Chapter
၂၅
ပီႊၵမ်သိၼ်
၁ ထႃႇဝရႃႉၽြႃး သမ်ႉမီးဢမိင်ႉတီႈမုဝ်းသေႇၵႃႈၼိူဝ်လွႆ သိၼႃႇၼၼ်ႉလႄႈဝႃႈၸမ်း၊-
၂ မႂ်းသင်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-မိူဝ်ႈဢၼ်သူႁွတ်ႈထိုင်ၵႃႈတီႈ မိူင်းဢၼ်ၵဝ်တၵ်းပၼ်ၼၼ်ႉၸိုင် မိူင်းၼၼ်ႉ တၵ်းလႆႈၵမ်သိၼ်ပုၼ်ႈထႃႇဝရႃႉၽြႃးဢေႃႈ။
၃ ႁူၵ်းပီႊတဵမ်တဵမ် မႂ်းတၵ်းလႆႈႁဵတ်းႁႆႊႁဵတ်းၼႃးယူႇႁူၵ်းပီႊတဵမ်တဵမ်မႂ်းတၵ်းလႆႈတႅပ်းလႆႈလၢၼ်း ၵႃႈတီႈသူၼ်ဢူးယဵၼ်ႇမၢၵ်ႇၸပိတ်ႈယူႇသေလႄႈ သိမ်းဢဝ် မၢၵ်ႇမၼ်းႁူင်းမၼ်းယူႇဢေႃႈ။
၄ ပီႊသတ်ႉတမၼၼ်ႉတၵ်းလႆႈပဵၼ် ပီႊၵမ်သိၼ်ဢၼ်တင်းဝၢၼ်ႈတင်းမိူင်းတၵ်းလႆႈယူႇၼိမ်ၼိမ်လီလီ ပီႊၵမ်သိၼ်ပုၼ်ႈထႃႇဝရႃႉၽြႃးဢေႃႈ။မႂ်းဢမ်ႇလႆႈႁဵတ်းႁႆႊႁဵတ်းၼႃး၊ဢမ်ႇလႆႈတႅပ်းလႆႈလၢၼ်း ၵႃႈတီႈသူၼ်ဢူးယဵၼ်ႇမၢၵ်ႇၸပိတ်ႈ မၢၵ်ႇႁူင်း ဢၼ်ဢွၵ်ႇပဵၼ်မႃးႁၢင်းၵူၺ်းမၼ်းၵႃႈတီႈႁႆႊတီႈၼႃးၼၼ်ႉၵေႃႈ
၅ မႂ်းဢမ်ႇလႆႈပၢတ်ႈလႆႈထိူဝ်။မၢၵ်ႇသူၼ်ဢူးယဵၼ်ႇၸပိတ်ႈဢၼ်ယင်းဢမ်ႇတႅပ်းဢမ်ႇလၢၼ်းဝႆႉၼၼ်ႉၵေႃႈ မႂ်းဢမ်ႇလႆႈပိတ်းဢဝ်သိမ်းဢဝ်။ပဵၼ်ပီႊဢၼ်တင်းဝၢၼ်ႈတင်းမိူင်းတၵ်းလႆႈယူႇ ၼိမ်ၼိမ်လီလီဢေႃႈ။
၆ တၢင်းဢၼ်ဢွၵ်ႇပဵၼ်မႃးႁင်းၵူၺ်းမၼ်း ၼႂ်းပီႊမိူင်းၵမ်သိၼ်ၼၼ်ႉတၵ်းလႆႈပဵၼ်တၢင်းၵိၼ်တၢင်းၶူပ်းပုၼ်ႈၸႃႉၸဵမ်မႂ်းလႄႈၶႃႈမႂ်း၊ ၶႃႈၵူၼ်းယိင်းမႂ်း၊ၵူၼ်းၵိၼ်ၸၢင်ႈၵိၼ်ငႃးမႂ်း၊ ၶႅၵ်ႇဢၼ် သွၼ်ႈပိုင်ႈယူႇၵႃႈတီႈမႂ်း၊
၇ ဢိၵ်ႇတင်းတၢင်းၵိၼ်တၢင်းၶူပ်းပုၼ်ႈတူဝ်ငႄႈတူဝ်ႁၢႆႉ ဢၼ်မီးၵႃႈတီႈမိူင်းမႂ်းဢေႃႈ။
ပီႊၵျူႇပလီႇ
၈ မႂ်းတၵ်းလႆႈၼပ်ႉဢၢၼ်ႇ ပီႊၵမ်သိၼ်ၸဵတ်းပီႊဢၼ်ဝႃႈ ၸဵတ်းပီႊမိူင်းၸဵတ်းပွၵ်ႈဢေႃႈ။ပီႊၵမ်သိၼ်ၸဵတ်းပီႊၼၼ်ႉ တၵ်းလႆႈပဵၼ်သီႇသိပ်းပၢႆၵဝ်ႈပီႊတီႈမႂ်းဢေႃႈ။
၉ ၵမ်းၼၼ်ႉ ၵႃႈတီႈလိူၼ်သတ်ႉတမသိပ်းဝၼ်းၼၼ်ႉမႂ်းတၵ်းလႆႈႁႂ်ႈပဝ်ႇၼႄးၶရႃႇ ဢၼ်မေႃးလင်ႊလႄႈၼႂ်းဝၼ်းဢၼ်ႁဵတ်းတၢင်းဢၼ်ၽေႇဢပျႅတ်ႈၼၼ်ႉ သူတၵ်းလႆႈႁႂ်ႈပဝ်ႇၼႄးၶရႃႇ တင်းဝၢၼ်ႈတင်းမိူင်းဢေႃႈ။
၁၀ သူတၵ်းလႆႈႁႂ်ႈ ပီႊမိူင်းဢၼ်ထူၼ်ႈထိုင်ႁႃႈသိပ်းပီႊၼၼ်ႉမူတ်းၸၢင်ႇလႄႈ ႁွင်ႉသေႃႇႁွင်ႉလၢတ်ႈဢၶႂၢင်ႉတၢင်းဢၼ်လွတ်ႈၼၼ်ႉ တီႈၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင် ၵႃႈၼႂ်းမိူင်းၵူႈတီႈၵူႈလႅၼ်ဢေႃႈ။တၵ်းလႆႈပဵၼ်ပီႊယုၽိလိတီႈသူလႄႈ သူၵူႈၵေႃႉၵူႈၵူၼ်းတၵ်းလႆႈၶိုၼ်းၸူးၵႃႈတီႈလိၼ်မိူင်း ဢၼ်တူဝ်ၸဝ်ႈၵဝ်ႇပိူင်ႇၼၼ်ႉလႄႈ သူၵူႈၵေႃႉၵူႈၵူၼ်းတၵ်းလႆႈၶိုၼ်း ၸူးၵႃႈတီႈပီႈၼွင်ႉၸိူဝ်ႉၶိူဝ်းတူဝ်ၸဝ်ႈၵဝ်ႇဢေႃႈ။
၁၁ ၵွပ်ႈပိူဝ်ႈဢၼ်ပီႊမိူင်း ဢၼ်ထူၼ်ႈထိုင်ႁႃႈသိပ်းပီႊၼၼ်ႉပဵၼ်ပီႊယုၽိလိတီႈသူလႄႈ သူဢမ်ႇလႆႈဝၢၼ်ႇၸိူဝ်ႉဝၢၼ်ႇၽၼ်း။ တူၼ်ႈဢၼ်ဢွၵ်ႇမႃးႁင်းၵူၺ်းမၼ်းၼၼ်ႉၵေႃႈဢမ်လႆႈပၢတ်ႇလႆႈထိူဝ်။မၢၵ်ႇသူၼ်ဢူးယဵၼ်ႇၸပိတ်ႈ ဢၼ်သူယင်းဢမ်ႇတႅပ်းဢမ်ႇလၢၼ်း ၼၼ်ႉၵေႃႈဢမ်ႇလႆႈပိတ်းဢဝ်သိမ်းဢဝ်။
၁၂ ၵွပ်ႈပိူဝ်ႈဢၼ်ပဵၼ်ပီႊယုၽိလိတီႈသူလႄႈ ပဵၼ်ပီႊဢၼ်မူတ်းၸၢင်ႇတီႈသူၼၼ်ႉလႄႈသူတၵ်းလႆႈၵိၼ်မၢၵ်ႇႁူင်းဢၼ်ဢွၵ်ႇပဵၼ်မႃးႁင်းၵူၺ်းမၼ်း ၵႃႈတီႈႁႆႊတီႈၼႃးၼၼ်ႉၵူၺ်းဢေႃႈ။
၁၃ ၼႂ်းပီႊယုၽိလိၼၼ်ႉသူၵူႈၵေႃႉၵူႈၵူၼ်းတၵ်းလႆႈၶိုၼ်းၸူးၵႃႈတီႈလိၼ်မိူင်းဢၼ်တူဝ်ၸဝ်ႈ ၵဝ်ႇပိူင်ႇၼၼ်ႉဢေႃႈ။
၁၄ ပေႃးသူႁဵတ်းတၢင်းဢၼ်သိုဝ်ႉဢဝ်သေၸိူဝ်ႉသေပိူင် တီႈၵူၼ်းႁိူၼ်းၸမ်ၵၼ် ဢမ်ႇၼၼ်ၵေႃႈ ပေႃးသူႁဵတ်းတၢင်းဢၼ်ၶၢႆသေၸိူဝ်ႉသေပိူင်တီႈၵူၼ်းႁိူၼ်းၸမ်ၵၼ်ၸိုင် သူၵေႃႉၼိုင်ႈလႄႈၵေႃႉ ၼိုင်ႈဢမ်ႇလႆႈႁဵတ်းဢမ်ႇတြႃးၼိူဝ်ၵၼ်။
၁၅ ၸွမ်းၼင်ႇၼပ်ႉဢၢၼ်ႇ ပီႊဢၼ်ပဵၼ်လိုၼ်းသပေီႊယုၽိလိၼၼ်ႉသေလႄႈ မႂ်းတၵ်းလႆႈသိုဝ်ႉၵႃႈတီႈၵူၼ်းႁိူၼ်းၸမ်ၵၼ်ဢေႃႈ။ၸွမ်းၼင်ႇၼပ်ႉဢၢၼ်ႇပီႊဢၼ်တၵ်းမၢၵ်ႇမၢၵ်ႇမၼ်းႁူင်းမၼ်းၼၼ်ႉသေလႄႈ မၼ်းတၵ်းလႆႈႁဵတ်း တၢင်းဢၼ်ၶၢႆပၼ်တီႈမႂ်းဢေႃႈ။
၁၆ ၸွမ်းလူၺ်ႈပီႊၼပ်ႉဢၢၼ်ႇၼမ်ၼၼ်ႉလႄႈမႂ်းတၵ်းလႆႈၶိုၼ်ႈၵႃႊမၼ်းၶၼ်မၼ်းလႄႈ ၸွမ်းလူၺ်ႈပီႊဢၼ်ၼပ်ႉဢၢၼ်ႇၵေႇၼၼ်ႉလႄႈ မႂ်းတၵ်းလႆႈယွမ်းၵႃႊမၼ်းၶၼ်မၼ်းလႄႈၶၢႆဢေႃႈ။လွင်ႈမၼ်းၸမ်းမၼ်းၸွမ်းတၢင်းဢၼ်တၵ်းမၢၵ်ႇမၢၵ်ႇမၼ်းႁူင်းမၼ်းၸိူဝ်းၼၼ်ႉသေလႄႈ ၶၢႆတီႈမႂ်း ဢေႃႈ။
၁၇ သူၵေႃႉၼိုင်ႈလႄႈၵေႃႉၼိုင်ႈဢမ်ႇလႆႈၼိၵ်ႈၸၢၵ်ႈငႅၼ်းသေးၵၼ်။ မႂ်းတၵ်းလႆႈၵူဝ်ႁႄၽြႃးပဵၼ်ၸဝ်ႈမႂ်းဢေႃႈ။ၵဝ်ပဵၼ်ထႃႇဝရႃႉၽြႃး၊ၽြႃးပဵၼ်ၸဝ်ႈသူဢေႃႈ။
၁၈ သူၵမ်ၵျၢင်ႉပိင်းၺၢပ်ႈတြႃးၵဝ်တင်းလၢႆလႄႈ ပႂ်ႉၸွမ်းတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉတႃႉ။ၼင်ႇၼၼ်လႄႈ သူတၵ်းလႆႈၵၢင်းလွတ်ႈတင်းၽေးသေလႄႈယူႇ ၵႃႈတီႈမိူင်းၼၼ်ႉဢေႃႈ။
၁၉ လိၼ်ၵေႃႈတၵ်းပၼ်မၢၵ်ႇမၼ်းႁူင်းမၼ်းလႄႈ သူတၵ်းလႆႈၵိၼ်ဢိမ်ႇၵိၼ်တဵမ် လႄႈၵၢင်းလွတ်ႈတင်းၽေးယူႇဢေႃႈ။ပေႃးသူလၢတ်ႈလႄႈဝႃႈ၊-
၂၀ ၼႂ်းပီႊသတ်ႉတမၼၼ်ႉႁဝ်းတၵ်းႁဵတ်းၸိူဝ်ႉၼင်ႇႁိုဝ်လႄႈလႆႈၵိၼ်။ႁဝ်းဢမ်ႇလႆႈဝၢၼ်ႇၸိူဝ်ႉဝၢၼ်ႇၽၼ်း၊ ဢမ်ႇလႆႈသိမ်းမၢၵ်ႇသိမ်းႁူင်းလူင်ပေႇ၊ ဝႃႈၼင်ႇၼႆၸိုင်၊
၂၁ ၼႂ်းပီႊသတ်ႉတမၼၼ်ႉၵဝ်တၵ်းပၼ်တၢင်းလီတီႈသူလႄႈ ႁႂ်ႈမၢၵ်ႇႁူင်းပဵၼ်မႃးၼႂ်းပီႊၼၼ်ႉ ပုၼ်ႈတႃႇသၢမ်ပီႊဢေႃႈ။
၂၂ သူတၵ်းလႆႈဝၢၼ်ႇၸိူဝ်ႉဝၢၼ်ႇၽၼ်းၼႂ်းပီႊဢထမလႄႈ ဢဝ်မၢၵ်ႇဢဝ်ႁူင်းဢၼ်ၵဝ်ႇၼၼ်ႉၵိၼ်ဢေႃႈ။တၵ်းလႆႈဢဝ်မၢၵ်ႇဢဝ်ႁူင်းဢၼ်ၵဝ်ႇၼၼ်ႉၵိၼ် တေႃႇထိုင်ႁွတ်ႈၶိင်ႇၵႃႇလဢၼ်သိမ်းဢဝ်မၢၵ်ႇဢဝ်ႁူင်းတီႈပီႊၼဝမၼၼ်ႉဢေႃႈ။
၂၃ ဢမ်ႇလႆႈၶၢႆလိၼ် ႁႂ်ႈပိူၼ်ႈတၢင်ႇၵေႃႉလႆႈပိူင်ႇဢဝ်ယူႇသေႇသေႇ။လိၼ်ၼၼ်ႉပဵၼ်ၶွင်ၵဝ်ဢေႃႈ။သူပဵၼ်ၶႅၵ်ႇ ဢႃႇၵၼ်ႇတူႉဢၼ်သွၼ်ႈပိုင်ႈယူႇတီႈၵဝ်ဢေႃႈ။
၂၄ ၵႃႈတီႈလိၼ်ဢၼ်သူပိူင်ႇၵူႈတီႈၵူႈလႅၼ်ၼၼ်ႉ သူတၵ်း လႆႈပၼ်ဢၶႂၢင်ႉဢၼ်ထုတ်ႇဢဝ်ဢေႃႈ။
၂၅ ပေႃးၵူၼ်းၸိူဝ်ႉၶိူဝ်းလဵဝ်ၵၼ်တင်းမႂ်းယၢၵ်ႈၵႂႃႇၽၢၼ်ၵႂႃႇလႄႈ ၶၢႆလိၼ်ဢၼ်တူဝ်ၸဝ်ႈၵဝ်ႇပိူင်ႇၼၼ်ႉ ၵမ်ႈၽွင်ႈၸိုင်ပီႈၼွင်ႉမၼ်း ဢၼ်ၸမ်ၵၼ်တင်းမၼ်းသေပိူၼ်ႈၼၼ်ႉတၵ်းလႆႈမႃးထုတ်ႇဢဝ် ဢၼ်ပီႈၼွင်ႉမၼ်းၶၢႆၼၼ်ႉ ဢေႃႈ။
၂၆ ပေႃးမၼ်းဢမ်ႇမီးၵေႃႉဢၼ်ထုတ်ႇဢဝ်လိၼ်ၼၼ်ႉလႄႈ မၼ်းသမ်ႉမၢၵ်ႈမီးမႃးထၢၼ်ႈပေႃးထုတ်ႇဢဝ်လႆႈၼၼ်ႉၸိုင် ႁႂ်ႈမၼ်းၼပ်ႉဢၢၼ်ႇပီႊဢၼ်ၶၢႆ လႄႈ
၂၇ ပူၼ်ႉမႃးယဝ်ႉၸိူဝ်းၼၼ်ႉသေလႄႈ ဢဝ်ၵႃႊမၼ်းၶၼ်မၼ်းဢၼ်လူဝ်ႇထႅင်ႈၼၼ်ႉ ၶိုၼ်းပၼ်တီႈၵေႃႉဢၼ်မၼ်းၶၢႆမႃးယဝ်ႉမိူဝ်ႈဢွၼ်တၢင်းၼၼ်ႉတႃႉ။ၼင်ႇၼၼ်လႄႈ မၼ်းတၵ်းလႆႈၶိုၼ်းၸူးၵႃႈတီႈလိၼ်မိူင်း ဢၼ်တူဝ်ၸဝ်ႈၵဝ်ႇပိူင်ႇၼၼ်ႉဢေႃႈ။
၂၈ ပေႃးမၼ်းဢမ်ႇၶိုၼ်းပၼ်လႆႈၸိုင်၊ဢၼ်မၼ်းၶၢႆမႃးယဝ်ႉၼၼ်ႉ တၵ်းလႆႈမီးယူႇၵႃႈၼႂ်းမိုဝ်းၵေႃႉဢၼ်သိုဝ်ႉဢဝ်ၼၼ်ႉ တေႃႇထိုင်ႁွတ်ႈပီႊယုၽိလိၼၼ်ႉဢေႃႈ။ ၼႂ်းပီႊယုၽိလိၼၼ်ႉ တၵ်းလႆႈလွတ်ႈသေၵႃႈၼႂ်းမိုဝ်းၵေႃႉၼၼ်ႉလႄႈမၼ်းတၵ်းလႆႈၶိုၼ်းၸူး ၵႃႈတီႈလိၼ်မိူင်းဢၼ်တူဝ် ၸဝ်ႈၵဝ်ႇပိူင်ႇၼၼ်ႉဢေႃႈ။
၂၉ ပေႃးသေၵေႃႉသေၵူၼ်းၶၢႆႁိူၼ်းဢၼ်မီးၵႃႈၼႂ်းဝဵင်း ဢၼ်မီးလမ်းဝဵင်းၼၼ်ႉၸိုင်မၼ်းတၵ်းလႆႈမီးဢၶႂၢင်ႉ ဢၼ်လႆႈထုတ်ႇဢဝ်ၵႃႈၼႂ်းပီႊၼိုင်ႈဢေႃႈ။ၵႃႈၼႂ်းပီႊၼိုင်ႈၼၼ်ႉၵူၺ်း မၼ်းတၵ်းလႆႈမီးဢၶႂၢင်ႉဢၼ်ထုတ်ႇဢဝ်ဢေႃႈ။
၃၀ ပေႃးဢမ်ႇထုတ်ႇဢဝ်ၵႃႈၼႂ်းပီႊၼိုင်ႈၼၼ်ႉၸိုင် ႁိူၼ်းဢၼ်မီးၵႃႈၼႂ်းဝဵင်းဢၼ်မီးလမ်းဝဵင်းၼၼ်ႉ တၵ်းလႆႈပဵၼ်တီႈဢၼ်ၵေႃႉဢၼ်သိုဝ်ႉဢဝ်ၼၼ်ႉ တၵ်းလႆႈပိူင်ႇဢဝ်ယူႇသေႇသေႇတေႃႇထိုင်ႁွတ်ႈၸူဝ်ႈလုၵ်ႈပၢၼ်လၢၼ်မၼ်းဢေႃႈ။ပိၵ်ႉသမ်ႉပီႊယုၽိလိႁွတ်ႈထိုင်သေၵေႃႈ ဢမ်ႇလႆႈလွတ်ႈသေၵႃၼႂ်း မိုဝ်းမၼ်း။
၃၁ ႁိူၼ်းဢၼ်မီးၵႃႈတီႈဝၢၼ်ႈဢၼ်ဢမ်ႇမီးလမ်းဝဵင်းၸိူဝ်းၼၼ်ႉၸိုင် တၵ်းလႆႈမၢတ်ႈပဵၼ်ၸိူဝ်ႉၼင်ႇႁႆႊၼႃးသေလႄႈ မီးဢၶႂၢင်ႉဢၼ်လႆႈထုတ်ႇဢဝ်ဢေႃႈ။ မိူဝ်ႈဢၼ်ႁွတ်ႈထိုင်ပီႊယုၽိလိၼၼ်ႉတၵ်းလႆႈလွတ်ႈသေၵႃႈၼႂ်းမိုဝ်းဢေႃႈ။
၃၂ ၼႂ်းဝႃႈၼၼ်သေၵေႃႈ ဝဵင်းၵူၼ်းမဵဝ်းလေႇဝိဢိၵ်ႇတင်းႁိူၼ်းဝဵင်းဢၼ်ၶဝ်ပိူင်ႇၸိူဝ်းၼၼ်ႉၸိုင် ၶိင်ႇၵႃႇလမိူဝ်ႈ လႂ်ဢမ်ႇဝႃႈမီး ဢၶႂၢင်ႉဢၼ်လႆႈထုတ်ႇဢဝ်ဢေႃႈ။
၃၃ ပေႃးသေၵေႃႉသေၵူၼ်းသိုဝ်ႉဢဝ်တီႈၵူၼ်းမဵဝ်းလေႇဝိ ၸိူဝ်းၼၼ်ႉၸိုင်ႁိူၼ်းဢၼ်မၼ်းၶၢႆပၼ်ဢိၵ်ႇတင်း ဝဵင်းဢၼ်မၼ်းပိူင်ႇၸိူဝ်းၼၼ်ႉ မိူဝ်ႈဢၼ်ႁွတ်ႈထိုင်ပီႊယုၽိလိၼၼ်ႉၸိုင်တၵ်းလႆႈလွတ်ႈသေၵႃႈၼႂ်းမိုဝ်းဢေႃႈ။လွင်ႈမၼ်းၸမ်းႁိူၼ်းဝဵင်းၵူၼ်းမဵဝ်းလေႇဝိ တင်းလၢႆၼၼ်ႉၸိူဝ်းၼၼ်ႉပဵၼ်တီႈဢၼ်ၶဝ်လႆႈပိူင်ႇဢဝ်ၵႃႈၼႂ်းၵူၼ်းမဵဝ်းဢိသရေႇလတင်းလၢႆဢေႃႈ။
၃၄ ၼႂ်းဝႃႈၼၼ်သေၵေႃႈႁႆႊၼႃးဢၼ်မီးၵႃႈတီႈႁိမ်းဝဵင်းၶဝ်ၼၼ်ႉၸိုင်ဢမ်ႇလႆႈၶၢႆ။ ပဵၼ်တီႈဢၼ်ၶဝ်တၵ်းလႆႈပိူင်ႇယူႇသေႇသေႇ ဢေႃႈ။
၃၅ ပေႃးၵူၼ်းမဵဝ်းၸိူဝ်ႉၶိူဝ်းလဵဝ်ၵၼ်တင်းမႂ်းၼၼ်ႉယၢၵ်ႈၽၢၼ်လႄႈ ႁႅင်းမိုဝ်းဢူၼ်ႈၵႂႃႇၸိုင် မႂ်းတၵ်းလႆႈၸွႆႈထႅမ်မႃႉၸႃႉမၼ်းဢေႃႈ။မၼ်းတၵ်းလႆႈယူႇၵႃႈတီႈမႂ်းမိူၼ်ၸိူဝ်ႉၼင်ႇ ၶႅၵ်ႇဢႃႇၵၼ်ႇတူႉၵူၼ်းတၢင်ႇၸိူဝ်ႉ တၢင်ႇၶိူဝ်းၼၼ်ႉဢေႃႈ။
၃၆ မႂ်းဢမ်ႇလႆႈဢဝ်ဢတူဝ်းဢမႅတ်ႈတီႈမၼ်း။လွင်ႈၼင်ႇႁိုဝ်ၵူၼ်းမဵဝ်းၸိူဝ်ႉၶိူဝ်းလဵဝ်ၵၼ်တင်းမႂ်းၼၼ်ႉ တၵ်းလႆႈယူႇၵႃႈတီႈမႂ်းၸိုင်ၵူဝ်ႁႄ ၽြႃးပဵၼ်ၸဝ်ႈမႂ်းတႃႉ။
၃၇ မႂ်းဢမ်ႇလႆႈၵိူဝ်းလႆႈၶီႈမၼ်းသေလႄႈပၼ်ၵူႈပၼ်ယိမ်ငိုၼ်းတီႈၵေႃႉၼၼ်ႉ။မႂ်းဢမ်ႇလႆႈၵိူဝ်းလႆႈဢတူဝ်းဢမႅတ်ႈမၼ်းသေလႄႈ ပၼ်ၵူႈပၼ် ယိမ်တၢင်းၵိၼ်တၢင်းၶူပ်းတီႈၵေႃႉၼၼ်ႉ။
၃၈ ၵဝ်ထႃႇဝရႃႉၽြႃးၽြႃးပဵၼ်ၸဝ်ႈသူဢၼ်ၼုၵ်ႈဢဝ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတု မႃးႁႂ်ႈလႆႈဢဝ်မိူင်းၶႃႇၼၢၼ်ႇပၼ်တီႈသူလႄႈပဵၼ်ၽြႃးပဵၼ်ၸဝ်ႈသူဢေႃႈ။
၃၉ ပေႃး ၵူၼ်းမဵဝ်းၸိူဝ်ႉၶိူဝ်းလဵဝ်ၵဝ်တင်းမႂ်းၼၼ်ႉယၢၵ်ႈၽၢၼ်လႄႈဢဝ်တူဝ်မၼ်းၶၢႆပၼ်တီႈမႂ်းၸိုင် မႂ်းဢမ်ႇလႆႈႁႂ်ႈမၼ်းၶၢမ်ႇတၢင်းၸႂ်ႉတၢင်းသွႆ မိူၼ်ၸိူဝ်ႉၼင်ႇၶႃႈဢၼ်ၶၢမ်ႇတၢင်းၸႂ်ႉတၢင်းသွႆၼၼ်ႉ။
၄၀ မၼ်းတၵ်းလႆႈယူႇ ၵႃႈတီႈမႂ်း မိူၼ်ၸိူဝ်ႉၼင်ႇၵူၼ်းၵိၼ်ၸၢင်ႈၵိၼ်ငႃး ဢိၵ်ႇတင်း မိူၼ်ၸိူဝ်ႉၼင်ႇၶႅၵ်ႇဢႃႇၵၼ်ႇတူႉၼၼ်ႉလႄႈလႆႈၶၢမ်ႇတၢင်းၸႂ်ႉတၢင်းသွႆတီႈမႂ်းတေႃႇထိုင်ႁွတ်ႈပီႊယုၽိလိၼၼ်ႉဢေႃႈ။
၄၁ ဝၢႆးသေၼၼ်ႉ မၼ်းဢိၵ်ႇလူၺ်ႈလုၵ်ႈလၢင်းမၼ်းတင်းလၢႆ တၵ်းလႆႈလွတ်ႈဢွၵ်ႇသေၵႃႈတီႈမႂ်းလႄႈၶိုၼ်းၸူးၵႃႈတီႈပီႈၼွင်ႉၸိူဝ်ႉၶိူဝ်းမၼ်း ဢိၵ်ႇတင်းၵႃႈတီႈလိၼ်မိူင်းဢၼ်ပူႇမွၼ်ႇမၼ်းပိူင်ႇၼၼ်ႉဢေႃႈ။
၄၂ လွင်ႈမၼ်းၸမ်းၶဝ်ၼၼ်ႉ ပဵၼ်ၶႃႈၵဝ်ဢၼ်ၵဝ်ၼုၵ်ႈဢဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉလႄႈဢမ်ႇလႆႈၶၢႆ ႁႂ်ႈၶဝ်လႆႈပဵၼ် ၶႃႈဢၼ်ၶၢမ်ႇတၢင်းၸႂ်ႉ တၢင်းသွႆ။
၄၃ မႂ်းဢမ်ႇလႆႈၸီႇယၢင်ႇယၢပ်ႇယဵၼ်းၼႃႇလူင်လၢင်တီႈမၼ်း။မႂ်းတၵ်းလႆႈၵူဝ်ႁႄၽြႃးပဵၼ်ၸဝ်ႈ မႂ်းဢေႃႈ။
၄၄ ၶႃႈၸႂ်ႉၶႃႈသွႆ လႂ်ၶႃႈမေႈယိင်း လႂ်ဢၼ်သူတၵ်းလႆႈမီးၼၼ်ႉၸမ်း မႂ်းတၵ်းလႆႈသိုဝ်ႉဢဝ်ၶႃႈၸႂ်ႉၶႃႈသွႆ လႂ် ၶႃႈမေႈယိင်း လႂ် ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ယူႇလဵပ်ႈႁွပ်ႈမႂ်းယူႇၵူႈၽၢႆႇၵူႈပႃႈၸိူဝ်း ၼၼ်ႉဢေႃႈ။
၄၅ လိူဝ်သေၼၼ်ႉသူတၵ်းလႆႈသိုဝ်ႉဢဝ်လုၵ်ႈလၢင်းၵူၼ်းတၢင်ႇဝၢၼ်ႈတၢင်ႇမိူင်းဢၼ်သွၼ်ႈပိုင်ႈယူႇၵႃႈတီႈသူ ႁိူၼ်းယေးၶဝ်ဢၼ်မီးၵႃႈတီႈၼႂ်းမိူင်း သူၸိူဝ်းၼၼ်ႉဢေႃႈ။
၄၆ ၶဝ်တၵ်းလႆႈပဵၼ်တီႈဢၼ်သူလႆႈပိူင်ႇဢေႃႈ။သူတၵ်းလႆႈဢဝ်ၶဝ်ႁႂ်ႈပဵၼ်ပုၼ်ႈလုၵ်ႈလၢၼ်သူ ဢၼ်ပေႃႇမႃးလိုၼ်းလင်သူၼၼ်ႉလႆႈၶၢမ်ႇဢမူၺ်ႇလႄႈပိူင်ႇဢေႃႈ။သူတၵ်းလႆႈဢဝ်ၵႃႈၼႂ်းၶဝ်ၼၼ်ႉႁဵတ်းၶႃႈၸႂ်ႉၶႃႈသွႆသူယူႇသေႇသေႇဢေႃႈ။ၵူၺ်းၵႃႈတီႈၵူၼ်းမဵဝ်းၸိူဝ်ႉၶိူဝ်းလဵဝ်ၵၼ်တင်းမႂ်း ဢၼ်ပဵၼ်ၵူၼ်းမဵဝ်းဢိသရေႇလ တင်းလၢႆၼၼ်ႉၸမ်း သူၵေႃႉၼိုင်ႈလႄႈၵေႃႉၼိုင်ႈ ဢမ်ႇလႆႈၸီႇယၢင်ႇယၢပ်ႇယဵၼ်းၼႃႇလူင်လၢင်တီႈၵၼ်။
၄၇ ပေႃးၵူၼ်းတၢင်ႇဝၢၼ်ႈတၢင်ႇမိူင်းဢမ်ႇၼၼ်ၶႅၵ်ႇဢႃႇၵၼ်ႇတူႉ ဢၼ်သွၼ်ႈပိုင်ႈယူႇၵႃႈတီႈမႂ်းၸိူဝ်းၼၼ်ႉၸၢင်ႊမၢၵ်ႈၸၢင်ႊမီးလႄႈ ၵူၼ်းၸိူဝ်ႉၶိူဝ်းလဵဝ်ၵၼ်တင်းမႂ်း သမ်ႉယၢၵ်ႈၽၢၼ်ၵႃႈတီႈႁိမ်းမၼ်းလႄႈ ဢဝ်တူဝ်မၼ်းၶၢႆပၼ်တီႈၵူၼ်းတၢင်ႇဝၢၼ်ႈတၢင်ႇမိူင်းဢမ်ႇၼၼ်တီႈၶႅၵ်ႇဢႃႇၵၼ်ႇတူႉဢၼ်သွၼ်ႈပိုင်ႈယူႇၵႃႈႁိမ်းမႂ်း၊ဢမ်ႇၼၼ်တီႈလုၵ်ႈလၢၼ်ၵူၼ်းတၢင်ႇဝၢၼ်ႈတၢင်ႇမိူင်းၸိုင် လိုၼ်းသေမၼ်းၶၢႆတူဝ်မၼ်းယဝ်ႉ တၵ်းလႆႈမီးဢၶႂၢင်ႉဢၼ်လႆႈထုတ်ႇဢဝ်ဢေႃႈ။
၄၈ ပီႈဢၢႆႈၼွင်ႉၸၢႆးမၼ်းသေၵေႃႉၵေႃႉ တၵ်းလႆႈထုတ်ႇဢဝ်မၼ်းဢေႃႈ။
၄၉ ဢမ်ႇၼၼ်ၵေႃႈပေႃႈၼႃႉပေႃႈဢႃမၼ်း၊ ဢမ်ႇၼၼ်ၵေႃႈလုၵ်ႈပီႈလုၵ်ႈၼွင်ႉမၼ်း ဢမ်ႇၼၼ်ၵေႃႈပီႈၼွင်ႉၸိူဝ်ႉၶိူဝ်းဢွၵ်ႇမၼ်းသေၵေႃႉၵေႃႉၼၼ်ႉတၵ်းလႆႈထုတ်ႇဢဝ်မၼ်းဢေႃႈ။ ဢမ်ႇၼၼ် ပေႃးတူဝ်မၼ်းၶိုၼ်းမၢၵ်ႈၶိုၼ်းမီးမႃးၸိုင် တူဝ်မၼ်းတၵ်းလႆႈထုတ်ႇဢဝ်တူဝ်မၼ်းဢေႃႈ။
၅၀ မၼ်းတၵ်းလႆႈၼပ်ႉဢၢၼ်ႇ လူၺ်ႈၵၼ်တင်းၵေႃႉဢၼ်သိုဝ်ႉဢဝ်မၼ်းၼၼ်ႉ ၸႃႉၸဵမ်ပီႊဢၼ်မၼ်းဢဝ်တူဝ်ၸဝ်ႈၵဝ်ႇၶၢႆၼၼ်ႉ တေႃႇထိုင်ႁွတ်ႈပီႊယုၽိလိၼၼ်ႉသေလႄႈ ၵႃႈၶၼ်ဢၼ်မၼ်းတၵ်းလႆႈပၼ်ၼၼ်ႉမၼ်းတၵ်းလႆႈပၼ် ၸွမ်းလူၺ်ႈပီႊၼမ်ပီႊၵေႇၼၼ်ႉဢေႃႈ။တၵ်းလႆႈပဵၼ်ၸွမ်းလူၺ်ႈၶိင်ႇၵႃႇလ ဢၼ်ၵူၼ်းၵိၼ် ၸၢင်ႈၵိၼ်ငႃးႁဵတ်းၼၼ်ႉဢေႃႈ။
၅၁ ပေႃးပီႊယင်းၵိုတ်းၼမ်ၸိုင် မၼ်းတၵ်းလႆႈၸွမ်းလူၺ်ႈပီႊၸိူဝ်းၼၼ်ႉလႄႈ ဢဝ်ၵႃႊၶၼ်ဢၼ်တၵ်းထုတ်ႇဢဝ်တူဝ်မၼ်းၼၼ်ႉ ၼုၵ်ႈဢဝ်ၵႃႈၼႂ်းငိုၼ်းဢၼ်လႆႈသိုဝ်ႉဢဝ်မၼ်း ယဝ်ႉၼၼ်ႉသေလႄႈၶိုၼ်းပၼ်ဢေႃႈ။
၅၂ ၸူဝ်ႈဢၼ်ဢမ်ႇပႆႇႁွတ်ႈထိုင်ပီႊယုၽိလိၼၼ်ႉ ပေႃးယင်းၵိုတ်းပီႊၵေႇၸိုင် မၼ်းတၵ်းလႆႈၼပ်ႉဢၢၼ်ႇလူၺ်ႈၵၼ်တင်းၵေႃႉၼၼ်ႉလႄႈ ၸွမ်းလူၺ်ႈပီႊၸိူဝ်းၼၼ်ႉမၼ်းတၵ်းလႆႈဢဝ်ၵႃႊဢၼ်တၵ်းထုတ်ႇဢဝ်ၼၼ်ႉ ၶိုၼ်းပၼ်ဢေႃႈ။
၅၃ မၼ်းတၵ်းလႆႈယူႇလူၺ်ႈၵၼ်တင်းၵေႃႉၼၼ်ႉ ပီႊၼိုင်ႈယဝ်ႉပီႊၼိုင်ႈ မိူၼ်ၸိူဝ်ႉၼင်ႇၵူၼ်းၵိၼ်ၸၢင်ႈၵိၼ်ငႃးၼၼ်ႉဢေႃႈ။ၵေႃႉၼၼ်ႉဢမ်ႇလႆႈၸီႇယၢင်ႇမၼ်းယၢပ်ႇယဵၼ်းၼႃႇလူင်လၢင်တီႈမၼ်း သိုဝ်ႈၼႃႈတႂ်ႈတႃမႂ်း။
၅၄ ပေႃးမၼ်းဢမ်ႇၶၢမ်ႇ တၢင်းဢၼ်ၶဝ်ၸိူဝ်ႉၼၼ်ထုတ်ႇဢဝ်ၸိုင် မိူဝ်ႈဢၼ်ႁွတ်ႈထိုင်ပီႊယုၽိလိၼၼ်ႉမၼ်းဢိၵ်ႇတင်း လုၵ်ႈလၢင်းမၼ်းတင်းလၢႆတၵ်းလႆႈလွတ်ႈသေၵႃႈၼႂ်းမိုဝ်းၵေႃႉၼၼ်ႉဢေႃႈ။
၅၅ လွင်ႈမၼ်းၸမ်းၵူၼ်းမဵဝ်းဢိသရေႇလတင်းလၢႆပဵၼ်ၶႃႈၵဝ်ဢေႃႈ။ပဵၼ်ၶႃႈၵဝ်ဢၼ်ၵဝ်ၼုၵ်ႈဢဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉဢေႃႈ။ ၵဝ်ပဵၼ်ထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။