Chapter
၁
တၢင်းပုၵ်ႉၸေႃႇဢၼ်တုတ်ႇၽႆး
၁ ထႃႇဝရႃႉၽြႃး ယူႇၵႃႈၼႂ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈ သၢတ်ႈၼၼ်ႉသေယဝ်ႉႁွင်ႉမုဝ်းသေႇလႄႈမီးဢမိင်ႉဝႃႈ၊-မႂ်းတၵ်းလႆႈလၢတ်ႈတီႈၵူၼ်းမဵဝ်းဢိသရေႇ လတင်းလၢႆလႄႈဝႃႈ၊-
၂ ၼႂ်းသူၼႆႉပေႃးသေၵေႃႉသေၵူၼ်းၶႂ်ႈႁဵတ်းတၢင်းဢၼ်ပုၵ်ႉၸေႃႇတီႈ ထႃႇဝရႃႉၽြႃးၸိုင်မၼ်းတၵ်းလႆႈဢဝ် တရိၵ်ႈသၢၼ်ႇဢၼ်ယဵၼ်ႇဢၼ်ငႄႈၵႃႈၼႂ်းၽုင်ဝူဝ်းၽုင်သူဝ်းၽုင်ပေႉလႄႈ မႃး ႁဵတ်းတၢင်းဢၼ်ပုၵ်ႉၸေႃႇဢေႃႈ။
၃ ပေႃးတၢင်းပုၵ်ႉၸေႃႇမၼ်းၼၼ်ႉ ပဵၼ်တၢင်းဢၼ် ဢဝ်ဝူဝ်းႁဵတ်းယိၸ်ႉ ဢၼ်တုတ်ႇၽႆးၸိုင်မၼ်းတၵ်းလႆႈဢဝ်တူဝ်ပေႃႈဢၼ်ဢမ်ႇပႃးဢၢင်ႇၵႃႇလူႉၼၼ်ႉ ပုၵ်ႉၸေႃႇဢေႃႈ။ မၼ်းတၵ်းလႆႈဢဝ်ပုၵ်ႉၸေႃႇၵႃႈတီႈၽၢႆႇၼႃႈၽၵ်းတူသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈႁႂ်ႈထုၵ်ႇၸႂ်မႅၼ်ႈၸႂ်ထႃႇဝရႃႉၽြႃးဢေႃႈ။
၄ မၼ်းတၵ်းလႆႈဢဝ်မိုဝ်းမၼ်း တၢင်ႇသႂ်ႇၵႃႈၼိူဝ်ႁူဝ်ဝူဝ်းဢွၼ်ႇဢၼ်ပုၵ်ႉၸေႃႇၼၼ်ႉလႄႈ မၼ်းၸဝ်ႈတၵ်းႁပ်ႉတုင်း ဢဝ်ႁႂ်ႈၽေႇဢပျႅတ်ႈမၼ်းဢေႃႈ။
၅ မၼ်းတၵ်းလႆႈဢဝ်ဝူဝ်းၼၼ်ႉ တၢႆၵႃႈတီႈၽၢႆႇၼႃႈထႃႇဝရႃႉၽြႃးလႄႈလုၵ်ႈၸၢႆးဢႃႇရုၼ်ႇ ဢၼ်ပဵၼ်ယိတ်ႉပရေႃးႁိၵ်ႈၸိူဝ်းၼၼ်ႉတၵ်းလႆႈဢဝ်လိူတ်ႈၼၼ်ႉမႃးလႄႈ ၽႅတ်းသႂ်ႇလဵပ်ႈႁွပ်ႈၵႃႈၼိူဝ်ယိၸ်ႉပလၢင်ႇဢၼ်မီးၵႃႈတီႈႁိမ်းၽၵ်းတူသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈ ၼၼ်ႉဢေႃႈ။
၆ မၼ်းတၵ်းလႆႈလွၵ်ႈဢဝ်ၼင်တူဝ်ၼၼ်ႉလႄႈတႅပ်းႁဵတ်းပွတ်းႁဵတ်းပႅတ်းသေဢေႃႈ။
၇ လုၵ်ႈၸၢႆးရ ယိတ်ႉပရေႃးႁိၵ်ႈဢႃႇရုၼ်ႇ ၸိူဝ်းၼၼ်ႉတၵ်းလႆႈဢဝ်ၽႆးသႂ်ႇၵႃႈၼိူဝ်ယိၸ်ႉပလၢင်ႇလႄႈ ဢဝ်ၽိုၼ်းၽေႇ သိူဝ်ႇဝႆႉၵႃႈၼိူဝ်ၽႆးသေယဝ်ႉ
၈ လုၵ်ႈၸၢႆး ဢႃႇရုၼ်ႇဢၼ်ပဵၼ်ယိတ်ႉပရေႃးႁိၵ်ႈၸိူဝ်းၼၼ်ႉ တၵ်းလႆႈဢဝ်ဢၼ်ပွတ်းဢၼ်ပႅတ်းဢၼ်ဝႃႈ ၵွၵ်းႁူဝ်မၼ်း၊ၵွၼ်ႈၶႆၵွၼ်ႈမၼ်းမၼ်း၊ၵွၼ်ႈၼိူဝ်ႉ မၼ်းၸိူဝ်းၼၼ်ႉ ၽေႇသိူဝ်ႇဝႆႉၵႃႈၼိူဝ်ၽိုၼ်း ဢၼ်မီးၵႃႈၼိူဝ်ၽႆးဢၼ်မီးၵႃႈ ၼိူဝ်ယိၸ်ႉပလၢင်ႇၼၼ်ႉဢေႃႈ။
၉ ၵူၺ်းၵႃႈသႆႈမၼ်းတိၼ်မၼ်းၸိူဝ်းၼၼ်ႉၸိုင် မၼ်းတၵ်းလႆႈဢဝ်ၼမ်ႉသုၵ်ႈဢေႃႈ။ယိတ်ႉပရေႃးႁိၵ်ႈတင်းလၢႆဢဝ်ယိၸ်ႉၼၼ်ႉတင်းတူဝ်တုတ်ႇၽႆးၵႃႈၼိူဝ်ယိၸ်ႉပလၢင်ႇဢေႃႈ။ပဵၼ်ယိၸ်ႉဢၼ်တုတ်ႇၽႆးဢေႃႈ။ ပဵၼ်တၢင်းပုၵ်ႉၸေႃႇ
ဢၼ်ဢဝ်တင်းၽႆးသၢၵ်ႈၵၢပ်ႈလႄႈႁွမ်ႁူၺ်းတီႈထႃႇဝရႃႉၽြႃးဢေႃႈ။
၁၀ ပေႃးတၢင်းပုၵ်ႉၸေႃႇမၼ်းၼၼ်ႉ ပဵၼ်တၢင်းဢၼ်ဢဝ်ၵႃႈၼႂ်းၽုင်သူဝ်းၽုင်ပေႉ ႁဵတ်းယိၸ်ႉဢၼ်တုတ်ႇၽႆးၸိုင် မၼ်းတၵ်းလႆႈဢဝ်တူဝ်ပေႃႈဢၼ်ဢမ်ႇပႃး ဢၢင်ႇၵႃႇလူႉၼၼ်ႉပုၵ်ႉၸေႃႇဢေႃႈ။
၁၁ မၼ်းတၵ်းလႆႈဢဝ်တၢႆ ၵႃႈတီႈႁိမ်းၽၢႆႇတၢင်းႁွင်ႇယိၸ်ႉပလၢင်ႇၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉလႄႈ လုၵ်ႈၸၢႆးဢႃႇရုၼ်ႇ ဢၼ်ပဵၼ်ယိၸ်ႉပရေႃးႁိၵ်ႈၸိူဝ်းၼၼ်ႉတၵ်းလႆႈဢဝ်လိူတ်ႈၼၼ်ႉ ၽႅတ်းသႂ်ႇလဵပ်ႈႁွပ်ႈ ၵႃႈၼိူဝ် ယိၸ်ႉပလၢင်ႇဢေႃႈ။
၁၂ မၼ်းတၵ်းလႆႈတႅပ်းႁဵတ်းပွတ်းႁဵတ်းပႅတ်းဝႆႉ လူၺ်ႈၵၼ်တင်းၵွၵ်းႁူဝ်မၼ်းၵွၼ်ႈၶႆၵွၼ်ႈမၼ်းမၼ်းၸိူဝ်းၼၼ်ႉလႄႈ ယိၸ်ႉပရေႃးႁိၵ်ႈတၵ်းလႆႈဢဝ်ၽေႇသိူဝ်ႇဝႆႉၵႃႈၼိူဝ်ၽိုၼ်းဢၼ်မီးၵႃႈၼိူဝ်ၽႆးဢၼ်မီးၵႃႈၼိူဝ်ယိၸ်ႉပလၢင်ႇၼၼ်ႉဢေႃႈ။
၁၃ ၵူၺ်းၵႃႈသႆႈမၼ်းတင်းတိၼ်မၼ်းၸိူဝ်းၼၼ်ႉၸိုင် မၼ်းတၵ်းလႆႈဢဝ်ၼမ်ႉသုၵ်ႈဢွၼ်တၢင်းဢေႃႈ။ ယိၸ်ႉပရေႃးႁိၵ်ႈ တၵ်းလႆႈဢဝ်ယိၸ်ႉၼၼ်ႉ တင်းတူဝ်မႃးလႄႈတုတ်ႇၽႆးၵႃႈၼိူဝ်ယိၸ်ႉပလၢင်ႇဢေႃႈ။ ပဵၼ်ယိၸ်ႉဢၼ်တုတ်ႇၽႆးဢေႃႈ။ပဵၼ်တၢင်းပုၵ်ႉၸေႃႇဢၼ်ဢဝ်တင်းၽႆးသၢၵ်ႈၵၢပ်ႈလႄႈ ႁွမ်ႁူၺ်းတီႈထႃႇဝရႃႉၽြႃး ဢေႃႈ။
၁၄ ပေႃးတၢင်းပုၵ်ႉၸေႃႇမၼ်းၼၼ်ႉပဵၼ်တၢင်းဢၼ်ဢဝ်ၼူၵ်ႉႁဵတ်း ယိၸ်ႉဢၼ်တုတ်ႇၽႆးတီႈထႃႇဝရႃႉၽြႃးၸိုင် မၼ်းတၵ်းလႆႈဢဝ်ၵႃၵႄဢမ်ႇၼၼ်ၼူၵ်ႉတူႈဢွၼ်ပုၵ်ႉၸေႃႇဢေႃႈ။ယိတ်ႉပရေႃးႁိၵ်ႈတၵ်းလႆႈဢဝ်မႃးၵႃႈတီႈယိၸ်ႉပလၢင်ႇလႄႈ လိမ်ႇႁူဝ်မၼ်းၶၢတ်ႇသေယဝ်ႉ ဢဝ်တုတ်ႇၽႆးၵႃႈၼိူဝ်ယိၸ်ႉပလၢင်ႇ ဢေႃႈ။
၁၅ လိူတ်ႈမၼ်းၸိုင် တၵ်းလႆႈဢဝ်မိပ်ႇသႂ်ႇၵႃႈတီႈႁိမ်းယိၸ်ႉပလၢင်ႇဢေႃႈ။
၁၆ မၼ်းတၵ်းလႆႈထွတ်ႇဢွၵ်ႇ ၼဵင်မၼ်း တင်းၵႃႈဢၼ်မီးၼႂ်းၼဵင်မၼ်းၼၼ်ႉလႄႈဢဝ်ပႅတ်ႈဝႆႉ ၵႃႈတီႈႁိမ်းၽၢႆႇဝၼ်းဢွၵ်ႇယိၸ်ႉပလၢင်ႇ ၵႃႈတီႈဢၼ်ဝႆႉတဝ်ႈၼၼ်ႉဢေႃႈ။
၁၇ တူဝ်ၼူၵ်ႉဢၼ်ပႃးတင်းၶူၼ်ပိၵ်ႇမၼ်းၼၼ်ႉၸိုင် မၼ်းတၵ်းလႆႈၽႃႇၵီႈဢမ်ႇႁႂ်ႈလႆႈၽၢတ်ႇၵၼ်လႄႈ ယိတ်ႉပရေႃးႁိၵ်ႈတၵ်းလႆႈဢဝ်တုတ်ႇၽႆး ၵႃႈၼိူဝ်ၽိုၼ်းဢၼ်မီးၵႃႈၼိူဝ်ၽႆးဢၼ်မီးၵႃႈၼိူဝ်ယိၸ်ႉပလၢင်ႇၼၼ်ႉဢေႃႈ။ပဵၼ်ယိၸ်ႉဢၼ်တုတ်ႇၽႆးဢေႃႈ။ပဵၼ်တၢင်းပုၵ်ႉၸေႃႇဢၼ်ဢဝ်တင်းၽႆးသၢၵ်ႈၵၢပ်ႈလႄႈ ႁွမ်ႁူၺ်းတီႈထႃႇဝရႃႉၽြႃးဢေႃႈ။