၁
တၢင်းဢၼ်ၸၢမ်းတူၺ်းယေႃႇၽပွၵ်ႈပထမ
၁ မိူဝ်ႈၼၼ်ႉၵႃႈၼႂ်းမိူင်းဢုၸ ၼၼ်ႉမီးၵူၼ်းၵေႃႉၼိုင်ႈဢၼ်လႆႈၸိုဝ်ႈယေႃႇၽၼၼ်ႉဢေႃႈ။ၵေႃႉၼၼ်ႉပဵၼ်ၵေႃႉဢၼ်ၸေးၸုမ်ႇ၊ၵေႃႉဢၼ်သိုဝ်ႈတေႃႇဢေႃႈ။ပဵၼ်ၵေႃႉဢၼ်ရူဝ်ႇသေႇၵူဝ်ယၢမ်ၽြႃးပဵၼ်ၸဝ်ႈ ၵေႃႉဢၼ်ဝႄႈပႅတ်ႈတၢင်းႁဵတ်းတၢင်းသၢင်ႈ ဢၼ်ဢမ်ႇလီၼၼ်ႉ ဢေႃႈ။
၂ မၼ်းမီးလုၵ်ႈၸၢႆးၸဵတ်းၵေႃႉလုၵ်ႈယိင်းသၢမ်ၵေႃႉဢေႃႈ။ၶွင်ၶူဝ်းမၼ်းၸမ်း၊မီးသူဝ်းၸဵတ်းႁဵင်ၵလႃႈဢုၵ်ႉသၢမ်ႁဵင်၊ဝူဝ်းႁႃႈပၢၵ်ႇၵူႈ၊မႃႉလီႈမေႈႁႃႈပၢၵ်ႇ၊ ၵူၼ်း ႁိူၼ်းၵူၼ်းယေး
၃ ၵူၼ်းၸႂ်ႉၵူၼ်းသွႆၼမ်ၼႃႇလူင်လၢင်ထၼ်ႈပေႃးမၼ်းပဵၼ်ၵေႃႉဢၼ်ယႂ်ႇၼႃႇသေၵူၼ်းၵႃႈတီႈၼႃႈဝၼ်းဢွၵ်ႇတင်းသဵင်ႈတင်းလူင်ၸိူဝ်း ၼၼ်ႉဢေႃႈ။
၄ လုၵ်ႈၸၢႆးမၼ်းၸိူဝ်းၼၼ်ႉမီးထုင်းၸၢမ်ႇဢၼ်ယၢမ်ႈႁဵတ်းပွႆးၶၢမ်ႇပွႆး ၵႃႈတီႈႁိူၼ်းၽႂ်ႁိူၼ်းမၼ်းပဵၼ်ၵေႃႉပဵၼ်ၵေႃႉလႄႈ ယၢမ်ႈဢွၼ်ၵၼ်ႁွင်ႉဢဝ်ၼွင်ႉယိင်းၶဝ်သၢမ်ၵေႃႉ မႃးႁႂ်ႈလႆႈၵိၼ်လူၺ်ႈၵၼ်တင်းၶဝ် ၼႂ်းမိူဝ်ႈဢၼ်ႁွတ်ႈထိုင်ဝၼ်းပွႆးၼၼ်ႉဢေႃႈ။
၅ ပေႃးပူၼ်ႉဝၼ်းပွႆးယဝ်ႉၸိုင်ယေႃႇၽ ယၢမ်ႈႁွင်ႉဢဝ်ၶဝ်မႃးလႄႈႁႂ်ႈၶဝ်မူတ်းၸၢင်ႇသေယဝ်ႉ မၼ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ႁဵတ်းတၢင်းပုၵ်ႉၸေႃႇယိၸ်ႉဢၼ်တုတ်ႇၽႆးပုၼ်ႈၶဝ်ၵူႈၵေႃႉဢေႃႈ။လွင်ႈမၼ်းၸမ်းယေႃႇၽ မီးၸႂ်ဝႃႈလုၵ်ႈၸၢႆးမၼ်းၸိူဝ်းၼႆႉ ၸၢင်ႊႁဵတ်းၽိတ်းပိူင်ႈလႄႈၸုၼ်ႉပႅတ်ႈၽြႃးပဵၼ်ၸဝ်ႈ ၵႃႈၼႂ်းႁူဝ်ၸႂ်ၶဝ်ယဝ်ႉဢမ်ႇႁူႉ၊ ဝႃႈၼင်ႇၼႆလႄႈမၼ်းၸင်ႇႁဵတ်းၸိူဝ်ႉၼၼ်သေႇသေႇဢေႃႈ။
၆ မီးၽဝ်ႇၼိုင်ႈ မိူဝ်ႈဢၼ်ထိုင်ႁွတ်ႈမိူဝ်ႈဝၼ်းဢၼ်လုၵ်ႈၽြႃးပဵၼ်ၸဝ်ႈတမၢၼ်ႇၵၢင်ႁၢဝ်တင်းလၢႆ လႆႈမႃးၶႃးၸႃးၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉၸိုင် ၸႃႇ တၢၼ်ႇၵေႃႈၸွမ်းၵၼ်တင်းၶဝ်မႃးဢေႃႈ။
၇ ထႃႇဝရႃႉၽြႃးၵေႃႈထၢမ်တီႈၸႃႇတၢၼ်ႇလႄႈဝႃႈ၊-မႂ်းလုၵ်ႉၵႃႈတီႈ လႂ်မႃး၊ဝႃႈၼင်ႈၼႆလႄႈ ၸႃႇတၢၼ်ႇၵေႃႈၶိုၼ်းလဝ်ႈလၢတ်ႈလႄႈဝႃႈ၊-လုၵ်ႉသေၵႃႈတီႈတၢင်းဢၼ်လႄႇလဵပ်ႈၵႃႈၼိူဝ်လိၼ်မိူင်း ၵႂႃႇၵႂႃႇမႃးမႃးတီႈၶႃႈ ဢေႃႈ၊ဝႃႈၼင်ႇၼႆဢေႃႈ။
၈ ထႃႇဝရႃႉၽြႃးမီးဢမိင်ႉတီႈၸႃႇတၢၼ်ႇလႄႈဝႃႈ၊-မႂ်းၶႆႈၸႂ်ဝူၼ်ႉၸႂ်လူၺ်ႈၶႃႈၵဝ်ယေႃႇၽၼၼ်ႉယဝ်ႉႁိုဝ်။ၵႃႈၼိူဝ်လိၼ်မိူင်းၼႆႉၵေႃႉဢၼ်မိူၼ်ၵၼ်တင်းမၼ်းၼၼ်ႉ ဢမ်ႇမီးသေၵေႃႉသေၵူၼ်း။မၼ်းပဵၼ်ၵေႃႉဢၼ်ၸေးၸုမ်ႇ ၵေႃႉဢၼ်သိုဝ်ႈတေႃႇဢေႃႈ။ပဵၼ်ၵေႃႉဢၼ်ရူဝ်ႇသေႇၵူဝ်ယမ်ၽြႃးပဵၼ်ၸဝ်ႈၵေႃႉဢၼ်ဝေႈပႅတ်ႈတၢင်းႁဵတ်းတၢင်းသၢင်ႈဢၼ်ဢမ်ႇလီဢမ်ႇငၢမ်းၼၼ်ႉဢေႃႈ၊ဝႃႈၼင်ႇၼႆဢေႃႈ။
၉ ၸႃႇတၢၼ်ႇ ၵေႃႈ ၶိုၼ်းလဝ်ႈလၢတ်ႈတီႈထႃႇဝရႃႉၽြႃးလႄႈဝႃႈ၊-ယေႃႇၽၼၼ်ႉမၼ်းယင်းဢမ်ႇလႆႈဢၵျူဝ်းၵႃႈသင်လႄႈ ရူဝ်ႇသေႇၵူဝ်ယမ်ၽြႃးပဵၼ်ၸဝ်ႈ ၶႃႈႁိုဝ်။
၁၀ ၸဝ်ႈႁဝ်းႁဵတ်းႁူဝ်ႉႁဵတ်းႁိူၵ်ႈလွမ်ႉႁွပ်ႈတူဝ်မၼ်းႁိူၼ်းမၼ်းတင်းၶွင်ႇၶူဝ်းမၼ်းၸိူဝ်းၼၼ်ႉယူႇ ဢမ်ႇၸႂ်ႈၶႃႈႁိုဝ်။ၸဝ်ႈႁဝ်းပၼ်တၢင်းလီတီႈၵႃႈဢၼ်မိုဝ်းမၼ်းႁဵတ်းၼၼ်ႉတီႈၶႃႈယဝ်ႉ။တရိၵ်ႈသၢၼ်ႇမၼ်းၸိူဝ်းၼၼ်ႉ ပဵၼ်ဢၼ်ၼမ်ၼႃႇလူင်လၢင် ၵႃႈၼိူဝ်ၼႃႈ လိၼ်မိူင်းတီႈၶႃႈယဝ်ႉ။
၁၁ ၵူၺ်းၵႃႈပေႃးၸဝ်ႈႁဝ်းယဵတ်ႇမိုဝ်းၸဝ်ႈႁဝ်းသေလႄႈ တိူဝ်ႉထုၵ်ႇၶွင်ၶူဝ်းမၼ်းၵႃႈမီးၸိူဝ်းၼၼ်ႉလူႉလႅဝ်ၸိုင်၊ မၼ်းတၵ်းၸုၼ်ႉပႅတ်ႈၸဝ်ႈႁဝ်းသိုဝ်ႈၼႃႈတႂ်ႈတႃၸဝ်ႈႁဝ်းယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။
၁၂ ထႃႇဝရႃႉၽြႃးၵေႃႈ မီးဢမိင်ႉတီႈၸႃႇတၢၼ်ႇ လႄႈဝႃႈ၊-လီယဝ်ႉ။ ၶွင်ႇၶူဝ်းမၼ်းၵႃႈမီးၸိူဝ်းၼၼ်ႉမီးၼႂ်းမိုဝ်းမႂ်းယဝ်ႉ။ၵူၺ်းၵႃႈယႃႇပယေဵတ်ႇမိုဝ်းတိူဝ်ႉထုၵ်ႇတူဝ်မၼ်း၊ဝႃႈၼင်ႇၼႆဢေႃႈ။ၸႃႇတၢၼ်ႇၵေႃႈဢွၵ်ႇသေၵႃႈတီႈၽၢႆႇၼႃႈထႃႇဝရႃႉၽြႃးၵႂႃႇဢေႃႈ။
၁၃ ဝၼ်းၼိုင်ႈ ၼႂ်းမိူဝ်ႈဢၼ်လုၵ်ႈၸၢႆးလုၵ်ႈယိင်းယေႃႇၽ ၸိူဝ်းၼၼ်ႉ ယင်းတိုၵ်ႉဢွၼ်ၵၼ်ၵိၼ်ၶူပ်းလႄႈ သူတ်ႉဢိုၵ်ႉၼမ်ႉၸပိတ်ႉယူႇၵႃႈတီႈႁိူၼ်းပီႈၸၢႆးလူင်ၶဝ်ၼၼ်ႉၸိုင် ၵူၼ်းၸႂ်ႉၵူၼ်းသွႆၵေႃႉၼိုင်ႈမႃးၵႃႈတီႈ ယေႃႇၽလႄႈလဝ်ႈလၢတ်ႈလႄႈဝႃႈ၊-
၁၄ ၼႂ်းမိူဝ်ႈဢၼ်ဝူဝ်းတင်းလၢႆယင်းတိုၵ်ႉဢွၼ်ၵၼ်ထႆၼႃးယူႇ၊ မႃႉလီႈတင်းလၢႆ ဢွၼ်ၵၼ်ၵိၼ်ယူႇၼၼ်ႉၸိုင်ၵူၼ်းမဵဝ်းသေႇၽ တင်းလၢႆဢွၼ်ၵၼ်မႃးတိုၵ်းတေႃးလႄႈသိမ်း ဢဝ်ၵႂႃႇၶႃႈယဝ်ႉ။
၁၅ ၵူၼ်းဢၼ်ပဵၼ်လုၵ်ႈလဵင်ႉလုၵ်ႈလေႃးၸိူဝ်းၼၼ်ႉၵေႃႈ ၶဝ်ဢဝ်တၢႆလူၺ်ႈလၢပ်ႇလူၺ်ႈလႅဝ်းၶႃႈယဝ်ႉ။ၵိုတ်းၵျၢၼ်ႇဝႆႉၵဝ်ၶႃႈၵေႃႉလဵဝ်ၵူၺ်းလႄႈလႆႈၶိုၼ်းမႃးမွၵ်ႇလၢတ်ႈတီႈၸဝ်ႈႁဝ်းၶႃႈဢေႃႈ၊ ဝႃႈၼင်ႇ ၼႆဢေႃႈ။
၁၆ မိူဝ်ႈဢၼ်မၼ်းယင်းတိုၵ်ႉလဝ်ႈလၢတ်ႈၸိူဝ်ႉၼင်ႇၼၼ်ယူႇၼၼ်ႉၸိုင် ၵူၼ်းတၢင်ႇၵေႃႉၵေႃႉၼိုင်ႈမႃးလႄႈလဝ်ႈလၢတ်ႈလႄႈဝႃႈ၊-ၽႆးၽြႃးပဵၼ်ၸဝ်ႈတူၵ်းသေၵႃႈၼိူဝ်ၾႃႉၵၢင်ႁၢဝ်မႃးသေလႄႈ မႆႈသူဝ်းတင်းလၢႆဢိၵ်ႇတင်း လုၵ်ႈလဵင်ႉလုၵ်ႈလေႃးၸိူဝ်းၼၼ်ႉလႄႈသုတ်းၵႂႃႇသဵင်ႈၵႂႃႇၶႃႈယဝ်ႉ။ၵိုတ်းၵျၢၼ်ႇဝႆႉၵဝ်ၶႃႈၵေႃႉလဵဝ်ၵူၺ်းလႄႈ လႆႈၶိုၼ်းမႃးမွၵ်ႇလၢတ်ႈတီႈၸဝ်ႈႁဝ်း ၼႆႉၶႃႈဢေႃႈ၊ဝႃႈၼင်ႇၼႆဢေႃႈ။
၁၇ မိူဝ်ႈဢၼ်မၼ်းယင်းတိုၵ်ႉလဝ်ႈလၢတ်ႈၸိူဝ်ႉၼင်ႇၼၼ်ယူႇၼၼ်ႉၸိုင် ၵူၼ်းတၢင်ႇၵေႃႉၵေႃႉၼိုင်ႈမႃးလႄႈ လဝ်ႈလၢတ်ႈလႄႈဝႃႈ၊-ၵူၼ်းမဵဝ်းၶႃႇလတေႇ တင်းလၢႆဢွၼ်ၵၼ်ႁဵတ်းသၢမ်မုၵ်ႉသၢမ်ၸိူဝ်းသေလႄႈ ၶီႇသိုၵ်းမႃးတိုၵ်းတေႃးဢဝ်ၵလႃႈဢုၵ်ႉတင်းလၢႆၵႂႃႇၶႃႈယဝ်ႉ။လုၵ်ႈလဵင်ႉလုၵ်ႈလေႃးၸိူဝ်းၼၼ်ႉၵေႃႈ ၶဝ်ဢဝ်တၢႆလူၺ်ႈလၢပ်ႇလူၺ်ႈလႅဝ်းလႄႈၵိုတ်းၵျၢၼ်ႇဝႆႉၵဝ်ၶႃႈၵေႃႉလဵဝ်ၵူၺ်းလႄႈ လႆႈၶိုၼ်းမႃးမွၵ်ႇလၢတ်ႈတီႈၸဝ်ႈႁဝ်းၼႆႉၶႃႈဢေႃႈ၊ ဝႃႈၼင်ႇ ၼႆဢေႃႈ။
၁၈ မိူဝ်ႈဢၼ်မၼ်းယင်းတိုၵ်ႉလဝ်ႈလၢတ်ႈၸိူဝ်ႉၼင်ႇၼၼ်ယူႇၼၼ်ႉၸိုင်၊ ၵူၼ်းတၢင်ႇၵေႃႉၵေႃႉၼိုင်ႈမႃးလႄႈလဝ်ႈလၢတ်ႈလႄႈဝႃႈ၊-ၼႂ်းမိူဝ်ႈဢၼ်လုၵ်ႈၸၢႆးလုၵ်ႈယိင်းၸဝ်ႈႁဝ်းၸိူဝ်းၼၼ်ႉ ယင်းတိုၵ်ႉၵိၼ်ၶူပ်းလႄႈ သူတ်ႉဢိုၵ်ႉၼမ်ႉၸပိတ်ႉၸွမ်းၵၼ်ယူႇၵႃႈတီႈ ႁိူၼ်းပီႈၸၢႆးလူင်ၶဝ်ၼၼ်ႉ
၁၉ လူမ်းလူင်လုၵ်ႉသေၵႃႈတီႈထိူၼ်ႇပတ်ႉမႃးသေလႄႈထူဝ်းသီႇၸဵင်ႇႁိူၼ်းလႄႈႁိူၼ်းၼၼ်ႉ ပၼ်ႇတူၵ်းသႂ်ႇၵႃႈၼိူဝ်လုၵ်ႈလၢင်းၸဝ်ႈႁဝ်းၸိူဝ်းၼၼ်ႉၶႃႈဢေႃႈ။ ၶဝ်ၼၼ်ႉတၢႆလႄႈၵိုတ်းၵျၢၼ်ႇဝႆႉၵဝ်ၶႃႈၵေႃႉလဵဝ်ၵူၺ်းလႄႈ လႆႈၶိုၼ်းမႃးမွၵ်ႇလၢတ်ႈတီႈၸဝ်ႈႁဝ်းၼႆႉၶႃႈဢေႃႈ ဝႃႈၼင်ႇၼႆဢေႃႈ။
၂၀ မိူဝ်ႈၼၼ်ႉယေႃႇၽ လုၵ်ႉလႄႈၸၵ်ႉသိၵ်ႇသိူဝ်ႈယၢဝ်းမၼ်းသေလႄႈ ထႃၶူၼ်ႁူဝ်မၼ်းပႅတ်ႈသေယဝ်ႉၶုပ်ႉမူပ်ႇယူႇၵႃႈၼိူဝ်လိၼ်လႄႈ ၵူဝ်းၵႂၢႆႇသေယဝ်ႉလၢတ်ႈလႄႈ ဝႃႈ၊-
၂၁ ၵဝ်ၼႆႉယင်းဢမ်ႇပႃးၶူဝ်းၼုင်ႈလႄႈဢွၵ်ႇသေၵႃႈၼႂ်းတွင်ႉမေႈမႃးဢေႃႈ။ယင်းဢမ်ႇပႃးၶူဝ်ႈၼုင်ႈၼုင်ႈလႄႈတၵ်းၶိုၼ်းၵႂႃႇၵႃႈတီႈၼၼ်ႉဢေႃႈ။ ထႃႇဝရႃႉၽြႃးပၼ်ယဝ်ႉ။ ထႃႇဝရႃႉၽြႃးၶိုၼ်းသိမ်းဢဝ်ယဝ်ႉ။ႁႂ်ႈၼႃႇမႃႉၸိုဝ်သဵင်ထႃႇဝရႃႉၽြႃး မီးမၢင်ႇၵလႃႇသေၵမ်းလူၺ်ႈ၊ ဝႃႈၼင်ႇၼႆဢေႃႈ။
၂၂ ၼႂ်းလွင်ႈတၢင်းၼႆႉတင်းသဵင်ႈတင်းလူင် ယေႃႇၽယင်းဢမ်ႇတၢင်ႇဢပျႅတ်ႈ တီႈထႃႇဝရႃႉၽြႃးလႄႈ ဢမ်ႇႁဵတ်းၽိတ်းမႅၼ်ႈဢပျႅတ်ႈလႄႈယူႇဢေႃႈ။