၁၀
၁ ၵဝ်မိူဝ်ႇၸၢၼ်ႈဢသၢၵ်ႈၵဝ်ဢေႃႈ။ ၵဝ်တၵ်းပွႆႇပိုၼ်ႉပွႆႇပႅတ်ႈ တၢင်းဢၼ်ၵဝ်ပွင်ႉၶၢင်းပွင်ႉမိုၼ်ၼၼ်ႉလႄႈၵဝ်တၵ်းမီး ၸႂ်ဢၼ်ႁဵဝ်ႇၸွပ်ႈၼႃႇလူင်လၢင်သေလႄႈလၢတ်ႈဢေႃႈ။
၂ ၵဝ်တၵ်းလဝ်ႈလၢတ်ႈတီႈၽြႃးပဵၼ်ၸဝ်ႈလႄႈဝႃႈၸမ်း၊-ယႃႇပေၸီႇယၢင်ႇဢပျႅတ်ႈၵႃႈတီႈၶႃႈၸဝ်ႈသေၵမ်းတီႈၶႃႈ။ၶႅၼ်းတေႃႈၼႄပျႃးလွင်ႈဢၼ် ၸဝ်ႈႁဝ်းႁဵတ်းၶတ်းၵၼ်တင်းၶႃႈၸဝ်ႈ ယူႇၼၼ်ႉသေၵမ်းတီႈၶႃႈ။
၃ ၸဝ်ႈႁဝ်းထုၵ်ႇလီၼိၵ်ႈၸၢၵ်ႈငႅၼ်းသေးတီႈၶႃႈႁိုဝ်။ၸဝ်ႈႁဝ်းထုၵ်ႇလီလီႁင်ႈဢဵတ်ႇသဵတ်ႇ လွင်ႈတၢင်းဢၼ်ၸဝ်ႈႁဝ်းႁဵတ်းပဵၼ်ၼၼ်ႉသေလႄႈ ႁိူဝ်ႈလႅင်းထွင်ႇသႂ်ႇ တီႈတၢင်းၵျၢမ်ႇ တၢင်းပွင်ၵေႃႉဢၼ်ႁၢႆႉဢၼ်ႁုၵ်းၼၼ်ႉတီႈၶႃႈႁိုဝ်။
၄ ၸဝ်ႈႁဝ်းမီးမၢၵ်ႇတႃရူႇပႃႉတီႈၶႃႈႁိုဝ်။ မၼ်းၸဝ်ႈႁၼ်မိူၼ် ၸိူဝ်ႉၼင်ႇဢၼ်ၵူၼ်းႁၼ်ၼၼ်ႉတီႈၶႃႈႁိုဝ်။
၅ မိူဝ်ႉဝၼ်းမၼ်းၸဝ်ႈၸိူဝ်းၼၼ်ႉ မိူၼ်ၸိူဝ်ႉၼင်ႇမိူဝ်ႉဝၼ်းၵူၼ်း တီႈၶႃႈႁိုဝ်။
၆ ၶူပ်ႇပီႊၸဝ်ႈႁဝ်းၸိူဝ်းၼၼ်ႉပဵၼ်ၸိူဝ်ႉၼင်ႇၶူပ်ႇပီႊၵူၼ်းၸၢႆးလႄႈ ၸဝ်ႈႁဝ်းၸႅတ်ႈထၢမ်ၸႅတ်ႈတူၺ်းတူႉၸရိူၵ်ႈၶႃႈၸဝ်ႈလႄႈ သွၵ်ႈႁႃဢပျႅတ်ႈၶႃႈ ၸဝ်ႈတီႈၶႃႈႁိုဝ်။
၇ ၸဝ်ႈႁဝ်းႁူႉလွင်ႈဢၼ်ၶႃႈၸဝ်ႈဢမ်ႇၸႂ်ႈၵူၼ်းႁၢႆႉလႄႈ ၽူႈ လႂ်သေၵေႃႉသေၵူၼ်းဢမ်ႇၵႄႇသႄႇၼုၵ်ႈဢဝ်ၵဝ်ၶႃႈ ဢွၵ်ႇသေၵႃႈၼႂ်းမိုဝ်းၸဝ်ႈႁဝ်း လႆႈၼၼ်ႉတီႈၶႃႈ။
၈ ၸဝ်ႈႁဝ်းဢဝ်တင်းမိုဝ်းၸဝ်ႈႁဝ်းႁဵတ်းပဵၼ်ၶႃႈၸဝ်ႈလႄႈပွင်ႁဵတ်းပွင်မႄးၶႃႈၸဝ်ႈၸုင်ႇၽွမ်ႉၸေးၸေးၸွတ်ႇၸွတ်ႇယဝ်ႉလႄႈ ၸဝ်ႈႁဝ်း တၵ်းယႃႉၶႃႈၸဝ်ႈပႅတ်ႈတီႈၶႃႈႁိုဝ်။
၉ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းလွင်ႈ ဢၼ်ၸဝ်ႈႁဝ်းပွင်ႁဵတ်းပွင်မႄးၶႃႈၸဝ်ႈမိူၼ်ၸိူဝ်ႉၼင်ႇဢၼ် ဢဝ်လိၼ်ၼဵဝ်ႁဵတ်းၼၼ်ႉ သေၵမ်းတီႈၶႃႈ။
၁၀ ၸဝ်ႈႁဝ်းတၵ်းႁႂ်ႈၶိုၼ်းပဵၼ်မုၼ်လိၼ်တီႈၶႃႈႁိုဝ်။ၸဝ်ႈႁဝ်းထွၵ်ႇႁိုဝ်ႈၶႃႈၸဝ်ႈမိူၼ်ၸိူဝ်ႉၼင်ႇၼမ်ႉၼူမ်းလႄႈ ႁႂ်ႈၶႃႈၸဝ်ႈၵွၼ်ႈၵၢမ်ႈမိူၼ်ၸိူဝ်ႉၼင်ႇ ၼမ်ႉ ၼူမ်းၵၢမ်ႈၼၼ်ႉယဝ်ႉ၊ဢမ်ႇၸႂ်ႈတီႈၶႃႈႁိုဝ်။
၁၁ ၸဝ်ႈႁဝ်းဢဝ်ၼိူဝ်ႉဢဝ်ၼင်ၼုင်ႈႁေႃႇပၼ်လႄႈ ႁႂ်ႈၶႃႈၸဝ်ႈပဵၼ်တၢင်း ဢၼ်မၼ်ႈၶွတ်ႇၽွတ်ႈၶဵၼ်းဝႆႉလူၺ်ႈလုပ်ႇ လူၺ်ႈဢဵၼ်တီႈၶႃႈယဝ်ႉ။
၁၂ ၸဝ်ႈႁဝ်းပၼ်တၢင်းဢၼ်ဢသၢၵ်ႈလိပ်းဢိၵ်ႇတင်း ၵျေးၸူးတီႈၶႃႈၸဝ်ႈတီႈၶႃႈယဝ်ႉ။ၵျေးၸူးတၢင်းဢၼ်ၸဝ်ႈႁဝ်းလူတူၺ်းလုမ်းလႃး ၼၼ်ႉၵေႃႈၸွႆႈထႅမ်မႃႉၸႃႉဝိၺိၺ်ႇၶႃႈၸဝ်ႈတီႈၶႃႈယဝ်ႉ။
၁၃ လွင်ႈတၢင်းဢၼ်ႁွတ်ႈထိုင်မိူဝ်ႈလဵဝ်ၼႆႉၸိူဝ်းၼႆႉၵေႃႈ၊ ၸဝ်ႈႁဝ်းသိမ်းဝႆႉသိူင်ႇဝႆႉၵႃႈၼႂ်းႁူဝ်ၸႂ်ၸဝ်ႈႁဝ်းလႄႈ ၶႃႈၸဝ်ႈႁူႉလွင်ႈဢၼ်ႁွတ်ႈထိုင်မႅၼ်ႈၸွမ်းၵႃႈၼင်ႇဢၼ်ၸဝ်ႈႁဝ်းၵျၢမ်ႇပွင်ၼၼ်ႉတီႈၶႃႈဢေႃႈ။
၁၄ ပေႃးၶႃႈၸဝ်ႈၽိတ်းပိူင်ႈၸိုင် ၸဝ်ႈႁဝ်းမၢတ်ႈတွင်းဝႆႉတီႈၶႃႈဢေႃႈ။ၸဝ်ႈႁဝ်းတၵ်းဢမ်ႇပွႆႇလွတ်ႈဢပျႅတ်ႈၶႃႈၸဝ်ႈၼၼ်ႉတီႈၶႃႈ။
၁၅ ပေႃးၶႃႈၸဝ်ႈႁၢႆႉယုတ်ႈၸိုင်ၶႃႈၸဝ်ႈမီးဢႃႉမၢင်ႇၵလႃႇတီႈၶႃႈဢေႃႈ။ပိၵ်ႉသမ်ႉၶႃႈၸဝ်ႈသိုဝ်ႈတေႃႇယူႇသေၵေႃႈ ၶႃႈၸဝ်ႈဢမ်ႇလႆႈယုၵ်ႉႁူဝ်ငွၵ်ႈႁူဝ်ၶႃႈၸဝ်ႈတီႈၶႃႈ။ၶႃႈၸဝ်ႈလႆႈတဵမ်ဝႆႉတင်းတၢင်းဢၼ်ဢူၵ်းဢၼ်ဢၢႆ ဢိၵ်ႇတင်းတၢင်းဢၼ်ထူပ်းႁၼ် တုၵ်ႉၶႃႉတၢင်းၽၢၼ်ၶႃႈၸဝ်ႈၼၼ်ႉယူႇတီႈ ၶႃႈဢေႃႈ။
၁၆ ပေႃးၶႃႈၸဝ်ႈလုၵ်ႉၸိုင်၊ၸဝ်ႈႁဝ်းလဵပ်ႈႁႃလွမ်ႁႃၶႃႈၸဝ်ႈယူႇ မိူၼ်ၸိူဝ်ႉၼင်ႇသၢင်ႇသီႈလႄႈၼႄပျႃႉတူဝ်ၸဝ်ႈႁဝ်းတီႈၶႃႈၸဝ်ႈၼႂ်းတၢင်းဢၼ်ႁဵတ်းလွင်ႈတၢင်ႈဢၼ်လီဢၢမ်းၼၼ်ႉတီႈၶႃႈဢေႃႈ။
၁၇ ၸဝ်ႈႁဝ်းသမ်ႉၶိုၼ်း ႁဵတ်းသၢၵ်ႈသေႇယူႇၽၢႆႇၼိုင်ႈတင်းၶႃႈၸဝ်ႈထႅင်ႈလႄႈ ႁႂ်ႈတၢင်းၸႂ်မႆႈၶႆႈၸႃႉၸဝ်ႈႁဝ်းယႂ်ႇၽႄႈၼမ်မႃးတီႈၶႃႈၸဝ်ႈယူႇသေလႄႈရၢၼ်ႇသူႇသိုၵ်းတင်းလၢႆ ဢွၼ်ၵၼ်လုၵ်ႉပဵၼ်ၸၼ်ႉပဵၼ်ထၢပ်ႈ ယူႇၽၢႆႇၼိုင်ႈတင်းၶႃႈၸဝ်ႈတီႈၶႃႈဢေႃႈ။
၁၈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းဢဝ်ၶႃႈၸဝ်ႈဢွၵ်ႇသေၵႃႈၼႂ်းတွင်ႉမေႈၼင်ႇႁိုဝ်တီႈၶႃႈ။သင်ဢမ်ႇၼၼ်ၸႂ်ၶႃႈၸဝ်ႈၶၢတ်ႇယဝ်ႉလႄႈ မၢၵ်ႇတႃၽူႈ လႂ်သေၵေႃႉသေ ၵူၼ်းဢမ်ႇလႆႈႁၼ်ၶႃႈၸဝ်ႈယဝ်ႉတီႈၶႃႈ။
၁၉ ပေႃးၶႃႈၸဝ်ႈယင်းဢမ်ႇပဵၼ်ႈၵူၼ်းမႃး၊ ဢမ်ႇၼၼ်ပေႃးၶႃႈၸဝ်ႈလႆႈၶၢမ်ႇ တၢင်းဢၼ်ဢဝ်သေၵႃႈၼႂ်းတွင်ႉမေႈမႃးသေလႄႈ သူင်ႇႁွတ်ႈၵႃႈတီႈ ပႃႇႁဵဝ်ႈသၢင်းၶျႅင်းၼၼ်ႉၵမ်းလဵဝ်ၸိုင် မိူဝ်ႉဝၼ်းၶႃႈၸဝ်ႈၸိူဝ်းၼႆႉတၵ်း ၵေႇၼႃႇမၢင်ၼႃႇဢမ်ႇၸႂ်ႈတီႈၶႃႈႁိုဝ်။
၂၀ ယႃႇၶႃႈၸဝ်ႈတီႈၶႃႈတႃႉ။ႁႂ်ႈၶႃႈၸဝ်ႈလႆႈမီးတၢင်းဢၼ််သၢၵ်ႈသႃႇ ၶႅၼ်းၸႂ်ဢိတ်းဢွၼ်ႇၼိုင်ႈသေၵမ်းၶႃႈ။
၂၁ ၸူဝ်ႈဢၼ်ၶႃႈၸဝ်ႈဢမ်ႇပႆႇၵႂႃႇၵႃႈတီႈဢၼ်ဢမ်ႇၶိုၼ်းမႃးလႆႈ မိူင်းဢၼ်လပ်းသိင်ႇ တင်းႁူမ်ႈၵွင်ႉငဝ်းတၢင်းတၢႆႁူမ်ႇသုမ်ႇ ဝႆႉ၊
၂၂ လိူၼ်လမ်ပဵၼ်ဢၼ်လပ်းသိင်ႇၽိတ်းၽိတ်း၊ မိူင်းတီႈႁူမ်ႈၵွင်ႉငဝ်းတၢင်းတၢႆသုၵ်ႉသီႈသုၵ်ႉသၢၵ်ႉ၊ မိူင်းဢၼ်ဢၼ်လႅင်း ပဵၼ်ဢၼ်လပ်းသိင်ႇလွၼ်ႉလွၼ်ႉၸႅတ်ႈၸႅတ်ႈၼၼ်ႉၸိုင်ၶႅၼ်းတေႃႈယႃႇၶႃႈၸဝ်ႈလႄႈ ႁႂ်ႈလႆႈတၢင်းသၢၵ်ႈသႃႇ ဢိတ်းဢွၼ်ႇၼိုင်ႈသေၵမ်းတီႈၶႃႈ၊ ဝႃႈၼင်ႇၼႆဢေႃႈ။