၇
၁ ၵူၼ်းၸိုင် လႆႈၵိုတ်းႁၢပ်ႇဢမူႉဢၼ်ယၢပ်ႇၽိုတ်ႇၼႃႇလူင်လၢင်ၵႃႈၼိူဝ်လိၼ်မိူင်းယူႇဢမ်ႇၸႂ်ႈႁိုဝ်။မိူဝ်ႉဝၼ်းၵႃႈဢၼ်မၼ်းလႆႈယူႇၼၼ်ႉ ပဵၼ်ၸိူဝ်ႉၼင်ႇမိူဝ်ႉဝၼ်းၵေႃႉဢၼ်ၶၢမ်ႇၵိၼ်ၸၢင်ႈၵိၼ်ငႃးၼၼ်ႉ ဢမ်ႇၸႂ်ႈႁိုဝ်။
၂ ၸိူဝ်ႉၼင်ႇ ၵေႃႉဢၼ်ၶၢမ်ႇႁဵတ်းၶႃႈၼၼ်ႉမုင်ႈမွင်းၶိင်ႇဢၼ်ၵၢင်ဝၼ်းၶမ်ႈ ၵေႃႉဢၼ်ၶၢမ်ႇၵိၼ်ၸၢင်ႈၵိၼ်ငႃးၼၼ်ႉမုင်ႈမွင်းၶိင်ႇဢၼ်လႆႈၵႃႈလႆႈၶၼ်ၼၼ်ႉ ၵဝ်ၼႆႉလႆႈၸၢပ်ႈသႅင်ႇၵၼ်တင်းလိူၼ်တုၵ်ႉၶႃႉ ဝၼ်းတုၵ်ႉၶႃႉ ယူႇဢေႃႈ။
၃ ၶိင်ႇၵၢင်ၶိုၼ်းဢၼ်လႆႈၶၢမ်ႇယၢပ်ႇၸႂ်ၼႃႇလူင်လၢင်ၸိူဝ်းၼၼ်ႉၵေႃႈပဵၼ်ပုၼ်ႈပဵၼ်တႃႇၵဝ် ဢေႃႈ။
၄ မိူဝ်ႈဢၼ်ၵဝ်ၼွၼ်းၼၼ်ႉၵေႃႈၵဝ်လႆႈလၢတ်ႈလႄႈဝႃႈ ၵဝ်တၵ်းလႆႈလုၵ်ႉမိူဝ်ႈ လႂ်၊ၶိင်ႇၵၢင်ၶိုၼ်းတၵ်းသဵင်ႈမိူဝ်ႈ လႂ်၊ ဝႃႈၼင်ႇၼႆယူႇလႄႈ လႆႈၵိင်ႈယူႇၵိူၵ်ႇယူႇသေလႄႈၼွၼ်းယူႇတေႃႇထိုင်ႁွတ်ႈမိူင်းလႅင်း ဢေႃႈ။
၅ ၼိူဝ်တူဝ်ၵဝ်လႆႈၶၢမ်ႇတၢင်းဢၼ်ၼွၼ်ဢိၵ်ႇတင်းၵုမ်ႇပူၵ်ႉႁေႃႇဝႆႉမိူၼ်ၼင်ႇၶူဝ်းၼုင်ႈလႄႈ ၼင်ၼိူဝ်ႉ ၵဝ်ၼႆႉတႅၵ်ႇလႅဝ်လႄႈပူၺ်ႇလၢၼ်ႈယူႇဢေႃႈ။
၆ မိူဝ်ႉဝၼ်းၵဝ်ႇၸိူဝ်းၼၼ်ႉၶၼ်ၽႂ်းလွၼ်းႁုၵ်ႇလႄႈ ယင်းဢမ်ႇမီးတီႈဢၼ်လီမုင်ႈမွင်းလႄႈ ဢွၼ်ၵၼ်ပူၼ်ႉၵႂႃႇဢေႃႈ။
၇ ၶႅၼ်းတေႃႈ ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ဢသၢၵ်ႈၵဝ်ၼႆႉ ပဵၼ်လူမ်းလွၼ်ႉလွၼ်ႉၸႅတ်ႈၸႅတ်ႈၵူၺ်းၼၼ်ႉ သေၵမ်း။
၈ ၵမ်းလိုၼ်းမၢၵ်ႇတႃႇၵဝ်ဢမ်ႇလႆႈႁၼ်ဢၵျူဝ်းဢၼ်လီ။မၢၵ်ႇတႃႇၵေႃႉဢၼ်ႁၼ်ၵဝ်ၼၼ်ႉၵမ်းလိုၼ်းတၵ်းဢမ်ႇလႆႈႁၼ်ၵဝ်။မိူဝ်ႈဢၼ်မၢၵ်ႇတႃၸဝ်ႈႁဝ်းလူတူၺ်းၶႃႈၸဝ်ႈၼၼ်ႉ ၶႃႈၸဝ်ႈတၵ်းဢမ်ႇမီးယဝ်ႉ။
၉ ၸိူဝ်ႉၼင်ႇၽႃႈၽူၼ်ပၢင်ႇလႄႈ လပ်ႉႁၢႆၵႂႃႇၼၼ်ႉၵေႃႉဢၼ်လူင်းၵႃႈၼႂ်းၶုမ်ပႃႇႁဵဝ်ႈၼၼ်ႉ ၵမ်းလိုၼ်းတၵ်းဢမ်ႇၶိုၼ်းလႆႈမႃး။
၁၀ မၼ်းတၵ်းဢမ်ႇလႆႈၶိုၼ်းမိူဝ်းၸူးၵႃႈတီႈႁိူၼ်းမၼ်းလႄႈ တီႈဢၼ်မၼ်းယူႇၵဝ်ႇၵဝ်ႇ ၼၼ်ႉၵမ်းလိုၼ်းဢမ်ႇလႆႈႁူႉၸၵ်းမၼ်း။
၁၁ ပိူဝ်ႈၼႆလႄႈၵဝ်တၵ်းဢမ်ႇဢိူတ်းသူပ်းၵဝ်ဝႆႉလႄႈ ၵဝ်တၵ်းမီးတၢင်းဢၼ်ႁူဝ်ယၢပ်ႇၽိုတ်ႇယူႇသေလႄႈ တၵ်းလၢတ်ႈၵႂၢမ်းဢေႃႈ။ မီးတၢင်းဢၼ်ၶီၸႂ်ၶူမ်ၸႂ်သေလႄႈတၵ်းပွင်ႉမိုၼ်ဢေႃႈ။
၁၂ ၵဝ်ၼႆႉပဵၼ်ပၢင်ႇလၢႆႁိုဝ်။ပဵၼ်ၼၵႃးႁိုဝ်။ၵွပ်ႈပိူဝ်ႈဢၼ်ၼႆလႄႈၸဝ်ႈႁဝ်းၸင်ႇလႆႈပႂ်ႉၶႃႈၸဝ်ႈယူႇၶႃႈႁိုဝ်။
၁၃ မိူဝ်ႈ ဢၼ်ၵဝ်ဝႃႈတီႈၼွၼ်းၵဝ် တၵ်းႁႂ်ႈၵဝ်သၢၵ်ႈသႃႇလႄႈၵူႇၵဝ်တၵ်းပၼ်ၵတ်းယဵၼ်ၶျၢမ်းသႃႇဢေႃႈ၊ ဝႃႈၼင်ႇ ၼႆၼၼ်ႉၸိုင်
၁၄ ၸဝ်ႈႁဝ်းပၼ်တၢင်းဢၼ်ၼွၼ်းၽၼ်ႁၼ်ဢၼ်လီၵူဝ်လီႁႄၼႃႇလူင်လၢင်လႄႈ ၸဝ်ႈႁဝ်းႁႂ်ႈၶႃႈၸဝ်ႈလႆႈတူၵ်းၸႂ် လူၺ်ႈရူႇပႃႇရုင်ႇၶိင်ႇၵၢင်ၶိုၼ်း ၼၼ်ႉလႄႈ
၁၅ ႁႂ်ႈၶႃႈၸဝ်ႈထၢၼ်ႈပေႃးၶႂ်ႈၶၢမ်ႇတၢင်းဢၼ်တဵၵ်းငႅၼ်းလႄႈ တၢႆလိူဝ်တွၼ်းၼႃႇသေတၢင်းဢၼ်သေလၢႆလုပ်ႇတူဝ်ၸဝ်ႈၵဝ်ႇၼၼ်ႉ တီႈၶႃႈဢေႃႈ။
၁၆ ၵဝ်ၼႆႉ မီးတၢင်းဢၼ်ႁႅင်းဢူၼ်ႈႁႅင်းယွမ်းယူႇလႄႈဢသၢၵ်ႈၵဝ်ဢမ်ႇလႆႈလိပ်းယူႇသေႇသေႇ။ ယႃႇၵဝ်တႃႉ။ ဢသၢၵ်ႈၵဝ်ၼႆႉပဵၼ်ဢၢႆပဵၼ်ၵႂၼ်းၵူၺ်းဢေႃႈ။
၁၇ ၵူၼ်းၼႆႉပဵၼ်ၵေႃႉၸိူဝ်ႉၼင်ႇႁိုဝ်လႄႈ ၸဝ်ႈႁဝ်းႁဵတ်းပမႃႇၼႃႉတီႈမၼ်းယူႇ၊ ၸဝ်ႈႁဝ်းသမ်ႉတူၺ်းမၼ်းယူႇၵူႈၸူဝ်ႈၵူႈယၢမ်းယူႇ၊
၁၈ ၸဝ်ႈႁဝ်းမႃးလူမႃးတူၺ်းမၼ်းၵူႈၼႂ်ယူႇ၊ ၸဝ်ႈႁဝ်းသမ်ႉတူၺ်းမၼ်းၵူႈၸူဝ်ႈၵူႈယၢမ်း ယူႇၶႃႈ။
၁၉ ၶိင်ႇၵႃႇလႃႉႁိုင်ၵႃႈႁိုဝ်။ၸဝ်ႈႁဝ်းတၵ်းဢမ်ႇဝၢႆႇၼႃႈပႅတ်ႈၶႃႈၸဝ်ႈလႄႈ ဢမ်ႇႁႂ်ႈၶႃႈၸဝ်ႈလႆႈပဵၼ်ၶေႃၶေႃတီႈၶႃႈ။ၸဝ်ႈဢၼ်ပႂ်ႉလူပႂ်ႉတူၺ်းၵူၼ်းၼၼ်ႉ တီႈၶႃႈဢိူၺ်း။
၂၀ သင်ၶႃႈၸဝ်ႈမီးဢပျႅတ်ႈၸိုင်ၶႃႈၸဝ်ႈလႆႈႁဵတ်းမႅၼ်ႈတီႈၸဝ်ႈႁဝ်းတီႈၶႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းႁႂ်ႈၶႃႈၸဝ်ႈပဵၼ်တီႈယိူင်းမၢႆပုၼ်ႈဢၼ်တၵ်းယိူင်းတၵ်းယိုဝ်းၼၼ်ႉတီႈၶႃႈ။ ၸွင်ႇၶႃႈ ၸဝ်ႈလႆႈပဵၼ်ဢၼ်လီႁင်ႈတီႈၸဝ်ႈႁဝ်းၶႃႈႁိုဝ်။
၂၁ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းဢမ်ႇပွႆႇလွတ်ႈတၢင်းဢၼ်ၶႃႈၸဝ်ႈၽိတ်းပိူင်ႈၼၼ်ႉလႄႈ ဢမ်ႇၽေႇဢပျႅတ်ႈၶႃႈၸဝ်ႈမူတ်းမူတ်းသဵင်ႈသဵင်ႈတီႈၶႃႈ။မိူဝ်ႈလဵဝ်ၼႆႉ ၶႃႈၸဝ်ႈတၵ်းလႆႈၼွၼ်းၵႃႈတီႈမုၼ်လိၼ်လႄႈ မိူဝ်ႈဢၼ်ၸဝ်ႈႁဝ်းႁႃၶႃႈၸဝ်ႈၼၼ်ႉၸိုင်၊ၶႃႈၸဝ်ႈတၵ်းဢမ်ႇမီးတီႈၶႃႈယဝ်ႉ၊ဝႃႈၼင်ႇၼႆဢေႃႈ။