Chapter
၂၁
ၶႃႈၵူၼ်းႁေႇပြႄး
၁ ထမ်ႇမႃႉသၢတ်ႈဢၼ်မႂ်းတၵ်းလႆႈၸီႇယၢင်ႇဝႆႉၵႃႈတီႈၽၢႆႇၼႃႈၶဝ်ၼၼ်ႉၸမ်းပေႃးမႂ်းသိုဝ်ႉဢဝ်ၶႃႈဢၼ်ပဵၼ်ၸိူဝ်ႉၶိူဝ်းႁေႇပႄးၸိုင်မၼ်းတၵ်းလႆႈၶၢမ်ႇႁဵတ်းၶႃႈႁူၵ်းပီႊၵူၺ်းဢေႃႈ။
၂ ပေႃးထိုင်ႁွတ်ႈပီႊသတ်ႉတမၸိုင်မၼ်းယင်းဢမ်ႇပၼ်ၵႃႈတူဝ်မၼ်းလႄႈတၵ်းလႆႈဢွၵ်ႇၵႂႃႇဢေႃႈ။
၃ မိူဝ်ႈဢၼ်ၸႃႉၶၢမ်ႇႁဵတ်းၶႃႈၼၼ်ႉပေႃးမၼ်းၶၢမ်ႇၵေႃႉလဵဝ်ၵူၺ်းၸိုင်တၵ်းလႆႈဢွၵ်ႇၵေႃႉလဵဝ်ၵူၺ်းဢေႃႈ။ပေႃးမၼ်းပႃးမေးၸိုင်မေးမၼ်းၼၼ်ႉၵေႃႈတၵ်းလႆႈဢွၵ်ႇလူၺ်ႈၵၼ်တင်းမၼ်းဢေႃႈ။
၄ ဢမ်ႇၼၼ်ပေႃးၸဝ်ႈမၼ်းဢဝ်မေးပၼ်တီႈမၼ်းလႄႈမေးၼၼ်ႉၵိူတ်ႇလဵင်ႉလုၵ်ႈလဵင်ႉလၢင်းမႃးၸိုင်ၸဝ်ႈမၼ်းတၵ်းလႆႈပိူင်ႇဢဝ်မေးမၼ်းတင်းလုၵ်ႈလၢင်းမၼ်းၸိူဝ်းၼၼ်ႉဝႆႉဢေႃႈ။ၶႃႈၼၼ်ႉၸမ်းတၵ်းလႆႈဢွၵ်ႇၵေႃႉလဵဝ်ၵူၺ်းမၼ်းဢေႃႈ။
၅ ဢမ်ႇၼၼ်ပေႃးၶႃႈမၼ်းၼၼ်ႉလၢတ်ႈလႅင်းလႅင်းဝႃႈ၊-ၵဝ်ၶႃႈႁၵ်ႉၸဝ်ႈၵဝ်ၶႃႈဢိၵ်ႇတင်းမေးတင်းလုၵ်ႈလၢင်းၵဝ်ၶႃႈၶႃႈဢေႃႈ။
၆ ဢမ်ႇၶႂ်ႈဢွၵ်ႇၵႂႃႇၶႃႈ၊ဝႃႈၼင်ႇၼႆၸိုင်၊ၸဝ်ႈမၼ်းၼၼ်ႉတၵ်းလႆႈဢဝ်မၼ်းၵႂႃႇၵႃႈတီႈၽၢႆႇၼႃႈၵူၼ်းလူင်ဢၼ်ၸီႇယၢင်ႇတြႃးၼၼ်ႉသေယဝ်ႉ၊သမ်ႉဢဝ်ၵႂႃႇၵႃႈတီႈၽၵ်းတူႁိူၼ်းဢမ်ႇၼၼ်တီႈသဝ်ၽၵ်းတူႁိူၼ်းလႄႈဢဝ်လဵၵ်းၸီးၸီးဝၢၼ်ႇႁူမၼ်းသေယဝ်ႉၶႃႈၼၼ်ႉတၵ်းလႆႈၶၢမ်ႇႁဵတ်းၶႃႈယူႇတေႃႇၸူဝ်ဢသၢၵ်ႈဢေႃႈ။
၇ ပေႃးသေၵေႃႉသေၵူၼ်းဢဝ်လုၵ်ႈယိင်းမၼ်းၶၢႆပႅတ်ႈႁႂ်ႈလႆႈၶၢမ်ႇႁဵတ်းၶႃႈၸိုင်ၶႃႈလုၵ်ႈယိင်းၼၼ်ႉတၵ်းလႆႈဢွၵ်ႇမိူၼ်ၸိူဝ်ႉၼင်ႇၶႃႈၵူၼ်းၸၢႆးဢမ်ႇၸႂ်ႈ။
၈ ပေႃးမၼ်းဢမ်ႇထုၵ်ႇၸႂ်ၸဝ်ႈမၼ်းဢၼ်သိုဝ်ႉဢဝ်မၼ်းဝႆႉပုၼ်ႈတူဝ်ၸဝ်ႈၵဝ်ႇယဝ်ႉၸိုင်ၸဝ်ႈမၼ်းၼၼ်ႉတၵ်းလႆႈပၼ်ဢၶႂၢင်ႉႁႂ်ႈပိူၼ်ႈတၢင်ႇၵေႃႉလႆႈထုတ်ႇဢဝ်မၼ်းဢေႃႈ။ပိူဝ်ႈဢၼ်လႆႈပႅတ်ႉလႆႈလႅၼ်မၼ်းယဝ်ႉလႄႈဢမ်ႇမီးဢၶႂၢင်ႉဢၼ်လႆႈၶၢႆပၼ်တီႈၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉ။
၉ ပေႃးဢဝ်မၼ်းပၼ်လုၵ်ႈၸၢႆးတူဝ်ၸဝ်ႈၵဝ်ႇၸိုင်တၵ်းလႆႈဢဝ်မၼ်းႁဵတ်းမိူၼ်ႇၸိူဝ်ႉၼင်ႇလုၵ်ႈယိင်းဢေႃႈ။
၁၀ ပေႃးသမ်ႉဢဝ်မေႈယိင်းတၢင်ႇၵေႃႉထႅင်ႈၸိုင်တီႈမေႈယိင်းဢၼ်ဢဝ်ဢွၼ်တၢင်းၼၼ်ႉၵေႃႈတၵ်းဢမ်ႇလႆႈသုတ်ႈလႆႈယွမ်းတၢင်းၵိၼ်တၢင်းၼုင်ႈဢိၵ်ႇတင်းဝၢတ်ႈမေး။
၁၁ ပေႃးဢမ်ႇႁဵတ်းသၢမ်ပိူင်ၼႆႉၸိုင်မေးၼၼ်ႉယင်းဢမ်ႇပၼ်ၵႃႊတူဝ်ၶၼ်တူဝ်မၼ်းလႄႈတၵ်းလႆႈဢွၵ်ႇဢေႃႈ။
တၢင်းဢၼ်ႁဵတ်းႁႂ်ႈတိူဝ်ႉမၢတ်ႇ
၁၂ ၵေႃႉဢၼ်ပေႃႉယႅၼ်ႉၵူၼ်းႁႂ်ႈတၢႆၼၼ်ႉတၵ်းလႆႈၶၢမ်ႇတၢင်းတၢႆဢမၢၼ်ႇၶၢၼ်ပဵၼ်ဢေႃႈ။
၁၃ ပေႃးမၼ်းယင်းဢမ်ႇလွမ်တဵတ်ႇလွမ်မႅပ်းလႄႈႁဵတ်းပဵၼ်တၢင်းဢၼ်ၽြႃးပဵၼ်ၸဝ်ႈဢဝ်ဢသၢၵ်ႈၵူၼ်းဢၢပ်ႈပၼ်ၵႃႈၼႂ်းမိုဝ်းမၼ်းၸိုင်ၵဝ်တၵ်းၶၢၼ်းဝႆႉတီႈဢၼ်မၼ်းတၵ်းလႆႈလႅၼ်ႈပၢႆႊၵႂႃႇၸူးၼၼ်ႉဢေႃႈ။
၁၄ ၵေႃႉဢၼ်ႁဵတ်းၵျၢမ်းၼႃႇတီႈၵူၼ်းႁိူၼ်းၸမ်ၵၼ်လႄႈဢဝ်တင်းပရီႉယေႇဢဝ်တၢႆၼၼ်ႉၸမ်းမီးယူႇၵႃႈတီႈယိၸ်ႉပလၢင်ႇၵဝ်သေၵေႃႈတၵ်းလႆႈတိုတ်ႉၸၼ်ဢဝ်မၼ်းသေလႄႈဢဝ်တၢႆဢေႃႈ။
၁၅ ၵေႃႉဢၼ်ပေႃႉယႅၼ်ႉပေႃႈမၼ်းမေႈမၼ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၢၼ်ပဵၼ်ဢေႃႈ။
၁၆ ၵေႃႉဢၼ်ဢႃႉထမ်ႇမႃႉလၵ်ႉဢဝ်ၵူၼ်းလႄႈဢဝ်ၶၢႆပႅတ်ႈသေဢမ်ႇဝႃႈယင်းမီးယူႇၼႂ်းမိုဝ်းမၼ်းသေဢမ်ႇဝႃႈတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၢၼ်ပဵၼ်ဢေႃႈ။
၁၇ ၵေႃႉဢၼ်ၵိၼ်ႇလႃႇပေႃႈမေႈမၼ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၢၼ်ပဵၼ်ဢေႃႈ။
၁၈ ပေႃးၵူၼ်းၼင်ႇၵၼ်ၵၼ်ၽိတ်းၵၼ်လႄႈၵေႃႉၼိုင်ႈဢဝ်မၢၵ်ႇႁိၼ်ထိမ်ႈသေဢမ်ႇဝႃႈဢဝ်တႃမိုဝ်းထုပ်ႉသေဢမ်ႇဝႃႈၵေႃႉဢၼ်လႆႈၶၢမ်ႇတၢင်းဢၼ်ထိမ်ႈဢၼ်ထုပ်ႉၼၼ်ႉယင်းဢမ်ႇတၢႆလႄႈလႆႈၼွၼ်းယဵတ်ႇယူႇၵႃႈၼိူဝ်တီႈၼွၼ်းပေႃးမၼ်းသမ်ႉလုၵ်ႉလႆႈလႄႈဢဝ်တင်းၶွၼ်ႉတဝ်ႉပႆဢွၵ်ႇၵႂႃႇၵႃႈၼွၵ်ႈလႆႈယူႇၸိုင်ၵေႃႉဢၼ်ပေႃႉၼၼ်ႉတၵ်းလႆႈလွတ်ႈဢေႃႈ။
၁၉ ၵူၺ်းၵႃႈတၵ်းလႆႈဢဝ်ငိုၼ်းယေႃႇသေပုၼ်ႈတၢင်းဢၼ်မၼ်းလႆႈၼွၼ်းယူႇၼၼ်ႉလႄႈပၼ်ၵႃႊတေႃႇတၢင်းၸဵပ်းတၢင်းပဵၼ်မၼ်းလႆႈႁွတ်ႈထိုင်တၢင်းဢၼ်ႁၢႆၶႅၼ်းမႃးမူတ်းမူတ်းၼၼ်ႉဢေႃႈ။
၂၀ ပေႃးသေၵေႃႉသေၵူၼ်းဢဝ်တင်းၶွၼ်ႉပေႃႉယႅၼ်ႉၶႃႈၵူၼ်းၸၢႆးမၼ်းဢမ်ႇၼၼ်ၶႃႈၵူၼ်းယိင်းမၼ်းလႄႈလႆႈတၢႆၵွပ်ႈမိုဝ်းမၼ်းၸိုင်ၵေႃႉၼၼ်ႉတၵ်းလႆႈၶၢမ်ႇတၢမ်ႇဢမၢၼ်ႇၶၢၼ်ပဵၼ်ဢေႃႈ။
၂၁ ၵူၺ်းၵႃႈပေႃးၶႃႈၼၼ်ႉဢမ်ႇတၢႆလႄႈယူႇဝၼ်းၼိုင်ႈသွင်ဝၼ်းၶိုၼ်းလုၵ်ႉမႃးၸိုင်ၸဝ်ႈၼၼ်ႉတၵ်းလႆႈၵၢင်းလွတ်ႈတင်းတၢမ်ႇၵွပ်ႈပိူဝ်ႈဝႃႈၶႃႈၼၼ်ႉပဵၼ်မၼ်းပိူင်ႇၼၼ်ႉဢေႃႈ။
၂၂ ပေႃးၵူၼ်းၸၢႆးၼင်ႇၵၼ်ၽိတ်းၵၼ်လႄႈတိူဝ်ႉထုၵ်ႇမေႈယိင်းဢၼ်ပႃးပတိၵ်ႈသၼ်ႇထေၼၼ်ႉသေယဝ်ႉသၼ်ႇထေႇလႆႈၵိူတ်ႇမႃးၸဝ်ႉၸဝ်ႉလႄႈဢၢင်ႇၵႃႇလုၵ်ႈဢွၼ်ႇတၢင်ႇၸိူဝ်ႉတၢင်ႇပိူင်ၸိုင်ဢမ်ႇလူႉၸိုင်ႈၵေႃႉၼၼ်ႉတၵ်လႆႈယေႃႇငိုၼ်းၸွမ်းၵႃႈၼင်ႇဢၼ်ၽူဝ်မေႈယိင်းၸီႇယၢင်ႇၵႃႈၼင်ႇဢၼ်ၶုၼ်ၸီႇယၢင်ႇၼၼ်ႉဢေႃႈ။
၂၃ ပေႃးပဵၼ်တၢင်းဢၼ်ဢၢင်ႇၵႃႇလုၵ်ႈဢွၼ်ႇလူႉသေၸိူဝ်ႉသေပိူင်ၸိုင်မႂ်းတၵ်းလႆႈတႅၼ်းဢသၢၵ်ႈပုၼ်ႈဢသၢၵ်ႈ၊မၢၵ်ႇတႃပုၼ်ႈမၢၵ်ႇတႃ၊
၂၄ ၶဵဝ်ႈပုၼ်ႈၶဵဝ်ႈ၊မိုဝ်းပုၼ်ႈမိုဝ်း၊တိၼ်ပုၼ်ႈတိၼ်၊တၢင်းဢၼ်ၽႆးမႆႈပုၼ်ႈတၢင်းဢၼ်ၽႆးမႆႈ၊
၂၅ တၢင်းဢၼ်တိူဝ်ႉမတ်ႉပုၼ်ႈတၢင်းဢၼ်တိူဝ်ႉမတ်ႉႁွႆးၸဵပ်းပုၼ်ႈႁွႆးၸဵပ်းဢေႃႈ။
၂၆ ပေႃးသေၵေႃႉသေၵူၼ်းပေႃႉယႅၼ်ႉသႂ်ႇမၢၵ်ႇတႃၶႃႈၵူၼ်းၸၢႆးမၼ်း၊ဢမ်ႇၼၼ်မၢၵ်ႇတႃၶႃႈၵူၼ်းယိင်းမၼ်းႁႂ်ႈမၢၵ်ႇတႃလူႉၵႂႃႇၸိုင်ၵွပ်ႈပိူဝ်ႈဢၼ်မၢၵ်ႇတႃမၼ်းလူႉၵႂႃႇၼၼ်ႉၵႃႊမၼ်းၶၼ်မၼ်းယင်းဢမ်ႇဢဝ်လႄႈတၵ်းလႆႈပွႆႇမၼ်းလွတ်ႈသေဢေႃႈ။
၂၇ မိူၼ်ၼင်ႇၼၼ်ပေႃးပေႃႉယႅၼ်ႉသႂ်ႇၶဵဝ်ႈၶႃႈၵူၼ်းၸၢႆးမၼ်းဢမ်ႇၼၼ်ၶဵဝ်ႈၶႃႈၵူၼ်းယိင်းမၼ်းႁႂ်ႈၶဵဝ်ႈႁၵ်းၵႂႃႇၸိုင်ၵွပ်ႈပိူဝ်ႈဢၼ်ၶဵဝ်ႈမၼ်းႁၵ်းၵႂႃႇၼၼ်ႉၵႃႊမၼ်းၶၼ်မၼ်းယင်းဢမ်ႇဢဝ်လႄႈတၵ်းလႆႈပွႆႇမၼ်းလွတ်ႈသေဢေႃႈ။
၂၈ ပေႃးဝူဝ်းတေႃးမႅၼ်ႈၵူၼ်းၸၢႆးဢမ်ႇၼၼ်ၵူၼ်းယိင်းလႄႈတၢႆၸိုင်တၵ်းလႆႈဢဝ်တင်းမၢၵ်ႇႁိၼ်ထိမ်ႈဝူဝ်းၼၼ်ႉတၢႆဢမၢၼ်ႇၶၢၼ်ပဵၼ်ဢေႃႈ။ၼိူဝ်ႉမၼ်းၵေႃႈဢမ်ႇလႆႈၵိၼ်။ၸဝ်ႈဝူဝ်းၼၼ်ႉၸမ်းတၵ်းလႆႈၵၢင်းလွတ်ႈတင်းဢပျႅတ်ႈဢေႃႈ။
၂၉ ၼႂ်းဝႃႈၼၼ်သေၵေႃႈယၢမ်ႈတေႃးမိူဝ်ႈဢွၼ်ၼၼ်ႉဝူဝ်းတူဝ်ၼၼ်ႉၸဝ်ႈမၼ်းလႆႈႁူႉငိၼ်းလွင်ႈဢၼ်ဝႃႈမၼ်းမေႃတေႃးပိူၼ်ႈသေၵေႃႈယင်းဢမ်ႇမတ်ႉၽုၵ်ႇလႄႈပွႆႇလွတ်ႈဝႆႉလႄႈဝူဝ်းၼၼ်ႉတေႃးၵူၼ်းၸၢႆးဢမ်ႇၼၼ်ၵူၼ်းယိင်းတၢႆၸိုင်တၵ်းလႆႈဢဝ်တင်းမၢၵ်ႇႁိၼ်ထႅမ်ႈဝူဝ်းၼၼ်ႉတၢႆဢေႃႈ။ၸဝ်ႈဝူဝ်းၵေႃႈတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။
၃၀ ဢမ်ႇၼၼ်ၵေႃႈပေႃးၸီႇယၢင်ႇႁႂ်ႈယေႃႇငိုၼ်းသငေိုၼ်းၸိုင်တၵ်းလႆႈယေႃႇငိုၼ်းသငေိုၼ်းဢၼ်ထုတ်ႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉၸွမ်းၵႃႈၼင်ႇဢၼ်ၸီႇယၢင်ႇၼၼ်ႉဢေႃႈ။
၃၁ ပေႃးတေႃးလုၵ်ႈၸၢႆးပိူၼ်ႈလုၵ်ႈယိင်းပိူၼ်ႈၵေႃႈတၵ်းလႆႈၶၢမ်ႇၸွမ်းၵႃႈၼင်ႇဢၼ်ၸီႇယၢင်ႇၼႆႉဢေႃႈ။
၃၂ ပေႃးဝူဝ်းၼၼ်ႉတေႃးၶႃႈၵူၼ်းၸၢႆးဢမ်ႇၼၼ်ၶႃႈၵူၼ်းယိင်းၸိုင်ၸဝ်ႈဝူဝ်းတၵ်းလႆႈပၼ်ငိုၼ်းၵျၢပ်ႈသၶလသေၢမ်သိပ်းၵျၢပ်ႈတီႈၸဝ်ႈၶႃႈၼၼ်ႉဢေႃႈ။ဝူဝ်းၵေႃႈတၵ်းလႆႈဢဝ်တင်းမၢၵ်ႇႁိၼ်ထႅမ်ႈတၢႆဢေႃႈ။
၃၃ ပေႃးသေၵေႃႉသေၵူၼ်းၽုၺ်ႇႁူးၽုၺ်ႇၶုမ်ဝႆႉဢမ်ႇၼၼ်ၶုတ်းႁူးၶုတ်းၶုမ်ဢမ်ႇႁူမ်ႇဝႆႉသေယဝ်ႉဝူဝ်းပိူၼ်ႈမႃႉလီႈပိူၼ်ႈတူၵ်းသႂ်ႇၵႃႈၼႂ်းႁူးၼႂ်းၶုမ်ၼၼ်ႉၸိုင်
၃၄ ၸဝ်ႈႁူးၸဝ်ႈၶုမ်ၼၼ်ႉတၵ်းလႆႈပၼ်ငိုၼ်းတီႈၸဝ်ႈဝူဝ်းၸဝ်ႈမႃႉလီႈၼၼ်ႉလႄႈတူဝ်ဢၼ်တၢႆၼၼ်ႉတၵ်းလႆႈပဵၼ်ဢုၵ်ႉၸႃႇမၼ်းဢေႃႈ။
၃၅ ပေႃးဝူဝ်းသေၵေႃႉသေၵူၼ်းတေႃးဝူဝ်းပိူၼ်ႈတၢႆၸိုင်သွင်ၶႃႈတၵ်းလႆႈၶၢႆဝူဝ်းဢၼ်ဢသၢၵ်ႈလိပ်းၼၼ်ႉသေလႄႈဢဝ်ၵႃႊမၼ်းၶၼ်မၼ်းၽမေႅင်ႇၵၼ်ဢေႃႈ။
၃၆ ၼႂ်းဝႃႈၼၼ်သေၵေႃႈပေႃးၸဝ်ႈဝူဝ်းႁူႉလွင်ႈဢၼ်ဝူဝ်းမၼ်းယၢမ်ႈတေႃးမိူဝ်ႈဢွၼ်ၼႆႉၼၼ်ႉယူႇလႄႈယင်းဢမ်ႇမတ်ႉဢမ်ႇၽုၵ်ႇပွႆႇလွတ်ႈဝႆႉၸိုင်မၼ်းတၵ်းလႆႈဢဝ်ဝူဝ်းယေႃႇပၼ်ပုၼ်ႈဝူဝ်းတူဝ်ၼိုင်ႈၼၼ်ႉဢမၢၼ်ႇၶၢၼ်ပဵၼ်လႄႈဝူဝ်းဢၼ်တၢႆၼၼ်ႉတၵ်းလႆႈပဵၼ်ၶွင်ၶူဝ်းမၼ်းဢေႃႈ။