Chapter
၃၃
၁ ၵမ်းၼၼ်ႉထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇလႄႈဝႃႈ၊-ၸႃႉၸဵမ်မႂ်းလႄႈၶဝ်ၸိူဝ်းဢၼ်မႂ်းၼုၵ်ႈဢဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉၶဝ်ဢိူၺ်း၊ဢွၵ်ႇသေၵႃတီႈၼႆႉလႄႈၵႂႃႇၵႃႈတီႈမိူင်းဢၼ်ၵဝ်တိူင်ႇတီႈဢႃႇပႁမ်ႇ၊ဢိၸၢၵ်ႉ၊တင်းယႃႇၵုပ်ႉၼၼ်ႉဝႃႈၵဝ်တၵ်းပၼ်တီႈၸိူဝ်ႉၶိူဝ်းသူ၊ဝႃႈၼင်ႇၼႆၼၼ်ႉတႃႉ။
၂ ၵဝ်တၵ်းပွႆႇၸႂ်ႉတမၢၼ်ႇၵၢင်ႁၢဝ်ဢွၼ်ႁူဝ်သူၵႂႃႇလႄႈၵဝ်တၵ်းႁေႃႈၵူၼ်းၶႃႇၼၼိ၊ၵူၼ်းဢႃႇမေႃႇရိ၊ၵူၼ်းႁိတ်ႉတိ၊ၵူၼ်းၽရေၸိ၊ၵူၼ်းႁိဝိတင်းၵူၼ်းယေႇပုသိၸိူဝ်းၼၼ်ႉဢွၵ်ႇလႄႈဢဝ်သူသူင်ႇၵႃႈတီႈမိူင်းဢၼ်ၼမ်ႉၼူမ်းတင်းၼမ်ႉၽိုင်ႈလႆယူႇၼၼ်ႉဢေႃႈ။
၃ ၵဝ်တၵ်းဢမ်ႇၵႂႃႇၸွမ်းၵႃႈၼႂ်းၶိုင်ႈၵၢင်သူ။ပိူဝ်ႈဢၼ်သူပဵၼ်မဵဝ်းၵူၼ်းဢၼ်လမ်းၶေႃးၵႅၼ်ႇၶႅင်ၼၼ်ႉလႄႈၵူဝ်ၵဝ်တၵ်းလႆႈယႃႉၽဵဝ်ႈသူပႅတ်ႈၼႂ်းမိူဝ်ႈဢၼ်ယင်းတိုၵ်ႉၸွမ်းၼႂ်းသဵၼ်ႈတၢင်းၵႂႃႇယူႇၼၼ်ႉဢေႃႈ၊ဝႃႈၼင်ႇၼႆဢေႃႈ။
၄ မိူဝ်ႈဢၼ်ၵူၼ်းတင်းလၢႆငိၼ်းသတၢင်းဢၼ်ဢမ်ႇလီဢမ်ႇငၢမ်းၼၼ်ႉၸိုင်ၶဝ်ဢွၼ်ၵၼ်ႁႆႈႁွင်ႉပွင်ႉၶင်းသေလႄႈယင်းဢမ်ႇႁၢင်ႈၶိူင်ႈႁၢင်ႊၽၢင်သေၵေႃႉလႄႈယူႇဢေႃႈ။လွင်ႈမၼ်းၸမ်းထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈ၊-ဢၼ်မႂ်းတၵ်းလႆႈမွၵ်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈၸမ်း၊-သူၸိူဝ်းၼႆႉပဵၼ်မဵဝ်းၵူၼ်းဢၼ်လမ်းၶေႃးၵႅၼ်ႇၶႅင်ဢေႃႈ။ပေႃးၵဝ်ၵႂႃႇၸွမ်းၵႃႈၼႂ်းၶိုင်ႈၵၢင်သူၵမ်းဢွၼ်ႇၼိုင်ႈၸိုင်ၵဝ်တၵ်းလႆႈယႃႉၽဵဝ်ႈသူပႅတ်ႈဢေႃႈ။
၅ ပိူဝ်ႈၼႆလႄႈလွင်ႈၼင်ႇႁိုဝ်ၵဝ်တၵ်းႁူႉလွင်ႈဢၼ်ၵဝ်တၵ်းလႆႈႁဵတ်းတီႈသူၸိူဝ်ႉၼင်ႇႁိုဝ်ၼၼ်ႉၸိုင်တေႃႈလဵဝ်ၼႆႉထွတ်ႇၶိူင်ႈတိုဝ်းသူတႃႉ၊ဝႃႈၼင်ႇၼႆဢေႃႈ။
၆ ၵူၼ်းမဵဝ်းဢိသရေႇလၸိူဝ်းၼၼ်ႉၵေႃႈဢွၼ်ၵၼ်ထွတ်ႇၶိူင်ႈတိုဝ်းၶဝ်ၵႃႈတီႈလွႆႁေႃႇရၢပ်ႉၼၼ်ႉဢေႃႈ။
သုမ်ႉထဵင်ဢၼ်ၸူႉတုမ်
၇ မုဝ်းသေႇပုၵ်းတၢင်ႈသုမ်ႉထဵင်ၸဝ်ႈၵႃႈတီႈၼွၵ်ႈတပ်ႉတီႈဢၼ်ၵႆၵႆၼၼ်ႉသေယဝ်ႉႁွင်ႉႁိၵ်ႈၸိုဝ်ၼၼ်ႉဝႃႈသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈဢေႃႈ။ၶဝ်ၸိူဝ်းဢၼ်ႁႃထႃႇဝရႃႉၽြႃးၼၼ်ႉတင်းသဵင်ႈတင်းလူင်ဢွၼ်ၵၼ်ဢွၵ်ႇၵႂႃႇၸူးၵႃႈတီႈသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈဢၼ်မီးၵႃႈၼွၵ်ႈတပ်ႉၼၼ်ႉဢေႃႈ။
၈ မိူဝ်ႈဢၼ်မုဝ်းသေႇဢွၵ်ႇၵႂႃႇၸူးၵႃႈတီႈသုမ်ႉထဵင်ၸဝ်ႈၼၼ်ႉၸိုင်ၵူၼ်းတင်းသဵင်ႈတင်းလူင်ဢွၼ်ၵၼ်လုၵ်ႉလႄႈၸုၵ်းယူႇၵႃႈတီႈၽၵ်းတူသုမ်ႉထဵင်ၼၼ်ႉႁင်းၽႂ်ႁင်းမၼ်းလႄႈတူၺ်းၸွမ်းလင်မုဝ်းသေႇတေႃႇထိုင်ႁွတ်ႈမၼ်းၶဝ်ႈၵႃႈၼႂ်းသုမ်ႉထဵင်ၸဝ်ႈၼၼ်ႉဢေႃႈ။
၉ မုဝ်းသေႇၶဝ်ႈၵႃႈၼႂ်းသုမ်ႉထဵင်ၸဝ်ႈသေယဝ်ႉသဝ်မွၵ်ႇၵုမ်ႈလူင်းမႃးၸုၵ်းယူႇၵႃႈတီႈၽၵ်းတူသုမ်ႉသုမ်ႉထဵင်ၸဝ်ႈၼၼ်ႉလႄႈထႃႇဝရႃႉၽြႃးလၢတ်ႈတေႃႇမုဝ်းသေႇဢေႃႈ။
၁၀ မိူဝ်ႈဢၼ်ၵူၼ်းတင်းသဵင်ႈတင်းလူင်ႁၼ်သဝ်မွၵ်ႇၵုမ်ႈၸုၵ်းယူႇၵႃႈတီႈၽၵ်းတူသုမ်ႉထဵင်ၸဝ်ႈၼၼ်ႉၸိုင်ၶဝ်ဢွၼ်ၵၼ်လုၵ်ႉတင်းသဵင်ႈတင်းလူင်လႄႈၵူဝ်းၵႂၢႆႇယူႇၵႃႈတီႈၽၵ်းတူသုမ်ႉထဵင်ၶဝ်ၼၼ်ႉႁင်းၽႂ်ႁင်းမၼ်းဢေႃႈ။
၁၁ ထႃႇဝရႃႉၽြႃးတေႃႇၼႃႈၵၼ်တင်းမုဝ်းသေႇသေလႄႈလၢတ်ႈတေႃႇမၼ်းမိူၼ်ၸိူဝ်ႉၼင်ႇၵူၼ်းလၢတ်ႈတေႃႇၵၼ်တင်းၵေႃႉသေႈမၼ်းၼၼ်ႉဢေႃႈ။မိူဝ်ႈဢၼ်မၼ်းၶိုၼ်းၶဝ်ႈမႃးၵႃႈၼႂ်းတပ်ႉၼၼ်ႉၸိုင်ႈၵူၼ်းႁူမ်ႈၵူၼ်းပွင်းၵၼ်တင်းမၼ်းယေႃးသုတင်းလုၵ်ႈၸၢႆးၼုၼ်ႇဢၼ်ပဵၼ်ၵူၼ်းၼုမ်ႇၼၼ်ႉယင်းဢမ်ႇဢွၵ်ႇသေၵႃႈၼႂ်းသုမ်ႉထဵင်ၸဝ်ႈလႄႈယူႇၵႃႈၼႂ်းၼၼ်ႉဢေႃႈ။
မုဝ်းသေႇလႄႈမုၼ်ၽုင်းၽြႃးပဵၼ်ၸဝ်ႈ
၁၂ မုဝ်းသေႇၵေႃႈလဝ်ႈလၢတ်ႈတီႈထႃႇဝရႃႉၽြႃးလႄႈဝႃႈ၊-တူၺ်းသေၵမ်းတီႈၶႃႈ။ၸဝ်ႈႁဝ်းမီးဢမိင်ႉတီႈၶႃႈၸဝ်ႈဝႃႈ၊-ဢဝ်ၵူၼ်းၸိူဝ်းၼႆႉၵႂႃႇသူင်ႇတႃႉ၊ဝႃႈၼင်ႇၼႆလႄႈၸဝ်ႈႁဝ်းယင်းဢမ်ႇႁႂ်ႈၶႃႈၸဝ်ႈလႆႈႁူႉလွင်ႈဢၼ်ၸဝ်ႈႁဝ်းတၵ်းပွႆႇၸႂ်ႉၽူႈလႂ်ႁႂ်ႈၵႂႃႇလူၺ်ႈၵၼ်တင်းၶႃႈၸဝ်ႈၼၼ်ႉတီႈၶႃႈ။ၼႂ်းဝႃႈၼၼ်သေၵေႃႈၸဝ်ႈႁဝ်းလၢတ်ႈဝႃႈ၊-ဢဝ်တင်းၸိုဝ်သဵင်မႂ်းသေလႄႈၵဝ်ႁူႉၸၵ်းမႂ်းဢေႃႈ။မႂ်းလႆႈထူပ်းၵျေးၸူးသိုဝ်ႈၼႃႈတႂ်ႈတႃၵဝ်ယဝ်ႉဝႃႈၼင်ႇၼႆယဝ်ႉတီႈၶႃႈဢေႃႈ။
၁၃ ပိူဝ်ႈၼႆလႄႈပေႃးၶႃႈၸဝ်ႈလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းယဝ်ႉၸိုင်ၶႅၼ်းတေႃႈၼႄပျႃးသဵၼ်ႈတၢင်းၸဝ်ႈႁဝ်းၼၼ်ႉတီႈၶႃႈၸဝ်ႈႁႂ်ႈၶႃႈၸဝ်ႈလႆႈႁူႉၸၵ်းၸဝ်ႈႁဝ်းပုၼ်ႈလွင်ႈၼင်ႇႁိုဝ်ၶႃႈၸဝ်ႈသမ်ႉတၵ်းလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းထႅင်ႈၼၼ်ႉသေၵမ်းတီႈၶႃႈ။ၶႆႈၸႂ်ဝူၼ်ႉၸႂ်လူၺ်ႈလွင်ႈဢၼ်ၵူၼ်းမဵဝ်းၸိူဝ်းၼႆႉပဵၼ်ၵူၼ်းၸဝ်ႈႁဝ်းၼၼ်ႉသေၵမ်းတီႈၶႃႈ။ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-
၁၄ တူဝ်ၵဝ်တၵ်းၵႂႃႇလႄႈပၼ်တၢင်းၼိမ်ၵတ်းယဵၼ်ၶျၢမ်းသႃႇဢေႃႈ၊ဝႃႈၼင်ႇၼႆဢေႃႈ။
၁၅ မုဝ်းသေႇၵေႃႈသမ်ႉလဝ်ႈလၢတ်ႈလႄႈဝႃႈ၊-ပေႃးတူဝ်ၸဝ်ႈႁဝ်းဢမ်ႇၵႂႃႇၸိုင်ယႃႇပေဢဝ်ၶႃႈၸဝ်ႈႁဝ်းၶဝ်ဢွၵ်ႇသေၵႃႈတီႈၼႆႉၵႂႃႇသေၵမ်းတီႈၶႃႈ။
၁၆ ပေႃးၸဝ်ႈႁဝ်းဢမ်ႇၵႂႃႇလူၺ်ႈၵၼ်တင်းၶႃႈၸဝ်ႈႁဝ်းၶဝ်ၸိူဝ်းၼႆႉၼၼ်ႉၸိုင်လွင်ႈတၢင်းဢၼ်ဝႃႈၶႃႈၸဝ်ႈဢိၵ်ႇတင်းၵူၼ်းၸဝ်ႈႁဝ်းၸိူဝ်းၼႆႉလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းၼၼ်ႉတၵ်းထၢင်ႇသႃးၸိူဝ်ႉၼင်ႇႁိုဝ်ၶႃႈ။ၶႃႈၸဝ်ႈဢိၵ်ႇတင်းၵူၼ်းၸဝ်ႈႁဝ်းၸိူဝ်းၼႆႉတၵ်းလႆႈပႅၵ်ႇပိူင်ႈၵၼ်တင်းၵူၼ်းဢၼ်မီးၵႃႈၼိူဝ်လိၼ်မိူင်းၼႆႉတင်းသဵင်ႈတင်းလူင်ၼၼ်ႉၸိူဝ်ႉၼင်ႇႁိုဝ်တီႈၶႃႈ၊ဝႃႈၼင်ႇၼႆလႄႈ၊
၁၇ ထႃႇဝရႃႉၽြႃးလၢတ်ႈတီႈမုဝ်းသေႇလႄႈဝႃႈ၊-ၵဝ်တၵ်းႁဵတ်းၸွမ်းၵႃႈၼင်ႇဢၼ်မႂ်းလဝ်ႈလၢတ်ႈၼၼ်ႉဢေႃႈ။လွင်ႈမၼ်းၸမ်းမႂ်းလႆႈထူပ်းၵျေးၸူးသိုဝ်ႈၼႃႈတႂ်ႈတႃၵဝ်ယဝ်ႉ။ဢဝ်တင်းၸိုဝ်ႈသဵင်မႂ်းသေလႄႈၵဝ်ႁူႉၸၵ်းမႂ်းယဝ်ႉ၊ဝႃႈၼင်ႇၼႆဢေႃႈ။
၁၈ ၵမ်းၼၼ်ႉမၼ်းသမ်ႉလဝ်ႈလၢတ်ႈထႅင်ႈလႄႈဝႃႈ၊-ၶႅၼ်းတေႃႈၼႄပျႃးမုၼ်ၽုင်းၸဝ်ႈႁဝ်းတီႈၶႃႈၸဝ်ႈသေၵမ်းတီႈၶႃႈ။ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈလၢတ်ႈလႄႈဝႃႈ၊-
၁၉ ၵဝ်တၵ်းႁႂ်ႈတၢင်းဢၼ်လီဢၼ်ငၢမ်းၵဝ်ၵႃႈမီးတင်းသဵင်ႈတင်းလူင်ၵၢႆၵႂႃႇၵႃႈတီႈၽၢႆႇၼႃႈမႂ်းဢေႃႈ။ၼႃႇမႃႉၸိုဝ်ႈသဵင်ထႃႇဝရႃႉၽြႃးၵေႃႈၵဝ်တၵ်းႁွင်ႉမွၵ်ႇႁွင်ႉလၢတ်ႈၵႃႈတီႈၽၢႆႇၼႃႈမႂ်းဢေႃႈ။ၵဝ်ၶႂ်ႈႁဵတ်းၵျေးၸူးတီႈၽူႈလႂ်ၵေႃႈၵဝ်တၵ်းဢိတ်းလူဢေႃႈ၊ဝႃႈၼင်ႇၼႆသေယဝ်ႉ၊သမ်ႉလၢတ်ႈထႅင်ႈလႄႈဝႃႈ၊-မႂ်းဢမ်ႇႁၼ်ၼႃႈၵဝ်လႆႈ။
၂၀ လွင်ႈမၼ်းၸမ်းၵေႃႉဢၼ်ႁၼ်ၼႃႈၵဝ်လႄႈဢသၢၵ်ႈလိပ်းၼၼ်ႉဢမ်ႇမီးသေၵေႃႉသေၵူၼ်း၊ဝႃႈၼင်ႇၼႆဢေႃႈ။
၂၁ ထႃႇဝရႃႉၽြႃးသမ်ႉလၢတ်ႈထႅင်ႈလႄႈဝႃႈ၊-ၵႃႈတီႈႁိမ်းၵဝ်ၼႆႉမီးတီႈတီႈၼိုင်ႈလႄႈမႂ်းတၵ်းလႆႈၸုၵ်းယူႇၵႃႈၼိူဝ်မၢၵ်ႇႁိၼ်ၼၼ်ႉဢေႃႈ။
၂၂ မိူဝ်ႈဢၼ်မုၼ်ၽုင်းၵဝ်ၵၢႆၵႂႃႇၼၼ်ႉၸိုင်ၵဝ်တၵ်းဢဝ်မႂ်းသႂ်ႇဝႆႉၵႃႈၼႂ်းၵႄႈမၢၵ်ႇႁိၼ်ၼၼ်ႉလႄႈဢဝ်မိုဝ်းၵဝ်ႁူမ်ႇမႂ်းဝႆႉၼႂ်းမိူဝ်းဢၼ်ၵဝ်ယင်းတိုၵ်ႉၵၢႆၵႂႃႇယူႇၼၼ်ႉဢေႃႈ။
၂၃ မိူဝ်ႈဢၼ်ၵဝ်ယိုတ်းဢဝ်မိုဝ်းၵဝ်ၶိုၼ်းၼၼ်ႉၸိုင်မႂ်းတၵ်းလႆႈႁၼ်လင်ၵဝ်ၵူၺ်းဢေႃႈ။ၼႃႈၵဝ်ၸိုင်မႂ်းတၵ်းဢမ်ႇလႆႈႁၼ်၊ဝႃႈၼင်ႇၼႆဢေႃႈ။