၃၆
၁ လၢႆးသမ်ႉဢေႇလိႁု သိုပ်ႇၵႂၢမ်းလႄႈဢွၵ်ႇသူပ်းဝႃႈထႅင်ႈၸမ်း၊-
၂ ယိူၼ်ႉၶၢမ်ႇၵဝ်သေၵမ်း။ၵဝ်တၵ်းၼႄပျႃးလွင်ႈမၼ်းတၢင်းမၼ်းတီႈမႂ်းထႅင်ႈလူးၵွၼ်ႇဢေႃႈ။မီးတီႈတၵ်းလၢတ်ႈပုၼ်ႈၽြႃးပဵၼ်ၸဝ်ႈထႅင် လူးၵွၼ်ႇဢေႃႈ။
၃ ၵဝ်တၵ်းဢဝ်ပိင်ႇၺႃႇၵဝ်သေ ၵႃႈတီႈဢၼ်ၵႆၼၼ်ႉမႃးလႄႈ တၵ်းၼႄပျႃးလွင်ႈဢၼ်ၸဝ်ႈဢၼ်ၽၢၼ်ႇ သၢင်းႁဵတ်းပဵၼ်ၵဝ်ၼၼ်ႉသိုဝ်ႈတေႃႇၼၼ်ႉဢေႃႈ။
၄ ၵႂၢမ်းၵဝ်ၼၼ်ႉ ဢမ်ႇပဵၼ်ဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉဢမၢၼ်ႇၶၢၼ်ပဵၼ်ဢေႃႈ။ၵေႃႉဢၼ်ၸေးၸုမ်ႇဝႆႉတင်းဢတၢတ်ႈပိင်ႇၺႃႇၼၼ်ႉ မီးယူႇၵႃႈတီႈႁိမ်းမႂ်းဢေႃႈ။
၅ ၽြႃးပဵၼ်ႈၸဝ်ႈတၼ်းၶူဝ်းယႂ်ႇဢေႃႈ။မၼ်းၸဝ်ႈဢမ်ႇၸၢင်ႊႁဵတ်းဢမ်ႇပေႃးၼင်ႇႁိုဝ်ၼၼ်ႉတီႈၽူႈ လႂ်။မၼ်းၸဝ်ႈ တဵမ်ဝႆႉတင်းတၢင်းၵတ်ႉတၢင်းၶၼ်ၺၢၼ်ႇဢေႃႈ။
၆ မၼ်းၸဝ်ႈဢမ်ႇပႂ်ႉဢသၢၵ်ႈ ၶဝ်ၸိူဝ်းဢၼ်ဢမ်ႇတြႃးၼၼ်ႉ။မၼ်းၸဝ်ႈၸီႇယၢင်ႇဢၶႂၢင်ႉတြႃးၽၢႆႇၶဝ်ၸိူဝ်း ဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉဢေႃႈ။
၇ မၼ်းၸဝ်ႈ ယင်းဢမ်ႇဝၢႆႇတႃမၼ်းၸဝ်ႈသေ ၵႃႈတီႈၶဝ်ၸိူဝ်းဢၼ်သိုဝ်ႈတေႃႇၼၼ်ႉ။မၼ်းၸဝ်ႈႁႂ်ႈၶဝ်ၼင်ႈယူႇထႃႇဝရႃႉ ၵႃႈၼိူဝ်ရႃႇၸႃႉပလၢင်ႇႁူမ်ႈလူၺ်ႈၵၼ် တင်းၶုၼ်ႁေႃၶမ်းလႄႈယုၵ်ႉယွင်ႈၶဝ်ဢေႃႈ။
၈ ပေႃးၶဝ်လႆႈ ၶၢမ်ႇတၢင်းဢၼ်သႂ်ႇဝႅၼ်လဵၵ်းလႄႈမီးတင်းဢၼ်ဢဝ်တင်းၸိူၵ်ႈတုၵ်ႉၶႃႉ မတ်ႉၽုၵ်ႈၸိုင်မၼ်းၸဝ်ႈၼႄပျႃးဢမူႉၶဝ်ဢိၵ်ႇတင်း
၉ တၢင်းဢၼ်ၶဝ်ပူၼ်ႉလိူဝ်ဢၼ်ၶဝ်မီးမၢၼ်ႇမႃႇၼႃႉၸႂ်သုင်သေလႄႈ ႁဵတ်းမႅၼ်ႈၼၼ်ႉ ဢေႃႈ။
၁၀ မၼ်းၸဝ်ႈၽုၺ်ႇပိုတ်ႇႁူၶဝ်ႁႂ်ႈၶဝ်ထွမ်ႇငိၼ်းၵႂၢမ်းဢၼ်သင်ႇသွၼ်သုင်းမႃႉၼၼ်ႉလႄႈ ပိင်းၺၢပ်ႈႁႂ်ႈ ၶဝ်ၸုၼ်ႉပႅတ်ႈတူႉၸရိူၵ်ႈဢေႃႈ။
၁၁ ပေႃးၶဝ်ထွမ်ႇဢဝ်ၵႂၢမ်းမၼ်းၸဝ်ႈလႄႈ ၵိုတ်ႈႁၢပ်ႇဢမူႉၶဝ်ၸိုင်ၶဝ်တၵ်းလႆႈလီလႆႈပဵၼ်ယူႇသေ လႄႈပူၼ်ႉမိုဝ်ႉပူၼ်ႉဝၼ်းၶဝ်ဢေႃႈ။ၶဝ်တၵ်းလႆႈ မူၼ်ႈပျေႃႇၵတ်းယဵၼ်ၶျၢမ်းသႃႇယူႇသေ လႄႈပူၼ်ႉပီႊၶဝ်လိူၼ်ၶဝ်ဢေႃႈ။
၁၂ ပေႃးၶဝ်ဢမ်ႇထွမ်ႇဢမ်ႇဢဝ်ၸိုင် ၶဝ်တၵ်းဢွၼ်ၵၼ်သုမ်းၸွမ်းလူၺ်ႈၽေးလၢပ်ႇၽေးလႅဝ်းလႄႈ ယင်းဢမ်ႇမီးဢတၢတ်ႈ ပိင်ႇၺႃႇလႄႈတၢႆၵႂႃႇဢေႃႈ။
၁၃ ၶဝ်ၸိူဝ်းဢၼ်မီးသၽေႃးဢၼ်ၵူဝ်ႈၵိူၵ်ႇၼၼ်ႉၸၢင်ႊဢွၼ်ၵၼ်သိမ်းဝႆႉတၢင်းၸႂ်မႆႈၶႆႈၸႃႉမၼ်းၸဝ်ႈလႄႈ ၸၢင်ႊဢွၼ်ၵၼ်ႁွင်ႉသႅၼ်ႇယွၼ်းဢဝ် တၢင်းဢၼ်ၸွႆႈထႅမ်မႃႉၸႃႉၼႂ်း မိူဝ်ႈဢၼ်မၼ်းၸဝ်ႈမတ်ႉၽုၵ်ႇၼၼ်ႉဢေႃႈ။
၁၄ လူမ်းဢသၢၵ်ႈၶဝ်ၼၼ်ႉ ၸၢင်ႊသဵင်ႈၸၢင်ႊႁၢႆၸဵမ်မိူဝ်ႈဢၼ်ဢသၢၵ်ႈၶဝ်ယင်းလဵၵ်ႉယင်းဢွၼ်ႇၼၼ်ႉလႄႈ ဢသၢၵ်ႈၶဝ်ၸၢင်ႊသုမ်းၸွမ်းႁူမ်ႈလူၺ်ႈၵၼ်တင်းၶဝ်ၸိူဝ်း ဢၼ်ႁၢႆႉဢၼ်ယုတ်ႈၼၼ်ႉဢေႃႈ။
၁၅ မၼ်းၸဝ်ႈၵႄႇသႄႇလိတ်ႈဢဝ် ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉၼႂ်းမိူဝ်ႈဢၼ် ၶဝ်ႁွတ်ႈထိုင်ဢမူႉၼၼ်ႉလႄႈ ၽုၺ်ႇပိုတ်ႇႁူၶဝ် ၼႂ်းမိူဝ်ႈဢၼ်ၶဝ်လႆႈၶၢမ်ႇတၢင်းဢၼ်ၼိၵ်ႈ ၸၢၵ်ႈငႅၼ်းသေးၼၼ်ႉဢေႃႈ။
၁၆ ၼင်ႇၼၼ်လႄႈမၼ်းၸဝ်ႈမီးဢလူဝ်ႇ ၶႂ်ႈႁႂ်ႈမႂ်းၶၢႆႉသေ ၵႃႈတီႈဢၼ်ၵိတ်ႇဢၼ်ၵႅၼ်းၸူး ၵႃႈတီႈဢၼ်ပၢင်ႇလီၵႂၢင်ႈလီတီႈဢၼ်ဢမ်ႇမီးတၢင်းဢၼ်ၵိတ်ႇဢၼ်ၵႅၼ်းၼၼ်ႉလႄႈ ဢဝ်တၢင်းၵိၼ်တၢင်းၶူပ်း ဢၼ်တဵမ်ဝႆႉတင်းဢရသႃႇဢၼ်လီၼၼ်ႉတၢင်ႇသႂ်ဝႆႉၵႃႈၼိူဝ်ၶူင်ႇတီႈၵိၼ်မႂ်းဢေႃႈ။
၁၇ ၵူၺ်းၵႃႈ မႂ်းတဵမ်ဝႆႉတင်းဢပျႅတ်ႈမိူၼ်ၸိူဝ်ႉၼင်ႇၵေႃႉဢၼ်ဢမ်ႇတြႃးၼၼ်ႉလႄႈတၢမ်ႇဢပျႅတ်ႈဢိၵ်ႇတင်းတြႃး တၢင်းဢၼ်ၸီႇယၢင်ႇ ၸွမ်းၼင်ႇတြႃး ၼၼ်ႉယိပ်းၵမ်တီႉဢဝ်မႂ်းဢေႃႈ။
၁၈ ၵူၺ်းၵူဝ်တၢင်းၸႂ်မႆႈၶႆႈၸႃႉမၼ်းၸဝ်ႈၼၼ်ႉတၵ်း တိုၵ်းယူင်းၸူဝ်းဢဝ်မႂ်းႁႂ်ႈမႂ်းလႆႈႁဵတ်းတၢင်းဢၼ်ၶတ်းၵၼ်တင်း တၢင်းဢၼ်မၼ်းၸဝ်ႈပၼ်တၢမ်ႇၼၼ်ႉလႄႈ ဢမူႉႁွတ်ႈထိုင်သေယဝ်ႉပိၵ်ႉသမ်ႉ ပၼ်ၵႃႈၶၼ်ၼမ်ၼႃႇလူင်လၢင်သေၵေႃႈဢမ်ႇထူတ်ႇဢမ်ႇၼုၵ်ႈဢဝ် တူဝ်ၸဝ်ႈၵဝ်ႇလႆႈၵူၺ်း ယဝ်ႉ။
၁၉ မၼ်းၸဝ်ႈတၵ်းႁဵတ်းပမႃႇၼႃႉတီႈဢုၵ်ႉၸႃႇမႂ်းဢၼ်ဢမ်ႇၼပ်ႉဢမ်ႇဢၢၼ်လႆႈ ဢိၵ်ႇတင်းၸေးၸိမ်ႇ မႂ်း ဢၼ်ၼမ်ၵိုၼ်းၼႃႇလူင်လၢင်ၼၼ်ႉႁိုဝ်။
၂၀ ယႃႇပေတုၵ်းဢၢင်ႈၶိင်ႇၵၢင်ၶိုၼ်းၶိင်ႇဢၼ်ၵူၼ်းတင်းလၢႆၸၢင်ႊဢွၼ်ၵၼ်လႆႈ ၶၢမ်ႇတၢင်းဢၼ်ပႄႇၽဵဝ်ႈပႅတ်ႈ သေၵႃႈတီႈတီႈယူႇတီႈသဝ်းၶဝ်ၼၼ်ႉ။ႁဵတ်းသတိသေၵမ်း။
၂၁ ယႃႇပေဝႆႇၵႂႃႇၸူးဢမူႉဢၼ်ဢမ်ႇတြႃးၼၼ်ႉသေၵမ်း။လွင်ႈမၼ်းၸမ်းမႂ်းယိင်ႈၶႅၼ်းမီးၸႂ်ဢၼ်ၶႂ်ႈလႆႈဢမူႉၸိူဝ်ႉၼင်ႇၼၼ်ၼၼ်ႉ လိူဝ်တွၼ်းၼႃႇသေတၢင်းဢၼ်ယၢၵ်ႈဢၼ်ၽၢၼ် ၶၢၼ်ၸႂ်ၼၼ်ႉယူႇလူင် ပေႇ။
၂၂ တူၺ်းလူ။ၽြႃးပဵၼ်ၸဝ်ႈမီးတၢင်းဢၼ်ယုၵ်ႉယွင်ႈၵွပ်ႈပိူဝ်ႈတၼ်းၶူဝ်းမၼ်းၸဝ်ႈလႄႈ ၽူႈ လႂ်သင်ႇ သွၼ်ပၼ်မိူၼ်ၸိူဝ်ႉၼင်ႇမၼ်းၸဝ်ႈၼၼ်ႉလႆႈ။
၂၃ ၽူႈ လႂ်ၸီႇယၢင်ႇပၼ်သဵၼ်ႈတၢင်း ဢၼ်မၼ်းၸဝ်ႈၵႂႃႇၼၼ်ႉ။ၽူႈ လႂ်လၢတ်ႈလႄႈဝႃႈ၊-ၸဝ်ႈႁဝ်းႁဵတ်းဢမူႉ ဢၼ်ဢမ်ႇတြႃးမႅၼ်ႈယဝ်ႉ၊ ဝႃႈၼင်ႇၼႆလႆႈ။
၂၄ ၶုၵ်းၸႂ်လႆႈၶႆႈၸႂ်ထူပ်း ႁႂ်ႈလႆႈယုၵ်ႉယွင်ႈဢမူႉမၼ်းၸဝ်ႈဢၼ်ၵူၼ်းတင်းလၢႆ ႁဵတ်းၵႂၢမ်းယွင်ႈၵႂၢမ်းဢိုၼ်းၼၼ်ႉတႃႉ။
၂၅ ၵူၼ်းတင်းသဵင်ႈတင်းလူင် ဢွၼ်ၵၼ်ႁၼ်လွင်ႈတၢင်းၼၼ်ႉလႄႈ မဵဝ်းၵူၼ်းဢွၼ်ၵၼ်ယူႇတီႈၵႆသေလႄႈလူ တူၺ်းဢေႃႈ။
၂၆ တူၺ်းလူ။ၽြႃးပဵၼ်ၸဝ်ႈယႂ်ႇမျၢတ်ႈလႄႈႁဝ်းဢမ်ႇႁူႉမၼ်းၸဝ်ႈ။ တၢင်းဢၼ်ၼပ်ႉဢၼ်ဢၢၼ်ႇၶူပ်ႇပီႊမိူင်းမၼ်းၸဝ်ႈၼၼ်ႉ ဢမ်ႇသဵင်ႈလႆႈ။
၂၇ မၼ်းၸဝ်ႈ တိုတ်ႉၸၼ်ဢဝ်မဵတ်ႉၼမ်ႉၽူၼ်ၶိုၼ်ႈၵႃႈၼိူဝ်လႄႈ မဵတ်ႉၽူၼ်ၸင်ႇတူၵ်းလူင်းမႃးသေၵႃႈတီႈ ဢၢႆၼမ်ႉမၼ်းၸဝ်ႈလႄႈ
၂၈ တူၵ်းသေၵႃႈၼိူဝ်ၾႃႉၵၢင်ႁၢဝ် လူင်းမႃးသႂ်ႇၵႃႈၼိူဝ်ၵူၼ်းႁႃႇယႂ်ႇႁႃႇလူင်ဢေႃႈ။
၂၉ ၽူႈ လႂ်ႁူႉ တၢင်းဢၼ်ၽႃႈၽူၼ်ၸွတ်ႇတူဝ်ႈ ဢိၵ်ႇတင်း တၢင်းဢၼ်သဵင်သုမ်ႉထဵင်ၸဝ်ႈလင်မေႃးၼၼ်ႉလႆႈ။
၃၀ တူၺ်းလူ။မၼ်းၸဝ်ႈပိုတ်ႇၵီႈဢၼ်လႅင်းမၼ်းၸဝ်ႈၵႃႈတီႈႁိမ်းမၼ်းၸဝ်ႈလႄႈ ႁူမ်ႇသုမ်ႇတီႈဢၼ် လိုၵ်ႉဢၼ်လမ်ႇၼမ်ႉသမ်ႇမုၵ်ႉတြႃႇၼၼ်ႉဢေႃႈ။
၃၁ မၼ်းၸဝ်ႈဢဝ်ၸိူဝ်ႉၼင်ႇၼၼ်ႉၸီႇယၢင်ႇတြႃးတီႈမဵဝ်းၵူၼ်းတင်းလၢႆလႄႈ ပၼ်ဢႁႃႇရႃႉတၢင်းၵိၼ်တၢင်း ၶူပ်းၼမ်ၼႃႇလူင်လၢင်ဢေႃႈ။
၃၂ မၼ်းၸဝ်ႈဢဝ်ဢၼ်လႅင်းႁူမ်ႇသုမ်ႇၽႃႇမိုဝ်းမၼ်းၸဝ်ႈသေလႄႈ ပွႆႇၸႂ်ႉၸူးၵႃႈတီႈဢၼ်ရၢၼ်ႇသူႇမီးၼၼ်ႉဢေႃႈ။
၃၃ ၾႃႉလင်ႊမၼ်းၸဝ်ႈ မွၵ်ႇလၢတ်ႈၼႄပျႃးလွင်ႈမၼ်းၸဝ်ႈ ဢၼ်ယူႇၵႃႈၼိူဝ်တီႈဢၼ်သုင်ၼႃႇၼၼ်ႉလႄႈမူႇၽုင်တရိၵ်ႈသၢၼ်ႇတင်းလၢႆၵေႃႈႁူႉဢေႃႈ။