Chapter
၁၀
ၽေးမႅင်းၵႅင်း
၁ ထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇလႄႈလၢတ်ႈဝႃႈၸမ်း၊-မႂ်းၶဝ်ႈၸူးၵႃႈတီႈၶုၼ်ႁေႃၶမ်းၽႃႇရေႃးတႃႉ။
၂ လွင်ႈၼင်ႇႁိုဝ်ၵဝ်တၵ်းလႆႈၼႄပျႃးၼီႈမိၵ်ႈၸိူဝ်းၼႆႉၵႃႈၼႂ်းမိူင်းၼႆႉ၊ဢိၵ်ႇတင်းလွင်ႈၼင်ႇႁိုဝ်မႂ်းတၵ်းလႆႈဢဝ်လွင်ႈတၢင်းဢၼ်ၵဝ်ႁဵတ်းၵႃႈတီႈမိူင်းဢေႇၵႅပ်ႉတုဢိၵ်ႇတင်းၼီႈမိၵ်ႈတင်းလၢႆဢၼ်ၵဝ်ၼႄပျႃးၵႃႈၼႂ်းၵူၼ်းဢေႇၵႅပ်ႉတုၸိူဝ်းၼၼ်ႉမွၵ်ႇလၢတ်ႈထိုင်ႁူလုၵ်ႈလၢၼ်မႂ်းလႄႈႁႂ်ႈၶဝ်လႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉၸိုင်ၵဝ်ႁႂ်ႈႁူဝ်ၸႂ်မၼ်းတင်းႁူဝ်ၸႂ်ၶႃႈမၼ်းၵူၼ်းမၼ်းတင်းလၢႆၼၵ်းၼႃယဝ်ႉ၊ဝႃႈၼင်ႇၼႆဢေႃႈ။
၃ မုဝ်းသေႇတင်းဢႃႇရုၼ်ႇၵေႃႈၶဝ်ႈၸူးၵႃႈတီႈၶုၼ်ႁေႃၶမ်းၽႃႇရေႃးသေယဝ်ႉလဝ်ႈလၢတ်ႈတီႈမၼ်းလႄႈဝႃႈ၊-ထႃႇဝရႃႉၽြႃး၊ၽြႃးပဵၼ်ၸဝ်ႈၵူၼ်းမဵဝ်းႁေႇပႄးမီးဢမိင်ႉလႄႈဝႃႈၸမ်း၊-မႂ်းယင်းဢမ်ႇဢဝ်တူဝ်ၸဝ်ႈၵဝ်ၶျႃးတႅမ်ႇၵႃႈတီႈၽၢႆႇၼႃႈၵဝ်လႄႈတၵ်းယူႇၶိင်ႇၵႃႇလႃႉႁိုင်ၵႃႈႁိုဝ်။
၄ ပွႆႇၵူၼ်းၵဝ်တင်းလၢႆၵႂႃႇႁႂ်ႈၶဝ်လႆႈႁဵတ်းဝၢတ်ႈတီႈၵဝ်တႃပေႃးဢမ်ႇၼၼ်ပေႃးယင်းဢမ်ႇပွႆႇၵူၼ်းၵဝ်တင်းလၢႆၵႂႃႇလႄႈယူႇၸိုင်တူၺ်းလူႊ၊ဝၼ်းမိူဝ်ႈၽုၵ်ႈၵဝ်တၵ်းဢဝ်မႅင်းၵႅင်းတင်းလၢႆမႃးၵႃႈၼိူဝ်မိူင်းမႂ်းဢေႃႈ။
၅ ၶဝ်တၵ်းႁူမ်ႇသုမ်ႇၼႃႈလိၼ်တေႃႇထိုင်ႁွတ်ႈထၢၼ်ႈပေႃးၽူႈလႂ်ဢမ်ႇႁၼ်ၼႃႈလိၼ်လႆႈဢေႃႈ။ၶဝ်တၵ်းၵိၼ်ၵႃႈဢၼ်ၵိုတ်းဢၼ်ၵျၢၼ်ႇဢၼ်လွတ်ႈဝႆႉၼႂ်းတၢင်းဢၼ်မၢၵ်ႇႁဵပ်းဢမ်ႇယႃႉလႄႈယင်းၵိုတ်းယင်းၵျၢၼ်ႇယူႇတီႈသူၼၼ်ႉဢိၵ်ႇတင်းတူၼ်ႈမႆႉၵႃႈဢၼ်ဢွၵ်ႇမႃးၵႃႈတီႈပၢင်ႇပဵင်းၸိူဝ်းၼၼ်ႉဢေႃႈ။
၆ ၼႂ်းႁိူၼ်းမႂ်းလႂ်၊ႁိူၼ်းၶႃႈမႂ်းတင်းသဵင်ႈတင်းလူင်လႂ်၊ႁိူၼ်းၵူၼ်းဢေႇၵႅပ်ႉတုတင်းသဵင်ႈတင်းလူင်တၵ်းတဵမ်ဝႆႉတင်းမႅင်းၵႅင်းဢၼ်ပေႃႈမႂ်းဢိၵ်ႇတင်းပူႇမွၼ်ႇမႂ်းတင်းလၢႆဢမ်ႇပႆႇတွၼ်ႉယၢမ်ႈႁၼ်သေပွၵ်ႈၸႃႉၸဵမ်ၶိင်ႇၵႃလႃႉဢၼ်ၶဝ်ပဵၼ်မႃးၵႃႈၼိူဝ်လိၼ်တေႃႇႁွတ်ႈမိူဝ်ႈလဵဝ်ၼႆႉၼၼ်ႉဢေႃႈ၊ဝႃႈၼင်ႇၼႆသေယဝ်ႉဝၢႆႇၼႃႈလႄႈဢွၵ်ႇၵႂႃႇသေၵႃႈတီႈၶုၼ်ႁေႃၶမ်းၽႃႇရေႃးၼၼ်ႉၵႂႃႇဢေႃႈ။
၇ ၶႃႈၶုၼ်ႁေႃၶမ်းၽႃႇရေႃးၸိူဝ်းၼၼ်ႉၵေႃႈလဝ်ႈလၢတ်ႈတီႈမၼ်းလႄႈဝႃႈ၊-ၵေႃႉၼႆႉတၵ်းပဵၼ်တူင်ႇႁဵဝ်ႉတူင်ႇၶိုမ်းတီႈႁဝ်းၶႃႈယူႇၶိင်ႇၵႃႇလႃႉႁိုင်ၵႃႈႁိုဝ်လူးၵွၼ်ႇၶႃႈ။ပွႆႇၵူၼ်းၸိူဝ်းၼၼ်ႉၵႂႃႇႁႂ်ႈၶဝ်လႆႈႁဵတ်းဝၢတ်ႈတီႈထႃႇဝရႃႉၽြႃး၊ၽြႃးပဵၼ်ၸဝ်ႈၶဝ်ၼၼ်ႉသေၵမ်းၶႃႈ။
၈ ၸဝ်ႈႁဝ်းယင်းဢမ်ႇပႆႇႁူႉလွင်ႈဢၼ်မိူင်းဢေႇၵႅပ်ႉတုလူႉယဝ်ႉၼၼ်ႉတီႈၶႃႈႁိုဝ်၊ဝႃႈၼင်ႇၼႆသေယဝ်ႉ၊သမ်ႉဢဝ်မုဝ်းသေႇတင်းဢႃႇရုၼ်ႇၶိုၼ်းသႂၢင်းၶဝ်ႈၵႃႈတီႈၶုၼ်ႁေႃၶမ်းၽႃႇရေႃးလႄႈလၢတ်ႈတီႈၶဝ်ဝႃႈ၊-ၵႂႃႇႁႂ်ႈလႆႈႁဵတ်းဝၢတ်ႈတီႈထႃႇဝရႃႉၽြႃး၊ၽြႃးပဵၼ်ၸဝ်ႈသူၼၼ်ႉတႃႉ။
၉ ၵူၺ်းၵႃႈၶဝ်ႈၸိူဝ်းဢၼ်တၵ်းလႆႈၵႂႃႇၼၼ်ႉပဵၼ်ၽူႈလႂ်၊မိူဝ်ႈဢၼ်ဝႃႈၼင်ႇၼႆၸိုင်၊မုဝ်းသေႇၵေႃႈၶိုၼ်းလဝ်ႈလၢတ်ႈလႄႈဝႃႈ၊-ၶႃႈၸဝ်ႈႁဝ်းၶဝ်တၵ်းလႆႈပႃးဢဝ်တင်းလုၵ်ႈဢွၼ်ႇ၊ၵူၼ်းထဝ်ႈ၊လုၵ်ႈၸၢႆး၊လုၵ်ႈယိင်း၊ၽုင်သူဝ်းၽုင်ဝူဝ်းၶႃႈၸဝ်ႈႁဝ်းၶဝ်ၼၼ်ႉၵႂႃႇၶႃႈဢေႃႈ။
၁၀ လွင်ႈမၼ်းၸမ်းၶႃႈၸဝ်ႈႁဝ်းၶဝ်တၵ်းလႆႈၶၢမ်ႇပွႆးတီႈထႃႇဝရႃႉၽြႃးတီႈၶႃႈဢေႃႈ၊ဝႃႈၼင်ႇၼႆလႄႈၶုၼ်ႁေႃၶမ်းၵေႃႈလၢတ်ႈဝႃႈ၊-ၵႃႈၼင်ႇဢၼ်ၵဝ်ပွႆႇသူတင်းလုၵ်ႈဢွၼ်ႇသူၵႂႃႇၼၼ်ႉႁႂ်ႈထႃႇဝရႃႉၽြႃးမီးလူၺ်ႈၵၼ်တင်းသူတႃႉ။ႁဵတ်းသတိတႃႉ။သူၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ဢမ်ႇလီယဝ်ႉလူင်ပေႇ။ဢမ်ႇလီပဵၼ်ၸိူဝ်ႉၼင်ႇၼၼ်။
၁၁ ႁႂ်ႈၶဝ်ၸိူဝ်းဢၼ်ပဵၼ်ၵူၼ်းၸၢႆးၵူၺ်းဢွၼ်ၵၼ်ၵႂႃႇလႄႈႁဵတ်းဝၢတ်ႈတီႈထႃႇဝရႃႉၽြႃးတႃႉ။လွင်ႈၼႆႉၸမ်းပဵၼ်လွင်ႈတၢင်းဢၼ်သူႁႃဢဝ်ယဝ်ႉ၊ဝႃႈၼင်ႇၼႆလႄႈသွင်ၶႃၵေႃႈလႆႈၶၢမ်ႇတၢင်းဢၼ်ႁေႃႈဢွၵ်ႇသေၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးၵႂႃႇဢေႃႈ။
၁၂ ၵမ်းၼၼ်ႉထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈၸမ်း၊-ယိုၼ်းမိုဝ်းမႂ်းၶိုၼ်ႈၵႃႈၼိူဝ်မိူင်းဢေႇၵႅပ်ႉတုလႄႈႁႂ်ႈမႅင်းၵႅင်းတင်းလၢႆႁွတ်ႈမႃးၵႃႈၼိူဝ်မိူင်းဢေႇၵႅပ်ႉတုလႄႈၵိၼ်တူၼ်ႈၵႃႈဢၼ်မီးၵႃႈၼိူဝ်လိၼ်တင်းသဵင်ႈတင်းလူင်ဢၼ်မၢၵ်ႇႁဵပ်းဢမ်ႇယႃႉလႄႈၵိုတ်းၵျၢၼ်ႇဝႆႉၸိူဝ်းၼၼ်ႉတႃႉ၊ဝႃႈၼင်ႇၼႆဢေႃႈ။
၁၃ မုဝ်းသေႇၵေႃႈဢဝ်ၶွၼ်ႉတဝ်ႉမၼ်းယိုၼ်းၶိုၼ်ႈၵႃႈၼိူဝ်မိူင်းဢေႇၵႅပ်ႉတုလႄႈထႃႇဝရႃႉၽြႃးႁႂ်ႈလူမ်းတၢင်းဢွၵ်ႇပဝ်ႇမႃးၵႃႈၼိူဝ်လိၼ်ၼႂ်းဝၼ်းၼၼ်ႉတင်းဝၼ်းၼႂ်းၶိုၼ်းၼၼ်ႉတင်းၶိုၼ်းလႄႈမိူဝ်ႈဢၼ်ထိုင်ႁွတ်ႈၶိင်ႇၵၢင်ၼႂ်ၸိုင်လူမ်းတၢင်းဢွၵ်ႇၼၼ်ႉပႃးဢဝ်မႅင်းၵႅင်းတင်းလၢႆမႃးဢေႃႈ။
၁၄ မႅင်းၵႅင်းၸိူဝ်းၼၼ်ႉႁွတ်ႈမႃးၵႃႈၼိူဝ်မိူင်းဢေႇၵႅပ်ႉတုၵူႈတီႈၵူႈလႅၼ်လႄႈၸပ်းယူႇၵႃႈၼႂ်းၶွပ်ႇၼမ်ႉလႅၼ်လိၼ်မိူင်းဢေႇၵႅပ်ႉတုၵူႈတီႈၵူႈလႅၼ်ၼမ်ၵိုၼ်းၼႃႇလူင်လၢင်ဢေႃႈ။မႅင်းၵႅင်းၸိူဝ်ႉၼင်ႇၼၼ်ၼၼ်ႉၸႃႉၸဵမ်မိူဝ်ႈၵႃႇလႃႉဢွၼ်ၼႆႉၼၼ်ႉဢမ်ႇတွၼ်ႉပဵၼ်သေပွၵ်ႈၵမ်းလိုၼ်းၵေႃႈတၵ်းဢမ်ႇပဵၼ်။
၁၅ ၶဝ်ႁူမ်ႇလူမ်ႈၼႃႈလိၼ်တင်းသဵင်ႈတင်းလူင်တေႃႇထိုင်ႁွတ်ႈထၢၼ်ႈပေႃးႁႂ်ႈလိၼ်ၼၼ်ႉလမ်ၵႂႃႇလႄႈၵိၼ်တူၼ်ႈယိူဝ်ႈၵႃႈမီးၵႃႈၼႂ်းမိူင်းၼၼ်ႉတင်းသဵင်ႈတင်းလူင်ဢိၵ်ႇတင်းမၢၵ်ႇမႆႉမၢၵ်ႇတွၵ်ႇဢၼ်လွတ်ႈတင်းမၢၵ်ႇႁဵပ်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉဢေႃႈ။ၵႃႈၼႂ်းမိူင်းဢေႇၵႅပ်ႉတုၵူႈတီႈၵူႈလႅၼ်ၼၼ်ႉဢမ်ႇၵိုတ်းဢမ်ႇၵျၢၼ်ႇဢၼ်ၶဵဝ်ၵႃႈတီႈတူၼ်ႈမႆႉဢိၵ်ႇတင်းတူၼ်ႈယိူဝ်ႈတူၼ်ႈယႃႈသေၸိူဝ်ႉသေပိူင်ၵႃႈတီႈပၢင်ႇတီႈပဵင်းၼၼ်ႉ။
၁၆ မိူဝ်ႈၼၼ်ႉၶုၼ်ႁေႃၶမ်းၽႃႇရေႃးႁိပ်ႈၼႅတ်ႈႁွင်ႉဢဝ်မုဝ်းသေႇတင်းဢႃႇရုၼ်ႇလႄႈလၢတ်ႈဝႃႈ၊-ၵဝ်ၽိတ်းပိူင်ႈထႃႇဝရႃႉၽြႃး၊ၽြႃးပဵၼ်ၸဝ်ႈသူဢိၵ်ႇတင်းသူယဝ်ႉ။
၁၇ ပွၵ်ႈၼႆႉၵေႃႈၶႅၼ်းတေႃႈယိူၼ်ႉၶၢမ်ႇဢပျႅတ်ႈၵဝ်သေၵမ်း။တွင်းပၢၼ်ႇထႃႇဝရႃႉၽြႃး၊ၽြႃးပဵၼ်ၸဝ်ႈသူၼၼ်ႉႁႂ်ႈမၼ်းၸဝ်ႈဢဝ်ပႅတ်ႈၽေးတၢင်းတၢႆဢၼ်ၼႆႉသေၵႃႈတီႈၵဝ်သေၵမ်း၊မိူဝ်ႈဢၼ်ဝႃႈၼင်ႇၼႆၸိုင်၊
၁၈ မုဝ်းသေႇဢွၵ်ႇသေၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးၵႂႃႇလႄႈတွင်းပၢၼ်ႇထႃႇဝရႃႉၽြႃးဢေႃႈ။
၁၉ ထႃႇဝရႃႉၽြႃးပွႆႇလူမ်းတၢင်းတူၵ်းဢၼ်ႁႅင်းယႂ်ႇၼႃႇၼၼ်ႉမႃးလႄႈလူမ်းၼၼ်ႉဢဝ်မႅင်းၵႅင်းၸိူဝ်းၼၼ်ႉၶျႃးတူၵ်းပႅတ်ႈၵႃႈၼႂ်းပၢင်ႇလၢႆႇဢေႇတုင်ႇသေဢေႃႈ။
၂၀ ၵႃႈၼႂ်းမိူင်းဢေႇၵႅပ်ႉတုၵူႈတီႈၵူႈလႅၼ်ၼၼ်ႉဢမ်ႇၵိုတ်းဢမ်ႇၵျၢၼ်ႇဝႆႉမႅင်းၵႅင်းသေတူဝ်၊ၵူၺ်းၵႃႈထႃႇဝရႃႉၽြႃးႁႂ်ႈႁူဝ်ၸႂ်ၶုၼ်ႁေႃၶမ်းၽႃႇရေႃးၵႅၼ်ႇၶႅင်လႄႈမၼ်းၵေႃႈယင်းဢမ်ႇပွႆႇၵူၼ်းမဵဝ်းဢိသရေႇလၵႂႃႇလႄႈယူႇဢေႃႈ။
ၽေးလပ်းသိင်ႇ
၂၁ ၵမ်းၼၼ်ႉထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇလႄႈဝႃႈၸမ်း၊-ဢဝ်မိုဝ်းမႂ်းယိုၼ်းၶိုၼ်ႈၵႃႈၼိူဝ်ၽႃႉၵၢင်ႁၢဝ်ႁႂ်ႈလပ်းသိင်ႇပဵၼ်မႃးၵႃႈတီႈမိူင်းဢေႇၵႅပ်ႉတုၵူႈတီႈၵူႈလႅၼ်ဢၼ်ဝႃႈလပ်းသိင်ႇဢၼ်ထၼ်ႈပေႃးဢဝ်မိုဝ်းလုပ်ႈၵမ်လႆႈၼၼ်ႉတႃႉ၊ဝႃႈၼင်ႇၼႆလႄႈ
၂၂ မုဝ်းသေႇၵေႃႈဢဝ်မိုဝ်းမၼ်းယိုၼ်းၶိုၼ်ႈၵႃႈၼိူဝႃ်ႉၵၢင်ႁၢဝ်လႄႈလပ်းသိင်ႇဢၼ်ၼႃတၼ်ၼႃႇလူင်လၢင်ၼၼ်ႉပဵၼ်မႃးၵႃႈတီႈမိူင်းဢေႇၵႅပ်ႉတုသၢမ်ဝၼ်းတဵမ်တဵမ်ဢေႃႈ။သၢမ်ဝၼ်းတဵမ်တဵမ်ၵေႃႉၼိုင်ႈလႄႈၵေႃႉၼိုင်ႈဢမ်ႇႁၼ်ၵၼ်လႆႈ။
၂၃ ၽူႈလႂ်ၵေႃႈဢမ်ႇၸၢင်ႊလုၵ်ႉသေၵႃႈတီႈဢၼ်တူဝ်ၸဝ်ႈၵဝ်ႇယူႇၼၼ်ႉ။ၵူၺ်းၵႃႈၵူၼ်းမဵဝ်းဢိသရေႇလၶဝ်တင်းသဵင်ႈတင်းလူင်ၸိူဝ်းၼၼ်ႉၸမ်းလႆႈဢၼ်လႅင်းၵႃႈၼႂ်းႁိူၼ်းတီႈဢၼ်ၶဝ်ယူႇၸိူဝ်းၼၼ်ႉယူႇဢေႃႈ။
၂၄ မိူဝ်ႈၼၼ်ႉၶုၼ်ႁေႃၶမ်းၽႃႇရေႃးႁွင်ႉဢဝ်မုဝ်းသေႇလႄႈလၢတ်ႈဝႃႈ၊-သူၵႂႃႇႁႂ်ႈလႆႈႁဵတ်းဝၢတ်ႈတီႈထႃႇဝရႃႉၽြႃးတႃႉ။ၼႂ်းဝႃႈၼၼ်သေၵေႃႈယႃႇပေဢဝ်ၽုင်သူဝ်းၽုင်ဝူဝ်းသူၵႂႃႇ။လုၵ်ႈဢွၼ်ႇသူတင်းၽူႈယိင်းလႂ်ၵေႃႈဢဝ်ပႃးၵႂႃႇတႃႉ၊ဝႃႈၼင်ႇၼႆဢေႃႈ။
၂၅ မုဝ်းသေႇၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းတၵ်းလႆႈပၼ်တူဝ်ယိၸ်ႉဢိၵ်ႇတင်းယိၸ်ႉဢၼ်တုတ်ႇၽႆးတင်းလၢႆပုၼ်ႈဢၼ်တၵ်းလႆႈပုၵ်ႉၸေႃႇထႃႇဝရႃႉၽြႃး၊ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်ၸိူဝ်းၼႆႉၼၼ်ႉတီႈၶႃႈဢေႃႈ။
၂၆ တရိၵ်ႈသၢၼ်ႇၶႃႈၸဝ်ႈႁဝ်းၶဝ်တၵ်းလႆႈပႃးလူၺ်ႈၵၼ်တင်းၶႃႈၸဝ်ႈႁဝ်းၶဝ်ၵႂႃႇတီႈၶႃႈဢေႃႈ။ဢမ်ႇလႆႈဝႆႉၵိုတ်းဝႆႉၵျၢၼ်ႇၵိပ်ႇမၼ်းသေၵိပ်ႇၶႃႈ။လွင်ႈမၼ်းၸမ်းတၵ်းလႆႈလိူၵ်ႈၵဵပ်းဢဝ်ၵႃႈၼႂ်းၶဝ်ၼၼ်ႉပုၼ်ႈဢၼ်တၵ်းႁဵတ်းဝၢတ်ႈထႃႇဝရႃႉၽြႃး၊ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈဢေႃႈ။ၸူဝ်ႈဢၼ်ဢမ်ႇပႆႇႁွတ်ႈထိုင်ၵႃႈတီႈၼၼ်ႉၼၼ်ႉၸိုင်ဢမ်ႇႁူႉလွင်ႈဢၼ်တၵ်းလႆႈဢဝ်တင်းတူဝ်ၸိူဝ်ႉၼင်ႇႁိုဝ်လႄႈႁဵတ်းဝၢတ်ႈတီႈထႃႇဝရႃႉၽြႃးၼၼ်ႉၶႃႈဝႃႈၼင်ႇၼႆဢေႃႈ။
၂၇ ထႃႇဝရႃႉၽြႃးႁႂ်ႈႁူဝ်ၸႂ်ၶုၼ်ႁေႃၶမ်းၽႃႇရေႃးၵႅၼ်ႇၶႅင်လႄႈမၼ်းၵေႃႈယင်းဢမ်ႇပွႆႇၵူၼ်းမဵဝ်းဢိသရေႇလၶဝ်ၵႂႃႇလႄႈယူႇဢေႃႈ။
၂၈ ၵမ်းၼၼ်ႉၶုၼ်ႁေႃၶမ်းၽႃႇရေႃးမီးဢမိင်ႉတီႈမုဝ်းသေႇလႄႈဝႃႈ၊-ဢွၵ်ႇသေၵႃႈတီႈၵဝ်ၼႆႉတႃႉ။ၵမ်းလိုၼ်းႁဵတ်းသတိတႃႉ။ယႃႇပေႁႂ်ႈလႆႈႁၼ်ၼႃႈၵဝ်။ၼႂ်းဝၼ်းဢၼ်မႂ်းႁၼ်ၼႃႈၵဝ်ၼၼ်ႉမႂ်းတၵ်းလႆႈတၢႆဢေႃႈ၊ဝႃႈၼင်ႇၼႆဢေႃႈ။
၂၉ မုဝ်းသေႇၵေႃႈလဝ်ႈလၢတ်ႈလႄႈဝႃႈ၊-လွင်ႈဢၼ်ၸဝ်ႈႁဝ်းမီးဢမိင်ႉၼႆႉလီတီႈၶႃႈယဝ်ႉ။ၵမ်းလိုၼ်းၶႃႈၸဝ်ႈႁဝ်းတၵ်းဢမ်ႇလႆႈႁၼ်ၼႃႈၸဝ်ႈႁဝ်းတီႈၶႃႈယဝ်ႉ၊ဝႃႈၼင်ႇၼႆဢေႃႈ။