Chapter
၂၃
ပွႆးလၢမ်း
၁ ထႃႇဝရႃႉၽြႃး သမ်ႉမီးဢမိင်ႉတီႈမုဝ်းသေႇ လႄႈဝႃႈ ၸမ်း၊-
၂ မႂ်းသင်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-ပွႆးထႃႇဝရႃႉၽြႃးဢၼ်သူတၵ်းလႆႈၸီႇယၢင်ႇ ၶိင်ႇမၼ်းၶႃႇမၼ်းႁႂ်ႈပဵၼ်တၢင်းဢၼ်ၸူႉတုမ်ထမ်ႇမႃႉၸိူဝ်းၼၼ်ႉ ပဵၼ်ပွႆးၵဝ်ဢမၢၼ်ႇၶၢၼ်ပဵၼ်ဢေႃႈ။
ဝၼ်းၵမ်သိၼ်တၵ်းလႆႈႁဵတ်းတၢင်းႁဵတ်းႁူၵ်းဝၼ်းဢေႃႈ။
၃ ဝၼ်းသတ်ႉတမ ပဵၼ်ဝၼ်းၵမ်သိၼ်ဢၼ်တၵ်းလႆႈယူႇၼိမ်ၼိမ်လီလီ၊ဝၼ်းဢၼ်ၸူႉတုမ်ထမ်ႇမႃႉၵၼ်ဢေႃႈ။သူဢမ်ႇလႆႈႁဵတ်းတၢင်းႁဵတ်း။ပဵၼ်ဝၼ်းၵမ်သိၼ်ထႃႇဝရႃႉၽြႃးတီႈဢၼ်သူယူႇသူသဝ်း ၵူႈတီႈၵူႈလႅၼ်ၼၼ်ႉဢေႃႈ။
ပွႆးပၢတ်ႈသၶႃႇတင်းၶဝ်ႈမုၼ်းဢမ်ႇဢမ်ႇပႃးၸိူဝ်ႉပႅင်ႈ
၄ ၶိင်ႇမၼ်းၶႃႇမၼ်း ၵိုင်ႇတၢၼ်ႇသေယဝ်ႉပွႆးထႃႇဝရႃႉၽြႃးဢၼ်ဝႃႈ တၢင်းဢၼ်ၸူႉတုမ်ထမ်ႇမႃႉဢၼ်သူတၵ်းလႆႈၸီႇယၢင်ႇၼႂ်းမိူဝ်ႈဢၼ်ၶိင်ႇမၼ်းၶႃႇမၼ်း ထုၵ်ႇၸိူဝ်းၼၼ်ႉၸမ်း
၅ ၼႂ်းလိူၼ်ပထမသိပ်းသီႇဝၼ်းၵႃႈတီႈၶိင်ႇႁူဝ်ၶမ်ႈၼၼ်ႉ ပဵၼ်ပွႆးပႃသၶႃႇထႃႇဝရႃႉ ၽြႃးဢေႃႈ။
၆ လိုၼ်းၼၼ်ႉသိပ်းႁႃႈဝၼ်းတၵ်းလႆႈပဵၼ်ပွႆးၶဝ်ႈမုၼ်း ဢမ်ႇပႃးၸိူဝ်ႉပႅင်ႈ ပုၼ်ႈထႃႇဝရႃႉၽြႃးဢေႃႈ။ၸဵတ်းဝၼ်းတဵမ်တဵမ်သူတၵ်းလႆႈၵိၼ်ၶဝ်ႈ မုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉဢေႃႈ။
၇ ၵႃႈတီႈဝၼ်းပထမၼၼ်ႉ တၵ်းလႆႈႁဵတ်းဢၼ်ၸူႉတုမ်ထမ်ႇမႃႉၵၼ် ဢေႃႈ။သူဢမ်ႇလႆႈႁဵတ်းတၢင်းႁဵတ်းလေႃးၵီႇ။
၈ သူတၵ်းလႆႈဢဝ်တင်းၽႆး ႁဵတ်းတၢင်းပုၵ်ႉၸေႃႇတီႈထႃႇဝရႃႉၽြႃးၸဵတ်းဝၼ်းဢေႃႈ။ၵႃႈတီႈဝၼ်းသတ်ႉထမၼၼ်ႉၵေႃႈ တၵ်းလႆႈမီးတၢင်းဢၼ်ၸူႉတုမ် ထမ်ႇမႃႉၵၼ်ဢေႃႈ။သူဢမ်ႇလႆႈႁဵတ်းတၢင်းႁဵတ်းလေႃးၵီႇ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
မၢၵ်ႇဢွၼ်တၢင်းသုတ်းပိူၼ်ႈ
၉ ထႃႇဝရႃႉၽြႃး သမ်ႉမီးဢမိင်ႉတီႈမုဝ်းသေႇ လႄႈဝႃႈၸမ်း၊-
၁၀ မႂ်းသင်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆၼၼ်ႉလႄႈဝႃႈ၊-မိူဝ်ႈဢၼ်သူႁွတ်ႈထိုင်ၵႃႈတီႈမိူင်းဢၼ် ၵဝ်တၵ်းပၼ်ၼၼ်ႉလႄႈ ပၢတ်ႇၶဝ်ႈၼၼ်ႉၸိုင် သူတၵ်းလႆႈဢဝ်ႈလိုၼ်ႈၶဝ်ႈဢၼ်ပဵၼ်မၢၵ်ႇပဵၼ်ႁူင်းဢွၼ်တၢင်းၼၼ်ႉမတ်ႉၼိုင်ႈ မႃးတီႈယိတ်ႉပ ရေႃးႁိၵ်ႈဢေႃႈ။
၁၁ မၼ်းတၵ်းလႆႈဢဝ်လိုၼ်ႈၶဝ်ႈၼၼ်ႉယွင်ႊၵႂႆၵႃႈတီႈၽၢႆႇၼႃႈထႃႇဝရႃႉၽြႃး ႁႂ်ႈထုၵ်ႇၸႂ်မႅၼ်ႈၸႂ်မၼ်းၸဝ်ႈဢေႃႈ။ပူၼ်ႉဝၼ်းၵမ်သိၼ်သေယဝ်ႉၼႂ်းဝၼ်းမိူဝ်ႈၽုၵ်ႈၼၼ်ႉ ယိတ်ႉပရေႃးႁိၵ်ႈတၵ်းလႆႈ ဢဝ်လိုၼ်ႈၶဝ်ၼၼ်ႉယွင်ႊၵႂႆဢေႃႈ။
၁၂ ၵႃႈတီႈဝၼ်းဢၼ်သူဢဝ်လိုၼ်ႈၶဝ်ၼၼ်ႉ ယွင်ႊၵႂႆၼၼ်ႉသူတၵ်းလႆႈဢဝ်သူဝ်းပေႃႈဢွၼ်ႇဢၼ်ဢမ်ႇပႆႇၶွပ်ႈၶူပ်ႇ ဢၼ်ဢမ်ႇပႃးဢၢင်ႇၵႃႇလူႉၼၼ်ႉ ပုၵ်ႉၸေႃႇပုၼ်ႈယိၸ်ႉဢၼ်တုတ်ႇ ၽႆးတီႈထႃႇဝရႃႉၽြႃးဢေႃႈ။
၁၃ တၢင်းပုၵ်ႉၸေႃႇၽေႃးၸဵၼ်ႇ ဢၼ်ၸၢပ်ႈသႅင်ႇၵၼ်တင်းယိၸ်ႉၼၼ်ႉတၵ်းလႆႈပဵၼ်ၽွင်ၶဝ်ႈမုၼ်း ဢၼ်ဢဝ်ၼမ်ႉမၼ်းသႂ်ႇလေႃးၼၼ်ႉဢေႇၽႃႇသိပ်းပုၼ်ႊ ဢဝ်သွင်ပုၼ်ႊဢၼ်ဝႃႈတၢင်းပုၵ်ႉၸေႃႇ ဢၼ်ဢဝ်ၽႆးႁဵတ်းတီႈထႃႇဝရႃႉၽြႃးပုၼ်ႈဢၼ်ႁွမ်ဢၼ်ႁူၺ်းဢေႃႈ။တၢင်းပုၵ်ႉၸေႃႇဢၼ်သွၼ်းလေႃႇၸမ်း တၵ်းလႆႈပဵၼ်ၼမ်ႉၸပိတ်ႈႁီႉၼႃႉသီႇ ပုၼ်ႊဢဝ်ပုၼ်ႊၼိုင်ႈဢေႃႈ။
၁၄ ၸူဝ်ႈဢၼ်ဢမ်ႇပႆႇႁွတ်ႈထိုင်ဝၼ်းၼႆႉလႄႈသူဢမ်ႇပႆႇဢဝ်တၢင်းပုၵ်ႉၸေႃႇၽြႃးပဵၼ်ၸဝ်ႈသူမႃးယဝ်ႉၼၼ်ႉၸိုင် သူဢမ်ႇလႆႈၵိၼ်ၶဝ်ႈမုၼ်း၊ၶဝ်ႈၶူဝ်ႈ၊ မၢၵ်ႇလိပ်းႁူင်းလိပ်း။ ပဵၼ်ပိင်းၺၢပ်ႈတီႈၸူဝ်ႈလုၵ်ႈပၢၼ်လၢၼ်သူ သိုပ်ႇသိုပ်ႇတၢမ်ႈတၢမ်ႈ ၼႂ်းတီႈၵႃႈဢၼ်သူယူႇသူသဝ်းၵူႈတီႈၵူႈလႅၼ်ၼၼ်ႉဢေႃႈ။
ပွႆးၼႂ်းၸဵတ်းသတၢင်း
၁၅ပူၼ်ႉဝၼ်းၵမ်သိၼ် ဢၼ်ဢဝ်လိုၼ်ႈၶဝ်ႈပုၵ်ႉၸေႃႇယွင်ႊၵႂႆၼၼ်ႉယဝ်ႉ ၼပ်ႉဢၢၼ်ႇသတၢင်းႁႂ်ႈၸေးၸဵတ်း သတၢင်းဢေႃႈ။
၁၆ ပူၼ်ႉဝၼ်းၵမ်သိၼ်သတ်ႉတမၼၼ်ႉယဝ်ႉၼပ်ႉဢၢၼ်ႇႁႃႈသိပ်းဝၼ်းတဵမ်တဵမ်လႄႈ သူတၵ်းလႆႈသၢၵ်ႈၵၢပ်ႈတၢင်းပုၵ်ႉၸေႃႇ ၽေႃးၸဵၼ်ႇဢၼ်မႂ်ႇ တီႈထႃႇဝရႃႉၽြႃးဢေႃႈ။
၁၇ ၵႃႈၼႂ်းတီႈဢၼ်သူယူႇသဝ်းၼၼ်ႉ သူတၵ်းလႆႈဢဝ် ၶဝ်ႈမုၼ်းယွင်ႊၵႂႆသွင်ႁူၺ်ႇဢၼ်ဢဝ်တင်း ၽွင်ၶဝ်ႈမုၼ်းဢေႇၽႃႇသိပ်းပုၼ်ႊဢဝ်သွင်ပုၼ်ႊဢၼ်ပႃးတင်းၸိူဝ်ႉပႅင်ႈသေလႄႈ ႁဵတ်းၼၼ်ႉ ပုၵ်ႉၸေႃႇထႃႇဝရႃႉၽြႃး ၸိူဝ်ႉၼင်ႇပဵၼ်မၢၵ်ႇ ဢၼ်မၢၵ်ႇဢွၼ်တၢင်းၼၼ်ႉတႃႉ။
၁၈ တၵ်းလႆႈဢဝ်သူဝ်းဢွၼ်ႇဢၼ်ဢမ်ႇပႆႇၶွပ်ႈၶူပ်ႇ ဢၼ်ဢမ်ႇပႃးတူဝ်လူႉၸဵတ်းတူဝ်၊ဝူဝ်းပေႃႈဢွၼ်ႇတူဝ်ၼိုင်ႈ ပေႉပေႃႈဢွၼ်ႇသွင်တူဝ် သၢၵ်ႈၵၢပ်ႈလူၺ်ႈၵၼ်တင်းၶဝ်ႈမုၼ်းၼၼ်ႉဢေႃႈ။ ပဵၼ်တၢင်းပုၵ်ႉၸေႃႇယိၸ်ႉဢၼ်တုတ်ႇၽႆးတီႈထႃႇဝရႃႉၽြႃးဢၼ်ဝႃႈတၢင်းပုၵ်ႉၸေႃႇ ဢၼ်ဢဝ်တင်းၽႆးႁဵတ်းပုၼ်ႈဢၼ်ႁွမ်ဢၼ်ႁူၺ်း တီႈထႃႇဝရႃႉၽြႃးၼၼ်ႉလႄႈ ပႃးလူၺ်ႈၵၼ်တင်းတၢင်းပုၵ်ႉၸေႃႇၽေႃးၸဵၼ်ႇမၼ်းဢိၵ်ႇတင်း တၢင်းပုၵ်ႉၸေႃႇဢၼ် သွၼ်းလေႃႇမၼ်းႁင်းၽႂ်ႁင်းမၼ်းဢေႃႈ။
၁၉ သူတၵ်းလႆႈဢဝ်ပေႉပေႃႈဢွၼ်ႇ ပုၼ်ႈယိၸ်ႉဢၼ်ၽေႇဢပျႅတ်ႈတူဝ်ႈၼိုင်ႈဢိၵ်ႇတင်း သူဝ်းပေႃႈဢွၼ်ႇဢၼ်ဢမ်ႇပႆႇၶွပ်ႈၶူပ်ႇပုၼ်ႈယိၸ်ႉမိၵ်ႉသႁႃႇယႃႉသွင်တူဝ် ပုၵ်ႉၸေႃႇ လႄႈ
၂၀ ယိတ်ႉပရေႃးႁိၵ်ႈ တၵ်းလႆႈဢဝ်ယွင်ႊၵႂႆလူၺ်ႈၵၼ်တင်းၶဝ်ႈမုၼ်း မၢၵ်ႇဢၼ်မၢၵ်ႇဢွၼ်တၢင်းၼၼ်ႉလႄႈ ပႃးသူဝ်းပေႃႈဢွၼ်ႇသွင်တူဝ်ၼၼ်ႉသေလႄႈႁဵတ်းတၢင်းပုၵ်ႉၸေႃႇဢၼ်ယွင်ႊၵႂႆၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ၸိူဝ်းၼၼ်ႉတၵ်းလႆႈပဵၼ်ဢၼ်မူတ်းၸၢင်ႇ ၵႃႈတီႈၽၢႆႇၼႃႈထႃႇဝရႃႉၽြႃး ပုၼ်ႈ ယိတ်ႉပရေႃးႁိၵ်ႈၼၼ်ႉဢေႃႈ။
၂၁ ၼႂ်းဝၼ်းၼၼ်ႉၵေႃႈသူတၵ်းလႆႈၸီႇယၢင်ႇ ႁႂ်ႈမီးတၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။ သူဢမ်ႇလႆႈႁဵတ်းတၢင်းႁဵတ်းလေႃးၵီႇ။ပဵၼ်ပိင်းၺၢပ်ႈ ဢၼ်ၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်ႈတၢမ်ႈ ၵႃႈၼႂ်းတီႈဢၼ်သူယူႇသူသဝ်းၵူႈ တီႈၵူႈလႅၼ်ၼၼ်ႉတႃႇသေႇဢေႃႈ။
၂၂ မိူဝ်ႈဢၼ်သူပၢတ်ႇၶဝ်ႈဢၼ်ဢွၵ်ႇၵႃႈတီႈလိၼ်သူၼၼ်ႉၸိုင် ဢမ်ႇလႆႈပၢတ်ႈ ၵႃႈတီႈၸွၵ်ႉၼႃးၸဵင်ႇၼႃး မူတ်းမူတ်းသဵင်ႈသဵင်ႈ။ သူဢမ်ႇလႆႈၶိုၼ်းလႄႇၵဵပ်းသိမ်းဢဝ်ဢၼ်တူၵ်းဢၼ်ႁူင်ႈ ၵႃႈတီႈဢၼ်ပၢတ်ႇသိမ်းဢဝ်ယဝ်ႉၼၼ်ႉ။တၵ်းလႆႈႁႂ်ႈၵိုတ်းႁႂ်ႈၵျၢၼ်ႇဝႆႉ ပုၼ်ႈၵူၼ်းယၢၵ်ႈၵူၼ်းၽၢၼ်ဢိၵ်ႇတင်းၶႅၵ်ႇဢႃႇၵၼ်ႇတူႉဢေႃႈ။ၵဝ်ပဵၼ်ထႃႇဝရႃႉၽြႃး၊ၽြႃးပဵၼ်ၸဝ်ႈသူဢေႃႈ၊ ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
ပွႆးပဝ်ႇၼႄးၶရႃႇ
၂၃ ထႃႇဝရႃႉၽြႃး သမ်ႉမီးဢမိင်ႉတီႈမုဝ်းသေႇ လႄႈဝႃႈၸမ်း၊-
၂၄ မႂ်းသင်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-လိူၼ်သတ်ႉတမ၊ဝၼ်းပထမၼၼ်ႉတၵ်းလႆႈပဵၼ်ဝၼ်းဢၼ် တၵ်းလႆႈယူႇၼိမ်ၼိမ်လီလီဝၼ်းဢၼ်တၵ်းလႆႈႁဵတ်း တၢင်းဢၼ်ပဝ်ၼႄးၶရႃႇပုၼ်ႈဢၼ် မၼ်းၸဝ်ႈ တၵ်းၶုၵ်းၸႂ်လႆႈၶႆႈၸႂ်ထူပ်းဝၼ်းဢၼ်ႁဵတ်း တၢင်းဢၼ်ၸူႉတုမ် ထမ်ႇမႃႉၵၼ် ဢေႃႈ။
၂၅ သူဢမ်ႇလႆႈႁဵတ်းတၢင်းႁဵတ်းလေႃးၵီႇ။ သူတၵ်းလႆႈသၢၵ်ႈၵၢပ်ႈပုၵ်ႉၸေႃႇဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးဢေႃႈဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
ဝၼ်းဢၼ်ၽေႇဢပျႅတ်ႈ
၂၆ ထႃႇဝရႃႉၽြႃး သမ်ႉမီးဢမိင်ႉတီႈမုဝ်းသေႇ လႄႈဝႃႈ ၸမ်း၊-
၂၇ လိူၼ်သတ်ႉတမဝၼ်းတႃႉသမၼၼ်ႉၵေႃႈပဵၼ်ဝၼ်းဢၼ်ၽေႇဢပျႅတ်ႈဝၼ်းဢၼ်ႁဵတ်းတၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။သူတၵ်းလႆႈၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်ဢေႃႈ။သူတၵ်းလႆႈသၢၵ်ႈၵၢပ်ႈတၢင်းပုၵ်ႉၸေႃႇ ဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃး ဢေႃႈ။
၂၈ ၼႂ်းဝၼ်းၼၼ်ႉသူဢမ်ႇလႆႈႁဵတ်းတၢင်းႁဵတ်းလႃးလႃး။ လွင်ႈမၼ်းၸမ်းပဵၼ်ဝၼ်းဢၼ်ၽေႇဢပျႅတ်ႈ ဢၼ်တၵ်းလႆႈႁဵတ်းတၢင်းဢၼ်ၽေႇဢပျႅတ်ႈပုၼ်ႈသူၵႃႈတီႈၽၢႆႇၼႃႈထႃႇဝရႃႉၽြႃး ၽြႃးပဵၼ် ၸဝ်ႈသူဢေႃႈ။
၂၉ ၵေႃႉဢၼ်ဢမ်ႇၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်ၼႂ်းဝၼ်းၼၼ်ႉၸမ်း တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။
၃၀ ၵေႃႉဢၼ်ႁဵတ်းတၢင်းႁဵတ်း သေၸိူဝ်ႉသေပိူင်ၼႂ်းဝၼ်းၼၼ်ႉၵဝ်တၵ်းပႄႇပႅတ်ႈသေ ၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။
၃၁ သူဢမ်ႇလႆႈႁဵတ်းတၢင်းႁဵတ်းလႃးလႃး။ပဵၼ်ပိင်းၺၢပ်ႈၸဝ်ႈတီႈၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်ႈတၢမ်ႈၵႃႈၼႂ်းတီႈၵႃႈဢၼ်သူယူႇသူသဝ်း ၵူႈတီႈၵူႈ လႅၼ်ၼၼ်ႉတႃႇသေႇဢေႃႈ။
၃၂ ဝၼ်းၼၼ်ႉပဵၼ်ဝၼ်းၵမ်သိၼ်ဢၼ်တၵ်းလႆႈယူႇၼိမ်ၼိမ်လီလီ ဝၼ်းဢၼ်တၵ်းလႆႈၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်ဢေႃႈ။ႁူဝ်ၶမ်ႈဝၼ်းၼဝမ ၼၼ်ႉၸႃႉၸဵမ်ႁူဝ်ၶဝ်ႈဝၼ်းၼၼ်ႉတေႃႇထိုင်ႁွတ်ႈႁူဝ်ၶမ်ႈဝၼ်းမိူဝ်ႈၽုၵ်ႈသူတၵ်းလႆႈပႂ်ႉဝၼ်းၵမ်သိၼ်ဢေႃႈ၊ဝႃႈၼင်ႇၼႆဢေႃႈ။
ပွႆးသုမ်ႉထဵင်ၸဝ်ႈ
၃၃ ထႃႇဝရႃႉၽြႃး သမ်ႉမီးဢမိင်ႉတီႈမုဝ်းသေႇ လႄႈဝႃႈၸမ်း၊-
၃၄ မႂ်းသင်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-ၸႃႉၸဵမ်လိူၼ်သတ်ႉတမသိပ်းႁႃႈဝၼ်းၼၼ်ႉၸဵတ်းဝၼ်းတဵမ်တဵမ် တၵ်းလႆႈပဵၼ်ပွႆးႁဵတ်း သုမ်ႉထဵင်ပုၼ်ႈထႃႇဝရႃႉၽြႃးဢေႃႈ။
၃၅ ၵႃႈတီႈဝၼ်းပထမၼၼ်ႉတၵ်းလႆႈႁဵတ်း တၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။ သူဢမ်ႇလႆႈႁဵတ်းတၢင်းႁဵတ်းလေႃးၵီႇ။
၃၆ ၸဵတ်းဝၼ်းတဵမ်တဵမ် သူတၵ်းလႆႈသၢၵ်ႈၵၢပ်ႈတၢင်းပုၵ်ႉၸေႃႇ ဢၼ်ဢဝ်ၽႆးႁဵတ်းတီႈထႃႇဝရႃႉၽြႃးၼၼ်ႉဢေႃႈ။ၵႃႈတီႈဝၼ်းဢႃႉထမၼၼ်ႉၵေႃႈတၵ်းလႆႈႁဵတ်းတၢင်းဢၼ်ၸူႉတုမ်ထမ်ႇမႃႉၵၼ်လႄႈ သၢၵ်ႈၵၢပ်ႈတၢင်းပုၵ်ႉၸေႃႇ ဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးၼၼ်ႉဢေႃႈ။ပဵၼ်တၢင်းဢၼ်ၸူႉၵၼ်တုမ်ၵၼ်ဢၼ်ပဵၼ်တီႈသုတ်းတီႈၵွႆပွႆးလႄႈ သူဢမ်ႇလႆႈႁဵတ်းတၢင်းႁဵတ်းလေႃးၵီႇ။
၃၇ ဢၼ်ၼႆႉၸမ်း ပဵၼ်ပွႆးထႃႇဝရႃႉၽြႃးဢၼ်သူတၵ်းလႆႈၸီႇယၢင်ႇ ႁႂ်ႈပဵၼ်တၢင်းဢၼ်ၸူႉတုမ် ထမ်ႇမႃႉၵၼ်လွင်ႈ ၼင်ႇႁိုဝ်တၵ်းလႆႈႁဵတ်းတၢင်းပုၵ်ႉၸေႃႇဢၼ်ဢဝ်တင်းၽႆးႁဵတ်း တီႈထႃႇဝရႃႉၽြႃး ယိၸ်ႉဢၼ်တုတ်ႇၽႆးတၢင်းပုၵ်ႉၸေႃႇၽေႃးၸဵၼ်ႇ တၢင်းဢၼ်ပုၵ်ႉၸေႃႇယိၸ်ႉ တၢင်းပုၵ်ႉၸေႃႇဢၼ်သွၼ်းလေႃႇၼႂ်း မိူဝ်ႉဝၼ်းႁင်းၽႂ်ႁင်းမၼ်းၼၼ်ႉၸိူဝ်းၼၼ်ႉ
၃၈ ဢၼ်ၼွၵ်ႈသဝေၼ်းၵမ်သိၼ်ထႃႇဝရႃႉၽြႃး လႂ် တႃႇၼႃႉတၢင်းဢၼ်သူလူႇ လႂ်တၢင်းဢၼ်ပုၵ်ႉၸေႃႇဢၼ်ၸၢပ်ႈသႅင်ႇၵၼ်တင်း ၵတိသႅတ်ႉၸႃႇ လႂ် တၢင်းပုၵ်ႉၸေႃႇဢၼ်ႁဵတ်းၸွမ်းၸႂ်ၸေႇတၼႃႇ လႂ် ဢၼ်လႆႈသၢၵ်ႈၵၢပ်ႈတီႈထႃႇဝရႃႉၽြႃးၸိူဝ်းၼၼ်ႉဢေႃႈ။
၃၉ ၼွၵ်ႈသေၼၼ်ႉလိူၼ်သတ်ႉတမသိပ်းႁႃႈဝၼ်းၼၼ်ႉ မိူဝ်ႈဢၼ်သူသိမ်းဢဝ်မၢၵ်ႇလိၼ်ႁူင်းလိၼ်ယဝ်ႉၼၼ်ႉ သူတၵ်းလႆႈၶၢမ်ႇပွႆးတီႈထႃႇဝရႃႉၽြႃး ၸဵတ်းဝၼ်းတဵမ်တဵမ်ဢေႃႈ။ဝၼ်းပထမတၵ်းလႆႈပႂ်ႉၵမ်သိၼ်ဢၼ်တၵ်းလႆႈယူႇၼိမ်ၼိမ်လီလီဢေႃႈ။ ဝၼ်းဢႃႉထမၼၼ်ႉၵေႃႈတၵ်းလႆႈပႂ်ႉၵမ်သိၼ် ဢၼ်တၵ်းလႆႈယူႇၼိမ်ၼိမ်လီလီ ဢေႃႈ။
၄၀ ၵႃႈတီႈဝၼ်းပထမၼၼ်ႉသူတၵ်းလႆႈဢဝ်မၢၵ်ႇမႆႉမၢၵ်ႇတွၵ်ႇဢၼ်လီဢၼ်ငၢမ်း လႂ်၊မႂ်ႊထၢၼ်း လႂ် ၵိင်ႇၵႃႈဢၼ်ၽိူဝ်ၼႃၽိူဝ်ပူင်း လႂ်တင်းတူၼ်ႈမူဝ်းမၶဢၼ်မီးၵႃႈႁိမ်းၼမ်ႉႁွင်ႈၼမ်ႉၵႄး လႂ် ၸိူဝ်းၼၼ်ႉသေလႄႈ ဢွၼ်ၵၼ်ႁဵတ်းတၢင်းဢၼ်သႂၢင်ႇသိူဝ်းၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈသူၸဵတ်း ဝၼ်းတဵမ်တဵမ်ဢေႃႈ။
၄၁ ပွႆးၸဝ်ႈၼၼ်ႉၸိုင်သူတၵ်းလႆႈၶၢမ်ႇပုၼ်ႈထႃႇဝရႃႉၽြႃး ၼႂ်းယေႈပီႊၸဵတ်းဝၼ်းတဵမ်တဵမ်ဢေႃႈ။ပဵၼ်ပိင်းၺၢပ်ႈၸဝ်ႈတီႈၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်ႈတၢမ်ႈၼၼ်ႉ တႃႇသေႇဢေႃႈ။ ပွႆးၸဝ်ႈၼၼ်ႉၸိုင်သူတၵ်းလႆႈၶၢမ်ႇၵႃႈတီႈ လိူၼ်သတ်ႉတမဢေႃႈ။
၄၂ လွင်ႈၼင်ႇႁိုဝ်ၵူၼ်းမဵဝ်းၸိူဝ်ႉၶိူဝ်းသူသိုပ်ႇသိုပ်ႇတၢမ်ႈတၢမ်ႈၸိူဝ်းၼၼ်ႉ တၵ်းလႆႈႁူႉလႆႈမၢတ်ႈ လွင်ႈဢၼ်ၵဝ်ႁႂ်ႈၵူၼ်းမဵဝ်းဢိသရေႇလတင်းလၢႆယူႇၵႃႈၼႂ်းသုမ်ႉၼႂ်းထဵင် ၼႂ်းမိူဝ်ႈဢၼ်ၵဝ်ၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်းဢေႇၵိပ်ႉတုမႃးၼၼ်ႉၸိုင် သူတၵ်းလႆႈယူႇၵႃႈၼႂ်းသုမ်ႉၼႂ်းထဵင်ဢေႃႈ။
၄၃ ၵူၼ်းမဵဝ်းၸိူဝ်ႉၶိူဝ်းဢိသရေႇလ တင်းသဵင်ႈတင်းလူင်တၵ်းလႆႈဢွၼ်ၵၼ်ယူႇၵႃႈၼႂ်းသုမ်ႉၼႂ်းထဵင် ၸဵတ်းဝၼ်းတဵမ်တဵမ်ဢေႃႈ။ၵဝ်ပဵၼ်ထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၄၄ မုဝ်းသေႇ ၵေႃႈၶိုၼ်းလၢတ်ႈလွင်ႈပွႆး ထႃႇဝရႃႉၽြႃးၸိူဝ်းၼၼ်ႉတီႈၵူၼ်းမဵဝ်းဢိသရေႇလ တင်းလၢႆဢေႃႈ။