၂၂
ဢပျႅတ်ႈယေႇရုသလႅမ်ႈ
၁ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ် လႄႈဝႃႈၸမ်း၊-
၂ လုၵ်ႈၵူၼ်းဢိူၺ်း။မႂ်းတၵ်းၸႅတ်ႈထၢမ်ၸႅတ်ႈတူၺ်း ဝဵင်းဢၼ်ၸၢင်ႊထွၵ်ႇလိူတ်ႈၵူၼ်းပႅတ်ႈၼၼ်ႉႁိုဝ်။မႂ်းတၵ်းၸႅတ်ႈထၢမ်ၸႅတ်ႈတူၺ်းႁိုဝ်။ႁႂ်ႈမၼ်းႁူႉႁၼ်လွင်ႈတၢင်းဢၼ် လီႁင်ႈဢဵတ်ႇသဵတ်ႇ ၵႃႈဢၼ်မၼ်းႁဵတ်းၸိူဝ်းၼၼ်ႉတႃႉ။
၃ မႂ်းလၢတ်ႈလႄႈဝႃႈၸဝ်ႈထႃႇဝရႃႉၽြႃးမီးဢမိင်ႉၸမ်း၊-ပဵၼ်ဝဵင်းဢၼ်ၸၢင်ႊထွၵ်ႇလိူတ်ႈၵူၼ်း ၵႃႈၼႂ်းၵၢင်မၼ်းႁႂ်ႈၶိင်ႇမိူဝ်ႉဝၼ်းမၼ်းလႆႈႁွတ်ႈထိုင်လႄႈ ႁဵတ်းတူႉၸရိူၵ်ႈတင်းလၢႆပုၼ်ႈမၼ်းႁႂ်ႈတူဝ်မၼ်းလႆႈၵူဝ်ႈၵိူၵ်ႇလူင်ပေႇ။ မႂ်းႁွတ်ႈထိုင်ဢပျႅတ်ႈ ၵွပ်ႈပိူဝ်ႈလိူတ်ႈဢၼ်မႂ်းထွၵ်ႇပႅတ်ႈၼၼ်ႉလႄႈ မီးတၢင်းဢၼ်ၵူဝ်ႈၵိူၵ်ႇၵွပ်ႈပိူဝ်ႈရုၵ်ႉထူႉဢၼ် မႂ်းႁဵတ်းၸိူဝ်းၼၼ်ႉဢေႃႈ။
၄ တူဝ်မႂ်းႁႂ်ႈမိူဝ်ႉဝၼ်းမႂ်းႁွတ်ႈထိုင်လႄႈမႂ်းၶိုတ်းထိုင်ၸူဝ်ႈတႃႇၶူပ်ႇပီႊမႂ်းယဝ်ႉ။ပိူဝ်ႈဢၼ်ပဵၼ်ၼင်ႇၼၼ်လႄႈ ၵဝ်ႁႂ်ႈမႂ်းပဵၼ်တီႈဢၼ်သေႉသွမ်းတီႈၵူၼ်းၵူႈၸိူဝ်ႉၵူႈမဵဝ်း ဢိၵ်ႇတင်းတီႈဢၼ်ႁဵတ်းပျၢၵ်ႈၵႃႈၼႂ်းၵူႈသိုင်ႇၵူႈမိူင်းဢေႃႈ။
၅ ဝဵင်းဢၼ်သရေႇလူႉလႄႈလႆႈၶၢမ်ႇတၢင်းဢၼ်ယႃႉယူၵ်ႉဢိူၺ်း။ၶဝ်ၸိူဝ်းဢၼ်ယူႇၵႃႈတီႈဢၼ်ၸမ်ဢိၵ်ႇတင်း ၶဝ်ၸိူဝ်းဢၼ်ယူႇၵႃႈတီႈ ဢၼ်ၵႆတၵ်းဢွၼ်ၵၼ်ႁဵတ်းပျၢၵ်ႈတေႃႇ မႂ်းဢေႃႈ။
၆ တူၺ်းလူ။ၶုၼ်ဢိသရေႇလၸိူဝ်းၼၼ်ႉၸၢင်ႊ ဢွၼ်ၵၼ်ထွၵ်ႇလိူတ်ႈၵူၼ်းပႅတ်ႈ ၵႃႈၼႂ်းမႂ်းၸွမ်းၵႃႈၼင်ႇဢၼ် မီးဢၶႂၢင်ႉတၼ်းၶူဝ်းၼၼ်ႉႁင်းၽႂ်ႁင်းမၼ်းဢေႃႈ။ၶဝ်ၸၢင်ႊဢွၼ်ၵၼ်ႁဵတ်းဢမ်ႇပေႃးၼင်ႇႁိုဝ်တီႈပေႃႈၶဝ်မေႈၶဝ်ၵႃႈၼႂ်းၵၢင်မႂ်းလႄႈ ၸၢင်ႊဢွၼ်ၵၼ်ၼိၵ်ႈၸၢၵ်ႈငႅၼ်းသေးၵူၼ်းတင်းဝၢၼ်ႈ တင်းမိူင်းၵႃႈၼႂ်းၵၢင်မႂ်းဢေႃႈ။
၇ ၶဝ်ၸၢင်ႊဢွၼ်ၵၼ်ႁဵတ်းဢမ်ႇတြႃးတီႈၵေႃႉဢၼ်ဢမ်ႇမီးပေႃႈမီးမေႈဢိၵ်ႇတင်း မေႈမုၵ်ႉမေႈမၢႆႈတင်းလၢႆ ၵႃႈၼႂ်းၵၢင်မႂ်းဢေႃႈ။
၈ မႂ်းႁိတ်းဢမ်ႇပေႃးၼင်ႇႁိုဝ်တီႈလွင်ႈတၢင်းဢၼ်မူတ်းၸၢင်ႇၵဝ်တင်းလၢႆလႄႈ ၶျႃးဝၼ်းၵမ်သိၼ် ၵဝ်တင်းလၢႆတူၵ်းတီႈတႅမ်ႇယဝ်ႉ။
၉ ၶဝ်ၸိူဝ်းဢၼ်ၶႃႉၸိုဝ်ၶၢႆသဵင်ႁႂ်ႈလႆႈထွၵ်ႇလိူတ်ႈၵူၼ်းပႅတ်ၼၼ်ႉ မီးယူႇၵႃႈၼႂ်းမႂ်းလႄႈ ၶဝ်ၸိူဝ်းဢၼ်ၵိၼ်ၵႃႈၼိူဝ်လွႆၼိူဝ်ၵုင်းၼၼ်ႉမီးယူႇၵႃႈၼႂ်းမႂ်း၊ ၶဝ်ၸိူဝ်းဢၼ်ႁဵတ်းဢမူႉဢႃႉထမ်ႇမႃႉ ၼၼ်ႉၵေႃႈမီးယူႇၵႃႈၼႂ်းမႂ်းဢေႃႈ။
၁၀ ၶဝ်ဢွၼ်ၵၼ်ႁဵတ်းတၢင်းဢၼ်ၽုၺ်ႇပိုတ်ႇၶူဝ်းလဵင်းပေႃႈၶဝ် ၵႃႈၼႂ်းမႂ်းလႄႈ ဢွၼ်ၵၼ်ၽိတ်းပိူင်ႈမေႈယိင်းဢၼ်ႁွတ်ႈဢူႉတူႉ ဢမ်ႇမူတ်းသႂ်ၼၼ်ႉၵႃႈၼႂ်းမႂ်းဢေႃႈ။
၁၁ ၵမ်ႈၽွင်ႈဢွၼ်ၵၼ်ၽိတ်းပိူင်ႈမႄးၵူၼ်းႁိူၼ်းၸမ်ၵၼ်၊ၵမ်ႈၽွင်ႈဢွၼ်ၵၼ်ႁဵတ်းဢမူႉဢၼ်ႁၢႆႉယုတ်ႈ လူၺ်ႈၵၼ်တင်းလုၵ်ႈပႂ်ႉၶဝ်၊ ၵမ်ႈၽွင်ႈဢွၼ်ၵၼ်ၶျႃးၼွင်ႉယိင်းၶဝ်ဢၼ်ဝႃႈလုၵ်ႈယိင်းပေႃႈၶဝ်ၼၼ်ႉတူၵ်းတီႈတႅမ်ႇၵႃႈၼႂ်း မႂ်းဢေႃႈ။
၁၂ ၶဝ်ဢွၼ်ၵၼ်ၶၢမ်ႇဢဝ်ၵႃႈၶၼ်ဢၼ်ထွၵ်ႇလိူတ်ႈၵူၼ်းပႅတ်ႈၼၼ်ႉၵႃႈၼႂ်းမႂ်းဢေႃႈ။ မႂ်းၵိၼ်ဢတူဝ်းၶီႈမၼ်း ဢိၵ်ႇတင်းဢမႅတ်ႈမၼ်းသေလႄႈႁဵတ်းတၢင်းဢၼ်ၼိၵ်ႈၸၢၵ်ႈငႅၼ်းသေးသေလႄႈ ႁိပ်ႈၼႅတ်ႈႁိမ်ဢဝ်ႁူင်ႇဢဝ်ဢုၵ်ႉၸႃႇ ၵူၼ်းႁိူၼ်းၸမ်ၵၼ်တင်းမႂ်းဢေႃႈ။ၵဝ်ၵေႃႈမႂ်းလူင်လိုမ်းပႅတ်ႈယဝ်ႉ၊ဝႃႈၼင်ႇၼႆၸဝ်ႈထႃႇဝရႃႉၽြႃးမီးဢမိင်ႉဢေႃႈ။
၁၃ တူၺ်းလူ။ပိူဝ်ႈဢၼ်ပဵၼ်ၼင်ႇၼႆလႄႈ ၵဝ်တူပ်းမိုဝ်းၵဝ်ၵွပ်ႈပိူဝ်ႈဢုၵ်ႉၸႃႇဢၼ်မႂ်းႁႃဢဝ်သိမ်းပႅင်းဝႆႉ ဢိၵ်ႇတင်းလိူတ်ႈဢၼ်ထွၵ်ႇပႅတ်ႈၵႃႈၼႂ်းၵၢင်မႂ်းၼၼ်ႉ ဢေႃႈ။
၁၄ ၼႂ်းမိူဝ်ႉဝၼ်းဢၼ်ၵဝ်ၸီႇယၢင်ႇမႂ်းၼၼ်ႉႁူဝ်ၸႂ်မႂ်းတၵ်းမၼ်ႈၶိူင်ႇလႆႈႁိုဝ်။မိုဝ်းမႂ်းၵေႃႈႁႅင်း ယႂ်ႇလႆႈႁိုဝ်။ၵဝ်ထႃႇဝရႃႉၽြႃးၼႆႉမီးဢမိင်ႉဝႆႉယဝ်ႉလႄႈ တၵ်းႁဵတ်း ၸွမ်းဢေႃႈ။
၁၅ ၵဝ်တၵ်းဢဝ်မႂ်းၸၢတ်ႇပိုၼ်ပႅတ်ႈၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းလႄႈ ႁႂ်ႈႁွတ်ႈထိုင်ၵႃႈၼႂ်းၵူႈသိုင်ႇၵူႈမိူင်းဢေႃႈ။ၵဝ်တၵ်းပႄႇၽဵဝ်ႈဢၼ်ဝူၺ်ႇဢၼ်ႁင်ႈ မႂ်းပႅတ်ႈသေၵႃႈၼႂ်းမႂ်းဢေႃႈ။
၁၆ မႂ်းတၵ်းလႆႈၶၢမ်ႇတၢင်းဢၼ်တူဝ်မႂ်းၶျႃးသရေႇတူဝ်မႂ်း တူၵ်းတီႈတႅမ်ႇသိုဝ်ႈၼႃႈတႂ်ႈတႃၵူၼ်းၵူႈၸိူဝ်ႉၵူႈမဵဝ်းလႄႈ မႂ်းတၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
၁၇ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ် လႄႈဝႃႈၸမ်း၊-
၁၈ လုၵ်ႈၵူၼ်းဢိူၺ်း။မဵဝ်းဢိသရေႇလပဵၼ်ၶီႈပဵၼ်ဝၢၵ်ႇၵႂႃႇတီႈၵဝ်ယဝ်ႉ။ၶဝ်ၵႃႈမီးပဵၼ်တွင်းလိူင်၊လဵၵ်းၽိူၵ်ႇ၊လဵၵ်း၊ၸိုင်း ၵႃႈၼႂ်းၵွၵ်းမိူင်ႈၼၼ်ႉလႄႈ ၶီႈငိုၼ်းဝၢၵ်ႇငိုၼ်းၵေႃႈပဵၼ်ဢေႃႈ။
၁၉ ပိူဝ်ႈဢၼ်ပဵၼ်ၼင်ႇၼၼ်လႄႈၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵွပ်ႈပိူဝ်ႈဢၼ်သူၵႃႈမီးပဵၼ်ၶီႈဝၢၵ်ႇၵႂႃႇလႄႈ ၵဝ်တၵ်းႁႂ်ႈသူၸူႉၵၼ်တုမ်ၵၼ်ၵႃႈၼႂ်းဝဵင်းယေႇရုသလႅမ်ႇဢေႃႈ။
၂၀ မိူၼ်ၸိူဝ်ႉၼင်ႇဢၼ်ၵူၼ်းၸူႉသိမ်းငိုၼ်း၊တွင်းလိူင်၊လဵၵ်း၊ၸိုၼ်း၊လဵၵ်းၽိူၵ်ႇသႂ်ႇဝႆႉၵႃႈၼႂ်းၵွၵ်းမိူင်ႈႁႂ်ႈလႆႈပဝ်ႇၽႆးထူဝ်းၽႆးလႄႈဢွင်ႇမၼ်း ၸိုမ်းၼၼ်ႉၵဝ်တၵ်းပႃးတင်းၶႂ်ႈၸႃႉၶႂ်ႈၸိတ်ႈ ဢိၵ်ႇတင်းဢၢႆႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၼႃႇလူင်လၢင်သေလႄႈ ဢဝ်သူၸူႉ သိမ်း သႂ်ႇဝႆႉၵႃႈၼႂ်းဝဵင်းလႄႈဢွင်ႇသူၸိုမ်းဢေႃႈ။
၂၁ ဢဝ်သူၸူႉသိမ်း သႂ်ႇဝႆႉသေယဝ်ႉ ၵဝ်တၵ်းပဝ်ႇၽႆးထူဝ်းၽႆးတၢင်းၸႂ်မႆႈၶႂ်ႈၸႃႉၵဝ်လႄႈ သူတၵ်းလႆႈၶၢမ်ႇတၢင်း ဢၼ်ဢွင်ႇၸိုမ်းပႅတ်ႈၵႃႈၼႂ်းဝဵင်းၼၼ်ႉဢေႃႈ။
၂၂ ၸိူဝ်ႉၼင်ႇဢၼ်ဢွင်ႇငိုၼ်းၸိုမ်း ၵႃႈၼႂ်းၵွွၵ်းမိူင်ႈၼၼ်ႉသူတၵ်းလႆႈၶၢမ်ႇ တၢင်းဢၼ်ဢွင်ႇၸိုမ်း ၵႃႈၼႂ်းဝဵင်းလႄႈ ႁူႉလွင်ႈဢၼ် ၵဝ်ထႃႇဝရႃႉၽြႃးဢဝ်ဢၢႆႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ် သွၼ်းလေႃႇၵႃႈၼိူဝ်သူၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၃ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်လႄႈဝႃႈၸမ်း၊-လုၵ်ႈၵူၼ်းဢိူၺ်း။မႂ်းလၢတ်ႈတီႈမၼ်းလႄႈဝႃႈ၊-
၂၄ မႂ်းပဵၼ်မိူင်းဢၼ်ဢမ်ႇလႆႈၶၢမ်ႇတၢင်းဢၼ်မူတ်းသႂ်၊ မိူင်းဢၼ်ၽူၼ်ဢမ်ႇတူၵ်းၼႂ်းမိူဝ်ႉဝၼ်းဢၼ် တၢင်းၸႂ်မႆႈၶႂ်ႈၸႃႉဢွၵ်ႇၼၼ်ႉဢေႃႈ။
၂၅ ၵႃႈၼႂ်းၶိုင်ႈၵၢင်မၼ်းၼၼ်ႉ မီးတၢင်းဢၼ် ပရေႃးၽႅတ်ႈတင်းလၢႆဢွၼ်ၵၼ်ႁဵတ်းမုၵ်ႉႁဵတ်းၸိူဝ်းယူႇ မိူၼ်ၸိူဝ်ႉၼင်ႇသၢင်ႇသီႈဢၼ်ႁွင်ႉလႄႈ ၶူပ်းၵိၼ်တူဝ်ၼၼ်ႉလႄႈၶဝ်ဢွၼ်ၵၼ်ၶူပ်းၵိၼ်ဢသၢၵ်ႈဝိၺိၺ်ႇတင်းလၢႆယူႇဢေႃႈ။ၶဝ်ဢွၼ်ၵၼ်ႁိမ်ဢဝ်ႁူင်ႇဢဝ်ၽၼ်ႇတႃႇ ဢိၵ်ႇတင်းဢုၵ်ႉၸႃႇဢၼ်ထိူၵ်ႈၵႃႈထိူၵ်ႈၶၼ်တင်းလၢႆယူႇလႄႈ ၶဝ်ဢွၼ်ၵၼ်ႁႂ်ႈမေႈမုၵ်ႉမေႈမၢႆႈၼမ်ၼႃႇ ၵႃႈၼႂ်းၵၢင်မၼ်း ဢေႃႈ။
၂၆ ယိတ်ႉပရေႃးႁိၵ်ႈမၼ်းတင်းလၢႆၵေႃႈဢွၼ်ၵၼ်ယႃႉတြႃးၵဝ်လႄႈ ႁႂ်ႈထႃႇၼႃႉတီႈဢၼ်မူတ်းၵဝ်တင်းလၢႆၵူဝ်ႈၵိူၵ်ႇဢေႃႈ။ၶဝ်ဢမ်ႇႁႂ်ႈလွင်ႈတၢင်းဢၼ်မူတ်းၸၢင်ႇ လႂ် လွင်ႈတၢင်းဢၼ်ဢမ်ႇမူတ်းၸၢင်ႇ လႂ်ပႅၵ်ႇပိူင်ႈၵၼ်လႄႈ ဢမ်ႇႁႂ်ႈၵူၼ်းတင်းလၢႆၸၵ်းၽႄလႄႈလွင်ႈတၢင်းဢၼ်မူတ်း သႂ်ႇ လႂ်၊ လွင်ႈတၢင်းဢၼ်ဢမ်ႇမူတ်းသႂ် လႂ်ၼၼ်ႉၶဝ်ဢွၼ်ၵၼ်ဝၢႆႇၼႃႈဝၢႆႇတႃၶဝ်ပႅတ်ႈဝၼ်းၵမ်သိၼ်ၵဝ်တင်းလၢႆလႄႈၵဝ်လႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇၵႃႈၼႂ်းၶိုင်ႈၵၢင်ၶဝ် ဢေႃႈ။
၂၇ ၶုၼ်မၼ်းတင်းလၢႆၵေႃႈပဵၼ်ၸိူဝ်ႉၼင်ႇမႃလိၼ်ဢၼ်ၶူပ်းၵိၼ်တူဝ်တင်းလၢႆၼၼ်ႉၵႃႈၼႂ်းၶိုင်ႈၵၢင်မၼ်းလႄႈ ႁဵတ်းႁႂ်ႈလႆႈထွၵ်ႇလိူတ်ႈၵူၼ်းပႅတ်ႈလႄႈယႃႉၽဵဝ်ႈဝိၺိၺ်ႇပိူၼ်ႈပႅတ်ႈယူႇ ႁႂ်ႈလႆႈႁႃဢဝ်တၢင်းဢၼ်ပဵၼ်တိုၼ်းပဵၼ်ႁွၼ်းဢၼ်ဢမ်ႇတြႃးၼၼ်ႉ ဢေႃႈ။
၂၈ ပိၵ်ႉသမ်ႉထႃႇဝရႃႉၽြႃးဢမ်ႇမီးဢမိင်ႉသေၵေႃႈပရေႃးၽႅတ်ႈမၼ်းတင်းလၢႆ ႁၼ်လွင်ႈတၢင်းဢၼ်လၢႆလၢႆဢမ်ႇပွင်ႇလွင်ႈၵႃႈသင်လႄႈ ႁေႃးလၢတ်ႈၵႂၢမ်းမူႉသႃႇတီႈၶဝ်လႄႈဝႃႈ ၸဝ်ႈထႃႇဝရႃႉၽြႃးမီးဢမိင်ႉယဝ်ႉ၊ဝႃႈၼင်ႇၼႆယူႇသေလႄႈ ဢွၼ်ၵၼ်ဢဝ်တင်း ဢၢင်းၵတေႇဢုမ်ႇႁေႃႇႁၢင်ႊၶိူင်ႈၶဝ်ၼၼ်ႉဢေႃႈ။
၂၉ ၵူၼ်းဝၢၼ်ႈၵူၼ်းမိူင်းတင်းလၢႆၵေႃႈ ဢွၼ်ၵၼ်ႁဵတ်းတၢင်းဢၼ်ၼိၵ်ႈၸၢၵ်ႈငႅၼ်းသေး၊ တၢင်းဢၼ်ၸူၼ်ဢဝ်တိုၵ်းဢဝ်ၼၼ်ႉလႄႈ တဵၵ်းၼႅၼ်ႉၵႅၼ်ႉၶေႃးႁဵတ်းႁၢႆႉတီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်၊ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉယူႇသေလႄႈ ႁဵတ်းတၢင်းဢၼ်ၼိၵ်ႈၸၢၵ်ႈငႅၼ်းသေးဢၼ်ဢမ်ႇတြႃးတီႈ ၵူၼ်းတၢင်ႇၸိူဝ်ႉတၢင်ႇမဵဝ်းဢေႃႈ။
၃၀ ၵဝ်ႁႃဢဝ်ၵေႃႉဢၼ်တၵ်းတေႁဵတ်းလမ်းဝဵင်း ၵေႃႉဢၼ်ၸုၵ်းယူႇၵႃႈၼႂ်းႁူးၵူင်ပွင်ႇလမ်းဝဵင်းၵႃႈတီႈၽၢႆႇၼႃႈၵဝ်သေလႄႈ ႁႂ်ႈႁႄႉၶႅၼ်ပုၼ်ႈဝဵင်းၼၼ်ႉ ႁႂ်ႈၵဝ်ဢမ်ႇလႆႈယႃႉၽဵဝ်ႈမိူင်းၼၼ်ႉပႅတ်ႈသေၵေႃႉသေၵူၼ်းလႄႈ ဢမ်ႇထူပ်းဢမ်ႇႁၼ်၊ပိူဝ်ႈ ဢၼ်ပဵၼ်ၼင်ႇၼၼ်လႄႈ
၃၁ ၵဝ်တၵ်းဢဝ်တၢင်းၸႂ်မႆႈၶႂ်ႈၸႃႉၵဝ်သွၼ်းလေႃႇၵႃႈၼိူဝ်ၶဝ်ယူႇသေလႄႈဢဝ်ႆးတေႃးသႃႉၵဝ်ႁုပ်ႇမႅၼ်ႈၶဝ်လႄႈ ႁႂ်ႈဢပျႅတ်ႈၶဝ်တူၵ်းႁွတ်ႈၵႃႈၼိူဝ်ႁူဝ်ၶဝ်ဢေႃႈ၊ဝႃႈၼင်ႇၼႆ၊ ၸဝ်ႈထႃႇဝရႃႉၽြႃးမီးဢမိင်ႉဝႆႉယဝ်ႉ၊ ဝႃႈၼင်ႇတႃႉ၊ ဝႃႈၼင်ႇၼႆဢေႃႈ။