Chapter
၃၈
ယိၸ်ႉပလၢင်ႇယိၸ်ႉဢၼ်တုတ်ႇၽႆး
၁ ၼႄးၼိုင်ႈၸမ်းၶဝ်ဢဝ်မႆႉဢၵႃႇသႁဵတ်းယိၸ်ႉပလၢင်ႇတီႈဢၼ်တၵ်းတုတ်ႇၽႆးဢၼ်ၼႃႈယၢဝ်းမၼ်းမီးႁႃႈသွၵ်ႇၼႃႈပွတ်းမၼ်းႁႃႈသွၵ်ႇလႄႈပဵၼ်သီႇၸဵင်ႇၶိုင်ႈဝႆႉၼၼ်ႉဢေႃႈ။ဢၼ်သုင်မၼ်းၵေႃႈမီးသၢမ်သွၵ်ႇဢေႃႈ။
၂ ၶဝ်ႁဵတ်းၶဝ်လႅမ်သီႇလႅမ်ႈသႂ်ႇၵႃႈၼိူဝ်သီႇၸဵင်ႇမၼ်းဢေႃႈ။ၶဝ်လႅမ်ၸိူဝ်းၼၼ်ႉပဵၼ်ၼိူဝ်ႉလဵဝ်ၵၼ်တင်းမၼ်းလႄႈဢဝ်တွင်းလိူင်ဢုမ်ႇႁေႃႇသေဢေႃႈ။
၃ ၶဝ်ဢဝ်တွင်းလိူင်ႁဵတ်းၶိူင်ႈပိူင်ၵႃႈဢၼ်ၸၢပ်ႈသႅင်ႇၵၼ်တင်းယိၸ်ႉပလၢင်ႇတင်းသဵင်ႈတင်းလူင်ဢၼ်ဝႃႈမေႃႈမၼ်းၸေႃႉၽႅပ်ႉမၼ်း၊ဝၢၼ်ႇမၼ်း၊ၶေႃဢၼ်ၵွင်ႉၼိူဝ်ႉမၼ်းလႂ်၊လၢင်ႇပၢၼ်းမၼ်းလႂ်ၼၼ်ႉဢေႃႈ။
၄ ၶဝ်ႁဵတ်းတႃႇၶႃႇတွင်းလိူင်ပုၼ်ႈယိၸ်ႉပလၢင်ႇၼၼ်ႉလႄႈဝႆႉၵႃႈတႂ်ႈၶႃႇပၢၼ်းမၼ်းႁႂ်ႈၶိုတ်းထိုင်ၵႃႈတီႈၶိုင်ႈၵၢင်မၼ်းလႄႈ
၅ ဢဝ်တင်းတွင်းလိူင်လေႃႇႁဵတ်းၶူၺ်ႇသီႇၶူၺ်ႇသႂ်ႇၵႃႈတီႈသီႇၸဵင်ႇတႃႇၶႃႇၼၼ်ႉဝႆႉပုၼ်ႈတီႈဢၼ်တၵ်းသွတ်ႇၵၢၼ်းဢေႃႈ။
၆ ၶဝ်ဢဝ်မႆႉဢၵႃႇသႁဵတ်းၵၢၼ်းႁၢပ်ႇလႄႈဢဝ်တွင်းလိူင်ဢုမ်ႇႁေႃႇသေယဝ်ႉဢဝ်ၵၢၼ်းႁၢပ်ႇၸိူဝ်းၼၼ်ႉသွတ်ႇသႂ်ႇဝႆႉၵႃႈၼႂ်းၶူၺ်ႇၵႃႈတီႈသွင်ၽၢၵ်ႇယိၸ်ႉပလၢင်ႇလႄႈပဵၼ်ပုၼ်ႈဢၼ်တၵ်းႁၢပ်ႇမၼ်းဢေႃႈ။
၇ ၶဝ်ဢဝ်ပႅၼ်ႈႁဵတ်းမၼ်းႁႂ်ႈၵႃႈၼႂ်းမၼ်းပွင်ႇပဵၼ်ပဵဝ်ဝႆႉဢေႃႈ။
ၵွၵ်းပုၼ်ႈဢၼ်သုၵ်ႈ
၈ ၶဝ်ဢဝ်မၢၼ်ႇၸမ်ႈတွင်းလိူင်ဢၼ်မေႈယိင်းၶဝ်ဢဝ်မႃးၸူႉၵၼ်တုမ်ၵၼ်ၵႃႈတီႈၽၢႆႇၼႃႈၽၵ်းတူသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၸိူဝ်းၼၼ်ႉလႄႈႁဵတ်းၵွၵ်းတွင်းလိူင်လူင်တင်းတိၼ်တွင်းလိူင်မၼ်းဢေႃႈ။
ႁူဝ်ႉဝၢင်း
၉ ဢၼ်တၵ်းၵင်ႈႁဵတ်းႁူဝ်ႉဝၢင်းသုမ်ႉထဵင်ၸဝ်ႈၸမ်းၶဝ်ဢဝ်ပိၵ်ႈၶျေႃးဢၼ်ၼႃႈယၢဝ်းမၼ်းမီးပၢၵ်ႇသွၵ်ႇၼၼ်ႉႁဵတ်းၽႃႈၵင်ႈပုၼ်ႈၼႃႈတၢင်းၸၢၼ်းဢေႃႈ။
၁၀ ပုၼ်ႈၽႃႈၵင်ႈၼၼ်ႉၶဝ်ႁဵတ်းသဝ်သၢဝ်းၼိုင်ႈတင်းတီႈသုပ်းတိၼ်တွင်းလိူင်သၢဝ်းၼိုင်ႈဢေႃႈ။တႅမ်တီႈသဝ်ဢိၵ်ႇတင်းႁၢဝ်းၸိူဝ်းၼၼ်ႉပဵၼ်ငိုၼ်းဢေႃႈ။
၁၁ ပုၼ်ႈၼႃႈတၢင်းႁွင်ႇၵေႃႈမီးၽႃႈၵင်ႈဢၼ်ၼႃႈယၢဝ်းမၼ်းမီးပၢၵ်ႇသွၵ်ႇဢိၵ်ႇတင်းသဝ်သၢဝ်းၼိုင်ႈတီႈသုပ်းတိၼ်တွင်းလိူင်သၢဝ်းၼိုင်ႈတႅမ်ငိုၼ်းတီႈသဝ်ဢိၵ်ႇတင်းႁၢဝ်းငိုၼ်းၸိူဝ်းၼၼ်ႉဢေႃႈ။
၁၂ ပုၼ်ႈၼႃႈပွတ်းၽၢႆႇတၢင်းဝၼ်းတူၵ်းမီးၽႃႈၵင်ႈဢၼ်ၼႃႈယၢဝ်းမၼ်းမီးႁႃႈသိပ်းသွၵ်ႇဢိၵ်ႇတင်းသဝ်သိပ်းၼိုင်ႈတီႈသုပ်းတိၼ်သိပ်းၼိုင်ႈတႅမ်ငိုၼ်းတီႈသဝ်ဢိၵ်ႇတင်းႁၢဝ်းငိုၼ်းၸိူဝ်းၼၼ်ႉဢေႃႈ။
၁၃ ပုၼ်ႈၼႃႈၽၢႆႇတၢင်းဝၼ်းဢွၵ်ႇၵေႃႈၼႃႈပွတ်းမၼ်းမီးႁႃႈသိပ်းသွၵ်ႇဢေႃႈ။
၁၄ ပုၼ်ႈဢၼ်တၵ်းၵင်ႈႁိမ်းၽၵ်းတူၽၢႆႇၼိုင်ႈၼၼ်ႉမီးၽႃႈၵင်ႈဢၼ်ၼႃႈယၢဝ်းမၼ်းမီးသိပ်းႁႃႈသွၵ်ႇဢိၵ်ႇတင်းသဝ်သၢမ်လႅမ်ႈတင်းတီႈသုပ်းတိၼ်သၢမ်ဢၼ်ဢေႃႈ။
၁၅ ပုၼ်ႈႁိမ်းၽၵ်းတူၽၢႆႇၼိုင်ႈၵေႃႈမီးၽႃႈၵင်ႈဢၼ်ၼႃႈယၢဝ်းမၼ်းမီးသိပ်းႁႃႈသွၵ်ႇဢိၵ်ႇတင်းသဝ်သၢမ်လႅမ်ႈတင်းတီႈသုပ်းတိၼ်သၢမ်ဢၼ်ဢေႃႈ။
၁၆ ၽႃႈၵင်ႈဢၼ်ၵင်ႈႁဵတ်းႁူဝ်ႉဝၢင်းၼၼ်ႉၵႃႈမီးတင်းသဵင်ႈတင်းလူင်ပဵၼ်ပိၵ်ႈၶျေႃးဢေႃႈ။
၁၇ သဝ်ၸိူဝ်းၼၼ်ႉတဵမ်ဝႆႉတင်းတီႈသုပ်းတိၼ်တွင်းလိူင်လႂ်၊တႅမ်ငိုၼ်းလႂ်လႄႈဝၢၼ်ႇဢၼ်ၶၢမ်ႇႁူဝ်သဝ်ၸိူဝ်းၼၼ်ႉၵေႃႈဢဝ်တင်းငိုၼ်းဢုမ်ႇႁေႃႇသေဢေႃႈ။ႁၢဝ်းသဝ်ဝၢင်းၵႃႈမီးတင်းသဵင်ႈတင်းလူင်ၼၼ်ႉပဵၼ်ႁၢဝ်းငိုၼ်းဢေႃႈ။
၁၈ ၽႃႈၵင်ႈပုၼ်ႈဢၼ်တၵ်းၵင်ႈၽၵ်းတူႁူဝ်ႉဝၢင်းၼၼ်ႉပဵၼ်ၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊတင်းပိၵ်ႈၶျေႃးဢၼ်တမ်ႇၵၢမ်းၵၼ်ႁၢင်ႈၶိူင်ႈတေႃးႁဵတ်းၼၼ်ႉလႄႈၼႃႈယၢဝ်းမၼ်းမီးသၢဝ်းသွၵ်ႇဢၼ်သုင်ၼႂ်းၼႃႈပွတ်းမၼ်းႁႃႈသွၵ်ႇလႄႈပဵၼ်ၼႄးလဵဝ်ၵၼ်တင်းၽႃႈၵင်ႈဢၼ်ၵင်ႈႁူဝ်ႉဝၢင်းၼၼ်ႉဢေႃႈ။
၁၉ သဝ်ၽၵ်းတူႁူဝ်ႉဝၢင်းမီးသီႇလႅမ်ႈလႄႈတဵမ်ဝႆႉတင်းတီႈသုပ်းတိၼ်တွင်းလိူင်သီႇဢၼ်တင်းတႅမ်ငိုၼ်းမၼ်းတင်းႁၢဝ်းမၼ်းတင်းဝၢၼ်ႇဢၼ်ၶၢမ်ႇႁူဝ်သဝ်မၼ်းဢၼ်ဢဝ်တင်းငိုၼ်းဢုမ်ႇႁေႃႇၼၼ်ႉဢေႃႈ။
၂၀ လၵ်းသုမ်ႉထဵင်ၸဝ်ႈၵႃႈမီးတင်းသဵင်ႈတင်းလူင်ဢိၵ်ႇတင်းလၵ်းဢၼ်ပၵ်းၸွမ်းႁိမ်းႁူဝ်ႉဝၢင်းမၼ်းၵႃႈမီးတင်းသဵင်ႈတင်းလူင်ပဵၼ်တွင်းလိူင်ဢေႃႈ။
ၶိူင်ႈဢၼ်သုင်းတိုဝ်း
၂၁ ဢၼ်ၼပ်ႉဢၼ်ဢၢၼ်ႇၼႆႉၸမ်းပဵၼ်ၸရၢင်းသုမ်ႉထဵင်ၸဝ်ႈဢၼ်ဝႃႈသုမ်ႉထဵင်ၸဝ်ႈၶိူင်ႈဢၼ်ၶၢမ်ႇသၢၵ်ႈသေႇဢၼ်မႅၼ်ႈၸွမ်းၼင်ႇဢၼ်ဢိသမႃႇလုၵ်ႈၸၢႆးယိတ်ႉပရေႃးႁိၵ်ႈဢႃႇရုၼ်ႇဢဝ်ၶိူင်ႈပိူင်ပုၼ်ႈဢၼ်ၵူၼ်းမဵဝ်းလေႇဝိၶဝ်တၵ်းပွင်ႁဵတ်းဢမူႉၸဝ်ႈၸိူဝ်းၼၼ်ႉၼပ်ႉဢၢၼ်ႇၸွမ်းၵႃႈၼင်ႇဢၼ်မုဝ်းသေႇၸီႇယၢင်ႇဝႆႉၼၼ်ႉဢေႃႈ။
၂၂ ၵႃႈဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇၼၼ်ႉၸိုင်ပေႇၸလေႇလလုၵ်ႈၸၢႆးဢုရိဢၼ်ပဵၼ်လုၵ်ႈၸၢႆးႁုရၵႃႇၼႂ်းၸိူဝ်ႉၶိူဝ်းယုတၼၼ်ႉႁဵတ်းဢေႃႈ။
၂၃ လိူဝ်သေၼၼ်ႉဢႁေႃႇလျႃႇၽလုၵ်ႈၸၢႆးဢႁိသမၵ်ႉၵႃႈၼႂ်းၸိူဝ်ႉၶိူဝ်းတၼ်ႇဢၼ်ၸၢင်ႊႁဵတ်းတၢင်းႁဵတ်းဢၼ်မေႃတွင်ႈမေႃၶႅၵ်း၊တၢင်းႁဵတ်းဢၼ်ၸၢင်ႊၵျၢမ်ႇႁဵတ်းဢၼ်လၢၵ်ႇလၢၵ်ႇလၢႆးလၢႆး၊တၢင်းႁဵတ်းဢၼ်ၸၢင်ႊဢဝ်ၶူဝ်းဢၼ်သွမ်ႇၶူဝ်းဢၼ်ၵမ်ႇ၊ၶူဝ်းဢၼ်လႅင်ႊ၊ပိၵ်ႈၶျေႃးတမ်ႇၵၢမ်းၵၼ်ႁၢင်ႈၶိူင်ႈတေႃးႁဵတ်းၸိူဝ်းၼၼ်ႉၵေႃႈမီးလူၺ်ႈၵၼ်တင်းမၼ်းဢေႃႈ။
၂၄ ၶၼ်ၶမ်းဢၼ်ဢဝ်ႁႂ်ႈလႆႈႁဵတ်းထႃႇၼႃႉတီႈမူတ်းၸၢင်ႇႁႂ်ႈယဝ်ႉတူဝ်ႈဢၼ်ဝႃႈၶမ်းဢၼ်ဢဝ်လူႇဢဝ်တၢၼ်းၼၼ်ႉၸမ်းၸွမ်းလူၺ်ႈၼမ်ႉၼၵ်းငိုၼ်းၸဝ်ႈၵျၢပ်ႈသၶေႇလၼၼ်ႉမီးသၢဝ်းပၢႆၵဝ်ႈတလၢၼ်ႇတၢၼ်ႇတင်းၵျၢပ်ႈသၶေႇလၸဵတ်းပၢၵ်ႇပၢႆႇသၢမ်သိပ်းၵျၢပ်ႈဢေႃႈ။
၂၅ ငိုၼ်းဢၼ်ပရိၵ်ႈသၢတ်ႈဢၼ်ၶဝ်ႈပႃးၼႂ်းၸႃႈရၢင်းၸိူဝ်းၼၼ်ႉပၼ်ၼၼ်ႉပဵၼ်ပၢၵ်ႇတလၢၼ်ႇတၢၼ်ႇတင်းၵျၢပ်ႈသၶေႇလႁဵင်းၼိုင်ႈပၢႆၸဵတ်းပၢၵ်ႇၸဵတ်းသိပ်းပၢႆႁႃႈၵျၢပ်ႈဢေႃႈ။
၂၆ ၶဝ်ၸိူဝ်းဢၼ်ၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးၼႂ်းၸရၢင်းၵူႈၵေႃႉဢၼ်ၸႃႉၸဵမ်ဢသၢၵ်ႈလႆႈသၢဝ်းၼိုင်ႈလႄႈဢသၢၵ်ႈလိူဝ်သၢဝ်းၵႂႃႇၵႃႈမီးတင်းသဵင်ႈတင်းလူင်ဢၼ်မီးၵူၼ်းႁူၵ်းသႅၼ်သၢမ်ႁဵင်ႁႃႈပၢၵ်ႇပၢႆႁႃႈသိပ်းၸိူဝ်းၼၼ်ႉၸွမ်းလူၺ်ႈၼမ်ႉၼၵ်းငိုၼ်းၸဝ်ႈၵျၢပ်ႈသၶေႇလၼၼ်ႉလႄႈဢွၼ်ၵၼ်ပၼ်ယေႈၵေႃႉယေႈၽေႇၵႃႇဢၼ်ဝႃႈၶိုင်ႈၵျၢပ်ႈၼိုင်ႈဢေႃႈ။
၂၇ ငိုၼ်းပၢၵ်ႇတလၢၼ်ႇတၢၼ်ႇၼၼ်ႉပဵၼ်ပုၼ်ႈဢၼ်တၵ်းလေႃႇႁဵတ်းတီႈသုပ်းတိၼ်ထႃႇၼႃႉတီႈမူတ်းၸၢင်ႇဢိၵ်ႇတင်းတီႈသုပ်းတိၼ်ၽႃႈၵင်ႈၵႃႈၼႂ်းဢၼ်ဝႃႈဢဝ်ငိုၼ်းပၢၵ်ႇတလၢၼ်ႇတၢၼ်ႇႁဵတ်းတီႈသုပ်းတိၼ်ပၢၵ်ႇၼိုင်ႈၼၼ်ႉယေႈဢၼ်ယေႈတလၢၼ်ႇတၢၼ်ႇဢေႃႈ။
၂၈ ၶဝ်ဢဝ်ငိုၼ်းဢၼ်ၵိုတ်းဢၼ်ၵျၢၼ်ႇႁဵင်ၼိုင်ႈၸဵတ်းပၢၵ်ႇပၢႆၸဵတ်းသိပ်းႁႃႈၵျၢပ်ႈၼၼ်ႉႁဵတ်းတႅမ်သဝ်လႂ်၊တင်းႁၢဝ်းသဝ်လႂ်ဢုမ်ႇႁေႃႇဝၢၼ်ႇဢၼ်ၶၢမ်ႇႁူဝ်သဝ်လႂ်ဢေႃႈ။
၂၉ ၶၼ်ၸင်ႊတွင်းလိူင်ဢၼ်လူႇဢၼ်တၢၼ်းၼၼ်ႉမီးၸဵတ်းသိပ်းတလၢၼ်ႇတၢၼ်ႇတင်းၵျၢပ်ႈသၶေႇလသွင်ႁဵင်ပၢႆသီႇပၢၵ်ႇၵျၢပ်ႈဢေႃႈ။
၃၀ ၶဝ်ဢဝ်တွင်းလိူင်ႁဵတ်းတီႈသုပ်းတိၼ်ၽၵ်းတူသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈယိၸ်ႉပလၢင်ႇတွင်းလိူင်၊တႃႇၶႃႇတွင်းလိူင်၊ၶိူင်ႈပိူင်ယိၸ်ႉပလၢင်ႇၼၼ်ႉၵႃႈမီးတင်းသဵင်ႈတင်းလူင်၊
၃၁ ဢိၵ်ႇတင်းတီႈသုပ်းတိၼ်ႁူဝ်ႉဝၢင်းဢၼ်ၵင်ႈလႂ်တီႈသုပ်းတိၼ်ၽၵ်းတူႁူဝ်ႉဝၢင်းလႂ်လၵ်းသုမ်ႉထဵင်ၸဝ်ႈလႂ်လၵ်းဢၼ်ပၵ်းလွမ်ႉႁွပ်ႈႁူဝ်ႉဝၢင်းလႂ်ၵႃႈမီးတင်းသဵင်ႈတင်းလူင်ဢေႃႈ။