၄၂
လုၵ်းၶၢၼ်း
၁ လိုၼ်းၼၼ်ႉ မၼ်းႁွင်ႉဢဝ်ၵဝ်ၸွမ်းသဵၼ်ႈတၢင်းၼႃႈတၢင်းႁွင်ႇၵႂႃႇၸူးၵႃႈၼႂ်းတမ်ႇတိူင်း ၵႃႈၼွၵ်ႈလႄႈဢဝ်ၵဝ်ႁွတ်ႈၵႃႈၼႂ်းလုၵ်း ဢၼ်ဝၢႆႇၼႃႈတေႃႇတီႈဢၼ်ပဝ်ႇဢၼ်လၢပ်ႈလႄႈ ဝၢႆႇၼႃႈတေႃႇႁိူၼ်းၵႃႈ တီႈၽၢႆႇတၢင်းႁွင်ႇၼၼ်ႉဢေႃႈ။
၂ ၵႃႈတီႈၽၢႆႇၼႃႈၼႃႈယၢဝ်းပၢၵ်ႇသွၵ်ႇၼၼ်ႉမီးၽၵ်းတူ ၼႃႈတၢင်းႁွင်ႇလႄႈ ၼႃႈပွတ်းမၼ်းမီးႁႃႈသိပ်းသွၵ်ႇဢေႃႈ။
၃ ၵႃႈတီႈဢၼ်တေႃႇၵၼ်သိုဝ်ႈၵၼ်တင်းသဝ်သွၵ်ႇ ဢၼ်ၸၢပ်ႈသႅင်ႇၵၼ်တင်းတမ်ႇတိူင်းဢၼ်ၵႃႈၼႂ်း ဢိၵ်ႇတင်းတေႃႇၵၼ်သိုဝ်ႈၵၼ်တင်းမၢၵ်ႇႁိၼ်သိူဝ်ႇ ဢၼ်ၸၢပ်ႈသႅင်ႇၵၼ်တင်းတမ်ႇတိူင်းဢၼ်ၵႃႈၼွၵ်ႈၼၼ်ႉမီးၸၼ်ႉ ႁၢၼ်ႉသၢမ်ႁၢၼ်ႉဢေႃႈ။
၄ ၵႃႈတီႈၽၢႆႇၼႃႈလုၵ်းၸိူဝ်းၼၼ်ႉမီးတီႈဢၼ်ၽၢႆႈသၢင်းၵျၢၼ်ႇဢၼ်ၵႂၢင်ႈသိပ်းသွၵ်ႇလႄႈ ၶဝ်ႈၵႂႃႇၽၢႆႇတၢင်းၼႂ်းၼၼ်ႉဢိၵ်ႇလူၺ်ႈၵၼ်တင်းသဵၼ်ႈတၢင်းဢၼ်ၵႂၢင်ႈသွၵ်ႇၼိုင်ႈဢေႃႈ။ၽၵ်းတူလုၵ်းၸိူဝ်းၼၼ်ႉ ဝၢႆႇၼႃႈၵႂႃႇတီႈၽၢႆႇတၢင်း ႁွင်ႇယူႇဢေႃႈ။
၅ လုၵ်းဢၼ်ၵႃႈၼိူဝ်ၸိူဝ်းၼၼ်ႉပဵၼ်ဢၼ်လဵၵ်ႉဢၼ်ၵဵပ်ႈဢေႃႈ။ၸၼ်ႉၶဝ်ၼၼ်ႉသုတ်ႉၶဝ်ႈယိုတ်းၶဝ်ႈလႄႈ ႁႂ်ႈၶဝ်လဵၵ်ႉၼႃႇသေၸၼ်ႉလုၵ်းဢၼ်ၵႃႈတႂ်ႈဢိၵ်ႇတင်းၸၼ်ႉလုၵ်းဢၼ်ၶိုင်ႈၵၢင်ၸိူဝ်း ၼၼ်ႉဢေႃႈ။
၆ လွင်ႈမၼ်းၸမ်းပိၵ်ႉသမ်ႉပဵၼ်သၢမ်ႁၢၼ်ႉသေၵေႃႈ ၶဝ်ဢမ်ႇမီးသဝ်မိူၼ်ၸိူဝ်ႉၼင်ႇသဝ်တီႈတမ်ႇတိူင်းၸိူဝ်းၼၼ်ႉ။ပိူဝ်ႈဢၼ်ပဵၼ်ၼင်ႇၼႆလႄႈဢၼ်ၵႃႈၼိူဝ်ယိင်ႈၶႅၼ်းၵႅပ်ႈသေဢၼ်ၵႃႈတႂ်ႈ ဢိၵ်ႇတင်း ဢၼ်ၶိုင်ႈၵၢင်ၼၼ်ႉဢေႃႈ။
၇ ၽႃဢၼ်မီးၵႃႈၼွၵ်ႈၵႃႈတီႈႁိမ်းလုၵ်းၸိူဝ်းၼၼ်ႉ ဢၼ်သိုဝ်ႈၵၼ်တင်းတမ်ႇတိူင်းဢၼ်ၵႃႈၼွၵ်ႈ ၵႃႈတီႈၽၢႆႇၼႃႈလုၵ်းၸိူဝ်းၼၼ်ႉ ဢၼ်ယၢဝ်းမၼ်းမီးႁႃႈသိပ်းသွၵ်ႇဢေႃႈ။
၈ လုၵ်းဢၼ်ၸၢပ်ႈသႅင်ႇၵၼ်တင်းတမ်ႇတိူင်း ဢၼ်ၵႃႈၼွၵ်ႈၸိူဝ်းၼၼ်ႉဢၼ်ယၢဝ်းမၼ်းမီးႁႃႈသိပ်းသွၵ်ႇဢေႃႈ။ဢၼ်ယၢဝ်းၵႃႈတီႈၽၢႆႇၼႃႈပိၵ်ႉမၢၼ်ႇၸဝ်ႈၼၼ်ႉ မီးပၢၵ်ႇ သွၵ်ႇဢေႃႈ။
၉ ၵႃႈတီႈတိၼ်လုၵ်းၸိူဝ်းၼႆႉမီးတၢင်းဢၼ်ၶဝ်ႈၸူးၵႃႈၼႂ်းၵႃႈတီႈ ၽၢႆႇၼႃႈတၢင်းဢွၵ်ႇၼၼ်ႉမိူဝ်ႈဢၼ်လုၵ်ႉသေၵႃႈတီႈတမ်ႇတိူင်းဢၼ်ၵႃႈၼွၵ်ႈ ၶဝ်ႈမႃးၼၼ်ႉဢေႃႈ။
၁၀ ၵႃႈၼႂ်းၼႃႈၽႃတမ်ႇတိူင်းဢၼ်မီးၽၢႆႇတၢင်းဢွၵ်ႇၵႃႈတီႈၽၢႆႇၼႃႈတီႈဢၼ်ပဝ်ႇဢၼ်လၢပ်ႈဢိၵ်ႇတင်း ၵႃႈတီႈၽၢႆႇၼႃႈႁိူၼ်းၼၼ်ႉ ၵေႃႈမီးလုၵ်းတင်းလၢႆဢေႃႈ။
၁၁ တီႈဢၼ်ၽၢႆႇသၢင်းၵျၢၼ်ႇဢၼ်မီးၵႃႈတီႈ ၽၢႆႇၼႃႈၶဝ်ၼၼ်ႉမိူၼ်ၸိူဝ်ႉၼင်ႇတီႈဢၼ်ၽၢႆႇသၢင်းၵျၢၼ်ႇ လုၵ်းၼႃႈတၢင်းႁွင်ႇၸိူဝ်းၼၼ်ႉလႄႈ ၸွမ်းလူၺ်ႈၼႃႈပွတ်းၶဝ်ၼႃႈယၢဝ်းၶဝ်သေလႄႈတီႈဢၼ်ၶဝ်ႈဢၼ်ဢွၵ်ႇၵႃႈမီးၼၼ်ႉၵေႃႈၸွမ်းလူၺ်ႈပုင်ႇႁၢင်ႊၶဝ် ဢိၵ်ႇတင်းၽၵ်းတူၶဝ် ၼၼ်ႉဢေႃႈ။
၁၂ ၽၵ်းတူလုၵ်းၼႃႈတၢင်းၸၢၼ်းၸိူဝ်းၼၼ်ႉၸမ်း မီးႁူးၽၵ်းတူႁူဝ်သဵၼ်ႈတၢင်းဢၼ်ဝႃႈသဵၼ်ႈတၢင်းဢၼ်သိုဝ်ႈ ၵႃႈတီႈၽၢႆႇၼႃႈၽႃဢၼ်တေႃႇၵၼ်သိုဝ်ႈၵၼ်တင်း ၼႃႈတၢင်းဢွၵ်ႇၼၼ်ႉမိူဝ်ႈဢၼ်ၶဝ်ႈၸူးၵႃႈၼႂ်းၶဝ်ၼၼ်ႉဢေႃႈ။
၁၃ မၼ်းၼၼ်ႉလၢတ်ႈတီႈၵဝ်လႄႈဝႃႈ၊-လုၵ်းၼႃႈတၢင်းႁွင်ႇဢိၵ်ႇတင်း လုၵ်းၼႃႈတၢင်းၸၢၼ်းဢၼ်ဝၢႆႇၼႃႈတေႃႇ တီႈဢၼ်ပဝ်ႇဢၼ်လၢပ်ႈယူႇၸိူဝ်းၼၼ်ႉပဵၼ်လုၵ်းဢၼ်မူတ်းၸၢင်ႇတီႈဢၼ်ယိတ်ႉပရေႃးႁိၵ်ႈဢၼ်လႆႈသုတ်ႉၸပ်းသုတ်ႉၸူး ၵႃႈတီႈထႃႇဝရႃႉၽြႃးၸိူဝ်းၼၼ်ႉလႆႈၵိၼ် လွင်ႈတၢင်းဢၼ်မူတ်းၸၢင်ႇၼႃႇလူင်လၢင်ၸိူဝ်းၼၼ်ႉဢေႃႈ။ ၵွပ်ႈပိူဝ်ႈဢၼ်ၵႃႈတီႈၼၼ်ႉပဵၼ်ဢၼ်မူတ်းၸၢင်ႇလႄႈ တၵ်းလႆႈဢဝ်လွင်ႈတၢင်းဢၼ်မူတ်းၸၢင်ႇၼႃႇလူင်လၢင် တင်းလၢႆဢိၵ်ႇတင်းၶိူင်ႈပုၵ်ႉၸေႃႇၽေႃးၸဵၼ်ႇ၊ ယိၸ်ႉဢၼ်ၽႄႇဢပျႅတ်ႈ၊ ယိၸ်ႉဢၼ်ၽႄႇတူႉၸရိူၵ်ႈၸိူဝ်းၼၼ်ႉဝႆႉ ၵႃႈတီႈၼၼ်ႉဢေႃႈ။
၁၄ မိူဝ်ႈဢၼ်ယိတ်ႈပရေႃးႁိၵ်ႈတင်းလၢႆၶဝ်ႈၼၼ်ႉၸိုင် ၶဝ်ဢမ်ႇလႆႈလုၵ်ႉသေၵႃႈတီႈဢၼ်မူတ်းၸၢင်ႇၼၼ်ႉ ဢွၵ်ႇၸူးၵႃႈတီႈတမ်ႇတိူင်းၵႃႈၼွၵ်ႈၶဝ်တၵ်းလႆႈဢဝ် ၶူဝ်းၼုင်ႈဢၼ်ၶဝ်ဢဝ်ပွင်ႁဵတ်းဢမူႉၸဝ်ႈၼၼ်ႉဝႆႉၵႃႈတီႈၼၼ်ႉ၊ ၵွပ်ႈပိူဝ်ႈဢၼ်ၶူဝ်းၼုင်ႈၼၼ်ႉပဵၼ်ဢၼ်မူတ်းၸၢင်ႇဢေႃႈ။တၵ်းလႆးၼုင်ႈၶူဝ်းၼုင်ႈတၢင်ႇၸိူဝ်ႉတၢင်ႇဢၼ်သေယဝ်ႉၸင်ႇ ဢွၵ်ႇၵႂႃႇၸူးၵႃႈတီႈဢၼ်ၵူၼ်းတင်းလၢႆမီးၼၼ်ႉဢေႃႈ၊ ဝႃႈၼင်ႇၼႆဢေႃႈ။
၁၅ လိုၼ်းသေဢၼ်မၼ်းတႅၵ်ႈတူၺ်းပိၵ်ႉမၢၼ်ႇၸဝ်ႈဢၼ်ၵႃႈ ၼႂ်းၼၼ်ႉယဝ်ႉၼၼ်ႉမၼ်းႁွင်ႉဢဝ်ၵဝ်ဢွၵ်ႇသေၵႃႈတီႈၼွၵ်ႈ ၸွမ်းသဵၼ်ႈတၢင်းၽၵ်းတူႈဢွၵ်ႇသေလႄႈ တႅၵ်ႈတူၺ်း ၵႃႈတီႈၸွမ်းႁိမ်းလဵပ်ႈႁွပ်ႈမၼ်း ဢေႃႈ။
၁၆ မၼ်းဢဝ်လႅမ်ႈမႆႉဢေႃႈဢၼ်တၵ်းတႅၵ်ႈၼၼ်ႉတႅၵ်ႈတူၺ်းၼႃႈၽၢႆႇဝၼ်းဢွၵ်ႇၼၼ်ႉလႄႈ ၸွမ်းႁိမ်း မၼ်းမီးႁႃႈပၢၵ်ႇတႅၵ်ႈလႅမ်ႈမႆႉဢေႃႈၼၼ်ႉဢေႃႈ။
၁၇ မၼ်းတႅၵ်ႈတူၺ်းၼႃႈၽၢႆႇတၢင်းႁွင်ႇၼၼ်ႉလႄႈ ၸွမ်းႁိမ်း မၼ်းမီးႁႃႈပၢၵ်ႇတႅၵ်ႈလႅမ်ႈမႆႉဢေႃႈၼၼ်ႉဢေႃႈ။
၁၈ မၼ်းတႅၵ်ႈတူၺ်းၼႃႈၸၢၼ်းၼၼ်ႉလႄႈ ၸွမ်းႁိမ်းမၼ်းမီး ႁႃႈပၢၵ်ႇတႅၵ်ႈလႅမ်ႈမႆႉဢေႃႈၼၼ်ႉဢေႃႈ။
၁၉ မၼ်းတႅၵ်ႈတူၺ်းၼႃႈၽၢႆႇဝၼ်းတူၵ်းၼၼ်ႉလႄႈ ၸွမ်းႁိမ်းမၼ်း မီးႁႃႈပၢၵ်ႇတႅၵ်ႈလႅမ်ႈမႆႉဢေႃႈၼၼ်ႉဢေႃႈ။
၂၀ မၼ်းတႅၵ်ႈတူၺ်းသီႇၼႃႈမၼ်းၼၼ်ႉလႄႈ မၼ်းၼၼ်ႉမီးတမ်ႇတိူင်းၵႃႈတီႈၸွမ်းႁိမ်းႁွမ်းမၼ်းယူႇ ႁႂ်ႈလႆႈၸၵ်းၽႄတီႈဢၼ်မူတ်းၸၢင်ႇဢိၵ်ႇတင်း တီႈဢၼ်ဢမ်ႇမူတ်းၸၢင်ႇယူႇသေလႄႈ ၼႃႈယၢဝ်းမၼ်းမီးႁႃႈပၢၵ်ႇတႅၵ်ႈ၊ၼႃႈပွတ်းမၼ်းမီးႁႃႈပၢၵ်ႇတႅၵ်ႈဢေႃႈ။