Chapter
၁၇
ဢမ်ႇလႆႈၵိၼ်လိူတ်ႈ
၁ ထႃႇဝရႃႉၽြႃး သမ်ႉမီးဢမိင်ႉတီႈမုဝ်းသေႇ လႄႈဝႃႈၸမ်း၊- သင်ႇလၢတ်ႈတီႈဢႃႇရုၼ်ႇတင်းလုၵ်ႈၸၢႆးမၼ်းတင်းလၢႆ ဢိၵ်ႇတင်းၵူၼ်းမဵဝ်းဢိသရေႇလတင်း သဵင်ႈတင်းလူင်ၼၼ်ႉလႄႈဝႃႈ၊-
၂ ပိင်းၺၢပ်ႈဢၼ်ထႃႇဝရႃႉၽြႃးပိင်းၺၢပ်ႈဝႆႉၸမ်း၊-ပေႃးၵူၼ်းမဵဝ်းဢိသရေႇ လသေၵေႃႉသေၵူၼ်း
၃ ဢဝ်သူဝ်းပေႉဝူဝ်းတၢႆၵႃႈၼႂ်းတပ်ႉဢမ်ႇၼၼ် ဢဝ်တၢႆၵႃႈၼွၵ်ႈတပ်ႉလႄႈ ယင်းဢမ်ႇ ဢဝ်မႃးၵႃႈတီႈၽၵ်းတူသုမ်ႉထဵင်ၸဝ်ႈ
၄ တီႈၸူႉတီႈတုမ်ပရိၵ်ႈသၢတ်ႈႁႂ်ႈလႆႈႁဵတ်းတၢင်းပုၵ်ႉၸေႃႇတီႈ ထႃႇဝရႃႉၽြႃးၼႂ်းတီႈၽၢႆႇၼႃႈသုမ်ႉထဵင် ၸဝ်ႈထႃႇဝရႃႉၽြႃးၼၼ်ႉၸိုင် တၵ်းလႆႈမၢတ်ႈဢပျႅတ်ႈလိူတ်ႈမီးတီႈၵေႃႉၼၼ်ႉဢေႃႈ။ၵေႃႉၼၼ်ႉထွၵ်ႇလိူတ်ႈပႅတ်ႈယဝ်ႉ။ ၵေႃႉၼၼ်ႉၸိုင် တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေ ၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။
၅ ၼင်ႇႁိုဝ်ၵူၼ်းမဵဝ်းဢိသရေႇလ တင်းလၢႆ တၵ်းလႆႈဢဝ်ယိၸ်ႉ တၢင်းပုၵ်ႉၸေႃႇ ဢၼ်ၶဝ်ပုၵ်ႉၸေႃႇၵႃႈတီႈထိူၼ်ႇၼၼ်ႉမႃးၸူးယိတ်ႉပရေႃးႁိၵ်ႈ တီႈထႃႇဝရႃႉၽြႃးၼႂ်းတီႈၽၢႆႇၼႃႈသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈၼၼ်ႉလႄႈပုၵ်ႉၸေႃႇယိၸ်ႉမိၵ်ႉသႁႃႇယႃႉ တီႈထႃႇဝရႃႉၽြႃးၸိုင် လႆႈၸီႇယၢင်ႇၸိူဝ်ႉၼင်ႇၼၼ်ဢေႃႈ။
၆ ယိတ်ႉပရေႃးႁိၵ်ႈၼၼ်ႉ တၵ်းလႆႈဢဝ်လိူတ်ႈတူဝ်ယိၸ်ႉၼၼ်ႉၽႅတ်းသႂ်ႇၵႃႈၼိူဝ်ယိၸ်ႉပလၢင်ႇထႃႇဝရႃႉၽြႃး ဢၼ်မီးၵႃႈႁိမ်းၽၵ်းတူသုမ်ႉထဵင် ၸဝ်ႈ တီႈၸူႉတီႈတုမ်ပရိၵ်ႈသၢတ်ႈလႄႈ ဢဝ်ၵွၼ်ႈၶႆၵွၼ်ႈမၼ်း တုတ်ႇၽႆးပုၼ်ႈတၢင်း ဢၼ်ႁွမ်ဢၼ်ႁူၺ်းတီႈ ထႃႇဝရႃႉၽြႃးဢေႃႈ။
၇ ၶဝ်ၼၼ်ႉၵမ်းလိုၼ်း ဢမ်ႇလႆႈပုၵ်ႉၸေႃႇၵႃႈတီႈၽီႁၢႆႉတင်းလၢႆမိူၼ်ၸိူဝ်ႉၼင်ႇဢၼ်ၽိတ်းပိူင်ႈမႃးယဝ်ႉဢွၼ်တၢင်းၼၼ်ႉ။ဢၼ်ၼႆႉၸမ်းပဵၼ်ပိင်းၺၢပ်ႈၸဝ်ႈတႃႇသေႇတီႈၸူဝ်ႈလုၵ်ႈပၢၼ်လၢၼ်သူ သိုပ်ႇသိုပ်ႇတၢမ်ႈတၢမ်ႈၼၼ်ႉဢေႃႈ၊ဝႃႈၼင်ႇၼႆတႃႉ။
၈ မႂ်းသင်ႇလၢတ်ႈတီႈၶဝ်ၼၼ်ႉလႄႈဝႃႈ၊-ၵူၼ်းမဵဝ်းၸိူဝ်ႉၶိူဝ်းဢိသရေႇလသေဢမ်ႇဝႃႈ ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၵႃႈၼႂ်းသူသေဢမ်ႇဝႃႈ ပေႃးသေၵေႃႉသေၵူၼ်း ပုၵ်ႉၸေႃႇၸႃႉၸဵမ်ယိၸ်ႉဢၼ် တုတ်ႇၽႆးလႄႈ
၉ ယိၸ်ႉတၢင်ႇၸိူဝ်ႉတၢင်ႇဢၼ်သေၸိူဝ်ႉသေပိူင်ၼၼ်ႉလႄႈ ယင်းဢမ်ႇဢဝ်မႃးၵႃႈတီႈၽၵ်းတူသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈႁႂ်ႈလႆႈပုၵ်ႉၸေႃႇတီႈထႃႇဝရႃႉၽြႃးၸိုင် ၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေ ၵႃႈၼႂ်းမဵဝ်းၸိူဝ်ႉၶိူဝ်းမၼ်း ဢေႃႈ၊ဝႃႈၼင်ႇၼႆတႃႉ။
၁၀ ၵူၼ်းမဵဝ်းၸိူဝ်ႉၶိူဝ်းဢိသရေႇလသေဢမ်ႇဝႃႈ ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၵႃႈၼႂ်းသူသေဢမ်ႇဝႃႈ ပေႃးသေၵေႃႉသေၵူၼ်းၵိၼ်လိူတ်ႈသေမဵဝ်းမဵဝ်းၸိုင် ၵဝ်တၵ်းဝၢႆႇၼႃႈပႅတ်ႈသေ ၵေႃႉဢၼ်ၵိၼ်လိူတ်ႈၼၼ်ႉလႄႈ ပႄႇမၼ်းပႅတ်ႈ သေၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။
၁၁ လွင်ႈမၼ်းၸမ်းဢသၢၵ်ႈတူဝ်ၶၼ်ႇထႃႇ တႄႇယူႇၵႃႈတီႈလိူတ်ႈဢေႃႈ။လိူတ်ႈၼၼ်ႉၸိုင်ၵဝ်ပၼ်တီႈသူ ၵႃႈၼိူဝ်ယိၸ်ႉပလၢင်ႇႁႂ်ႈလႆႈၽေႇဢပျႅတ်ႈဝိၺိၺ်ႇသူၼၼ်ႉယဝ်ႉ။လိူတ်ႈၸမ်းပဵၼ်လွင်ႈတၢင်းဢၼ်ၽေႇဢပျႅတ်ႈ ၵွပ်ႈပိူဝ်ႈဢၼ် ပဵၼ်ဢသၢၵ်ႈဢေႃႈ။
၁၂ ပိူဝ်ႈၼႆလႄႈၵဝ်မီးဢမိင်ႉတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊- ၵႃႈၼႂ်းသူၽူႈ လႂ်ဢမ်ႇလႆႈၵိၼ်လိူတ်ႈ။ ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၵႃႈၼႂ်းသူၼၼ်ႉၵေႃႈ ဢမ်ႇလႆႈ ၵိၼ်လိူတ်ႈ၊ဝႃႈၼင်ႇၼႆဢေႃႈ။
၁၃ ၵူၼ်းမဵဝ်းၸိူဝ်ႉၶိူဝ်းဢိသရေႇလသေဢမ်ႇဝႃႈၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၵႃႈၼႂ်းသူသေဢမ်ႇဝႃႈ၊ ပေႃးသေၵေႃႉသေၵူၼ်းႁဵတ်းမူးသိူဝ်းလႄႈ တီႉလႆႈတူဝ်သတ်းဢမ်ႇၼၼ်ၵေႃႈ ၼူၵ်ႉပုၼ်ႈဢၼ်တၵ်းၵိၼ်ၸိုင်မၼ်းတၵ်းလႆႈထွၵ်ႇလိူတ်ႈမၼ်းပႅတ်ႈသေလႄႈ ဢဝ်လိၼ် ႁူမ်ႇဝႆႉသေဢေႃႈ။
၁၄ လွင်ႈမၼ်းၸမ်းလိူတ်ႈပဵၼ်ဢသၢၵ်ႈတူဝ်ၶၼ်ႇထႃႇတင်းသဵင်ႈတင်းလူင်ဢေႃႈ။ လိူတ်ႈပဵၼ်ဢၼ်လဵဝ်ၵၼ်တင်းဢသၢၵ်ႈဢေႃႈ။ပိူဝ်ႈၼႆလႄႈၵဝ်မီးဢမိင်ႉတီႈ ၵူၼ်းမဵဝ်းဢိသရေႇလ တင်းလၢႆလႄႈဝႃႈ၊-သူဢမ်ႇလႆႈၵိၼ်လိူတ်ႈတူဝ်ၶၼ်ႇထႃႇသေၸိူဝ်ႉသေပိူင်၊ဝႃႈၼင်ႇၼႆဢေႃႈ။ၵွပ်ႈပိူဝ်ႈဢၼ်ဢသၢၵ်ႈတူဝ်ၶၼ်ႇထႃႇတင်းလၢႆ တႄႇယူႇၼႂ်းလိူတ်ႈလႄႈ ၵေႃႉဢၼ်ၵိၼ်ၼၼ်ႉၸမ်း တၵ်းလႆႈၶၢမ်ႇတၢင်းဢၼ်ပႄႇ ပႅတ်ႈသေဢေႃႈ။
၁၅ ၵူၼ်းမဵဝ်းၸိူဝ်ႉၶိူဝ်းဢိသရေႇလသေဢမ်ႇဝႃႈ၊ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်သွၼ်ႈပိုင်ႈယူႇၵႃႈၼႂ်းသူသေဢမ်ႇဝႃႈ၊ ပေႃးသေၵေႃႉသေၵူၼ်းၵိၼ်ၼိူဝ်ႉတူဝ်ဢၼ်တၢႆႁင်းမၼ်း၊ ဢမ်ႇၼၼ်တူဝ်တၢႆဢၼ်တူဝ်ႁၢႆႉၶူပ်းတၢႆၼၼ်ႉၸိုင် မၼ်းတၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈ ဢၢပ်ႇၼမ်ႉဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။
၁၆ လိုၼ်းၼၼ်ႉမၼ်းမီးတၢင်းဢၼ်မူတ်းသႂ်ဢေႃႈ။ ပေႃးဢမ်ႇသၵ်ႉလွႆးၶူဝ်းၼုင်ႈ ဢမ်ႇဢၢပ်ႇၼမ်ႉၸိုင် မၼ်းတၵ်းလႆႈၶၢမ်ႇဢပျႅတ်ႈမၼ်းဢေႃႈ၊ ဝႃႈၼင်ႇၼႆဢေႃႈ။