၂၂
ဢေးလိၽတ်ႉ
၁ မိူဝ်ႈၼၼ်ႉ ဢေးလိၽတ်ႉ မဵဝ်းတေႇမၼ်ႇဢွၵ်ႇသူပ်းၶိုၼ်းလၢတ်ႈလႄႈဝႃႈ၊-
၂ ၵူၼ်းၸိုင်ႁဵတ်းၵျေးၸူးတီႈၽြႃးပဵၼ်ၸဝ်ႈလႆႈႁိုဝ်။ ၵေႃႉဢၼ်မီးပိင်ႇၺႃႇၼၼ်ႉ ႁဵတ်းဢၵျူဝ်းပုၼ်ၽြႃးပဵၼ်ၸဝ်ႈလႆႈႁိုဝ်။
၃ တၢင်းဢၼ်မႂ်းသိုဝ်ႈတေႃႇၼၼ်ႉ ပဵၼ်တၢင်းဢၼ်ၸူမ်းဢၼ်သိူဝ်းတီႈၸဝ်ႈဢၼၼ်ႇတႃႉတၼ်းၶူဝ်းၸိူဝ်ႉၼင်ႇႁိုဝ်။တၢင်းဢၼ်မႂ်း ႁႂ်ႈသဵၼ်ႈတၢင်းဢၼ်မႂ်းၵႂႃႇၼၼ်ႉၸေးၸုမ်ႇၼၼ်ႉ ပဵၼ်တိုၼ်းပဵၼ်ႁွၼ်းတီႈမၼ်းၸဝ်ႈၸိူဝ်ႉၼင်ႇ ႁိုဝ်။
၄ ၵွပ်ႈပိူဝ်ႈဢၼ်မႂ်းၵူဝ်ႁႄမၼ်းၸဝ်ႈလႄႈမၼ်းၸဝ်ႈ တၵ်းသင်ႇသွၼ်သုင်းမႃႉပၼ်မႂ်းႁိုဝ်။
၅ မၼ်းၸဝ်ႈတၵ်းထူပ်းတြႃးၵၼ်တင်းမႂ်းႁိုဝ်။ တူႉၸရိူၵ်ႈဢၼ်မႂ်းႁဵတ်း ၼၼ်ႉယႂ်ႇၼႃႇလူင်လၢင်ဢမ်ႇၸႂ်ႈႁိုဝ်။
၆ ဢပျႅတ်ႈမႂ်းတင်းလၢႆၼၼ်ႉဢမ်ႇမီးတီႈသုတ်းတီႈသဵင်ႈဢမ်ႇၸႂ်ႈႁိုဝ်။ယင်းဢမ်ႇမီးလွင်မၼ်းတၢင်းမၼ်းလႄႈ မႂ်းဢဝ်ၶွင်ၶူဝ်းပီႈမႂ်းၼွင်ႉမႂ်းဢမ်ႇၸႂ်ႈႁိုဝ်။မႂ်းထွတ်ႇဢဝ်ၶူဝ်းၼုင်ႈ ၶဝ်လႄႈႁႂ်ႈၶဝ်ယူႇတူဝ်ပူၺ်ယဝ်ႉ။
၇ မႂ်းဢမ်ႇပၼ်ၼမ်ႉပုၼ်ႈၵေႃႉဢၼ်ႁိူဝ်ႉဢၼ်ၼူၼ်းတၵ်းၵိၼ်။မႂ်းဢမ်ႇလဵင်ႉလူ ၶဝ်ၸိူဝ်းဢၼ်ဢိုပ်းယၢၵ်ႈၼၼ်ႉ။
၈ ၵေႃႉဢၼ်ႁႅင်းယႂ်ႇၼၼ်ႉလႆႈပိူင်ႇၼမ်ႉပိူင်ႇလိၼ်ဢေႃႈ။ၵေႃႉဢၼ်မီးၵုင်ႇ သရေႇၼၼ်ႉလႆႈဢၶႂၢင်ႉယူႇၼႂ်းမၼ်းဢေႃႈ။
၉ မႂ်းပွႆႇမေႈမုၵ်ႉမေႈမၢႆႈတင်းလၢႆပႅတ်ႈ တိၼ်လၢႆမိုဝ်းပဝ်ႇလႄႈႁၵ်း ၶႅၼ်ႁၵ်းမိုဝ်းလုၵ်ႈတိၼ်ၽႃႉတင်းလၢႆပႅတ်ႈယဝ်ႉ။
၁၀ ၵွပ်ႈပိူဝ်ႈၼင်ႇၼၼ်လႄႈတူင်ႇႁဵဝ်ႉတူင်ႇၶိုမ်းလွမ်ႉႁွပ်ႈမႂ်းဝႆႉလႄႈတၢင်းဢၼ်ၶီႉၶႃႉတူၵ်းၸႂ်ၼၼ်ႉ ႁႂ်ႈမႂ်းယၢပ်ႇၸႂ် ၶၢၼ်ၸႂ်ဢေႃႈ။
၁၁ လပ်းသိင်ႇဢၼ်မႂ်းဢမ်ႇႁၼ်လႆႈၼၼ်ႉၼိၵ်ႈၸၢၵ်ႈငႅၼ်းသေးလႄႈ ၼမ်ႉဢၼ်လႆၸႅဝ်ႈၼႃႇလူင်လၢင်ၼၼ်ႉလႆႈထူမ်ႈႁူမ်ႇမႂ်းဢေႃႈ။
၁၂ ၽြႃးပဵၼ်ၸဝ်ႈ မီးယူႇၵႃႈၼိူဝ်ပၢႆၸိၵ်းၸွမ်ၵၢင်ႁၢဝ်ဢမ်ႇၸႂ်ႈႁိုဝ်။ တူၺ်းတၢင်းဢၼ်လၢဝ်တင်းလၢႆသုင်ၼႃႇၼၼ်ႉလူ။ လၢဝ်ၸိူဝ်းၼၼ်ႉပဵၼ်ဢၼ်သုင်ၼႃႇ လူင်လၢင်လူင်ပေႇ။
၁၃ ပိူဝ်ႈၼႆလႄႈမႂ်းၸၢင်ႊလၢတ်ႈလႄႈဝႃႈ၊-ၽြႃးပဵၼ်ၸဝ်ႈတၵ်းႁူႉလႆႈၸိူဝ်ႉၼင်ႇႁိုဝ်။ မၼ်းၸဝ်ႈယူႇၵႃႈၼႂ်းတမ်ႇတိူၵ်ႈၽႃႈၽူၼ်ဢၼ်ၼႃ တၼ်ၼႃႇၼၼ်ႉလႄႈတၵ်းၸီႇယၢင်ႇလႆႈႁိုဝ်။
၁၄ ၽႃႈၽူၼ် ဢၼ်တၼ်ၼႃႇလူင်လၢင်ထၢၼ်ႈပေႃးမၼ်းၸဝ်ႈဢမ်ႇႁၼ်လႆႈၸိူဝ်းၼၼ်ႉ ဢွၼ်ၵၼ်ႁူမ်ႇသုမ်ႇမၼ်းၸဝ်ႈယူႇလႄႈ မၼ်းၸဝ်ႈလႄႇလဵပ်ႈၵႃႈၼိူဝ်ပၢႆၸိၵ်းၸၵျႃႉဝလႃႇႉၵၢင်ႁၢဝ်ယူႇဢေႃႈ၊ ဝႃႈၼင်ႇၼႆယဝ်ႉ။
၁၅ မႂ်းတၵ်းၸွမ်းသဵၼ်ႈတၢင်းဢၼ်ၵဝ်ႇဢၼ်မွၼ်ဢၼ်ၵူၼ်းဢႃႉထမ်ႇမႃႉတင်းလၢႆဢၼ်ဝႃႈ ၶဝ်ၸိူဝ်း ဢၼ်လႆႈၶၢမ်ႇတၢင်းဢၼ်ၸၵ်ႉထူၺ်ႈဢွၵ်ႇပႅတ်ႈၸူဝ်ႈဢၼ်ၸူဝ်ႈပၢၼ်ၶဝ်
၁၆ ဢမ်ႇပႆႇထူၼ်ႈပႆႇတဵမ်ဢၼ်ငဝ်ႈႁၢၵ်ႈၶဝ် လႆႈၶၢမ်ႇတၢင်းဢၼ်ၼမ်ႉၼွင်းထူဝ်းဢဝ်ပႃးဢဝ်ၵႂႃႇပႅတ်ႈမူတ်းမူတ်းသဵင်ႈသဵင်ႈၼၼ်ႉလႄႈ ၸၢင်ႊလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊-
၁၇ ဢွၵ်ႇၵႂႃႇသေၵႃႈတီႈႁဝ်းတႃႉ။ ၸဝ်ႈဢၼၼ်ႇတႃႉတၼ်းၶူဝ်းၼၼ်ႉတၵ်းႁဵတ်းပုၼ်ႈႁဝ်းၸိူဝ်ႉၼင်ႇႁိုဝ်လႆႈ၊ ဝႃႈၼင်ႇ ၼႆၸိူဝ်းၼၼ်ႉႁိုဝ်။
၁၈ ၼႂ်းဝႃႈၼၼ်သေၵေႃႈမၼ်းၸဝ်ႈႁႂ်ႈႁိူၼ်းၶဝ်ၼၼ်ႉ တဵမ်ဝႆႉတင်းၶိူင်ႈပိူင်ဢၼ်လီဢၼ်ငၢမ်းဢေႃႈ။ ၵူၺ်းၵႃႈတၢင်းၵျၢမ်ႇတၢင်းပွင်ၶဝ်ၸိူဝ်း ဢၼ်ဢမ်ႇတြႃးၼၼ်ႉမီးၵႆၵၼ်တင်းၵဝ်ဢေႃႈ။
၁၉ ၶဝ်ၸိူဝ်းဢၼ်သိုဝ်ႈတေႃႇၼၼ်ႉ ဢွၼ်ၵၼ်တူၺ်းႁၼ် လႄႈၸူမ်းသိူဝ်းဢေႃႈ။
၂၀ ၶဝ်ၸိူဝ်းဢၼ်ၵၢင်းလွတ်ႈဢပျႅတ်ႈၼၼ်ႉဢွၼ်ၵၼ်ၶူဝ်ၶဝ်သေလႄႈဝႃႈ၊-ၶဝ်ၸိူဝ်းဢၼ်လုၵ်ႉယူႇၽၢႆႇၼိုင်ႈတင်းႁဝ်းၼၼ်ႉလႆႈၶၢမ်ႇတၢင်းဢၼ်ယႃႉပႅတ်ႈ ဢမၢၼ်ႇၶၢၼ်ပဵၼ်ယဝ်ႉလႄႈၵႃႈဢၼ်ယင်းၵိုတ်းယင်းၵျၢၼ်ႇဝႆႉ တီႈၶဝ်ၼၼ်ႉၵေႃႈၽႆးမႆႈပႅတ်ႈယဝ်ႉ၊ဝႃႈၼင်ႇၼႆဢေႃႈ။
၂၁ မိုတ်ႈၵိုဝ်းႁူႉၸၵ်းမၼ်းၸဝ်ႈလႄႈ ႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်းမၼ်းၸဝ်ႈတႃႉ။ပေႃးႁဵတ်းၸိူဝ်ႉၼင်ႇၼၼ်ၸိုင် တၢင်းဢၼ်လႆႈလီလႆႈပဵၼ်တၵ်းႁွတ်ႈထိုင်ၵႃႈတီႈမႂ်းဢေႃႈ။
၂၂ ၶႅၼ်းတေႃႈၶၢမ်ႇဢဝ်တြႃးၵႃႈတီႈသူပ်းမၼ်းၸဝ်ႈလႄႈဢဝ်ၵႂၢမ်းမၼ်းၸဝ်ႈ သႂၢင်းသႂ်ႇဝႆႉၵႃႈၼႂ်းႁူဝ်ၸႂ်မႂ်းသေၵမ်း။
၂၃ ပေႃးမႂ်းၶိုၼ်းမႃးၸူးတီႈၸဝ်ႈဢၼၼ်ႇတႃႉတၼ်းၶူဝ်း၊ ပေႃးမႂ်းပႄႇပႅတ်ႈတူႉၸရိူၵ်ႈႁႂ်ႈၵႆယၢၼ်သေ ၵႃႈတီႈသုမ်ႉထဵင်တီႈယူႇတီႈသဝ်းမႂ်းၸိုင် မႂ်းတၵ်းလႆႈၶၢမ်ႇတၢင်းဢၼ်တႄႇ ႁဵတ်းဢေႃႈ။
၂၄ ဢဝ်ၽၼ်ႇတႃႇၶမ်းမႂ်းၶျႃးပႅတ်ႈၵႃႈတီႈမုၼ်လိၼ်လႄႈ ဢဝ်ၶမ်းဢေႃႇရၽိရၶျႃးတူၵ်းပႅတ်ႈၵႃႈၼႂ်းမၢၵ်ႇႁိၼ်ႁႄႈ ဢၼ်မီးၵႃႈၼႂ်းၼမ်ႉၼွင်ၼမ်ႉၵႄး ၼၼ်ႉသေတႃႉ။
၂၅ ပေႃးႁဵတ်းၸိူဝ်ႉၼင်ႇၼၼ်ၸိုင်ၸဝ်ႈဢၼၼ်ႇတႃႉတၼ်းၶူဝ်း တၵ်းပဵၼ်ၽၼ်ႇတႃႇၶမ်းဢိၵ်ႇ တင်းၽၼ်ႇတႃႇငိုၼ်းပုၼ်ႈမႂ်းဢေႃႈ။
၂၆ မိူဝ်ႈၼၼ်ႉမႂ်းတၵ်းမူၼ်ႈပျေႃႇတီႈ ၸဝ်ႈဢၼၼ်ႇတႃႉတၼ်းၶူဝ်းလႄႈမီးဢၶႂၢင်ႉ ဢၼ်လႆႈငွၵ်ႈၸူးႁႅၼ်ၸူးတီႈၽြႃး ပဵၼ်ၸဝ်ႈဢေႃႈ။
၂၇ မႂ်းတၵ်းမီးဢၶႂၢင်ႉဢၼ်လႆႈသူးတွင်းတီႈမၼ်းၸဝ်ႈ၊ မၼ်းၸဝ်ႈၵေႃႈတၵ်းထွမ်ႇဢဝ်ၵႂၢမ်းမႂ်းလႄႈမႂ်းတၵ်းမီးဢၶႂၢင်ႉ ဢၼ်လႆႈၽေႇဝၢတ်ႈသႅတ်ႈ ၸႃႇဢၼ်မႂ်းဝႆႉၵတိၼၼ်ႉဢေႃႈ။
၂၈ မႂ်းတၵ်းမီးဢၶႂၢင်ႉဢၼ်လႆႈၵျၢမ်ႇပွင်လႄႈ တၢင်းၵျၢမ်ႇတၢင်းပွင်ၼၼ်ႉၵေႃႈ တၵ်းပဵၼ်လႆႈလႄႈ သၢႆဢရွင်ႇတၵ်းႁိူဝ်ႈလႅင်းၵႃႈတီႈသဵၼ်ႈတၢင်းဢၼ်မႂ်းၵႂႃႇၼၼ်ႉဢေႃႈ။
၂၉ ယၢမ်းမိူဝ်ႈဢၼ်ပိူၼ်ႈၶျႃးမႂ်းတူၵ်းတီႈတႅမ်ႇၼၼ်ႉ မႂ်းတၵ်းဝႃႈတၵ်းမီးဢၶႂၢင်ႉဢၼ်ယုၵ်ႉယွင်ႈလႆႈ၊ ဝႃႈၼင်ႇၼႆလႄႈမၼ်းၸဝ်ႈတၵ်းၵႄႇသႄႇၶျွတ်ႈဢဝ် ၵေႃႉဢၼ်ႁူဝ်ၸႂ် ၶျႃးတႅမ်ႇၼၼ်ႉဢေႃႈ။
၃၀ မၼ်းၸဝ်ႈတၵ်းၵႄႇသႄႇၼုၵ်ႈဢဝ်ၵေႃႉဢၼ် ဢမ်ႇၵၢင်းဢမ်ႇလွတ်ႈတင်းဢပျႅတ်ႈၼၼ်ႉလႄႈ မၼ်းၼၼ်ႉတၵ်းႁွတ်ႈထိုင်တၢင်းဢၼ်ၵႄႇသႄႇၼုၵ်ႈဢဝ် ၵွပ်ႈပိူဝ်ႈတၢင်းဢၼ်မိုဝ်းမႂ်းပဵၼ်ဢၼ်မူတ်းသႂ်ၼၼ်ႉဢေႃႈ၊ဝႃႈၼင်ႇၼႆဢေႃႈ။