Chapter
၂၄
ပတိၺိၼ်ႇၸဝ်ႈၽြႃး
၁ ၵမ်းၼၼ်ႉမၼ်းၸဝ်ႈသမ်ႉမီးဢမိင်ႉတီႈမုဝ်းသေႇလႄႈဝႃႈ၊-မႂ်းဢိၵ်ႇတင်းဢႃႇရုၼ်ႇတင်းၼႃႇတပ်ႉတင်းဢၽိႁုတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢိသရေႇလၸဵတ်းၵေႃႉဢွၼ်ၵၼ်ၶိုၼ်ႈၸူးၵႃႈတီႈထႃႇဝရႃႉၽြႃးလႄႈယူႇတီႈဢၼ်ၵႆၵႆသေလႄႈၵူဝ်းၵႂၢႆႇတႃႉ။
၂ မုဝ်းသေႇၵေႃႉလဵဝ်ၵူၺ်းတၵ်းလႆႈသုတ်ႉၸပ်းသုတ်ႉၸူးၵႃႈတီႈထႃႇဝရႃႉၽြႃးဢေႃႈ။ၶဝ်ၼၼ်ႉဢမ်ႇလႆႈသုတ်ႉၸပ်းသုတ်ႉၸူး။ၵူၼ်းတင်းလၢႆၵေႃႈဢမ်ႇလႆႈၶိုၼ်ႈလူၺ်ႈၵၼ်တင်းမၼ်း၊ဝႃႈၼင်ႇၼႆဢေႃႈ။
၃ မုဝ်းသေႇၵေႃႈမႃႈလႄႈမွၵ်ႇလၢတ်ႈၵႂၢမ်းထႃႇဝရႃႉၽြႃးတင်းသဵင်ႈတင်းလူင်ဢိၵ်ႇတင်းလွင်ႈတၢင်းဢၼ်မၼ်းၸဝ်ႈၸီႇယၢင်ႇတင်းသဵင်ႈတင်းလူင်ၼၼ်ႉတီႈၵူၼ်းတင်းလၢႆလႄႈၵူၼ်းတင်းသဵင်ႈတင်းလူင်ၽွမ်ႉသဵင်လဵဝ်ၵၼ်လႄႈၶိုၼ်းလၢတ်ႈဝႃႈ၊-ႁဝ်းၶႃႈတၵ်းႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၄ မုဝ်းသေႇတႅမ်ႈၵႂၢမ်းထႃႇဝရႃႉၽြႃးတင်းသဵင်ႈတင်းလူင်ဝႆႉသေယဝ်ႉလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈတႄႇႁဵတ်းယိၸ်ႉပလၢင်ႇဢိၵ်ႇတင်းသဝ်မၢၵ်ႇႁိၼ်သိပ်းသွင်လုၵ်ႈၸွမ်းၵႃႈၼင်ႇဢၼ်ၵူၼ်းမဵဝ်းဢိသရေႇလပဵၼ်သိပ်းသွင်မဵဝ်းၼၼ်ႉၵႃႈတီႈႁိမ်းတိၼ်လွႆၼၼ်ႉဢေႃႈ။
၅ မၼ်းပွႆႇၸႂ်ႉၽူႈမၢဝ်ႇတင်းလၢႆၵႃႈၼႂ်းၵူၼ်းမဵဝ်းဢိသရေႇလၸိူဝ်းၼၼ်ႉၵႂႃႇလႄႈၶဝ်ၼၼ်ႉၵေႃႈဢွၼ်ၵၼ်ဢဝ်ဝူဝ်းပုၵ်ႉၸေႃႇယိၸ်ႉဢၼ်တုတ်ႇၽႆးဢိၵ်ႇတင်းယိၸ်ႉမိၵ်ႉသႁႃႇယႃႉၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၆ မုဝ်းသေႇၵေႃႈဢဝ်လိူတ်ႈၼၼ်ႉၶိုင်ႈၼိုင်ႈသႂ်ႇၵႃႈၼႂ်းဝၢၼ်ႇလူင်လႄႈဢဝ်ရၶိုင်ႈၼိုင်ႈၽႅတ်းသႂ်ႇၵႃႈၼိူဝ်ယိၸ်ႉပလၢင်ႇဢေႃႈ။
၇ လိၵ်ႈပတိၺိၼ်ႇၵေႃႈမၼ်းဢဝ်ၽတ်းၵႃႈတီႈၽၢႆႇၼႃႈပရိၵ်ႈသၢတ်ႈၵူၼ်းတင်းလၢႆသေယဝ်ႉၶဝ်ဢွၼ်ၵၼ်လၢတ်ႈဝႃႈ၊-ႁဝ်းၶႃႈတၵ်းႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉလႄႈတၵ်းထွမ်ႇဢဝ်ၶႃႈဢေႃႈ၊ဝႃႈၼင်ႇၼႆဢေႃႈ။
၈ မုဝ်းသေႇၵေႃႈဢဝ်လိူတ်ႈၽႅတ်းသႂ်ႇၵႃႈၼိူဝ်ၵူၼ်းတင်းလၢႆလႄႈလၢတ်ႈဝႃႈ၊-လိူတ်ႈၼႆႉၸမ်းပဵၼ်လိူတ်ႈပတိၺိၼ်ႇဢၼ်ထႃႇဝရႃႉၽြႃးႁဵတ်းလူၺ်ႈၵၼ်တင်းသူလူၺ်ႈလွင်ႈၵႂၢမ်းၸိူဝ်းၼႆႉတင်းသဵင်ႈတင်းလူင်ၼၼ်ႉဢေႃႈ၊ဝႃႈၼင်ႇၼႆဢေႃႈ။
၉ မိူဝ်ႈၼၼ်ႉမုဝ်းသေႇ၊ဢႃႇရုၼ်ႇ၊ၼႃႇတပ်ႉ၊ဢၽိႁုဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢိသရေႇလၸိူဝ်းၼၼ်ႉဢွၼ်ၵၼ်ၶိုၼ်ႈၸူးလႄႈလႆႈႁၼ်ၽြႃးပဵၼ်ၸဝ်ႈၵူၼ်းမဵဝ်းဢိသရေႇလဢေႃႈ။
၁၀ ၵႃႈတီႈတႂ်ႈတိၼ်မၼ်းၸဝ်ႈၼၼ်ႉပဵၼ်ၸိူဝ်ႉၼင်ႇၶိူင်ႈပိူင်ဢၼ်ဢဝ်တင်းၼီႇလႃႇဢၼ်ႁိူဝ်ႈႁိူင်းႁဵတ်းၼၼ်ႉဢိၵ်ႇတင်းၸိူဝ်ႉၼင်ႇၼႃႈၽႃႉၵၢင်ႁၢဝ်ဢၼ်သႂ်ႇလႅင်းၼၼ်ႉဝႆႉဢေႃႈ။
၁၁ ပိၵ်ႉသမ်ႉၶဝ်လႆႈႁၼ်ၽြႃးပဵၼ်ၸဝ်ႈသေၵေႃႈမၼ်းၸဝ်ႈဢမ်ႇဢဝ်မိုဝ်းႁဵတ်းတေႃႇမူးမၢတ်ႈၽွင်းမိူင်းၵူၼ်းမဵဝ်းဢိသရေႇလၸိူဝ်းၼၼ်ႉ။ၶဝ်ယင်းၵိၼ်ယူႇၶူပ်းယူႇဢေႃႈ။
၁၂ ထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈ၊-ၶိုၼ်ႈၸူးတီႈၵဝ်ၵႃႈၼိူဝ်လွႆၼႆႉတႃႉ။ၵဝ်တၵ်းဢဝ်ၶႅပ်းမၢၵ်ႇႁိၼ်ဢိၵ်ႇတင်းတြႃးၸဝ်ႈတင်းပိင်းၺၢပ်ႈၸဝ်ႈဢၼ်ၵဝ်တႅမ်ႈဝႆႉယဝ်ႉၼၼ်ႉဢၢပ်ႈပၼ်တီႈမႂ်းပုၼ်ႈဢၼ်မႂ်းတၵ်းလႆႈသင်ႇသွၼ်ပၼ်ပိူၼ်ႈၼၼ်ႉဢေႃႈ၊ဝႃႈၼင်ႇၼႆသေယဝ်ႉ၊
၁၃ မုဝ်းသေႇဢိၵ်ႇတင်းယေႃးသုဢၼ်ပဵၼ်ၵူၼ်းႁူမ်ႈပွင်းမၼ်းၼၼ်ႉဢွၼ်ၵၼ်လုၵ်ႉလႄႈမုဝ်းသေႇၶိုၼ်ႈၵႂႃႇၵႃႈၼိူဝ်လွႆၽြႃးပဵၼ်ၸဝ်ႈဢေႃႈ။
၁၄ မၼ်းသင်ႇလၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉလႄႈဝႃႈ၊-သူဢွၼ်ၵၼ်ပႂ်ႉထႃႈယူႇၵႃႈတီႈၼႆႉတေႃႇထိုင်ႁွတ်ႈႁဝ်းၶိုၼ်းမႃးၼၼ်ႉတႃႉ။တူၺ်းလူႊ၊ဢႃႇရုၼ်ႇတင်းႁုရမီးယူႇလူၺ်ႈၵၼ်တင်းသူလႄႈၽူႈလႂ်သေဢမ်ႇဝႃႈပေႃးမီးဢမူႉၵိၵ်ႉၸႃႉၸိုင်ႁႂ်ႈမၼ်းၵႂႃႇၸူးၵႃႈတီႈၶဝ်တႃႉ၊ဝႃႈၼင်ႇၼႆဢေႃႈ။
၁၅ မုဝ်းသေႇၶိုၼ်ႈၵႂႃႇၵႃႈၼိူဝ်လွႆၸဝ်ႈလႄႈမွၵ်ႇၵုမ်ႈႁူမ်ႇသုမ်ႇလွႆၸဝ်ႈၼၼ်ႉဝႆႉဢေႃႈ။
၁၆ မုၼ်ၽုင်းထႃႇဝရႃႉၽြႃးတိူဝ်ႉထုၵ်ႇၵႃႈၼိူဝ်လွႆသိၼႃႇလႄႈမွၵ်ႇၵုမ်ႈႁူမ်ႇသုမ်ႇဝႆႉႁူၵ်းဝၼ်းတဵမ်တဵမ်ဢေႃႈ။ၼႂ်းဝၼ်းသတ်ႉတမၸိုင်မၼ်းၸဝ်ႈယူႇၵႃႈၼႂ်းမွၵ်ႇၵုမ်ႈလႄႈႁွင်ႉမုဝ်းသေႇဢေႃႈ။
၁၇ ဢရွင်ႇမုၼ်ၽုင်းထႃႇဝရႃႉၽြႃးၼၼ်ႉပဵၼ်မိူၼ်ၸိူဝ်ႉၼင်ႇၽႆးဢၼ်မႆႈယူႇၵႃႈၼိူဝ်ပၢႆၸိၵ်းလွႆၼၼ်ႉသိုဝ်ႈၼႃႈတႂ်ႈတႃၵူၼ်းမဵဝ်းဢိသရေႇလၸိူဝ်းၼၼ်ႉဢေႃႈ။
၁၈ မုဝ်းသေႇၶဝ်ႈၵႃႈၼႂ်းမွၵ်ႇၵုမ်ႈလႄႈၶိုၼ်ႈၵႂႃႇၵႃႈၼိူဝ်လွႆၸဝ်ႈၼၼ်ႉသေယဝ်ႉယူႇၵႃႈၼိူဝ်လွႆၸဝ်ႈၼၼ်ႉသီႇသိပ်းဝၼ်းသီႇသိပ်းၶိုၼ်းတဵမ်တဵမ်ဢေႃႈ။