၂၇
ပွင်ႉမိုၼ်ပွင်ႉၶင်းပုၼ်ႈမိူင်းတုရု
၁ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ် လႄႈဝႃႈၸမ်း၊-
၂ လုၵ်ႈၵူၼ်းဢိူၺ်း။ မႂ်းႁဵတ်းတၢင်းဢၼ်ပွင်ႉၶၢင်းပွင်ႉမိုၼ်ပုၼ်ႈဝဵင်းတုရု လႄႈလၢတ်ႈတီႈ ဝဵင်းတုရုလႄႈဝႃႈ၊-ဝဵင်းဢၼ်တႄႇယူႇၵႃႈတီႈသူပ်းပၢင်ႇလၢႆႇ ဢၼ်ၸၢင်ႊၵႃႉၵုၼ်ႇၵႃႉသိၼ်ပုၼ်ႈၵူၼ်းၵႃႈၼႂ်းၵုၼ်ပၢင်ႇလၢႆၼမ်ၼႃႇၼႆႉဢိူၺ်း။
၃ ၸဝ်ႈထႃႇဝရႃႉၽြႃးမီးဢမိင်ႉတီႈမႂ်းၸမ်း၊-ဝဵင်းတုရုဢိူၺ်း။မႂ်းၸင်ႇလၢတ်ႈလႄႈဝႃႈ ၵဝ်ၼႆႉၸေးၸုင်ႇဝႆႉတင်းတၢင်းဢၼ်ႁၢင်ႊလီႁၢင်ႊငၢမ်းယဝ်ႉ၊ဝႃႈၼင်ႇၼႆဢေႃႈ။
၄ ၶွပ်ႇၼမ်ႉလႅၼ်လိၼ်မႂ်းၼၼ်ႉ မီးၵႃႈၼႂ်းပၢင်ႇလၢႆႇလႄႈလၢၵ်ႈသမႃးမႂ်းၸိူဝ်းၼၼ်ႉ ဢွၼ်ၵၼ်ႁဵတ်းႁႂ်ႈမႂ်းၸေး ၸုင်ႇဝႆႉတင်းတၢင်းဢၼ်ႁၢင်ႊလီႁၢင်ႊငၢမ်းယဝ်ႉ။
၅ ၶဝ်ဢွၼ်ၵၼ် ဢဝ်မႆႉပႅၵ်ႇၵႃႈတီႈၸေႇၼိရ ႁဵတ်းၽႅၼ်ႇပႅၼ်ႈမႂ်းၵႃႈမီးလႄႈ ဢဝ်တူၼ်ႈဢႃႇရိတ်ႉလေႇပၼုၼ်ႇႁဵတ်းသဝ်လၢင်းယၢၼ်းမႂ်းတင်းလၢႆယဝ်ႉ။
၆ ၶဝ်ဢွၼ်ၵၼ်ဢဝ်မႆႉၼိမ်ပႃႇသၼ်ႇႁဵတ်းလၢမ်ႈၽၢႆးမႂ်းလႄႈ ဢဝ်မႆႉပႅၵ်ႇႁွမ်ဢၼ်ဢဝ်ၵႃႈတီႈၵုၼ်ၶိတ်ႉတိမ်ႇမႃးလႄႈ ဢဝ်ငႃးၸၢင်ႉႁၢင်ႈၶိူင်ႈ သႂ်ႇၼၼ်ႉ ႁဵတ်းဢၼ်သိူဝ်ႇမႂ်းယဝ်ႉ။
၇ လၢင်းယၢၼ်းမႂ်းၸိူဝ်းၼၼ်ႉ ပဵၼ်ပိၵ်ႈၶျေႃးဢၼ်တမ်ႇၵၢမ်းႁၢင်ႈၶိူင်ႈၵႃႈတီႈမိူင်းဢေႇၵႅပ်ႉတု ၼၼ်ႉႁႂ်ႈလႆႈပဵၼ်လၢမ်ႇပုၼ်ႈမႂ်းလႄႈ ပိၵ်ႉတၢၼ်ႇမႂ်းၵေႃႈပဵၼ်ၶူဝ်းဢၼ်သွမ်ႇၶူဝ်းဢၼ်ၵမ်ႇ ဢၼ်ဢဝ်ၵႃႈတီႈၵုၼ်ဢေႇလိသ ၼၼ်ႉမႃးၼၼ်ႉဢေႃႈ။
၈ ၵူၼ်းဝဵင်းၸိတုၼ်ႇ၊ၵူၼ်းဝဵင်းဢႃႇဝတ်ႉ ဢွၼ်ၵၼ်ပဵၼ်ၵူၼ်းၽၢႆးႁိူဝ်းမႂ်းလႄႈ ပိင်ႇၺႃႇသိမႂ်းၸိူဝ်းၼၼ်ႉဝိင်းတုရုဢိူၺ်း။ ဢွၼ်ၵၼ်မီးယူႇၵႃႈၼႂ်းမႂ်းလႄႈ ပဵၼ်ၵေႃႉဢၼ်ၶတ်းႁၢင်ႁိူဝ်းသၢင်း ၽေႃးမႂ်းဢေႃႈ။
၉ ၵူၼ်း ယႂ်ႇၵူၼ်းလူင်ၵေႇပလဢိၵ်ႇတင်းပိင်ႇၺႃႇသိမၼ်းၸိူဝ်းၼၼ်ႉ ဢွၼ်ၵၼ်မႄးဢူတ်းမႄးယႃယူႇသေလႄႈၸွမ်းဢေႃႈ။ႁိူဝ်းသၢင်းၽေႃးဢၼ်ၸၢင်ႊၶၢမ်ႈပၢင်ႇလၢႆႇၵႃႈမီး ဢိၵ်ႇတင်းၵူၼ်းႁိူဝ်းသၢင်းၽေႃးတင်းလၢႆ ဢွၼ်ၵၼ်မီးယူႇၵႃႈၼႂ်းမႂ်းႁႂ်ႈလႆႈသိုဝ်ႉ လႆႈၶၢႆၵုၼ်ႇသိၼ်မႂ်းဢေႃႈ။
၁၀ ၵူၼ်းပေႇရသိ၊ၵူၼ်းလုတၵူၼ်းၽုတၸိူဝ်းၼၼ်ႉ ဢွၼ်ၵၼ်ႁဵတ်းတပ်ႉႁဵတ်းတႃႇတီႈမႂ်းလႄႈပဵၼ်ႁူဝ်ႁၢၼ်ၵူၼ်းသိုၵ်းမႂ်းဢေႃႈ။ၶဝ်ဢွၼ်ၵၼ်ဢဝ်ၶိူင်ႈႁႄႉလၢၵ်ႈၼၢၵ်ႈ ဢိၵ်ႇတင်းမွၵ်ႇႁူဝ်လဵၵ်းႁွႆႈဝႆႉၵႃႈၼႂ်းမႂ်းလႄႈ ႁဵတ်းႁႂ်ႈမုၼ်ၽုင်းၵုင်ႇသရေႇမႂ်း ထၢင်ႇသႃးဢေႃႈ။
၁၁ ၵူၼ်းဝဵင်းဢႃႇဝတ်ႉဢိၵ်ႇတင်းၵူၼ်းတပ်ႉၵူၼ်းတႃႇမႂ်းၸိူဝ်းၼၼ်ႉ ဢွၼ်ၵၼ်မီးယူႇၵႃႈၼိူဝ်လမ်းဝဵင်းမႂ်းလဵပ်ႈႁွပ်ႈမႂ်းဝႆႉလႄႈ ၶဝ်ၸိူဝ်းဢၼ်ႁတ်းႁၢၼ်ၼႃႇလူင်လၢင်ၸိူဝ်းၼၼ်ႉပႂ်ႉလၢင်းၸီႇမႂ်းသေလႄႈ ဢဝ်ၶိူင်ႈႁႄႉလၢၵ်ႈၼၢၵ်ႈႁွႆႈဝႆႉၵႃႈၼိူဝ်လမ်းဝဵင်းမႂ်းလဵပ်ႈႁွပ်ႈမႂ်းဝႆႉလႄႈ ဢွၼ်ၵၼ်ႁဵတ်းႁႂ်ႈတၢင်းဢၼ် ႁၢင်ႊလီႁၢင်ႊငၢမ်းမႂ်းၸေးၸုင်ႇဢေႃႈ။
၁၂ ဝဵင်းတႃႇသုပဵၼ်ၸဝ်ႈၵုၼ်ႇၸဝ်ႈသိၼ်တီႈမႂ်း ၵွပ်ႈပိူဝ်ႈဢၼ်ဢုၵ်ႉၸႃႇၸေးၸိမ်ႇၶဝ်မီးၼမ်ၼႃႇ ၵူႈၸိူဝ်ႉၵူႈမဵဝ်းၼၼ်ႉလႄႈ
ၶဝ်ၼၼ်ႉဢဝ်ငိုၼ်း၊လဵၵ်း၊ လဵၵ်းၽိူၵ်ႇ၊ၸိုၼ်းသေလႄႈမႃးႁဵတ်းတၢင်းဢၼ်ၵႃႉၵုၼ်ႇၶၢႆသိၼ် တေႃႇၵၼ်တင်း မႂ်းဢေႃႈ။
၁၃ မိူင်းယႃႇဝၼ်ႇ၊မိူင်းတုပလ၊မိူင်းမေႇသိၵ်ႉၸိူဝ်းၼၼ်ႉ ဢွၼ်ၵၼ်ၵႃႉၵုၼ်ၶၢႆသိၼ်တေႃႇၵၼ်တင်းမႂ်းလႄႈ ဢဝ်ၶႃႈဢဝ်ၵူၼ်းဢိၵ်ႇတင်းၵွၵ်းတွင်းလိူင်မႃး လႅၵ်ႈဢဝ်ၵုၼ်ႇမႂ်းသိၼ်မႂ်းဢေႃႈ။
၁၄ ၵူၼ်းမဵဝ်းတေႃႇၵႃႇမၸိူဝ်းၼၼ်ႉဢွၼ်ၵၼ်ဢဝ်မႃႉ လႂ်၊မႃႉသိုၵ်း လႂ်၊ လေႃႉလႃးလႂ်မႃးလႅၵ်ႈဢဝ်ၵုၼ်ႇမႂ်းသိၼ်မႂ်းဢေႃႈ။
၁၅ ၵူၼ်းဝဵင်းတေႇတၼ်ႇၸိူဝ်းၼၼ်ႉၵေႃႈ ဢွၼ်ၵၼ်ၵႃႉၵုၼ်ႇၵႃႉသိၼ်လူၺ်ႈၵၼ်တင်းမႂ်းဢေႃႈ။ၵူၼ်းတင်းမိူင်းၼမ်ၼႃႇၼၼ်ႉပဵၼ်ၵၢတ်ႇပဵၼ်သႃးမႂ်းလႄႈ ဢွၼ်ၵၼ်ဢဝ်ၶဝ်လႅမ်ငႃးၸၢင်ႉ၊ ၼိူဝ်ႉမႆႉလမ်မႃးလႅၵ်ႈဢဝ်ၶူဝ်းမႂ်းလဵင်းမႂ်း ဢေႃႈ။
၁၆ မိူင်းဢႃႇသုရိပဵၼ်ၸဝ်ႈၵုၼ်ႇၸဝ်ႈသိၼ်တီႈမႂ်းၵွပ်ႈပိူဝ်ႈဢၼ်ဢုၵ်ႉၸႃႇ ဢၼ်မႂ်းႁဵတ်းၼၼ်ႉၼမ်ၼႃႇလႄႈ ဢွၼ်ၵၼ်ဢဝ်သႅင်ၼပၵ်ႉ၊ၶူဝ်းဢၼ်သွမ်ႇ၊ၶူဝ်းၼုင်ႈဢၼ်တမ်ႇၵၢမ်းႁၢင်ႈၶိူင်ႈ၊ ပိၵ်ႈၶျေႃး၊သၼ်ႇတႃႇ၊သႅင်လႅင်သေလႄႈ မႃးႁဵတ်းတၢင်းဢၼ်ၵႃႉၵုၼ်ႇၶၢႆ သိၼ်တေႃႇၵၼ်တင်းမႂ်းဢေႃႈ။
၁၇ မိူင်းယုတဢိၵ်ႇတင်းမိူင်းဢိသရေႇလ ၸိူဝ်းၼၼ်ႉ ဢွၼ်ၵၼ်ၵႃႉၵုၼ်ႇၶၢႆသိၼ်လူၺ်ႈၵၼ်တင်းမႂ်းလႄႈ ဢဝ်ၶဝ်ႈသၢၼ်ၵျုင်ႇဢၼ်ဢဝ်ၵႃႈတီႈဝဵင်းမိၼ်ႇၼိတ်ႉ တင်းဝဵင်းပၼ်ႇၼၵ်ႉမႃးၼၼ်ႉၼမ်ႉၽိုင်ႈ၊ ၼမ်ႉမၼ်း၊ယၢင်ပႃႇလၸမ်းမႃး လႅၵ်ႈဢဝ်ၵုၼ်ႇမႂ်းသိၼ်မႂ်းဢေႃႈ။
၁၈ ဝဵင်းထမ်ႇမသိတ်ႉပဵၼ်ၸဝ်ႈၵုၼ်ႇၸဝ်ႈသိၼ်တီႈမႂ်း ၵွပ်ႈပိူဝ်ႈဢုၵ်ႉၸႃႇဢၼ်မႂ်းႁဵတ်းၼမ်ၼႃႇ ဢိၵ်ႇတင်း ၸေးၸိမ်ႇၼမ်ၼႃႇၵူႈၸိူဝ်ႉၵူႈမဵဝ်းၼၼ်ႉလႄႈဢွၼ်ၵၼ်ဢဝ် ၼမ်ႉၸပိတ်ႉႁေႇလပုၼ်ႇ၊ ၶူၼ်သူဝ်းဢၼ်ၽိူၵ်ႇဢၼ်ၶၢဝ်မႃး လႅၵ်ႈမႃးလၢႆႈဢေႃႈ။
၁၉ ဝဵင်းဝေႇတၼ်ႇဢိၵ်ႇတင်း မိူင်းယႃႇဝၼ်ႇၸိူဝ်းၼၼ်ႉ ဢွၼ်ၵၼ်ဢဝ်ပဵတ်ႈၵူၺ်မႃးလႅၵ်ႈဢဝ်ၵုၼ်ႇမႂ်းသိၼ်မႂ်းလႄႈ လဵၵ်းသမ်ႇမၼိ ဢၼ်လိူမ်ႈလီၶျေႃးလီ၊ မႆႉႁွမ်ႁိူတ်ႈတင်းဢွႆႈပဵၼ်ၵုၼ်ႇမႂ်းသိၼ်မႂ်းဢေႃႈ။
၂၀ ဝဵင်းတေႇတၼ်ႇၼၼ်ႉဢဝ်ၶူဝ်းဢၼ်ၶျေႃးလီဢၼ်ပဵၼ်ပုၼ်ႈဢၼ် ႁူဝ်ႁၢၼ်ၵူၼ်းသိုၵ်းၶီႇမႃႉသုင်းသွင်ႇၼၼ်ႉမႃးလႄႈ ၵႃႉၵၼ်ႇၶၢႆသိၼ်တေႃႇၵၼ်တင်း မႂ်းဢေႃႈ။
၂၁ မိူင်းဢႃႇရေႇပျႃႇဢိၵ်ႇတင်းၶုၼ်ၵေႇတႃႇၵႃႈမီးၼၼ်ႉပဵၼ်ၸဝ်ႈၵုၼ်ႇၸဝ်ႈသိၼ် တီႈမႂ်းလႄႈၼင်ႇႁိုဝ်တၵ်းလႆႈဢုၵ်ႉၸႃႇ ဢၼ်မႂ်းႁဵတ်းၸိုင်ဢွၼ်ၵၼ်ဢဝ်သူဝ်းဢွၼ်ႇ၊သူဝ်းပေႃႈ၊ ပႄႉပေႃႈမႃးၵႃႉၵုၼ်ႇၶၢႆ သိၼ်တေႃႇၵၼ်တင်းမႂ်းဢေႃႈ။
၂၂ ၸဝ်ႈၵုၼ်ၸဝ်ႈသိၼ်သေႇၽႃႉဢိၵ်ႇတင်း ရၵမၸိူဝ်းၼၼ်ႉဢွၼ်ၵၼ်ပဵၼ်ၵေႃႉဢၼ်ၵႃႉဢၼ်ၶၢႆတေႃႇၵၼ်တင်းမႂ်းလႄႈ ဢဝ်မဵဝ်းၼၢမ်ႇသႃႇဢၼ်မျၢတ်ႈသေပိူၼ်ႈ၊မဵဝ်းသႅင်ဢၼ်ၵႃႈ ယႂ်ႇၶၼ် ယႂ်ႇ၊ မဵဝ်းၶမ်းမႃးလႅၵ်ႈဢဝ်ၵုၼ်ႇမႂ်းသိၼ်မႂ်း ဢေႃႈ။
၂၃ ၵူၼ်းဝဵင်းၶႃႇရၼ်ႇ၊ၵူၼ်းဝဵင်းၵၼ်ႇၼေႇ၊ၵူၼ်းဝဵင်းဢေႇတိၼ်ႇ၊ ၸဝ်ႈၵုၼ်ႇၸဝ်ႈသိၼ်သေႇၽတင်းဢႃႇသုရိတင်းၶိလမတ်ႉ ၸိူဝ်းၼၼ်ႉၵေႃႈ ပဵၼ်ၵေႃႉ ဢၼ်ၵႃႉဢၼ်ၶၢႆတေႃႇၵၼ်တင်းမႂ်းဢေႃႈ။
၂၄ ၶဝ်ၸိူဝ်းၼႆႉပဵၼ်ၵေႃႉဢၼ်ပႃးဢဝ်ဢုၵ်ႉၸႃႇ ဢၼ်လၢၵ််ႇဢၼ်လၢႆးၶူဝ်းၼုင်ႈဢၼ်သွမ်ႇ၊ ၶူဝ်းၼုင်ႈဢၼ်တမ်ႇၵၢမ်းႁၢင်ႈၶိူင်ႈ၊ ၶူဝ်းၵမ်ႇဢၼ်ဢဝ် သႂ်ႇတိူၵ်ႈ သႂ်ႇတႃႇသေလႄႈ ဢဝ်ၸိူၵ်ႈမတ်ႉဝႆႉၶၢတ်ႈဝႆႉလႄႈ ပဵၼ်ဢၼ်ဢဝ်ၼိူဝ်ႉမႆႉဢႃႇရိတ်ႉ ႁဵတ်းၼၼ်ႉမႃးသႂၢင်းၶဝ်ႈၵႃႈၼႂ်းၵုၼ်ႇ မႂ်းသိၼ်မႂ်းဢေႃႈ။
၂၅ ႁိူဝ်းသၢင်းၽေႃးတႃႇသုၸိူဝ်းၼၼ်ႉပဵၼ်လမ်းဝဵင်းမႂ်း၊ပဵၼ်တီႈဢၼ်တေႃႉဢဝ်ၵုၼ်ႇမႂ်းသိၼ်မႂ်းၵႂႃႇဢေႃႈ။မႂ်းမၢၵ်ႇမီးလိူင်ႇၼမ်လႄႈမီးမူၼ်မီးၽုင်းၼႃႇလူင်လၢင်ၵႃႈၼႂ်းၵၢင်ပၢင်ႇလၢႆႇဢေႃႈ။
၂၆ မိူဝ်ႈလဵဝ်ၼႆႉၸမ်း ၵူၼ်းဢၼ်ၽၢႆးႁိူဝ်းမႂ်းၸိူဝ်းၼၼ်ႉဢဝ်မႂ်းၵႂႃႇၵႃႈၼႂ်း တီႈဢၼ်ႁႅင်း ယႂ်ႇၼႃႇၼၼ်ႉလႄႈလူမ်းတၢင်းဢွၵ်ႇပတ်ႉထူဝ်းဢဝ်မႂ်း ႁၵ်းပႅတ်ႈၵႃႈၼႂ်း ပၢင်ႇလၢႆႇယဝ်ႉ။
၂၇ ၸေးၸိမ်ႇမႂ်း၊ဢုၵ်ႉၸႃႇၶူဝ်းလဵင်းမႂ်း၊ၵုၼ်ႇသိၼ်မႂ်း ၵူၼ်းႁိူဝ်းသၢင်းၽေႃးမႂ်း၊ ၵူၼ်းၶတ်းႁၢင်ႇႁိူၼ်းသၢင်းၽေႃးမႂ်း ၵေႃႉဢၼ်မႄးဢူတ်းမႄးယႃမႂ်းယူႇသေလႄႈ ၸွမ်းၸဝ်ႈၵုၼ်ႇၸဝ်ႈသိၼ်မႂ်း၊ႁူဝ်ႁၢၼ်ၵူၼ်းသိုၵ်းၵႃႈမီးတီႈ မႂ်းဢိၵ်ႇတင်းမုၵ်ႉၵူၼ်းၸိူဝ်းၵူၼ်းဢၼ်မီးၵႃႈၼႂ်းမႂ်း တင်းသဵင်ႈတင်းလူင်ၼၼ်ႉတၵ်းလႆႈဢွၼ်ၵၼ်တူၵ်းၵႃႈၼႂ်းပၢင်ႇလၢႆႇ ၼႂ်းမိူဝ်ႈ ဢၼ်မႂ်းလူမ်ႉလႄႈလူႉၼၼ်ႉဢေႃႈ။
၂၈ ၵွပ်ႈပိူဝ်ႈသဵင်ၶဝ်ၸိူဝ်းဢၼ်ၶတ်းႁၢင်ႁိူဝ်းသၢင်းၽေႃးမႂ်းၼၼ်ႉ ဢွၼ်ၵၼ်ႁွင်ႉသႅၼ်ႇၼၼ်ႉလႄႈ ၵႃႈတီႈလဵပ်ႈႁွပ်ႈႁိမ်းႁွမ်းမႂ်းၸိူဝ်း ၼၼ်ႉတၵ်းမီးတၢင်းဢၼ်သၼ်ႇၶွၼ်းဝႆဢေႃႈ။
၂၉ ၶဝ်ၸိူဝ်းဢၼ်ၽၢႆးႁိူဝ်းၵႃႈမီး၊ ၵူၼ်းႁိူဝ်းသၢင်းၽေႃးၵႃႈမီး၊ ၶဝ်ၸိူဝ်းဢၼ် ၶတ်းႁၢင်ႁိူဝ်းသၢင်းၽေႃးၵႃႈမီးၼၼ်ႉ တၵ်းဢွၼ်ၵၼ်လူင်းသေ ၵႃႈၼိူဝ်ႁိူဝ်းသၢင်း ၽေႃးၶဝ်လႄႈ
၃၀ ၸုၵ်းယူႇၵႃႈၼိူဝ်ၵုင်းသေလႄႈ ႁႂ်ႈသဵင်ဢၼ်ၶဝ်သႅၼ်ႇႁွင်ႉၼၼ်ႉ ငိၼ်းၸွတ်ႇငိၼ်းတူဝ်ႈၵႃႈၼိူဝ်မႂ်းလႄႈႁႆႈႁွင်ႉႁႅင်း ယႂ်ႇၼႃႇလူင်လၢင်ဢေႃႈ။ၶဝ်တၵ်းဢွၼ်ၵၼ်ဢဝ်မုၼ်ႈလိၼ် ပိုၼ် သႂ်ႇၵႃႈၼိူဝ်ၵွၵ်း ႁူဝ်ၶဝ်လႄႈၵိင်ႈၵိူၵ်ႇယူႇၵႃႈၼႂ်းတဝ်ႊဢေႃႈ။
၃၁ ၶဝ်တၵ်းဢွၼ်ၵၼ်ထႃႁူဝ်ၵႅတ်းႁူဝ်ၶဝ်လႄႈ ဢဝ်ၶူဝ်းၼုင်ႈၼင်ပေႃႁတ်ႉဢႅဝ်ယူႇသေလႄႈ ပႃးတင်းတၢင်းဢၼ်ၶီၸႂ်ၶူမ်ၸႂ်၊ တၢင်းဢၼ်ၶၢင်းၶီၶၢင်းၽၢၼ်ဢၼ်ၶူမ်ၼႃႇ လူင်လၢင်သေလႄႈႁႆႈႁွင်ႉဢေႃႈ။
၃၂ ၼႂ်းမိူဝ်ႈဢၼ်ၶဝ်ႁႆႈႁွင်ႉယူႇၼၼ်ႉၸိုင် ၶဝ်တၵ်းႁဵတ်းတၢင်းဢၼ်ပွင်ႉၶၢင်းပွင်ႉမိုၼ်ၵွပ်ႈပိူဝ်ႈမႂ်းလႄႈ ဢွၼ်ၵၼ်ပွင်ႉၶၢင်းပွင်ႉမိူၼ်ႇပုၼ်ႈမႂ်းယူႇသေလႄႈဝႃႈ ဝဵင်းဢၼ် လႂ်မိူၼ်ၵၼ်တင်းဝဵင်းတုရု ဢၼ်ဝႃႈဝဵင်းဢၼ်သုမ်းၸွမ်းၵႃႈၼႂ်းပၢင်ႇ လၢႆႇၼၼ်ႉ။
၃၃ မိူဝ်ႈဢၼ်ဢုၵ်ႉၸႃႇမႂ်းဢွၵ်ႇၸွမ်းသဵၼ်ႈတၢင်းပၢင်ႇလၢႆႇၼၼ်ႉ မႂ်းႁႂ်ႈမဵဝ်းၵူၼ်းၼမ်ၼႃႇဢိမ်ၸႂ်တဵမ်ၸႂ်လႄႈ မႂ်းၸၢင်ႊႁႂ်ႈၶုၼ်ႁေႃၶမ်းလေႃးၵီႇတင်းလၢႆမၢၵ်ႇမီးလိူင်ႇၸႂ်လူၺ်ႈ ၸေးၸိမ်ႇမႂ်းဢၼ်ၼမ်ၼႃႇဢိၵ်ႇတင်းၵုၼ်ႇသိၼ်ၸိူဝ်းၼၼ်ႉဢေႃႈ။
၃၄ မိူဝ်ႈလဵဝ်ၼႆႉၸမ်း မႂ်းႁၵ်းလႅဝ်ၵႂႃႇလူၺ်ႈၼမ်ႉပၢင်ႇလၢႆႇၵႃႈၼႂ်းတီႈဢၼ်လိုၵ်ႉဢၼ်လမ်ႇၼၼ်ႉယဝ်ႉ။ဢုၵ်ႉၸႃႇၵုၼ်ႇသိၼ်မႂ်းဢိၵ်ႇတင်း ၶဝ်ၸိူဝ်းဢၼ်ပႃးတီႈမႂ်းတင်းသဵင်ႈတင်းလူင်ၼၼ်ႉ ဢွၼ်ၵၼ်သုမ်းၸွမ်းပႅတ်ႈၵႃႈ ၼႂ်းၵၢင်မႂ်းယဝ်ႉ။
၃၅ ၵူၼ်းၼႂ်းၵုၼ်တင်းသဵင်ႈတင်းလူင်ဢွၼ်ၵၼ်ငဝ်ငိူဝ်ႈၵႂင်ၸႂ်ယူႇၵွပ်ႈပိူဝ်ႈမႂ်းလႄႈ ၶုၼ်ႁေႃၶမ်းၶဝ်တင်းလၢႆၼၼ်ႉ ဢွၼ်ၵၼ်တူၵ်းၸႂ် လႂ်တိုၼ်ႇ သေလႄႈၼႃႈလူႉယူႇဢေႃႈ။
၃၆ ၸဝ်ႈၵုၼ်ႇၸဝ်ႈသိၼ်ၵႃႈၼႂ်းမဵဝ်းၵူၼ်းတင်း လၢႆဢွၼ်ၵၼ်ႁဵတ်းသဵင်သီႉသီႉသေႃႉသေႃႉသေႉသွမ်းမႂ်းဢေႃႈ။မႂ်းလႆႈပဵၼ်တီႈဢၼ်လီၵူဝ်လီႁႄၵႂႃႇယဝ်ႉလူင်ပေႇ။ၵမ်းလိုၼ်းမႂ်းတၵ်းဢမ်ႇလႆႈပေႃႇမႃးလႃးလႃးလူင်ပေႇ၊ဝႃႈၼင်ႇၼႆဢေႃႈ။