Chapter
၁
ၵူၼ်းဢိသရေႇလလႆႈၶၢမ်ႇၼိၵ်ႈၸၢၵ်ႈငႅၼ်းသေး
၁ ၸိုဝ်သဵင်လုၵ်ႈလၢင်းဢိသရေႇလဢၼ်ပႃးဢဝ်တင်းႁိူၼ်းတင်းယေးႁင်းၽႂ်ႁင်းမၼ်းၸွမ်းလူၺ်ႈၵၼ်တင်းယႃႇၵုပ်ႉလႄႈႁွတ်ႈထိုင်ၵႃႈတီႈမိူင်းဢေႇၵႅပ်ႉတုလႄႈၸိူဝ်းၼၼ်ႉၸမ်းပဵၼ်၊-
၂ ရုပိၼ်ႇ၊သိမုၼ်ႇ၊လေႇဝိ၊ယုတ၊ဢိသၶႃႇ၊ၸေႇပုလုၼ်ႇ၊ပိၼ်ႇယႃႇမိၼ်ႇ၊
၃-၄ တၢၼ်ႇ၊ၼၢပ်ႉထလိ၊ၵၢတ်ႉ၊တင်းဢႃႇသႃႇဢေႃႈ။
၅ ၸိူဝ်ႉၶိူဝ်းလုၵ်ႈလၢင်းဢၼ်သိုပ်ႇဢွၵ်ႇၵႃႈၼႂ်းယႃႇၵုပ်ႉၼၼ်ႉၸမ်းပဵၼ်ၸဵတ်းသိပ်းၵေႃႉဢေႃႈ။ၵူၺ်းၵႃႈယုဝ်းသႅပ်ႉမီးယူႇၵႃႈၼႂ်းမိူင်းဢေႇၵႅပ်ႉတုဢွၼ်တၢင်းဢေႃႈ။
၆ ၸႃႉၸဵမ်ယုဝ်းသႅပ်ႉလႄႈပီႈဢၢႆႈမၼ်းတင်းလၢႆဢိၵ်ႇတင်းၵူၼ်းၵႃႈတီႈၶိင်ႇၵႃႇလႃႉၼၼ်ႉတင်းသဵင်ႈတင်းလူင်ၸိူဝ်းၼၼ်ႉတၢႆၵႂႃႇဝၢႆးၵႂႃႇသေဢေႃႈ။
၇ ၵူၼ်းမဵဝ်းဢိသရေႇလၸိူဝ်းၼၼ်ႉၵိူတ်ႇလဵင်ႉလုၵ်ႈလဵင်ႉလၢင်းလႄႈယႂ်ႇၽေႈၼမ်ၵိုၼ်းမႃးသေယဝ်ႉႁႅင်းယႂ်ႇၼႃႇလႄႈၸွတ်ႇတူဝ်ႈၵႂႃႇတၢင်ႇမိူင်းၵူႈတီႈၵူႈလႅၼ်ဢေႃႈ။
၈ ဝၢႆးသေၼၼ်ႉၶုၼ်ႁေႃၶမ်းပႃးမႂ်ႇဢၼ်ဢမ်ႇႁူႉၸၵ်းယုဝ်းသႅပ်ႉၼၼ်ႉပေႃႇမႃးၵႃႈတီႈမိူင်းဢေႇၵႅပ်ႉတုဢေႃႈ။ပႃးၼၼ်ႉၵေႃႈလၢတ်ႈတီႈၶႃႈဝၢၼ်ႈၵူၼ်းမိူင်းမၼ်းလႄႈဝႃႈ၊-
၉ တူၺ်းလူႊ၊ၵူၼ်းမဵဝ်းဢိသရေႇလၸိူဝ်းၼႆႉၼမ်ၼႃႇသေႁဝ်းဢေႃႈ။ႁႅင်းယႂ်ႇၼႃႇသေႁဝ်းဢေႃႈ။
၁၀ မႃးမႃးဢိူၺ်ႊ၊ႁဵတ်းလၵ်းလၵ်းလႅမ်လႅမ်တေႃႇၶဝ်တႃႉႁဝ်း။ပေႃးဢမ်ႇၼၼ်ၶဝ်တၵ်းယႂ်ႇၽေႈၼမ်ၵိုၼ်းမႃးဢိူဝ်ႈ။ၵမ်းလိုၼ်းပေႃးပဵၼ်သိုၵ်းပဵၼ်သိူဝ်ၸိုင်ၶဝ်တၵ်းယူႇၶဝ်ႈယူႇၽၢႆႇရၢၼ်ႇသူႇႁဝ်းၼၼ်ႉသေလႄႈတိုၵ်းတေႃးႁဝ်းသေယဝ်ႉ၊ဢွၵ်ႇသေၵႃႈၼႂ်းမိူင်းၸဝ်ႈၼႆႉၵႂႃႇဢိူဝ်ႈ၊ဝႃႈၼင်ႇၼႆဢေႃႈ။
၁၁ ပိူဝ်ႈၼႆလႄႈၶဝ်ၶၢၼ်းၶုၼ်ဢၼ်တၵ်းလႆႈဢုပ်ႉၵႃႈၼိူဝ်ၶဝ်ၼၼ်ႉဝႆႉႁႂ်ႈလႆႈဢဝ်ၵၢၼ်တၢင်းႁဵတ်းဢၼ်ယၢပ်ႇၽိုတ်ႇၼႃၼၼ်ႉၼိၵ်ႈၸၢၵ်ႈငႅၼ်းသေးၶဝ်ၼႃႇၼႃႇဢေႃႈ။ၶဝ်လႆႈတႄႇႁဵတ်းဝဵင်းဢၼ်ပဵၼ်ဝဵင်းဝိတုင်ႇတင်းဝဵင်းႁႃႇမသႅတ်ႉတီႈဢၼ်တၵ်းလႆႈသိမ်းဝႆႉၽၼ်ႇတႃႇၸဝ်ႈပုၼ်ႈၶုၼ်ႁေႃၶမ်းၽႃႇရေႃးၼၼ်ႉဢေႃႈ။
၁၂ ၵူၺ်းၵႃႈၸွမ်းၵႃႈၼင်ႇဢၼ်ၶဝ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသေးၼၼ်ႉၶဝ်ယိင်ႈၶႅၼ်းယႂ်ႇၽေႈၼမ်ၵိုၼ်းမႃးၸွတ်ႇတူဝ်ႈၵႂႃႇဢေႃႈ။
၁၃ ၵူၼ်းဢေႇၵႅပ်ႉတုတင်းလၢႆဢွၼ်ၵၼ်မႆႈၸႂ်ၵွပ်ႈပိူဝ်ႈၵူၼ်းမဵဝ်းဢိသရေႇလၸိူဝ်းၼၼ်ႉလႄႈ၊ႁႂ်ႈၶဝ်ၶၢမ်ႇႁဵတ်းၶႃႈယၢပ်ႇၼႃႇၽိုတ်ႇၼႃႇလူင်လၢင်ဢေႃႈ။
၁၄ ၶဝ်ၼၼ်ႉႁဵတ်းႁႂ်ႈၶဝ်ၶီၸႂ်ၶူမ်ၸႂ်လူၺ်ႈတၢင်းဢၼ်ၶၢမ်ႇၸႂ်ႉႁဵတ်းဢၼ်ယၢပ်ႇၼႃႇယဵၼ်းၼႃႇၼႂ်းတၢင်းဢၼ်ႁဵတ်းလိၼ်ၼဵဝ်တင်းမၢၵ်ႇဢုတ်ႇ၊ၼႂ်းတၢင်းဢၼ်ႁဵတ်းႁႆႊႁဵတ်းၼႃးၵူႈၸိူဝ်ႉၵူႈပိူင်ဢၼ်ဝႃႈတၢင်းဢၼ်ၸႂ်ႉႁဵတ်းၵူႈၸိူဝ်ႉၵူႈပိူင်ၵၢၼ်တၢင်းႁဵတ်းဢၼ်ယၢပ်ႇၼႃႇၽိုတ်ႇၼႃႇလူင်လၢင်ၸိူဝ်းၼၼ်ႉဢေႃႈ။
၁၅ ၶုၼ်ႁေႃၶမ်းမိူင်းဢေႇၵႅပ်ႉတုလၢတ်ႈတီႈမေႈၵဵပ်းႁေႇပႄးဢၼ်လႆႈၸိုဝ်ႈသိၽရႃႉတင်းပုဢႃႇၸိူဝ်းၼၼ်ႉလႄႈဝႃႈ၊-
၁၆မိူဝ်ႈဢၼ်သူႁဵတ်းမေႈၵဵပ်းတီႈမေႈယိင်းႁေႇပႄးတင်းလၢႆလႄႈႁၼ်ၶဝ်ၵိူတ်ႇလဵင်ႉလုၵ်ႈၼၼ်ႉ၊ပေႃးပဵၼ်ၵူၼ်းၸၢႆးဢွၼ်ႇၸိုင်သူတၵ်းလႆႈဢဝ်တၢႆပႅတ်ႈဢေႃႈ။ပေႃးပဵၼ်ၵူၼ်းယိင်းဢွၼ်ႇၸိုင်မၼ်းတၵ်းလႆႈဢသၢၵ်ႈလိပ်းယူႇဢေႃႈ၊ဝႃႈၼင်ႇၼႆဢေႃႈ။
၁၇မေႈၵဵပ်းၸိူဝ်းၼၼ်ႉၵူဝ်ႁႄၽြႃးပဵၼ်ၸဝ်ႈလႄႈဢမ်ႇႁဵတ်းၸွမ်းၵႃႈၼင်ႇဢၼ်ၶုၼ်ႁေႃၶမ်းဢေႇၵႅပ်ႉတုမီးဢမိင်ႉဝႆႉၼၼ်ႉ။ၶဝ်ပၼ်ႁႂ်ႈၵူၼ်းၸၢႆးဢွၼ်ႇတင်းလၢႆဢသၢၵ်ႈလႆႈၵတ်းယဵၼ်ၶျၢမ်းသႃႇယူဢေႃႈ။
၁၈ ၶုၼ်ႁေႃၶမ်းမိူင်းဢေႇၵႅပ်ႉတုၵေႃႈႁွင်ႉဢဝ်မေႈၵဵပ်းၸိူဝ်းၼၼ်ႉလႄႈၸႅတ်ႈထၢမ်ဝႃႈ၊-ႁဵတ်းသင်လႄႈသူပၼ်ၵူၼ်းၸၢႆးဢွၼ်ႇတင်းလၢႆဢသၢၵ်ႈလႆႈၵတ်းယဵၼ်ၶျၢမ်းသႃႇယူႇ၊ဝႃႈၼင်ႇၼႆလႄႈမေႈၵဵပ်းၸိူဝ်းၼၼ်ႉၵေႃႈၶိုၼ်းလဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊-
၁၉ မေႈယိင်းႁေႇပႄးၸိူဝ်းၼၼ်ႉဢမ်ႇမိူၼ်မေႈယိင်းဢေႇၵႅပ်ႉတုၶႃႈ။ၵွပ်ႈပိူဝ်ႈဢၼ်ၶဝ်ၵႅၼ်ႇၶႅင်ၼႃႇလႄႈၶဝ်ၸၢင်ႊၵိူတ်ႇလဵင်ႉလုၵ်ႈမႃးၸူဝ်ႈဢၼ်မေႈၵဵပ်းဢမ်ႇပႆႇၶဝ်ႈႁွတ်ႈထိုင်ၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၂၀ ၽြႃးပဵၼ်ၸဝ်ႈႁဵတ်းၵျေးၸူးတီႈမေႈၵဵပ်းၸိူဝ်းၼၼ်ႉဢေႃႈ။ၵူၼ်းမဵဝ်းၼၼ်ႉၵေႃႈယႂ်ႇၽေႈၼမ်ၵိုၼ်းမႃးလႄႈႁႅင်းယႂ်ႇၼႃႇလူင်လၢင်ဢေႃႈ။
၂၁ ပိူဝ်ႈဢၼ်မေႈယိင်းၸိူဝ်းၼၼ်ႉၵူဝ်ႁႄၽြႃးပဵၼ်ၸဝ်ႈလႄႈမၼ်းၸဝ်ႈပွင်ႁဵတ်းလုမ်းလႃးၵူၼ်းႁိူၼ်းၵူၼ်းယေးၶဝ်ဢေႃႈ။
၂၂ ၶုၼ်ႁေႃၶမ်းၽႃႇရေႃးသင်ႇလၢတ်ႈတီႈၶႃႈဝၢၼ်ႈၵူၼ်းမိူင်းမၼ်းၸဝ်ႈတင်းသဵင်ႈတင်းလူင်လႄႈဝႃႈ၊-တၵ်းလႆႈဢဝ်လုၵ်ႈၸၢႆးဢွၼ်ႇၶဝ်ၵႃႈဢၼ်ၵိူတ်ႇလဵင်ႉမႃးတင်းသဵင်ႈတင်းလူင်ၼၼ်ႉၶျႃးတူၵ်းပႅတ်ႈၵႃႈၼႂ်းၼမ်ႉႁွင်ႊဢေႃႈ။ၵႃႈဢၼ်ပဵၼ်လုၵ်ႈယိင်းဢွၼ်ႇၸမ်းတၵ်းလႆႈဢသၢၵ်ႈလိပ်းၵတ်းယဵၼ်ၶျၢမ်းသႃႇယူႇဢေႃႈ၊ဝႃႈၼင်ႇၼႆဢေႃႈ။