Chapter
၈
ၽေးၶဵတ်ႇ
၁ ထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈ၊-ၶဝ်ႈၸူးၵႃႈတီႈၶုၼ်ႁေႃၶမ်းၽႃႇရေႃးသေလႄႈလၢတ်ႈတီႈမၼ်းလႄႈဝႃႈ၊-ထႃႇဝရႃႉၽြႃးလၢတ်ႈလႄႈဝႃႈၸမ်းပွႆႇၵူၼ်းၵဝ်တင်းလၢႆၵႂႃႇႁႂ်ႈၶဝ်လႆႈႁဵတ်းဝၢတ်ႈတီႈၵဝ်တႃႉ။ပေႃးမႂ်းထဵင်ပႅတ်ႈလႄႈဝႃႈ၊-
၂ ဢမ်ႇပွႆႇၵႂႃႇၵူၺ်း၊ဝႃႈၼင်ႇၼႆၸိုင်၊ၵဝ်တၵ်းဢဝ်တင်းၶဵတ်ႇတင်းလၢႆပၼ်တၢမ်ႇၵႃႈၼႂ်းမိူင်းမႂ်းၵူႈတီႈၵူႈလႅၼ်ဢေႃႈ။
၃ ၼမ်ႉႁွင်ႊတၵ်းၵိူတ်ႇလဵင်ႉၶဵတ်ႇမႃးၼမ်ၼႃႇလႄႈၶဝ်တၵ်းဢွၼ်ၵၼ်ၶိုၼ်ႈလႄႈၶဝ်ႈယူႇၵႃႈၼႂ်းႁိူၼ်းမႂ်း၊ၵႃႈၼႂ်းလုၵ်းတီႈၼွၼ်းမႂ်း၊ၵႃႈၼိူဝ်ၵူႇတီႈၼွၼ်းမႂ်း၊ၵႃႈၼႂ်းႁိူၼ်းၶႃႈမႂ်း၊ၵႃႈၼိူဝ်ၵူၼ်းဝၢၼ်ႈၵူၼ်းမိူင်းမႂ်း၊ၵႃႈၼႂ်းၽီးၽႆး၊ၵႃႈၼႂ်းၵွၵ်းဝၢၼ်ႇဢၼ်ၼူတ်ႈၶဝ်ႈမုၼ်းမႂ်းၸိူဝ်းၼၼ်ႉဢေႃႈ။
၄ ၶဵတ်ႇၸိူဝ်းၼၼ်ႉတၵ်းဢွၼ်ၵၼ်ၶိုၼ်ႈယူႇၵႃႈၼိူဝ်ၸႃႉၸဵမ်မႂ်းလႄႈၵူၼ်းဝၢၼ်ႈၵူၼ်းမိူင်းဢိၵ်ႇတင်းၶႃႈမႂ်းၵႃႈမီးတင်းသဵင်ႈတင်းလူင်ဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၅ ၵမ်းၼၼ်ႉထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇလႄႈဝႃႈၸမ်း၊-လၢတ်ႈတီႈဢႃႇရုၼ်ႇလႄႈဝႃႈ၊-ဢဝ်တင်းၶွၼ်ႉတဝ်ႉမႂ်းယိုၼ်းမိုဝ်းမႂ်းၵႃႈၼိူဝ်ၼမ်ႉႁွင်ႉၼမ်ႉၵႄးတင်းၼမ်ႉၼွင်ၸိူဝ်းၼၼ်ႉလႄႈႁႂ်ႈၶဵတ်ႇတင်းလၢႆၶိုၼ်ႈမႃးၵႃႈၼိူဝ်မိူင်းဢေႇၵႅပ်ႉတုၼႆႉတႃႉ၊ဝႃႈၼင်ႇၼႆဢေႃႈ။
၆ ဢႃႇရုၼ်ႇၵေႃႈယိုၼ်းမိုဝ်းမၼ်းၵႃႈၼိူဝ်ၼမ်ႉဢၼ်မီးၵႃႈၼႂ်းမိူင်းဢေႇၵႅပ်ႉတုလႄႈၶဵတ်ႇဢွၼ်ၵၼ်ၶိုၼ်ႈမႃးႁူမ်ႇသုမ်ႇမိူင်းဢေႇၵႅပ်ႉတုဝႆႉဢေႃႈ။
၇ သြႃႇဝိၵ်ႉၸႃႇတင်းလၢႆၵေႃႈဢွၼ်ၵၼ်ဢဝ်တင်းဢတၢတ်ႈဝိၵ်ႉၸႃႇႁဵတ်းမိူၼ်ၸိူဝ်ႉၼင်ႇၼၼ်လႄႈႁႂ်ႈၶဵတ်ႇတင်းလၢႆၶိုၼ်ႈမႃးၵႃႈၼိူ်ဝ်မိူင်းဢေႇၵႅပ်ႉတုဢေႃႈ။
၈ မိူဝ်ႈၼၼ်ႉၶုၼ်ႁေႃၶမ်းၽႃႇရေႃးႁွင်ႉဢဝ်မုဝ်းသေႇတင်းဢႃႇရုၼ်ႇလႄႈလၢတ်ႈဝႃႈ၊-တွင်းပၢၼ်ႇႁႂ်ႈထႃႇဝရႃႉၽြႃးႁေႃႈၶဵတ်ႇၸိူဝ်းၼႆႉဢွၵ်ႇသေၵႃႈတီႈၵဝ်ဢိၵ်ႇတင်းၵူၼ်းဝၢၼ်ႈၵူၼ်းမိူင်းၵဝ်တင်းလၢႆတႃႉ။ၵဝ်တၵ်းပၼ်ႁႂ်ႈၵူၼ်းမဵဝ်းဢိသရေႇလၸိူဝ်းၼၼ်ႉၵႂႃႇႁႂ်ႈလႆႈပုၵ်ႉၸေႃႇယိၸ်ႉတီႈထႃႇဝရႃႉၽြႃးဢေႃႈ၊ဝႃႈၼင်ႇၼႆဢေႃႈ။
၉ မုဝ်းသေႇၵေႃႈလဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊-လွင်ႈၼင်ႇႁိုဝ်ၶဵတ်ႇၸိူဝ်းၼႆႉတၵ်းလႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈသေၵႃႈတီႈၸဝ်ႈႁဝ်းဢိၵ်ႇတင်းႁိူၼ်းၸဝ်ႈႁဝ်းတင်းလၢႆလႄႈႁႂ်ႈၶဝ်ယူႇၵႃႈၼႂ်းၼမ်ႉႁွင်ႊၵူၺ်းၸိုင်ၶႅၼ်းတေႃႈမၵ်းၶၢၼ်းဝႆႉၶိင်ႇဢၼ်ၶႃႈၸဝ်ႈတၵ်းလႆႈတွင်းပၢၼ်ႇပုၼ်ႈၸဝ်ႈႁဝ်းဢိၵ်ႇတင်းၶႃႈၸဝ်ႈႁဝ်းတင်းၵူၼ်းဝၢၼ်ႈၵူၼ်းမိူင်းၸဝ်ႈႁဝ်းတင်းလၢႆၼၼ်ႉသေၵမ်းတီႈၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶုၼ်ႁေႃၶမ်းၵေႃႈလၢတ်ႈလႄႈဝႃႈ၊-
၁၀ ဝၼ်းမိူဝ်ႈၽုၵ်ႈဢေႃႈ၊ဝႃႈၼင်ႇၼႆလႄႈမၼ်းလဝ်ႈလၢတ်ႈလႄႈဝႃႈ၊-လွင်ႈၼင်ႇႁိုဝ်ၸဝ်ႈႁဝ်းတၵ်းလႆႈႁူႉလွင်ႈဢၼ်ဝႃႈၽြႃးပဵၼ်ၸဝ်ႈဢၼ်မိူၼ်ၸိူဝ်ႉၼင်ႇထႃႇဝရႃႉၽြႃးၽြႃးပဵၼ်ၸဝ်ႈၶႃႈၸဝ်ႈႁဝ်းၼႆႉဢမ်ႇမီးဢၼ်ဝႃႈၼၼ်ႉၸိုင်
၁၁ တၵ်းပဵၼ်ၸွမ်းၵႃႈၼင်ႇဢၼ်ဢမိင်ႉၸဝ်ႈမီးၼၼ်ႉလႄႈၶဵတ်ႇၸိူဝ်းၼႆႉတၵ်းဢွၵ်ႇသေၵႃႈတီႈၸဝ်ႈႁဝ်းဢိၵ်ႇတင်းႁိူၼ်းၸဝ်ႈႁဝ်းတင်းၶႃႈၸဝ်ႈႁဝ်းတင်းၵူၼ်းဝၢၼ်ႈၵူၼ်းမိူင်းၸဝ်ႈႁဝ်းတင်းလၢႆၵႂႃႇလႄႈယူႇၵႃႈၼႂ်းၼမ်ႉႁွင်ႊၵူၺ်းတီႈၶႃႈဢေႃႈ၊ဝႃႈၼင်ႇၼႆသေယဝ်ႉ၊
၁၂ မုဝ်းသေႇတင်းဢႃႇရုၼ်ႇဢွၵ်ႇသေၵႃႈတီႈၶုၼ်ႁေႃၶမ်းၽႃႇရေႃးၵႂႃႇလႄႈမုဝ်းသေႇႁဵတ်းသူးတွင်းပထၼႃတီႈထႃႇဝရႃႉၽြႃးၵွပ်ႈပိူဝ်ႈၶဵတ်ႇဢၼ်မၼ်းၸဝ်ႈဢဝ်မႃးၵႃႈၼိူဝ်ၶုၼ်ႁေႃၶမ်းၽႃႇရေႃးၸိူဝ်းၼၼ်ႉဢေႃႈ။
၁၃ ထႃႇဝရႃႉၽြႃးႁဵတ်းၸွမ်းၵႃႈၼင်ႇၵႂၢမ်းဢၼ်မုဝ်းသေႇလဝ်ႈလၢတ်ႈသူးတွင်းၼၼ်ႉလႄႈၶဵတ်ႇၸိူဝ်းၼၼ်ႉတၢႆၵႃႈၼႂ်းႁိူၼ်း၊ၵႃႈၼႂ်းဝၢၼ်ႈ၊ၵႃႈၼႂ်းတူင်ၼႃးၸိူဝ်းၼၼ်ႉဢေႃႈ။
၁၄ ၶဝ်ၵဵပ်းဢဝ်တူဝ်တၢႆၸူႉဝႆႉၵွင်ဝႆႉလႄႈမဵၼ်တူႇၵႂႃႇတင်းမိူင်းဢေႃႈ။
၁၅ ၶုၼ်ႁေႃၶမ်းၽႃႇရေႃးၵေႃႈမိူဝ်ႈဢၼ်ႁူႉႁၼ်လွင်ႈဢၼ်လႆႈသၢၵ်ႈသႃႇမႃးယဝ်ႉၼၼ်ႉၸိုင်မၼ်းသမ်ႉႁူဝ်ၸႂ်ၵႅၼ်ႇၶႅင်လႄႈယင်းဢမ်ႇထွမ်ႇဢမ်ႇဢဝ်ၵႂၢမ်းၶဝ်လႄႈယူႇမႅၼ်ႈၵႃႈၼင်ႇဢၼ်ထႃႇဝရႃႉၽြႃးလၢတ်ႈဝႆႉၼၼ်ႉဢေႃႈ။
ၽေးႁိၼ်ႉ
၁၆ ၵမ်းၼၼ်ႉထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇလႄႈဝႃႈၸမ်း၊-လၢတ်ႈတီႈဢႃႇရုၼ်ႇႁႂ်ႈမၼ်းဢဝ်ၶွၼ်ႉတဝ်ႉမၼ်းယိုၼ်းမိုဝ်းလႄႈပေႃႉယႅၼ်ႉမုၼ်ႈလိၼ်ႁႂ်ႈပဵၼ်ႁိၼ်ႉၵႂႃႇၵႃႈၼႂ်းမိူင်းဢေႇၵႅပ်ႉတုၵူႈတီႈၵူႈလႅၼ်တႃႉ၊ဝႃႈၼင်ႇၼႆသေယဝ်ႉ
၁၇ ၶဝ်ႁဵတ်းၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉၼၼ်ႉလႄႈဢႃႇရုၼ်ႇဢဝ်ၶွၼ်ႉတဝ်ႉမၼ်းယိုၼ်းမိုဝ်းမၼ်းလႄႈပေႃႉယႅၼ်ႉမုၼ်ႈလိၼ်သေယဝ်ႉပဵၼ်ႁိၼ်ႉၵႂႃႇၵႃႈၼႂ်းမိူင်းဢေႇၵႅပ်ႉတုၵူႈတီႈၵူႈလႅၼ်ဢေႃႈ။
၁၈ သြႃႇဝိၵ်ႉၸႃႇၸိူဝ်းၼၼ်ႉၵေႃႈဢွၼ်ၵၼ်ဢဝ်တင်းဢတၢတ်ႈဝိၵ်ႉၸႃႇႁဵတ်းမိူၼ်ၸိူဝ်ႉၼင်ႇၼၼ်ႁႂ်ႈပဵၼ်ႁိၼ်ႉမႃးၵေႃႈဢမ်ႇတၢတ်ႈၼိုင်ႇလႆႈ။ၼင်ႇၼၼ်လႄႈႁိၼ်ႉမီးယူႇၵႃႈတီႈၵူၼ်းဢိၵ်ႇတင်းတရိၵ်ႈသၢၼ်ႇတင်းလၢႆဢေႃႈ။
၁၉ သြႃႇဝိၵ်ႉၸႃႇၸိူဝ်းၼၼ်ႉၵေႃႈဢွၼ်ၵၼ်လဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊-လွင်ႈတၢင်းၼႆႉၸိုင်ပဵၼ်ၼိဝ်ႉမိုဝ်းၽြႃးပဵၼ်ၸဝ်ႈတီႈၶႃႈယဝ်ႉ၊ဝႃႈၼင်ႇၼႆဢေႃႈ။ၵူၺ်းၵႃႈၶုၼ်ႁေႃၶမ်းၽႃႇရေႃးႁူဝ်ၸႂ်ၵႅၼ်ႇၶႅင်လႄႈယင်းဢမ်ႇထွမ်ႇဢမ်ႇဢဝ်ၵႂၢမ်းၶဝ်လႄႈယူႇမႅၼ်ႈၵႃႈၼင်ႇဢၼ်ထႃႇဝရႃႉၽြႃးလၢတ်ႈဝႆႉၼၼ်ႉဢေႃႈ။
ၽေးလိူၵ်ႇ
၂၀ ၵမ်းၼၼ်ႉထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇလႄႈဝႃႈ၊-မႂ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈၵႂႃႇၸုၵ်းယူႇၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးၼႂ်းမိူဝ်ႈဢၼ်မၼ်းၵႂႃႇၵႃႈတီႈတိုဝ်ႉၼမ်ႉၼၼ်ႉသေလႄႈလၢတ်ႈတီႈမၼ်းဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ပွႆႇၵူၼ်းၵဝ်တင်းလၢႆၵႂႃႇႁႂ်ႈၶဝ်လႆႈႁဵတ်းဝၢတ်ႈတီႈၵဝ်တႃႉ။
၂၁ ပေႃးဢမ်ႇပွႆႇၵူၼ်းၵဝ်တင်းလၢႆၵႂႃႇလႄႈယူႇၸိုင်ၵဝ်တၵ်းပွႆႇၸႂ်ႉလိူၵ်ႇၼမ်ၼႃႇမႃးၵႃႈတီႈမႂ်းဢိၵ်ႇတင်းၶႃႈမႂ်းတင်းၵူၼ်းဝၢၼ်ႈၵူၼ်းမိူင်းမႂ်းတင်းႁိူၼ်းမႂ်းၸိူဝ်းၼၼ်ႉလႄႈႁိူၼ်းၵူၼ်းဢေႇၵႅပ်ႉတုတင်းလၢႆဢိၵ်ႇတင်းလိၼ်တီႈဢၼ်ၶဝ်ယူႇၼၼ်ႉတၵ်းလႆႈမီးတဵမ်ဝႆႉတင်းလိူၵ်ႇဢေႃႈ။
၂၂ ၼင်ႇႁိုဝ်မႂ်းတၵ်းႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼႂ်းၶိုင်ႈၵၢင်လိၼ်မိူင်းၼႆႉၸိုင်ၼႂ်းဝၼ်းၼၼ်ႉၵဝ်တၵ်းႁႂ်ႈမိူင်းၵေႃႇသိၼ်ႇဢၼ်ပဵၼ်တီႈယူႇၵူၼ်းၵဝ်ၸိူဝ်းၼၼ်ႉပႅၵ်ႇပိူင်ႈသေလႄႈလိူၵ်ႇဢမ်ႇလႆႈမီးၵႃႈၼႂ်းမိူင်းၼၼ်ႉ။
၂၃ ၼင်ႇၼၼ်လႄႈၵဝ်တၵ်းႁႂ်ႈၵူၼ်းၵဝ်တင်းၵူၼ်းမႂ်းပႅၵ်ႇပိူင်ႈၵၼ်ဢေႃႈ။ၼႂ်းဝၼ်းမိူဝ်ႈၽုၵ်ႈၼီႈမိၵ်ႈလၢၵ်ႈၶၼႃႇၼၼ်ႉတၵ်းပေႃႇမႃးဢေႃႈ၊ဝႃႈၼင်ႇၼႆတႃႉ။
၂၄ ထႃႇဝရႃႉၽြႃးႁဵတ်းၸိူဝ်ႉၼင်ႇၼၼ်လႄႈလိူၵ်ႇဢၼ်ၵျၢမ်းၼႃႇတင်းလၢႆႁွတ်ႈမႃးၵႃႈတီႈၸႃႉၸဵမ်ႁေႃၶုၼ်ႁေႃၶမ်းၽႃႇရေႃးလႄႈႁိူၼ်းၶႃႈမၼ်းၵူၼ်းမၼ်းၵႃႈၼႂ်းမိူင်းဢေႇၵႅပ်ႉတုၵူႈတီႈၵူႈလႅၼ်လႄႈမိူင်းလူႉလႅဝ်ၵႂႃႇၵွပ်ႈပိူဝ်ႈလိူၵ်ႇၸိူဝ်းၼၼ်ႉဢေႃႈ။
၂၅ မိူဝ်ႈၼၼ်ႉၶုၼ်ႁေႃၶမ်းၽႃႇရေႃးႁွင်ႉဢဝ်မုဝ်းသေႇတင်းဢႃႇရုၼ်ႇမႃးလႄႈမီးဢမိင်ႉဝႃႈ၊-သူၵႂႃႇပုၵ်ႉၸေႃႇယိၸ်ႉတီႈၽြႃးပဵၼ်ၸဝ်ႈသူၵႃႈတီႈၼႂ်းမိူင်းၼႆႉတႃႉ၊မိူဝ်ႈဢၼ်ဝႃႈၼင်ႇၼႆၸိုင်မုဝ်းသေႇၵေႃႈလဝ်ႈလၢတ်ႈလႄႈဝႃႈ၊-
၂၆ ဢမ်ႇထုၵ်ႇလီႁဵတ်းၸိူဝ်ႉၼင်ႇၼၼ်တီႈၶႃႈ။ပေႃးႁဵတ်းၸိုင်တၵ်းပဵၼ်လွင်ႈတၢင်းဢၼ်ၶႃႈၸဝ်ႈႁဝ်းၶဝ်ပုၵ်ႉၸေႃႇယိၸ်ႉဢၼ်ၵူၼ်းဢေႇၵႅပ်ႉတုလီႁင်ႈၼၼ်ႉတီႈထႃႇဝရႃႉၽြႃးၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈယဝ်ႉ။ပေႃးပုၵ်ႉၸေႃႇယိၸ်ႉလွင်ႈတၢင်းဢၼ်ၵူၼ်းဢေႇၵႅပ်ႉတုလီႁင်ႈၼၼ်ႉၵႃႈတီႈသိုဝ်ႈၼႃႈတႂ်ႈတႃၶဝ်ၸိုင်ၶဝ်တၵ်းဢဝ်တင်းမၢၵ်ႇႁိၼ်ထႅမ်ႈၶႃႈၸဝ်ႈႁဝ်းၶဝ်၊ဢမ်ႇၸႂ်ႈတီႈၶႃႈႁိုဝ်။
၂၇ ပိူဝ်ႈၼႆလႄႈၶႃႈၸဝ်ႈႁဝ်းၶဝ်တၵ်းလႆႈၵႂႃႇၵႃႈတီႈၼႂ်းထိူၼ်ႇပုၼ်ႉၶၢဝ်းတၢင်းသသေၢမ်ဝၼ်းလႄႈပုၵ်ႉၸေႃႇယိၸ်ႉတီႈထႃႇဝရႃႉၽြႃး၊ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်ၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉၼၼ်ႉတီႈၶႃႈဢေႃႈ၊ဝႃႈၼင်ႇၼႆဢေႃႈ။
၂၈ ၶုၼ်ႁေႃၶမ်းၽႃႇရေႃးၵေႃႈလၢတ်ႈလႄႈဝႃႈ၊-ၵဝ်တၵ်းပွႆႇသူၵႂႃႇႁႂ်ႈသူလႆႈပုၵ်ႉၸေႃႇယိၸ်ႉၵႃႈတီႈထႃႇဝရႃႉၽြႃးၽြႃးပဵၼ်ၸဝ်ႈသူၵႃႈၼႂ်းထိူၼ်ႇပုၼ်ႉဢေႃႈ။
၂၉ ၼႂ်းဝႃႈၼၼ်သေၵေႃႈသူဢမ်ႇလႆႈၵႂႃႇၵႆၼႃႇလူင်လၢင်။တွင်းပၢၼ်ႇပုၼ်ႈၵဝ်တႃႉ၊ဝႃႈၼင်ႇၼႆဢေႃႈ။မုဝ်းသေႇၵေႃႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈတၵ်းဢွၵ်ႇသေၵႃႈတီႈၸဝ်ႈႁဝ်းၵႂႃႇလႄႈတွင်းပၢၼ်ႇတီႈထႃႇဝရႃႉၽြႃးႁႂ်ႈလိူၵ်ႇၸိူဝ်းၼႆႉၽၢတ်ႇယၢၼ်သေၶုၼ်ႁေႃၶမ်းၽႃႇရေႃးဢိၵ်ႇတင်းၶႃႈမၼ်းၸဝ်ႈတင်းၵူၼ်းဝၢၼ်ႈၵူၼ်းမိူင်းမၼ်းၸဝ်ႈတင်းလၢႆၼႂ်းဝၼ်းမိူဝ်ႈၽုၵ်ႈတီႈၶႃႈဢေႃႈ။ၵူၺ်းၵႃႈလိုၼ်းၼၼ်ႉယႃႇပပေႅတ်ႉလႅၼ်လႄႈႁႄႉၶႅၼ်ႁႂ်ႈၵူၼ်းမဵဝ်းဢိသရေႇလတင်းလၢႆဢမ်ႇႁႂ်ႈလႆႈၵႂႃႇပုၵ်ႉၸေႃႇယိၸ်ႉတီႈထႃႇဝရႃႉၽြႃးၼၼ်ႉၶႃႈ၊ဝႃႈၼင်ႇၼႆသေယဝ်ႉ
၃၀ မုဝ်းသေႇဢွၵ်ႇသေၵႃႈတီႈၶုၼ်ႁေႃၶမ်းၽႃႇရေႃးၵႂႃႇလႄႈတွင်းပၢၼ်ႇတီႈထႃႇဝရႃႉၽြႃးဢေႃႈ။
၃၁ ထႃႇဝရႃႉၽြႃးၵေႃႈႁဵတ်းၸွမ်းၵႂၢမ်းမုဝ်းသေႇလႄႈပႄႇၽဵဝ်ႈပႅတ်ႈလိူၵ်ႇတင်းလၢႆသေၵႃႈတီႈၶုၼ်ႁေႃၶမ်းၽႃႇရေႃးဢိၵ်ႇတင်းၶႃႈမၼ်းတင်းၵူၼ်းဝၢၼ်ႈၵူၼ်းမိူင်းမၼ်းၸိူဝ်းၼၼ်ႉလႄႈဢမ်ႇၵိုတ်းဢမ်ႇၵျၢၼ်ႇသေတူဝ်။
၃၂ မိူဝ်ႈၼၼ်ႉၵေႃႈၶုၼ်ႁေႃၶမ်းၽႃႇရေႃးႁူဝ်ၸႂ်သမ်ႉၵႅၼ်ႇၶႅင်ထႅင်ႈလႄႈယင်းဢမ်ႇပွႆႇၵူၼ်းမဵဝ်းဢိသရေႇလတင်းလၢႆၵႂႃႇလႄႈယူႇဢေႃႈ။