Chapter
၁၉
ပိင်းၺၢပ်ႈၵူႈမဵဝ်းမဵဝ်း
၁ ထႃႇဝရႃႉၽြႃးသမ်ႉမီးဢမိင်ႉတီႈ မုဝ်းသေႇ လႄႈဝႃႈ ၸမ်း၊-
၂ သင်ႇလၢတ်ႈဝႆႉတီႈပရိၵ်ႈသၢတ်ႈၵူၼ်းမဵဝ်းဢိသရေႇလၼၼ်ႉလႄႈဝႃႈ၊- ၵွပ်ႈပိူဝ်ႈဢၼ်ၵဝ်ထႃႇဝရႃႉၽြႃးၽြႃးပဵၼ်ၸဝ်ႈသူမူတ်းၸၢင်ႇလႄႈ သူၵေႃႈတၵ်း လႆႈမီးတၢင်းဢၼ်မူတ်းၸၢင်ႇဢေႃႈ။
၃ သူၵူႈၵေႃႉၵူႈၵူၼ်းတၵ်းလႆႈဢွၼ်ၵၼ် ရူဝ်ႇသေႇၵူဝ်ယမ် ပေႃႈမေႈသူဢေႃႈ။ ဝၼ်းၵမ်သိၼ်ၵဝ်တင်းလၢႆၵေႃႈသူတၵ်းလႆႈဢွၼ်ၵၼ်ပႂ်ႉဢေႃႈ။
၄ သူဢမ်ႇလႆႈဝေႈၵႂႃႇလႄႈ သုတ်ႉၸပ်းသုတ်ႉၸူးတီႈရုၵ်ႉထူႉသၢင်းထူႉ။သူဢမ်ႇလႆႈသွၼ်းလေႃႇႁဵတ်းၽြႃးပုၼ်ႈသူ။ ၵဝ်ပဵၼ်ထႃႇဝရႃႉၽြႃး၊ၽြႃးပဵၼ်ၸဝ်ႈသူဢေႃႈ။
၅ ပေႃးသူပုၵ်ႉၸေႃႇယိၸ်ႉမိၵ်ႉသႁႃႇယႃႉ တီႈထႃႇဝရႃႉၽြႃးၸိုင် သူတၵ်းလႆႈပုၵ်ႉၸေႃႇႁႂ်ႈထုၵ်ႇၸႂ်မႅၼ်ႈၸႂ် မၼ်းၸဝ်ႈဢေႃႈ။
၆ တၵ်းလႆႈၵိၼ်ၼႂ်းဝၼ်းဢၼ်ပုၵ်ႉၸေႃႇဢိၵ်ႇတင်းၼႂ်းဝၼ်းမိူဝ်ႈၽုၵ်ႈၼၼ်ႉဢေႃႈ။ပေႃးၵိုတ်းၵျၢၼ်ႇသေဢိတ်းသေဢီႈ တေႃႇထိုင်ႁွတ်ႈဝၼ်းတတိယၸိုင် တၵ်းလႆႈဢဝ်တုတ်ႇၽႆးပႅတ်ႈသေဢေႃႈ။
၇ ၼႂ်းဝၼ်းတတိယၼၼ်ႉ ပေႃးၵိၼ်သေဢိတ်းသေဢီႈၸိုင်ပဵၼ်ဢၼ်လီႁင်ႈဢဵတ်ႇသဵတ်ႇဢေႃႈ။ဢမ်ႇထုၵ်ႇ ၸႂ်မႅၼ်ႈၸႂ်မၼ်းၸဝ်ႈ။
၈ ၵေႃႉဢၼ်ၵိၼ်ၼၼ်ႉၵွပ်ႈပိူဝ်ႈမၼ်းၶျႃးၶိူင်ႈပိူင် ဢၼ်မူတ်းၸၢင်ႇထႃႇဝရႃႉၽြႃးတူၵ်းတီႈတႅမ်ႇလႄႈ မၼ်းတၵ်းလႆႈၶၢမ်ႇဢပျႅတ်ႈတူဝ်ၸဝ်ႈၵဝ်ႇဢေႃႈ။ၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ပႄႇ ပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။
၉ မိူဝ်ႈဢၼ်သူပၢတ်ႇၶဝ်ႈဢၼ်ဢွၵ်ႇၵႃႈတီႈလိၼ်သူၼၼ်ႉၸိုင် မႂ်းဢမ်ႇလႆႈပၢတ်ႇ ၵႃႈတီႈၸွၵ်ႉၼႃးၸဵင်ႇၼႃးတင်းလၢႆမူတ်းမူတ်းသဵင်ႈသဵင်ႈ။မႂ်းဢမ်ႇလႆႈၶိုၼ်းလႄႇၵဵပ်းဢဝ်သိမ်းဢဝ် ဢၼ်တူၵ်းဢၼ်ႁူင်ႈၵႃႈတီႈဢၼ်သိမ်းဢဝ် ယဝ်ႉၼၼ်ႉ။
၁၀ သူၼ်မၢၵ်ႇၸပိတ်ႈမႂ်းၵေႃႈမႂ်းဢမ်ႇလႆႈၶိုၼ်း သေႇသိမ်းဢဝ်မၢၵ်ႇမၼ်းမူတ်းမူတ်းသဵင်ႈသဵင်ႈ။မႂ်းဢမ်ႇလႆႈၵဵပ်းလႆႈဢဝ် မၢၵ်ႇဢၼ်တူၵ်းဢၼ်ႁူင်ႈ ၼၼ်ႉ။
၁၁ မၢၵ်ႇၸိူဝ်းၼၼ်ႉၸိုင်မႂ်းတၵ်းလႆႈႁႂ်ႈၵိုတ်းၵျၢၼ်ႇဝႆႉပုၼ်ႈၵူၼ်းယၢၵ်ႈၵူၼ်းၽၢၼ်တင်း ၶႅၵ်ႇဢႃႇၵၼ်ႇတူႉဢေႃႈ။ ၵဝ်ၼႆႉပဵၼ်ထႃႇဝရႃႉၽြႃး၊ၽြႃးပဵၼ်ၸဝ်ႈသူ ဢေႃႈ။
၁၂ သူဢမ်ႇလႆႈလၵ်ႉဢဝ်ဢုၵ်ႉၸႃႇပိူၼ်ႈ။ဢမ်ႇလႆႈပႅတ်ႉလႆႈလႅၼ်ပိူၼ်ႈ။ၵေႃႉၼိုင်ႈလႄႈၵေႃႉၼိုင်ႈဢမ်ႇလႆႈလၢတ်ႈၵႂၢမ်းမူႉသႃႇတေႃႇၵၼ်။ယင်းဢမ်ႇၸိုဝ်ႈဢမ်ႇၸႂ်ႈလႄႈ သူဢမ်ႇလႆႈဢဝ်ၼႃႇမႃႉၸိုဝ်သဵင်ၵဝ်ႁဵတ်းတၢင်းဢၼ်ၵိၼ်ႇဢၼ်ဝႃႈ။ ဢမ်ႇလႆႈဢဝ်ၼႃႇမႃႉၸိုဝ်သဵင်ၽြႃးပဵၼ်ၸဝ်ႈမႂ်း ၶျႃးတူၵ်းတီႈတႅမ်ႇၸိူဝ်ႉၼင်ႇၼၼ်။ၵဝ်ပဵၼ်ထႃႇဝရႃႉၽြႃးဢေႃႈ။
၁၃ ဢုၵ်ႉၸႃႇၶူဝ်းလဵင်း ၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉၸိုင် မႂ်းဢမ်ႇလႆႈႁဵတ်းဢၼ်ဢမ်ႇတြႃးသေလႄႈသိမ်းဢဝ်။ဢမ်ႇလႆႈႁဵတ်းပႄႉႁဵတ်းၼႅင်ႇသေလႄႈႁိမ်ဢဝ်။ၵႃႈၸၢင်ႈၵႃႈငႃးဢၼ်ၵူၼ်းၵိၼ်ၸၢင်ႈၵိၼ်ငႃး ထုၵ်ႇလႆႈၶၢမ်ႇဢဝ်ၼၼ်ႉဢမ်ႇလႆႈမီးဝႆႉယူႇတီႈမႂ်းတင်းၶိုၼ်းတေႃႇထိုင်ႁွတ်ႈၶိင်ႇၵၢင်ၼႂ်။ မႂ်းဢမ်ႇလႆႈ ၵိၼ်ႇလႆႈလႃႇၵူၼ်းႁူၼူၵ်ႇ။
၁၄ မႂ်းဢမ်ႇလႆႈဢဝ်ဢၼ်တၵ်းတိူဝ်ႉမႅၼ်ႈလႄႈ လူမ်ႉၼၼ်ႉဝႆႉၵႃႈတီႈၽၢႆႇၼႃႈၵူၼ်းတႃႇမွတ်ႇ။မႂ်းတၵ်းလႆႈၵူဝ်ႁႄၽြႃးပဵၼ်ၸဝ်ႈမႂ်း ဢေႃႈ။
၁၅ ၵဝ်ပဵၼ်ထႃႇဝရႃႉၽြႃးဢေႃႈ။သူဢမ်ႇလႆႈၸွမ်းဢၼ်ဢမ်ႇတြႃးၼၼ်ႉသေလႄႈ ၸီႇယၢင်ႇၼႂ်းဢမူႉဢၼ်ထူပ်းတြႃးၼၼ်ႉ။ဢမ်ႇလႆႈၸွင်ႇပင်းလူၼႃႈၵေႃႉဢၼ်ယၢၵ်ႈဢၼ်ၽၢၼ်ၼၼ်ႉ။ဢမ်ႇလႆႈထွၵ်ႈလူၺ်ႈၼႃႈၵေႃႉဢၼ်ယႂ်ႇဢၼ်လူင်ၼၼ်ႉ။တၵ်းလႆႈၸီႇယၢင်ႇၸွမ်းၼင်ႇတြႃး တီႈၵူၼ်းဢၼ်ၸၢပ်ႈသႅင်ႇၵၼ် တင်းမႂ်းၼၼ်ႉဢေႃႈ။
၁၆ မႂ်းဢမ်ႇလႆႈပဵၼ်ၵေႃႉဢၼ်ၸၢင်ႊၶႃႉၸိုဝ်ႈၶၢႆသဵင်ၼၼ်ႉသေလႄႈၵႂႃႇၵႂႃႇမႃးမႃး ၵႃႈၼႂ်းၵူၼ်းမဵဝ်းမႂ်းတင်းလၢႆ။ ဢမ်ႇလႆႈၵျၢမ်ႇလႆႈပွင်ႁႂ်ႈၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉလႆႈတၢႆ။ၵဝ်ပဵၼ် ထႃႇဝရႃႉၽြႃးဢေႃႈ။
၁၇ မႂ်းဢမ်ႇလႆႈမီးၸႂ်ဢၼ်မူမ်ႇတၢင်းၽိတ်းပီႈၼွင်ႉမႂ်းဝႆႉ။ဢမ်ႇလႆႈႁပ်ႉဢဝ်ပႃးဢဝ်ဢပျႅတ်ႈ ၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉလႄႈတၵ်းလႆႈသင်ႇသွၼ်သုင်းမႃႉပၼ်မၼ်း မၢၼ်ႇမၢၼ်ႇ မႅၼ်ႈမႅၼ်ႈဢေႃႈ။
၁၈ ပေႃးၵူၼ်းၶိူဝ်းလဵဝ်ၵၼ်တင်းမႂ်းၽိတ်းပိူင်ႈမႂ်းၸိုင် မႂ်းဢမ်ႇလႆႈၶိုၼ်းတွပ်ႇတႅၼ်းပၼ်ဢပျႅတ်ႈတီႈမၼ်း။ဢမ်ႇလႆႈဝႆႉတၢင်းၽိတ်းမၼ်းၼႂ်းၸႂ်။ ၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉၸိုင်မႂ်းတၵ်းလႆႈႁၵ်ႉ မိူၼ်ၸိူဝ်ႉၼင်ႇႁၵ်ႉတူဝ်ၸဝ်ႈၵဝ်ႇၼၼ်ႉဢေႃႈ။
၁၉ ၵဝ်ပဵၼ်ထႃႇဝရႃႉၽြႃးဢေႃႈ။ သူတၵ်းလႆႈပႂ်ႉပိင်းၺၢပ်ႈတြႃးၵဝ်ဢေႃႈ။မႂ်းတၵ်းဢမ်ႇလႆႈႁႂ်ႈတရိၵ်ႈသၢၼ်ႇမႂ်း ဢၼ်မဵဝ်းပႅၵ်ႇပိူင်ႈၵၼ်ၼၼ်ႉလႆႈၶိုၼ်ႈၵၼ်ဝၢင်ၵၼ်။ဢမ်ႇလႆႈဢဝ်ၸိူဝ်ႉၽၼ်းဢၼ်ပႅၵ်ႇပိူင်ႈၵၼ်ၼၼ်ႉဝၢၼ်ႇပိုၼ်လူၺ်ႈၵၼ်ၵႃႈၼႂ်းႁႆႊမႂ်းၼႃးမႂ်း။ဢမ်ႇလႆႈၼုင်ႈ ၶူဝ်းဢၼ်ဢဝ်သွင်ၸိူဝ်ႉသွင်မဵဝ်းလေႃးၵၼ် သေလႄႈတေႃးႁဵတ်းၼၼ်ႉ။
၂၀ ပေႃးသေၵေႃႉသေၵူၼ်းၼွၼ်းလူၺ်ႈၵၼ်တင်းၶႃႈမေႈယိင်း ဢၼ်ပိူၼ်ႈမၢႆဝႆႉဢၼ်ဢမ်ႇပႆႇထုတ်ႇပႆႇလွတ်ႈၼၼ်ႉၸိုင် သွင်ၶႃတၵ်းလႆႈၶၢမ်ႇတၢမ်ႇဢပျႅတ်ႈဢေႃႈ။ပိူဝ်ႈဢၼ်မၼ်းပဵၼ်ၶႃႈဢၼ်ဢမ်ႇပႆႇထုတ်ႇပႆႇလွတ်ႈၼၼ်ႉလႄႈ သွင်ၶႃတၵ်း လႆႈလွတ်ႈသေတၢင်းဢၼ်ဢဝ်တၢႆဢေႃႈ။
၂၁ ၵူၼ်းၸၢႆးၼၼ်ႉ တၵ်းလႆႈဢဝ်ယိၸ်ႉဢၼ်ၽေႇတူႉၸရိူၵ်ႈဢၼ်ပဵၼ်သူဝ်းပေႃႈတူဝ်ၼိုင်ႈ မႃးၵႃႈတီႈထႃႇဝရႃႉၽြႃးၵႃႈႁိမ်းၽၵ်းတူသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈ သၢတ်ႈဢေႃႈ။
၂၂ ယိတ်ႉပရေႃးႁိၵ်ႈတၵ်းလႆႈဢဝ်သူဝ်းပေႃႈယိၸ်ႉ ဢၼ်ၽေႇတူႉၸရိူၵ်ႈၼၼ်ႉ ႁဵတ်းတၢင်းဢၼ်ၽေႇဢပျႅတ်ႈ ပုၼ်ႈဢၼ်မၼ်းႁဵတ်းၼၼ်ႉပုၼ်ႈမၼ်းၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ မၼ်းၼၼ်ႉ တၵ်းႁွတ်ႈထိုင်တၢင်းဢၼ် လွတ်ႈဢပျႅတ်ႈ ဢၼ်မၼ်းႁဵတ်းၼၼ်ႉဢေႃႈ။
၂၃ မိူဝ်ႈဢၼ်သူႁွတ်ႈထိုင်ၵႃႈတီႈမိူင်းၼၼ်ႉလႄႈ ၽုၵ်ႇသွမ်ႈတူၼ်ႈဢၼ်လီၵိၼ်လီၶူပ်းၵူႈၸိူဝ်ႉၵူႈပိူင်ယဝ်ႉၼၼ်ႉၸိုင် တၵ်းလႆႈမၢတ်ႈမၢၵ်ႇဢၼ်မၢၵ်ႇၸိူဝ်းၼၼ်ႉ ပဵၼ်ၸိူဝ်ႉၼင်ႇတၢင်းဢၼ်ဢမ်ႇထိူဝ်ႁိမ်းဢေႃႈ။သၢမ်ပီႊတဵမ်တဵမ်တၵ်းလႆႈပဵၼ်ၸိူဝ်ႉၼင်ႇတၢင်းဢၼ်ထိူဝ်ႁိမ်းၼၼ်ႉတီႈသူဢေႃႈ။
၂၄ ဢမ်ႇလႆႈၵိၼ်မၢၵ်ႇၸိူဝ်းၼၼ်ႉ။ၼႂ်းပီႊၸတုၵ်ႉထၼၼ်ႉမၢၵ်ႇဢၼ်မၢၵ်ႇၵႃႈမီးၼၼ်ႉၸိုင် တၵ်းလႆႈမူတ်းၸၢင်ႇလႄႈပဵၼ်ပုၼ်ႈဢၼ်တၵ်းယွင်ႈယေႃးၵျေးၸူးထႃႇ ဝရႃႉၽြႃးဢေႃႈ။
၂၅ ၼႂ်းပီႊပိၼ်ႇၸမၼၼ်ႉသူတၵ်းလႆႈၵိၼ်မၢၵ်ႇဢၼ်မၢၵ်ႇၸိူဝ်းၼၼ်ႉဢေႃႈ။ပေႃးႁဵတ်းၸိူဝ်ႉၼင်ႇၼၼ်ၸိုင်တူၼ်ႈၸိူဝ်းၼၼ်ႉယိင်ႈၶႅၼ်းတၵ်းမၢၵ်ႇၼႃႇဢေႃႈ။ၵဝ်ပဵၼ်ထႃႇဝရႃႉၽြႃး၊ၽြႃး ပဵၼ်ၸဝ်ႈသူဢေႃႈ။
၂၆ သူဢမ်ႇလႆႈၵိၼ်ၼိူဝ်ႉဢၼ်ပႃးလိူတ်ႈ။ သူဢမ်ႇလႆႈပွင်လႆႈႁဵတ်းတၢင်းၸၢင်ႊတၢင်း မေႃဢၼ်ဢမ်ႇလီဢမ်ႇငၢမ်းၼၼ်ႉ။
၂၇ သူဢမ်ႇလႆႈလူလႆႈတူၺ်းပေႇတၢင်ႇၵႃႇလႃး။သူဢမ်ႇလႆႈထႃၶူၼ်ႁူဝ်သူလဵပ်ႈႁွပ်ႈၵႃႈတီႈႁိမ်းၵွၵ်းႁူဝ်သူ ႁဵတ်းႁႂ်ႈမၼ်းမုၼ်းဝႆႉ။
၂၈ ၼူတ်ႇၵၢင်းၵေႃႈ သူဢမ်ႇလႆႈထႃႁဵတ်းႁႂ်ႈမၼ်းမုၼ်းဝႆႉ။ၵွပ်ႈပိူဝ်ႈၵူၼ်းတၢႆလႄႈ သူဢမ်ႇလႆႈထိူဝ်လႆႈၽၼ်းၼိူဝ်ႉသူၼင်သူ။သူဢမ်ႇလႆႈသမ်းမိုၵ်ႉတီႈတူဝ်သူ။ ၵဝ်ပဵၼ်ထႃႇဝရႃႉၽြႃးဢေႃႈ။မႂ်းဢမ်ႇလႆႈဢဝ်လုၵ်ႈယိင်းမႂ်း ၶျႃးတူၵ်းတီႈတႅမ်ႇႁႂ်ႈလႆႈပဵၼ်မေႈမွၵ်ႇယႃႈ။
၂၉ ပေႃးႁဵတ်းၸိူဝ်ႉၼင်ႇၼၼ်ၸိုင် တင်းဝၢၼ်ႈတင်းမိူင်းတၵ်းဢွၼ်ၵၼ်ၸွမ်းမေႇထုင်ႇဢၼ်ဢမ်ႇတြႃးလႄႈ တဵမ်ဝႆႉတင်းလွင်ႈတၢင်းဢၼ်ဢမ်ႇတြႃးဢေႃႈ။
၃၀ သူတၵ်းလႆႈပႂ်ႉၵမ်ပႂ်ႉၸွမ်းဝၼ်းၵမ်သိၼ်ၵဝ်တင်းလၢႆလႄႈ ရူဝ်ႇသေႇ ၵူဝ်ယမ်ထႃႇၼႃႉတီႈမူတ်းၸၢင်ႇၵဝ်ဢေႃႈ။
၃၁ ၵဝ်ပဵၼ်ထႃႇဝရႃႉၽြႃးဢေႃႈ။သူဢမ်ႇလႆႈဝေႈၵႂႃႇလႄႈသုတ်ႉၸပ်းသုတ်ႉၸူးၵႃႈတီႈၶဝ်ၸိူဝ်းဢၼ်ၽီၶဝ်ႈၼၼ်ႉဢိၵ်ႇတင်းၶဝ်ၸိူဝ်းဢၼ်ႁဵတ်းၽိူဝ်ႉၼၼ်ႉ။သူဢမ်ႇလႆႈသွၵ်ႈလႆႈႁႃၶဝ်ၼၼ်ႉလႄႈ ႁႂ်ႈတူဝ်သူလႆႈၵူဝ်ႈလႆႈၵိူၵ်ႇ။
၃၂ ၵဝ်ပဵၼ်ထႃႇဝရႃႉၽြႃး၊ၽြႃးပဵၼ်ၸဝ်ႈသူဢေႃႈ။ မႂ်းတၵ်းလႆႈ လုၵ်ႉၸုၵ်းၵႃႈတီႈၽၢႆႇၼႃႈၵေႃႉဢၼ်ၶူၼ်ႁူဝ်ႁွၵ်ႇၼၼ်ႉဢေႃႈ။မႂ်းတၵ်းလႆႈရူဝ်ႇသေႇၵူဝ်ယမ်ၼႃႈၵေႃႉဢၼ်ဢသၢၵ်ႈယႂ်ႇၼၼ်ႉဢေႃႈ။မႂ်းတၵ်းလႆႈၵူဝ်လႆႈႁႄၽြႃးပဵၼ်ၸဝ်ႈမႂ်းဢေႃႈ။ ၵဝ်ပဵၼ်ထႃႇဝရႃႉၽြႃး ဢေႃႈ။
၃၃ ပေႃးၶႅၵ်ႇသွၼ်ႈပိုင်ႈယူႇၵႃႈၼႂ်းမိူင်းမႂ်းၸိုင်ဢမ်ႇ လႆႈၼိၵ်ႈၸၢၵ်ႈငႅၼ်းသေးမၼ်း။
၃၄ ၶႅၵ်ႇဢၼ်ယူႇလူၺ်ႈၵၼ်တင်းမႂ်းၼၼ်ႉတၵ်းလႆႈပဵၼ်ၸိူဝ်ႉၼင်ႇၵူၼ်းမဵဝ်းဢၼ်ပဵၼ် ၸိူဝ်ႉၶိူဝ်းလဵဝ်ၵၼ်တင်းမႂ်းၼၼ်ႉ တီႈမႂ်းဢေႃႈ။မႂ်းတၵ်းလႆႈႁၵ်ႉမၼ်းမိူၼ်ၼင်ႇတူဝ်ၸဝ်ႈၵဝ်ႇဢေႃႈ။လွင်ႈမၼ်းၸမ်းသူလႆႈပဵၼ်ၶႅၵ်ႇၵႃႈၼႂ်းမိူင်းဢေႇၵႅပ်ႉတုမႃးယဝ်ႉ။ၵဝ်ပဵၼ်ထႃႇဝရႃႉၽြႃး၊ၽြႃးပဵၼ်ၸဝ်ႈ သူဢေႃႈ။
၃၅ သူဢမ်ႇလႆႈၸွမ်းဢၼ်ဢမ်ႇတြႃးသေလႄႈႁဵတ်းဢမူႉဢၼ်ထူပ်းတြႃးၼၼ်ႉ ဢိၵ်ႇတင်းၼႂ်းလွင်ႈတၢင်းဢၼ်တႅၵ်ႈဢၼ်ၶိုပ်ႈ၊ လွင်ႈတၢင်းဢၼ်ၸင်ႊဢၼ်ႁိဝ်ႈ လွင်ႈတၢင်းဢၼ်တူင်ဢၼ်ၵႂၢတ်ႇၼၼ်ႉ။
၃၆ သူတၵ်းလႆႈယိပ်းလၢႆးသုင်း ယႃႇၸူႇယွႆးဢၼ်မၢၼ်ႇဢၼ်မႅၼ်ႈ၊လုၵ်ႈၶၼ်ဢၼ်မၢၼ်ႇဢၼ်မႅၼ်ႈ၊ဢေႇၽႃႇဢၼ်မၢၼ်ႇဢၼ်မႅၼ်ႈ ႁီႉၼႃႉဢၼ်မၢၼ်ႇဢၼ်မႅၼ်ႈၸိူဝ်းၼၼ်ႉဢေႃႈ။ၵဝ်ပဵၼ်ထႃႇဝရႃႉၽြႃးၽြႃးပဵၼ်ၸဝ်ႈသူ ဢၼ်ၼုၵ်ႈဢဝ်သူဢွၵ်ႇသေၵႃႈၼႂ်းမိူင်း ဢေႇၵႅပ်ႉတုမႃးၼၼ်ႉဢေႃႈ။
၃၇ သူတၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ်ဢိၵ်ႇတင်းတၢင်းဢၼ်ၵဝ်ၸီႇယၢင်ႇဝႆႉတင်းသဵင်ႈတင်းလူင်ၼၼ်ႉဢေႃႈ။ၵဝ်ပဵၼ်ထႃႇဝရႃႉၽြႃးဢေႃႈ၊ ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။