၃၀
ပွင်ႉမိုၼ်ပွင်ႉၶင်းပုၼ်ႈမိူင်းဢေႇၵႅပ်ႉတု
၁ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ် လႄႈဝႃႈၸမ်း၊-
၂ လုၵ်ႈၵူၺ်းဢိူၺ်း။မႂ်းႁဵတ်းပရေႃးၽႅတ်ႈသေလႄႈလၢတ်ႈလႄႈဝႃႈ ထႃႇဝရႃႉၽြႃးမီးဢမိင်ႉၸမ်း၊-သူဢွၼ်ၵၼ်သႅၼ်ႇႁွင်ႉလႄႈဝႃႈ မိူဝ်ႉဝၼ်း ၼၼ်ႉမီးဢႃႉမင်ႇၵလႃႇဢေႃႈ၊ဝႃႈၼင်ႇၼႆတႃႉ။
၃ ဝၼ်းၼၼ်ႉၸမ်ယဝ်ႉ။ဝၼ်းထႃႇဝရႃႉၽြႃး၊ဝၼ်းဢၼ်ၾႃႉမိုတ်း၊ ၶိင်ႇမိူဝ်ႈဢၼ်ၶဵၼ်းဝႆႉတီႈၵူၼ်းတၢင်ႇၸိူဝ်ႉတၢင်ႇ မဵဝ်းတင်းလၢႆၼၼ်ႉၸမ်ယဝ်ႉ။
၄ ၽေးလၢပ်ႇၽေးလႅဝ်းတၵ်းႁွတ်ႈထိုင်ၵႃႈတီႈမိူင်းဢေႇၵႅပ်ႉတုလႄႈ မိူင်းဢိသယေႃႇပိ တၵ်းမီးတၢင်းဢၼ်မႆႈၸႂ်ယၢပ်ႇၸႂ်ၼႂ်းမိူဝ်ႈဢၼ်ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်တိူဝ်ႉမၢတ်ႇၼၼ်ႉလူမ်ႉတၢႆၵႃႈၼႂ်းမိူင်းဢေႇၵႅပ်ႉတုၼၼ်ႉဢေႃႈ။ၶဝ်တၵ်းဢွၼ်ၵၼ်သိမ်းဢဝ်ၵူၼ်းဝၢၼ်ႈၵူၼ်းမိူင်းၼမ်ၼႃႇလႄႈယႃႉၽဵဝ်ႈမူႇလငဝ်ႈႁၢၵ်ႈမၼ်းပႅတ်ႈ ဢေႃႈ။
၅ ၵူၼ်းမိူင်းဢိသယေႃႇပိၵူၼ်းမိူင်းၽုတ၊ ၵူၼ်းမိူင်းယုတ၊ၵူၼ်းဢၼ်မဵဝ်းဢၼ်လေႃးလေးၵၼ်ၵႃႈမီး၊ၵူၼ်းမဵဝ်းၶုၽ၊ ၵူၼ်းမိူင်းဢၼ်ႁဵတ်းပတိၺိၼ်ႇဝႆႉၸိူဝ်းၼၼ်ႉ တၵ်းဢွၼ်ၵၼ်လူမ်ႉတၢႆလူၺ်ႈလၢပ်ႇလူၺ်ႈလႅဝ်းလူၺ်ႈၵၼ်တင်းၶဝ်ၼၼ်ႉဢေႃႈ။
၆ ထႃႇဝရႃႉၽြႃးမီးဢမိင်ႉၸမ်း၊-ၶဝ်ၸိူဝ်းဢၼ်ၵမ်ႉထွၵ်ႈၸွႆႈထႅမ်မိူင်းဢေႇၵႅပ်ႉတု ၼၼ်ႉတၵ်းဢွၼ်ၵၼ်လူမ်ႉတၢႆလႄႈ မုၼ်ၵုင်ႇသရေႇတၢင်းၵတ်ႉတၢင်းၶၼ်မၼ်းတၵ်းလႆႈသုမ်းၸွမ်းဢေႃႈ။ ဢဝ်ၵႃႈတီႈၸႃႉၸဵမ်ဝဵင်း မိၵတေႃႇလ တေႃႇထိုင်ႁွတ်ႈဝဵင်းသုၼေႇၼၼ်ႉလႄႈၶဝ်ၼၼ်ႉတၵ်းဢွၼ်ၵၼ်လူမ်ႉတၢႆ လူၺ်ႈလၢပ်ႇလူၺ်ႈလႅဝ်းဢေႃႈ၊ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃးမီး ဢမိင်ႉဢေႃႈ။
၇ ၶဝ်တၵ်းလႆႈမီးတၢင်းဢၼ်လူႉလႅဝ်ယူႇၼႂ်းမိူင်းဢၼ်လူႉလႅဝ်ၸိူဝ်းၼၼ်ႉလႄႈ ဝဵင်းမၼ်းတင်းလၢႆတၵ်းလႆႈၶဝ်ႈပႃး ၼႂ်းဝဵင်းဢၼ်သိတ်ႇၵူၼ်းယဵၼ် ၵူၼ်းၸိူဝ်းၼၼ်ႉဢေႃႈ။
၈ မိူဝ်ႈဢၼ်ၵဝ်ဢဝ်ၽႆးၸပ်း သႂ်ႇၵႃႈၼႂ်းမိူင်းဢေႇၵႅပ်ႉတုလႄႈ ၶဝ်ၵႃႈဢၼ်ၸွႆႈထႅမ်မႃႉၸႃႉမိူင်းၼၼ်ႉ လႆႈဢွၼ်ၵၼ်လူႉလႅဝ်ၼၼ်ႉၸိုင် ၶဝ်တၵ်းလႆႈႁူႉလွင်ႈဢၼ် ၵဝ်ပဵၼ်ထႃႇဝရႃႉၽြႃးဢေႃႈ။
၉ ၼႂ်းမိူဝ်ႉဝၼ်းၼၼ်ႉ တမၢၼ်ႇဢၼ်ၵဝ်ပွႆႇၸႂ်ႉၸိူဝ်းၼၼ်ႉတၵ်းဢွၼ်ၵၼ်ၶီႇႁိူဝ်းသၢင်းၽေႃးၵႂႃႇ ႁႂ်ႈၵူၼ်းဢိသယေႃႇပိဢၼ်ဢမ်ႇမီးတၢင်းဢၼ်မႆႈၸႂ်ၶီၸႂ်ၼၼ်ႉ လႆႈၵူဝ်လႆႈႁႄလႄႈၶဝ်ၼၼ်ႉ တၵ်းဢွၼ်ၵၼ်ႁွတ်ႈထိုင်တၢင်းဢၼ်ယၢပ်ႇၸႂ်ၶၢၼ်ၸႂ်ၼႃႇလူင်လၢင် မိူၼ်ၸိူဝ်ႉၼင်ႇၼႂ်းမိူဝ်ႉဝၼ်းဢေႇၵိပ်ႉတု ၼၼ်ႉလႄႈတူၺ်းလူ။မိူဝ်ႉဝၼ်းၼၼ်ႉၸမ်မႃးယူႇဢေႃႈ။
၁၀ ထႃႇဝရႃႉၽြႃးမီးဢမိင်ႉၸမ်း၊-ၵဝ်တၵ်းဢဝ်မိူင်းၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပုလုၼ်ႇ ၼၼ်ႉပႄႇၽဵဝ်ႈၵူၼ်းမိူင်းဢေႇၵႅပ်ႉတု ဢၼ်ၼမ်ၼႃႇၼၼ်ႉပႅတ်ႈ ဢေႃႈ။
၁၁ မၼ်းၼၼ်ႉဢိၵ်ႇတင်းၵူၼ်းမၼ်းတင်းလၢႆဢၼ်ဝႃႈမဵဝ်းၵူၼ်း ဢၼ်လီၵူဝ်လီႁႄၼၼ်ႉတၵ်းဢွၼ်ၵၼ်မႃး ႁႂ်ႈလႆႈယႃႉၽဵဝ်ႈမိူင်းပႅတ်ႈလႄႈတၵ်းဢွၼ်ၵၼ်ယိပ်းၵမ်လၢပ်ႇၵမ်လႅဝ်း ယူႇၽၢႆႇၼိုင်ႈတင်းမိူင်းဢေႇၵႅပ်ႉတုလႄႈ ႁႂ်ႈမိူင်းတင်းမိူင်းတဵမ်ဝႆႉတင်းႁူဝ်ႁၢၼ် ၵူၼ်းသိုၵ်းဢၼ်လူမ်ႉတၢႆဢေႃႈ။
၁၂ ၵဝ်တၵ်းႁႂ်ႈၼမ်ႉႁွင်ႊၼမ်ႉၵႄးတင်းလၢႆႁႅင်ႈႁွင်ၵႂႃႇလႄႈ ဢဝ်မိူင်းၶၢႆႉပၼ်တီႈၵူၼ်းႁၢႆႉၵူၼ်းယုတ်ႈတင်းလၢႆဢေႃႈ။ၵဝ်တၵ်းဢဝ်မိုဝ်းၵူၼ်းတၢင်ႇဝၢၼ်ႈတၢင်ႇမိူင်းယႃႉမိူင်း ဢိၵ်ႇတင်းၵႃႈဢၼ်ပႃးၵႃႈၼႂ်းမၼ်းၼၼ်ႉပႅတ်ႈဢေႃႈ။ၵဝ်ထႃႇဝရႃႉၽြႃးမီးဢမိင်ႉဝႆႉယဝ်ႉ။
၁၃ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵဝ်တၵ်းယႃႉၽဵဝ်ႈရုၵ်ႉထူႉတင်းလၢႆပႅတ်ႈလႄႈ ႁႂ်ႈသၢင်းထူႉတင်းလၢႆႁၢႆၵႂႃႇသေၵႃႈၼႂ်းမိူင်းၼေႃႇၽဢေႃႈ။ၵမ်းလိုၼ်းဢမ်ႇလႆႈမီးမဵဝ်းၶုၼ်ဢေႇၵႅပ်ႉတုလႃးလႃး။ ၵဝ်တၵ်းႁဵတ်းလွင်ႈ ဢၼ်မိူင်းဢေႇၵႅပ်ႉတုတၵ်းလီၵူဝ်လီႁႄဢေႃႈ။
၁၄ ၵဝ်တၵ်းယႃႉမိူင်းပႃႇသရုပႅတ်ႈလႄႈ ဢဝ်ၽႆးၸပ်းၵႃႈၼႂ်းဝဵင်းၸေႃႇၼ သေလႄႈၸီႇယၢင်ႇတၢမ်ႇဢပျႅတ်ႈၼႂ်းဝဵင်း ၼေႃႇဢေႃႈ။
၁၅ ၵဝ်တၵ်းဢဝ်တၢင်းၸႂ်မႆႈၶႂ်ႈၸႃႉသွၼ်းလေႃႇၵႃႈၼိူဝ်ဝဵင်းသိၼ်ႇ ဢၼ်ပဵၼ်တၢင်းၵတ်ႉတၢင်းၶၼ်မိူင်းဢေႇၵႅပ်ႉတု ၼၼ်ႉလႄႈပႄႇၽဵဝ်ႈၵူၼ်းဝဵင်း ၼေႃႇဢၼ်ၼမ်ၼႃႇၼၼ်ႉပႅတ်ႈဢေႃႈ။
၁၆ ၵဝ်တၵ်းဢဝ်ၸပ်း သႂ်ႇၵႃႈၼႂ်းမိူင်းဢေႇၵႅပ်ႉတု ၼၼ်ႉလႄႈဝဵင်းသိၼ်ႇၼၼ်ႉ တၵ်းလႆႈၶၢမ်ႇတၢင်းဢၼ်ယၢပ်ႇၸႂ်ၶၢၼ်ၸႂ်ၼႃႇလူင်လၢင်၊ လမ်းဝဵင်းၼေႃႇ ၼၼ်ႉတၵ်းလႆႈၶၢမ်ႇတၢင်းဢၼ်လူမ်ႉဢၼ်ပွင်ႇ၊ဝဵင်းၼေႃႇၽ ၼၼ်ႉတၵ်းလႆႈၶၢမ်ႇတၢင်းဢၼ် ရၢၼ်ႇသူႇတိုၵ်းတေႃးၶိင်ႇ ၵၢင်ဝၼ်းဢေႃႈ။
၁၇ ၵူၼ်းၼုမ်ႇၵူၼ်းၵမ်ဝဵင်းဢႃႇဝၼ်ႇ၊ဝဵင်းၽိၽေႇသိတ်ႉၸိူဝ်းၼၼ်ႉ တၵ်းလႆႈဢွၼ်ၵၼ်လူမ်ႉတၢႆလူၺ်ႈလၢပ်ႇလူၺ်ႈလႅဝ်းလႄႈဝဵင်းၸိူဝ်းၼၼ်ႉတၵ်းလႆႈဢွၼ်ၵၼ် ၶၢမ်ႇတၢင်းဢၼ်သိမ်းဢဝ်ၵႂႃႇ ဢေႃႈ။
၁၈ ၶိင်ႇၵၢင်ဝၼ်းဢၼ်လႅင်းတၵ်းလပ်ႉႁၢႆၵႂႃႇၵႃႈၼႂ်းဝဵင်းတႃႇပၼိတ်ႉ ၼႂ်းမိူဝ်ႈဢၼ်ၵဝ်ႁၵ်းၵၼ်းႁွၵ်ႇရႃႇၸႃႉမိူင်းဢေႇၵႅပ်ႉတုတင်းလၢႆပႅတ်ႈလႄႈတၢင်းၵတ်ႉတၢင်းၶၼ်မုၼ်ၵုင်ႇသရေႇမၼ်း သုမ်းၵႂႃႇၼၼ်ႉဢေႃႈ။ ၾႃႉမိုတ်ၾႃႉမိူဝ်တၵ်းႁူမ်ႇသုမ်ႇမၼ်းလႄႈ လုၵ်ႈယိင်းမၼ်းတင်းလၢႆ တၵ်းလႆႈၶၢမ်ႇတၢင်းဢၼ်သိမ်းဢဝ် ၵႂႃႇဢေႃႈ။
၁၉ ၵဝ်တၵ်းၸီႇယၢင်ႇတၢမ်ႇဢပျႅတ်ႈတီႈမိူင်းဢေႇၵႅပ်ႉတုၸိူဝ်ႉၼင်ႇၼၼ်လႄႈ ၶဝ်တၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢေႃႈ၊ ဝႃႈၼင်ႇၼႆဢေႃႈ။
၂၀ ၼႂ်းပီႊဢၼ်ထူၼ်ႈထိုင်သိပ်းပၢႆဢဵတ်းပီႊ လိူၼ်ပထမၸဵတ်းဝၼ်းၼၼ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်းမႃးတီႈၵဝ်လႄႈဝႃႈၸမ်း၊-
၂၁ လုၵ်ႈၵူၼ်းဢိူၺ်း။ၵဝ်ႁၵ်းၶႅၼ်မိုဝ်းၽႃႇရေႃးၶုၼ်ႁေႃၶမ်းဢေႇၵႅပ်ႉတုပႅတ်ႈယဝ်ႉ။ဢမ်ႇလႆႈဢဝ်ယႃႈယႃယႃလႄႈဢုမ်ႇႁေႃႇဝႆႉ။ဢမ်ႇလႆႈဢဝ်ၽႅၼ်ႇဢဝ်ၶူဝ်းမတ်ႉဝႆႉၶဵၼ်းဝႆႉ ႁႂ်ႈမီးႁႅင်းၸိူဝ်ႉၼင်ႇပၵ်းၵဝ်ႇပိူင်ၵဝ်ႇ ပုၼ်ႈဢၼ်တၵ်းယိပ်းၵမ်လၢပ်ႇၵမ်လႅဝ်း။
၂၂ ပိူဝ်ႈၼႆလႄႈ ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-တူၺ်းလူ။ၵဝ်ယူႇၽၢႆႇၼိုင်ႈတင်းၽႃႇရေႃးၶုၼ်ႁေႃၶမ်းဢေႇၵႅပ်ႉတု လႄႈတၵ်းႁၵ်းၶႅၼ်မိုဝ်းမၼ်းဢၼ်ဝႃႈၶႅၼ်မိုဝ်းဢၼ်ၵႅၼ်ႇၶႅင်ဢိၵ်ႇတင်း ၶႅၼ်မိုဝ်းဢၼ်ႁၵ်းပႅတ်ႈၵမ်းဢွၼ်တၢင်းၼၼ်ႉပႅတ်ႈလႄႈ ႁႂ်ႈလၢပ်ႇလႅဝ်း တူၵ်းသေၵႃႈတီႈမိုဝ်းမၼ်းၵႂႃႇဢေႃႈ။
၂၃ ၵဝ်တၵ်းဢဝ်ၵူၼ်းဢေႇၵႅပ်ႉတု တင်းလၢႆၸၢတ်ႇပိုၼ်ပႅတ်ႈၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်းလႄႈ ႁႂ်ႈၶဝ်ႁွတ်ႈထိုင်ၵႃႈ ၼႂ်းၵူႈသိုင်ႇၵူႈမိူင်းဢေႃႈ။
၂၄ ၵဝ်တၵ်းႁႂ်ႈၶႅၼ်မိုဝ်းၶုၼ်ႁေႃၶမ်းပႃႇပုလုၼ်ႇ ၵႅၼ်ႇၶႅင်လႄႈဢဝ်လၢပ်ႇၵဝ်လႅဝ်းၵဝ်ဢၢပ်ႈပၼ်ၵႃႈၼႂ်းမိုဝ်းမၼ်းဢေႃႈ။ၵဝ်တၵ်းႁၵ်းၶႅၼ်မိုဝ်းၶုၼ်ၽႃႇရေႃးပႅတ်ႈလႄႈ မၼ်းတၵ်းလႆႈသႅၼ်ႇႁွင်ႉ ၼၼ်ႉဢေႃႈ။
၂၅ ၵဝ်တၵ်းယုၵ်ႉယွင်ႈၶႅၼ်မိုဝ်းၶုၼ်ႁေႃၶမ်းပႃႇပုလုၼ်ႇလႄႈၶႅၼ်မိုဝ်းၶုၼ်ၽႃႇရေႃးၸမ်း တၵ်းလႆႈတူၵ်းၵႂႃႇၵႃႈတႂ်ႈဢေႃႈ။မိူဝ်ႈဢၼ်ၵဝ်ဢဝ်လၢပ်ႇဢဝ်လႅဝ်းၵဝ်ဢၢပ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်း ပႃႇပုလုၼ်ႇလႄႈ မၼ်းၼၼ်ႉဢဝ်လၢပ်ႇလႅဝ်းၼၼ်ႉယဵတ်ႇယိုၼ်းၵႃႈၼိူဝ်မိူင်းဢေႇၵႅပ်ႉတု ၼၼ်ႉၸိုင်ၶဝ်တၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢေႃႈ။
၂၆ ၼင်ႇၼၼ်လႄႈ ၵဝ်တၵ်းဢဝ်ၵူၼ်းဢေႇၵႅပ်ႉတုတင်းလၢႆၸၢတ်ႇပိုၼ် ၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆလႄႈ ႁႂ်ႈၶဝ်ႁွတ်ႈထိုင်ၵႃႈၼႂ်းၵူႈသိုင်ႇၵူႈမိူင်းဢေႃႈ။ၶဝ်တၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢေႃႈ၊ဝႃႈၼင်ႇၼႆဢေႃႈ။