Chapter
၁၈
ၵႃႇမႃႉသိူၵ်ႈသမ်ႇဢၼ်ဢမ်ႇမႅၼ်ႈတြႃး
၁ ထႃႇဝရႃႉၽြႃး သမ်ႉမီးဢမိင်ႉတီႈမုဝ်းသေႇ လႄႈဝႃႈ ၸမ်း၊-
၂ သင်ႇလၢတ်ႈဝႆႉတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-ၵဝ်ပဵၼ်ထႃႇဝရႃႉၽြႃးၽြႃးပဵၼ်ၸဝ်ႈ သူဢေႃႈ။
၃ သူဢမ်ႇလႆႈၵမ်ၵျၢင်ႉၸွမ်းၼင်ႇတၢင်းၵမ်တၢင်းၵျၢင်ႉမိူင်းဢေႇၵႅပ်ႉတု ဢၼ်သူယူႇမႃးယဝ်ႉၼၼ်ႉ။သူဢမ်ႇလႆၵမ်ၵျၢင်ႉၸွမ်းၼင်ႇ တၢင်းၵမ်တၢင်းၵျၢင်ႉမိူင်းၶႃႇၼၢၼ်ႇ ဢၼ်ၵဝ်တၵ်းဢဝ်သူၵႂႃႇသူင်ႇၼၼ်ႉ။ၵႃႈတီႈသဵၼ်ႈတၢင်းပိင်းၺၢပ်ႈတြႃးၶဝ်ၼၼ်ႉၵေႃႈ သူ ဢမ်ႇလႆႈၵႂႃႇလႆႈၸွမ်း။
၄ သူတၵ်းလႆႈၵမ်ၵျၢင်ႉတၢင်းဢၼ်ၵဝ်ၸီႇၸၢင်ႇဝႆႉၸိူဝ်းၼၼ်ႉလႄႈ ပႂ်ႉႁဵတ်းႁႂ်ႈလႆႈၸွမ်းသဵၼ်ႈတၢင်းပိင်းၺၢပ်ႈတြႃးၵဝ်ၼၼ်ႉဢေႃႈ။
၅ ပိူဝ်ႈၼႆလႄႈ တၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈၵဝ်ဢိၵ်ႇတင်းတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉဢေႃႈ။ ၵေႃႉဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉၼၼ်ႉ ၵွပ်ႈပိူဝ်ႈတၢင်းၵမ်တၢင်းၵျၢင်ႉၼၼ်ႉလႄႈ ဢသၢၵ်ႈတၵ်းလိပ်းဢေႃႈ။ၵဝ်ပဵၼ်ထႃႇဝရႃႉၽြႃးဢေႃႈ။
၆ ၽူႈ လႂ်ၵေႃႈ တေဢမ်ႇလႆႈသုတ်ႉၸပ်းသုတ်ႉၸူးတီႈၵေႃႉဢၼ်ပဵၼ်ပီႈၼွင်ႉၸိူဝ်ႉၶိူဝ်းမၼ်းၼၼ်ႉသေလႄႈ ႁဵတ်းၵႃႈမႃႉသိူၵ်ႈသမ်ႇၵၼ်တင်းမၼ်းၼၼ်ႉ။
၇ ၵဝ်ပဵၼ်ထႃႇဝရႃႉၽြႃးဢေႃႈ။မႂ်းဢမ်ႇလႆႈႁဵတ်းတၢင်းဢၼ်လူႈလၢႆပေႃႈမႂ်း။ဢမ်ႇလႆႈႁဵတ်းၵႃႇမႃႉသိူၵ်ႈသမ်ႇ ၵၼ်တင်းၵေႃႉဢၼ်ပဵၼ်မေႈမႂ်းၼၼ်ႉ။
၈ ၵွပ်ႈပိူဝ်ႈပဵၼ်မေႈမႂ်းလႄႈ မႂ်းဢမ်ႇလႆႈႁဵတ်းတၢင်းဢၼ်ၵႃႇမႃႉသိူၵ်ႈသမ်ႇၵၼ်တင်းမၼ်း။ မႂ်းတၵ်းဢမ်ႇလႆႈႁဵတ်းတၢင်းဢၼ်ၵႃႇမႃႉသိူၵ်ႈသမ်ၵၼ်တင်းမေးပေႃႈမႂ်း။ပဵၼ်တၢင်းဢၼ် လူႈလၢႆႈပေႃႈမႂ်းဢေႃႈ။
၉ မႂ်းဢမ်ႇလႆႈႁဵတ်းၵႃႇမႃႉသိူၵ်ႈသမ်ႇၵၼ်တင်းပီႈၼၢင်းမႂ်း ၼွင်ႉယိင်းမႂ်းဢၼ်ပဵၼ်လုၵ်ႈယိင်းပေႃႈမႂ်း ဢမ်ႇၼၼ်လုၵ်ႈယိင်းမေႈမႂ်းဢၼ်ၵိူတ်ႇလဵင်ႉၼႂ်းႁိူၼ်းလဵဝ်ႈ ဢမ်ႇၼၼ်ဢၼ်ၵိူတ်ႇလဵင်ႉတၢင်ႇ တီႈၼၼ်ႉ။
၁၀ မႂ်းဢမ်ႇလႆႈႁဵတ်းၵႃႇမႃႉတၢင်းဢၼ်သိူၵ်ႈသမ်ႇၵၼ်တင်း လၢၼ်ယိင်းမႂ်း ဢၼ်ပဵၼ်လုၵ်ႈတီႈလုၵ်ႈယိင်းလုၵ်ႈၸၢႆးမႂ်း ဢမ်ႇၼၼ်ဢၼ်ပဵၼ်လုၵ်ႈတီႈလုၵ်ႈယိင်းလုၵ်ႈၸၢႆးမႂ်းၼၼ်ႉ။ ပဵၼ်တၢင်းဢၼ် ႁွတ်ႈထိုင်တၢင်းဢၼ်လူႈလၢႆဢေႃႈ။
၁၁ မႂ်းဢမ်ႇလႆႈႁဵတ်းၵႃႇမႃႉ တၢင်းဢၼ်သိူၵ်ႈသမ်ႇလူၺ်ႈၵၼ်တင်းလုၵ်ႈယိင်းမေႈသိုပ်ႇ ဢၼ်ပဵၼ်ပေႃႈလဵဝ်ၵၼ်တင်းမႂ်းၼၼ်ႉ။
၁၂ မၼ်းပဵၼ်ၼွင်ႉယိင်းမႂ်းဢေႃႈ။မႂ်းဢမ်ႇလႆႈႁဵတ်းတၢင်းဢၼ် ၵႃႇမႃႉသိူၵ်ႈသမ်ႇၵၼ်တင်းပီႈၼၢင်းၼွင်ႉယိင်း ပေႃႈမႂ်းၼၼ်ႉ။
၁၃ ပဵၼ်ပီႈၼွင်ႉဢွၵ်ႇပေႃႈမႂ်းဢေႃႈ။မႂ်းဢမ်ႇလႆႈႁဵတ်းၵႃႇမႃႉတၢင်းဢၼ်သိူၵ်ႈသမ်ႇၵၼ်တင်းပီႈ ၼၢင်းၼွင်ႉယိင်းမေႈမႂ်းၼၼ်ႉ။ပဵၼ်ပီႈၼွင်ႉဢွၵ်ႇမေႈမႂ်းဢေႃႈ။
၁၄ မႂ်းဢမ်ႇလႆႈႁဵတ်းၵႃႇမႃႉတၢင်းဢၼ်သိူၵ်ႈသမ်ႇၵၼ်တင်းပီႈၸၢႆးၼွင်ႉၸၢႆးပေႃႈမႂ်းၼၼ်ႉ။မႂ်းဢမ်ႇလႆႈ သုတ်ႉၸပ်းသုတ်ႉၸူးတီႈမေးမၼ်း။
၁၅ ပဵၼ်မေႈပႃႈမေႈဢႃႈမႂ်းဢေႃႈ။ မႂ်းဢမ်ႇလႆႈႁဵတ်းၵႃႇမႃႉတၢင်းဢၼ်သိူၵ်ႈသမ်ႇၵၼ်တင်းလုၵ်ႈပႂ်ႉမႂ်းၼၼ်ႉ။ မၼ်းပဵၼ်မေး လုၵ်ႈၸၢႆးမႂ်းဢေႃႈ။
၁၆ မႂ်းဢမ်ႇလႆႈႁဵတ်းၵႃႇမႃႉတၢင်းဢၼ်သိူၵ်ႈသမ်ႇၵၼ်တင်းမေးပီႈၸၢႆးၼွင်ႉၸၢႆးမႂ်းၼၼ်ႉ။ ပဵၼ်တၢင်းဢၼ်လူႈလၢႆပီႈၸၢႆးၼွင်ႉၸၢႆးမႂ်း ၼၼ်ႉဢေႃႈ။
၁၇ မႂ်းဢမ်ႇလႆႈႁဵတ်းၵႃႇမႃႉတၢင်းဢၼ်သိူၵ်ႈသမ်ႇၵၼ်တင်းမေႈယိင်းၵေႃႉၼိုင်ႈ ဢိၵ်ႇတင်းလုၵ်ႈယိင်းမၼ်း။ မႂ်းဢမ်ႇလႆႈႁဵတ်းၵႃႇမႃႉသူၵ်ႈသမ်ႇၵၼ်တင်းလုၵ်ႈယိင်းလုၵ်ႈၸၢႆးမၼ်း၊ဢမ်ႇၼၼ်ၵေႃႈ ၵႃႈတီႈလုၵ်ႈယိင်းလုၵ်ႈယိင်းမၼ်းၼၼ်ႉ။ပဵၼ်ပီႈၼွင်ႉဢွၵ်ႇမေႈယိင်းၼၼ်ႉဢေႃႈ။ ပဵၼ်လွင်ႈတၢင်းဢၼ်ဢမ်ႇတြႃးဢေႃႈ။
၁၈ ၼႂ်းမိူဝ်ႈဢၼ်မေးမႂ်းယင်းဢသၢၵ်ႈလိပ်းယူႇၼၼ်ႉ မႂ်းတၵ်းဢမ်ႇလႆႈသိမ်းဢဝ်ၼွင်ႉယိင်းမၼ်းႁႂ်ႈလႆႈႁဵတ်း တၢင်းဢၼ်ၵႃႇမႃႉသိူၵ်ႈသမ်ႇလူၺ်ႈၵၼ် တင်းမၼ်း။
၁၉ မႂ်းတၵ်းဢမ်ႇလႆႈႁဵတ်းၵႃႇမႃႉသိူၵ်ႈသမ်ႇလူၺ်ႈၵၼ်တင်းမေႈယိင်း ယင်းတိုၵ်ႉဢမ်ႇမူတ်းသႂ်ၵွပ်ႈ ပိူဝ်ႈဢူႉတူႉမၼ်းမႃးယူႇၼၼ်ႉ။
၂၀ မႂ်းတၵ်းဢမ်ႇလႆႈၵႃႇမႃႉသိူၵ်ႈသမ်ႇလူၺ်ႈၵၼ်တင်းမေးပိူၼ်ႈ ႁႂ်ႈတူဝ်ၸဝ်ႈၵဝ်ႇ လႆႈၵူဝ်ႈၵိူၵ်ႇ။
၂၁ မႂ်းဢမ်ႇလႆႈဢဝ်လုၵ်ႈလၢင်းၸိူဝ်ႉၶိူဝ်းမႂ်းသေၵေႃႉသေၵူၼ်း ပၼ်ႁႂ်ႈၶဝ်လႆႈၶၢမ်ႇတၢင်းဢၼ်ဢဝ်ႆးပုၵ်ႉၸေႃႇတီႈၸဝ်ႈၽြႃးမူႇလွၵ်ႇၼၼ်ႉ။မႂ်းဢမ်ႇလႆႈဢဝ် ၼႃႇမႃႉၸိုဝ်သဵင်ၽြႃးပဵၼ်ၸဝ်ႈမႂ်း ၶျႃးတူၵ်းတီႈတႅမ်ႇ။
၂၂ ၵဝ်ပဵၼ်ထႃႇဝရႃႉၽြႃးဢေႃႈ။မႂ်းဢမ်ႇလႆႈၼွၼ်းလူၺ်ႈၵၼ်တင်းၵူၼ်းၸၢႆး မိူၼ်ၸိူဝ်ႉၼင်ႇဢၼ်ၼွၼ်းလူၺ်ႈၵၼ်တင်းမေႈယိင်းၼၼ်ႉ။ ပဵၼ်လွင်ႈ တၢင်းဢၼ်လီႁင်ႈဢဵတ်ႇသဵတ်ႇဢေႃႈ။
၂၃ မႂ်းဢမ်ႇလႆႈၵႃႇမႃႉသိူၵ်ႈသမ်ႇၵၼ်တင်းတရိၵ်ႈသၢၼ်ႇ ႁႂ်ႈတူဝ်ၸဝ်ႈၵဝ်ႇလႆႈၵူဝ်ႈၵိူၵ်ႇ။မေႈယိင်းၵေႃႈဢမ်ႇလႆႈယူႇၵႃႈတီႈၽၢႆႇၼႃႈတရိၵ်ႈသၢၼ်ႇသေလႄႈ ႁႂ်ႈလႆႈၶၢမ်ႇတၢင်းဢၼ်ႁဵတ်းၵႃႇမႃႉသိူၵ်ႈသမ်ႇလူၺ်ႈၵၼ်တင်းတူဝ်ၸဝ်ႈၵဝ်ႇ။ပဵၼ်တၢင်းဢၼ်လီႁင်ႈဢဵတ်ႇသဵတ်ႇဢေႃႈ။
၂၄ တူဝ်ၸဝ်ႈၵဝ်ႇ ဢမ်ႇလႆႈဢဝ်လွင်ႈတၢင်းၸိူဝ်းၼႆႉသေလႄႈႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇ။ၵူၼ်းမဵဝ်းဢၼ်ၵဝ်ႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈသူၸိူဝ်းၼၼ်ႉ ႁဵတ်းလွင်ႈတၢင်းၸိူဝ်းၼႆႉတင်းသဵင်ႈတင်းလူင်လႄႈ ၵူဝ်ႈၵိူၵ်ႇ ၵူႈမဵဝ်းဢေႃႈ။
၂၅ မိူင်းၶဝ်ၼၼ်ႉၵေႃႈၵူဝ်ႈၵိူၵ်ႇဢေႃႈ။ပိူဝ်ႈၼႆလႄႈ ၵဝ်တၵ်းပၼ်တၢမ်ႇၵွပ်ႈပိူဝ်ႈဢပျႅတ်ႈဢၼ်ဢမ်ႇတြႃးၼၼ်ႉတီႈမိူင်းၼၼ်ႉလႄႈ မိူင်းၼၼ်ႉတၵ်း တူၼ်ႉႁၢၵ်ႈၵူၼ်းမၼ်းတင်းလၢႆဢွၵ်ႇပႅတ်ႈဢေႃႈ။
၂၆ သူၸမ်းတၵ်းလႆႈပႂ်ႉၵမ်ပႂ်ႉၸွမ်း ပိင်းၺၢပ်ႈတြႃးၵဝ်ဢိၵ်ႇတင်းလွင်ႈတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉ ဢေႃႈ။
၂၇ လွင်ႈၼင်ႇႁိုဝ်မိူင်းၼၼ်ႉတၵ်းဢမ်ႇလႆႈတူၼ်ႉႁၢၵ်ႈသူ ဢွၵ်ႇပႅတ်ႈၼႂ်းမိူဝ်ႈဢၼ်သူႁႂ်ႈမၼ်းၵူဝ်ႈၵိူၵ်ႇၼၼ်ႉ မိူၼ်ၸိူဝ်ႉၼင်ႇဢၼ်တူၼ်ႉႁၢၵ်ႈၵူၼ်းမဵဝ်းဢၼ်မီးဢွၼ်တၢင်းသူဢွၵ်ႇပႅတ်ႈၼၼ်ႉၸိုင် ၵူၼ်းမဵဝ်းတူဝ်ၸဝ်ႈၵဝ်ႇသေဢမ်ႇဝႃႈ၊ ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၵႃႈၼႂ်းသူသေဢမ်ႇဝႃႈ ဢမ်ႇလႆႈႁဵတ်း လွင်ႈတၢင်းဢၼ်လီႁင်ႈဢဵတ်ႇသဵတ်ႇၸိူဝ်ႉၼင်ႇၼၼ်ၼၼ်ႉ။
၂၈ ၵူၼ်းဝၢၼ်ႈၵူၼ်းမိူင်းဢၼ်မီးဢွၼ်တၢင်းသူၸိူဝ်းၼၼ်ႉ ႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇတင်းသဵင်ႈတင်းလူင်ၸိူဝ်းၼၼ်ႉလႄႈ မိူင်းၶဝ်မီး တၢင်းဢၼ်ၵူဝ်ႈၵိူၵ်ႇဢေႃႈ။
၂၉ ၵေႃႉဢၼ်ႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇ ၸိူဝ်ႉၼင်ႇၼၼ်ၼၼ်ႉၸမ်းတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေ ၵႃႈၼႂ်းမဵဝ်း ၸိူဝ်ႉၶိူဝ်းမၼ်းဢေႃႈ။
၃၀ ပိူဝ်ႈၼႆလႄႈလွင်ႈၼင်ႇႁိုဝ်သူတၵ်းဢမ်ႇၸွမ်းထုင်းၾိင်ႈ ဢၼ်လီႁင်ႈဢဵတ်ႇသဵတ်ႇ
ဢၼ်ယၢမ်ႈလႆႈႁဵတ်းမႃးယဝ်ႉမိူဝ်ႈဢွၼ်တၢင်းသူၼၼ်ႉၸိူဝ်းၼၼ်ႉသေလႄႈ ႁဵတ်းႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇၸိုင် တၵ်းလႆႈပႂ်ႉၵမ်ပႂ်ႉၸွမ်း ပိင်းၺၢပ်ႈတြႃးၵဝ်ဢေႃႈ။ ၵဝ်ပဵၼ်ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။