Chapter
၂၀
တၢမ်ႇဢပျႅတ်ႈ
၁ ထႃႇဝရႃႉၽြႃး သမ်ႉမီးဢမိင်ႉတီႈမုဝ်းသေႇ လႄႈဝႃႈ ၸမ်း၊-
၂ မႂ်းသင်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-ၵူၼ်းမဵဝ်းဢိသရေႇလသေဢမ်ႇဝႃႈ၊-ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်သွၼ်ႈပိုင်ႈယူႇၵႃႈတီႈၵူၼ်းမဵဝ်းဢိသရေႇလၸိူဝ်းၼၼ်ႉသေဢမ်ႇဝႃႈ ၵေႃႉဢၼ်ဢဝ်လုၵ်ႈလၢင်းၸိူဝ်ႉၶိူဝ်းမၼ်း သၢၵ်ႈၵၢပ်ႈတီႈၽြႃးမူႇလွၵ်ႇၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၢၼ်ပဵၼ်ဢေႃႈ။ၵူၼ်းဝၢၼ်ႈၵူၼ်းမိူင်းတင်းလၢႆ တၵ်းလႆႈဢွၼ်ၵၼ် ဢဝ်မၢၵ်ႇႁိၼ်ထႅမ်ႈမၼ်း ဢေႃႈ။
၃ ၵွပ်ႈပိူဝ်ႈဢၼ်မၼ်းၼၼ်ႉႁႂ်ႈထႃႇၼႃႉတီႈမူတ်းၸၢင်ႇၵဝ်ၵူဝ်ႈၵိူၵ်ႇယူႇ ဢဝ်ၼႃႇမႃႉၸိုဝ်သဵင်ၵဝ်ဢၼ်မူတ်းၸၢင်ႇၼၼ်ႉ ၶျႃးတူၵ်းတီႈတႅမ်ႇယူႇသေလႄႈဢဝ်လုၵ်ႈလၢင်းၸိူဝ်ႉၶိူဝ်းမၼ်း သၢၵ်ႈၵၢပ်ႈတီႈၽြႃးမူႇလွၵ်ႇၼၼ်ႉလႄႈၵဝ်တၵ်းဝၢႆႇၼႃႈၵဝ်ပႅတ်ႈမၼ်းသေလႄႈ ပႄႇမၼ်းပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းမၼ်း ဢေႃႈ။
၄ ပေႃးၵူၼ်းဝၢၼ်ႈၵူၼ်းမိူင်းတင်းလၢႆႁဵတ်းတၢင်းဢၼ်ႁႄႉဢၼ်ၵင်ႈတႃၶဝ်ဝႆႉ တီႈၵေႃႉဢၼ်ဢဝ်လုၵ်ႈလၢင်းၸိူဝ်ႉၶိူဝ်းမၼ်း သၢၵ်ႈၵၢပ်ႈတီႈၽြႃးမူႇလွၵ်ႈၼၼ်ႉလႄႈဢမ်ႇဢဝ်မၼ်းတၢႆၸိုင်
၅ ၵဝ်တၵ်းဝၢႆႇၼႃႈၵဝ် ပႅတ်ႈသေၵေႃႉဢၼ်ယူႇၸိူဝ်ႉၼင်ႇၼၼ်ၼၼ်ႉ ဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းလၢႆလႄႈ ဢဝ်ၵေႃႉၼၼ်ႉဢိၵ်ႇတင်း ၶဝ်ၸိူဝ်းဢၼ်ၸွမ်းမၼ်းသေလႄႈ ၽိတ်းပိူင်ႈႁႂ်ႈလႆႈဢွၼ်ၵၼ်ၽိတ်းပိူင်ႈလူၺ်ႈၵၼ်တင်းၽြႃးမူႇလွၵ်ႇၼၼ်ႉၵႃႈမီးၸိူဝ်းၼၼ်ႉ ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းၶဝ်ဢေႃႈ။
၆ ၵေႃႉဢၼ်ဝေႈပိူင်ႈလႄႈ သုတ်ႉၸပ်းသုတ်ႉၸူးၵႃႈတီႈၶဝ်ၸိူဝ်းဢၼ်လဵၼ်ႈၽီဢိၵ်ႇတင်း ၶဝ်ၸိူဝ်းဢၼ်ႁဵတ်းၽိူဝ်ႉၼၼ်ႉလႄႈ ႁႂ်ႈလႆႈၽိတ်းပိူင်ႈၼၼ်ႉၵဝ်တၵ်းဝၢႆႇၼႃႈၵဝ်ပႅတ်ႈသေလႄႈ ပႄႇပႅတ်ႈမၼ်းသေၵႃႈၼႂ်းမဵဝ်း ၸိူဝ်ႉၶိူဝ်းမၼ်းဢေႃႈ။
၇ ၵွပ်ႈပိူဝ်ႈဢၼ်ၵဝ်ထႃႇဝရႃႉၽြႃးၽြႃးပဵၼ်ၸဝ်ႈသူၼႆႉမူတ်းၸၢင်ႇလႄႈ သူႁႂ်ႈတူဝ်ၸဝ်ႈ ၵဝ်ႇမီးတၢင်းဢၼ်မူတ်းၸၢင်ႇတႃႉ။
၈ သူတၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ်တင်းလၢႆဢေႃႈ။ၵဝ်ပဵၼ်ထႃႇ ဝရႃႉၽြႃးဢၼ်ႁႂ်ႈသူမူတ်းၸၢင်ႇဢေႃႈ။
၉ ၵေႃႉဢၼ်ၵိၼ်ႇလႃႇပေႃႈမေႈမၼ်းၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၢၼ်ပဵၼ်ဢေႃႈ။ၵွပ်ႈပိူဝ်ႈဢၼ်မၼ်းၵိၼ်ႇလႃႇပေႃႈမေႈမၼ်းလႄႈ လိူတ်ႈမၼ်းတၵ်းလႆႈႁွတ်ႈထိုင်ၵႃႈၼိူဝ်မၼ်းဢေႃႈ။
၁၀ ၵေႃႉဢၼ်ၽိတ်းပိူင်ႈမေးပိူၼ်ႈ ဢၼ်ဝႃႈ ၵေႃႉဢၼ်ၽိတ်းပိူင်ႈ မေးဢၼ်ၸၢပ်ႈသႅင်ႇၵၼ်တင်းပိူၼ်ႈတၢင်ႇၵေႃႉၼၼ်ႉ ၵေႃႉၼၼ်ႉဢိၵ်ႇတင်းမေႈယိင်းဢၼ်ၽိတ်းပိူင်ႈၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇ ၶၢၼ်ပဵၼ်ဢေႃႈ။
၁၁ ၵေႃႉဢၼ်ၼွၼ်းလူၺ်ႈၵၼ်တင်းမေးပေႃႈမၼ်းၼၼ်ႉ ႁဵတ်းတၢင်းဢၼ်လူႈလၢႆပေႃႈမၼ်းလႄႈ မၼ်းဢိၵ်ႇတင်းမေႈယိင်းၼၼ်ႉတင်းသွင်ၵေႃႉတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၢၼ်ပဵၼ်ဢေႃႈ။လိူတ်ႈသွင်ၶႃတၵ်းလႆႈႁွတ်ႈထိုင်ၵႃႈၼိူဝ် သွင်ၶႃဢေႃႈ။
၁၂ ပေႃးၵူၼ်းၸၢႆးၼွၼ်းလူၺ်ႈၵၼ်တင်းလုၵ်ႈပႂ်ႉမၼ်းၸိုင် မၼ်းတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၢၼ်ပဵၼ်ဢေႃႈ။သွင်ၶႃၼၼ်ႉႁဵတ်းတၢင်းဢၼ်လေႃးလႄး ၵၼ်တင်းဢၼ်လီႁင်ႈဢဵတ်ႇသဵတ်ႇလႄႈ လိူတ်ႈသွင်ၶႃတၵ်းလႆႈႁွတ်ႈထိုင်ၵႃႈၼိူဝ်သွင် ၶႃဢေႃႈ။
၁၃ ပေႃးၵူၼ်းၸၢႆးၼင်ႇၵၼ်ၼွၼ်းလူၺ်ႈၵၼ်မိူၼ်ၸိူဝ်ႉၼင်ႇ ၼွၼ်းလူၺ်ႈၵၼ်တင်းမေႈယိင်းၼၼ်ႉၸိုင် သွင်ၶႃၼၼ်ႉႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇလႄႈ တၵ်းလႆႈၶၢမ်ႇတၢင်းဢၼ်ဢဝ်တၢႆ ဢမၢၼ်ႇၶၢၼ်ပဵၼ်ဢေႃႈ။လိူတ်ႈသွင်ၶႃတၵ်းလႆႈႁွတ်ႈ ထိုင်ၵႃႈၼိူဝ်သွင်ၶႃဢေႃႈ။
၁၄ ပေႃးၵူၼ်းၸၢႆးဢဝ်မေႈယိင်းဢိၵ်ႇတင်း လုၵ်ႈယိင်းမၼ်းႁဵတ်းမေးၸိုင်ပဵၼ်လွင်ႈတၢင်းဢၼ်ဢမ်ႇတြႃးဢေႃႈ။ လွင်ႈၼင်ႇႁိုဝ်လွင်ႈတၢင်းဢၼ်ဢမ်ႇတြႃး တၵ်းဢမ်ႇလႆႈမီးၵႃႈၼႂ်းသူၸိုင် တၵ်းလႆႈဢဝ်မၼ်းဢိၵ်ႇတင်းသွင်ၶႃၼၼ်ႉ တုတ်ႇၽႆးပႅတ်ႈသေဢေႃႈ။
၁၅ ပေႃးၵူၼ်းၸၢႆးၼွၼ်းလူၺ်ႈၵၼ်တင်းတရိၵ်ႈသၢၼ်ႇၸိုင် မၼ်းတၵ်းလႆႈၶၢမ်ႇ တၢင်းဢၼ်ဢဝ်တၢႆဢမၢၼ်ႇၶၢၼ်ပဵၼ်ဢေႃႈ။တရိၵ်ႈသၢၼ်ႇၼၼ်ႉၵေႃႈ တၵ်းလႆႈဢဝ်တၢႆသေဢေႃႈ။
၁၆ မေႈယိင်းၵေႃႈ ပေႃးသုတ်ႉၸပ်းသုတ်ႉၸူးၵႃႈတီႈတရိၵ်ႈသၢၼ်ႇလႄႈ ႁႂ်ႈလႆႈႁဵတ်းၵႃႇမႃႉသိူၵ်ႈသမ်ႇၵၼ်ၸိုင်မေႈယိင်းတင်းတရိၵ်ႈသၢၼ်ႇၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၢၼ်ပဵၼ်ဢေႃႈ။လိူတ်ႈ ၶဝ်တၵ်းလႆႈႁွတ်ႈထိုင်ၵႃႈၼိူဝ်ၶဝ်ဢေႃႈ။
၁၇ ပေႃးၵူၼ်းၸၢႆးဢဝ်ပီႈၼၢင်းမၼ်း၊ၼွင်ႉယိင်းမၼ်း၊ ဢၼ်ပဵၼ်လုၵ်ႈယိင်းပေႃႈမၼ်း၊ ဢမ်ႇၼၼ်လုၵ်ႈယိင်းမေႈမၼ်းလႄႈၵႃႇမႃႉသိူၵ်ႈသမ်ႇၸိုင် ပဵၼ်လွင်ႈတၢင်းဢၼ်လီဢူၵ်းလီဢၢႆလီသေႉလီသွမ်းဢေႃႈ။ၶဝ်ၼၼ်ႉတၵ်းလႆႈၶၢမ်ႇတၢင်းဢၼ် ပႄႇပႅတ်ႈသေ သိုဝ်ႈၼႃႈတႂ်ႈတႃၵူၼ်း မဵဝ်းၸိူဝ်ႉၶိူဝ်းလဵဝ်ၵၼ်ဢေႃႈ။ၵူၼ်းၸၢႆးၼၼ်ႉၵွပ်ႈပိူဝ်ႈဢၼ်မၼ်းႁဵတ်းတၢင်းဢၼ်လူႈလၢႆပီႈၼၢင်းမၼ်းၼွင်ႉယိင်းမၼ်းလႄႈမၼ်းတၵ်းလႆႈၶၢမ်ႇဢ ပျႅတ်ႈတူဝ်ၸဝ်ႈၵဝ်ႇဢေႃႈ။
၁၈ ပေႃးၵူၼ်းၸၢႆးၼွၼ်းလူၺ်ႈၵၼ်တင်းမေႈယိင်းဢၼ်ဢူႉတူႉမၼ်းမႃးယူႇၼၼ်ႉလႄႈ ႁဵတ်းၵႃႇမႃႉသိူၵ်ႈသမ်ႇၸိူင်ၵူၼ်းၸၢႆးၼၼ်ႉပဵၼ်တၢင်းပဵၼ်ဢၼ် ႁဵတ်းႁႂ်ႈဢူႉတူႉမၼ်းထၢင်ႇသႃးလႄႈ မေႈယိင်းၼၼ်ႉၵေႃႈ ႁဵတ်းႁႂ်ႈတၢင်းဢၼ်ထွၵ်ႇလိူတ်ႈမၼ်းၼၼ်ႉထၢင်ႇသႃးဢေႃႈ။သွင်ၶႃႈတၵ်းလႆႈၶၢမ်ႇ တၢင်းဢၼ်ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းသွင်ၶႃဢေႃႈ။
၁၉ မႂ်းဢမ်ႇလႆႈႁဵတ်းတၢင်းဢၼ်ၵႃႇမႃႉသိူၵ်ႈသမ်ႇလူၺ်ႈၵၼ်တင်းပီႈၼၢင်းပေႃႈ၊ၼွင်ႉယိင်းပေႃႈ၊ပီႈၼၢင်းမေႈ၊ၼွင်ႉယိင်းမေႈ။ပေႃးႁဵတ်းၸိုင်သွင်ၶႃၼၼ်ႉ တၵ်းလႆႈၶၢမ်ႇဢပျႅတ်ႈတူဝ်ၸဝ်ႈၵဝ်ႇဢေႃႈ။
၂၀ ပေႃးၵူၼ်းၸၢႆး ၼွၼ်းလူၺ်ႈၵၼ်တင်း မေးပီႈၸၢႆးပေႃႈမေးၼွင်ႉၸၢႆးပေႃႈၸိုင် ၵွပ်ႈပိူဝ်ႈဢၼ်မၼ်းႁဵတ်းတၢင်းဢၼ်လူႈလၢႆႈပီႈၸၢႆးပေႃႈမၼ်း ၼွင်ႉၸၢႆးပေႃႈမၼ်းၼၼ်ႉလႄႈ သွင်ၶႃၼၼ်ႉတၵ်းလႆႈၶၢမ်ႇဢပျႅတ်ႈတူဝ်ၸဝ်ႈၵဝ်ႇလႄႈၸူဝ်ႈဢသၢၵ်ႈတၵ်းဢမ်ႇလႆႈ လုၵ်ႈလၢင်း။
၂၁ ပေႃးၵူၼ်းၸၢႆးဢဝ်မေးပီႈၸၢႆးမၼ်းမေးၼွင်ႉၸၢႆးမၼ်းၸိုင်၊ ပဵၼ်လွင်ႈတၢင်းဢၼ်ၵူဝ်ႈၵိူၵ်ႇဢေႃႈ။ ၵွပ်ႈပိူဝ်ႈဢၼ်မၼ်းႁဵတ်းတၢင်းဢၼ်လူႈလၢႆႈပီႈၸၢႆးမၼ်း ၼွင်ႉၸၢႆးၼၼ်ႉလႄႈသွင်ၶႃၼၼ်ႉတၵ်း ဢမ်ႇလႆႈလုၵ်ႈလၢင်း။
၂၂ လွင်ႈၼင်ႇႁိုဝ်မိူင်းဢၼ်ၵဝ်ဢဝ်သူၵႂႃႇသူင်ႇႁႂ်ႈလႆႈၶျႃးတီႈယူႇပၼ်သူၼၼ်ႉ တၵ်းဢမ်ႇတူၼ်ႉႁၢၵ်ႈသူဢွၵ်ႇပႅတ်ႈၸိုင် သူတၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ် ဢိၵ်ႇတင်း တၢင်းဢၼ်ၵဝ်ၸီႇယၢင်ႇဝႆႉၵႃႈမီးၼၼ်ႉဢေႃႈ။
၂၃ သူဢမ်ႇလႆႈၵႂႃႇမႃးၸွမ်းၽႃႇသႃႇထုင်းၾိင်ႈ ၵူၼ်းၵူႈၸိူဝ်ႉၵူႈၶိူဝ်းဢၼ်ၵဝ်ႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈသူၼၼ်ႉ။ၵွပ်ႈပိူဝ်ႈဢၼ် ၶဝ်ႁဵတ်းလွင်ႈတၢင်းၸိူဝ်းၼၼ်ႉတင်းသဵင်ႈတင်း လူင်လႄႈၵဝ်လီႁင်ႈဢဵတ်ႇသဵတ်ႇဢေႃႈ။
၂၄ ၵဝ်လႆႈလၢတ်ႈဝႆႉလႄႈဝႃႈ၊-သူတၵ်းလႆႈၶၢမ်ႇဢမူၺ်ႇမိူင်းၶဝ်ဢၼ်ဝႃႈမိူင်းဢၼ်ၼမ်ႉၼူမ်းတင်းၼမ်ႉၽိုင်ႈလႆယူႇ ၼၼ်ႉလႄႈၵဝ်တၵ်းပၼ်တီႈသူ ႁႂ်ႈသူလႆႈပိူင်ႇဢေႃႈ၊ဝႃႈၼင်ႇၼႆဝႆႉယဝ်ႉ။ၵဝ်ပဵၼ်ထႃႇဝရႃႉၽြႃး၊ၽြႃးပဵၼ်ၸဝ်ႈသူ၊ဢၼ်ၽႄဢဝ်သူ ၽၢတ်ႇယၢၼ်ၵၼ်တင်းၵူၼ်းတၢင်ႇၸိူဝ်ႉ တၢင်ႇမဵဝ်းတင်းလၢႆၼၼ်ႉဢေႃႈ။
၂၅ ၵွပ်ႈပိူဝ်ႈလွင်ႈၼၼ်ႉလႄႈ သူတၵ်းလႆႈၸၵ်းၽႄဢဝ်တူဝ်ဢၼ်မူတ်းသႂ်တူဝ်ဢၼ်ဢမ်ႇမူတ်းသႂ် ၼူၵ်ႉဢၼ်မူတ်းသႂ်ၼူၵ်ႉဢၼ်ဢမ်ႇမူတ်းသႂ်ၸိူဝ်းၼၼ်ႉပႅၵ်ႇပိူင်ႈၵၼ်ဢေႃႈ။သူဢမ်ႇလႆႈႁႂ်ႈတူဝ်ၸဝ်ႈၵဝ်ႇ ပဵၼ်ဢၼ်လီႁင်ႈဢဵတ်ႇသဵတ်ႇၵွပ်ႈပိူဝ်ႈတူဝ်သတ်း၊ၼူၵ်ႉ၊တရိၵ်ႈသၢၼ်ႇ ဢၼ်ၸၢင်ႊၵႂႃႇၸၢင်ႊၵၢၼ်းၵႃႈၼိူဝ်လိၼ် ဢၼ်ၵဝ်ၽႄဢွၵ်ႇဝႆႉႁႂ်ႈပဵၼ်ဢၼ်ဢမ်ႇမူတ်းသႂ်တီႈသူၼႆႉၸိူဝ်းၼၼ်ႉ သေၸိူဝ်ႉ သေပိူင်။
၂၆ သူတၵ်းလႆႈမူတ်းၸၢင်ႇပုၼ်ႈၵဝ်ဢေႃႈ။လွင်ႈမၼ်းၸမ်း၊ ၵဝ်ထႃႇဝရႃႉၽြႃးမူတ်းၸၢင်ႇလႄႈၽႄဢဝ်သူ ၽၢတ်ႇယၢၼ်ၵၼ်တင်းၵူၼ်းတၢင်ႇၸိူဝ်ႉတၢင်ႇ မဵဝ်းတင်းလၢႆႁႂ်ႈလႆႈပဵၼ်ပုၼ်ႈၵဝ်ယဝ်ႉ။
၂၇ ၵူၼ်းၸၢႆးသေဢမ်ႇဝႃႈ ၵူၼ်းယိင်းသေဢမ်ႇဝႃႈ ၵေႃႉဢၼ်ၽီၶဝ်ႈ၊ဢမ်ႇၼၼ် ၵေႃႉဢၼ်ႁဵတ်းၽိူဝ်ႉၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၢၼ်ပဵၼ်ဢေႃႈ။ ၶဝ်တၵ်းလႆႈဢွၼ်ၵၼ်ဢဝ်မၢၵ်ႇႁိၼ်ထႅမ်ႈၵေႃႉၼၼ်ႉဢေႃႈ။လိူတ်ႈၶဝ်တၵ်းလႆႈႁွတ်ႈထိုင်ၵႃႈၼိူဝ်ၶဝ်ဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။