၁၉
ယေႃႇၽ
၁ မိူဝ်ႈၼၼ်ႉ ယေႃႇၽ ဢွၵ်ႇသူပ်းၶိုၼ်းလၢတ်ႈလႄႈ ဝႃႈ၊-
၂ သူတၵ်းဢွၼ်ၵၼ်ယႃႉယုၵ်ႉၸႂ်ဝိၺိၺ်ႇၵဝ်လႄႈဢဝ်တင်းၵႂၢမ်းႁၵ်းမိတ်းၵဝ်ယူႇႁိုဝ်ၵႃႈႁိုဝ်။
၃ သူဢွၼ်ၵၼ်သေႉသွမ်းၵဝ်တေႃႇထိုင်ႁွတ်ႈသိပ်းပွၵ်ႈယဝ်ႉ။ သူယင်းဢမ်ႇမီးတၢင်းဢူၵ်းတၢင်းဢၢႆလႄႈ ဢွၼ်ၵၼ် ႁဵတ်းႁႂ်ႈၵဝ်လႆႈၵိုတ်းမိုင်ၵႂင်ၸႂ်ယူႇယဝ်ႉ။
၄ ပေႃးၵဝ်ၽိတ်းပိူင်ႈယဝ်ႉ ႁႂ်ႈၸႂ်ႈသေတႃႉၸိုင်ဢပျႅတ်ႈၵဝ်လပ်းသိင်ႇ ၵၼ်တင်းၵဝ်ၵူၺ်းဢေႃႈ။
၅ ပေႃးသူဢွၼ်ၵၼ်ဢုပ်ႇဢၢတ်ႈယူႇၵႃႈၼိူဝ်ၵဝ်လႄႈႁႂ်ႈတၢင်းဢၼ်ၵဝ်လႆႈၶၢမ်ႇ တၢင်းဢၼ်ဢူၵ်းဢၼ်ဢၢႆၼၼ်ႉထၢင်ႇသႃးၸိုင် ဢွၼ်ၵၼ်ႁူႉၸႅင်ႈ
၆ မၢတ်ႈတွင်းလွင်ႈဢၼ်ဝႃႈၽြႃးပဵၼ်ၸဝ်ႈဢဝ်ၵဝ်လူမ်ႉတူၵ်းလႄႈ ထုၵ်ႇၶဵၼ်းမႅၼ်ႈၵႃႈတီႈ တူင်ႇႁဵဝ်ႉမၼ်းၸဝ်ႈဝႆႉၼၼ်ႉသေၵမ်း။
၇ ပိၵ်ႉသမ်ႉၵဝ်ပွင်ႉၶၢင်းပွင်ႉမိုၼ်လူၺ်ႈလွင်ႈဢၼ်ၵဝ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသေးသေၵေႃႈၽူႈ လႂ်ဢမ်ႇထွမ်ႇဢမ်ႇငိၼ်း။ပိၵ်ႉသမ်ႉၵဝ်သႅၼ်ႇႁွင်ႉသေၵေႃႈဢမ်ႇမီးၵေႃႉဢၼ်ၸီႇယၢင်ႇၸွမ်းၼင်ႇတြႃး။
၈ မၼ်းၸဝ်ႈ ႁဵတ်းဢၼ်ႁႄႉဢၼ်ၵင်ႈဝႆႉ ၵႃႈၼႂ်းသဵၼ်ႈတၢင်းၵဝ်လႄႈႁႂ်ႈၵဝ်ဢမ်ႇၵႂႃႇလႆႈ။မၼ်းၸဝ်ႈဢဝ်ဢၼ်လပ်းသိင်ႇ ဝႆႉၵႃႈတီႈသဵၼ်ႈတၢင်းဢၼ်ၵဝ်ၵႂႃႇ ၼၼ်ႉယဝ်ႉ။
၉ မၼ်းၸဝ်ႈပူတ်းမူၼ်ႈၽုင်းသရေႇၵဝ်ပႅတ်ႈလႄႈ ဢဝ်ပၢၼ်းၵုမ်းသရၽူႇၵႃႈတီႈႁူဝ်ၵဝ်တူၵ်းပႅတ်ႈ ယဝ်ႉ။
၁၀ မၼ်းၸဝ်ႈလွမ်ႉလဵပ်ႈႁွပ်ႈၵဝ်ယူႇၵူႈၽၢႆႇၵူႈပႃႈသေလႄႈ ယႃႉပႅတ်ႈၵဝ်လႄႈၵဝ်လႆႈႁၢႆၵႂႃႇသဵင်ႈသဵင်ႈမူတ်းမူတ်းယဝ်ႉ။မၼ်းၸဝ်ႈထူၺ်ႈပႅတ်ႈဢၶႂၢင်ႉဢၼ်ၵဝ်လႆႈမုင်ႈမွင်းၼၼ်ႉ မိူၼ်ၸိူဝ်ႉၼင်ႇထူၺ်ႈပႅတ်ႈတူၼ်ႈ မႆႉၼၼ်ႉယဝ်ႉ။
၁၁ တၢင်းၸႂ်မႆႈၶႆႈၸႃႉမၼ်းၸဝ်ႈမႆႈတေႃႇၵဝ်လႄႈ မၢတ်ႈၵဝ်ပဵၼ်ၸိူဝ်ႉၼင်ႇရၢၼ်သူႇမၼ်းၸဝ်ႈ ၼၼ်ႉဢေႃႈ။
၁၂ ႁူဝ်ႁၢၼ်ၵူၼ်းသိုၵ်းမၼ်းၸဝ်ႈတင်းလၢႆဢွၼ်ၵၼ်ၶီႇသိုၵ်းမႃးလႄႈ တဵင်တႅမ်ႈတဵင်တေးယူႇၽၢႆႇၼိုင်ႈတင်းၵဝ်လႄႈ ၶျႃးတပ်ႉလဵပ်ႈႁွပ်ႈသုမ်ႉထဵင် တီႈယူႇတီႈသဝ်းၵဝ်ၼၼ်ႉဢေႃႈ။
၁၃ မၼ်းၸဝ်ႈဢဝ်ပီႈၸၢႆးၵဝ်ၼွင်ႉၸၢႆးၵဝ် ဝႆႉတီႈဢၼ်ၵႆၵၼ်ယၢၼ်ၵၼ်တင်းၵဝ်ၼၼ်ႉလႄႈ ၶဝ်ၸိူဝ်းဢၼ်မိုတ်ႈၵိုဝ်းၵၼ်တင်းၵဝ် ၸိူဝ်းၼၼ်ႉဢမ်ႇႁူႉၸၵ်းၵဝ်လႃးလႃး။
၁၄ ပီႈၼွင်ႉၸိူဝ်ႉၶိူဝ်းၵဝ်ဢွၼ်ၵၼ်ၸုၼ်ႉပႅတ်ႈၵဝ်လႄႈ ၵေႃႉသေႈၵဝ်ဢွၼ် ၵၼ်လူင်လိုမ်းၵဝ်ဢေႃႈ။
၁၅ ၵူၼ်းႁိူၼ်းၵူၼ်းယေးၵဝ်ဢိၵ်ႇတင်းၶႃႈမေႈယိင်းၵဝ် ဢွၼ်ၵၼ်မၢတ်ႈၵဝ်ပဵၼ်ၸိူဝ်ႉၼင်ႇၶႅၵ်ႇၼၼ်ႉလႄႈ ၵဝ်လႆႈပဵၼ်ၸိူဝ်ႉၼင်ႇၵူၼ်းတၢင်ႇသိုင်ႇတၢင်ႇမိူင်းသိုဝ်ႈၼႃႈတႂ်ႈတႃၶဝ်ဢေႃႈ။
၁၆ ၵဝ်ႁွင်ႉၶႃႈၵဝ်ၵေႃႈ ဢဝ်သူပ်းၵဝ်တၵ်ႉလၢတ်ႈမၼ်းသေလႄႈ တွင်းပၢၼ်ႇမၼ်းၵေႃႈမၼ်းဢမ်ႇၶိုၼ်းလၢတ်ႈ ၶိုၼ်းဢိူဝ်ႈ။
၁၇ လူမ်းဢသၢၵ်ႈၵဝ်ပဵၼ်ဢၼ်ဢမ်ႇထုၵ်ႇၸႂ်ၵျိူၵ်ႈၸႂ်မေးၵဝ်လႄႈသဵင်ဢၼ်ၵဝ်ၶၢင်းၶီၶၢင်းၽၢၼ်ၼၼ်ႉၵေႃႈ ပဵၼ်ဢၼ်လီႁင်ႈဢဵတ်ႇသဵတ်ႇတီႈ ၼွင်းၸၢႆးၵဝ်တင်းလၢႆဢေႃႈ။
၁၈ လုၵ်ႈဢွၼ်ႇတင်းလၢႆယင်းဢွၼ်ၵၼ် ႁဵတ်းဢမ်ႇပေႃးၼင်ႇႁိုဝ်တီႈၵဝ်လႄႈယၢမ်းမိူဝ်ႈဢၼ်ၵဝ်လုၵ်ႉၼၼ်ႉၸိုင် ၶဝ်ဢွၼ်ၵၼ်သေႉ သွမ်းၵဝ်ဢေႃႈ။
၁၉ ၵေႃႉသေႈၵဝ်ၵႃႈမီးၼၼ်ႉဢွၼ်ၵၼ်လီႁင်ႈၵဝ်လႄႈ ၶဝ်ၸိူဝ်းဢၼ်ၵဝ်ႁၵ်ႉၵဝ်ပႅင်းၼၼ်ႉ လုၵ်ႉ ၽိုၼ်ႉတေႃႇၵဝ်ဢေႃႈ။
၂၀ ၵဝ်မီးလုပ်ႇတင်းၼိူဝ်ႉၼင်ဢၼ်ၸပ်းတူဝ်ၵဝ်ၼၼ်ႉၵူၺ်းလႄႈ ၵဝ်လႆႈပၢႆလွတ်ႈလူၺ်ႈ တင်းႁိူၵ်ႇၵဝ်ၼၼ်ႉၵူၺ်းဢေႃႈ။
၂၁ ဢွၼ်ၵၼ်ဢိတ်းလူၵဝ်ၶႃႈသေၵမ်း။မိုဝ်းၽြႃးပဵၼ်ၸဝ်ႈလႆႈတိူဝ်ႉထုၵ်ႇၵဝ်ယဝ်ႉ။
၂၂ ၵွပ်ႈပိူဝ်ႈၸိူဝ်ႉၼင်ႇႁို်ဝ်လႄႈ သူဢွၼ်ၵၼ်လိုပ်ႈလမ်းၸွမ်းၵဝ် မိူၼ်ၸိူဝ်ႉၼင်ႇၽြႃးပဵၼ်ၸဝ်ႈ လိုပ်ႈလမ်းၸွမ်းၵဝ်ၼၼ်ႉ။ သူၵိၼ်ၼိူဝ်ႉၼင်ၵဝ်ယင်းဢမ်ႇဢိမ်ႇ ၸႂ်တိူၵ်ႈၸႂ်လႆႈႁိုဝ်။
၂၃ ႁႂ်ႈမၢတ်ႈမၢႆတႅမ်ႈဝႆႉၵႂၢမ်းၵဝ်မိူဝ်ႈလဵဝ်ၼႆႉသေၵမ်းလူၺ်ႈ။ႁႂ်ႈဢဝ်သႂၢင်းသႂ်ႇဝႆႉၵႃႈၼႂ်းၸရၢင်း သေၵမ်းလူၺ်ႈ။
၂၄ ႁႂ်ႈဢဝ်ၵၼ်းၺိတ်ႈတင်းၸိုၼ်းတၢင်ႇသႂ်ႇတူဝ်လိၵ်ႈဢႅၵ်ႉၶရႃႇလႄႈ တွၵ်ႇတူဝ်လိၵ်ႈသႂ်ႇၵႃႈတီႈမၢၵ်ႇႁိၼ်ဝႆႉယူႇသေႇသေႇႁႂ်ႈမၼ်ႈၶိူင်ႇသေၵမ်း လူၺ်ႈ။
၂၅ ၵဝ်ႁူႉလွင်ႈဢၼ်ၸဝ်ႈဢၼ်ထုတ်ႇၼုၵ်ႈဢဝ်ၵဝ်ၼၼ်ႉ ဢသၢၵ်ႈလိပ်းယူႇလႄႈတၵ်းမႃးၸုၵ်းယူႇၵႃႈၼိူဝ်လိၼ်မိူင်း မိူဝ်ႈၶိင်ႇၵႃႇလႃႉၵမ်းလိုၼ်းသုတ်း ပုၼ်ႉဢိၵ်ႇတင်း
၂၆ လွင်ႈတၢင်းဢၼ် ပိၵ်ႉသမ်ႉၼင်ၵဝ်ၼိူဝ်ႉၵဝ်လူႉလႅဝ်သဵင်ႈမူတ်းသေၵေႃႈ ၵဝ်ၼႆႉတၵ်းယူႇၵႃႈၼႂ်းတူဝ်ၶၼ်ႇထႃႇသေလႄႈ ႁၼ်ၽြႃးပဵၼ်ၸဝ်ႈယူႇ ဢေႃႈ။
၂၇ ၵဝ်တၵ်းႁၼ်မၼ်းၸဝ်ႈမၢၵ်ႇတႃၵဝ်တၵ်းလႆႈထူပ်းႁၼ်မၼ်းၸဝ်ႈဢေႃႈ။ပဵၼ်ပိူၼ်ႈတၢင်ႇၵေႃႉဢမ်ႇၸႂ်ႈ။ပဵၼ်ၵဝ်တၵ်းႁၼ်ဢေႃႈ။မၢၵ်ႈႁူဝ်ၸႂ်ၵဝ်မုင်ႈမွင်း ၼႂ်းၵဝ်ယူႇဢေႃႈ။
၂၈ မိူဝ်ႈလဵဝ်ၼႆႉၵွပ်ႈပိူဝ်ႈဢၼ်ထူပ်းႁၼ်ငဝ်ႈႁၢၵ်ႈလွင်ႈမၼ်းတၢင်းမၼ်း ၵႃႈၼႂ်းၵဝ်ယဝ်ႉလႄႈပေႃးသူလၢတ်ႈဝႃႈ၊-တုၵ်းၶႃႉတၢင်းၽၢၼ်ၼၼ်ႉတႄႇၼႂ်းမၼ်းမႃးလႄႈ ႁဝ်းတၵ်းႁဵတ်းၸိူဝ်ႉၼင်ႇႁိုဝ်ၼိၵ်ႈၸၢၵ်ႈငႅၼ်းသေးမၼ်း၊ ဝႃႈၼင်ႇၼႆၸိုင်၊သူဢွၼ်ၵၼ် ၵူဝ်ႁႄၽေးလၢပ်ႇၽေးလႅဝ်းတႃႉ။
၂၉ လွင်ႈမၼ်းၸမ်းတၢင်းၸႂ်မႆႈၶႆႈၸႃႉမၼ်းၸဝ်ႈၼၼ်ႉ ၸၢင်ႊဢဝ်ၽေးလၢပ်ႇၽေးလႅဝ်း ပၼ်ဢပျႅတ်ႈသူ ႁႂ်ႈသူလႆႈႁူႉၸႅင်ႈမၢတ်ႈတွင်းလွင်ႈဢၼ်ဝႃႈ ၶိင်ႇဢၼ်ၸီႇယၢင်ႇ ဢပျႅတ်ႈတြႃးၼၼ်ႉမီးယူႇဢေႃႈ၊ ဝႃႈၼင်ႇၼႆဢေႃႈ။