၂၀
ၸေႃႇၽႃႇ
၁ မိူဝ်ႈၼၼ်ႉၸေႃႇၽႃႇ ၵူၼ်းမဵဝ်းၼေႇမတ်ႉဢွၵ်ႇသူပ်းၶိုၼ်းလၢတ်ႈလႄႈဝႃႈ၊-
၂ ပိူဝ်ႈဢၼ်ႁူဝ်ၸႂ်ၵဝ်တိုၵ်းယူင်းၵဝ်ႁႂ်ႈၵဝ်ၶိုၼ်းလၢတ်ႈလႄႈ ၵဝ်မီးၸႂ်ဢၼ်ၶႂ်ႈလၢတ်ႈႁႅင်းယႂ်ႇၼႃႇလူင်လၢင်ဢေႃႈ။
၃ ၵဝ်လႆႈငိၼ်းၵႂၢမ်းတၢင်းဢၼ်သေႉသွၼ်းတၢင်ႇဢပျႅတ်ႈဢၼ်ၵဝ်လႆႈၶၢမ်ႇၼၼ်ႉသေလႄႈ သၽေႃးၺၢၼ်ႇၵဝ် တိုၵ်းယူင်းၵဝ်လႄႈၵဝ်လႆႈၶိုၼ်းလၢတ်ႈဢေႃႈ။
၄ ၸႃႉၸဵမ်ၶိင်ႇၵႃႇလႃႉမိူဝ်ႈဢွၼ်ၼႆႉၼၼ်ႉ ၶိင်ႇၵႃႇလႃႉဢၼ်ၸႃႉဢဝ် ၵူၼ်းတၢင်ႇသႂ်ႇဝႆႉ ၵႃႈၼိူဝ်လိၼ်မိူင်းၼၼ်ႉ
၅ မႂ်းဢမ်ႇႁူႉလွင်ႈဢၼ် ၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉ ဢမ်ႇလႆႈဢုပ်ႇဢၢတ်ႇယူႇႁိုင်ႁိုင် ဢိၵ်ႇတင်းလွင်ႈဢၼ်ၵူၼ်းဢႃႉထမ်ႇမႃႉတင်းလၢႆ လႆႈၸူမ်းသိူဝ်းမူၼ်ႈပျေႃႇ ယေႈၸူဝ်ႈဢွၼ်ႇၵမ်းဢွၼ်ႇၼိုင်ႈ ၵူၺ်း ၼၼ်ႉႁိုဝ်။
၆ ပိၵ်ႉသမ်ႉၸႂ်မႃႇၼႃႉမၼ်းၶိုၼ်ႈၵႃႈၼိူဝ်ၾႃႉၵၢင်ႁၢဝ်လႄႈၵွၵ်းႁူဝ်မၼ်းၶိုတ်းထိုင်မွၵ်ႇၵုမ်ႈသေၵေႃႈ၊
၇ မၼ်းတၵ်းလႆႈလူႉလႅဝ် မိူၼ်ၸိူဝ်ႉၼင်ႇၽၢႆႈလူင်မၼ်းၼၼ်ႉလႄႈ ၶဝ်ၸိူဝ်းဢၼ်ယၢမ်ႈႁၼ်မၼ်းၼၼ်ႉတၵ်း ထၢမ်ဝႃႈ၊-မၼ်းမီးၵႃႈ လႂ်၊ဝႃႈၼင်ႇၼႆဢေႃႈ။
၈ မၼ်းတၵ်းၶီႉၶႃႉႁၢႆၵႂႃႇ မိူၼ်ၸိူဝ်ႉၼင်ႇ တၢင်းဢၼ်ၼွၼ်းၽၼ်ႁၼ်ၼၼ်ႉလႄႈ ၵမ်းလိုၼ်းဢမ်ႇလႆႈထူပ်းလႆႈႁၼ်။ မၼ်းတၵ်းလႆႈလပ်ႉၵႂႃႇႁၢႆၵႂႃႇမိူၼ်ၸိူဝ်ႉၼင်ႇရူႇ ပႃႇရူင်ႇၶိင်ႇၵၢင်ၶိုၼ်းၼၼ်ႉဢေႃႈ။
၉ မၢၵ်ႇတႃဢၼ်ယၢမ်ႈလႆႈႁၼ်မၼ်းၼၼ်ႉၵမ်းလိုၼ်း ဢမ်ႇလႆႈႁၼ်မၼ်း။ တီႈဢၼ်မၼ်းယူႇမၼ်းသဝ်းၼၼ်ႉၵမ်းလိုၼ်းတၵ်းဢမ်ႇလႆႈထူပ်းလႆႈႁၼ်မၼ်း။
၁၀ ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉ တၵ်းၼိၵ်ႈၸၢၵ်ႈငႅၼ်းသေးလုၵ်ႈလၢင်းမၼ်းလႄႈ မိုဝ်းမၼ်းတၵ်းလႆႈဢဝ်ၶွင်ၶူဝ်းၸေးၸိမ်ႇဢၼ်မၼ်းမႅပ်ႇဝႆႉသိမ်းဝႆႉၼၼ်ႉ ၶိုၼ်းပၼ် ဢေႃႈ။
၁၁ ပိၵ်ႉသမ်ႉလုပ်ႇမၼ်းတဵမ်ဝႆႉတင်းဢဵၼ်ႁႅင်းယူႇသေၵေႃႈ တၵ်းလႆႈၼွၼ်းလူၺ်ႈၵၼ်တင်းမၼ်းၵႃႈ ၼႂ်းမုၼ်လိၼ်ဢေႃႈ။
၁၂ ပိၵ်ႉသမ်ႉတူႉၸရိူၵ်ႈမၼ်းၼၼ်ႉပဵၼ်ဢၼ်ဝၢၼ်ဢၼ်ၸဵမ်းတီႈသူပ်းမၼ်းလႄႈ မၼ်းဢဝ် သိူင်ႇဝႆႉသိမ်းဝႆႉၵႃႈတႂ်ႈလိၼ်ႉမၼ်းလႄႈ
၁၃ မၼ်းငိၼ်းပဵၼ်သေလၢႆယူႇ ယင်းဢမ်ႇၸုၼ်ႉဢမ်ႇပႅတ်ႈလႄႈဢူမ်သႂ်ႇဝႆႉ ၵႃႈၼႂ်းသူပ်းမၼ်းသေၵေႃႈ
၁၄ တၢင်းဢၼ်မၼ်းၵိၼ်မၼ်းၶူပ်းၼၼ်ႉ တၵ်းပဵၼ်ဢၼ်သူမ်ႈၵႂႃႇၵႃႈၼႂ်းတွင်ႉမၼ်းလႄႈ ပဵၼ်ၵွင်ႉပဵၼ်ယၢင်ငူးႁၢႆႉၵႂႃႇ ၵႃႈၼႂ်းမၼ်း ဢေႃႈ။
၁၅ မၼ်းဢိုၼ်ႈၵိၼ်ၸေးၸိမ်ႇၶွင်ၶူဝ်းသေယဝ်ႉသမ်ႉတၵ်းလႆႈၶိုၼ်းႁၢၵ်ႈလႄႈ ၽြႃးပဵၼ်ၸဝ်ႈတၵ်းၼုၵ်ႈ ပႅတ်ႈၶျႃးပႅတ်ႈသေၵႃႈၼႂ်းတွင်ႉမၼ်းဢေႃႈ။
၁၆ မၼ်းတၵ်းၸုပ်ႇၵိၼ်ၵွင်ႉယၢင်ငူးႁၢႆႉလႄႈ တၵ်းတၢႆလူၺ်ႈလိၼ်ႉငူး တိုင်ဢေႃႈ။
၁၇ မၼ်းဢမ်ႇလႆႈႁၼ်ၼမ်ႉႁွင်ႊဢၼ်ပဵၼ်ႁွင်ႊပဵၼ်ၵေးၼမ်ႉႁွင်ႊ ဢၼ်ၼမ်ႉၼူမ်းတင်းၼမ်ႉၽိုင်ႈ လႆႈယူႇၼၼ်ႉ။
၁၈ ၶွင်ၶူဝ်းဢၼ်မၼ်းႁဵတ်းလႄႈလႆႈမႃးၼၼ်ႉတူဝ်မၼ်းဢမ်ႇလႆႈသုင်းလႆႈၸၢႆႇလႄႈ တၵ်းလႆႈၶိုၼ်းပၼ်ဢေႃႈ။ ၸွမ်းလူၺ်ႈၶွင်ၶူဝ်းဢၼ်မၼ်းလႆႈၼၼ်ႉသေလႄႈမၼ်းဢမ်ႇလႆႈၸူမ်းသိူဝ်းသႂၢင်ႇၸႂ်။
၁၉ မၼ်းၼိၵ်ႈၸၢၵ်ႈငႅၼ်းသေး ၵူၼ်းယၢၵ်ႈၵူၼ်းၽၢၼ်လႄႈ မၼ်းႁိမ်ဢဝ်ႁိူၼ်းဢၼ်မၼ်းဢမ်ႇတႄႇဢမ်ႇ ႁဵတ်းၼၼ်ႉ။
၂၀ ၵွပ်ႈပိူဝ်ႈလေႃးၽႃႉမၼ်းဢမ်ႇပျေႇလႆႈၼၼ်ႉလႄႈ ၶွင်ၶူဝ်းၽၢၼ်ႇထႃႇမၼ်းဢမ်ႇၵႄႇသႄႇ ၶျွတ်ႈဢဝ်မၼ်းလႆႈ။
၂၁ လွင်ႈတၢင်းဢၼ်မၼ်းတၵ်းလႆႈႁိမ်ဢဝ်ၼၼ်ႉ ဢမ်ႇၵိုတ်းဢမ်ႇၵျၢၼ်ႇလႃးလႃးလႄႈၸေးၸိမ်ႇမၼ်းဢမ်ႇလႆႈတႄႇလႆႈပဵၼ်။
၂၂ တေႃႈၵႃႈၼႂ်းမိူဝ်ႈဢၼ်ၶွင်ၶူဝ်းမၼ်း ယင်းတိုၵ်ႉလိူင်ႇၼမ်ယူႇၼၼ်ႉ မၼ်းလႆႈႁူပ်ႉထူပ်းတၢင်းဢၼ်ယၢၵ်ႈဢၼ်ၽၢၼ်လႄႈ မိုဝ်းၶဝ်ၸိူဝ်းဢၼ်ယၢၵ်ႈၸႂ်ၶၢၼ် ၸႂ်ၼၼ်ႉတၵ်းႁွတ်ႈထိုင်ၵႃႈၼိူဝ်မၼ်းဢေႃႈ။
၂၃ ၼႂ်းမိူဝ်ႈဢၼ်မၼ်းၵိၼ်လႄႈ ၸမ်တၵ်းဢိမ်ႇတၵ်းတဵမ်ၼၼ်ႉၽြႃးပဵၼ်ၸဝ်ႈ တၵ်းပွႆႇၸႂ်ႉဢၢႆႁႅင်းတၢင်းၸႂ်မႆႈၶႆႈၸႃႉမၼ်းၸဝ်ႈမႃးၵႃႈၼိူဝ်မၼ်းလႄႈ ႁႂ်ႈၽူၼ်တၢင်းၸႂ်မႆႈၶႆႈၸႃႉမၼ်းၸဝ်ႈတူၵ်းမႃး ပုၼ်ႈဢၼ်မၼ်းတၵ်းၵိၼ် ဢေႃႈ။
၂၄ ပိၵ်ႉသမ်ႉမၼ်းငႅၵ်းပိူင်ႈဢွၵ်ႇပၢႆႈသလေၢၵ်ႈၼၢၵ်ႈလဵၵ်းၵေႃႈ ၵၢင်ႇတွင်းလိူင်တင်းယိုဝ်းၸပ်းမၼ်းပွင်ႇပိဝ်ၵႂႃႇဢေႃႈ။မၼ်းထွတ်ႇဢဝ်ပိုၼ်ၼၼ်ႉဢွၵ်ႇလႄႈ ပိုၼ် ၼၼ်ႉဢွၵ်ႇမႃးၵႃႈၼႂ်းတူဝ်မၼ်းဢေႃႈ။
၂၅ လၢပ်ႇဢၼ်ဢရွင်ႇမၼ်း မၢပ်ႈမႅပ်ႈၼၼ်ႉ ဢွၵ်ႇမႃးၵႃႈၼႂ်းလီႉမၼ်း လႄႈမၼ်းလႆႈမိင်းမဝ်းလိုမ်းတူဝ်ၵႂႃႇဢေႃႈ။
၂၆ လပ်းသိင်ႇၵႃႈမီးၼၼ်ႉသိမ်းဝႆႉယူႇပုၼ်ႈမၼ်းလႄႈ ၽႆးဢၼ်ၵူၼ်းဢမ်ႇသႂ်ႇဢမ်ႇသုမ်ၼၼ်ႉတၵ်းႁုပ်ႇမႆႈမၼ်းဢေႃႈ။တၵ်းမႆႈၵႃႈဢၼ်ၵိုတ်းၵျၢၼ်ႇဝႆႉၵႃႈၼႂ်း သုမ်ႉထဵင်မၼ်းၼၼ်ႉ ဢေႃႈ။
၂၇ ၾႃႉၵၢင်ႁၢဝ်တၵ်းၽုၺ်ႇဢွၵ်ႇၼႄပျႃႉဢပျႅတ်ႈမၼ်းလႄႈ လိၼ်မိူင်းၵေႃႈတၵ်းလုၵ်ႈယူႇၽၢႆႇၼိုင်ႈ ၵၼ်တင်းမၼ်းဢေႃႈ။
၂၈ ဢုၵ်ႉၸႃႇၵႃႈၼႂ်းႁိူၼ်းမၼ်းတၵ်းလပ်ႉႁၢႆၵႂႃႇလႄႈ လွင်ႈၵႂႃႇလႆၵႂႃႇမိူၼ်ၸိူဝ်ႉၼင်ႇၼမ်ႉၼၼ်ႉ ၼႂ်းမိူဝ်ႉဝၼ်းဢၼ်တၢင်းၸႂ်မႆႈၶႆႈၸႃႉမၼ်း ၸဝ်ႈဢွၵ်ႇၼၼ်ႉဢေႃႈ။
၂၉ ဢၼ်ၼႆႉပဵၼ်ပုၼ်ႈပဵၼ်တႃႇၵူၼ်း ႁၢႆႉၵူၼ်းမိူၵ်ႈဢၼ်ၽြႃးပဵၼ်ၸဝ်ႈပၼ်ၼၼ်ႉလႄႈပဵၼ်ဢမူၺ်ႇဢုၵ်ၸႃႇဢၼ်ၽြႃးပဵၼ်ႈၸဝ်ႈ ၸီႇယၢင်ႇၶၢၼ်းဝႆႉပုၼ်ႈမၼ်းၼၼ်ႉဢေႃႈ၊ဝႃႈၼင်ႇၼႆဢေႃႈ။