Chapter
၇
၁ ထႃႇဝရႃႉၽြႃးလၢတ်ႈတီႈမုဝ်းသေႇလႄႈဝႃႈ၊-တူၺ်းလူႊ၊ၵဝ်ၶၢၼ်းမႂ်းဝႆႉၼႂ်းဢရႃႇၽြႃးပဵၼ်ၸဝ်ႈတီႈၶုၼ်ႁေႃၶမ်းၽႃႇရေႃးဢေႃႈ။ပီႈၸၢႆးမႂ်းဢႃႇရုၼ်ႇၼၼ်ႉတၵ်းလႆႈပဵၼ်ပရေႃးၽႅတ်ႈမႂ်းဢေႃႈ။
၂ မႂ်းတၵ်းလႆႈၶိုၼ်းလၢတ်ႈၵႃႈဢၼ်ၵဝ်သင်ႇလၢတ်ႈဝႆႉၼၼ်ႉဢေႃႈ။ပီႈၸၢႆးမႂ်းဢႃႇရုၼ်ႇၼၼ်ႉတၵ်းလႆႈလဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးႁႂ်ႈမၼ်းပွႆႇၵူၼ်းမဵဝ်းဢိသရေႇလဢွၵ်ႇသေၵႃႈၼႂ်းမိူင်းမၼ်းၵႂႃႇဢေႃႈ။
၃ ၵဝ်တၵ်းႁႂ်ႈႁူဝ်ၸႂ်ၶုၼ်ႁေႃၶမ်းၽႃႇရေႃးၵႅၼ်ႇၶႅင်လႄႈႁႂ်ႈၼီႈမိၵ်ႈလၢၵ်ႈၶၼႃႇၵဝ်ဢိၵ်ႇတင်းလွင်ႈတၢင်းဢၼ်လီဢၢမ်းၵဝ်လႆႈၼမ်မႃးၵိုၼ်းမႃးၵႃႈၼႂ်းမိူင်းဢေႇၵႅပ်ႉတုဢေႃႈ။
၄ ၼႂ်းဝႃႈၼၼ်သေၵေႃႈၶုၼ်ႁေႃၶမ်းၽႃႇရေႃးယင်းဢမ်ႇထွမ်ႇဢမ်ႇဢဝ်ၵႂၢမ်းသူလႄႈတၵ်းယူႇဢေႃႈ။ၵဝ်တၵ်းဢဝ်မိုဝ်းၵဝ်တၢင်ႇသႂ်ႇၵႃႈၼိူဝ်မိူင်းဢေႇၵႅပ်ႉတုလႄႈဢဝ်တင်းတၢင်းဢၼ်ပၼ်တၢမ်ႇၼမ်ၼႃႇၼုၵ်ႈဢဝ်ပူဝ်ႇပႃႇၵဝ်ဢၼ်ပဵၼ်ၵူၼ်းၵဝ်ၵူၼ်းမဵဝ်းဢိသရေႇလၸိူဝ်းၼၼ်ႉဢွၵ်ႇသေၵႃႈၼႂ်းမိူင်းဢေႇၵိပ်ႉတုဢေႃႈ။
၅ မိူဝ်ႈဢၼ်ၵဝ်ယိုၼ်းမိုဝ်းၵဝ်ၵႃႈၼိူဝ်မိူင်းဢေႇၵႅပ်ႉတုၸိူဝ်ႉၼင်ႇၼၼ်လႄႈၼုၵ်ႈဢဝ်ၵူၼ်းမဵဝ်းဢိသရေႇလဢွၵ်ႇသေၵႃႈၼႂ်းၶဝ်ၼၼ်ႉၸိုင်ၵူၼ်းဢေႇၵႅပ်ႉတုတင်းလၢႆတၵ်းႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ၊ဝႃႈၼင်ႇၼႆဢေႃႈ။
၆ မုဝ်းသေႇတင်းဢႃႇရုၼ်ႇႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉရၼၼ်ႉဢေႃႈ။
၇ မိူဝ်ႈဢၼ်သွင်ၶႃလဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးၼၼ်ႉၸိုင်ဢသၢၵ်ႈမုဝ်းသေႇလႆႈပႅတ်ႇသိပ်းပီႊဢေႃႈ။ဢသၢၵ်ႈဢႃႇရုၼ်ႇၵေႃႈလႆႈပႅတ်ႇသိပ်းပၢႆသၢမ်ပီႊဢေႃႈ။
၈ ၵမ်းၼၼ်ႉထႃႇဝရႃႉၽြႃးလၢတ်ႈတီႈမုဝ်းသေႇတင်းဢႃႇရုၼ်ႇလႄႈဝႃႈၸမ်း၊-မိူဝ်ႈဢၼ်ၶုၼ်ႁေႃၶမ်းၽႃႇရေႃးလၢတ်ႈတီႈသူဝႃႈ၊-
၉ ၼႄပျႃးတၢင်းဢၼ်လီဢၢမ်းသေၸိူဝ်ႉသေပိူင်လူႊ၊ဝႃႈၼင်ႇၼႆၼၼ်ႉၸိုင်မႂ်းလၢတ်ႈတီႈဢႃႇရုၼ်ႇႁႂ်ႈမၼ်းဢဝ်ၶွၼ်ႉတဝ်ႉမၼ်းၶျႃးတူၵ်းသႂ်ႇၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးတႃႉ။ၶွၼ်ႉတဝ်ႉၼၼ်ႉတၵ်းပဵၼ်ငူးၵႂႃႇယဝ်ႉ၊ဝႃႈၼင်ႇၼႆဢေႃႈ။
၁၀ မုဝ်းသေႇတင်းဢႃႇရုၼ်ႇၵေႃႈၶဝ်ႈၸူးၵႃႈတီႈၶုၼ်ႁေႃၶမ်းၽႃႇရေႃးလႄႈႁဵတ်းၸိူဝ်ႉၼင်ႇၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉၼၼ်ႉဢေႃႈ။ဢႃႇရုၼ်ႇဢဝ်ၶွၼ်ႉတဝ်ႉမၼ်းၶျႃးတူၵ်းသႂ်ႇၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးဢိၵ်ႇတင်းၵႃႈတီႈၽၢႆႇၼႃႈၵူၼ်းမၼ်းတင်းလၢႆၼၼ်ႉလႄႈၶွၼ်ႉတဝ်ႉၼၼ်ႉပဵၼ်ငူးၵႂႃႇဢေႃႈ။
၁၁ မိူဝ်ႈၼၼ်ႉၶုၼ်ႁေႃၶမ်းၽႃႇရေႃးႁွင်ႉဢဝ်ပိင်ႇၺႃႇသိဢိၵ်ႇတင်းၶဝ်ၸိူဝ်းဢၼ်ၸၢင်ႊၸေႃႉၸၢင်ႊႁဵတ်းတင်းလၢႆသြႃႇဝိၵ်ႉၸႃႇၵႃႈၼႂ်းမဵဝ်းၵူၼ်းဢေႇၵႅပ်ႉတုၸိူဝ်းၼၼ်ႉတင်းလၢႆဢွၼ်ၵၼ်ဢဝ်တင်းဢတၢတ်ႈဝိၵ်ႉၸႃႇၶဝ်ႁဵတ်းမိူၼ်ၸိူဝ်ႉၼင်ႇၼၼ်လႄႈဢွၼ်ၵၼ်ဢဝ်ၶွၼ်ႉတဝ်ႉဢၼ်ၶဝ်ယိပ်းၵမ်ၸိူဝ်းၼၼ်ႉၶျႃးတူၵ်းသေယဝ်ႉပဵၼ်ငူးၵႂႃႇဢေႃႈ။
၁၂ ၵူၺ်းၵႃႈငူးၶွၼ်ႉတဝ်ႉဢႃႇရုၼ်ႇၼၼ်ႉဢိုၼ်ၵိၼ်ငူးၶွၼ်ႉတဝ်ႉၶဝ်ၸိူဝ်းၼၼ်ႉပႅတ်ႈသေဢေႃႈ။
၁၃ ၵႃႈၼင်ႇဢၼ်ထႃႇဝရႃႉၽြႃးလၢတ်ႈဝႆႉၼၼ်ႉႁူဝ်ၸႂ်ၶုၼ်ႁေႃၶမ်းၽႃႇရေႃးၼၼ်ႉၵႅၼ်ႇၶႅင်ၼႃႇလႄႈမၼ်းယင်းဢမ်ႇထွမ်ႇဢမ်ႇဢဝ်ၵႂၢမ်းၶဝ်ၼၼ်ႉလႄႈယူႇဢေႃႈ။
ၽေးလိူတ်ႈ
၁၄ ထႃႇဝရႃႉၽြႃးၵေႃႈလၢတ်ႈတီႈမုဝ်းသေႇလႄႈဝႃႈ၊-ၶုၼ်ႁေႃၶမ်းၽႃႇရေႃးၼၼ်ႉၸႂ်ၼၵ်းၸႂ်ၼႃႇလႄႈယင်းဢမ်ႇပွႆႇၵူၼ်းၸိူဝ်းၼၼ်ႉၵႂႃႇလႄႈယူႇယဝ်ႉ။
၁၅ ၶိင်ႇၵၢင်ၼႂ်မႂ်းၵႂႃႇၸူးၵႃႈတီႈၶုၼ်ႁေႃၶမ်းၽႃႇရေႃးတႃႉ။မၼ်းတၵ်းၵႂႃႇၵႃႈတီႈတိုဝ်ႉၼမ်ႉဢေႃႈ။ၸုၵ်းယူႇၵႃႈတီႈႁိမ်းၽင်ႇၼမ်ႉႁွင်ႊၼၼ်ႉလႄႈႁႂ်ႈလႆႈႁူပ်ႉထူပ်းမၼ်းတႃႉ။ၶွၼ်ႉတဝ်ႉဢၼ်ပဵၼ်ငူးၵႂႃႇၼၼ်ႉၵေႃႈယိပ်းၵမ်ဝႆႉၵႃႈၼႂ်းမိုဝ်းမႂ်းတႃႉ။
၁၆ မႂ်းတၵ်းလႆႈလၢတ်ႈတီႈမၼ်းလႄႈဝႃႈ၊-ထႃႇဝရႃႉၽြႃး၊ၽြႃးပဵၼ်ၸဝ်ႈၵူၼ်းႁေႇပႄးတင်းလၢႆၼၼ်ႉပွႆႇၸႂ်ႉၶႃႈၸဝ်ႈမႃးၵႃႈတီႈၸဝ်ႈႁဝ်းလႄႈသင်ႇလၢတ်ႈဝႃႈ၊-ပွႆႇၵူၼ်းၵဝ်တင်းလၢႆၵႂႃႇႁႂ်ႈၶဝ်လႆႈႁဵတ်းဝၢတ်ႈတီႈၵဝ်ၵႃႈၼႂ်းထိူၼ်ႇပုၼ်ႉတႃႉ၊ဝႃႈၼင်ႇၼႆတီႈၶႃႈယဝ်ႉ။ၵူၺ်းၵႃႈႁၢၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉၸဝ်ႈႁဝ်းယင်းဢမ်ႇထွမ်ႇလႄႈယူႇလူင်ပေႇ။
၁၇ ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-မႂ်းတၵ်းႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၸိူဝ်ႉၼင်ႇႁိုဝ်ဝႃႈၼႆၸမ်းၵဝ်တၵ်းဢဝ်ၶွၼ်ႉတဝ်ႉဢၼ်ၵဝ်ယိပ်းၵမ်ဝႆႉၼႆႉပေႃႉယႅၼ်ႉၼမ်ႉဢၼ်မီးၵႃႈၼႂ်းၼမ်ႉႁွင်ႊလႄႈၼမ်ႉၼၼ်ႉတၵ်းပဵၼ်လိူတ်ႈၵႂႃႇဢေႃႈ။
၁၈ ပႃဢၼ်မီးၵႃႈၼႂ်းၼမ်ႉႁွင်ႊၸိူဝ်းၼၼ်ႉတၵ်းတၢႆဢေႃႈ။ၼမ်ႉၵႃႈၼႂ်းႁွင်ႊၼၼ်ႉၵေႃႈတၵ်းမဵၼ်တူႇၵႂႃႇဢေႃႈ။ၵူၼ်းဢေႇၵႅပ်ႉတုတင်းလၢႆၵေႃႈတၵ်းလီႁင်ႈဢဵတ်ႇသဵတ်ႇလွင်ႈဢၼ်ၵိၼ်ၼမ်ႉဢၼ်မီးၵႃႈၼႂ်းၼမ်ႉႁွင်ႊၼၼ်ႉဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၉ ၵမ်းၼၼ်ႉထႃႇဝရႃႉၽြႃးသမ်ႉလၢတ်ႈတီႈမုဝ်းသေႇႁႂ်ႈမုဝ်းသေႇလၢတ်ႈတီႈဢႃႇရုၼ်ႇလႄႈဝႃႈ၊-မႂ်းဢဝ်ၶွၼ်ႉတဝ်ႉမႂ်းလႄႈယိုၼ်းမိုဝ်းမႂ်းၵႃႈၼိူဝ်ၼမ်ႉၵႃႈဢၼ်မီးၵႃႈၼႂ်းမိူင်းဢေႇၵႅပ်ႉတုဢၼ်ပဵၼ်ၼမ်ႉႁွင်ႊလႂ်၊ၼမ်ႉၵႄးလႂ်၊ၼမ်ႉၼွင်လႂ်၊ၼမ်ႉယိုင်ႈလႂ်ၼၼ်ႉတႃႉ။ၼမ်ႉၸိူဝ်းၼၼ်ႉတင်းသဵင်ႈတင်းလူင်တၵ်းပဵၼ်လိူတ်ႈၵႂႃႇဢေႃႈ။ၵႃႈတီႈမိူင်းဢေႇၵႅပ်ႉတုၵူႈတီႈၵူႈလႅၼ်ၼမ်ႉဢၼ်မီးၼႂ်းၵွၵ်းမႆႉလႂ်မေႃႈမၢၵ်ႇႁိၼ်လႂ်ၼၼ်ႉတၵ်းပဵၼ်လိူတ်ႈၵႂႃႇဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၂၀ မုဝ်းသေႇတင်းဢႃႇရုၼ်ႇၵေႃႈႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉလႄႈမၼ်းယုၵ်ႉၶွၼ်ႉတဝ်ႉမၼ်းပေႃႉယႅၼ်ႉၼမ်ႉၵႃႈၼႂ်းၼမ်ႉႁွင်ႊၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးဢိၵ်ႇတင်းၵႃႈတီႈၽၢႆႇၼႃႈၶႃႈၵူၼ်းမၼ်းတင်းလၢႆလႄႈၼမ်ႉၵႃႈဢၼ်မီးၵႃႈၼႂ်းၼမ်ႉႁွင်ႊၸိူဝ်းၼၼ်ႉပဵၼ်လိူတ်ႈၵႂႃႇဢေႃႈ။
၂၁ ပႃဢၼ်မီးၵႃႈၼႂ်းၼမ်ႉႁွင်ႊၸိူဝ်းၼၼ်ႉတၢႆဢေႃႈ။ၼမ်ႉၵႃႈၼႂ်းၼမ်ႉႁွင်ႊၼၼ်ႉၵေႃႈမဵၼ်တူႇၵႂႃႇဢေႃႈ။ၵူၼ်းဢေႇၵႅပ်ႉတုတင်းလၢႆၵေႃႈဢမ်ႇၵိၼ်ၼမ်ႉၵႃႈၼႂ်းၼမ်ႉႁွင်ႊၼၼ်ႉလႆႈယဝ်ႉ။ၵႃႈၼႂ်းမိူင်းဢေႇၵႅပ်ႉတုၼၼ်ႉပဵၼ်လိူတ်ႈၸွတ်ႇတူဝ်ႈၵႂႃႇၵူႈတီႈၵူႈလႅၼ်ဢေႃႈ။
၂၂ သြႃႇဝိၵ်ႉၸႃႇၵႃႈၼႂ်းၵူၼ်းမဵဝ်းဢေႇၵႅပ်ႉတုၸိူဝ်းၼၼ်ႉဢွၼ်ၵၼ်ဢဝ်ဢတၢတ်ႈဝိၵ်ႉၸႃႇၶဝ်ႁဵတ်းမိူၼ်ၸိူဝ်ႉၼင်ႇၼၼ်ဢေႃႈ။ၶုၼ်ႁေႃၶမ်းၽႃႇရေႃးႁူဝ်ၸႂ်ၵႅၼ်ႇၶႅင်လႄႈယင်းဢမ်ႇထွမ်ႇဢမ်ႇဢဝ်ၵႂၢမ်းၶဝ်လႄႈယူႇမႅၼ်ႈၵႃႈၼင်ႇဢၼ်ထႃႇဝရႃႉၽြႃးလၢတ်ႈဝႆႉၼၼ်ႉဢေႃႈ။
၂၃ ၶုၼ်ႁေႃၶမ်းၽႃႇရေႃးဝၢႆႇၶိုၼ်းမိူဝ်းၵႂႃႇၵႃႈတီႈႁေႃၶမ်းလႄႈယင်းဢမ်ႇဢဝ်လွင်ႈတၢင်းၼၼ်ႉသႂၢင်းဝႆႉၵႃႈၼႂ်းႁူဝ်ၸႂ်လႄႈယူႇဢေႃႈ။
၂၄ မိူဝ်ႈၼၼ်ႉၵူၼ်းဢေႇၵႅပ်ႉတုတင်းသဵင်ႈတင်းလူင်ပိူဝ်ႈဢၼ်ဢမ်ႇၵိၼ်ၼမ်ႉၵႃႈၼႂ်းၼမ်ႉႁွင်ႊၼၼ်ႉလႆႈလႄႈဢွၼ်ၵၼ်ၶုတ်းၵႃႈတီႈႁိမ်းၼမ်ႉႁွင်ႊႁႂ်ႈလႆႈၼမ်ႉပုၼ်ႈဢၼ်တၵ်းၵိၼ်ဢေႃႈ။
၂၅ ထႃႇဝရႃႉၽြႃးပၼ်တၢမ်ႇၼမ်ႉႁွင်ႊႁႂ်ႈထူၼ်ႈတဵမ်ၸဵတ်းဝၼ်းဢေႃႈ။