Chapter
၂
မုဝ်းသေႇၵိူတ်ႇလဵင်ႉမႃး
၁ မိူဝ်ႈၶိင်ႇၵႃႇလႃႉယၢမ်းၼၼ်ႉၵူၼ်းမဵဝ်းလေႇဝိၵေႃႉၼိုင်ႈၵႂႃႇလႄႈပဵၼ်ႁိူၼ်းႁူမ်ႈၵၼ်တင်းလုၵ်ႈယိင်းမဵဝ်းလေႇဝိဢေႃႈ။မေႈယိင်းၼၼ်ႉပႃးပတိၵ်ႉသၼ်ႇထေႇသေယဝ်ႉၵိူတ်ႇလဵင်ႉလုၵ်ႈၸၢႆးမႃးဢေႃႈ။
၂ မိူဝ်ႈဢၼ်မၼ်းႁၼ်လုၵ်ႈၸၢႆးၼၼ်ႉႁၢင်ႊလီၽၢင်လီၼၼ်ႉၸိုင်မၼ်းဢဝ်သိူင်ႇဝႆႉမႅပ်းဝႆႉသၢမ်လိူၼ်တဵမ်တဵမ်ဢေႃႈ။
၃ ၵမ်းလိုၼ်းမိူဝ်ႈဢၼ်မၼ်းဢမ်ႇၸၢင်ႊဢဝ်သိူင်ႇမႅပ်းဝႆႉလႆႈယဝ်ႉၼၼ်ႉၸိုင်မၼ်းဢဝ်ဢူႇဢၼ်ဢဝ်တင်းတူၼ်ႈၶႅမ်ၵႃႇမသၢၼ်ႇႁဵတ်းၼၼ်ႉလႄႈဢဝ်တင်းၵႆးတဝ်းတင်းႁၵ်ႉတႃးသေယဝ်ႉဢဝ်လုၵ်ႈဢွၼ်ႇၼၼ်ႉသႂ်ႇၵႃႈၼႂ်းမၼ်းသေလႄႈဢဝ်ဝႆႉၵႃႈၼႂ်းတူၼ်ႈၶႅမ်ၵႃႈတီႈႁိမ်းၽင်ႇၼမ်ႉႁွင်ႊဢေႃႈ။
၄ ပီႈၼၢင်းၵေႃႉဢွၼ်ႇၼၼ်ႉၵေႃႈၸုၵ်းယူႇတီႈဢၼ်ၵႆလႄႈလွမ်တူၺ်းႁႂ်ႈလႆႈႁူႉလွင်ႈဢၼ်တၵ်းပဵၼ်မႃးၸိူဝ်ႉၼင်ႇႁိုဝ်တီႈမၼ်းၼၼ်ႉဢေႃႈ။
၅ မိူဝ်ႈၶိင်ႇၼၼ်ႉလုၵ်ႈယိင်းၶုၼ်ႁေႃၶမ်းၽႃႇရေႃးလူင်းမႃးႁႂ်ႈလႆႈဢၢပ်ႇၼမ်ႉဢေႃႈ။မိူဝ်ႈဢၼ်ၸိူင်ႉမၼ်းၼၢင်းမၼ်းတင်းလၢႆလႄႇလဵပ်ႈၸွမ်းၵႃႈတီႈႁိမ်းၽင်ႇၼမ်ႉႁွင်ႊယူႇၼၼ်ႉမၼ်းထူပ်းႁၼ်ဢူႇၵႃႈတီႈတူၼ်ႈၶႅမ်ၼၼ်ႉလႄႈမၼ်းၸႂ်ႉၸိူင်ႉမၼ်းၵေႃႉၼိုင်ႈၵႂႃႇဢဝ်မႃးဢေႃႈ။
၆ မိူဝ်ႈဢၼ်မၼ်းၽုၺ်ႇတူၺ်းဢူႇၼၼ်ႉမၼ်းႁၼ်လုၵ်ႈလႅင်ဢွၼ်ႇၵေႃႉၼိုင်ႈၼႂ်းၼၼ်ႉဢေႃႈ။လုၵ်ႈလႅင်ဢွၼ်ႇၼၼ်ႉႁႆႈယူႇဢေႃႈ။မၼ်းၵေႃႈမီးၸႂ်ဢၼ်ဢိတ်းလူလႄႈလၢတ်ႈဝႃႈ၊-မၼ်းတၵ်းပဵၼ်လုၵ်ႈဢွၼ်ႇၸိူဝ်ႉၶိူဝ်းႁေႇပႄးဢေႃႈ၊ဝႃႈၼင်ႇၼႆဢေႃႈ။
၇ မိူဝ်ႈၼၼ်ႉပီႈၼၢင်းၵေႃႉဢွၼ်ႇၼၼ်ႉၵေႃႈလဝ်ႈထၢမ်တီႈလုၵ်ႈယိင်းၶုၼ်ႁေႃၶမ်းၽႃႇရေႃးၼၼ်ႉလႄႈဝႃႈ၊-ၸွင်ႇၵဝ်ၶႃႈတၵ်းလႆႈၵႂႃႇႁွင်ႉဢဝ်ၵေႃႉဢၼ်တၵ်းလူႈတၵ်းထိင်းလုၵ်ႈဢွၼ်ႇၼႆႉပုၼ်ႈၸဝ်ႈၼၢင်းႁဝ်းၶႃႈႁိုဝ်၊ဝႃႈၼင်ႇၼႆလႄႈလုၵ်ႈယိင်းၶုၼ်ႁေႃၶမ်းၵေႃႈလၢတ်ႈဝႃႈ၊-ၵႂႃႇတႃႉ၊ဝႃႈၼင်ႇၼႆဢေႃႈ။
၈ မေႈယိင်းဢွၼ်ႇၼၼ်ႉၵႂႃႇႁွင်ႉဢဝ်မေႈလုၵ်ႈဢွၼ်ႇၼၼ်ႉမႃးဢေႃႈ။
၉ လုၵ်ႈယိင်းၶုၼ်ႁေႃၶမ်းၽႃႇရေႃးသင်ႇလၢတ်ႈဝႆႉတီႈမၼ်းလႄႈဝႃႈ၊-ဢဝ်လုၵ်ႈဢွၼ်ႇၼႆႉၵႂႃႇလႄႈလူထိင်းဝႆႉပုၼ်ႈၵဝ်တႃႉ။ၵဝ်တၵ်းပၼ်ၵႃႊမၼ်းၶၼ်မၼ်းဢေႃႈ၊ဝႃႈၼင်ႇၼႆလႄႈမေႈယိင်းၼၼ်ႉၵေႃႈဢဝ်လုၵ်ႈဢွၼ်ႇၼၼ်ႉၵႂႃႇလႄႈလူထိင်းဝႆႉဢေႃႈ။
၁၀ မိူဝ်ႈဢၼ်လုၵ်ႈဢွၼ်ႇၼၼ်ႉယႂ်ႇမႃးၼၼ်ႉၸိုင်မၼ်းဢဝ်ၵႂႃႇသူင်ႇပၼ်ၵႃႈတီႈလုၵ်ႈယိင်းၶုၼ်ႁေႃၶမ်းၽႃႇရေႃးလႄႈလုၵ်ႈယိင်းၶုၼ်ႁေႃၶမ်းၽႃႇရေႃးၵေႃႈဢဝ်မၼ်းၶၢၼ်းဝႆႉၼႂ်းဢရႃႇလုၵ်ႈၸၢႆးလႄႈႁွင်ႉႁိၵ်ႈၸိုဝ်မၼ်းဝႃႈမုဝ်းသေႇဢေႃႈ။မၼ်းဝႃႈ၊-ပိူဝ်ႈဢၼ်ႈၵဝ်ၼုၵ်ႈဢဝ်မၼ်းဢွၵ်ႇသေၵႃႈၼႂ်းၼမ်ႉမႃးလႄႈလႆႈႁွင်ႉႁိၵ်ႈၸိုဝ်ႈၼင်ႇၼႆဢေႃႈ၊ဝႃႈၼင်ႇၼႆဢေႃႈ။
မုဝ်းသေႇပၢႆၵႂႃႇမိူင်းမိတျၢၼ်ႇ
၁၁ မိူဝ်ႈၼၼ်ႉမုဝ်းသေႇယႂ်ႇမႃးသေယဝ်ႉဢွၵ်ႇၵႂႃႇၸူးၵႃႈတီႈပီႈၼွင်ႉၵူၼ်းမဵဝ်းမၼ်းလႄႈလူႈတူၺ်းၵၢၼ်တၢင်းႁဵတ်းၶဝ်ဢၼ်ယၢပ်ႇၼႃႇၽိုတ်ႇၼႃႇၼၼ်ႉဢေႃႈ။မိူဝ်ႈဢၼ်မၼ်းႁၼ်ၵူၼ်းဢေႇၵႅပ်ႉတုၵေႃႉၼိုင်ႈပေႃႉယႅၼ်ႉပီႈၼွင်ႉၵူၼ်းမဵဝ်းမၼ်းၵူၼ်းႁေႇပႄးၵေႃႉၼိုင်ႈယူႇဢေႃႈ။
၁၂ မၼ်းဝၢႆႇတူၺ်းၽၢႆႇၼိုင်ႈယဝ်ႉၽၢႆႇၼိုင်ႈလႄႈမိူဝ်ႈဢၼ်ဢမ်ႇႁၼ်ၽူႈလႂ်သေၵေႃႉၼၼ်ႉၸိုင်မၼ်းဢဝ်ၵူၼ်းဢေႇၵႅပ်ႉတုၵေႃႉၼၼ်ႉတၢႆလႄႈဢဝ်ၽင်ဝႆႉၵႃႈၼႂ်းသၢႆးဢေႃႈ။
၁၃ ဝၼ်းမိူဝ်ႈၽုၵ်ႈမၼ်းသမ်ႉဢွၵ်ႇၵွႃႇလႄႈလႆႈႁၼ်ၵူၼ်းႁေႇပႄးၼင်ႇၵၼ်သွင်ၵေႃႉပေႃႉယႅၼ်ႉၵၼ်ယူႇလႄႈမၼ်းထၢမ်တီႈၵေႃႉဢၼ်ၼိၵ်ႈၸၢၵ်ႈငႅၼ်းသေးၼၼ်ႉလႄႈဝႃႈ၊-ႁဵတ်းသင်လႄႈမႂ်းပေႃႉယႅၼ်ႉၵေႃႉသေႈမႂ်းၼင်ႇၼႆ၊မိူဝ်ႈဢၼ်ဝႃႈၼင်ႇၼႆၸိုင်၊ၵေႃႉၼၼ်ႉၵေႃႈၶိုၼ်းလၢတ်ႈဝႃႈ၊-
၁၄ ၽူႈလႂ်ၶၢၼ်းမႂ်းဝႆႉႁႂ်ႈမႂ်းလႆႈပဵၼ်ၵႄႇပဵၼ်ႁူဝ်ပဵၼ်ၵေႃႉဢၼ်ၸီႇယၢင်ႇတြႃးၵႃႈၼိူဝ်ႁဝ်းၼႆႉ။မႂ်းတၵ်းဢဝ်ၵဝ်တၢႆမိူၼ်ၸိူဝ်ႉၼင်ႇဢၼ်မႂ်းဢဝ်ၵူၼ်းဢေႇၵႅပ်ႉတုတၢႆၼၼ်ႉႁိုဝ်၊ဝႃႈၼင်ႇလႄႈမုဝ်းသေႇမီးတၢင်းဢၼ်ၵူဝ်ႁႄလႄႈဝႃႈ၊-ပိူၼ်ႈႁူႉလွင်ႈဢၼ်ၵဝ်ႁဵတ်းမႃးၼၼ်ႉယဝ်ႉ၊ဝႃႈၼင်ႇၼႆဢေႃႈ။
၁၅ မိူဝ်ႈဢၼ်ၶုၼ်ႁေႃၶမ်းၽႃႇရေႃးငိၼ်းသတၢင်းသဵင်ၶၢဝ်ၼၼ်ႉၸိုင်မၼ်းၵျၢမ်ႇႁႃႁႂ်ႈလႆႈဢဝ်မုဝ်းသေႇတၢႆဢေႃႈ။မုဝ်းသေႇၵေႃႈဢွၵ်ႇပၢႆႊသေၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးၵႂႃႇလႄႈႁွတ်ႈထိုင်ၵႃႈတီႈမိူင်းမိတျၢၼ်ႇသေယဝ်ႉၼင်ႈယူႇၵႃႈတီႈႁိမ်းၼမ်ႉမေႃႇဢေႃႈ။
၁၆ မိူဝ်ႈၼၼ်ႉတီႈယိတ်ႉပရေႃးႁိၵ်ႈမိူင်းမိတျၢၼ်ႇၼၼ်ႉမီးလုၵ်ႈယိင်းၸဵတ်းၵေႃႉဢေႃႈ။ၶဝ်ၼၼ်ႉဢွၼ်ၵၼ်မႃးလႄႈတဵၵ်းၼမ်ႉသေယဝ်ႉထွၵ်ႇသႂ်ႇၵႃႈၼႂ်းႁၢင်းၵိၼ်ၼမ်ႉႁႂ်ႈလႆႈတိုၵ်းၼမ်ႉပၼ်တီႈၽုင်သူဝ်းၽုင်ပႄႉပေႃႈၶဝ်ဢေႃႈ။
၁၇ ၵူၼ်းလဵင်ႉသူဝ်းတင်းလၢႆဢွၼ်ၵၼ်မႃးလႄႈႁေႃႈသူဝ်းၶဝ်ပႄႉၶဝ်ၸိူဝ်းၼၼ်ႉပႅတ်ႈဢေႃႈ။မိူဝ်ႈၼၼ်ႉမုဝ်းသေႇလုၵ်ႉလႄႈၸွႆႈထႅမ်မေႈယိင်းၸိူဝ်းၼၼ်ႉသေယဝ်ႉတိုၵ်းၼမ်ႉပၼ်တီႈၽုင်သူဝ်းၽုင်ပႄႉၶဝ်ဢေႃႈ။
၁၈ မိူဝ်ႈဢၼ်လုၵ်ႈယိင်းၶဝ်ႁွတ်ႈထိုင်ၵႃႈတီႈရုဢေႇလၼၼ်ႉမၼ်းထၢမ်တီႈၶဝ်လႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်မိူဝ်ႈၼႆႉသူၸဵဝ်းႁွတ်ႈမႃးႁိူၼ်း၊ဝႃႈၼင်ႇၼႆလႄႈၶဝ်ၵေႃႈၶိုၼ်းလၢတ်ႈလႄႈဝႃႈ၊-
၁၉ ၵူၼ်းဢေႇၵႅပ်ႉတုၵေႃႉၼိုင်ႈၵႄႇၼုၵ်ႈဢဝ်ႁဝ်းၶႃႈသေၵႃႈၼႂ်းမိုဝ်းၵူၼ်းလဵင်ႉသူဝ်းတင်းလၢႆလႄႈတဵၵ်းၼမ်ႉၵႃႈဢၼ်ႁဝ်းၶႃႈလူဝ်ႇၼၼ်ႉတိုၵ်းပၼ်တီႈၽုင်သူဝ်းၽုင်ပႄႉႁဝ်းၶႃႈၶႃႈဢေႃႈ၊ဝႃႈၼင်ႇၼႆဢေႃႈ။
၂၀ မၼ်းၵေႃႈထၢမ်ႇတီႈလုၵ်ႈယိင်းမၼ်းၸိူဝ်းၼၼ်ႉလႄႈဝႃႈ၊-ၵေႃႉၼၼ်ႉမီးယူႇၵႃႈတီႈလႂ်။ႁဵတ်းသင်လႄႈသူပႅတ်ႈမၼ်းဝႆႉၸိူဝ်ႉၼႆ။ဢွၼ်ၵၼ်ၵႂႃႇႁွင်ႉဢဝ်မၼ်းမႃးႁႂ်ႈလႆႈၵိၼ်တၢင်းၵိၼ်တၢင်းၶူပ်းတႃႉ၊ဝႃႈၼင်ႇၼႆဢေႃႈ။
၂၁ မုဝ်းသေႇငိၼ်းမူၼ်ႈၶႂ်ႈယူႇလူၺ်ႈၵေႃႉၼၼ်ႉလႄႈၵေႃႉၼၼ်ႉၵေႃႈဢဝ်လုၵ်ႈယိင်းမၼ်းၸိပေႃႇရပၼ်တီႈမုဝ်းသေႇဢေႃႈ။
၂၂ ၸိပေႃႇရၵိူတ်ႇလဵင်ႉလုၵ်ႈၸၢႆးမႃးလႄႈမုဝ်းသေႇၵေႃႈႁွင်ႉႁိၵ်ႈၸိုဝ်မၼ်းဝႃႈၵေႇရသုၼ်ႇဢေႃႈ။လွင်ႈမၼ်းၸမ်းမၼ်းဝႃႈ၊-ၵဝ်လႆႈပဵၼ်ၶႅၵ်ႇဢႃႇၵၼ်ႇတူႉတၢင်ႇတီႈတၢင်ႇမိူင်းယဝ်ႉ၊ဝႃႈၼင်ႇၼႆဢေႃႈ။
၂၃ ၶိင်ႇၵႃႇလႃႉမိုဝ်ႉဝၼ်းႁိုင်တၢၼ်ႇတၢၼ်ႇယဝ်ႉၸင်ႇၶုၼ်ႁေႃၶမ်းၼွၼ်းၽေးၵႂႃႇသေဢေႃႈ။ၵူၼ်းမဵဝ်းဢိသရေႇလတင်းလၢႆၵေႃႈဢွၼ်ၵၼ်ပွင်ႉၶင်းယူႇၵွပ်ႈပိူဝ်ႈဢၼ်ၶဝ်လႆႈၶၢမ်ႇႁဵတ်းၶႃႈၼၼ်ႉဢေႃႈ။
၂၄ ၶဝ်ဢွၼ်ၵၼ်ႁွင်ႉသႅၼ်ႇႁွင်ႉႁႆႈလႄႈသဵင်ဢၼ်ၶဝ်ႁွင်ႉသႅၼ်ႇႁွင်ႉႁႆႈၵွပ်ႈပိူဝ်ႈတၢင်းဢၼ်ၶဝ်လႆႈၶၢမ်ႇႁဵတ်းၶႃႈၼၼ်ႉၶိုၼ်ႈၵႂႃႇႁွတ်ႈထိုင်ၵႃႈတီႈၽြႃးပဵၼ်ၸဝ်ႈဢေႃႈ။
၂၅ ၽြႃးပဵၼ်ၸဝ်ႈငိၼ်းသဵင်ဢၼ်ၶဝ်ပွင်ႉၶင်းယူႇၼၼ်ႉလႄႈၶုၵ်းၸႂ်လႆႈၶႆႈၸႂ်ထူပ်းပတိၺိၼ်ႇဢၼ်လႆႈႁဵတ်းမႃးလူၺ်ႈၵၼ်တင်းဢႃႇပြႁမ်ႇ၊ဢိၸၢၵ်ႉ၊ယႃႇၵုပ်ႉၶဝ်ၸိူဝ်းၼၼ်ႉသေယဝ်ႉၽြႃးပဵၼ်ၸဝ်ႈၵေႃႈလူႈတူၺ်းၵူၼ်းမဵဝ်းဢိသရေႇလၸိူဝ်းၼၼ်ႉလႄႈႁူႉလွင်ႈၶဝ်ဢေႃႈ။