၁၆
ယေႃႇၽ
၁ မိူဝ်ႈၼၼ်ႉ ယေႃႇၽ ဢွၵ်ႇသူပ်းၶိုၼ်းလၢတ်ႈလႄႈ ဝႃႈ၊-
၂ ၵဝ်ယၢမ်ႈလႆႈငိၼ်းၵႂၢမ်းၸိူဝ်ႉၼင်ၼၼ်ၼမ်ၼႃႇယဝ်ႉ။ၸွင်ႇသူၵႃႈမီးၼႆႉပဵၼ်ၵေႃႉဢၼ်ႁဵတ်းႁႂ်ႈၶၢၼ်ၸႂ် ယၢပ်ႇၸႂ်ထၢတ်ႇယဵၼ်ၵႂႃႇႁိုဝ်။
၃ ၵႂၢမ်းဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉ ဢမ်ႇသဵင်ႈဢမ်ႇမူတ်းလႆႈႁိုဝ်။ၵွပ်ႈၵႃႈသင်လႄႈသူႁတ်းႁၢၼ်းထၼ်ႈပေႃး ၶိုၼ်းတွပ်ႇ ၶိုၼ်းထဵင်။
၄ ပေႃးသူပဵၼ်ဢၼ်ၵဝ်ပဵၼ်ၼႆႉၸိုင်ၵဝ်ၵေႃႈလၢတ်ႈၸိူဝ်ႉၼင်ႇဢၼ်သူလၢတ်ႈၼၼ်ႉလႆႈယူႇဢေႃႈ။ၵဝ်တၵ်းဢဝ်ၵႂၢမ်း ပုမ်ႇၵွင်ဝႆႉယူႇၽၢႆႇၼိုင်ႈတင်းသူသေ လႄႈသၼ်ႇႁူဝ်ဝၢႆႇႁူဝ်ၵဝ်ၸူးသူလႆႈယူႇဢေႃႈ။
၅ ၵူၺ်းၵႃႈၵဝ်တၵ်းဢဝ်သူပ်းၵဝ်ပၼ်ႁႅင်းသူလႄႈ ဢၼ်သီႇသူပ်းၵဝ်ႁႂ်ႈသူၼိမ်ၸႂ်လီၸႂ်သၢၵ်ႈသႃႇယူႇဢေႃႈ။
၆ မိူဝ်ႈလဵဝ်ၼႆႉၸိုင် ပိၵ်ႉသမ်ႉၵဝ်လၢတ်ႈသေၵေႃႈ တၢင်းဢၼ်မႆႈၸႂ်ၶီၸႂ်ၼၼ်ႉဢမ်ႇသၢၵ်ႈသႃႇ။ပိၵ်ႉသမ်ႉၵဝ်ဢမ်ႇလၢတ်ႈလႄႈ ယူႇသေၵေႃႈဢမ်ႇမီးတၢင်းဢၼ်လၢၵ်ႇမႃးပိူင်ႈမႃး။
၇ ၸဝ်ႈႁဝ်းႁႂ်ႈၶႃႈၸဝ်ႈယၢပ်ႇၸႂ်ၶၢၼ်ၸႂ်ယဝ်ႉ။ၸဝ်ႈႁဝ်းတီႇပႅတ်ႈၽဵဝ်ႈပႅတ်ႈႁိူၼ်းၶႃႈၸဝ်ႈတီႈၶႃႈယဝ်ႉ။
၈ ၸဝ်ႈ ႁဝ်းယိပ်းၵမ်ဢဝ်ၶႃႈၸဝ်ႈ မၼ်ႈၼႃႇလူင်လၢင်သေလႄႈ ၶၢမ်ႇသၢၵ်ႈသေႇယူႇၽၢႆႇၼိုင်ႈတင်းၶႃႈၸဝ်ႈတီႈၶႃႈဢေႃႈ။တၢင်းဢၼ်ၵဝ်ယွမ်ႁဵဝ်ႇၼၼ်ႉၵေႃႈလုၵ်ႉယူႇၽၢႆႇၼိုင်ႈတင်းၶႃႈၸဝ်ႈလႄႈ ၼႃႈတေႃႇၼႃႈယူႇ သေလႄႈၶၢမ်ႇသၢၵ်ႈသေႇယူတီႈၶႃႈဢေႃႈ။
၉ မၼ်းၸဝ်ႈတိုတ်ႉဢဝ်ၶၢတ်ႇ ပဵၼ်ပွတ်းပဵၼ်တွၼ်ႈၼႂ်းတၢင်းၸႂ်မႆႈၶႆႈၸႃႉမၼ်းၸဝ်ႈၼၼ်ႉသေလႄႈ ၼိၵ်ႈၸၢၵ်ႈငႅၼ်းသေးၵဝ်ဢေႃႈ။မၼ်းၸဝ်ႈႁဵတ်းတၢင်းဢၼ်ၵတ်းၶဵဝ်ႈၵူတ်းၽၢၼ်ႈၵႃႈၼိူဝ်ၵဝ်လႄႈရၢၼ်ႇသူႇၵဝ်ၼၼ်ႉ ၽႅပ်ႉ တႃႇယုပ်းတႃၸူးၵဝ်ယူႇဢေႃႈ။
၁၀ ၶဝ်ဢွၼ်ၵၼ်ဢႃႈသူပ်းဢႃႈပၢၵ်ႇၸူးတီႈၵဝ်လႄႈ ဢွၼ်ၵၼ်တူပ်းၵႅမ်ႈ ယႃႉသရေႇၵဝ်ဢေႃႈ။
၁၁ ၽြႃးပဵၼ်ၸဝ်ႈဢဝ်ၵဝ်ဢၢပ်ႈဝႆႉၵႃႈၼႂ်း ၶဝ်ၸိူဝ်းဢၼ်ဢမ်ႇတြႃးၼၼ်ႉလႄႈ မၼ်းၸဝ်ႈဢဝ်ၵဝ်ထႅမ်ႈသႂ်ႇဝႆႉ ၵႃႈၼႂ်းမိုဝ်းၵူၼ်းႁၢႆႉၵူၼ်းမိူၵ်ႈ တင်းလၢႆယဝ်ႉ။
၁၂ မိူဝ်ႈဢၼ်ၵဝ်ယူႇတဵတ်ႇလီၼိမ်လီယူႇၼၼ်ႉမၼ်းၸဝ်ႈႁၵ်းႁိၵ်းၵဝ်ပႅတ်ႈယဝ်ႉ။မၼ်းၸဝ်ႈယုပ်းဢဝ်ၶေႃးၵဝ်သေလႄႈ ၽတ်ႉႁႂ်ႈၶၢတ်ႇပဵၼ်ပွတ်းပဵၼ်တွၼ်ႈၵႂႃႇယဝ်ႉ။ မၼ်းၸဝ်ႈဢဝ်ၵဝ်ပဵၼ်တီႈယိူင်းမၢႆဢၼ်တၵ်းလႆႈၶၢမ်ႇတၢင်းဢၼ် တၵ်းယိင်ႈတၵ်းယိုဝ်းယဝ်ႉ။
၁၃ ႁူဝ်ႁၢၼ်ၵူၼ်းသိုၵ်းဢၼ်ယိုဝ်းတင်းလၢႆၵေႃႈဢွၼ်ၵၼ်လွမ်ႉႁွပ်ႈၵဝ်ယူႇဢေႃႈ။မၼ်းၸဝ်ႈယင်းဢမ်ႇသေလၢႆၵဝ်လႄႈ ႁႂ်ႈၸူၵ်ႉသဵပ်ႇသႂ်ႇမၢၵ်ႇလၼ်းၵဝ်ယဝ်ႉ။မၼ်းၸဝ်ႈဢဝ်ၼမ်ႉႁူင်းလီၵဝ် ထွၵ်ႇႁိုဝ်ႈပႅတ်ႈၵႃႈၼိူဝ် လိၼ်မိူင်းယဝ်ႉ။
၁၄ မၼ်းၸဝ်ႈသိၵ်ႇယႃႉၵဝ်ပဵၼ်ႁူးပဵၼ်ႁွႆးဝႆႉလႄႈ တိုၵ်းတေႃးၵဝ်မႃးမိူၼ်ၼင်ႇႁူဝ်ႁၢၼ်ၵူၼ်းသိုၵ်း ဢၼ်ႁႅင်းယႂ်ႇၼႃႇၼၼ်ႉဢေႃႈ။
၁၅ ၵဝ်လႆႈယဵပ်ႉၶူဝ်းၼုင်ႈၼင်ႈပေႃသႂ်ႇၵႃႈၼိူဝ်ႉၼင်ၼိူဝ်ႉတူဝ်ၵဝ်လႄႈ လႆႈဢဝ် ႁူဝ်ၵဝ်ၵူမ်ႈတူၵ်းၵႃႈၼႂ်းၽုၼ်ႇမုၵ်ႉယဝ်ႉ။
၁၆ ၼႃႈၵဝ်လူႉယူႇလူၺ်ႈတၢင်းဢၼ်ႁႆႈဢၼ်ႁွင်ႉလႄႈ ႁူမ်ႈတၢင်းတၢႆ သုမ်ႇႁူမ်ႇဝႆႉၵႃႈၼိူဝ်ႉၼင်တႃၵဝ်ဢေႃႈ။
၁၇ ၼႂ်းဝႃႈၼၼ်သေၵေႃႈ ဢမူႉဢၼ်ဢမ်ႇတြႃးဢမ်ႇမီးၵႃႈတီႈမိုဝ်းၵဝ်။ပထၼႃႇဢၼ်ၵဝ်ႁဵတ်းၼၼ်ႉမူတ်းသႂ်ယူႇဢေႃႈ။
၁၈ လိၼ်မိူင်းဢိူၺ်း။ယႃႇပေႁူမ်ႇသုမ်ႇလိူတ်ႈၵဝ်ဝႆႉသေၵမ်း။ယႃႇပေႁႂ်ႈ သဵင်ဢၼ်ၵဝ်သႅၼ်ႇႁွင်ႉၼၼ်ႉလႆႈၵိုတ်းယူႇ ၵႃႈတီႈမႂ်းသေၵမ်း။
၁၉ တူၺ်းလူ။မိူဝ်ႈလဵဝ်ၼႆႉသၢၵ်ႈသေၵဝ်မီးယူႇၵႃႈၼိူဝ်ၵၢင်ႁၢဝ်ဢေႃႈ။ၵေႃႉဢၼ်ႁႃသၽေႃးၵဝ်ၼၼ်ႉမီးယူႇၵႃႈတီႈဢၼ်သုင်ဢေႃႈ။
၂၀ ၵေႃႉသေႈၵဝ်တင်းလၢႆဢွၼ်ၵၼ်သေႉသွမ်းၵဝ်လႄႈ ၼမ်ႉတႃၵဝ်လႆတူၵ်း ၸူးၵႃႈတီႈၽြႃးပဵၼ်ၸဝ်ႈဢေႃႈ။
၂၁ တၢင်ႈတူဝ်ၵူၼ်းလႄႈ မၼ်းၸဝ်ႈတၢင်ႇလၢဝ်တီႈၽြႃးပဵၼ်ၸဝ်ႈဢေႃႈ။ၸိူဝ်ႉၼင်ႇၵူၼ်းၼၼ်ႉမၼ်းတၢင်ႇလၢဝ်ပုၼ်ႈၵေႃႉ သေႈမၼ်းဢေႃႈ။
၂၂ ၸူဝ်ႈဢၼ်ၶူပ်ႇၼီႈပီႊမိူင်းဢမ်ႇပႆႇႁိုင်ပႆႇၼၢၼ်းၼၼ်ႉ ၵဝ်တၵ်းလႆႈၵႂႃႇၸွမ်းသဵၼ်ႈတၢင်းဢၼ်ၵဝ်ဢမ်ႇၶိုၼ်းမႃးလႆႈၼၼ်ႉဢေႃႈ။