၃
ယေႃႇၽလၢတ်ႈၵႂၢမ်း
၁ လိုၼ်းၼၼ်ႉယေႃႇၽ ၽုၺ်ႇသူပ်းမၼ်းလႄႈၵိၼ်ႇလႃႇမိူဝ်ႉဝၼ်းဢၼ်မၼ်းၵိူတ်ႇလဵင်ႉမႃးၼၼ်ႉဢေႃႈ။
၂-၃ ယေႃႇၽဢွၵ်ႇသူပ်းလႄႈဝႃႈၸမ်း၊-ႁႂ်ႈမိူဝ်ႉဝၼ်းဢၼ်ၵဝ်ၵိူတ်ႇလဵင်ႉမႃးၼၼ်ႉလူႉလႅဝ်လႄႈ ႁႂ်ႈၵၢင်ၶိုၼ်းဢၼ်မွၵ်ႇလၢတ်ႈလႄႈဝႃႈ၊-ပႃးပတိၵ်ႉသၼ်ႇထေႇလုၵ်ႈၸၢႆး ယဝ်ႉ၊ဝႃႈၼင်ႇၼႆၼၼ်ႉလူႉလႅဝ်သေၵမ်း။
၄ ႁႂ်ႈမိူဝ်ႉဝၼ်းၼၼ်ႉပဵၼ်ဢၼ်လပ်းသိင်ႇသေၵမ်း။ယႃႇပေႁႂ်ႈၽြႃးပဵၼ်ၸဝ်ႈဝၢႆႇၼႃႈၸူးသေၵမ်း။ယႃႇပေႁႂ်ႈဢၼ်လႅင်း ႁိူဝ်ႈလႅင်းထွင်မၼ်းသေၵမ်း။
၅ ႁႂ်ႈလပ်းသိင်ႇဢိၵ်ႇတင်းႁူမ်ႈတၢင်းတၢႆသိမ်းဢဝ်ပိူင်ႇဢဝ်မၼ်းသေၵမ်း။ႁႂ်ႈၶႅပ်းၾႃႉၽူၼ်ႁူမ်ႇသုမ်ႇမၼ်းဝႆႉသေၵမ်း။ႁႂ်ႈတၢင်းဢၼ်ၾႃႉမိုတ်းၽူၼ်ဢုမ်ႇၶိင်ႇၵၢင်ဝၼ်း ပဵၼ်ဢၼ်လီၵူဝ်လီႁႄၼႃႇလူင်လၢင်တီႈမၼ်းသေၵမ်း။ႁႂ်ႈလပ်းသိင်ႇတီႉၵမ် ဢဝ်ၶိုၼ်းၼၼ်ႉသေၵမ်း။
၆ ယႃႇပေႁႂ်ႈမၼ်းလႆႈမူၼ်ႈပျေႃႇလူၺ်ႈၵၼ်တင်းမိူဝ်ႉဝၼ်းဢၼ်ၸႅၼ်ႇတၢမ်းၵၼ်ၸိူဝ်းၼၼ်ႉသေၵမ်း။ယႃႇပေႁႂ်ႈမၼ်းလႆႈၶဝ်ႈပႃးၼႂ်းတၢင်းဢၼ်ၼပ်ႉဢၢၼ်ႇလိူၼ် တင်းလၢႆၼၼ်ႉသေ ၵမ်း။ဢလူဝ်ႉ။
၇ ႁႂ်ႈၶိုၼ်းၼၼ်ႉပဵၼ်ဢၼ်သဵတ်ႇဢၼ်ယဵၼ်သေၵမ်း။ ယႃႇပေႁႂ်ႈမီးသဵင်ဢၼ်သႂၢင်ႇဢၼ် သိူဝ်းသေၵမ်း။
၈ ႁႂ်ႈၶဝ်ၸိူဝ်းဢၼ်ၸၢင်ႊလိူၵ်ႈမိုဝ်ႉလိူၵ်ႈဝၼ်းလႄႈၵိၼ်ႇလႃႇ၊ ဢၼ်ၸၢင်ႊႁႂ်ႈငိူၵ်ႈလုၵ်ႉၼၼ်ႉ ၵိၼ်ႇလႃႇၶိုၼ်းၼၼ်ႉသေၵမ်း။
၉ ႁႂ်ႈလၢဝ်တင်းလၢႆၶိင်ႇႁူဝ်ၶမ်ႈၶိုၼ်းၼၼ်ႉလပ်းသိင်ႇသေၵမ်း။တၢင်းဢၼ်မုင်ႈမွင်းဢၼ်လႅင်းၵၢင်ႈၼႂ်ၼၼ်ႉ ယႃႇပေႁႂ်ႈမၼ်းႁၼ်ဢႃႇ ရူင်ႇၵၢင်ၼႂ်သေၵမ်း။
၁၀ လွင်ႈမၼ်းၸမ်းမၼ်းဢမ်ႇဢိုတ်းႁပ်းၽၵ်းတူတွင်ႉမေႈၵဝ်ဝႆႉ။ မၼ်းဢမ်ႇႁႄႉၵင်ႈလပ်းတႃႇၵဝ်ဝႆႉသေၵႃႈတီႈတုၵ်ႉၶႃႉတၢင်းၽၢၼ်ၵဝ်ၼၼ်ႉ။
၁၁ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၵဝ်ဢမ်ႇတၢႆဢွၵ်ႇတွင်ႉမေႈၵဝ်မႃး။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸႂ်ၵဝ်ဢမ်ႇၶၢတ်ႇ မိူဝ်ႈၸႃႉဢွၵ်ႇသေၵႃႈၼႂ်းတွင်ႉမေႈမႃးၼၼ်ႉ။
၁၂ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မီးၶႃဢၼ်တၵ်းႁပ်ႉဢဝ်ၵဝ်ၼၼ်ႉ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မီးၼုမ်းပုၼ်ႈဢၼ်ၵဝ်တၵ်းၸုပ်ႇၵိၼ်ၼၼ်ႉ။
၁၃ သင်ဢမ်ႇပဵၼ်ၸိူဝ်ႉၼင်ႇၼၼ်ၸိုင်ၵဝ်ယင်းလႆႈၼွၼ်းယဵၼ် လူၺ်ႈၵၼ်တင်းၶုၼ်ႁေႃၶမ်း လႂ်
၁၄ တင်းမူးမၢတ်ႈၽွင်းမိူင်းလေႃးၵီႇ ဢၼ်တႄႇႁဵတ်းဝဵင်း ဢၼ်လူႉဢၼ်ႁၢမ်း လႂ်၊
၁၅ ၶုၼ်ဢၼ်မီးၶမ်းၼမ်ၼႃႇလႄႈ ႁႂ်ႈႁိူၼ်းၶဝ်တဵမ်ဝႆႉတင်းငိုၼ်းၼၼ်ႉ လႂ်ၸိူဝ်းၼၼ်ႉ ယူႇယဝ်ႉ။
၁၆ ဢမ်ႇၼၼ်ၵေႃႈႁဵတ်းသင်လႄႈၵဝ်ဢမ်ႇလူႉလႅဝ်မိူၼ်ၸိူဝ်ႉၼင်ႇလုၵ်ႈဢွၼ်ႇဢၼ် လိူၼ်ဝၼ်းဢမ်ႇၸေႉလႄႈၵိူတ်ႇလဵင်ႉမႃးၼၼ်ႉ။ႁဵတ်းသင်လႄႈလႆႈပဵၼ်ၸိူဝ်ႉၼင်ႇလုၵ်ႈလႅင်ႊဢွၼ်ႇ ဢၼ်ဢမ်ႇလႆႈႁၼ်ဢၼ် လႅင်းလႃးလႃးၼၼ်ႉ။
၁၇ ၵႃႈတီႈၼၼ်ႉၵမ်းလိုၼ်းၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉ လႆႈဢွၼ်ၵၼ်ထၢတ်ႇယဵၼ်သေတၢင်းဢၼ်ၶဝ်ယႃႉယူၵ်ႉပိူၼ်ႈၼၼ်ႉလႄႈ ၶဝ်ၸိူဝ်းဢၼ်ယၢပ်ႇၸႂ်ၶၢၼ်ၸႂ်ၼၼ်ႉဢွၼ်ၵၼ်လႆႈၵတ်း ယဵၼ်ၶျၢမ်းသႃႇဢေႃႈ။
၁၈ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶျုၵ်ႉဝႆႉၼၼ်ႉ လႆႈဢွၼ်ၵၼ်ယူႇၼိမ်ၼိမ်လူၺ်ႈၵၼ်လႄႈ ဢမ်ႇလႆႈငိၼ်းသဵင်ၵႂၢမ်းၶဝ်ၸိူဝ်းဢၼ်ၼိၵ်ႈ ၸၢၵ်ႈငႅၼ်းသေးၼၼ်ႉ။
၁၉ ၵႃႈတီႈၼၼ်ႉမီးၶဝ်ၸိူဝ်းဢၼ်ယႂ်ႇဢၼ်လူင်ဢိၵ်ႇတင်းၶဝ်ၸိူဝ်းဢၼ်လဵၵ်ႉဢၼ်ဢွၼ်ႇၼၼ်ႉဢေႃႈ။ ၶႃႈၵေႃႈလႆႈလွတ်ႈသေၵႃႈၼႂ်းမိုဝ်းၸဝ်ႈမၼ်းဢေႃႈ။
၂၀ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ပၼ်ဢၼ်လႅင်းတီႈၵေႃႉဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ႇၼၼ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ပၼ်ဢသၢၵ်ႈတီႈၵေႃႉဢၼ်ႁူဝ်ၸႂ် ၶူမ်ၼၼ်ႉ။
၂၁ ၶဝ်ၼၼ်ႉမုင်ႈမွင်းတၢင်းဢၼ်တၢႆလႄႈဢမ်ႇလႆႈလႄႈ ယိင်ႈၶႅၼ်းၶုတ်းႁႃဢဝ်လွင်ႈတၢင်းၼၼ်ႉလိူဝ်တွၼ်းၼႃႇသေ ၶုတ်းႁႃဢဝ်ၽၼ်ႇတႃႇဢၼ်သိူင်ႇဝႆႉသိမ်းဝႆႉၼၼ်ႉဢေႃႈ။
၂၂ ၶဝ်ၼၼ်ႉမိူဝ်ႈဢၼ်ထူပ်းႁၼ်ၶုမ်သၢင်းၶျႅင်းၼၼ်ႉၸိုင်၊ ၸူမ်းသိူဝ်းၼႃႇလူင်လၢင် လႄႈမူၼ်ႈၸႂ်ပျေႃႇၸႂ်ဢေႃႈ။
၂၃ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ပၼ်ဢၼ်လႅင်းတီႈၵေႃႉဢၼ်သဵၼ်ႈတၢင်းမၼ်းလပ်းၵႂႃႇတၼ်ၵႂႃႇယဝ်ႉ ဢၼ်ၽြႃးပဵၼ်ၸဝ်ႈႁႄႉၵင်ႈ ၶင်ဝႆႉၼၼ်ႉ။
၂၄ ၼႂ်းမိူဝ်ႈဢၼ်ၵဝ်ၵိၼ်တၢင်းၵိၼ်တၢင်းၶူပ်းယူႇၼၼ်ႉ တၢင်းဢၼ်ၵဝ်ၶၢင်းၶီၶၢင်းၽၢၼ်ပေႃႇမႃးလႄႈ ၼမ်ႉတႃႈတၢင်းဢၼ်ၵဝ်ႁႆႈႁွင်ႉပွင်ႉၶၢင်းၼၼ်ႉလႆတူၵ်းယူႇပဵၼ်ၸိူဝ်ႉၼင်ႇၼမ်ႉဢၼ်လႆတူၵ်းယူႇ ၼၼ်ႉဢေႃႈ။
၂၅ လွင်ႈတၢင်းဢၼ်ၵဝ်ၵူဝ်ႁႄၼၼ်ႉႁွတ်ႈထိုင်မႃးၵႃႈတီႈၵဝ်လႄႈ ၽေးဢဝ်ၵဝ်ၵူဝ်ႁႄသၼ်ႇဝႆ ၼၼ်ႉထူပ်းမႅၼ်ႈၵဝ်ယဝ်ႉ။
၂၆ ၵဝ်ၼႆႉဢမ်ႇမီတၢင်းဢၼ်ၼိမ်ဢၼ်လီ၊ ဢမ်ႇမီးတၢင်းဢၼ်ၵတ်းယဵၼ်ၶျၢမ်းသႃႇ၊ဢမ်ႇမီးတၢင်းဢၼ်ထၢတ်ႇၸႂ်ယဵၼ်ၸႂ်။မီးတုၵ်ႉၶႃႉတၢင်းၽၢၼ်လွၼ်ႉလွၼ်ႉၸႅတ်ႈၸႅတ်ႈဢေႃႈ၊ ဝႃႈၼင်ႇၼႆဢေႃႈ။