Chapter
၂၉
တၢင်းဢၼ်သၢၵ်ႈၵၢပ်ႈၵူၼ်းမူတ်းၸၢင်ႇ
၁ လွင်ႈတၢင်းဢၼ်မႂ်းတၵ်းလႆႈႁဵတ်းၸိူဝ်ႉၼင်ႇႁိုဝ်တီႈၶဝ်ႁႂ်ႈၶဝ်မူတ်းၸၢင်ႇႁႂ်ႈၶဝ်လႆႈပွင်ႁဵတ်းဢမူႉယိတ်ႉပရေႃးႁိၵ်ႈၵႃႈတီႈၽၢႆႇၼႃႈၵဝ်ၼၼ်ႉၸမ်း
၂ တၵ်းလႆႈဢဝ်ဝူဝ်းပေႃႈဢွၼ်ႇတင်းသူဝ်းပေႃႈသွင်တူဝ်ဢၼ်ဢမ်ႇပႃးဢၢင်ႇၵႃႇလူႉဢိၵ်ႇတင်းၶဝ်မုၼ်းဢၼ်ဢဝ်ၶဝ်ႈၵျုင်ႇဢၼ်ဢမ်ႇပႃးၸိူဝ်ႉပႅင်ႈႁဵတ်းၶဝ်ႈမုၼ်းၵျုင်ႇဢၼ်ၶႅပ်ႈဢၼ်ဢဝ်ၼမ်ႉမၼ်းသႂ်ႇလေႃး၊
၃ ၶဝ်ႈမုၼ်းၵျုင်ႇဢၼ်ၶွပ်ႈဢၼ်ၼမ်ႉမၼ်းတႃးၸိူဝ်းၼၼ်ႉလႄႈဢဝ်သႂ်ႇၵႃႈၼႂ်းၶွင်ႉႁူၺ်ႇၼိုင်ႈသေယဝ်ႉပႃးဢဝ်ၶွင်ႉၼၼ်ႉမႃးဢိၵ်ႇလူၺ်ႈၵၼ်တင်းဝူဝ်းပေႃႈဢွၼ်ႇတင်းသူဝ်းသွင်တူဝ်ၼၼ်ႉဢေႃႈ။
၄ မႂ်းတၵ်းလႆႈႁွင်ႉဢဝ်ဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉမႃးၵႃႈတီႈၽၵ်းတူသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉလႄႈဢဝ်ၶဝ်ဢၢပ်ႇၼမ်ႉသေဢေႃႈ။
၅ မႂ်းတၵ်းလႆႈဢဝ်ၶူဝ်းၼုင်ႈတၢင်းမႆႊ၊ဢဝ်သိူဝ်ႈပုတ်း၊သိူဝ်ႈယၢဝ်းဢၼ်ၸၢပ်ႈသႅင်ႇၵၼ်တင်းသိူဝ်ႈသုပ်းတင်းၶိူင်ႈဝႆႉၼႃႈဢူၵ်းၼၼ်ႉၼုင်မႆႊပၼ်ဢႃႇရုၼ်ႇလႄႈဢဝ်သၢႆႁတ်ႉဢႅဝ်ဢၼ်ႁၢင်ႈၶိူင်ႈဢၼ်ၸၢပ်ႈသႅင်ႇၵၼ်တင်းသိူဝ်ႈသုပ်းၼၼ်ႉႁတ်ႉပၼ်ဢေႃႈ။
၆ မႂ်းတၵ်းလႆႈဢဝ်ၶဵၼ်းႁူဝ်ၶဵၼ်းသႂ်ႇၵႃႈတီႈႁူဝ်မၼ်းလႄႈသမ်ႉဢဝ်ၶိူင်ႈပျႃးၶမ်းဢၼ်မူတ်းၸၢင်ႇၼၼ်ႉသႂ်ႇဝႆႉၵႃတီႈၶဵၼ်းႁူဝ်ၼၼ်ႉဢေႃႈ။
၇ ၵမ်းၼၼ်ႉမႂ်းတၵ်းလႆႈဢဝ်ၼမ်ႉမၼ်းပုၼ်ႈဢၼ်တႃးၼၼ်ႉထွၵ်ႇသႂ်ႇၵႃႈၼိူဝ်ႁူဝ်မၼ်းလႄႈတႃးမၼ်းဢေႃႈ။
၈ လုၵ်ႈၸၢႆးမၼ်းၸိူဝ်းၼၼ်ႉၵေႃႈမႂ်းတၵ်းလႆႈႁွင်ႉမႃးလႄႈဢဝ်သိူဝ်ႈၼုင်ႈပၼ်ဢေႃႈ။
၉ မႂ်းတၵ်းလႆႈဢဝ်သၢႆႁတ်ႉဢႅဝ်ႁတ်ႉပၼ်ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉလႄႈဢဝ်မွၵ်ႇႁူဝ်တိုဝ်းပၼ်သေယဝ်ႉၶဝ်ၼၼ်ႉတၵ်းလႆႈၸၢပ်ႈသႅင်ႇၵၼ်တင်းဢရႃႇယိတ်ႉပရေႃးႁိၵ်ႈၸွမ်းၵႃႈၼင်ႇထုင်းၾိင်ႈထႃႇဝရႃႉၸဝ်ႈဢေႃႈ။ၼင်ႇၼၼ်လႄႈမႂ်းတၵ်းလႆႈဢဝ်ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉၶၢၼ်းဝႆႉၼႂ်းဢရႃႇယိတ်ႉပရေႃးႁိၵ်ႈဢေႃႈ။
၁၀ လိုၼ်းၼၼ်ႉမႂ်းတၵ်းလႆႈဢဝ်ဝူဝ်းပေႃႈတူဝ်ၼိုင်ႈမႃးၵႃႈတီႈၽၢႆႇၼႃႈသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈလႄႈဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉတၵ်းလႆႈဢွၼ်ၵၼ်ဢဝ်မိုဝ်းတူဝ်ၸဝ်ႈၵဝ်ႇတၢင်ႇသႂ်ႇၵႃႈၼိူဝ်ႁူဝ်ဝူဝ်းပေႃႈၼၼ်ႉဢေႃႈ။
၁၁ ဝူဝ်းပေႃႈၼၼ်ႉၸိုင်မႂ်းတၵ်းလႆႈဢဝ်တၢႆၵႃႈတီႈၽၢႆႇၼႃႈထႃႇဝရႃႉၽြႃးၵႃႈတီႈႁိမ်းၽၵ်းတူသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉဢေႃႈ။
၁၂ မႂ်းတၵ်းလႆႈဢဝ်တင်းၼိဝ်ႉမိုဝ်းမႂ်းဢဝ်လိူတ်ႈဝူဝ်းပေႃႈၼၼ်ႉၵမ်ႈၽွင်ႈသႂ်ႇၵႃႈၼိူဝ်ၶဝ်လႅမ်ယိၸ်ႉပလၢင်ႇၸိူဝ်းၼၼ်ႉသေယဝ်ႉဢဝ်လိူတ်ႈဢၼ်ၵိုတ်းဢၼ်ၵျၢၼ်ႇၼၼ်ႉထွၵ်ႇပႅတ်ႈၵႃႈတီႈႁိမ်းတိၼ်ယိၸ်ႉပလၢင်ႇဢေႃႈ။
၁၃ မႂ်းတၵ်းလႆႈဢဝ်ၵွၼ်ႈၶႆၵွၼ်ႈမၼ်းဢၼ်ႁူမ်ႇသႆႈမၼ်းၵႃႈမီးတင်းသဵင်ႈတင်းလူင်ၽၢင်ႇၽၢပ်ႈဢၼ်မီးၵႃႈၼိူဝ်တပ်းမၼ်းမၢၵ်ႇလၼ်းသွင်လုၵ်ႈတင်းၵွၼ်ႈၶႆၵွၼ်ႈမၼ်းဢၼ်ႁူမ်ႇမၢၵ်ႇလၼ်းၼၼ်ႉတုတ်ႇၽႆးၵႃႈၼိူဝ်ယိၸ်ႉပလၢင်ႇဢေႃႈ။
၁၄ ၼိူဝ်ႉဝူဝ်း၊ၼင်မၼ်းတင်းၶီႈၼုမ်ႇမၼ်းၸမ်းမႂ်းတၵ်းလႆႈဢဝ်တုတ်ႇၽႆးၵႃႈတီႈၽၢႆႇတၢင်းၼွၵ်ႈတပ်ႉဢေႃႈ။ပဵၼ်ယိၸ်ႉပုၼ်ႈဢၼ်တၵ်းၽေႇဢပျႅတ်ႈဢေႃႈ။
၁၅ မႂ်းသမ်ႉတၵ်းလႆႈဢဝ်သူဝ်းပေႃႈတူဝ်ၼိုင်ႈလႄႈဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉတၵ်းလႆႈဢွၼ်ၵၼ်ဢဝ်မိုဝ်းတူဝ်ၸဝ်ႈၵဝ်ႇတၢင်ႇၵႃႈၼိူဝ်ႁူဝ်သူဝ်းပေႃႈၼၼ်ႉဢေႃႈ။
၁၆ မႂ်းဢဝ်သူဝ်းပေႃႈၼၼ်ႉတၢႆသေယဝ်ႉတၵ်းလႆႈဢဝ်လိူတ်ႈမၼ်းၽႅတ်းၸွမ်းႁိမ်းၵႃႈၼိူဝ်ယိၸ်ႉပလၢင်ႇၼၼ်ႉဢေႃႈ။
၁၇ မႂ်းတၵ်းလႆႈတႅပ်းသူဝ်းပေႃႈၼၼ်ႉႁဵတ်းပဵၼ်ပွတ်းပဵၼ်ပိတ်းသေလႄႈဢဝ်ၶူင်းၼႂ်းမၼ်းဢိၵ်ႇတင်းတိၼ်မၼ်းသုၵ်ႈၼမ်ႉသေယဝ်ႉတၵ်းလႆႈဢဝ်ၸူႉၵၼ်ၵွင်ၵၼ်ဝႆႉၵႃႈၼိူဝ်ၵွၼ်ႈၼိူဝ်ႉမၼ်းဢိၵ်ႇတင်းႁူဝ်မၼ်းၼၼ်ႉလႄႈဢဝ်သူဝ်းပေႃႈၼၼ်ႉတုတ်ႇၽႆးၵႃႈၼိူဝ်ယိၸ်ႉပလၢင်ႇတင်းတူဝ်ဢေႃႈ။ပဵၼ်ယိၸ်ႉဢၼ်တုတ်ႇၽႆးတီႈထႃႇဝရႃႉၽြႃးဢေႃႈ။
၁၈ ပဵၼ်ဢၢႆဢၼ်ႁွမ်ဢၼ်ႁူၺ်းတၢင်းပုၵ်ႉၸေႃႇဢၼ်ဢဝ်တင်းၽႆးသၢၵ်ႈၵၢပ်ႈတီႈထႃႇဝရႃႉၽြႃးဢေႃႈ။
၁၉ မႂ်းတၵ်းလႆႈဢဝ်သူဝ်းပေႃႈတူဝ်တုတိယၼၼ်ႉလႄႈႁႂ်ႈဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉဢွၼ်ၵၼ်ဢဝ်မိုဝ်းတူဝ်ၸဝ်ႈၵဝ်ႇတၢင်ႇသႂ်ႇၵႃႈၼိူဝ်ႁူဝ်သူဝ်းပေႃႈၼၼ်ႉဢေႃႈ။
၂၀ မႂ်းတၵ်းလႆႈဢဝ်သူဝ်းပေႃႈၼၼ်ႉတၢႆလႄႈဢဝ်လိူတ်ႈမၼ်းသႂ်ႇၵႃႈတီႈမႂ်ႊႁူၽၢႆႇၶႂႃဢႃႇရုၼ်ႇၵႃႈတီႈမႂ်ႊႁူၽၢႆႇၶႂႃလုၵ်ႈၸၢႆးမၼ်းၸိူဝ်းၼၼ်ႉၵႃႈတီႈႁူဝ်မေႈမိုဝ်းၽၢႆႇၶႂႃၶဝ်ၵႃႈတီႈႁူဝ်မေႈတိၼ်ၽၢႆႇၶႂႃၶဝ်ၼၼ်ႉသေယဝ်ႉဢဝ်လိူတ်ႈၽႅတ်းၸွမ်းႁိမ်းၵႃႈၼိူဝ်ယိၸ်ႉပလၢင်ႇဢေႃႈ။
၂၁ မႂ်းတၵ်းလႆႈဢဝ်လိူတ်ႈဢၼ်မီးၵႃႈၼိူဝ်ယိၸ်ႉပလၢင်ႇဢိၵ်ႇတင်းၼမ်ႉမၼ်းပုၼ်ႈဢၼ်တၵ်းတႃးၼၼ်ႉၽႅတ်းသႂ်ႇၵႃႈၼိူဝ်ဢႃႇရုၼ်ႇတင်းၶူဝ်းၼုင်ႈမၼ်းဢိၵ်ႇတင်းၵႃႈၼိူဝ်လုၵ်ႈၸၢႆးမၼ်းတင်းၶူဝ်းၼုင်ႈၶဝ်ၼၼ်ႉလႄႈမၼ်းတင်းၶူဝ်းၼုင်မၼ်းဢိၵ်ႇတင်းလုၵ်ႈၸၢႆးမၼ်းတင်းၶူဝ်းၼုင်ႈၶဝ်ၸိူဝ်းၼၼ်ႉတၵ်းလႆႈမူတ်းၸၢင်ႇဢေႃႈ။
၂၂ ပိူဝ်ႈဢၼ်သူဝ်းပေႃႈၼၼ်ႉပဵၼ်သူဝ်းပုၼ်ႈဢၼ်တၵ်းၶၢၼ်းဝႆႉၼႂ်းဢရႃႇလႄႈမႂ်းတၵ်းလႆႈဢဝ်ၵွၼ်ႈၶႆၵွၼ်ႈမၼ်းသူဝ်းပေႃႈၼၼ်ႉဢိၵ်ႇတင်းႁၢင်မၼ်းၵွၼ်ႈၶႆၵွၼ်ႈမၼ်းဢၼ်ႁူမ်ႇသႆႈမၼ်းၽၢင်ႇၽၢပ်ႈဢၼ်မီးၵႃႈၼိူဝ်တပ်းမၼ်းမၢၵ်ႇလၼ်းသွင်လုၵ်ႈတင်းၵွၼ်ႈၶႆၵွၼ်ႈမၼ်းဢၼ်ႁူမ်ႇမၢၵ်ႇလၼ်းၼၼ်ႉ၊
၂၃ ႁူဝ်ၶႃမၼ်းၽၢႆႇၶႂႃ၊ၶဝ်ႈမုၼ်းႁူၺ်ႇၼိုင်ႈၶဝ်ႈမုၼ်းၶႅပ်းဢၼ်ဢဝ်ၼမ်ႉမၼ်းသႂ်ႇလေႃးၶႅပ်းၼိုင်ႈၶဝ်ႈမုၼ်းၶွပ်ႈၶႅပ်းၼိုင်ႈဢၼ်ဢဝ်ဢွၵ်ႇၵႃႈၼႂ်းၶွင်ႉဢၼ်မီးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈဢၼ်ဝႆႉၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉလႄႈ
၂၄ ဢဝ်တင်းသဵင်ႈတင်းလူင်သႂ်ႇပၼ်ၵႃႈတီႈၼႂ်းမိုဝ်းဢႃႇရုၼ်ႇတင်းမိုဝ်းလုၵ်ႈၸၢႆးမၼ်းၸိူဝ်းၼၼ်ႉသေယဝ်ႉဢဝ်ယွင်ႈၵႂႆႈၵႃႈတီႈၽၢႆႇၼႃႈထႃႇဝရႃႉၽြႃးလႄႈႁဵတ်းတၢင်းပုၵ်ႉၸေႃႇဢၼ်ယွင်ႈၵႂႆႈဢေႃႈ။
၂၅ မႂ်းတၵ်းလႆႈႁပ်ႉၶၢမ်ႇဢဝ်ၸိူဝ်းၼၼ်ႉၵႃႈၼႂ်းမိုဝ်းၶဝ်ၼၼ်ႉလႄႈဢဝ်တုတ်ႇၽႆးၵႃႈၼိူဝ်ယိၸ်ႉပလၢင်ႇၵႃႈၼိူဝ်ယိၸ်ႉဢၼ်တုတ်ႇၽႆးပုၼ်ႈဢၼ်တၵ်းပဵၼ်ဢၢႆႁွမ်ဢၢႆႁူၺ်းၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉဢေႃႈ။ပဵၼ်တၢင်းပုၵ်ႉၸေႃႇဢၼ်ဢဝ်တင်းၽႆးသၢၵ်ႈၵၢပ်ႈတီႈထႃႇဝရႃႉၽြႃးဢေႃႈ။
၂၆ မႂ်းတၵ်းလႆႈဢဝ်ႁူဝ်ဢူၵ်းသူဝ်းပေႃႈဢၼ်ပဵၼ်လွင်ႈတၢင်းဢၼ်ၶၢၼ်းဢႃႇရုၼ်ႇဝႆႉၼႂ်းဢရႃႇၼၼ်ႉယွင်ႈၵႂႆႈၵႃႈတီႈၽၢႆႇၼႃႈထႃႇဝရႃႉၽြႃးလႄႈႁဵတ်းတၢင်းပုၵ်ႉၸေႃႇဢၼ်ယွင်ႈၵႂႆႈသေယဝ်ႉႁူဝ်ဢူၵ်းၼၼ်ႉတၵ်းလႆႈပဵၼ်ပုၼ်ႈမႂ်းဢေႃႈ။
၂၇ ၵႃႈၼႂ်းသူဝ်းပေႃႈဢၼ်ၶၢၼ်းဝႆႉၼႂ်းဢရႃႇဢၼ်ဝႃႈလွင်ႈတၢင်းဢၼ်ၸၢပ်ႈသႅင်ႇၵၼ်တင်းဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉမႂ်းတၵ်းလႆႈဢဝ်ႁူဝ်ဢူၵ်းဢၼ်ယွင်ႈၵႂႆႈလႄႈႁဵတ်းတၢင်းပုၵ်ႉၸေႃႇဢၼ်ယွင်ႈၵႂႆႈၼၼ်ႉဢိၵ်ႇတင်းႁူဝ်ၶႃဢၼ်ယုၵ်ႉယွင်ႈလႄႈ
၂၈ ႁဵတ်းတၢင်းပုၵ်ႉၸေႃႇဢၼ်ယုၵ်ႉယွင်ႈၼၼ်ႉမူတ်းၸၢင်ႇသေယဝ်ႉပိူဝ်ႈဢၼ်ပဵၼ်တၢင်းပုၵ်ႉၸေႃႇဢၼ်ယုၵ်ႉယွင်ႈလႄႈႁူဝ်ဢူၵ်းတင်းႁူဝ်ၶႃၼၼ်ႉတၵ်းလႆႈပဵၼ်ပုၼ်ႈဢႃႇရုၼ်ႇဢိၵ်ႇတင်းပုၼ်ႈလုၵ်ႈၸၢႆးမၼ်းတင်းလၢႆဢၼ်ၸွမ်းၼင်ႇထုင်းၾိင်ႈထႃႇဝရႃႉဢၼ်ၵူၼ်းမဵဝ်းဢိသရေႇလၶဝ်ထိူၵ်ႈႁဵတ်းၼၼ်ႉဢေႃႈ။တၵ်းလႆႈပဵၼ်တၢင်းပုၵ်ႉၸေႃႇဢၼ်ယုၵ်ႉယွင်ႈဢၼ်ၵူၼ်းမဵဝ်းဢိသရေႇလၶဝ်ဢဝ်ၵႃႈၼႂ်းယိၸ်ႉမိၵ်ႉသႁႃႇယႃႉၶဝ်တင်းလၢႆၼၼ်ႉႁဵတ်းဢၼ်ဝႃႈတၢင်းဢၼ်ၶဝ်ယုၵ်ႉယွင်ႈၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉဢေႃႈ။
၂၉ ၶူဝ်းၼုင်ႈတၢင်းမႆႊဢႃႇရုၼ်ႇဢၼ်မူတ်းၸၢင်ႇၼၼ်ႉၸိုင်ဝၢႆးလင်မၼ်းၼၼ်ႉတၵ်းလႆႈမီးတီႈလုၵ်ႈၸၢႆးမၼ်းတင်းလၢႆလႄႈပဵၼ်ပုၼ်ႈဢၼ်ၶဝ်တၵ်းၼုင်ႈၼႂ်းမိူဝ်ႈဢၼ်ၶဝ်ၶၢမ်ႇမင်ႇၵလႃႇတၢင်းဢၼ်ဢဝ်ၼမ်ႉမၼ်းတႃးဢိၵ်ႇတင်းဢၼ်ၶၢမ်ႇတၢင်းဢၼ်ၶၢၼ်းဝႆႉၼႂ်းဢရႃႇၼၼ်ႉဢေႃႈ။
၃၀ လုၵ်ႈၸၢႆးမၼ်းၵေႃႉဢၼ်ႁဵတ်းယိတ်ႉပရေႃးႁိၵ်ႈတင်းတူဝ်မၼ်းတၵ်းလႆႈၼုင်ႈမႆႊၼႂ်းမိူဝ်ႈဢၼ်မၼ်းၶဝ်ႈၵႃႈၼႂ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈႁႂ်ႈလႆႈပွင်ႁဵတ်းဢမူႉၸဝ်ႈၵႃႈတီႈထႃႇၼႃႉတီႈမူတ်းၸၢင်ႇၼၼ်ႉၸဵတ်းဝၼ်းတဵမ်တဵမ်ဢေႃႈ။
၃၁ မႂ်းတၵ်းလႆႈဢဝ်သူဝ်းပေႃႈဢၼ်ၶၢၼ်းဝႆႉၼႂ်းဢရႃႇၼၼ်ႉတူမ်ႈၵႃႈတီႈထႃႇၼႃႉတီႈမူတ်းၸၢင်ႇလႄႈဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉတၵ်း
၃၂ လႆႈဢွၼ်ၵၼ်ၵိၼ်ၼိူဝ်ႉသူဝ်းပေႃႈၼၼ်ႉဢိၵ်ႇတင်းၶဝ်ႈမုၼ်းဢၼ်မီးၵႃႈၼႂ်းၶွင်ႉၼၼ်ႉၵႃႈတီႈႁိမ်းၽၵ်းတူသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉဢေႃႈ။
၃၃ ၶဝ်တၵ်းလႆႈၵိၼ်ၶိူင်ႈပိူင်ဢၼ်ၸၢပ်ႈသႅင်ႇၵၼ်တင်းတၢင်းဢၼ်ႁဵတ်းမင်ႇၵလႃႇတၢင်းၽေႇဢပျႅတ်ႈၸိူဝ်းၼၼ်ႉႁႂ်ႈလႆႈၶၢၼ်းၶဝ်ဝႆႉၼႂ်းဢရႃႇလႄႈႁႂ်ႈၶဝ်မူတ်းၸၢင်ႇဢေႃႈ။
၃၄ ၶိူင်ႈပိူင်ၸိူဝ်းၼၼ်ႉၸိုင်ပိူဝ်ႈဢၼ်မူတ်းၸၢင်ႇလႄႈၵေႃႉဢၼ်ဢမ်ႇၸၢပ်ႈသႅင်ႇၼၼ်ႉဢမ်ႇလႆႈၵိၼ်။ပေႃးၼိူဝ်ႉဢၼ်ၸၢပ်ႈသႅင်ႇၵၼ်တင်းလွင်ႈတၢင်းဢၼ်ၶၢၼ်းဝႆႉၼႂ်းဢရႃႇၼၼ်ႉဢမ်ႇၼၼ်ၵေႃႈၶဝ်ႈမုၼ်းၼၼ်ႉၵိုတ်းၵျၢၼ်ႇဝႆႉတေႃႇထိုင်ႁွတ်ႈၶိင်ႇၵၢင်ၼႂ်သေဢိတ်းၸိုင်မႂ်းတၵ်းလႆႈဢဝ်ဢၼ်ၵိုတ်းဢၼ်ၵျၢၼ်ႇၼၼ်ႉတုတ်ႇၽႆးပႅတ်ႈဢေႃႈ။
၃၅ ပိူဝ်ႈဢၼ်မူတ်းၸၢင်ႇလႄႈၽူႈလႂ်ဢမ်ႇလႆႈၵိၼ်။ၼင်ႇၼၼ်လႄႈမႂ်းတၵ်းလႆႈႁဵတ်းတီႈဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉၸွမ်းၵႃႈၼင်ႇဢၼ်ၵဝ်ပိင်းၺၢပ်ႈဝႆႉၼၼ်ႉလႄႈႁဵတ်းမင်ႇၵလႃႇတၢင်းဢၼ်ၶၢၼ်းဝႆႉၼႂ်းဢရႃႇယိတ်ႉပရေႃးႁိၵ်ႈၼၼ်ႉၸဵတ်းဝၼ်းတဵမ်တဵမ်ဢေႃႈ။
၃၆ မႂ်းတၵ်းလႆႈပုၵ်ႉၸေႃႇဝူဝ်းပေႃႈပုၼ်ႈဢၼ်တၵ်းၽေႇဢပျႅတ်ႈၼၼ်ႉတူဝ်ၼိုင်ႈၵူႈဝၼ်းလႄႈႁဵတ်းယိၸ်ႉလွင်ႈတၢင်းဢၼ်ၽေႇဢပျႅတ်ႈဢေႃႈ။ၼင်ႇၼၼ်လႄႈမႂ်းတၵ်းလႆႈႁႂ်ႈယိၸ်ႉပလၢင်ႇမူတ်းသႂ်ႇမိူဝ်ႈဢၼ်ႁဵတ်းတၢင်းဢၼ်ၽေႇဢပျႅတ်ႈပုၼ်ႈမၼ်းၼၼ်ႉဢေႃႈ။
၃၇ ႁႂ်ႈမၼ်းမူတ်းၸၢင်ႇဢေႃႈ။ႁဵတ်းတၢင်းဢၼ်ၽေႇဢပျႅတ်ႈယိၸ်ႉပလၢင်ႇၸဵတ်းဝၼ်းတဵမ်တဵမ်လႄႈႁႂ်ႈမူတ်းၸၢင်ႇသေယဝ်ႉတၵ်းလႆႈပဵၼ်ယိၸ်ႉပလၢင်ႇဢၼ်မူတ်းၸၢင်ႇၼႃႇလူင်လၢင်လႄႈၶိူင်ႈပိူင်ၵႃႈဢၼ်တၵ်းတိူဝ်ႉထုၵ်ႇယိၸ်ႉပလၢင်ႇၼၼ်ႉၵေႃႈတၵ်းလႆႈပဵၼ်ဢၼ်မူတ်းၸၢင်ႇဢေႃႈ။
၃၈ ၶိူင်ႈပိူင်ဢၼ်တၵ်းလႆႈပုၵ်ႉၸေႃႇၵႃႈၼိူဝ်ယိၸ်ႉပလၢင်ႇၸမ်းတၵ်းလႆႈဢဝ်သူဝ်းဢွၼ်ႇဢၼ်ဢမ်ႇပႆႇၶွပ်ႈၶူပ်ႇသွင်တူဝ်ပုၵ်ႉၸေႃႇၵူႈဝၼ်းဢမ်ႇထၢတ်ႈလႄႈ
၃၉ ပုၵ်ႉၸေႃႇႁူဝ်ၼႂ်တူဝ်ၼိုင်ႈ၊ႁူဝ်ၶမ်ႈတူဝ်ၼိုင်ႈဢေႃႈ။
၄၀ မိူဝ်ႈဢၼ်ပုၵ်ႉၸေႃႇသူဝ်းဢွၼ်ႇတူဝ်ၼိုင်ႈၼၼ်ႉၸိုင်မႂ်းတၵ်းလႆႈဢဝ်ၽွင်ၶဝ်ႈမုၼ်းၼႂ်းဢေႇၽႃႇၼိုင်ႈသိပ်းပုၼ်ႊဢဝ်ပုၼ်ႊၼိုင်ႈ၊ဢၼ်ဢဝ်ၼမ်ႉမၼ်းဢၼ်ဢဝ်မၢၵ်ႇသၢၼ်ႇလုၼ်ႇတမ်ၼၼ်ႉၼႂ်းႁီႉၼႃႉၼိုင်ႈသီႇပုၼ်ႊဢဝ်ပုၼ်ႊၼိုင်ႈသႂ်ႇလေႃးၼၼ်ႉဢိၵ်ႇတင်းၼမ်ႉမၢၵ်ႇၸပိတ်ႉၼႂ်းႁီႉၼႃႉၼိုင်ႈသီႇပုၼ်ႊဢဝ်ပုၼ်ႈၼိုင်ႈပုၼ်ႈတင်းပုၵ်ႉၸေႃႇဢၼ်သွၼ်းလေႃႇၸိူဝ်းၼၼ်ႉပုၵ်ႉၸေႃႇလူၺ်ႈဢေႃႈ။
၄၁ သူဝ်းဢွၼ်ႇတူဝ်တုတိယၼၼ်ႉၸိုင်မႂ်းတၵ်းလႆႈပုၵ်ႉၸေႃႇၶိင်ႇႁူဝ်ၶမ်ႈလႄႈႁဵတ်းၸွမ်းတၢင်းပုၵ်ႉၸေႃႇၽေႃးၸႅၼ်ႇဢိၵ်ႇတင်းတၢင်းပုၵ်ႉၸေႃႇဢၼ်သွၼ်းလေႃႇၶိင်ႇႁူဝ်ၼႂ်ၼၼ်ႉႁႂ်ႈပဵၼ်ဢၢႆဢၼ်ႁွမ်ဢၼ်ႁူၺ်း၊တၢင်းပုၵ်ႉၸေႃႇဢၼ်ဢဝ်ၽႆးသၢၵ်ႈၵၢပ်ႈတီႈထႃႇဝရႃႉၽြႃးဢေႃႈ။
၄၂ ၼင်ႇၼၼ်လႄႈယိၸ်ႉဢၼ်တုတ်ႇၽႆးၼႆႉၸူဝ်ႈလုၵ်ႈပၢၼ်လၢၼ်သူတၵ်းလႆႈႁဵတ်းတႃႇသေႇဢမ်ႇထၢတ်ႇတၵ်းလႆႈပုၵ်ႉၸေႃႇၵႃႈတီႈႁိမ်းၽၵ်းတူသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၵႃႈတီႈၽၢႆႇၼႃႈထႃႇဝရႃႉၽြႃးတီႈဢၼ်ၵဝ်တၵ်းထူပ်းၵၼ်တင်းမႂ်းလႄႈလၢတ်ႈတေႃႇမႂ်းၼၼ်ႉဢေႃႈ။
၄၃ ၵႃႈတီႈၼၼ်ႉၵဝ်တၵ်းထူပ်းၵၼ်တင်းၵူၼ်းမဵဝ်းဢိသရေႇလတင်းလၢႆလႄႈႁႂ်ႈသုမ်ႉထဵင်ၸဝ်ႈမူတ်းၸၢင်ႇၵွပ်ႈပိူဝ်ႈမုၼ်ၽုင်းၵဝ်ဢေႃႈ။
၄၄ ၵဝ်တၵ်းႁႂ်ႈသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈဢိၵ်ႇတင်းယိၸ်ႉပလၢင်ႇမူတ်းၸၢင်ႇဢေႃႈ။ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉၵေႃႈၵဝ်တၵ်းႁႂ်ႈမူတ်းၸၢင်ႇႁႂ်ႈၶဝ်လႆႈႁဵတ်းဢမူႉယိတ်ႉပႁေႃးႁိၵ်ႈၵႃႈတီႈၽၢႆႇၼႃႈၵဝ်ဢေႃႈ။
၄၅ ၵဝ်တၵ်းယူႇၵႃႈၼႂ်းၵူၼ်းမဵဝ်းဢိသရေႇလတင်းလၢႆလႄႈပဵၼ်ၽြႃးၶဝ်ဢေႃႈ။
၄၆ လွင်ႈၼင်ႇႁိုဝ်ၵဝ်တၵ်းယူႇၼႂ်းၶဝ်ယူႇၸိုင်ၶဝ်တၵ်းႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃး၊ၽြႃးပဵၼ်ၸဝ်ႈၶဝ်ဢၼ်လႆႈၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉဢေႃႈ။ၵဝ်ၼႆႉပဵၼ်ထႃႇဝရႃႉၽြႃး၊ၽြႃးပဵၼ်ၸဝ်ႈၶဝ်ဢေႃႈ။