Chapter
၂၆
သူးလၢပ်ႈတၢင်းဢၼ်ထွမ်ႇဢဝ်
၁ သူဢမ်ႇလႆႈႁဵတ်းရုၵ်ႉထူႉပုၼ်ႈတူဝ်ၸဝ်ႈၵဝ်ႇ။သူဢမ်ႇလႆႈပူၵ်းတင်ႈ ႁၢင်ႊဢၼ်တွင်ႈႁဵတ်းၶႅၵ်းႁဵတ်းၼၼ်ႉပုၼ်ႈတူဝ်ၸဝ်ႈၵဝ်ႇ။သူဢမ်ႇလႆႈပၵ်းဝႆႉသဝ်ဢၼ်ၵူဝ်းၵႂၢႆႇၼၼ်ႉ။ၵႃႈၼႂ်းမိူင်းသူၼၼ်ႉသူဢမ်ႇလႆႈပူၵ်းတင်ႈမၢၵ်ႇႁိၼ်ဢၼ်တွင်ႈႁဵတ်းၼၼ်ႉ။ ၵဝ်ပဵၼ်ထႃႇဝရႃႉၽြႃး၊ၽြႃးပဵၼ်ၸဝ်ႈသူဢေႃႈ။
၂ သူတၵ်းလႆႈၵမ်ဝၼ်းၵမ်သိၼ်ၵဝ်တင်းလၢႆလႄႈ ရူဝ်ႇသေႇၵူဝ်ယမ်ထႃႇၼႃႉတီႈမူတ်းၸၢင်ႇၵဝ်ဢေႃႈ။
၃ ၵဝ်ပဵၼ်ထႃႇဝရႃႉၽြႃးဢေႃႈ။ပေႃးသူၸွမ်းသဵၼ်ႈတၢင်းထုင်းၾိင်ႈတြႃးၵဝ်လႄႈ ပႂ်ႉပိင်းၺၢပ်ႈၵဝ်တင်း လၢႆသေယဝ်ႉၵမ်ၵျၢင်ႉယူႇၸိုင်
၄ ၵဝ်တၵ်းႁႂ်ႈၽူၼ်တူၵ်းပုၼ်ႈသူၼႂ်းၶိင်ႇမၼ်းမိုဝ်ႉမၼ်းလႄႈ လိၼ်တၵ်းဢဝ်ၽၼ်ႇတႃႇၸူဝ်းတူဝ်ၸဝ်ႈၵဝ်ပၼ်လႄႈတူၼ်ႈမႆႉသူၼ်ဢူးယဵၼ်ႇတင်းလၢႆ တၵ်းမၢၵ်ႇမၢၵ်ႇမၼ်းဢေႃႈ။
၅ လွင်ႈတၢင်းဢၼ်ယဵပ်ႇၶဝ်ႈပေႃႉၶဝ်ႈၼၼ်ႉ တၵ်းလႆႈၶိုတ်းထိုင် ၶိင်ႇဢၼ်ပိတ်းမၢၵ်ႇၸပိတ်ႈလႄႈ လွင်ႈတၢင်းဢၼ်ပိတ်းမၢၵ်ႇၸပိတ်ႈၼၼ်ႉ တၵ်းလႆႈၶိုတ်းထိုင်ၶိင်ႇဢၼ်ဝၢၼ်ႇၸိူဝ်ႉဝၢၼ်ႇၽၼ်းဢေႃႈ။သူတၵ်းလႆႈၵိၼ်ဢိမ်ႇၵိၼ်တဵမ်လႄႈ ၵၢင်းလွတ်ႈတင်းၽေးယူႇၵႃႈၼႂ်းမိူင်းတူဝ်ၸဝ်ႈၵဝ်ႇဢေႃႈ။
၆ ၵဝ်တၵ်းႁႂ်ႈဢမူႉသိုၵ်းထၢတ်ႇယဵၼ်သေၵႃႈတီႈမိူင်းသူလႄႈ သူယင်းဢမ်ႇမီးၵေႃႉဢၼ်လွၵ်ႇဢၼ်ငိူတ်ႈလႄႈတၵ်းလႆႈၼွၼ်းလီဢေႃႈ။တူဝ်ထိူၼ်ႇဢၼ်ႁၢႆႉတင်းလၢႆၵေႃႈၵဝ်တၵ်းပႄႇၽဵဝ်ႈပႅတ်ႈသေၵႃႈၼႂ်းမိူင်းသူ ဢေႃႈ။
၇ ၽေးလၢပ်ႇၽေးမိတ်ႈ ဢမ်ႇလႆႈၽႃႇလႆႈလတ်းၵႃႈၼႂ်းမိူင်းသူ။ သူတၵ်းလိုပ်ႈလမ်းၸွမ်းရၢၼ်ႇသူႇလႄႈၶဝ်တၵ်းလူမ်ႉတၵ်းတူၵ်း လူၺ်ႈလၢပ်ႇလူၺ်ႈလႅဝ်းၵႃႈတီၽၢႆႇ ၼႃႈသူဢေႃႈ။
၈ ၵူၼ်းၵႃႈၼႂ်းသူႁႃႈၵေႃႉတၵ်းလိုပ်ႈတၵ်းလမ်းၸွမ်းၵူၼ်းပၢၵ်ႇၼိုင်ႈဢေႃႈ။ၵူၼ်းပၢၵ်ႇၼိုင်ႈတၵ်းလိုပ်ႈလမ်းၸွမ်းၵူၼ်းမိုၼ်ႇၼိုင်ႈလႄႈ ရၢၼ်ႇသူႇသူတၵ်းလူမ်ႉတၵ်းတူၵ်းလူၺ်ႈလၢပ်ႇလူၺ်ႈလႅဝ်း ၵႃႈတီႈ ၽၢႆႇၼႃႈသူဢေႃႈ။
၉ ၵဝ်တၵ်းပႂ်ႉၸွႆႈပႂ်ႉထႅမ်သူယူႇလႄႈႁႂ်ႈသူၵိူတ်ႇလဵင်ႉလုၵ်ႈလဵင်ႉလၢင်းမႃး ႁႂ်ႈသူယႂ်ႇၽႄၼမ်ၵိုၼ်းမႃးလႄႈႁႂ်ႈပတိၺိၼ်ႇဢၼ်ၵဝ်ႁဵတ်းလူၺ်ႈ ၵၼ်တင်းသူၼၼ်ႉမၼ်ႈၶိူင်ႇဢေႃႈ။
၁၀ သူတၵ်းၵိၼ်ၶဝ်ႈပိူၵ်ႇဢၼ်ၵဝ်ႇဢၼ်သိမ်းဝႆႉၼၼ်ႉယူႇလႄႈ ဢဝ်ၶဝ်ႈပိူၵ်ႇဢၼ်ၵဝ်ႇဢွၵ်ႇပႅတ်ႈ ၵွပ်ႈပိူဝ်ႈၶဝ်ႈပိူၵ်ႇဢၼ်မႂ်ႇဢေႃႈ။
၁၁ ၵဝ်တၵ်းတႄႇသုမ်ႉထဵင်ၵဝ်ၵႃႈၼႂ်းသူလႄႈ ၵဝ်တၵ်း ဢမ်ႇလီႁင်ႈဢဵတ်ႇသဵတ်ႇသူ။
၁၂ ၵဝ်တၵ်းလႄႇၵႂႃႇလႄႇမႃးၵႃႈၼႂ်းသူလႄႈပဵၼ်ၽြႃးပဵၼ်ၸဝ်ႈသူဢေႃႈ။သူ ၵေႃႈတၵ်းပဵၼ်ၵူၼ်းၵဝ်ဢေႃႈ။
၁၃ ၵဝ်ပဵၼ်ထႃႇဝရႃႉၽြႃးၽြႃးပဵၼ်ၸဝ်ႈသူ ဢၼ်ၼုၵ်ႈဢဝ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတု မႃးပုၼ်ႈလွင်ႈၼင်ႇႁိုဝ်သူတၵ်းဢမ်ႇလႆႈပဵၼ်ၶႃႈၸႂ်ႉၶႃႈသွႆၶဝ်ၼၼ်ႉဢေႃႈ။ၵဝ်တႅပ်းၸိူၵ်ႈၵၢၼ်းၸိူၵ်ႈဢိၵ်သူပႅတ်ႈလႄႈ ႁႂ်ႈသူပူၵ်းတင်ႈၵႂႃႇသိုဝ်ႈသိုဝ်ႈယဝ်ႉ။
တၢမ်ႇတၢင်းဢၼ်ဢမ်ႇထွမ်ႇဢဝ်
၁၄ ပေႃးသူ ဢမ်ႇထွမ်ႇဢမ်ႇဢဝ်ၵႂၢမ်းၵဝ် ဢမ်ႇပႂ်ႉၸွမ်းပိင်းၺၢပ်ႈတင်းသဵင်ႈတင်းလူင်၊
၁၅ ႁဵတ်းဢမ်ႇပေႃးၼင်ႇႁိုဝ်တီႈထုင်းၾိင်ႈတြႃးၵဝ် လီႁင်ႈဢဵတ်ႇသဵတ်ႇတၢင်းဢၼ်ၵဝ်ၸီႇယၢင်ႇဝႆႉတင်းလၢႆထၢၼ်ႈပေႃး ဢမ်ႇၵမ်ဢမ်ႇၵျၢင်ႉပိင်းၺၢပ်ႈၵဝ်တင်းသဵင်ႈတင်းလူင်လႄႈ
၁၆ ယႃႉသႅတ်ႉၸႃႇပတိၺိၼ်ႇၵဝ်ပႅတ်ႈၸိုင် လွင်ႈတၢင်းဢၼ်ၵဝ်တၵ်းလႆႈႁဵတ်းတီႈသူၸမ်း ၵဝ်တၵ်းၶၢၼ်းဝႆႉတၢင်းဢၼ်တူၵ်းၸႂ်ၵူဝ်ႁႄ ဢၼ်ပဵၼ်တူႇလႃႇၶႆႈၼၢဝ်ဢၼ်တၵ်းႁႂ်ႈမၢၵ်ႇတႃသူလူႉလႄႈ ႁႂ်ႈႁူဝ်ၸႂ်သူဢူၼ်ႈၵႂႃႇယွမ်းၵႂႃႇၼၼ်ႉၵႃႈၼိူဝ်သူဢေႃႈ။ယင်းဢမ်ႇမီးဢၵျူဝ်းလႄႈ သူတၵ်းလႆႈဝၢၼ်ႇၸိူဝ်ႉဝၢၼ်ႇၽၼ်းလၢႆ လၢႆဢေႃႈ။
၁၇ ရၢၼ်ႇသူႇသူတင်းလၢႆတၵ်းၵိၼ်မၢၵ်ႇၵိၼ်ႁူင်းမၼ်းဢေႃႈ။ၵဝ်တၵ်းဝၢႆႇၼႃႈပႅတ်ႈသသေူလႄႈႁႂ်ႈသူတူၵ်းသုမ်းၵႃႈတီႈၽၢႆႇၼႃႈရၢၼ်ႇသူႇသူဢေႃႈ။ၶဝ်ၸိူဝ်းဢၼ်ၸင်းသူၼၼ်ႉ တၵ်းလႆႈဢုပ်ႉပိူင်ႇၵႃႈၼိူဝ်သူလႄႈ ၽူႈ လႂ်ယင်းဢမ်ႇလိုပ်ႈၸွမ်းလမ်းၸွမ်းလႄႈသူ တၵ်းလႆႈပၢႆႊဢေႃႈ။
၁၈ သူလႆႈၶၢမ်ႇထၢၼ်ႇၼၼ်ႉသေၵေႃႈပေႃးသူယင်းဢမ်ႇပႆႇထွမ်ႇဢဝ်ၵႂၢမ်းၵဝ်လႄႈ ယူႇၸိုင်ၵွပ်ႈပိူဝ်ႈဢပျႅတ်ႈသူၼၼ်ႉလႄႈ ၵဝ်တၵ်းပၼ်တၢမ်ႇ ၸဵတ်းပုၼ်ႊလူးၵွၼ်ႇဢေႃႈ။
၁၉ ၵဝ်တၵ်းႁၵ်းမႃႇၼႃႉၸႂ်သုင်ႁႅင်းတၼ်းၶူဝ်းသူပႅတ်ႈဢေႃႈ။ၵဝ်တၵ်းႁႂ်ႈၽႃႉၵၢင်ႁၢဝ်ပဵၼ်ၸိူဝ်ႉၼင်ႇလဵၵ်း၊လိၼ်မိူင်းပဵၼ်ၸိူဝ်ႉၼင်ႇတွင်းလိူင်လႄႈ၊
၂၀ သူတၵ်းဢဝ်ဢဵၼ်ႁႅင်းသူႁဵတ်းလၢႆလၢႆလွၵ်ႇလွၵ်ႇဢမ်ႇပွင်ႇလွင်ႈၵႃႈသင်ဢေႃႈ။လိၼ်သူတၵ်းဢမ်ႇဢဝ် ၽၼ်ႇတႃႇၸူဝ်းတူဝ်ၸဝ်ႈၵဝ်ႇပၼ်တီႈသူ။တူၼ်ႈမႆႉသူၼ်ဢူးယဵၼ်ႇသူ တၵ်းဢမ်ႇမၢၵ်ႇ မၢၵ်ႇ။
၂၁ ပေႃးသူႁဵတ်းတၢင်းဢၼ်ၶတ်းၵၼ်တင်းၵဝ်လႄႈ ဢမ်ႇထွမ်ႇဢဝ်ၵႂၢမ်းၵဝ်ၸိုင်ၸွမ်းလူၺ်ႈဢပျႅတ်ႈသူၼၼ်ႉလႄႈ ၵဝ်တၵ်းႁႂ်ႈၽေးလူင်ၸဵတ်းပုၼ်ႊတူၵ်း ႁွတ်ႈၵႃႈၼိူဝ်သူဢေႃႈ။
၂၂ ၵဝ်တၵ်းပွႆႇၸႂ်ႉတူဝ်ႁၢႆႉဢၼ်တၵ်းၵၢပ်ႈဢဝ်လုၵ်ႈလၢင်းသူၵႂႃႇ တၵ်းယႃႉပႅတ်ႈတရိၵ်ႈသၢၼ်ႇသူသေလႄႈႁႂ်ႈသူလဵၵ်ႉၵႂႃႇၵေႇၵႂႃႇလႄႈၶူၼ်တၢင်းသူတၵ်းပဵၼ် တီႈဢၼ်သိတ်ႇၵူၼ်းယဵၼ် ၵူၼ်းၵႂႃႇဢေႃႈ။
၂၃ သူလႆႈၶၢမ်ႇၸိူဝ်ႉၼင်ႇၼၼ်သေၵေႃႈပေႃးသူဢမ်ႇလႆႈသတိၵွပ်ႈပိူဝ်ႈၵဝ်လႄႈ ယင်းႁဵတ်းတၢင်းဢၼ်ၶတ်းၵၼ်တင်းၵဝ်ယူႇၸိုင် ၵဝ်ၵေႃႈတၵ်းႁဵတ်းတၢင်းဢၼ်ၶတ်းၵၼ်တင်းသူလႄႈ
၂၄ ပၼ်တၢမ်ႇၸဵတ်းပုၼ်ႊ ၵွပ်ႈပိူဝ်ႈဢပျႅတ်ႈသူၼၼ်ႉလူးၵွၼ်ႇဢေႃႈ။ၵဝ်တၵ်းႁႂ်ႈၽေးလၢပ်ႇ ဢၼ်လႆႈယူႇၽၢႆႇပတိၺိၼ်ႇၵဝ်သေလႄႈၸီႇယၢင်ႇတြႃးၼၼ်ႉ တူၵ်းႁွတ်ႈၵႃႈၼိူဝ် သူဢေႃႈ။
၂၅ မိူဝ်ႈဢၼ်သူယင်းၸူႉၵၼ်တုမ်ၵၼ်ယူႇၵႃႈၼႂ်းဝဵင်းသူၼၼ်ႉၸိုင် ၵဝ်တၵ်းပွႆႇၸႂ်ႉၽေးၵႃႇလႁႃႇလႅင်ႉမိူင်း ႁွတ်ႈမႃးၵႃႈၼႂ်းသူလႄႈႁႂ်ႈသူႁွတ်ႈထိုင်ၵႃႈ ၼႂ်းမိုဝ်းရၢၼ်ႇသူႇသူဢေႃႈ။
၂၆ မိူဝ်ႈဢၼ်ၵဝ်ပႄႇပႅတ်ႈဢၼ်ၵမ်ႉဢၼ်ထွၵ်ႈဢႁႃႇရႃႉ တၢင်းၵိၼ်တီႈသူၼၼ်ႉၸိုင် မေႈယိင်းသိပ်းၵေႃႉတၵ်းၸီႇၽဝ်ၶဝ်ႈမုၼ်းၵႃႈတီႈၽီးၽႆးဢၼ်ၼိုင်ႈသေယဝ်ႉ ဢဝ်ၶဝ်ႈမုၼ်းၸင်ႊပၼ်ႁိဝ်ႈပၼ်သူလႄႈသူဢမ်ႇလႆႈၵိၼ်ဢိမ်ႇၵိၼ်တဵမ်။
၂၇ သူလႆႈၶၢမ်ႇထၢၼ်ႇၼၼ်ႉသေၵေႃႈ ပေႃးသူဢမ်ႇထွမ်ႇဢဝ်ၵႂၢမ်းၵဝ်လႄႈ ယင်းႁဵတ်းတၢင်းဢၼ်ၶတ်းၵၼ် တင်းၵဝ်ယူႇၸိုင်
၂၈ ၵဝ်ၵေႃႈတၵ်းၸႂ်မႆႈၶႂ်ႈၸႃႉႁႅင်းယႂ်ႇၼႃႇလူင်လၢင်သေလႄႈ ႁဵတ်းတၢင်းဢၼ်ၶတ်းၵၼ်တင်းသူလႄႈ ပၼ်တၢမ်ႇၸဵတ်းပုၼ်ႊတီႈသူၵွပ်ႈပိူဝ်ႈ ဢပျႅတ်ႈသူၼၼ်ႉလူးၵွၼ်ႇဢေႃႈ။
၂၉ သူတၵ်းၵိၼ်ၼိူဝ်ႉလုၵ်ႈၸၢႆးသူလႄႈ ၼိူဝ်ႉလုၵ်ႈယိင်းသူၵေႃႈသူတၵ်းၵိၼ် ဢေႃႈ။
၃၀ ၵဝ်တၵ်းယႃႉၽဵဝ်ႈထႃႇၼႃႉတီႈသူင်သူၸိူဝ်းၼၼ်ႉပႅတ်ႈလႄႈ ၽၼ်းရုၵ်ႉထူႉသူၸိူဝ်းၼၼ်ႉလူမ်ႉပႅတ်ႈဢေႃႈ။ၵဝ်တၵ်းဢဝ်တူဝ်တၢႆသူပႅတ်ႈတူၵ်းသႂ်ႇၵႃႈၼိူဝ်တူဝ်တၢႆရုၵ်ႉထူႉသူၸိူဝ်းၼၼ်ႉလႄႈ လီႁင်ႈဢဵတ်ႇသဵတ်ႇ သူဢေႃႈ။
၃၁ ၵဝ်တၵ်းယႃႉဝဵင်းသူၸိူဝ်းၼၼ်ႉပႅတ်ႈလႄႈၽဵဝ်ႈ ထႃႇၼႃႉတီႈမူတ်းၸၢင်ႇသူၸိူဝ်းၼၼ်ႉ ပႅတ်ႈဢေႃႈ။ ဢၼ်ႁွမ်ဢၼ်ႁူၺ်းၼၢမ်ႇသႃႇသူၼၼ်ႉၸိုင် ၵဝ်တၵ်းဢမ်ႇသုတ်ႇဢမ်ႇၼူမ်ႈ။
၃၂ ၵဝ်တၵ်းၽဵဝ်ႈမိူင်းသူပႅတ်ႈသေလႄႈရၢၼ်ႇသူႇသူဢၼ်ယူႇၵႃႈၼႂ်းမိူင်းၼၼ်ႉ တၵ်းဢွၼ်ၵၼ်ဢၢမ်းၼႃႇလူင်လၢင်လႄႈၵႂင် ၸႂ်ယူႇဢေႃႈ။
၃၃ ၵဝ်တၵ်းႁႂ်ႈသူၽၢတ်ႇၽေၵၼ်ၵႂႃႇၵူႈတီႈၵူႈလႅၼ်ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႄႈ ထွတ်ႇလၢပ်ႇလိုပ်ႈလမ်းၸွမ်းသူၵႂႃႇဢေႃႈ။မိူင်းသူၵေႃႈ တၵ်းလႆႈမီးတၢင်းဢၼ်သိတ်ႇၵူၼ်းယဵၼ်ၵူၼ်းဢေႃႈ။ဝဵင်းသူၸိူဝ်းၼၼ်ႉၵေႃႈတၵ်းလႆႈမီးတၢင်း ဢၼ် လူႉဢၼ်လႅဝ်ဢေႃႈ။
၃၄ ၼင်ႇၼၼ်လႄႈၶိင်ႇၵႃႇလ ၼႂ်းမိူဝ်ႈဢၼ်မိူင်းသူသိတ်ႇၵူၼ်းယဵၼ်ၵူၼ်းယူႇၼၼ်ႉ၊မိူင်းသူတၵ်းလႆႈမူၼ်ႈပျေႃႇၵႃႈၼႂ်းဝၼ်းၵမ်သိၼ်လႄႈ သူတၵ်းလႆႈယူႇၵႃႈၼႂ်းမိူင်းရၢၼ်ႇသူႇသူဢေႃႈ။မိူဝ်ႈၶိင်ႇၼၼ်ႉမိူင်းတၵ်းလႆႈယူႇၼိမ်ၼိမ်လီလီလႄႈ မုၼ်ႈပျေႃႇယူၵႃႈၼႂ်းဝၼ်းၵမ်သိၼ်မၼ်းဢေႃႈ။
၃၅ ၶိင်ႇၵႃႇလ ၼႂ်းမိူဝ်ႈဢၼ်ပဵၼ်သိတ်ႇၵူၼ်းယဵၼ်ၵူၼ်းၼၼ်ႉ မိူင်းတၵ်းလႆႈမီးတၢင်းဢၼ်ယူႇၼိမ်ၼိမ်လီလီဢၼ်ဢမ်ႇလႆႈဢၶႂၢင်ႉ ၼႂ်းဝၼ်းၵမ်သိၼ်တင်းလၢႆမိူဝ်ႈ ဢၼ်သူယင်းယူႇၵႃႈၼႂ်းမၼ်းယူႇၼၼ်ႉဢေႃႈ။
၃၆ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼႂ်းသူၼၼ်ႉၸမ်း ၵဝ်တၵ်းဢဝ်သၽေႃးဢၼ်တူၵ်းၸႂ် သႂ်ႇသႂၢင်းပၼ်ၵႃႈၼႂ်းႁူဝ်ၸႂ်ၶဝ် ၵႃႈၼႂ်းမိူင်းရၢၼ်ႇသူႇၶဝ်ၼၼ်ႉလႄႈသဵင်မႂ်ႊမႆႉဢၼ်တူင်ႉၼိုင်ၼၼ်ႉ တၵ်းၸွမ်းလွၵ်ႇၶဝ်လႄႈၶဝ်တၵ်းတိုၼ်ႇပၢႆႊ မိူၼ်ၸိူဝ်ႉၼင်ႇပၢႆႊၽေးလၢပ်ႇၽေးလႅဝ်းၼၼ်ႉဢေႃႈ။ၽူႈ လႂ်ဢမ်ႇလိုပ်ႈဢမ်ႇၸွမ်းသေ ၵေႃႈတၵ်းလူမ်ႉဢေႃႈ။
၃၇ ၽူႈ လႂ်ယင်းဢမ်ႇလိုပ်ႈလမ်းၸွမ်းသေၵေႃႈ ၶဝ်ၵေႃႉၼိုင်ႈတၵ်းလူမ်ႉတူၵ်းသႂ်ၵႃႈၼိူဝ်ၵေႃႉၼိုင်ႈ မိူၼ်ၸိူဝ်ႉၼင်ႇဢၼ်ပၢႆႊၽေးလၢပ်ႇၽေးလႅဝ်းၼၼ်ႉဢေႃႈ။ဢမ်ႇလႆႈမီးတၼ်းၶူဝ်းဢၼ်ၸုၵ်းၶၢမ်ႇယူႇ ၵႃႈတီႈၽၢႆႇၼႃႈရၢၼ်ႇသူႇသူလႆႈၼၼ်ႉလႃး လႃး။
၃၈ သူတၵ်းသုမ်းၸွမ်းၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႄႈ မိူင်းရၢၼ်ႇသူႇၼၼ်ႉတၵ်းဢိုၼ်ၵိၼ်သူဢေႃႈ။
၃၉ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇတီႈသူၼၼ်ႉတၵ်းၶၢမ်ႇဢပျႅတ်ႈတူဝ်ၸဝ်ႈၵဝ်ႇ ၵႃႈတီႈၼႂ်းမိူင်းရၢၼ်ႇသူႇသူၼၼ်ႉလႄႈႁႅင်းဢူၼ်ႈၵႂႃႇဢေႃႈ။ဢပျႅတ်ႈပူႇမွၼ်ႇၶဝ်ၼၼ်ႉၵေႃႈ ၶဝ်တၵ်းလႆႈၶၢမ်ႇလႄႈႁႅင်းဢူၼ်ႈ ၵႂႃႇလူၺ်ႈၵၼ်တင်းၶဝ်ၼၼ်ႉဢေႃႈ။
၄၀ ၼႂ်းဝႃႈၼၼ်သေၵေႃႈ ပေႃးၶဝ်ၽုၺ်ႇဢွၵ်ႇၼႄပျႃးတွင်းပၢၼ်ႇ ဢပျႅတ်ႈၶဝ် ဢပျႅတ်ႈပူႇမွၼ်ႇၶဝ်တင်းလၢႆ ၼႂ်းတၢင်းဢၼ်ၽိတ်းပိူင်ႈ ဢၼ်ၶဝ်ၽိတ်းပိူင်ႈၵဝ်ၼၼ်ႉဢိၵ်ႇ တင်း
၄၁ လွင်ႈတၢင်းဢၼ်ၵဝ်ႁဵတ်းတေႃႇၶဝ်လႄႈ ဢဝ်ၶဝ်ၵႂႃႇသူင်ႇၵႃႈတီႈမိူင်းရၢၼ်ႇသူႇၶဝ် ၵွပ်ႈပိူဝ်ႈဢၼ်ၶဝ်ႁဵတ်းတၢင်းဢၼ်ၶတ်းၵၼ်တင်းၵဝ်ၼၼ်ႉ ပေႃးၶဝ်ဢဝ်ႁူဝ်ၸႂ်တူဝ်ၸဝ်ႈၵဝ်ႇ ဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းၼၼ်ႉၶျႃးတူၵ်းတီႈတႅမ်ႇလႄႈ ႁပ်ႉတုင်းဢဝ်တၢမ်ႇ ဢၼ်လႆႈၶၢမ်ႇၵွပ်ႈပိူဝ်ႈဢပျႅတ်ႈတူဝ်ၸဝ်ႈၵဝ်ႇ ၼၼ်ႉၸိုင်
၄၂ ၵဝ်တၵ်းၶုၵ်းၸႂ်လႆႈၶႆႈၸႂ်ထူပ်းပတီႈၺိၼ်ႇဢၼ်ၵဝ်လႆႈႁဵတ်းလူၺ်ႈၵၼ်တင်းယႃႇၵုပ်ႉ ပတိၺိၼ်ႇဢၼ်ၵဝ်လႆႈႁဵတ်းလူၺ်ႈၵၼ်တင်းဢိၸၢၵ်ႉ ပတိၺိၼ်ႇဢၼ်ၵဝ်လႆႈႁဵတ်းလူၺ်ႈၵၼ်တင်းဢႃႇပႁမ်ႇ ၼၼ်ႉဢေႃႈ။မိူင်းၼၼ်ႉၵေႃႈၵဝ်တၵ်းၶုၵ်းၸႂ်လႆႈၶႆႈၸႂ်ထူပ်း ဢေႃႈ။
၄၃ မိူင်းၼၼ်ႉတၵ်းလွတ်ႈသေၵႃႈၼႂ်းမိုဝ်းၶဝ်လႄႈၶိင်ႇၵႃႇလႃႉ ၼႂ်းမိူဝ်ႈဢၼ်ၶဝ်ယင်းဢမ်ႇမီးလႄႈသိတ်ႇၵူၼ်းယဵၼ်ၵူၼ်းယူႇၼၼ်ႉၸိုင် တၵ်းမူၼ်ႈပျေႃႇၵႃႈၼႂ်းဝၼ်းၵမ်သိၼ်မၼ်းတင်းလၢႆဢေႃႈ။ၶဝ်ၼၼ်ႉတၵ်းလႆႈႁပ်ႉတုင်းဢဝ်တၢမ်ႇဢပျႅတ်ႈ ဢၼ်ၶဝ်လႆႈၶၢမ်ႇၼၼ်ႉ ၵွပ်ႈပိူဝ်ႈဢၼ်ၶဝ်ႁဵတ်းဢမ်ႇပေႃးၼင်ႇႁိုဝ်တီႈတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉလႄႈ လီႁင်ႈ ဢဵတ်ႇသဵတ်ႇထုင်းၾိင်ႈတြႃးၵဝ်ၸိူဝ်းၼၼ်ႉဢေႃႈ။
၄၄ ၼႂ်းဝႃႈၼၼ်သေၵေႃႈ မိူဝ်ႈဢၼ်ၶဝ်ယူႇၵႃႈၼႂ်းမိူင်းရၢၼ်ႇသူႇၶဝ်ယူႇၼၼ်ႉ ၵဝ်တၵ်းဢမ်ႇၸုတ်ႉပႅတ်ႈၶဝ်ၵဝ်တၵ်းဢမ်ႇလီႁင်ႈဢဵတ်ႇသဵတ်ႇၶဝ်ထၢၼ်ႈပေႃး ယႃႉၶဝ်ပႅတ်ႈမူတ်းမူတ်းသဵင်ႈသဵင်ႈလႄႈ ပႄႇပႅတ်ႈပတိၺိၼ်ႇဢၼ်ၵဝ်ႁဵတ်းလူၺ်ႈၵၼ်တင်းၶဝ်ၼၼ်ႉ။ၵဝ်ပဵၼ်ထႃႇဝရႃႉ ၽြႃးၽြႃးပဵၼ်ၸဝ်ႈၶဝ်ဢေႃႈ။
၄၅ ၵွပ်ႈပိူဝ်ႈၶဝ်လႄႈၵဝ်တၵ်းၶုၵ်းၸႂ်လႆႈၶႆႈၸႂ်ထူပ်း ပတိၺိၼ်ႇဢၼ်ၵဝ်ႁဵတ်းလူၺ်ႈၵၼ်တင်းပူႇမွၼ်ႇၶဝ် ဢၼ်ၵဝ်ၼုၵ်ႈဢဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတု သိုဝ်ႈၼႃႈတႂ်ႈတႃၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆမႃး လွင်ႈၼင်ႇႁိုဝ်ၵဝ်တၵ်းလႆႈပဵၼ်ထႃႇဝရႃႉၽြႃးဢေႃႈ၊ ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၄၆ ဢၼ်ၼႆႉၸမ်းပဵၼ်ထုင်းၾိင်ႈတြႃးဢိၵ်ႇတင်း လွင်ႈတၢင်းဢၼ်ထႃႇဝရႃႉၽြႃးၸီႇယၢင်ႇဝႆႉတင်းတြႃးၸဝ်ႈတင်းလၢႆ ဢၼ်မၼ်းၸဝ်ႈႁဵတ်းဝႆႉဝူင်ႈၵၢင်မၼ်းၸဝ်ႈဢိၵ်ႇတင်း ၵူၼ်းမဵဝ်းဢိသရေႇလတင်းလၢႆၵႃႈၼိူဝ်လွႆသိၼႃႇၼၼ်ႉ ၵႃႈၼႂ်းမိုဝ်းမုဝ်းသေႇၼၼ်ႉဢေႃႈ။