၂
တၢင်းဢၼ်ၸၢမ်းတူၺ်းယေႃႇၽပွၵ်ႈတုတိယ
၁ လၢႆးသမ်ႉမိူဝ်ႈဢၼ်ထိုင်ႁွတ်ႈမိူဝ်ႈဝၼ်းဢၼ်လုၵ်ႈၽြႃးပဵၼ်ၸဝ်ႈတမၢၼ်ႇၵၢင်ႁၢဝ်တင်း လၢႆလႆႈမႃးၶႃးၸႃးၵႃႈတီႈ ၽၢႆႇၼႃႈထႃႇဝရႃႉၽြႃးၼၼ်ႉၸိုင်ၸႃႇတၢၼ်ႇ ၵေႃႈၸွမ်းၵၼ်တင်းၶဝ်ႁႂ်ႈလႆႈမႃးၶႃးၸႃးၵႃႈ တီႈၽၢႆႇၼႃႈထႃႇဝရႃႉၽြႃးဢေႃႈ။
၂ ထႃႇဝရႃႉၽြႃးၵေႃႈထၢမ်တီႈၸႃႇတၢၼ်ႇလႄႈဝႃႈ၊-မႂ်းလုၵ်ႉၵႃႈတီႈ လႂ်မႃး၊ဝႃႈၼင်ႇၼႆလႄႈ ၸႃႇတၢၼ်ႇၵေႃႈၶိုၼ်းလဝ်ႈလၢတ်ႈလႄႈဝႃႈ၊-လုၵ်ႉသေၵႃႈတီႈတၢင်းဢၼ်လႄႇလဵပ်ႈၵႃႈၼိူဝ်လိၼ်မိူင်း ၵႂႃႇၵႂႃႇမႃးမႃးတီႈၶႃႈဢေႃႈ၊ ဝႃႈၼင်ႇၼႆဢေႃႈ။
၃ ထႃႇဝရႃႉၽြႃးမီးဢမိင်ႉတီႈ ၸႃႇတၢၼ်ႇလႄႈဝႃႈ၊- မႂ်းၶႆႈၸႂ်ဝူၼ်ႉၸႂ်လူၺ်ႈၶႃႈၵဝ်ယေႃႇၽ ၼၼ်ႉယဝ်ႉႁိုဝ်။ ၵႃႈၼိူဝ်လိၼ်မိူင်းၼႆႉၵေႃႉဢၼ်မိူၼ်မၼ်းၼၼ်ႉဢမ်ႇမီးသေၵေႃႉသေၵူၼ်း။မၼ်းပဵၼ်ၵေႃႉဢၼ်ၸေးၸုမ်ႇ ၵေႃႉဢၼ်သိုဝ်ႈတေႃႇဢေႃႈ။ပဵၼ်ၵေႃႉဢၼ်ၵူဝ်ယၢမ်ၽြႃးပဵၼ်ၸဝ်ႈ ၵေႃႉဢၼ်ဝေႈပႅတ်ႈတၢင်းႁဵတ်းတၢင်းသၢင်ႈဢၼ်ဢမ်ႇလီဢေႃႈ။ပိၵ်ႉသမ်ႉမႂ်းတိုၵ်းယူင်းၵဝ် လွင်ႈတၢင်းမၼ်းယင်းဢမ်ႇမီးလႄႈ တၵ်းႁႂ်ႈၵဝ်ႁဵတ်းႁႂ်ႈမၼ်းလူႉလႅဝ်သေၵေႃႈမၼ်းယင်း တႄႇယူႇၵႃႈၼႂ်းတၢင်းဢၼ်သိုဝ်ႈတေႃႇၼၼ်ႉယူႇဢေႃႈ၊ဝႃႈၼင်ႇၼႆဢေႃႈ။
၄ ၸႃႇတၢၼ်ႇၵေႃႈၶိုၼ်းလဝ်ႈလၢတ်ႈတီႈထႃႇဝရႃႉၽြႃးလႄႈဝႃႈ၊-ၽိဝ်ၼင်ပုၼ်ႈၽိဝ်ၼင်ဢေႃႈ။ၵူၼ်းတၵ်းဢဝ်ၵႃႈဢၼ်မၼ်းမီးၼၼ်ႉ ပၼ်ပုၼ်ႈဢသၢၵ်ႈ တူဝ်ၸဝ်ႈၵဝ်ႇယူႇဢေႃႈ။
၅ မိူဝ်ႈလဵဝ်ၼႆႉပေႃးၸဝ်ႈႁဝ်းယဵတ်ႇမိုဝ်းၸဝ်ႈႁဝ်းလႄႈ တိူဝ်ႉထုၵ်ႇလုပ်ႇမၼ်းတင်းၼိူဝ်ႉမၼ်းၸိုင်၊ မၼ်းတၵ်းၸုၼ်ႉပႅတ်ႈၸဝ်ႈႁဝ်းသိုဝ်ႈၼႃႈတႂ်ႈတႃၸဝ်ႈႁဝ်းယူႇတီႈၶႃႈဢေႃႈ၊ ဝႃႈၼင်ႇၼႆ ဢေႃႈ။
၆ ထႃႇဝရႃႉၽြႃးၵေႃႈမီးဢမိင်ႉတီႈၸႃႇတၢၼ်ႇလႄႈဝႃႈ၊- လီယဝ်ႉ။မၼ်းမီးယူႇၵႃႈၼႂ်းမိုဝ်းမႂ်းယဝ်ႉ။ၵူၺ်းၵႃႈတေဢမ်ႇလႆဢဝ်ဢသၢၵ်ႈမၼ်း၊ ဝႃႈၼင်ႇၼႆ ဢေႃႈ။
၇ ၸႃႇတၢၼ်ႇၵေႃႈဢွၵ်ႇသေၵႃႈတီႈၽၢႆႇၼႃႈထႃႇဝရႃႉၽြႃးၵႂႃႇလႄႈ ႁဵတ်းႁႂ်ႈတုမ်ႇၸဵပ်းတုမ်ႇၽီဢွၵ်ႇၵႃႈတီႈယေႃႇၽ၊ ဢဝ်ၸႃႉၸဵမ်ႇၵႃႈတီႈၽႃႇ တိၼ်မၼ်းတေႃႇၸိၵ်းႁူဝ်မၼ်းဢေႃႈ။
၈ မၼ်းၵေႃႈယိပ်းၵမ်ဢဝ်ၽၢၵ်ႇမေႃႈ ၶုတ်ႇယၢႆးတူဝ်ၸဝ်ႈၵဝ်ႈယူႇသေ လႄႈၼင်ႈယူႇၵႃႈၼႂ်းတဝ်ႊၽီးၽႆးဢေႃႈ။
၉ မိူဝ်ႈၼၼ်ႉမေးမၼ်းလၢတ်ႈလႄႈဝႃႈ၊- မႂ်းယင်းယိပ်းၵမ်တြႃးဢၼ်သိုဝ်ႈတေႃႇယူႇႁိုဝ်။ၵိၼ်ႇလႃႇၽြႃးပဵၼ်ၸဝ်ႈမႂ်း သေလႄႈတၢႆတႃႉ၊ဝႃႈၼင်ႇၼႆဢေႃႈ။
၁၀ မၼ်းၵေႃႈၶိုၼ်းလၢတ်ႈလႄႈဝႃႈ၊- မႂ်းၼႆႉလၢတ်ႈမိူၼ်ၸိူဝ်ႉၼင်ႇမေႈယိင်းမိူၵ်ႈလၢတ်ႈၼၼ်ႉလူင်ပေႇ။ႁဝ်းတၵ်းလႆႈၶၢမ်ႇဢဝ်သုၵ်ႉၶႃႉၵတ်းယဵၼ်ၶျၢမ်းသႃႇတီႈမိုဝ်းၽြႃးပဵၼ်ၸဝ်ႈၵူၺ်းလႄႈ ဢမ်ႇလႆႈၶၢမ်ႇဢဝ်တုၵ်ႉၶႃႉတၢင်းၽၢၼ်ႁိုဝ်၊ဝႃႈၼင်ႇၼႆဢေႃႈ။ၼႂ်းလွင်ႈတၢင်းၼႆႉတင်းသဵင်ႈတင်းလူင်ယေႃႇၽ ဢမ်ႇၽိတ်းပိူင်ႈလူၺ်ႈသူပ်းမၼ်းလႃးလႃး။
ၵေႃႉသေႈယေႃႇၽသၢမ်ၵေႃႉ
၁၁ မိူဝ်ႈၼၼ်ႉၵေႃႉသေႈယေႃႇၽ သၢမ်ၵေႃႉဢၼ်ဝႃႈဢေးလိၽတ်ႉၵူၼ်းမဵဝ်းတေႇမၼ်ႇ၊ ပိလတတ်ႉၵူၼ်းမဵဝ်းသုဢႃႇ၊ၸေႃႇၽႃႇၵူၼ်းမဵဝ်းၼေႇမတ်ႉၸိူဝ်းၼၼ်ႉ ငိၼ်းလွင်ႈၽေးလူင် ဢၼ်ႁွတ်ႈထိုင်ၵႃႈၼိူဝ်ယေႃႇၽၼၼ်ႉလႄႈၶဝ်ဢွၼ်ၵၼ် လုၵ်ႉသေၵႃႈတီႈယူႇတီႈသဝ်းၶဝ်ႁင်းၽႂ်ႁင်းမၼ်းႁွတ်ႈမႃး ၸွမ်းၵႃႈၼင်ႇဢၼ်ၶဝ်မၵ်းၶဵၼ်းၶၢၼ်းဝႆႉ လူၺ်ႈလွင်ႈဢၼ်ၶဝ်တၵ်းၸူႉၵၼ်တုမ်ၵၼ် ႁႂ်ႈလႆႈႁဵတ်းတၢင်းဢၼ်ၶင်းၶီၶင်းၽၢၼ်၊တၢင်းဢၼ်ႁႂ်ႈမၼ်းပျေႇၸႂ်ၼိမ်ၸႂ်ၼၼ်ႉဢေႃႈ။
၁၂ မိူဝ်ႈဢၼ် ၶဝ်ယူႇတီႈဢၼ်ၵႆမုင်ႈတူၺ်းလႄႈ လႆႈႁၼ်မၼ်းၼၼ်ႉၶဝ်ဢမ်ႇတွင်းမၼ်းယဝ်ႉ။ၶဝ်ဢွၼ်ၵၼ်ၵိဝ်သဵင်သေလႄႈႁႆႈႁွင်ႉဢေႃႈ။ၶဝ်ဢွၼ်ၵၼ်ၸၵ်ႉသိၵ်ႇသိူဝ်ႈယၢဝ်းၶဝ်ႁင်းၽႂ်ႁင်းမၼ်းလႄႈ ဢဝ်မုၼ်လိၼ်ပိုၼ်ၶိုၼ်ႈၵႃႈၼိူဝ်ၾႃႉၵၢင်ႁၢဝ် ႁႂ်ႈတူၵ်းသႂ်ႇၵႃႈၼိူဝ်ႁူဝ်ၶဝ် ဢေႃႈ။
၁၃ ၸဵတ်းဝၼ်းၸဵတ်းၶိုၼ်းတဵမ်တဵမ်ၶဝ်ဢွၼ်ၵၼ်ၼင်ႈယူႇလူၺ်ႈၵၼ်တင်းမၼ်း ၵႃႈၼိူဝ်လိၼ်လႄႈၽူႈ လႂ်ၵေႃႈယင်းဢမ်ႇလၢတ်ႈၵႂၢမ်းတေႃႇမၼ်းသေၶေႃႈသေၵမ်း ၵွပ်ႈပိူဝ်ႈဢၼ်ၶဝ်ႁူႉႁၼ်လွင်ႈဢၼ်မၼ်းလႆႈၶၢမ်ႇတုၵ်ႉၶႃႉတၢင်းၽၢၼ် ယႂ်ႇၼႃႇလူင်လၢင်ၼၼ်ႉဢေႃႈ။