Chapter
၇
တၢင်းပုၵ်ႉၸေႃႇပုၼ်ႈတၢင်းၽိတ်း
၁ တြႃးတၢင်းဢၼ်ပုၵ်ႉၸေႃႇယိၸ်ႉ ဢၼ်ၽေႇတူႉၸရိူၵ်ႈၸမ်း ပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။
၂ ၶဝ်တၵ်းလႆႈဢဝ် တူဝ်ယိၸ်ႉဢၼ်ၽေႇတူႉၸရိူၵ်ႈတၢႆၵႃႈၼႂ်းတီႈဢၼ်ၶဝ်ဢဝ်တူဝ်ယိၸ်ႉဢၼ်တုတ်ႇၽႆးၼၼ်ႉတၢႆလႄႈဢဝ်လိူတ်ႈမၼ်းၽႅတ်းသႂ်ႇလဵပ်ႈႁွပ်ႈ ၵႃႈၼိူဝ်ယိၸ်ႉပလၢင်ႇဢေႃႈ။
၃ မၼ်းတၵ်းလႆႈဢဝ်ၵွၼ်ႈၶႆၵွၼ်ႈမၼ်း ၵႃႈဢၼ်မီးၵႃႈၼႂ်းတူဝ်ယိၸ်ႉၼၼ်ႉသၢၵ်ႈ ၵၢပ်ႈဢေႃႈ။
၄ မၼ်းတၵ်းလႆႈဢဝ်ႁၢင်မၼ်းဢိၵ်ႇတင်းၵွၼ်ႈၶႆၵွၼ်ႈမၼ်းဢၼ်ႁူမ်ႇသႆႈမၼ်း မၢၵ်ႇလၼ်းသွင်ႁူၺ်ႇတင်းၵွၼ်ႈၶႆၵွၼ်ႈမၼ်း မၢၵ်ႇလၼ်းဢၼ်မီးၵႃႈႁိမ်းဢႅဝ်မၼ်း၊ၽၢင်ႇၽၢပ်ႈဢၼ်မီးၵႃႈၼိူဝ်တပ်းမၼ်းဢိၵ်ႇတင်း မၢၵ်ႇလၼ်းၸိူဝ်းၼၼ်ႉဢွၵ်ႇလႄႈ
၅ ယိတ်ႉပရေႃးႁိၵ်ႈ တၵ်းလႆႈဢဝ်တုတ်ႇၽႆး ၵႃႈၼိူဝ်ယိၸ်ႉပလၢင်ႇ ပုၼ်ႈတၢင်းပုၵ်ႉၸေႃႇဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးဢေႃႈ။ ပဵၼ်ယိၸ်ႉဢၼ် ၽေႇတူႉၸရိူၵ်ႈဢေႃႈ။
၆ ယိတ်ႉပရေႃးႁိၵ်ႈၵူၼ်းၸၢႆးတၵ်းလႆႈဢွၼ်ၵၼ်ဢဝ်ၵႃႈၼႂ်းတူဝ်ယိၸ်ႉၼၼ်ႉ ၵိၼ်ၵူႈၵေႃႉၵူႈၵူၼ်းဢေႃႈ။တၵ်းလႆႈၵိၼ်ၵႃႈၼႂ်းထႃႇၼႃႉတီႈမူတ်းၸၢင်ႇၼၼ်ႉဢေႃႈ။ ပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။
၇ ယိၸ်ႉဢၼ်ၽေႇတူႉၸရိူၵ်ႈပဵၼ်မိူၼ်ၸိူဝ်ႉၼင်ႇယိၸ်ႉဢၼ်ၽေႇဢပျႅတ်ႈလႄႈ မီးတြႃးပႃးလဵဝ်ၵူၺ်းဢေႃႈ။ယိတ်ႉပရေႃးႁိၵ်ႈဢၼ်တၵ်းႁဵတ်းတၢင်းဢၼ်ၽေႇဢပျႅတ်ႈတူႉၸရိူၵ်ႈၼၼ်ႉတၵ်းလႆႈဢဝ်ဢေႃႈ။
၈ ယိတ်ႉပရေႃးႁိၵ်ႈဢၼ်ႁဵတ်းတၢင်းပုၵ်ႉၸေႃႇယိၸ်ႉဢၼ်တုတ်ႇၽႆး ပုၼ်ႈသေၵေႃႉသေၵူၼ်းၼၼ်ႉတၵ်းလႆႈဢဝ်ၼင်တူဝ်ယိၸ်ႉဢၼ်မၼ်းပုၵ်ႉၸေႃႇ ၼၼ်ႉပုၼ်ႈမၼ်းဢေႃႈ။
၉ တၢင်းပုၵ်ႉၸေႃႇၽေႃးၸဵၼ်ႇဢၼ်ၶူဝ်ႈႁႅင်ႈၵႃႈၼိူဝ်ၽီးၽႆး တင်းမိူင်ႈတင်းၶႅပ်းလဵၵ်းၼၼ်ႉယိတ်ႉပရေႃးႁိၵ်ႈဢၼ်ဢဝ်ပုၵ်ႉၸေႃႇၼၼ်ႉ တၵ်း လႆႈဢဝ်ဢေႃႈ။
၁၀ တၢင်းပုၵ်ႉၸေႃႇၽေႃးၸဵၼ်ႇဢၼ်ဢဝ်ၼမ်ႉမၼ်းသႂ်ႇလေႃးသေဢမ်ႇဝႃႈ ဢၼ်ဢမ်ႇသႂ်ႇလေႃးသေဢမ်ႇဝႃႈ ၵႃႈမီးၼၼ်ႉၸိုင်လုၵ်ႈၸၢႆးဢႃႇရုၼ်ႇတင်းသဵင်ႈတင်းလူင် တၵ်းလႆႈဢဝ်ပဵင်းပဵင်းၵၼ်ဢေႃႈ။
တၢင်းပုၵ်ႉၸေႃႇမိၵ်ႉသႁႃႇယႃႉ
၁၁ တြႃးတၢင်းဢၼ်ပုၵ်ႉၸေႃႇ ယိၸ်ႉမိၵ်ႉသႁႃႇယႃႉဢၼ်တၵ်းလႆႈႁဵတ်းတီႈထႃႇဝရႃႉၽြႃးၼၼ်ႉၸမ်း ပေႃးပုၵ်ႉ ၸေႃႇ ပုၼ်ႈဢၼ်တၵ်းႁပ်ႉတုင်းဢဝ် ၵျေးၸူးၸဝ်ႈၸိုင်
၁၂ တၵ်းလႆႈဢဝ်ၶဝ်ႈမုၼ်းၶႅပ်ဢၼ်ဢမ်ႇပႃးၸိူဝ်ႉပႅင်ႈဢၼ်ဢဝ်ၼမ်ႉမၼ်းသႂ်ႇလေႃး၊ ၶဝ်ႈမုၼ်းၶွပ်ႈဢၼ်ဢမ်ႇပႃးၸိူဝ်ႉပႅင်ႈဢၼ်ဢဝ်တင်းၼမ်ႉမၼ်းတႃး၊ ၶဝ်ႈမုၼ်းၶႅပ်း ဢၼ်ဢဝ်ၽွင်ၶဝ်ႈမုၼ်းဢၼ်ဢဝ်ၼမ်ႉမၼ်းသႂ်ႇလေႃးသေလႄႈ ၶူဝ်ႈၸိူဝ်းၼၼ်ႉပုၵ်ႉၸေႃႇလူၺ်ႈၵၼ်တင်းယိၸ်ႉဢၼ်ႁပ်ႉတုင်းဢဝ်ၵျေးၸူးၸဝ်ႈ ၼၼ်ႉဢေႃႈ။
၁၃ လိူဝ်သေၶဝ်ႈမုၼ်းၶႅပ်းၼၼ်ႉၶဝ်ႈမုၼ်းဢၼ်ပႃးၸိူဝ်ႉပႅင်ႈၵေႃႈ တၵ်းလႆႈဢဝ်ပုၵ်ႉၸေႃႇလူၺ်ႈၵၼ်တင်းယိၸ်ႉဢၼ်ႁပ်ႉတုင်းၵျေးၸူးၸဝ်ႈဢၼ်ၸၢပ်ႈသႅင်ႇၵၼ်တင်း တၢင်းပုၵ်ႉၸေႃႇမိၵ်ႉသႁႃႇယႃႉ ၼၼ်ႉဢေႃႈ။
၁၄ ၵႃႈၼႂ်းတၢင်းပုၵ်ႉၸေႃႇၵႃႈမီးတင်းသဵင်ႈတင်းလူင်ၼၼ်ႉ တၵ်းလႆႈဢဝ်ယေႈၶႅပ်းယေႈၶႅပ်းၵူႈဢၼ်ႁဵတ်းတၢင်းပုၵ်ႉၸေႃႇဢၼ်ယုၵ်ႉယွင်ႈလႄႈ ပဵၼ်ပုၼ်ႈယိတ်ႉပရေႃးႁိၵ်ႈ ဢၼ်ဢဝ်လိူတ်ႈယိၸ်ႉမိၵ်ႉသ ႁႃႇယႃႉၽႅတ်းၼၼ်ႉဢေႃႈ။
၁၅ ၼိူဝ်ႉယိၸ်ႉမိၵ်ႉသႁႃႇယႃႉဢၼ်ပုၵ်ႉၸေႃႇ ပုၼ်ႈဢၼ်တၵ်းႁပ်ႉတုင်းဢဝ်ၵျေးၸူးၸဝ်ႈၼၼ်ႉၸိုင် တၵ်းလႆႈၵိၼ်ၼႂ်းဝၼ်းဢၼ်ပုၵ်ႉၸေႃႇၼၼ်ႉၵမ်းလဵဝ်ဢေႃႈ။ဢမ်ႇလႆႈၵိုတ်းလႆႈၵျၢၼ်ႇဝႆႉတေႃႇ ထိုင်ႁွတ်ႈၶိင်ႇၵၢင်ၼႂ်။
၁၆ ၼွၵ်ႈသေၼႆႉပေႃးတၢင်းပုၵ်ႉၸေႃႇမၼ်းၼၼ်ႉ ပဵၼ်တၢင်းဢၼ်ႁဵတ်းၵတိသႅတ်ႉၸႃႇလႄႈပုၵ်ႉၸေႃႇယိၸ်ႉ ဢမ်ႇၼၼ် ပဵၼ်တၢင်းဢၼ်ၸွမ်းၸေႇတၼႃႇတူဝ်ၸဝ်ႈၵဝ်ႇလႄႈ ပုၵ်ႉၸေႃႇၼၼ်ႉၸိုင်တၵ်းလႆႈၵိၼ်ၼႂ်းဝၼ်းဢၼ်ပုၵ်ႉၸေႃႇၼၼ်ႉ ၵမ်းလဵဝ်လႄႈ ဢၼ်ၵိုတ်းဢၼ်ၵျၢၼ်ႇၵေႃႈတၵ်းလႆႈၵိၼ်ဝၼ်း မိူဝ်ႈၽုၵ်ႈဢေႃႈ။
၁၇ ၼိူဝ်ႉယိၸ်ႉတၢင်းပုၵ်ႉၸေႃႇဢၼ်ယင်းၵိုတ်းယင်းၵျၢၼ်ႇၼၼ်ႉၵေႃႈ တၵ်းလႆႈဢဝ်တုတ်ႇၽႆး ဝၼ်းမိူဝ်ႈႁိုဝ်းဢေႃႈ။
၁၈ ပေႃးၵိၼ်မႅၼ်ႈၼိူဝ်ႉယိၸ်ႉမိၵ်ႉသႁႃႇယႃႉဢိတ်းၼိုင်ႈ ၼႂ်းဝၼ်းမိူဝ်ႈႁိုဝ်းၼၼ်ႉၸိုင်ဢမ်ႇထုၵ်ႇၵၼ်တင်းၸႂ်မၼ်းၸဝ်ႈ၊ ဢမ်ႇမၢတ်ႈပဵၼ်တၢင်းဢၼ်မီးဢၵျူဝ်း တီႈၵေႃႉဢၼ်ပုၵ်ႉၸေႃႇၼၼ်ႉ။ပဵၼ်ဢၼ်လီႁင်ႈဢဵတ်ႇသဵတ်ႇဢေႃႈ။
၁၉ ၵေႃႉဢၼ်ၵိၼ် ၼၼ်ႉတၵ်းလႆႈၶၢမ်ႇဢပျႅတ်ႈတူဝ်ၸဝ်ႈၵဝ်ႇဢေႃႈ။ၼိူဝ်ႉယိၸ်ႉဢၼ်တိူဝ်ႉထုၵ်ႇမႅၼ်ႈ လွင်ႈတၢင်းဢၼ်ဢမ်ႇမူတ်းသႂ်သေၸိူဝ်ႉသေပိူင်ၼၼ်ႉၸိုင်ဢမ်ႇလႆႈၵိၼ် တၵ်းလႆႈဢဝ်တုတ်ႇၽႆးဢေႃႈ။ၶဝ်ၸိူဝ်းဢၼ်မူတ်းသႂ်ၼၼ်ႉ ၵူၺ်းတၵ်းလႆႈၵိၼ်ၼိူဝ်ႉယိၸ်ႉဢေႃႈ။
၂၀ ၽူႈ လႂ်သေဢမ်ႇဝႃႈ ၵေႃႉဢၼ်ယင်းမီးတၢင်းဢၼ်ဢမ်ႇမူတ်းသႂ်ယူႇလႄႈ ၵိၼ်ၼိူဝ်ႉယိၸ်ႉမိၵ်ႉသႁႃႇယႃႉဢၼ်ၸၢပ်ႈသႅင်ႇၵၼ်တင်းထႃႇဝရႃႉၽြႃးၼၼ်ႉ၊ ၵေႃႉၼၼ်ႉတၵ်းလႆႈၶၢမ်ႇတၢင်းဢၼ် ပႄႇပႅတ်ႈသေၵႃႈၼႂ်းၸိူဝ်ႉၶိူဝ်းမၼ်း ဢေႃႈ။
၂၁ ၽူႈ လႂ်သေဢမ်ႇဝႃႈ ၵေႃႉဢၼ်တိူဝ်ႉထုၵ်ႇမႅၼ်ႈလွင်ႈတၢင်းဢၼ်ဢမ်ႇမူတ်းသႂ် သေၸိူဝ်ႉသေပိူင်ဢၼ်ဝႃႈ လွင်ႈတၢင်းဢၼ်ဢမ်ႇမူတ်းသႂ်ၵႃႈတီႈၵူၼ်းၵႃႈတီႈတရိၵ်ႈသၢၼ်ႇ ဢၼ်ဢမ်ႇမူတ်းသႂ်၊တူဝ်းဢၼ်လီႁင်ႈဢဵတ်ႇသဵတ်ႇ ဢၼ်ဢမ်ႇမူတ်းသႂ်ၼၼ်ႉလႄႈၵိၼ်ၼိူဝ်ႉယိၸ်ႉမိၵ်ႉသႁႃႇယႃႉ ဢၼ်ၸၢပ်ႈသႅင်ႇၵၼ်တင်းထႃႇဝရႃႉၽြႃးၼၼ်ႉ ၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေ ၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ၊ဝႃႈၼင်ႇၼႆဢေႃႈ။
ဢမ်ႇလႆႈၵိၼ်ၵွၼ်ႈၶႆၵွၼ်ႈမၼ်းတင်းလိူတ်ႈ
၂၂ ထႃႇဝရႃႉၽြႃး သမ်ႉမီးဢမိင်ႉတီႈမုဝ်းသေႇ လႄႈဝႃႈ ၸမ်း၊-
၂၃ မႂ်းသင်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-သူဢမ်ႇလႆႈၵိၼ်ၵွၼ်ႈၶႆၵွၼ်ႈမၼ်းဝူဝ်း၊ သူဝ်း၊ပေႉလႃးလႃး။
၂၄ ၵွၼ်ႈၶႆၵွၼ်ႈမၼ်းတရိၵ်ႈသၢၼ်ႇဢၼ်တၢႆႁင်းမၼ်း ၵွၼ်ႈၶႆၵွၼ်ႈမၼ်းတရိၵ်ႈသၢၼ်ႇဢၼ်တူဝ်ႁၢႆႉၶူပ်းလႄႈတၢႆၼၼ်ႉ ပိၵ်ႉသမ်ႉလႆႈဢဝ်သုင်းႁဵတ်းတၢင်ႇၸိူဝ်ႉတၢင်ႇပိူင်သေၵေႃႈ ဢမ်ႇလႆႈၵိၼ်လႃး လႃး။
၂၅ ၽူႈ လႂ်သေဢမ်ႇဝႃႈၵေႃႉဢၼ်ၵိၼ်ၵွၼ်ႈၶႆၵွၼ်ႈမၼ်းတရိၵ်ႈသၢၼ်ႇဢၼ်ဢဝ်တင်းၽႆးတုတ်ႇႁဵတ်းတၢင်းပုၵ်ႉၸေႃႇတီႈ ထႃႇဝရႃႉၽြႃးၼၼ်ႉၵေႃႉၼၼ်ႉတၵ်းလႆႈၶၢမ်ႇ တၢင်းဢၼ်ပႄႇပႅတ်ႈသေၵႃႈၼႂ်းမဵဝ်း ၸိူဝ်ႉၶိူဝ်းမၼ်းဢေႃႈ။
၂၆ သူဢမ်ႇလႆႈၵိၼ်ၸႃႉၸဵမ်လိူတ်ႈၼူၵ်ႉလႄႈ လိူတ်ႈတရိၵ်ႈသၢၼ်ႇလိူတ်ႈသေၸိူဝ်ႉသေမဵဝ်း ၵႃႈၼႂ်းတီႈဢၼ်သူယူႇသူသဝ်းၼၼ်ႉလႃးလႃး။
၂၇ ၽူႈ လႂ်သေဢမ်ႇဝႃႈ ၵေႃႉဢၼ်ၵိၼ်လိူတ်ႈသေၸိူဝ်ႉသေပိူင်ၼၼ်ႉၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈ ၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
ပုၼ်ႈယိတ်းပရေႃးႁိၵ်ႈ
၂၈ ထႃႇဝရႃႉၽြႃး သမ်ႉမီးဢမိင်ႉတီႈမုဝ်းသေႇ လႄႈဝႃႈၸမ်း၊-
၂၉ မႂ်းသင်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-ၵေႃႉဢၼ်ပုၵ်ႉၸေႃႇယိၸ်ႉမိၵ်ႉသႁႃႇယႃႉတီႈထႃႇဝရႃႉၽြႃးၼၼ်ႉ တၵ်းလႆႈဢဝ်ပုၼ်ႈဢၼ်မၼ်းတၵ်းသၢၵ်ႈၵၢပ်ႈတီႈ ထႃႇဝရႃႉၽြႃးၼၼ်ႉၵႃႈၼႂ်းယိၸ်ႉမိၵ်ႉသႁႃႇယႃႉ ဢၼ်မၼ်းပုၵ်ႉၸေႃႇၼၼ်ႉ မႃးဢေႃႈ။
၃၀ တူဝ်ၸဝ်ႈၵဝ်ႇတၵ်းလႆႈဢဝ်မိုဝ်းတူဝ်ၸဝ်ႈၵဝ်ႇဢဝ်ၶိူင်ႈပိူင်ဢၼ်ဢဝ်တင်းၽႆး ပုၵ်ႉၸေႃႇတီႈထႃႇဝရႃႉၽြႃးၼၼ်ႉမႃးဢေႃႈ။ မၼ်းတၵ်းလႆႈဢဝ်ၵွၼ်ႈၶႆၵွၼ်ႈမၼ်းမၼ်း ဢိၵ်ႇတင်း ဢူၵ်းမၼ်းမႃးႁႂ်ႈလႆႈႁဵတ်းတၢင်းပုၵ်ႉၸေႃႇ ဢၼ်ဢဝ်ဢူၵ်းမၼ်းယွင်ႊၵႂႆၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉလႄႈ ယွင်ႊၵႂႆဢေႃႈ။
၃၁ ယိတ်ႉပရေႃးႁိၵ်ႈ တၵ်းလႆႈဢဝ်ၵွၼ်ႈၶႆၵွၼ်ႈမၼ်းၼၼ်ႉတုတ်ႇၽႆး ၵႃႈၼိူဝ်ယိၸ်ႉပလၢင်ႇလႄႈ ဢူၵ်းမၼ်းၼၼ်ႉတၵ်းလႆႈပဵၼ်ပုၼ်ႈဢႃႇရုၼ်ႇတင်းလုၵ်ႈၸၢႆး မၼ်းတင်းလၢႆဢေႃႈ။
၃၂ ၶႅပ်းၶႃၶွၼ်ၶႂႃမၼ်းၼၼ်ႉၸိုင်သူတၵ်းလႆႈဢဝ် ၵႃႈၼႂ်း ယိၸ်ႉမိၵ်ႉသႁႃႇယႃႉၼၼ်ႉလႄႈ ပၼ်တီႈယိတ်ႉပရေႃးႁိၵ်ႈပုၼ်ႈတၢင်းပုၵ်ႉၸေႃႇ ဢၼ်ယုၵ်ႉယွင်ႈဢေႃႈ။
၃၃ ၼႂ်းလုၵ်ႈၸၢႆးဢႃႇရုၼ်ႇၸိူဝ်းၼၼ်ႉ ၵေႃႉဢၼ်ပုၵ်ႉၸေႃႇလိူတ်ႈတင်းၵွၼ်ႈၶႆၵွၼ်ႈမၼ်းယိၸ်ႉမိၵ်ႉသႁႃႇယႃႉၼၼ်ႉ တၵ်းလႆႈဢဝ်ၶႅပ်းၶႃ ၶွၼ်ၶႂႃၼၼ်ႉပုၼ်ႈမၼ်းဢေႃႈ။
၃၄ ဢူၵ်းဢၼ်ယွင်ႊၵႂႆတင်းၶႅပ်းၶႃဢၼ်ယုၵ်ႉယွင်ႈၼၼ်ႉၸိုင် ၵဝ်ၼုၵ်ႈဢွၵ်ႇၵႃႈၼႂ်းယိၸ်ႉမိၵ်ႉသႁႃႇယႃႉ ဢၼ်ၵူၼ်းမဵဝ်းဢိသရေႇလတင်းလၢႆႁဵတ်းၼၼ်ႉလႄႈ ဢဝ်တင်းပိင်းၺၢပ်ႈထႃႇဝရႃႉဢၢပ်ႈပၼ်တီႈယိတ်ႉပရေႃးႁိၵ်ႈဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ ၵႃႈၼႂ်းၵူၼ်းမဵဝ်းဢိသရေႇလတင်းလၢႆယဝ်ႉ၊ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
၃၅ ဢၼ်ၼႆႉၸမ်းပဵၼ်ပုၼ်ႈဢၼ်ဢႃႇရုၼ်ႇ ဢိၵ်ႇတင်းလုၵ်ႈၸၢႆးမၼ်းတင်းလၢႆ တၵ်းလႆႈၶၢမ်ႇဢဝ်ၵႃႈၼႂ်းတၢင်းပုၵ်ႉၸေႃႇ ဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃး ၼႂ်းၶိင်ႇဝၼ်းဢၼ်မၼ်းၸဝ်ႈၶၢၼ်းၶဝ်ဝႆႉပုၼ်ႈလွင်ႈၼင်ႇႁိုဝ် ၶဝ်တၵ်းပွင်ႁဵတ်းဢမူႉယိတ်ႉပရေႃးႁိၵ်ႈ ၵႃႈတီႈၽၢႆႇၼႃႈထႃႇဝရႃႉၽြႃး
၃၆ ဢၼ်ထႃႇဝရႃႉၽြႃးသင်ႇလၢတ်ႈဝႆႉၼႂ်းဝၼ်း ဢၼ်မၼ်းၸဝ်ႈပၼ်ၽိၵ်ႈသိၵ်ႈ တီႈၶဝ်ႁႂ်ႈၶဝ်လႆႈၶၢမ်ႇဢဝ်ၵႃႈၼႂ်းမိုဝ်းၵူၼ်းမဵဝ်းဢိသရေႇလတင်းလၢႆၼၼ်ႉဢေႃႈ။ပဵၼ်ပိင်းၺၢပ်ႈတႃႇသေႇတီႈမဵဝ်းၸိူဝ်ႉၶိူဝ်း သိုပ်ႇသိုပ်ႇတၢမ်ႈတၢမ်ႈၼၼ်ႉ ဢေႃႈ။
၃၇ ဢၼ်ၸိူဝ်းၼႆႉၸမ်းပဵၼ်တြႃးယိၸ်ႉဢၼ်တုတ်ႇၽႆး တြႃးယိၸ်ႉတၢင်းပုၵ်ႉၸေႃႇၽေႃးၸဵၼ်ႇတြႃးယိၸ်ႉဢၼ်ၽေႇဢပျႅတ်ႈ တြႃးယိၸ်ႉဢၼ်ၽေႇတူႉၸရိူၵ်ႈ၊
၃၈ တြႃးယိၸ်ႉဢၼ်ၶၢၼ်းဝႆႉၼႂ်းဢရႃႇ၊တြႃးယိၸ်ႉဢၼ်မိၵ်ႉသႁႃႇယႃႉ၊ ဢၼ်ထႃႇဝရႃႉၽြႃးသင်လၢတ်ႈဝႆႉတီႈမုဝ်းသေႇ ၵႃႈၼိူဝ်လွႆသီၼႃႇၼႂ်းၶိင်ႇဝၼ်းဢၼ်မၼ်းၸဝ်ႈသင်ႇလၢတ်ႈဝႆႉတီႈ ၵူၼ်းမဵဝ်းဢိသရေႇလ တင်းလၢႆႁႂ်ႈၶဝ်လႆႈႁဵတ်းယိၸ်ႉတီႈထႃႇဝရႃႉၽြႃးၵႃႈၼႂ်းထိူၼ်ႇသိ ၼႃႇ ၼၼ်ႉဢေႃႈ။