၂၁
ယေႃႇၽ
၁ မိူဝ်ႈၼၼ်ႉ ယေႃႇၽ ဢွၵ်ႇသူပ်းၶိုၼ်းလၢတ်ႈလႄႈ ဝႃႈ၊-
၂ ဢွၼ်ၵၼ်ထွမ်ႇငိၼ်းၵႂၢမ်းၵဝ်ၸေးၸေးၸွတ်ႇၸွတ်ႇသေလႄႈ ႁႂ်ႈပဵၼ်တၢင်းဢၼ်ပျေႇၸႂ်ၼိမ်ၸႂ်တီႈ သူသေၵမ်း။
၃ ဢွၼ်ၵၼ်ယိူၼ်ႉၶၢမ်ႇႁႂ်ႈၵဝ်မီးဢၶႂၢင်ႉဢၼ်လႆႈၶိုၼ်းလၢတ်ႈသေၵမ်း။ ၵဝ်လၢတ်ႈသေယဝ်ႉသမ်ႉဢွၼ်ၵၼ်ႁဵတ်းတၢင်းဢၼ်ႁဵတ်းပျၢၵ်ႈၶူဝ်ထႅင်ႈလူး ၵွၼ်ႇတႃႉ။
၄ ၵဝ်ပွင်ႉၶင်းပွင်ႉမိုၼ်တေႃႇၵူၼ်းႁိုဝ်။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵဝ်ဢမ်ႇထုၵ်ႇလီၸႂ်ပွတ်း။
၅ ဢွၼ်ၵၼ်လူတူၺ်းၵဝ်လႄႈ ၵိုတ်းမိုင်ၵႂင်ၸႂ်ယူႇသေလႄႈဢဝ် တင်းမိုဝ်းသူတူမ်းသူပ်းသူသေၵမ်း။
၆ ယၢမ်းမိူဝ်ႈဢၼ်ၵဝ်ၶုၵ်းၸႂ်လႆႈၶႆႈၸႂ်ထူပ်းၼၼ်ႉၸိုင် ၵဝ်မီးတၢင်းဢၼ်မိင်းမဝ်းလိုမ်းတူဝ်လႄႈ တၢင်းဢၼ်သၼ်ႇၶွၼ်းဝႆၼၼ်ႉ ပဵၼ်မႃးတီႈၼိူဝ်ၵဝ်ဢေႃႈ။
၇ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵူၼ်းႁၢႆႉၵူၼ်းမိူၵ်ႈတင်းလၢႆ ဢသၢၵ်ႈလိပ်းယူႇၵူၺ်းဢမ်ႇၵႃးဢွၼ်ၵၼ်ၵႄႇထဝ်ႈလႄႈ တဵမ်ဝႆႉတင်းမူၼ်ႈ ၸေးၸိမ်ႇၼင်ႇႁိုဝ်။
၈ လုၵ်ႈလၢင်းၶဝ်လႆႈတူၵ်းတီႈတူၵ်းလႅၼ်ယူႇၵႃႈတီႈႁိမ်းၶဝ်လဵပ်ႈႁွပ်ႈၶဝ် ၵႃႈတီႈၽၢႆႇၼႃႈၶဝ်လႄႈ မဵဝ်းၸိူဝ်ႉၶိူဝ်းၶဝ်တူၵ်းတီႈတူၵ်းလႅၼ်ယူႇသိုဝ်ႈ ၼႃႈတႂ်ႈတႃၶဝ်ဢေႃႈ။
၉ ႁိူၼ်းယေးၶဝ်ၵေႃႈဢွၼ်ၵၼ်လွတ်ႈၽေးသေလႄႈ တဵတ်ႇလီၼိမ်လီယူႇလႄႈႁွႆးၶွၼ်ႉႁွႆးတၢမ်ႇၽြႃးပဵၼ်ၸဝ်ႈဢမ်ႇမီးၵႃႈၼိူဝ်ၶဝ်။
၁၀ ဝူဝ်းငၢၼ်ၶဝ်ၼၼ်ႉ ဢွၼ်ၵၼ်ၸွမ်းၽွၵ်ႇသေယဝ်ႉဢမ်ႇလုတ်ႈဢမ်ႇႁၢမ်းလႄႈ ဝူဝ်းမေႈၶဝ်ၵေႃႈၸၢင်ႊၵိူတ်ႇ လဵင်ႉလႄႈဢမ်ႇယွတ်ႇဢမ်ႇတူၵ်း။
၁၁ ၶဝ်ပွႆႇလုၵ်ႈဢွၼ်ႇၶဝ်တင်းလၢႆဝႆႉ မိူၼ်ၸိူဝ်ႉၼင်ႇၽုင်သူဝ်းလႄႈလုၵ်ႈၶဝ်လၢင်းၶဝ်ၼၼ်ႉဢွၼ်ၵၼ်ၵႃႈယူႇဝႅၼ်ယူႇဢေႃႈ။
၁၂ ၶဝ်ၼၼ်ႉ ၸၢင်ႊဢွၼ်ၵၼ်ႁႆႇၵွင်ၶဵတ်ႇလဵတ်းတိင်ႇလႄႈ ၸူမ်းၸူမ်းသိူဝ်းသိူဝ်းလူၺ်ႈသဵင်ၼႄးၶရႃႇဢေႃႈ။
၁၃ ၶဝ်ၸၢင်ႊဢွၼ်ၵၼ်လႆႈလီလႆႈပဵၼ်ယူႇသေလႄႈ ႁႂ်ႈၸူဝ်ႈပၢၼ်ၶဝ်ပူၼ်ႉၵႂႃႇလႄႈ ဢွၼ်ၵၼ်လူင်းၵႂႃႇၸူးၵႃႈတီႈ မရၼႃႉၵမ်းလဵဝ်ဢေႃႈ။
၁၄ ၶဝ်ၸၢင်ႊဢွၼ်ၵၼ်လၢတ်ႈတီႈၽြႃးပဵၼ်ၸဝ်ႈလႄႈဝႃႈ၊- ဢွၵ်ႇသေၵႃႈတီႈႁဝ်းၵႂႃႇတႃႉ။ႁဝ်းဢမ်ႇမီးဢလူဝ်ႇၶႂ်ႈႁူႉသဵၼ်ႈတၢင်းၸဝ်ႈႁဝ်း။ၸဝ်ႈဢၼၼ်ႇတႃႉတၼ်းၶူဝ်းၼၼ်ႉပဵၼ်ၵေႃႉၸိူဝ်ႉ ၼင်ႇႁိုဝ်လႄႈႁဝ်းတၵ်းလႆႈႁဵတ်းဝၢတ်ႈတီႈမၼ်း။
၁၅ ပေႃးႁဝ်းသူးတွင်းတီႈမၼ်းၸိုင် တၵ်းမီးဢၵျူဝ်းၵႃႈသင်၊ဝႃႈၼင်ႇၼႆဢေႃႈ။
တူၺ်းလူ။
၁၆ ၸေးၸိမ်ႇၶျၢမ်းသႃႇၶဝ်ၼၼ်ႉဢမ်ႇတႄႇယူႇၵႃႈၼႂ်းမိုဝ်းၶဝ်။တၢင်းၵျၢမ်ႇတၢင်းပွင်ၶဝ်ၸိူဝ်းဢၼ်ဢမ်ႇတြႃးၼၼ်ႉပဵၼ်ဢၼ်ၵႆၵၼ်တင်းၵဝ်ဢေႃႈ။
၁၇ ဝၢၼ်ႇၽႆးတဵၼ်းၶဝ်ၸိူဝ်းဢၼ်ဢမ်ႇတြႃးၼၼ်ႉယၢမ်ႈမွတ်ႇယၢမ်ႈတၢႆလႄႈၽေးတၢင်းဢၼ်ယႃႉပႅတ်ႈၶဝ်ၼၼ်ႉ ယၢမ်ႈတွၼ်ႉႁွတ်ႈထိုင်ၵႃႈၼိူဝ်ၶဝ်လၢႆၽဝ်ႇလၢႆပွၵ်ႈယဝ်ႉ။ၽြႃးပဵၼ်ၸဝ်ႈၸႂ်မႆႈၶႆႈၸႃႉလႄႈယၢမ်ႈတွၼ်ႉၸီႇယၢင်ႇ ၽေးဢူးပၢတ်ႈ တၢင်းဢၼ်ယၢပ်ႇၸႂ်ၽိုတ်ႇၸႂ်တီႈၶဝ်လၢႆၽဝ်ႇလၢႆပွၵ်ႈယဝ်ႉ။
၁၈ ၶဝ်ယၢမ်ႈတွၼ်ႉပဵၼ် ၸိူဝ်ႉၼင်ႇမုၼ်ယိူဝ်ႈမုၼ်ယႃႈၵႃႈတီႈၽၢႆႇၼႃႈလူမ်းဢိၵ်ႇတင်းၸိူဝ်ႉၼင်ႇၵႅပ်ႇဢၼ်ၽူၼ်လူင်လူမ်းလူင်ပတ်ႉထူဝ်းၵႂႃႇၼၼ်ႉ လၢႆၽဝ်ႇလၢႆ ပွၵ်ႈယဝ်ႉ။
၁၉ ၽြႃးပဵၼ်ၸဝ်ႈတၵ်းဢဝ်ဢပျႅတ်ႈမၼ်းသိမ်းဝႆႉပုၼ်ႈလုၵ်ႈပုၼ်ႈလၢၼ်မၼ်းႁိုဝ်။ႁႂ်ႈၸဝ်ႈမၼ်းတွပ်ႇတႅၼ်းပၼ်ဢပျႅတ်ႈမၼ်းတီႈမၼ်း ႁႂ်ႈမၼ်းလႆႈႁူႉလႆႈ ၸႅင်ႈသေၵမ်း။
၂၀ ႁႂ်ႈမၢၵ်ႇတႃမၼ်းလႆႈႁၼ်တၢင်းဢၼ်မၼ်းလူႉလႅဝ်သေၵမ်းလူၺ်ႈ။ ႁႂ်ႈမၼ်းလႆႈသူတ်ႉၵိၼ်တၢင်းၸႂ်မႆႈၶႆႈၸႃႉ ၸဝ်ႈဢၼၼ်ႇတႃႉတၼ်းၶူဝ်းသေ ၵမ်းလူၺ်ႈ။
၂၁ ယၢမ်းမိူဝ်ႈဢၼ်ပီႊမၼ်းလိူၼ်မၼ်းလႆႈၶၢမ်ႇတၢင်းဢၼ် တႅပ်းၶၢတ်ႇပႅတ်ႈသေၵႃႈၼႂ်းၶိုင်ႈၵၢင်ၸူဝ်ႈဢသၢၵ်ႈမၼ်းၼၼ်ႉ မၼ်းမီးတၢင်းဢၼ်မူၼ်ႈပျေႃႇ ၼႂ်းလုၵ်ႈၼႂ်းလၢင်းမၼ်းလိုၼ်းမၼ်းၼၼ်ႉ ၸိူဝ်ႉၼင်ႇႁိုဝ်။
၂၂ ၽူႈ လႂ်တၵ်းသင်ႇသွၼ်ပၼ်ပိင်ႇၺႃႇတီႈၽြႃးပဵၼ်ၸဝ်ႈ ဢၼ်ၸီႇယၢင်ႇတီႈၶဝ်ၸိူဝ်းဢၼ်ယႂ်ႇ ဢၼ်သုင်ၼၼ်ႉ။
၂၃ ၵူၼ်းၵေႃႉၼိုင်ႈၸမ်းၸၢင်ႊတဵမ်ဝႆႉတင်းႁႅင်းယူႇသေလႄႈတၢႆၵႂႃႇဢေႃႈ။မၼ်းပဵၼ်ၵေႃႉဢၼ်မီးတၢင်းဢၼ် တဵတ်ႇၼိမ်ၵတ်းယဵၼ်ၶျၢမ်းသႃႇ ၼႃႇလူင်လၢင်ဢေႃႈ။
၂၄ ပဵမ်ႉမၼ်းၸိူဝ်းၼၼ်ႉပီးမၼ်းလႄႈ ဢွၵ်းလူပ်ႇမၼ်းမီးတၢင်းဢၼ်ပိူဝ်ႉလီယမ်းလီဝႆႉဢေႃႈ။
၂၅ ၵူၼ်းၵေႃႉၼိုင်ႈၸမ်းမီးတၢင်းဢၼ်ၶီၸႂ်ၶူမ်ၸႂ်လႄႈတၢႆၵႂႃႇဢေႃႈ။မၼ်းပဵၼ်ၵေႃႉဢၼ်ဢမ်ႇတွၼ်ႉလႆႈၸိမ်းလူၸိမ်းတူၺ်း တၢင်းဢၼ်လီဢၼ်ငၢမ်း သေၽဝ်ႇသပွေၵ်ႈဢေႃႈ။
၂၆ သွင်ၶႃသွင်ၵေႃႉၼၼ်ႉလႆႈၼွၼ်း ၵႃႈၼႂ်းမုၼ်လိၼ်မိူၼ်မိူၼ်ၵၼ်လႄႈ ၶၢမ်ႇတၢင်းဢၼ်တူဝ်ၼွၼ်ႁူမ်ႇသုမ်ႇဢေႃႈ။
၂၇ တူၺ်းလူ။ၵဝ်ႁူႉလွင်ႈတၢင်းဢၼ်သူၵျၢမ်ႇသူပွင်ဢိၵ်ႇတင်းလွင်ႈတၢင်းဢၼ်သူၶႆႈၸႂ်ဝူၼ်ႉၸႂ်ဢၼ်ဢမ်ႇ တြႃးယူႇၽၢႆႇၼိုင်ႈတင်းၵဝ်ၼၼ်ႉယူႇဢေႃႈ။
၂၈ သူဢွၼ်ၵၼ်ထၢမ်လႄႈဝႃႈ၊-ႁိူၼ်းၶုၼ်ဢရႃႇသိၼၼ်ႉမီးၵႃႈတီႈ လႂ်။သုမ်ႉထဵင်တီႈယူႇတီႈသဝ်း ၶဝ်ၸိူဝ်းဢၼ်ဢမ်ႇ တြႃးၼၼ်ႉမီးၵႃႈတီႈ လႂ်၊ဝႃႈၼင်ႇၼႆဢေႃႈ။
၂၉ သူဢမ်ႇတွၼ်ႉယၢမ်ႈဢွၼ်ၵၼ် ထၢမ်တူၺ်းတီႈၶဝ်ၸိူဝ်းဢၼ်ၵႂႃႇတၢင်းပႆတၢင်းၼၼ်ႉႁိုဝ်။သူဢမ်ႇဢွၼ်ၵၼ်ႁူႉလၢၵ်ႈ ၶၼႃႇသၢၵ်ႈသေႇၶဝ်တင်းလၢႆဢၼ်ဝႃႈ၊-
၃၀ လွင်ႈဢၼ်ၶဝ်ၸိူဝ်းဢၼ်ဢမ်ႇတြႃးၼၼ်ႉ လႆႈၵၢင်းလွတ်ႈၽေးမိူဝ်ႈလဵဝ်ၼႆႉလႄႈ လႆႈၶၢမ်ႇတၢင်းဢၼ်ၵႄႇသႄႇၼုၵ်ႉဢဝ်ၼႂ်းမိူဝ်ႉဝၼ်း ဢၼ်လႆႈၶၢမ်ႇတေႃးသႃႉတၢင်းၸႂ်မႆႈ ၶႆႈၸႃႉၼၼ်ႉႁိုဝ်။
၃၁ ၽူႈ လႂ်တၵ်းၸီႉၼႃႈတမ်တႃမၼ်းသေလႄႈ ၽုၺ်ႇဢွၵ်ႇၼႄပျႃးသဵၼ်ႈတၢင်းဢၼ်မၼ်းၵႂႃႇယူႇၸွမ်းယူႇၼၼ်ႉ။ၽူႈ လႂ်တၵ်းတွပ်ႇတႅၼ်းပၼ် ၸွမ်းၼင်ႇဢပျႅတ်ႈ ဢၼ်မၼ်းႁဵတ်းၼၼ်ႉတီႈမၼ်း။
၃၂ မၼ်းတၵ်းလႆႈၶၢမ်ႇတၢင်းဢၼ်ဢဝ်သူင်ႇၵႃႈတီႈသၢင်းၶႅင်းလႄႈ ပိူၼ်ႈတၵ်းဢွၼ်ၵၼ်ပႂ်ႉၵွင်သၢင်းၶႅင်း မၼ်းဢေႃႈ။
၃၃ ၵွၼ်ႈလိၼ်ၵႃႈၼႂ်းၶူင်ႈႁူၺ်ႈၼၼ်ႉတၵ်းပဵၼ်ဢၼ်ထုၵ်ႇၸႂ်ဝၢၼ်ၸႂ်တီႈမၼ်းလႄႈ ၵူၼ်းတင်းသဵင်ႈတင်းလူင် ဢွၼ်ၵၼ်ၸွမ်းလင်မၼ်းၵႂႃႇၼမ်ၼႃႇလူင်လၢင်လႄႈ ၵူၼ်းၼမ်ၼႃႇထၢၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈၼၼ်ႉၵႂႃႇဢွၼ်တၢင်းမၼ်းယဝ်ႉ ဢေႃႈ။
၃၄ ၵွပ်ႈႁွႆႈၼႆႉလႄႈပိူဝ်ႈဢၼ်ၵႂၢမ်းဢၼ်သူၶိုၼ်းလၢတ်ႈၸိူဝ်းၼၼ်ႉပႃးမူႉသႃႇလႄႈ သူတၵ်းဢွၼ်ၵၼ်ႁဵတ်းႁႂ်ႈၵဝ်ပျေႇၸႂ်ၼိမ်ၸႂ်လႆႈၸိူဝ်ႉၼင်ႇႁိုဝ်၊ ဝႃႈၼင်ႇၼႆဢေႃႈ။