Chapter
၁၂
တၢင်းမူတ်းသႂ်မေႈယိင်းဢၼ်ၵိူတ်ႇလဵင်ႉလုၵ်ႈ
၁ ထႃႇဝရႃႉၽြႃး သမ်ႉမီးဢမိင်ႉတီႈမုဝ်းသေႇ လႄႈဝႃႈၸမ်း၊-မႂ်းသင်ႇလၢတ်ႈတီႈၵူၼ်းမဵဝ်းဢိသရေႇလတင်း လၢႆၼၼ်ႉလႄႈဝႃႈ၊-
၂ ပေႃးမေႈယိင်းပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉလုၵ်ႈၸၢႆးယဝ်ႉၸိုင် မၼ်းပဵၼ်ဢမ်ႇမူတ်းသႂ်ၸဵတ်းဝၼ်းဢေႃႈ။မၼ်းတၵ်းဢမ်ႇမူတ်းသႂ်မိူၼ်ၸိူဝ်ႉၼင်ႇၶိင်ႇဢူႉတူႉမၼ်းမႃးၼၼ်ႉလႄႈ မၼ်း ဢမ်ႇမူတ်းသႂ်ဢေႃႈ။
၃ ဝၼ်းဢထမၼၼ်ႉတၵ်းလႆႈႁဵတ်းတၢင်းဢၼ်ထိူဝ်ႁိမ်းပၢႆၼင် တီႈလုၵ်ႈၸၢႆးၼၼ်ႉဢေႃႈ။ လိုၼ်းၼၼ်ႉမေႈယိင်းၼၼ်ႉတၵ်းလႆႈပႂ်ႉသၢမ်သိပ်းပၢႆသၢမ်ဝၼ်းတဵမ်တဵမ် တေႃႇထိုင်ႁွတ်ႈလိူတ်ႈ မၼ်းမူတ်းသႂ်ဢေႃႈ။
၄ မၼ်းဢမ်ႇလႆႈယိပ်းလႆႈၵမ်ၶိူင်ႈပိူင်ဢၼ်မူတ်းၸၢင်ႇ။ ဢမ်ႇလႆႈၵႂႃႇၵႃႈတီႈထႃႇၼႃႉတီႈမူတ်းၸၢင်ႇၸဝ်ႈ တေႃႇထိုင်ႁွတ်ႈၶိင်ႇဝၼ်းဢၼ် တၢင်းမူတ်းသႂ်ၸေးၼၼ်ႉ။
၅ ပေႃးမၼ်းၵိူတ်ႇလဵင်ႉလုၵ်ႈယိင်းၸိုင် မၼ်းတၵ်းပဵၼ်ဢမ်ႇမူတ်းသႂ်သိပ်းပၢႆသီႇဝၼ်းတဵမ်တဵမ်လႄႈ ယူႇမိူၼ်ၸိူဝ်ႉၼင်ႇၶိင်ႇဢူႉတူႉမၼ်းႁွတ်ႈထိုင်ၼၼ်ႉဢေႃႈ။လိုၼ်းၼၼ်ႉမၼ်းတၵ်းလႆႈပႂ်ႉႁူၵ်းသိပ်းပၢႆႁူၵ်းဝၼ်းတဵမ်တဵမ် ႁႂ်ႈလိူတ်ႈမၼ်းမူတ်းသႂ် ဢေႃႈ။
၆ မိူဝ်ႈဢၼ်ၶိင်ႇဝၼ်းတၢင်းဢၼ်ႁႂ်ႈမူတ်းသႂ်ပုၼ်ႈလုၵ်ႈၸၢႆးဢမ်ႇၼၼ် ပုၼ်ႈလုၵ်ႈယိင်းၼၼ်ႉၸေးယဝ်ႉၼၼ်ႉၸိုင် မၼ်းတၵ်းလႆႈဢဝ်သူဝ်းဢွၼ်ႇဢၼ်ဢမ်ႇပႆႇၶွပ်ႈၶူပ်ႇတူဝ်ၼိုင်ႈ ပုၼ်ႈယိၸ်ႉဢၼ်တုတ်ႇၽႆးၵႃၵႄဢွၼ်ႇတူဝ်ၼိုင်ႈ၊ ဢမ်ႇၼၼ်ၼူၵ်ႉတူႈတူဝ်ၼိုင်ႈပုၼ်ႈယိၸ်ႉဢၼ်ၽေႇဢပျႅတ်ႈ မႃးၵႃႈတီႈ ယိတ်ႉပရေႃးႁိၵ်ႈၸူးၵႃႈတီႈၽၵ်းတူသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈၼၼ်ႉဢေႃႈ။
၇ ယိတ်ႉပရေႃးႁိၵ်ႈၼၼ်ႉတၵ်းလႆႈဢဝ်ပုၵ်ႉၸေႃႇၵႃႈတီႈၽၢႆႇၼႃႈထႃႇဝရႃႉၽြႃးလႄႈ ႁဵတ်းတၢင်းဢၼ်ၽေႇဢပျႅတ်ႈပုၼ်ႈမၼ်းဢေႃႈ။ၵမ်းၼၼ်ႉမၼ်းတၵ်းလႆႈမူတ်းၸၢင်ႇလွတ်ႈသေဢပျႅတ်ႈတၢင်းဢၼ်လိူတ်ႈထင်ႇၼၼ်ႉဢေႃႈ။ဢၼ်ၼႆႉၸမ်း ပဵၼ်တြႃးဢၼ်ၸၢပ်ႈသႅင်ႇၵၼ်တင်းမေႈယိင်း ဢၼ်ၵိူတ်ႇလဵင်ႉလုၵ်ႈၸၢႆးလုၵ်ႈယိင်း ၼၼ်ႉ ဢေႃႈ။
၈ ပေႃးမၼ်းဢမ်ႇတတ်ႈၼိုင်ႇလႆႈဢဝ်သူဝ်းဢွၼ်ႇမႃးၸိုင် မၼ်းတၵ်းလႆႈဢဝ်ၼူၵ်ႉတူႈသွင်တူဝ်၊ဢမ်ႇၼၼ်ၵႃၵႄဢွၼ်ႇသွင်တူဝ် ပုၼ်ႈယိၸ်ႉဢၼ်တုတ်ႇၽႆးတူဝ်ၼိုင်ႈပုၼ်ႈယိၸ်ႉဢၼ်ၽေႇဢပျႅတ်ႈတူဝ်းၼိုင်ႈမႃးလႄႈ ယိတ်ႉပရေႃးႁိၵ်ႈတၵ်းလႆႈႁဵတ်းတၢင်းဢၼ်ၽေႇဢပျႅတ်ႈပုၼ်ႈမၼ်းဢေႃႈ။ၵမ်းၼၼ်ႉမၼ်းတၵ်းလႆႈမူတ်းၸၢင်ႇဢေႃႈ။