Chapter
၁၀
တၢင်းဢၼ်ၼႃႇတပ်ႉတင်းဢၽိႁုတၢႆ
၁ လုၵ်ႈၸၢႆးဢႃႇရုၼ်ႇ၊ ၼႃႇတပ်ႉတင်းဢၽိႁု ၸိူဝ်းၼၼ်ႉ ဢွၼ်ၵၼ်ဢဝ်လၢင်ႇပၢၼ်းသွင်ၶႃႁင်းၽႂ်ႁင်းမၼ်းလႄႈ ဢဝ်ၽႆးသႂ်ႇသေယဝ်ႉဢဝ်ၼၢမ်ႇသႃႇတၢင်ႇသႂ်ႇသေလႄႈ ပုၵ်ႉၸေႃႇၽႆး ဢၼ်ဢမ်ႇၸၢပ်ႈဢမ်ႇသႅင်ႇ ဢၼ်ထႃႇဝရႃႉၽြႃးဢမ်ႇသင်ႇလၢတ်ႈဝႆႉၼၼ်ႉ၊ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၂ ၵမ်းၼၼ်ႉၽႆးဢွၵ်ႇသေၵႃႈတီႈထႃႇဝရႃႉၽြႃး ႁူပ်ႇမႆႈသွင်ၶႃလႄႈသွင်ၶႃၼၼ်ႉ တၢႆၵႃႈတီႈၽၢႆႇၼႃႈ ထႃႇဝရႃႉၽြႃး ဢေႃႈ။
၃ မိူဝ်ႈၼၼ်ႉမုဝ်းသေႇလၢတ်ႈတီႈဢႃႇရုၼ်ႇလႄႈဝႃႈ၊-ဢၼ်ၼႆႉၸမ်း ပဵၼ်လွင်ႈတၢင်းဢၼ်ထႃႇဝရႃႉၽြႃးမီးဢမိင်ႉဝႃႈ၊-ၵဝ်တၵ်းမၢတ်ႈၶဝ်ၸိူဝ်းဢၼ်သုတ်ႉၸပ်းသုတ်ႉၸူးတီႈၵဝ်ၼၼ်ႉပဵၼ်ဢၼ်မူတ်းၸၢင်ႇလႄႈ ၵဝ်တၵ်းႁႂ်ႈမုၼ်ၽုင်းၵဝ်ထၢင်ႇသႃးၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ဢေႃႈ၊ဝႃႈၼင်ႇၼႆၼၼ်ႉယဝ်ႉ၊ဝႃႈၼင်ႇၼႆလႄႈ ဢႃႇရုၼ်ႇ ယူႇတဵတ်ႇ တဵတ်ႇယူႇဢေႃႈ။
၄ မုဝ်းသေႇ ႁွင်ႉဢဝ် မိသေႇလ တင်းဢေႇလၸႃႇၽၢၼ်ႇ ဢၼ်ပဵၼ်လုၵ်ႈၸၢႆးဢေႃးၸေႇလ ပေႃႈလုင်းဢႃႇရုၼ်ႇ၊ၼၼ်ႉသေလႄႈလၢတ်ႈဝႃႈ၊-မႃးတႃႉ။ဢဝ်ပီႈၼွင်ႉၸိူဝ်ႉၶိူဝ်းသူဢွၵ်ႇသေၵႃႈတီႈၽၢႆႇၼႃႈ ထႃႇၼႃႉတီႈမူတ်းၸၢင်ႇၼႆႉၵႂႃႇၵႃႈၼွၵ်ႈတပ်ႉပုၼ်ႉ သေတႃႉ၊ဝႃႈၼင်ႇၼႆလႄႈ
၅ သွင်ၶႃၵေႃႈမႃးလႄႈဢဝ်တူဝ်တၢႆပီႈၼွင်ႉသွင်ၶႃ တင်းသိူဝ်ႈပူတ်းသွင်ၶႃဢွၵ်ႇၵႂႃႇၵႃႈၼွၵ်ႈတပ်ႉသေဢေႃႈ။
၆ မုဝ်းသေႇ လၢတ်ႈတီႈ ဢႃႇရုၼ်ႇတင်းလုၵ်ႈၸၢႆးမၼ်းဢေႇလႃႇၸႃႇ တင်းဢိသမႃႇလႄႈဝႃႈ၊-သူယႃႇပေၽေႇၶူၼ်ႁူဝ်သူ၊ယႃႇပသေိၵ်ႇၶူဝ်းၼုင်ႈတၢင်းမႆသူ။ပေႃးဢမ်ႇၼၼ်သူတၵ်းတၢႆလႄႈတၢင်းၸႂ်မႆႈၸဝ်ႈတၵ်းတူၵ်းႁွတ်ႈထိုင် ၵႃႈၼိူဝ်ပရိၵ်ႈသၢတ်ႈတင်းလၢႆၼၼ်ႉဢေႃႈ။ ၵူၺ်းၵႃႈႁႂ်ႈပီႈၼွင်ႉသူၵူၼ်းမဵဝ်းဢိသရေႇလ တင်းသဵင်ႈတင်းလူင်ၶင်းၶီၶင်းၽၢၼ်ႁွင်ႉႁႆႈ လူၺ်ႈလွင်ႈတၢင်းဢၼ်ၽႆးမႆႈဢၼ်ထႃႇ ဝရႃႉၽြႃးႁဵတ်းၼၼ်ႉတႃႉ။
၇ ၵွပ်ႈပိူဝ်ႈၵူဝ်သူတၵ်းတၢႆလႄႈယႃႇပေဢွၵ်ႇၵႃႈၼွၵ်ႈၽၵ်းတူသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈ။လွင်ႈမၼ်းၸမ်း၊ၼမ်ႉမၼ်းၽိၵ်ႈသိၵ်ႈထႃႇဝရႃႉၽြႃးမီးယူႇၵႃႈၼိူဝ်သူဢေႃႈ၊ ဝႃႈၼင်ၼႆလႄႈ ၶဝ်ဢွၼ်ၵၼ်ႁဵၼ်းၸွမ်းၵႃႈၼင်ႇဢၼ်မုဝ်း၈-၉ သေႇဝႃႈၼၼ်ႉဢေႃႈ။
၈-၉ ထႃႇဝရႃႉၽြႃးမီးဢမိင်ႉတီႈ ဢႃႇရုၼ်ႇလႄႈဝႃႈ၊-မႂ်းဢိၵ်ႇတင်းလုၵ်ႈၸၢႆးမႂ်းၸိူဝ်းၼႆႉလွင်ႈၼင်ႇႁိုဝ်တၵ်းလႆႈၵၢင်းလွတ်ႈတင်းၽေး တၢင်းတၢႆဢိၵ်ႇတင်း လွင်ႈၼင်ႇႁိုဝ်တၵ်းၸၢင်ႊၸၵ်းၽႄတၢင်းဢၼ်မူတ်းၸၢင်ႇလႂ် လွင်ႈတၢင်းဢၼ်ဢမ်ႇမူတ်းၸၢင်ႇ လႂ်လွင်ႈတၢင်းဢၼ်မူတ်းသႂ်လႂ်လွင်ႈတၢင်းဢၼ်ဢမ်ႇမူတ်းသႂ် လႂ်ၼၼ်ႉ
၁၀ ဢိၵ်ႇတင်းလွင်ႈၼင်ႇႁိုဝ် တၵ်းသင်ႇသွၼ်ပၼ်ပိင်းၺၢပ်ႈဢၼ်ထႃႇဝရႃႉၽြႃး ဢဝ် မုဝ်းသေႇ သင်ႇလၢတ်ႈဝႆႉၵႃႈမီးၼၼ်ႉတီႈၵူၼ်းမဵဝ်းဢိသရေႇလ တင်းလၢႆၸိုင်ယႃႇပေၵိၼ်ၼမ်ႉၸပိတ်ႈ တင်းၼမ်ႉလဝ်ႈမိူဝ်ႈဢၼ်သူၶဝ်ႈၵႃႈၼႂ်းသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈၼၼ်ႉ။
၁၁ ၼႆႉပဵၼ်ပိင်းၺၢပ်ႈ တီႈၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်ႈတၢမ်ႈတႃႇသေႇၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၂ မုဝ်းသေႇလၢတ်ႈတီႈဢႃႇရုၼ်ႇတင်းလုၵ်ႈၸၢႆးမၼ်း ဢၼ်ယင်းၵိုတ်းယင်းၵျၢၼ်ႇ ဢေႇလႃႇၸႃႇတင်းဢိသမႃႇၼၼ်ႉလႄႈဝႃႈ၊- ဢဝ်တၢင်းပုၵ်ႉၸေႃႇၽေႃးၸဵၼ်ႇ ဢၼ်ဢမ်ႇပႃးၸိူဝ်ႉပႅင်ႈဢၼ်ယင်းၵိုတ်းယင်းၵျၢၼ်ႇတီႈတၢင်းပုၵ်ႉၸေႃႇ ဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးၼၼ်ႉ၊ ၵိၼ်ၵႃႈတီႈႁိမ်း ယိၸ်ႉပလၢင်ႇတႃႉ။ပဵၼ်ဢၼ်မူတ်းၸၢင်ႇဢေႃႈ။
၁၃ တၵ်းလႆႈၵိၼ်ၵႃႈၼႂ်းထႃႇၼႃႉတီႈမူတ်းၸၢင်ႇ ၵွပ်ႈပိူဝ်ႈပဵၼ်ပုၼ်ႈဢၼ်မႂ်း ဢိၵ်ႇတင်းလုၵ်ႈၸၢႆးမႂ်းတင်းလၢႆထိူၵ်ႈၶၢမ်ႇဢဝ်ၵႃႈၼႂ်း တၢင်းပုၵ်ႉၸေႃႇဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးၼၼ်ႉဢေႃႈ။ၵဝ်တၵ်းလႆႈ ၶၢမ်ႇဢဝ်ပိင်းၺၢပ်ႈၸဝ်ႈၸိူဝ်ႉၼင်ႇၼၼ်ယဝ်ႉ။
၁၄ ဢူၵ်းဢၼ်ယွင်ႊၵႂႆ ဢိၵ်ႇတင်းၶႅပ်းၶႃဢၼ်ယုၵ်ႉယွင်ႈၼၼ်ႉၸမ်း မႂ်းဢိၵ်ႇတင်းလုၵ်ႈယိင်းလုၵ်ႈၸၢႆးမႂ်းတင်းလၢႆတၵ်းလႆႈၵိၼ်ၵႃႈၼႂ်းတီႈဢၼ်မူတ်းသႂ်ဢေႃႈ။ ပဵၼ်ပုၼ်ႈဢၼ်မႂ်း ဢိၵ်ႇတင်းလုၵ်ႈၸၢႆးမႂ်းတင်းလၢႆထိူၵ်ႈၶၢမ်ႇဢဝ်ၵႃၼႂ်းယိၸ်ႉမိၵ်ႉသႁႃႇယႃႉ ဢၼ်ၵူၼ်းမဵဝ်းဢိ သရေႇလတင်းလၢႆပုၵ်ႉၸေႃႇၸိူဝ်းၼၼ်ႉဢေႃႈ။
၁၅ ၶႅပ်းၶႃဢၼ်ယုၵ်ႉယွင်ႈ ဢိၵ်ႇတင်းဢူၵ်းဢၼ်ယွင်ႊၵႂႆၼၼ်ႉၸိုင်ၶဝ်တၵ်းလႆႈဢဝ်မႃးပႃးလူၺ်ႈၵၼ်တင်း ၵွၼ်ႈၶႆၵွၼ်ႈမၼ်းတူဝ်ယိၸ်ႉ ဢၼ်ဢဝ်တင်းၽႆးပုၵ်ႉၸေႃႇၸိူဝ်းၼၼ်ႉ ႁႂ်ႈလႆႈယွင်ႊၵႂႆပုၼ်ႈတၢင်းပုၵ်ႉၸေႃႇဢၼ်ယွင်ႊၵႂႆၵႃႈတီႈၽၢႆႇၼႃႈထႃႇဝရႃႉၽြႃးလႄႈ မႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆ တၵ်းလႆႈထိူၵ်ႈပိူင်ႇဢဝ်ယူႇသေလႄႈၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၆ ၵမ်းၼၼ်ႉ မုဝ်းသေႇ ၵျူဝ်းၸႃးႁႃပေႉဢၼ်ဢဝ်ႁဵတ်းယိၸ်ႉဢၼ်ၽေႇဢပျႅတ်ႈၼၼ်ႉသေၵေႃႈ ဢမ်ႇထူပ်းဢမ်ႇႁၼ်လႄႈ လႆႈႁူႉဝႃႈ ဢဝ်တုတ်ႇၽႆးပႅတ်ႈယဝ်ႉၼၼ်ႉၸိုင်မၼ်းၸႂ်မႆႈၶႂ်ႈၸႃႉတီႈ လုၵ်ႈၸၢႆးဢႃႇရုၼ်ႇဢၼ်ယင်းၵိုတ်းယင်းၵျၢၼ်ႇ ဢေႇလႃႇၸႃႇ တင်း ဢိသမႃႇ ၼၼ်ႉလႄႈဝႃႈ၊-
၁၇ ယိၸ်ႉဢၼ်ၽေႇဢပျႅတ်ႈၼၼ်ႉမူတ်းၸၢင်ႇၼႃႇလူင်လၢင်လႄႈ မၼ်းၸဝ်ႈပၼ်ယိၸ်ႉၼၼ်ႉ ပုၼ်ႈလွင်ႈၼင်ႇႁိုဝ်သူတၵ်းလႆႈၶၢမ်ႇဢဝ်ဢပျႅတ်ႈပရိၵ်ႈသၢတ်ႈတင်းလၢႆလႄႈ ႁဵတ်းတၢင်းဢၼ်ၽေႇဢပျႅတ်ႈ ပုၼ်ႈၶဝ်ၵႃႈတီႈၽၢႆႇၼႃႈ ထႃႇဝရႃႉၽြႃးၼၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူဢမ်ႇၵိၼ်တူဝ်ယိၸ်ႉၼၼ်ႉ ၵႃႈၼႂ်းထႃႇၼႃႉတီႈမူတ်းၸၢင်ႇ ၼၼ်ႉ။
၁၈ တူၺ်းလူႊ။လိူတ်ႈတူဝ်ယိၸ်ႉၼၼ်ႉၵေႃႈယင်းဢမ်ႇဢဝ်သႂ်ႇၵႃႈၼႂ်း ထႃႇၼႃႉတီႈမူတ်းၸၢင်ႇလူင်ၼၼ်ႉလူင်ပေႇ။သူလီၵိၼ်ယိၸ်ႉၼၼ်ႉၵႃႈၼႂ်းထႃႇၼႃႉတီႈမူတ်းၸၢင်ႇၼၼ်ႉ ဢမၢၼ်ႇၶၢၼ်ပဵၼ် ၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉမႃးယဝ်ႉၼၼ်ႉဢေႃႈ၊ ဝႃႈ ၼင်ႇၼႆသေယဝ်ႉ၊ ဢႃႇရုၼ်ႇ လၢတ်ႈတီႈမုဝ်းသေႇလႄႈဝႃႈ၊-
၁၉ တူၺ်းလူႊ။ဝၼ်းမိူဝ်ႈၼႆႉၶဝ်ဢွၼ်ၵၼ်ဢဝ်ယိၸ်ႉဢၼ်ၽေႇဢပျႅတ်ႈၶဝ် ဢိၵ်ႇတင်းယိၸ်ႉဢၼ်တုတ်ႇၽႆးၶဝ်ပုၵ်ႉၸေႃႇၶႃႈယဝ်ႉ။လွင်ႈတၢင်းဢၼ်ပဵၼ်ၸိူဝ်ႉၼင်ႇၼၼ်ၸိူဝ်းၼၼ်ႉ ႁွတ်ႈထိုင်ၵႃႈတီႈၵဝ်ၶႃႈယဝ်ႉၶႃႈယဝ်ႉ။သင်ၵဝ်ၶႃႈၵိၼ်မႅၼ်ႈယိၸ်ႉဢၼ်ၽေႇဢပျႅတ်ႈၼၼ်ႉဝၼ်းမိူဝ်ႈၼႆႉၸိုင် တၵ်းထုၵ်ႇၸႂ်ၵျိူၵ်ႈၸႂ်ထႃႇဝရႃႉၽြႃးၶႃႈႁိုဝ်၊ဝႃႈၼင်ႇၼႆဢေႃႈ။
၂၀မုဝ်းသေႇ ငိၼ်းၵႂၢမ်းၼၼ်ႉသေယဝ်ႉ ႁပ်ႉတုင်းဢဝ်ဢေႃႈ။