၄
ဢေႇလိၽတ်ႉ
၁ မိူဝ်ႈၼၼ်ႉဢေႇလိၽတ်ႉ ဢၼ်ပဵၼ်မဵဝ်း တေႇမၼ်ႇၼၼ်ႉဢွၵ်ႇသူပ်းလႄႈဝႃႈၸမ်း၊- ပေႃးသေၵေႃႉသေ ၵူၼ်းလၢတ်ႈၵႂၢမ်းၸႃႉတေႃႇမႂ်းၸိုင် မႂ်းတၵ်းမီးတၢင်းဢၼ်ၸႂ်လူႉႁိုဝ်။
၂ ၵူၺ်းၵႃႈၽူႈ လႂ်ယင်းဢမ်ႇလၢတ်ႈ ၵႂၢမ်းလႄႈဢမ်ႇယူႇလႆႈလူင်ပေႇ။
၃ တူၺ်းလူး။မႂ်းသင်ႇသွၼ်သုင်းမႃႉၵူၼ်းၼမ်ၼႃႇလႄႈ ႁႂ်ႈၶဝ်ၸိူဝ်းဢၼ်ႁႅင်းၶႅၼ်ႁႅင်းမိုဝ်းဢူၼ်ႈၼၼ်ႉ လႆႈၵႅၼ်ႇၶႅင်ယဝ်ႉယဝ်ႉ။
၄ ၵႂၢမ်းမႂ်းလႆႈၵမ်ႉထွၵ်ႈ ၶဝ်ၸိူဝ်းဢၼ်ၸမ်တၵ်းလူမ်ႉတၵ်းတူၵ်းၼၼ်ႉလႄႈ ႁႂ်ႈႁူဝ်ၶဝ်ဢၼ်ဢူၼ်ႈဢွၼ်ႇထွပ်ႉထီႈ ထွပ်ႉထႅပ်ႉၼၼ်ႉမၼ်ႈၶိူင်ႇယဝ်ႉယဝ်ႉ။
၅ မိူဝ်ႈလဵဝ်ၼႆႉဢမူႉႁွတ်ႈထိုင်တီႈမႂ်းလႄႈ မႂ်းမီးတၢင်းဢၼ်ၸႂ်လူႉဢေႃႈ။ဢမူႉတိူဝ်ႉထုၵ်ႇမႂ်းလႄႈ မႂ်းၵိုတ်းမိုၼ်ႇၵႂင်ၸႂ်ယူႇဢေႃႈ။
၆ သၽေႃးမႂ်း ဢၼ်ရူဝ်ႇသေႇၵူဝ်ယမ်ၽြႃးၼၼ်ႉပဵၼ်တီႈ ဢၼ်မႂ်းဢိင်ပိုင်ႈဢမ်ႇၸႂ်ႈႁိုဝ်။သၽေႃးဢၼ်ၵမ်ၵျၢင်ႉၸွမ်းၼင်ႇတြႃးၼၼ်ႉ ပဵၼ်တီႈမုင်ႈထႃႈမွင်းထႃႈ မႂ်းဢမ်ႇၸႂ်ႈႁိုဝ်။
၇ ၶႆႈၸႂ်ဝူၼ်ႉၸႂ်သေၵမ်း။ ၽူႈ လႂ်ယင်းဢမ်ႇမီးဢပျႅတ်ႈလႄႈ လႆႈႁွတ်ႈထိုင်တၢင်းလူႉတၢင်းလႅဝ်ႁိုဝ်း။ၶဝ်ၸိူဝ်းဢၼ်သိုဝ်ႈတေႃႇၼၼ်ႉ လႆႈသုမ်းလႆႈ ၸွမ်းၵႃႈတီႈ လႂ်။
၈ ၵႃႈၼင်ႇဢၼ်ၵဝ်ႁူႉႁၼ်ၼၼ်ႉၶဝ်ၸိူဝ်းဢၼ်ဢွၼ်ၵၼ်ႁဵတ်း တၢင်းဢၼ်ထႆၼႃးဢၼ်ဢမ်ႇတြႃး တင်းၶဝ်ၸိူဝ်းဢၼ်ဢွၼ်ၵၼ်ဝၢၼ်ႇၸိူဝ်ႉဝၢၼ်ႇၽၼ်းဢႃႉထမ်ႇမႃႉၼၼ်ႉ ၸၢင်ႊလႆႈဢွၼ်ႈၵၼ်ပၢတ်ႇဢဝ်ၶဝ်ႈ ဢၼ်မႅၼ်ႈၵၼ်တင်းဢၼ်ၶဝ်ႁဵတ်း ၼၼ်ႉဢေႃႈ။
၉ ၶဝ်ၸိူဝ်းၼၼ်ႉလႆႈလူႉလႆႈလႅဝ်လူၺ်ႈတၢင်းဢၼ်ၽြႃးပဵၼ်ၸဝ်ႈ ထူၺ်ႈၸႂ်ဢွၵ်ႇၸူးၼၼ်ႉလႄႈ လႆႈသုမ်းလႆႈၸွမ်းလူၺ်ႈတၢင်းဢၼ်မၼ်းၸဝ်ႈဢဝ်တၢင်းၸႂ်မႆႈၶႆႈၸႃႉၸဝ်ႈပဝ်ႇသႂ်ႇၼၼ်ႉဢေႃႈ။
၁၀ သၢင်ႇသီႈတၵ်းႁွင်ႉႁဝ်ႇသဵင်သၢင်ႇသီႈ ဢၼ်ၵျၢမ်းထၢမ်းၼႃႇလူင်လၢင်ၼၼ်ႉဢေႃႈ။ၶဵဝ်ႈငႃးၶဝ်တၵ်းႁၵ်းဢေႃႈ။
၁၁ သၢင်ႇသီႈဢၼ်ႁႅင်းယႂ်ႇၼႃႇၼၼ်ႉလႆႈတၢႆၵွပ်ႈပိူဝ်ႈ ဢမ်ႇမီးဢၼ်တၵ်းလႆႈတီႉၵိၼ်ၼၼ်ႉလႄႈလုၵ်ႈဢွၼ်ႇသၢင်ႇသီႈမေႈၸိူဝ်းၼၼ်ႉ လႆႈၽၢတ်ႇၽႄၵၼ်ၵႂႃႇၵူႈတီႈၵူႈလႅၼ်ဢေႃႈ။
၁၂ ၽဝ်ႇၼိုင်ႈ ပျႃႇတိၵ်ႈၸဝ်ႈ ႁွတ်ႈမႃးတီႈၵဝ်တဵတ်ႇတဵတ်ႇလႄႈ ႁူၵဝ်လႆႈငိၼ်းသဵင်ဢၼ်သွပ်ႉသႅပ်ႉၼၼ်ႉဢေႃႈ။
၁၃ ၼႂ်းမိူဝ်ႈဢၼ်ၵဝ်ယင်းတိုၵ်ႉၶႆႈၸႂ်ဝူၼ်ႉၸႂ်လူၺ်ႈလွင်ႈရူႇပႃႇရုင်ႇ ဢၼ်လႆႈပေႃႇမႃးၶိင်ႇၵၢင်ၶိုၼ်းမိူဝ်ႈဢၼ်တၢင်းဢၼ်ၼွၼ်းလပ်းဢၼ်ယႂ်ႇၼႃႇလူင် လၢင်
၁၄ ယင်းတိုၵ်ႉတူၵ်းႁွတ်ႈၵႃႈၼိူဝ်ၵူၼ်းတင်းလၢႆယူႇၼၼ်ႉၸိုင်၊ တၢင်းဢၼ်တူၵ်းၸႂ်ၵူဝ်ႁႄလႄႈသၼ်ႇသၼ်ႇသၢႆသၢႆၼၼ်ႉ ႁွတ်ႈထိုင်ၵႃႈၼိူဝ်ၵဝ်လႄႈႁႂ်ႈလုပ်ႇၵဝ် တင်းသဵင်ႈတင်းလူင်ထၢၼ်ႈပေႃး သၼ်ႇၶွၼ်းဝႆ ဢေႃႈ။
၁၅ ၵမ်းၼၼ်ႉဝိၺိၺ်ႇပႃးၼိုင်ႈတႆႇလတ်ႉၵႂႃႇသိုဝ်ႈၼႃႈတႂ်ႈတႃၵဝ်လႄႈ တုမ်ႇၶူၼ်ၼိူဝ်ႉၶူၼ်ၶိင်းၵဝ်လုၵ်ႉဢေႃႈ။ဢၼ်ၼၼ်ႉၵိုတ်းၸုၵ်းယူႇလႄႈပုင်ႇႁၢင်ႊၽၢင် မၼ်းၵေႃႈၵဝ်ဢမ်ႇႁၼ်လႆႈလီလီငၢမ်းငၢမ်း။
၁၆ ၵွင်ႉငဝ်းမၼ်းၵူၺ်းမီးယူႇသိုဝ်ႈၼႃႈတႂ်ႈတႃၵဝ်ဢေႃႈ။ ပဵၼ်တၢင်းဢၼ်သိၵ်ႉဢၼ်ယဵၼ်သေလႄႈ ၵဝ်လႆႈငိၼ်း သဵင်ဢၼ်လၢတ်ႈလႄႈဝႃႈၸမ်း၊-
၁၇ ၵူၼ်းဢၼ်ၸၢင်ႊတၢႆၼႆႉ လႆႈမီးတၢင်းဢၼ်သိုဝ်ႈတေႃႇလိူဝ်တွၼ်းၼႃႇသေၽြႃးပဵၼ်ၸဝ်ႈႁိုဝ်။ ၵူၼ်းသတ်ႉတဝႃႇၼႆႉလႆႈမီးတၢင်းဢၼ်မူတ်းသႂ် လိူဝ်တွၼ်းၼႃႇသေၸဝ်ႈဢၼ်ၽၢၼ်ႇသၢင်းႁဵတ်းပဵၼ်မၼ်းၼၼ်ႉႁိုဝ်။
၁၈ တူၺ်းလူး။ပေႃးမၼ်းၸဝ်ႈယင်းဢမ်ႇယုမ်ႇၶဝ်ၸိူဝ်းဢၼ်ၵိုတ်းႁၢပ်ႇ ဢမူႉမၼ်းၸဝ်ႈတင်းလၢႆၼၼ်ႉလႄႈပၼ်တၢမ်ႇတမၢၼ်ႇၵၢင်ႁၢဝ် ဢၼ်ၽိတ်းပိူင်ႈၼၼ်ႉ ၸိုင်
၁၉ ၵႃႈတီႈၶဝ်ၸိူဝ်းဢၼ်ယူႇၵႃႈၼႂ်းႁိူၼ်းလိၼ်လႄႈတႄႇယူႇၵႃႈၼႂ်းမုၼ်လိၼ်ၼၼ်ႉ လႆႈၶၢမ်ႇတၢင်းဢၼ်ၼူတ်ႈပႅတ်ႈထူပႅတ်ႈမိူၼ်ၸိူဝ်ႉၼင်ႇမူင်ႈဢွၼ်ႇမႅင်း ဢွၼ်ႇၼၼ်ႉၵူၺ်းဢေႃႈ။
၂၀ ၼႂ်းၸူဝ်ႈၸႃႉၸဵမ်ၶိင်ႇႁူဝ်ၼႂ်တေႃႇထိုင်ႁွတ်ႈၶိင်ႇႁူဝ်ၶမ်ႈၼၼ်ႉၵူၺ်း ၶဝ်ၸၢင်ႊႁွတ်ႈထိုင်တၢင်းဢၼ်ယႃႉၽဵဝ်ႈပႅတ်ႈဢေႃႈ။ ၽူႈ လႂ်ယင်းဢမ်ႇႁဵတ်းပမႃႇၼႃႉတီႈၶဝ်လႃးလႃးလႄႈ ၶဝ်ၸင်ႇႁွတ်ႈထိုင်တၢင်းလူႉတၢင်းလႅဝ်ဢေႃႈ။
၂၁ ၵုင်ႇသရေႇၶဝ် ၼၼ်ႉလပ်ႉၵႂႃႇႁၢႆၵႂႃႇဢေႃႈ။ၶဝ်ယင်းဢမ်ႇမီးပိင်ႇၺႃႇလႄႈၸၢင်ႊဢွၼ်ၵၼ်တၢႆၵႂႃႇဝၢႆးၵႂႃႇဢေႃႈ။