၃၉
၁ မႂ်းႁူႉၶိင်ႇဢၼ်ပႄႉထိူၼ်ႇၵိူတ်ႇလဵင်ႉၼၼ်ႉႁိုဝ်။မႂ်းမၢတ်ႈတွင်းၶိင်ႇဢၼ်ၵႂၢင်မေႈ လႆႈၶၢမ်ႇဝူၺ်ႇတၼႃႇတၢင်း ဢၼ်ၵိူတ်ႇလဵင်ႉလုၵ်ႈလဵင်ႉလၢင်းၼၼ်ႉလႆႈႁိုဝ်။
၂ မႂ်းၼပ်ႉဢၢၼ်ႇ လိူၼ်ဢၼ်ၶဝ်လႆႈပႃးပတိၵ်ႉသၼ်ႇထေႇၸိူဝ်း ၼၼ်ႉလႆႈႁိုဝ်။
၃ မႂ်းႁူႉၶိင်ႇဢၼ်ၶဝ်ၵိူတ်ႇလဵင်ႉၼၼ်ႉႁိုဝ်။ၶဝ်ၼၼ်ႉဢွၼ်ၵၼ်ၵွင်ႇဢႅဝ်ၶူတ်းဢႅဝ်သေလႄႈ ၵိူတ်ႇလဵင်ႉလုၵ်ႈဢွၼ်ႇၶဝ်လႄႈ ၶဝ်ၸိူဝ်းၼၼ်ႉၸင်ႇဢွၼ် ၵၼ်ယူႇလီလႄႈယႂ်ႇမႃးၵႃႈတီႈပၢင်ႇပဵင်းဢေႃႈ။
၄ ၶဝ်ၸင်ႇဢွၼ်ၵၼ်ၵႂႃႇသေလႄႈ ယင်းဢမ်ႇၶိုၼ်းမႃးတီႈ မေႈၶဝ်လႄႈယူႇဢေႃႈ။
၅ ၽူႈ လႂ်ပွႆႇပိုၼ်ႉပွႆႇပႅတ်ႈမႃႉလီႈထိူၼ်ႇၼၼ်ႉ။ၽူႈ လႂ်ၵႄႈလိတ်ႈတၢင်းဢၼ်မတ်ႉဢၼ် ၽုၵ်ႈတူဝ်ဢၼ်ၸၢင်ႊလႄႇၸၢင်ႊလၢဝ်းၼၼ်ႉ။
၆ ၵဝ်ၶၢၼ်းဝႆႉပုၼ်ႈႁိူၼ်းမၼ်း ဢိၵ်ႇတင်းပၢင်ႇပဵင်းဢၼ်ပဝ်ႇ ဢၼ်လၢပ်ႈပုၼ်ႈတီႈယူႇမၼ်းယဝ်ႉ။
၇ မၼ်းၼၼ်ႉၸၢင်ႊႁဵတ်းဢမ်ႇပေႃးၼင်ႇႁိုဝ် တီႈသဵင်ဢၼ်တူင်ႉဢၼ်တိုၼ်ႇဢၼ်ပဵၼ်ၵႃႈတီႈဝဵင်းၼၼ်ႉလႄႈ ဢမ်ႇၸၢင်ႊတွၼ်ႉႁူႉတွၼ်ႉငိၼ်း သဵင်ႁွင်ႉသဵင်သႅၼ်ႇၵေႃႉဢၼ်ႁေႃႈၼၼ်ႉ။
၈ မၼ်းလႄႇၵိၼ်ၵႃႈတီႈၼိူဝ်လွႆၼိူဝ်ၵုင်းလႄႈ ႁႃဢဝ်တူၼ်ႈဢၼ်လိပ်းဢၼ်ၶဵဝ်ၵူႈၸိူဝ်ႉၵူႈမဵဝ်းဢေႃႈ။
၉ ဝူဝ်းထိူၼ်ႇၼၼ်ႉ တၵ်းမီးဢလူဝ်ႇၶႂ်ႈၵိုတ်ႈႁၢပ်ႇဢမူႉမႂ်းလႄႈယူႇၵႃႈၼႂ်းသိုင်ႇမႂ်းၶွၵ်ႈမႂ်းႁိုဝ်။မႂ်းဢဝ်ၸိူၵ်ႈမတ်ႉ ၽုၵ်ႈဝူဝ်းထိူၼ်ႇႁႂ်ႈမၼ်းထႆၸွမ်းႁွႆးထႆလႆႈႁိုဝ်။
၁၀ ဢမ်ႇၼၼ်ၵေႃႈမၼ်းတၵ်းၸွမ်းလင်မႂ်းလႄႈ ထိူၼ်ႇၼႃး ၵႃႈၼႂ်းၶူင်ႈၼႂ်းႁူၺ်ႈႁိုဝ်။
၁၁ ၵွပ်ႈပိူဝ်ႈဢၼ်ႁႅင်းမၼ်းယႂ်ႇလႄႈမႂ်းတၵ်းယုမ်ႇမၼ်းႁိုဝ်။မႂ်းတၵ်းဢဝ်တၢင်းႁဵတ်း တၢင်းသၢင်ႈမႂ်းဢၢပ်ႈပၼ်တီႈမၼ်းႁိုဝ်။
၁၂ မႂ်းတၵ်းၸႂ်ပိူင်မၼ်း လွင်ႈဢၼ်မၼ်းတၵ်းဢဝ် ၶဝ်ႈပိူၵ်ႇမႂ်းမႃးလႄႈ ၸူႉသိမ်းဝႆႉၵႃႈတီႈတလၢင်းယဵပ်ႇၶဝ်ႈမႂ်းၼၼ်ႉႁိုဝ်။
၁၃ ပိၵ်ႇၼူၵ်ႉၵလႃႈဢုၵ်ႉၼၼ်ႉ ၸၢင်ႊသႂၢင်ႇၸၢင်ႊသိူဝ်းယူႇသေလႄႈ ဝီးယူႇသေၵေႃႈပိၵ်ႇမၼ်းသဵၼ်ႈၶူၼ်မၼ်း ၸိူဝ်းၼၼ်ႉၸၢင်ႊႁဵတ်းၵျေးၸူးႁိုဝ်။
၁၄ လွင်ႈမၼ်းၸမ်းမၼ်းၸၢင်ႊၸုၼ်ႉပႅတ်ႈၶႆႇမၼ်းၵႃႈတီႈလိၼ်လႄႈၸၢင်ႊႁႂ်ႈၶႆႇၸိူဝ်းၼၼ်ႉ ဢုၼ်ႇလီၵႃႈၼႂ်းမုၼ်လိၼ် ဢေႃႈ။
၁၅ မၼ်းၸၢင်ႊလူင်လိုမ်းပႅတ်ႈလွင်ႈဢၼ်တိၼ်ပိူၼ်ႈတၵ်းယဵပ်ႇသႂ်ႇၶႆႇမၼ်းလႄႈတူဝ်ထိူၼ်ႇတၵ်း ယဵပ်ႇယမ်ႈႁႂ်ႈလူႉလႅဝ်ၼၼ်ႉဢေႃႈ။
၁၆ မၼ်းမီးၸႂ်ဢၼ်ၵႅၼ်ႇၶႅင်တီႈ လုၵ်ႈဢွၼ်ႇလၢင်းဢွၼ်ႇမၼ်းတင်းလၢႆထၼ်ႈပေႃး မိူၼ်ၼင်ႇဢမ်ႇၸႂ်ႈလုၵ်ႈလၢင်းမၼ်းၼၼ်ႉဢေႃႈ။ မၼ်းဢမ်ႇၵူဝ်လွင်ႈဢၼ်ၶၢမ်ႇဝူၺ်ႇတၼႃႇတၢင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်းသေလႄႈ တၵ်း ပဵၼ်ဢၼ်လၢႆလၢႆလွၵ်ႇလွၵ်ႇၵႂႃႇၼၼ်ႉ။
၁၇ လွင်ႈမၼ်းၸမ်း ၽြႃးပဵၼ်ၸဝ်ႈႁႂ်ႈမၼ်းၵၢင်းလွတ်ႈတင်းပိင်ႇ ၺႃႇလႄႈမၼ်းၸဝ်ႈဢမ်ႇပၼ်ၺၢၼ်ႇတီႈမၼ်း။
၁၈ ၵူၺ်းၵႃႈမိူဝ်ႈဢၼ်မၼ်းၵီႈပိၵ်ႇမၼ်းလႄႈတေမဵၼ်ၼၼ်ႉၸိုင်ႈ မၼ်းၸၢင်ႊၶူဝ်တေႃႇမႃႉတင်းၵေႃႉဢၼ်ၶီႇမႃႉ ၼၼ်ႉဢေႃႈ။
၁၉ မႂ်းႁႂ်ႈမႃႉတဵမ်ဝႆႉတင်းဢဵၼ်တင်းႁႅင်းႁိုဝ်။မႂ်းဢဝ်ၵုၵ်ႉမႃႉဢၼ်ၽႅတ်းသၼ်ႇယူႇၼၼ်ႉ သႂ်ႇဝႆႉၵႃႈ တီႈၶေႃးမႃႉႁိုဝ်။
၂၀ မႂ်းႁႂ်ႈမႃႉၵျွၵ်းဝႅၼ်မိူၼ်ၸိူဝ်ႉၼင်ႇဢၼ်မႅင်းၵႅင်းၵျွၵ်းဝႅၼ်ၼၼ်ႉႁိုဝ်။သဵင်ဢၼ်ၶူႈလင်မၼ်း ထင်ႇဢွၵ်ႇၼၼ်ႉပဵၼ်ဢၼ်လီၵူဝ်လီႁႄဝႆႉဢေႃႈ။
၂၁ မၼ်းၸၢင်ႊၶုတ်ႇယၢႆးမၢၼ်ႇ ၵႃႈတီႈပၢင်ႇတီႈႁူၺ်ႈသေလႄႈသႂၢင်ႇသိူဝ်းလူၺ်ႈႁႅင်းမၼ်းလႄႈ ဢွၵ်ႇႁႂ်ႈလႆႈထူပ်း ႁၼ်ႁူဝ်ႁၢၼ်ၵူၼ်းသိုၵ်းတင်းလၢႆဢေႃႈ။
၂၂ မၼ်းႁဵတ်းပျၢၵ်ႈတေႃႇ လွင်ႈဢၼ်လီၵူဝ်လီၼၼ်ႉလႄႈ ၵၢင်းလွတ်ႈတင်းသၽေႃးဢၼ်တူၵ်းၸႂ်လႄႈ ဢမ်ႇၸၢင်ႊ ဝၢႆႇၶိုၼ်းသေၵႃႈတီႈၽေးလၢပ်ႇၽေးလႅဝ်း။
၂၃ မုၵ်ႇပိူၼ်ႈႁွၵ်ႇလူင် ဢၼ်လိူမ်ႈမၢပ်ႈမိပ်ႈၼၼ်ႉ ဢိၵ်ႇတင်းႁွၵ်ႇဢွၼ်ႇ ၸိူဝ်းၼၼ်ႉတုမ်ႉသႂ်ႇတွၵ်ႈသႂ်ႇမၼ်းဢေႃႈ။
၂၄ မၼ်းမီးၸႂ်မႃႇၼႃႉ လႂ်ဢိၵ်ႇတင်း ၸႂ်ဢၼ်ႁၢဝ်ႈၵျၢမ်းၼႃႇသေလႄႈ ဢိုၼ်ၵိၼ်လိၼ်ဢေႃႈ။မၼ်းဢမ်ႇဝႆႉ ဢမူႉတီႈသဵင်ၼႄးၶရႃႇၼၼ်ႉ။
၂၅ မၼ်းငိၼ်းသဵင်ၼႄးၶရႃႇမိူဝ်ႈ လႂ်သေဢမ်ႇဝႃႈမၼ်းၸၢင်ႊဝႃႈ၊- ဢေႁေ၊ဝႃႈၼင်ႇၼႆဢေႃႈ။မၼ်းမီးယူႇတီႈဢၼ်ၵႆၼႃႇလႄႈၸၢင်ႊၼူမ်ႁႃသၢပ်ႇပွႆးတိုၵ်းသိုၵ်းဢိၵ်ႇတင်း သဵင်ႁုၼ်ႉသဵင်ႁိူဝ်ႇပူဝ်ႇပႃႇတင်းလၢႆ တင်းသဵင်ဢၼ်သႅၼ်ႇဢၼ် ႁွင်ႉၼၼ်ႉဢေႃႈ။
၂၆ ၵွပ်ႈပိူဝ်ႈၺၢၼ်ႇမႂ်းလႄႈယဵဝ်ႈၸွၵ်ႇၸင်ႇမိၼ်ၶိုၼ်ႈၵႃႈၼိူဝ်လႄႈ ၵီႈပိၵ်ႇမၼ်းၵႂႃႇၸူးၵႃႈ တီႈၼႃႈတၢင်းၸၢၼ်းႁိုဝ်။
၂၇ ၵွပ်ႈပိူဝ်ႈဢမိင်ႉမႂ်းလႄႈယဵဝ်ႈႁုင်ႉၸင်ႇၶိုၼ်ႈၵႃႈတီႈၼိူဝ်လႄႈ ႁဵတ်းႁင်းမၼ်းၵႃႈ တီႈတီႈဢၼ်သုင်ႁိုဝ်။
၂၈ မၼ်းၼၼ်ႉၸၢင်ႊယူႇၵႃႈၼိူဝ်မၢၵ်ႇႁိၼ်မၢၵ်ႇၽႃလႄႈ တူၵ်းတီႈယူႇတီႈသဝ်းၵႃႈၼိူဝ်လွႆဢိၵ်ႇတင်း တီႈဢၼ်လုင်ႇလီလွတ်ႈလီၼၼ်ႉဢေႃႈ။
၂၉ မၼ်းယူႇၵႃႈတီႈဢၼ်ၵႆၼၼ်ႉသေလႄႈလူတူၺ်း တူဝ်ဢၼ်တၵ်းလႆႈၵိၼ်လႆႈၶူပ်းၼၼ်ႉဢေႃႈ။
၃၀ လုၵ်ႈလၢင်းဢွၼ်ႇမၼ်းၸိူဝ်းၼၼ်ႉ သူတ်ႉၵိၼ်လိူတ်ႈလႄႈတူဝ်တၢႆမီးၵႃႈတီႈ လႂ်ၵေႃႈ မၼ်းမီးၵႃႈတီႈၼၼ်ႉဢေႃႈ၊ဝႃႈၼင်ႇၼႆဢေႃႈ။