၃၂
ပွင်ႉမိုၼ်ပွင်ႉၶင်းပုၼ်ႈၶုၼ်ၽႃႇရေႃး
၁ ၼႂ်းပီႊဢၼ်ထူၼ်ႈထိုင်သိပ်းပၢႆသွင်ပီႊ လိူၼ်သိပ်းသွင်ဝၼ်းၼိုင်ႈ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်လႄႈဝႃႈၸမ်း၊-
၂ လုၵ်ႈၵူၼ်းဢိူၺ်း။မႂ်းႁဵတ်းတၢင်းဢၼ်ပွင်ႉၶင်းပွင်ႉမိုၼ်ပုၼ်ႈၽႃႇရေႃးၶုၼ်ႁေႃၶမ်းဢေႇၵႅပ်ႉတု သေလႄႈလၢတ်ႈတီႈမၼ်းလႄႈဝႃႈ၊-မႂ်းၼႆႉပဵၼ်ၸိူဝ်ႉၼင်ႇသၢင်ႇသီႈၼုမ်ႇ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းလႄႈ ပဵၼ်ၸိူဝ်ႉၼင်ႇငိူၵ်ႈဢၼ်ယူႇၵႃႈၼႂ်းၼမ်ႉၼႂ်းၼွင်လႄႈ ယဵပ်ႇၶၢမ်ႈၼမ်ႉႁွင်ႈၼမ်ႉၵႄးတင်းလၢႆယူႇ၊ ဢဝ်တိၼ်ႁဵတ်းႁႂ်ႈၼမ်ႉတူင်ႉၼိုင်ယူႇ၊ ႁဵတ်းၼမ်ႉၶုၼ်ႇၼမ်ႉဢူၼ်ယူႇၼၼ်ႉဢေႃႈ။
၃ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵဝ်တၵ်းပႃးမဵဝ်းၵူၼ်းတင်းလၢႆ ဢၼ်ၸူႉၵၼ်တုမ်ၵၼ်ၼၼ်ႉသေလႄႈဢဝ်ၼႅင်ႈၶႄႁူမ်ႇသုမ်ႇမႂ်းလႄႈ ၶဝ်ၼၼ်ႉတၵ်းဢွၼ်ၵၼ်တိုတ်ႉၸၼ်ဢဝ်မႂ်းပႃးမႃးၵႃႈၼႂ်းၼႅင်ႈၶႄၵဝ် ဢေႃႈ။
၄ ၵဝ်တၵ်းဢဝ်မႂ်းတၢင်ႇဝႆႉၵႃႈၼိူဝ်ၵုင်းလႄႈပႅတ်ႈမႂ်းဝႆႉၵႃႈတီႈၼွၵ်ႈတီႈပၢင်ႇဢေႃႈ။တၵ်းႁႂ်ႈၼူၵ်ႉၵၢင်ႁၢဝ်တင်းသဵင်ႈတင်းလူင်ၸပ်းၵႃႈၼိူဝ်မႂ်းလႄႈ ဢဝ်မႂ်းဢွႆႇပၼ်တူဝ်လိၼ်မိူင်းတင်းသဵင်ႈတင်းလူင် ဢိမ်ႇဢိမ်ႇ တဵမ်တဵမ်ဢေႃႈ။
၅ ၵဝ်တၵ်းဢဝ်ၼိူဝ်ႉမႂ်းၽႄႇသိူဝ်ႇဝႆႉၵႃႈၼိူဝ်လွႆၼိူဝ်ၵုင်းလႄႈ တၵ်းႁႂ်ႈပၢင်ႇႁူၺ်ႈၶူင်ႈႁူၺ်ႈမီး တဵမ်ဝႆႉတင်းတူဝ် ယႂ်ႇတူဝ်လူင်မႂ်းဢေႃႈ။
၆ ၵဝ်တၵ်းႁႂ်ႈလိၼ် ယမ်းလူၺ်ႈလိူတ်ႈမႂ်း တေႃႇထိုင်ႁွတ်ႈပၢႆလွႆၸိၵ်းလွႆလႄႈ ၼမ်ႉႁွင်ႊၼမ်ႉၵႄးၸိူဝ်းၼၼ်ႉတၵ်းဢွၼ်ၵၼ်လူၼ်ႉတဵမ်ဝႆႉတင်းမႂ်းဢေႃႈ။
၇ မိူဝ်ႈဢၼ်ၵဝ်ႁႂ်ႈမႂ်းသုမ်းၸွမ်းၼၼ်ႉၸိုင် ၵဝ်တၵ်းႁူမ်ႇသုမႃ်ႇႉၵၢင်ႁၢဝ်လႄႈလၢဝ်တင်းလၢႆလပ်းသိင်ႇဢေႃႈ။ၵဝ်တၵ်းႁႂႃ်ႈႉမိုတ်းတီႈၵၢင်ဝၼ်းလႄႈ လိူၼ်ၵေႃႈ ဢမ်ႇလႆႈပၼ်ဢၼ် လႅင်းမၼ်း။
၈ ၵဝ်တၵ်းႁႂ်ႈႁိူၼ်းလႅင်းၵႃႈၼိူဝ်ၾႃႉၵၢင်ႁၢဝ်ၵႃႈမီးၼၼ်ႉလပ်းသိင်ႇၵွပ်ႈပိူဝ်ႈမႂ်းလႄႈ ဢဝ်လပ်းသိင်ႇသုမ်ႇႁူမ်ႇမိူင်းမႂ်းဢေႃႈ၊ဝႃႈၼင်ႇၼႆၸဝ်ႈထႃႇဝရႃႉ ၽြႃးမီးဢမိင်ႉဢေႃႈ။
၉ မိူဝ်ႈဢၼ်ၵဝ်ႁႂ်ႈလွင်ႈဢၼ်မႂ်းလူႉလႅဝ်ၼၼ်ႉ ႁွတ်ႈထိုင်ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းၵႃႈၼႂ်းၵူႈသိုင်ႇၵူႈမိူင်း ဢၼ်မႂ်းဢမ်ႇတွၼ်ႉယၢမ်ႈႁူႉၼၼ်ႉၸိုင် ၵဝ်တၵ်းႁႂ်ႈမဵဝ်းၵူၼ်းၼမ်ၼႃႇမႆႈၸႂ်ႁွၼ်ႉၸႂ်ဢေႃႈ။
၁၀ ၵဝ်တၵ်းႁႂ်ႈမဵဝ်းၵူၼ်းၼမ်ၼႃႇၵႂင်ၸႂ်ယုင်ႈၸႂ်ၵွပ်ႈပိူဝ်ႈမႂ်းလႄႈ ၶုၼ်ႁေႃၶမ်းၶဝ်ၼၼ်ႉတၵ်းဢွၼ်ၵၼ်တူၵ်းၸႂ်ၼႃႇလူင်လၢင်ၵွပ်ႈပိူဝ်ႈ မႂ်းၼႂ်းမိူဝ်ႈဢၼ်ၵဝ်ဢဝ်လၢပ်ႇလႅဝ်းၵဝ်ငႃၵႃႈတီႈၽၢႆႇၼႃႈၶဝ်ၼၼ်ႉဢေႃႈ။ၼႂ်းမိူဝ်ႉဝၼ်းဢၼ်မႂ်းတူၵ်းသုမ်းတူၵ်းၸွမ်းၼၼ်ႉ ၶဝ်ၼၼ်ႉတၵ်းဢွၼ်ၵၼ်သၼ်ႇၶွၼ်းဝႆယူႇ ၵူႈၸူဝ်ႈၵူႈၵႅပ်ႉၵွပ်ႈပိူဝ်ႈဢသၢၵ်ႈၶဝ်ႁင်းၽႂ်ႁင်းမၼ်းဢေႃႈ၊ဝႃႈၼင်ႇၼႆဢေႃႈ။
၁၁ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-လၢပ်ႇလႅဝ်းၶုၼ်ႁေႃၶမ်းပႃႇပုလုၼ်ႇၼၼ်ႉ တၵ်းႁွတ်ႈထိုင်ၵႃႈၼိူဝ်မႂ်းဢေႃႈ။
၁၂ ၵဝ်တၵ်းႁႂ်ႈၵူၼ်းမႂ်းဢၼ်ၼမ်ၼႃႇဢၼ်ဝႃႈၵူၼ်းမဵဝ်း ဢၼ်လီၵူဝ်လီႁႄၵႃႈမီးၼၼ်ႉလူမ်ႉတၢႆလူၺ်ႈလၢပ်ႇလူၺ်ႈလႅဝ်း ၶဝ်ၸိူဝ်းဢၼ်ႁႅင်း ယႂ်ႇၼႃႇၼၼ်ႉဢေႃႈ။ၶဝ်ၼၼ်ႉတၵ်းဢွၼ်ၵၼ်ၶျႃးမႃႉၼႃႉၸႂ်သုင်ဢေႇၵႅပ်ႉတုတူၵ်းတီႈတႅမ်ႇလႄႈ ၵူၼ်းဝၢၼ်ႈၵူၼ်းမိူင်းမၼ်းဢၼ်ၼမ်ၼႃႇၵႃႈမီးၼၼ်ႉ တၵ်းလႆႈၶၢမ်ႇ တၢင်းဢၼ်ယႃႉၽဵဝ်ႈပႅတ်ႈဢေႃႈ။
၁၃ ၵဝ်တၵ်းပႄႇၽဵဝ်ႈပႅတ်ႈတရိၵ်ႈသၢၼ်ႇ ၵႃႈဢၼ်ၵိၼ်ယူႇၵႃႈတီႈႁိမ်းၼမ်ႉဢၼ်ၼမ်ၼႃႇၼၼ်ႉၸိူဝ်းၼၼ်ႉလႄႈၵမ်းလိုၼ်းတိၼ်ၵူၼ်းဢိၵ်ႇတင်းတိၼ်တရိၵ်ႈသၢၼ်ႇဢမ်ႇလႆႈ ႁဵတ်းႁႂ်ႈၼမ်ႉၼၼ်ႉပဵၼ်ဢၼ်ၶုၼ်ႇဢၼ်ဢူၼ်။
၁၄ မိူဝ်ႈၼၼ်ႉၵဝ်တၵ်းႁႂ်ႈၼမ်ႉၸိူဝ်းၼၼ်ႉ သႂ်လီလႄႈႁႂ်ႈၼမ်ႉႁွင်ႊၼမ်ႉၵႄးၸိူဝ်းၼၼ်ႉ လႆၵႂႃႇမိူၼ်ၸိူဝ်ႉၼင်ႇၼမ်ႉမၼ်းၼၼ်ႉဢေႃႈ၊ ဝႃႈၼင်ႇၼႆၸဝ်ႈထႃႇဝရႃႉၽြႃး မီးဢမိင်ႉဢေႃႈ။
၁၅ မိူဝ်ႈဢၼ်ၵဝ်ႁႂ်ႈမိူင်းဢေႇၵႅပ်ႉတုပဵၼ်မိူင်းဢၼ်သိတ်ႇဢၼ်ယဵၼ် ဢၼ်လူႉဢၼ်လႅဝ်မိူင်းဢၼ်ဢုၵ်ႉၸႃႇ ၵႃႈဢၼ်မီးၵႃႈၼႂ်းမၼ်းသဵင်ႈၵႂႃႇမူတ်းၵႂႃႇယဝ်ႉၼၼ်ႉ၊ မိုဝ်းဢၼ်ၵဝ်ပၼ်တၢမ်ႇတီႈၵူၼ်းဝၢၼ်ႈၵူၼ်းမိူင်းၵႃႈမီးၼၼ်ႉၸိုင် ၶဝ်တၵ်းလႆႈႁူႉလွင်ႈဢၼ်ၵဝ် ပဵၼ်ထႃႇဝရႃႉၽြႃးၼၼ်ႉဢေႃႈ။
၁၆ ဢၼ်ၼႆႉၸမ်းပဵၼ်တၢင်းဢၼ်ပွင်ႉၶင်းပွင်ႉမိုၼ် ဢၼ်ဢဝ်ၶဝ်တင်းလႆႈပွင်ႉၶင်းပွင်ႉမိုၼ်ဢေႃႈ။လုၵ်ႈယိင်းၵူၼ်းၵူႈၸိူဝ်ႉၵူႈမဵဝ်းၸိူဝ်းၼၼ်ႉၵေႃႈတၵ်းဢွၼ်ၵၼ်ဢဝ် ပွင်ႉၶင်းပွင်ႉမိုၼ်လႄႈဢွၼ်ၵ ၼ်ပွင်ႉၶင်းပွင်ႉမိူၼ်ပုၼ်ႈမိူင်းဢေႇၵႅပ်ႉတုဢိၵ်ႇတင်း ၵူၼ်းဝၢၼ်ႈၵူၼ်းမိူင်းမၼ်းဢၼ်ၼမ်ၼႃႇၵႃႈမီးၼၼ်ႉဢေႃႈ။ထႃႇဝရႃႉၽြႃးမီးဢမိင်ႉဝႆႉယဝ်ႉ၊ ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၇ ၼႂ်းပီႊဢၼ်ထူၼ်ႈထိုင် သိပ်းပီႊသိပ်းပၢႆႁႃႈဝၼ်းၼၼ်ႉၼုၵ်ႉၵပၢတ်ႈထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈ ၸမ်း၊-
၁၈ လုၵ်ႈၵူၼ်းဢိူၺ်း။မႂ်းႁဵတ်းတၢင်းဢၼ်ပွင်ႉၶင်းပွင်ႉမိုၼ်ပုၼ်ႈၵူၼ်း မိူင်းဢေႇၵႅပ်ႉတု ဢၼ်ၼမ်ၼႃႇၼၼ်ႉလႄႈ ဢဝ်ၶဝ်ဢၼ်ဝႃႈမၼ်းဢိၵ်ႇလူၺ်ႈၵၼ်တင်း လုၵ်ႈယိင်းၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ႁူင်ႁၢင်းၸိူဝ်းၼၼ်ႉ ၶျႃးတူၵ်းတေႃႇထိုင်ႁွတ်ႈၵႃႈတီႈတႂ်ႈလိၼ်တီႈဢၼ် ၶဝ်ၸိူဝ်းဢၼ်လူင်းၵႂႃႇ ၵႃႈၼႂ်းႁူး လိၼ်ၶုမ်လိၼ်ၸိူဝ်းၼၼ်ႉတႃႉ။
၁၉ ဢၼ်မႂ်းတၵ်းလႆႈဢွၵ်ႇသူပ်းလႄႈဝႃႈၸမ်း၊- မႂ်းၼႆႉယိင်ႈၶႅၼ်းႁၢင်ႊလီလိူဝ်တွၼ်းၼႃႇသေၽူႈ လႂ်။မႂ်းလုၵ်ႉၵႂႃႇလႄႈတူၵ်းတီႈယူႇတီႈသဝ်း လူၺ်ႈၵၼ်တင်းၶဝ်ၸိူဝ်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းၼၼ်ႉတႃႉ။
၂၀ ၶဝ်တၵ်းလႆႈလူမ်ႉတၢႆလူၺ်ႈၵၼ်တင်း ၶဝ်ၸိူဝ်းဢၼ်တၢႆလူၺ်ႈလၢပ်ႇလူၺ်ႈလႅဝ်းၼၼ်ႉလႄႈ မၼ်းလႆႈၶၢမ်ႇတၢင်းဢၼ်ဢဝ်ဢၢပ်ႈပၼ်တီႈလၢပ်ႇတီႈလႅဝ်းယဝ်ႉ။ဢွၼ်ၵၼ်တိုတ်ႉၸၼ်ဢဝ်မၼ်းဢိၵ်ႇတင်း ၵူၼ်းမၼ်းဢၼ်ၼမ်ၼႃႇၵႃႈမီး ၼၼ်ႉတႃႉ။
၂၁ ႁူဝ်ၵူၼ်းသိုၵ်းဢၼ်ႁႅင်း ယႂ်ႇၼႃႇသေပိူၼ်ႈၸိူဝ်းၼၼ်ႉ တၵ်းဢွၼ်ၵၼ်တၵ်ႉလၢတ်ႈမၼ်း ဢိၵ်ႇလူၺ်ႈၵၼ်တင်း ၶဝ်ၸိူဝ်းဢၼ်ၸွႆႈထႅမ်မႃႉၸႃႉမၼ်းၸိူဝ်းၼၼ်ႉၵႃႈၼႂ်းမိူင်းမရၼၼၼ်ႉဢေႃႈ။ ၶဝ်ၵေႃႈဢွၼ်ၵၼ်လူင်းၵႂႃႇယဝ်ႉ။ၶဝ်ဢၼ်ဝႃႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ထိူဝ်ႁိမ်းလႄႈလႆႈတၢႆလူၺ်ႈလၢပ်ႇလူၺ်ႈလႅဝ်းၼၼ်ႉဢွၼ်ၵၼ်မီးယူႇၵႃႈတီႈ ၼၼ်ႉဢေႃႈ။
၂၂ ဢႃႇသုရိဢိၵ်ႇတင်းမူႇၽုင်မုၵ်ႉၸိူဝ်းဢၼ်ၸပ်းၸွမ်းမၼ်းၵႃႈမီးၼၼ်ႉၵေႃႈဢွၼ်ၵၼ်မီးၵႃႈတီႈၼၼ်ႉဢေႃႈ။ ပႃႇႁဵဝ်ႈမၼ်းၸိူဝ်းၼၼ်ႉမီးယူႇၵႃႈတီႈႁိမ်းႁွမ်းလဵပ်ႈႁွပ်ႈမၼ်းလႄႈ ၶဝ်ၵႃႈမီးၼၼ်ႉပဵၼ်ဢၼ်လူမ်ႉတၢႆလူၺ်ႈလၢပ်ႇလူၺ်ႈလႅဝ်းဢေႃႈ။
၂၃ ပႃႇႁဵဝ်ႈၶဝ်ၼၼ်ႉမီးတၢင်းဢၼ်ၸႅၼ်ႇယႆၵၼ်ဝႆႉယူႇ ၵႃႈတီႈႁိမ်းပဵမ်ႉၶုမ်ပဵမ်ႉလုၵ်းလႄႈမူႇၽုင်မုၵ်ႉၸိူဝ်း မၼ်းမီးယူႇၵႃႈတီႈႁိမ်းႁွမ်းလဵပ်ႈႁွပ်ႈပႃႇႁဵဝ်ႈမၼ်းဢေႃႈ။ ၶဝ်ဢၼ်ပဵၼ်ၵေႃႉဢၼ် ၸၢင်ႊႁႂ်ႈပိူၼ်ႈ ၵူဝ်ႁႄၶဝ်ၵႃႈၼႂ်းတီႈဢၼ်ၶဝ်ၸိူဝ်းဢၼ် ဢသၢၵ်ႈလိပ်းယူႇသဝ်းၼၼ်ႉၵႃႈမီးၼၼ်ႉ ဢွၼ်ၵၼ်လူမ်ႉတၢႆလူၺ်ႈလၢပ်ႇလူၺ်ႈလႅဝ်း ဢေႃႈ။
၂၄ ၵႃႈတီႈၼၼ်ႉဢေႇလမ်ႇဢိၵ်ႇတင်းၵူၼ်းမၼ်းဢၼ်ၼမ်ၼႃႇၼၼ်ႉ ဢွၼ်ၵၼ်မီးယူႇၵႃႈတီႈလဵပ်ႈႁွပ်ႈပႃႇႁဵဝ်ႈမၼ်းလႄႈ ၶဝ်ၵႃႈမီးၼၼ်ႉလူမ်ႉတၢႆလူၺ်ႈလၢပ်ႇလူၺ်ႈလႅဝ်းဢေႃႈ။ၶဝ်ဢၼ်ပဵၼ်ၵေႃႉဢၼ်ၸၢင်ႊႁႂ်ႈပိူၼ်ႈၵူဝ်ႁႄၶဝ်ၵႃႈၼႂ်းတီႈဢၼ်ၶဝ်ၸိူဝ်းဢၼ်ဢသၢၵ်ႈလိပ်းယူႇသဝ်းၼၼ်ႉပဵၼ်ၵေႃႉဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းသေလႄႈ လႆႈလူင်းၵႂႃႇၵႃႈတီႈတႂ်ႈလိၼ်လႄႈလႆႈၶၢမ်ႇတၢင်းဢၼ်ဢူၵ်းဢၼ်ဢၢႆလူၺ်ႈၵၼ်တင်း ၶဝ်ၸိူဝ်းဢၼ်လူင်းၵႂႃႇၵႃႈ ၼႂ်းႁူးလိၼ်ၶုမ်လိၼ်ၼၼ်ႉဢေႃႈ။
၂၅ ၶဝ်ဢဝ်တီႈၼွၼ်းဝႆႉၵႃႈၼႂ်းၵၢင်ၶဝ်ၸိူဝ်းဢၼ်လႆႈၶၢမ်ႇတၢႆၼၼ်ႉပုၼ်ႈမၼ်း ဢိၵ်ႇတင်း ၵူၼ်းမၼ်းဢၼ်ၼမ်ၼႃႇၵႃႈမီးၼၼ်ႉလႄႈ ပႃႇႁဵဝ်ႈမၼ်းၸိူဝ်းၼၼ်ႉမီးယူႇၵႃႈတီႈႁိမ်းႁွမ်းလဵပ်ႈႁွပ်ႈမၼ်းဢေႃႈ။ ၶဝ်ၵႃႈမီးၼၼ်ႉပဵၼ်ၵေႃႉဢၼ်ဢမ်ၶၢမ်ႇ တၢင်းဢၼ်ထိူဝ်ႁိမ်းလႄႈတၢႆလူၺ်ႈလၢပ်ႇလူၺ်ႈလႅဝ်းဢေႃႈ။ၶဝ်ၸၢင်ႊႁႂ်ႈပိူၼ်ႈၵူဝ်ႁႄၶဝ်ၵႃႈၼႂ်းတီႈဢၼ် ၶဝ်ၸိူဝ်းဢၼ်ဢသၢၵ်ႈလိပ်းၼၼ်ႉယူႇသဝ်းလႄႈ ၶဝ်လႆႈၶၢမ်ႇတၢင်းဢၼ်ဢူၵ်းဢၢႆလူၺ်ႈၵၼ်တင်း ၶဝ်ၸိူဝ်းဢၼ်လူင်းၵႂႃႇၵႃႈၼႂ်းႁူးလိၼ်ၶုမ်ႇလိၼ်ၼၼ်ႉဢေႃႈ။မၼ်းတူၵ်းတီႈယူႇတီႈသဝ်းလူၺ်ႈၵၼ်တင်းၶဝ်ၸိူဝ်းဢၼ်လႆႈၶၢမ်ႇတၢႆၼၼ်ႉဢေႃႈ။
၂၆ မေႇသိၵ်ႉ ဢိၵ်ႇတင်းတူႉပလတင်းၵူၼ်းမၼ်းဢၼ်ၼမ်ၼႃႇၵႃႈမီးၼၼ်ႉမီးၵႃႈတီႈၼၼ်ႉလႄႈ ပႃႇႁဵဝ်ႈမၼ်းၸိူဝ်းၼၼ်ႉမီးယူႇ ၵႃႈတီႈႁိမ်းႁွမ်းလဵပ်ႈႁွပ်ႈမၼ်းဢေႃႈ။ၶဝ်ၵႃႈမီးၼၼ်ႉပဵၼ်ၵေႃႉဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းလႄႈတၢႆလူၺ်ႈလၢပ်ႇလူၺ်ႈလႅဝ်းဢေႃႈ။ၶဝ်ၼၼ်ႉပဵၼ်ၵေႃႉဢၼ်ႁႂ်ႈပိူၼ်ႈၵူဝ်ႁႄၶဝ်ၵႃႈတီႈဢၼ် ၶဝ်ၸိူဝ်းဢၼ်ဢသၢၵ်ႈလိပ်းယူႇသဝ်းၼၼ်ႉ ဢေႃႈ။
၂၇ ၶဝ်ၼၼ်ႉတၵ်းလႆႈဢွၼ်ၵၼ်ၼွၼ်းယူႇလူၺ်ႈၵၼ်တင်းၵူၼ်း ယႂ်ႇၵူၼ်းလူင်ဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းလႄႈ လႆႈလူမ်ႉတၢႆလႄႈပႃးဢဝ်လၢၵ်ႈၼၢၵ်ႈတိုၵ်းသိုၵ်းၶဝ်ယူႇသေလႄႈ လူင်းၵႂႃႇၵႃႈၼႂ်းမိူင်းမရၼလႄႈဢဝ်လၢပ်ႇၶဝ်လႅဝ်းၶဝ်မွၼ်ႁူဝ်ၶဝ်ယူႇ၊ဢပျႅတ်ႈၶဝ် တႄႇယူႇၵႃႈၼိူဝ်ၶဝ်ၼၼ်ႉဢမ်ႇၸႂ်ႈႁိုဝ်။ၶဝ်ၼၼ်ႉပဵၼ်ၵေႃႉဢၼ်ၸၢင်ႊ ႁႂ်ႈပိူၼ်ႈၵူဝ်ႁႄၵႃႈၼႂ်းတီႈဢၼ်ၶဝ်ၸိူဝ်းဢၼ် ဢသၢၵ်ႈလိပ်းယူႇသဝ်းၼၼ်ႉဢေႃႈ။
၂၈ မႂ်းၵေႃႈတၵ်းလႆႈႁၵ်းလႅဝ်ၵႃႈၼႂ်းၵၢင်ၶဝ်ၸိူဝ်းဢၼ်ၶၢမ်ႇတၢင်းဢၼ်ထိူဝ်ႁိမ်းၼၼ်ႉလႄႈ ၼွၼ်းယူႇလူၺ်ႈၵၼ်တင်း ၶဝ်ၸိူဝ်းဢၼ်တၢႆလူၺ်ႈလၢပ်ႇလူၺ်ႈ လႅဝ်းၼၼ်ႉဢေႃႈ။
၂၉ ဢေႇတုမ်ႇဢိၵ်ႇတင်းၶုၼ်ႁေႃၶမ်းမၼ်းတင်းလၢႆ တင်းမူးမၢတ်ႈၽွင်းမိူင်းၵႃႈမီးဢၼ်ပႃးဢဝ်တၼ်းၶူဝ်းၶဝ်သေလႄႈတူၵ်းတီႈယူႇတီႈသဝ်းလူၺ်ႈၵၼ်တင်း ၶဝ်ၸိူဝ်းဢၼ်ဢမ်ႇၶၢမ်ႇတၢင်းတၢႆၸိူဝ်းၼၼ်ႉၵေႃႈ လႆႈဢွၼ်ၵၼ်မီးယူႇၵႃႈတီႈၼၼ်ႉလႄႈလႆႈၼွၼ်းယူႇလူၺ်ႈၵၼ်တင်း ၶဝ်ၸိူဝ်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းၼၼ်ႉ ဢိၵ်ႇတင်းၶဝ်ၸိူဝ်းဢၼ်လူင်းၵႂႃႇၵႃႈၼႂ်း ႁူးလိၼ်ၶုမ်လိၼ်ၼၼ်ႉ ဢေႃႈ။
၃၀ ၶုၼ်မိူင်းတၢင်းႁွင်ႇၵႃႈမီး၊ၶုၼ်ၸိတုမ်ႇၵႃႈမီးဢၼ်လူၵ်းၵႂႃႇလူၺ်ႈၵၼ်တင်း ၶဝ်ၸိူဝ်းဢၼ်လႆႈၶၢမ်ႇတၢႆၼၼ်ႉဢွၼ်ၵၼ်မီးၵႃႈတီႈၼၼ်ႉဢေႃႈ။ ၶဝ်လႆႈၶၢမ်ႇ တၢင်းဢၼ်ဢူၵ်းဢၢႆၵွပ်ႈပိူဝ်ႈတၢင်းၵူဝ်တၢင်းႁႄဢၼ်တၼ်းၶူဝ်းၶဝ်ႁႂ်ႈပဵၼ်ၼၼ်ႉယဝ်ႉ။ၶဝ်ပဵၼ်ၵေႃႉဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းလႄႈ လႆႈၼွၼ်းယူႇလူၺ်ႈၵၼ်တင်း ၶဝ်ၸိူဝ်းဢၼ်တၢႆလူၺ်ႈလၢပ်ႇလူၺ်ႈလႅဝ်းၸိူဝ်းၼၼ်ႉလႄႈ လႆႈဢွၼ်ၵၼ်ၶၢမ်ႇတၢင်းဢၼ်ဢူၵ်းဢၢႆ လူၺ်ႈၵၼ်တင်းၶဝ်ၸိူဝ်းဢၼ်လူင်း ၵႂႃႇၵႃႈၼႂ်းႁူးလိၼ်ၶုမ်လိၼ်ၼၼ်ႉယူႇဢေႃႈ။
၃၁ ၶုၼ်ၽႃႇရေႃးတၵ်းႁၼ်ၶဝ်ၼၼ်ႉလႄႈ ၸႂ်မၼ်းတၵ်းမီးတၢင်းဢၼ်သၢၵ်ႈသႃႇၶႅၼ်းမႃး ၵွပ်ႈပိူဝ်ႈၵူၼ်းမၼ်းဢၼ်ၼမ်ၼႃႇၵႃႈမီးၼၼ်ႉလႄႈ ၽႃႇရေႃးဢိၵ်ႇတင်းပူဝ်ႇပႃႇမၼ်းတင်းသဵင်ႈတင်းလူင်လႆႈၶၢမ်ႇတၢႆ လူၺ်ႈလၢပ်ႇလူၺ်ႈလႅဝ်းဢေႃႈ၊ ဝႃႈၼင်ႇၼႆၸဝ်ႈထႃႇဝရႃႉ ၽြႃးမီးဢမိင်ႉဢေႃႈ။
၃၂ ပိူဝ်ႈဢၼ်ၵဝ်တၵ်းႁဵတ်းႁႂ်ႈပိူၼ်ႈၵူဝ်ႁႄမၼ်း ၵႃႈၼႂ်းတီႈဢၼ်ၶဝ်ၸိူဝ်းဢၼ်ဢသၢၵ်ႈလိပ်းယူႇသဝ်းၼၼ်ႉလႄႈ မၼ်းဢၼ်ဝႃႈၶုၼ်ၽႃႇရေႃး ဢိၵ်ႇတင်းၵူၼ်းမၼ်းဢၼ်ၼမ်ၼႃႇၵႃႈမီးၼၼ်ႉတၵ်းလႆႈ ဢွၼ်ၵၼ်ၼွၼ်းယူႇၵႃႈၼႂ်းၵၢင်ၶဝ်ၸိူဝ်းဢၼ် ဢမ်ႇၶၢမ်ႇ တၢင်းဢၼ်ထိူဝ်ႁိမ်းၼၼ်ႉလူၺ်ႈၵၼ်တင်း ၶဝ်ၸိူဝ်းဢၼ်လႆႈၶၢမ်ႇတၢႆလူၺ်ႈလၢပ်ႇလူၺ်ႈလႅဝ်းၼၼ်ႉဢေႃႈ၊ ဝႃႈၼင်ၼႆၸဝ်ႈထႃႇဝရႃႉၽြႃးမီးဢမိင်ႉဢေႃႈ။