၁၈
ပိလတတ်ႉ
၁ မိူဝ်ႈၼၼ်ႉပိလတတ်ႉ ၵူၼ်းမဵဝ်းသုဢႃႇဢွၵ်ႇသူပ်းၶိုၼ်း လၢတ်ႈလႄႈဝႃႈ၊-
၂ မႂ်းတၵ်းႁႃထွႆႁႃၵႂၢမ်းယူႇႁိုင်ၵႃႈႁိုဝ်။ႁဵတ်းသတိတႃႉဢိူၺ်း။ပေႃးၼႆၸင်ႇႁဝ်းတၵ်းလၢတ်ႈ ၵႂၢမ်းတေႃႇၵၼ်ဢေႃႈ။
၃ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းမၢတ်ႈႁဝ်းပဵၼ်ၸိူဝ်ႉၼင်ႇတရိၵ်ႈသၢၼ်ႇလႄႈ မၢတ်ႈႁဝ်းပဵၼ်ဢၼ်ဢမ်ႇမူတ်းသႂ်သိုဝ်ႈၼႃႈတႂ်ႈတႃမႂ်း။
၄ ၵေႃႉဢၼ်တၢင်းၸႂ်မႆႈၶႆႈၸႃႉဢွၵ်ႇလႄႈ ၶူပ်းတူဝ်ၸဝ်ႈၵဝ်ႇၶၢတ်ႇၼႆႉဢိူၺ်း။လိၼ်မိူင်းတင်းလၢႆၶၢမ်ႇတၢင်းဢၼ်ၸုၼ်ႉပႅတ်ႈၵွပ်ႈပိူဝ်ႈမႂ်းႁိုဝ်။ မၢၵ်ႇႁိၼ်မၢၵ်ႇၽႃတၵ်းလႆႈၶၢမ်ႇတၢင်းဢၼ်ၶၢႆႉသေ ၵႃႈတီႈဢွင်ႈတီႈယူႇ မၼ်းၵွပ်ႈပိူဝ်ႈမႂ်းႁိုဝ်။
၅ ၵွၵ်းၽႆးၵေႃႉဢၼ်ႁၢႆႉမိူၵ်ႈၼၼ်ႉတၵ်းလပ်းႁၢႆၵႂႃႇဢမၢၼ်ႇၶၼ်ပဵၼ်လႄႈ ပိဝ်ၽႆးမၼ်း ဢမ်ႇလႆႈလုၵ်ႉလႆႈႁိူဝ်ႈ။
၆ ဢၼ်လႅင်းၼႂ်းသုမ်ႉထဵင်တီႈယူႇတီႈသဝ်းမၼ်းၼၼ်ႉတၵ်းလပ်းသိင်ႇၵႂႃႇလႄႈ ၵွၵ်းၽႆးၵႃႈႁိမ်းမၼ်းၼၼ်ႉတၵ်းမွတ်ႇတၵ်းတၢႆဢေႃႈ။
၇ တၢင်းၵႂႃႇတၢင်းပႆမၼ်း ဢၼ်ၵႅၼ်ႇၶႅင်ႁႅင်းလီၼၼ်ႉတၵ်းႁွတ်ႈထိုင်တီႈဢၼ်ၵိတ်ႇၵႅၼ်လႄႈ တၢင်းၵျၢမ်ႇတၢင်းပွင်မၼ်းၼၼ်ႉ တၵ်းႁႂ်ႈမၼ်းတူၵ်းသုမ်းဢေႃႈ။
၈ တိၼ်မၼ်းႁႂ်ႈမၼ်းတူၵ်းၶဝ်ႈ ၵႃႈၼႂ်းၼႅင်ႈၼႂ်းၶလေႄႈ မၼ်းယဵပ်ႇသႂ်ႇၵႃႈၼႂ်းတူင်ႇၶိူမ်းဢေႃႈ။
၉ ဢၼ်ႁၢင်ႈၼၼ်ႉထုၵ်ႇမႅၼ်ႈသူၼ်ႈတိၼ်မၼ်းလႄႈ တူင်ႇႁဵဝ်ႉတူင်ႇၶိူမ်း ႁတ်ႉတိၼ်မၼ်းဝႆႉဢေႃႈ။
၁၀ တူင်ႇႁဵဝ်ႉၽင်ဝႆႉၵႃႈတီႈလိၼ်ပုၼ်ႈမၼ်းလႄႈ ဢၼ်ႁၢင်ႈၼၼ်ႉမီးဝႆႉၵႃႈတီႈသဵၼ်ႈ တၢင်းဢၼ်မၼ်းၵႂႃႇၼၼ်ႉဢေႃႈ။
၁၁ တၢင်းဢၼ်လီၵူဝ်လီႁႄတင်းလၢႆလွမ်ႉႁွပ်ႈဝႆႉယူႇၵူႈၽၢႆႇၵူႈပႃႈလႄႈ လိုပ်ႈ ၸွမ်းလမ်းၸွမ်းတိၼ်မၼ်းဢေႃႈ။
၁၂ ႁႅင်းမၼ်းဢူၼ်ႈယွမ်းၵႂႃႇၵွပ်ႈပိူဝ်ႈတၢင်းဢိုပ်းယၢၵ်ႈၼၼ်ႉလႄႈ ၽေးတၢင်းဢၼ်လူႉလႅဝ်ၼၼ်ႉ မႄးႁႅၼ်းဝႆႉမီးၵႃႈတီႈႁိမ်း မၼ်းဢေႃႈ။
၁၃ ၽေးၼၼ်ႉတၵ်းၶူပ်းငၢၼ်ႈၼိူဝ်ႉမၼ်းၼင်မၼ်းလႄႈ လုၵ်ႈၸၢႆးတူၼ်ႈၶုၼ်တၢႆၼၼ်ႉတၵ်းဢိုၼ် ၵိၼ်တူဝ်ၶိင်းမၼ်းဢေႃႈ။
၁၄ မၼ်းတၵ်းလႆႈၶၢမ်ႇတၢင်းဢၼ်ထူၺ်ႈဢဝ်ဢွၵ်ႇသေ ၵႃႈၼႂ်းသုမ်ႉထဵင်တီႈယူႇမၼ်း တီႈဢၼ်မၼ်းသွင်ႈပိုင်ႈယူႇၼၼ်ႉလႄႈ ၶၢမ်ႇတၢင်းဢၼ်ဢဝ်ၵႂႃႇသူင်ႇ ၵႃႈတီႈၽေးတၢမ်ႇၶုၼ်ႁေႃ ၶမ်းဢေႃႈ။
၁၅ ၶဝ်ၸိူဝ်းဢၼ်ဢမ်ႇၸၢပ်ႈဢမ်ႇသႅင်ႇတင်းမၼ်းၼၼ်ႉ ဢွၼ်ၵၼ်ယူႇၵႃႈၼႂ်းသုမ်ႉထဵင်တီႈယူႇတီႈသဝ်းမၼ်းၼၼ်ႉလႄႈ ၵၢၼ်ႈဢၼ်မႆႈၽႆးယူႇၼၼ်ႉ တဵမ်ဝႆႉၵႃႈၼႂ်းသုမ်ႉထဵင်မၼ်းဢေႃႈ။
၁၆ ငဝ်ႈႁၢၵ်ႈမၼ်းၵႃႈတီႈတႂ်ႈၼၼ်ႉ မီးတၢင်းဢၼ်ယူတ်းႁႅင်ႈၵႂႃႇလႄႈၵိင်ႇမၼ်းၶႃႊမၼ်းၵႃႈတီႈၼိူဝ်ၼၼ်ႉ မီးတၢင်းဢၼ်လွၵ်ႇ ၵႂႃႇတၢႆၵႂႃႇဢေႃႈ။
၁၇ တီႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်းမၼ်းၼၼ်ႉ လူႉႁၢႆၵႂႃႇသေၵႃႈၼိူဝ်လိၼ်မိူင်းလႄႈၽူႈ လႂ်သေၵေႃႉသေၵူၼ်း ဢမ်ႇတူၵ်ႇဢမ်ႇႁႃၼႃႇမႃႉၸိုဝ်သဵင်မၼ်းၵႃႈၼႂ်းသဵၼ်ႈတႃႈသၢႆတၢင်းၼၼ်ႉ။မၼ်းတၵ်းလႆႈၶၢမ်ႇ တၢင်းဢၼ်ႁေႃႈဢွၵ်ႇသေၵႃႈၼႂ်းဢၼ်လႅင်းၸူး ၵႃႈၼႂ်းဢၼ်လပ်းသိင်ႇလႄႈ ၶၢမ်ႇတၢင်းဢၼ်လိုပ်ႈလူၺ်း ဢွၵ်သေၵႃႈၼႂ်းမိူင်းၵူၼ်း ဢေႃႈ။
၁၈ ၼႂ်းမဵဝ်းမၼ်းၼၼ်ႉလုၵ်ႈလၢၼ်မၼ်းတၵ်းဢမ်ႇလႆႈမီး။ၵူၼ်းႁိူၼ်းၵူၼ်းယေးမၼ်းဢမ်ႇလႆႈၵိုတ်း ဝႆႉၵျၢၼ်ႇဝႆႉသေၵေႃႉသေၵူၼ်း။
၁၉ ၶဝ်ၸိူဝ်းဢၼ်ပဵၼ်မႃးလိုၼ်းမၼ်းၼၼ်ႉ ဢွွၼ်ၵၼ်ၵိုတ်းမိုင်ၵႂင်ၸႂ်ၵွပ်ႈပိူဝ်ႈဢမူႉမၼ်းၼၼ်ႉလႄႈ ၶဝ်ၸိူဝ်းဢၼ်ပဵၼ်ဢွၼ်တၢင်း မၼ်းၼၼ်ႉဢွၼ်ၵၼ်တူၵ်းၸႂ်ဢေႃႈ။
၂၀ တီႈယူႇတီႈသဝ်းၶဝ်ၸိူဝ်းဢၼ်ႁၢႆႉမိူၵ်ႈၼၼ်ႉ မီးလၢၵ်ႈၶၼႃႇၸိူဝ်ႉၼင်ႇၼၼ်ဢမၢၼ်ႇၶၢၼ်ပဵၼ်ယဝ်ႉ။ၵေႃႉဢၼ်ဢမ်ႇႁူႉၸၵ်းၽြႃးပဵၼ်ၸဝ်ႈၼၼ်ႉ တၵ်းလႆႈႁွတ်ႈထိုင်တီႈၸိူဝ်ႉၼင်ႇၼၼ်ဢေႃႈ၊ ဝႃႈၼင်ႇၼႆဢေႃႈ။