Chapter
၁၉
ၼိူဝ်လွႆသိၼႃႇ
၁ ၵူၼ်းမဵဝ်းဢိသရေႇလၸိူဝ်းၼၼ်ႉလိုၼ်းသေၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုၵႂႃႇယဝ်ႉလိူၼ်တတိယလႆႈဝၼ်းၼိုင်ႈၶဝ်ႁွတ်ႈထိုင်ၵႃႈတီႈထိူၼ်ႇသိၼႃႇဢေႃႈ။
၂ ၶဝ်ဢွၵ်ႇသေၵႃႈတီႈရေႇၽိတိမ်ႇၼၼ်ႉၵႂႃႇသေယဝ်ႉႁွတ်ႈထိုင်ၵႃႈတီႈထိူၼ်ႇသိၼႃႇလႄႈၶျႃးတပ်ႉၵႃႈတီႈထိူၼ်ႇၼၼ်ႉဢေႃႈ။ၵႃႈတီႈၼၼ်ႉၵူၼ်းမဵဝ်းဢိသရေႇလတင်းလၢႆၶျႃးတပ်ႉၶဝ်ၵႃႈတီႈၽၢႆႇၼႃႈလွႆဢေႃႈ။
၃ မုဝ်းသေႇၶိုၼ်ႈၸူးၵႃႈတီႈၽြႃးပဵၼ်ၸဝ်ႈလႄႈထႃႇဝရႃႉၽြႃးယူႇၵႃႈၼႂ်းလွႆၼၼ်ႉသေလႄႈႁွင်ႉမၼ်းလႄႈဝႃႈ၊-ဢမိင်ႉၸဝ်ႈဢၼ်မႂ်းတၵ်းလႆႈၶိုၼ်းလၢတ်ႈတီႈၸိူဝ်ႉၶိူဝ်းယႃႇၵုပ်ႉမွၵ်ႇလၢတ်ႈတီႈၵူၼ်းမဵဝ်းဢိသရေႇလၸိူဝ်းၼၼ်ႉလႄႈဝႃႈၸမ်း၊-
၄ သူလႆႈႁူႉလႆႈႁၼ်လွင်ႈဢၼ်ၵဝ်ႁဵတ်းတီႈၵူၼ်းဢေႇၵႅပ်ႉတုၸိူဝ်းၼၼ်ႉဢိၵ်ႇတင်းလွင်ႈဢၼ်ၵဝ်ဢဝ်တင်းပိၵ်ႇၶၢင်လေႃႇႁၢပ်ႇဢဝ်သူလႄႈဢဝ်မႃးတီႈၵဝ်ၼၼ်ႉယဝ်ႉ။
၅ ပိူဝ်ႈၼႆလႄႈတေႃႈလဵဝ်ၼႆႉပေႃးသူတၵ်းဢဝ်ၵႂၢမ်းၵဝ်ဢမၢၼ်ႇၶၢၼ်ပဵၼ်လႄႈပႂ်ႉၵမ်ပႂ်ႉၸွမ်းပတိၺိၼ်ႇၵဝ်ၸိုင်သူတၵ်းလႆႈပဵၼ်ၽၼ်ႇတႃႇဢၼ်ၵဝ်ထိူၵ်ႈပိူင်ႇလိူဝ်တွၼ်းသမေဵဝ်းၵူၼ်းတၢင်ႇတီႈတၢင်ႇလႅၼ်ၵူႈၸိူဝ်ႉၵူႈၶိူဝ်းဢေႃႈ။လိၼ်မိူင်းၵႃႈမီးတင်းသဵင်ႈတင်းလူင်ၼႆႉပဵၼ်ဢုၵ်ႉၸႃႇၵဝ်ဢေႃႈ။
၆ သူၵေႃႈတၵ်းလႆႈပဵၼ်မဵဝ်းယိတ်ႉပရေႃးႁိၵ်ႈဢၼ်မီးၸေးၸိမ်ႇၶုၼ်မဵဝ်းၵူၼ်းဢၼ်မူတ်းၸၢင်ႇတီႈၵဝ်ဢေႃႈ။ၵႂၢမ်းဢၼ်ဝႃႈၸိူဝ်ႉၼင်ႇၼႆၼၼ်ႉၸိုင်ပဵၼ်ၵႂၢမ်းဢၼ်မႂ်းတၵ်းလႆႈသင်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆဢေႃႈ၊ဝႃႈၼင်ႇၼႆဢေႃႈ။
၇ ၵမ်းၼၼ်ႉမုဝ်းသေႇၶိုၼ်းမႃးလႄႈႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းတင်းလၢႆၸိူဝ်းၼၼ်ႉသေယဝ်ႉၶိုၼ်းမွၵ်ႇလၢတ်ႈၵႂၢမ်းဢၼ်ထႃႇဝရႃႉၽြႃးသင်ႇလၢတ်ႈဝႆႉတင်းသဵင်းတင်းလူင်ၼၼ်ႉၵႃႈတီႈၽၢႆႇၼႃႈၶဝ်ဢေႃႈ။
၈ ၵူၼ်းတင်းသဵင်ႈတင်းလူင်ၵေႃႈၽွမ်ႉၵၼ်ၶိုၼ်းလၢတ်ႈလႄႈဝႃႈ၊-ႁဝ်းၶႃႈတၵ်းဢွၼ်ၵၼ်ႁဵတ်းၸွမ်းၵႃႈဢၼ်ထႃႇဝရႃႉၽြႃးမီးဢမိင်ႉၼၼ်ႉၶႃႈဢေႃႈဝႃႈၼင်ႇၼႆဢေႃႈ။မုဝ်းသေႇၵေႃႈဢဝ်ၵႂၢမ်းၵူၼ်းၸိူဝ်းၼၼ်ႉၶို်ၼ်းလၢတ်ႈတီႈထႃႇဝရႃႉၽြႃးဢေႃႈ။
၉ ထႃႇဝရႃႉၽြႃးလၢတ်ႈတီႈမုဝ်းသေႇလႄႈဝႃႈ၊-တူၺ်းလူႊၵဝ်တၵ်းယူႇၼႂ်းမွၵ်ႇၵုမ်ႈဢၼ်လပ်းသိင်ႇၽိတ်းၽိတ်းၼၼ်ႉမႃးတီႈမႂ်းလၢတ်ႈၵႂၢမ်းတေႃႇၵၼ်တင်းမႂ်းလႄႈႁႂ်ႈၵူၼ်းတင်းလၢႆလႆႈငိၼ်းသေယဝ်ႉယုမ်ႇမႂ်းဢေႃႈ၊ဝႃႈၼင်ႇၼႆဢေႃႈ။မုဝ်းသေႇၵေႃႈဢဝ်ၵႂၢမ်းထႃႇဝရႃႉၽြႃးၼၼ်ႉၶိုၼ်းမွၵ်ႇလၢတ်ႈတီႈၵူၼ်းတင်းလၢႆဢေႃႈ။
၁၀ ထႃႇဝရႃႉၽြႃးၵေႃႈမီးဢမိင်ႉတီႈမုဝ်းသေႇလႄႈဝႃႈ၊-ၵႂႃႇတီႈဢၼ်ၵူၼ်းတင်းလၢႆမီးၼၼ်ႉလႄႈႁႂ်ႈၶဝ်မူတ်းၸၢင်ႇၼႂ်းဝၼ်းမိူဝ်ႈၼႆႉဢိၵ်ႇတင်းဝၼ်းမိူဝ်ႈၽုၵ်ႈတႃႉ။
၁၁ ႁႂ်ႈၶဝ်သၵ်ႉလွႆးၶူဝ်းၼုင်ႈၶဝ်လႄႈမႄးႁဵတ်းမႄးႁႅၼ်းႁႂ်ႈမီးဝႆႉၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉတႃႉ။လွင်ႈမၼ်းၸမ်းၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉထႃႇဝရႃႉၽြႃးတၵ်းလူင်းမႃးၵႃႈၼိူဝ်လွႆသိၼႃႇသိုဝ်ႈၼႃႈတႂ်ႈတႃၵူၼ်းတင်းသဵင်ႈတင်းလူင်ဢေႃႈ။
၁၂ မႂ်းတၵ်းလႆႈၸီႇယၢင်ႇႁႄႉၶႅၼ်ဝႆႉယႃႇႁႂ်ႈၵူၼ်းတင်းလၢႆၶၢမ်ႈၵႂႃႇၸူးၵႃႈၼိူဝ်လွႆ။သင်ႇလၢတ်ႈတီႈၶဝ်လႄႈဝႃႈ၊-သူဢွၼ်ၵၼ်ႁဵတ်းသတိယႃႇပေၶိုၼ်ႈၵႂႃႇၵႃႈၼိူဝ်လွႆ၊ယႃႇပတေိူဝ်ႉထုၵ်ႇတိၼ်လွႆ၊ဝႃႈၼင်ႇၼႆတႃႉ။ၽူႈလႂ်သေဢမ်ႇဝႃႈၵေႃႉဢၼ်တိူဝ်ႉထုၵ်ႇလွႆၼၼ်ႉတၵ်းလႆႈၶၢမ်ႇတၢင်းတၢႆဢမၢၼ်ႇၶၢၼ်ပဵၼ်ဢေႃႈ။
၁၃ တၵ်းဢမ်ႇလႆႈဢဝ်တင်းမိုဝ်းလႄႈဢဝ်တၢႆ။တၵ်းလႆႈဢဝ်မၢၵ်ႇႁိၼ်ထႅမ်ႈမၼ်းတၢႆဢမ်ႇၼၼ်ၵေႃႈတၵ်းလႆႈဢဝ်တင်းႁွၵ်ႇတႅင်းတၢႆဢမၢၼ်ႇၶၢၼ်ပဵၼ်ဢေႃႈ။ပဵၼ်ၵူၼ်းသေဢမ်ႇဝႃႈ၊ပဵၼ်တရိၵ်ႈသၢၼ်ႇသေဢမ်ႇဝႃႈတေဢမ်ႇလႆႈဢသၢၵ်ႈလိပ်း။မိူဝ်ႈဢၼ်သဵင်ၼႄးၶရႃႇမေႃးလင်ႊယဝ်ႉႁိူင်တၢၼ်ႇတၢၼ်ႇယဝ်ႉၸင်ႇၶဝ်တၵ်းလႆႈဢွၼ်ၵၼ်ၶိုၼ်ႈၵႃႈၼိူဝ်လွႆဢေႃႈ၊ဝႃႈၼင်ႇၼႆဢေႃႈ။
၁၄ မုဝ်းသေႇလူင်းသေၵႃႈၼိူဝ်လွႆၵႂႃႇၸူးၵႃႈတီႈဢၼ်ၵူၼ်းတင်းလၢႆသေယဝ်ႉႁႂ်ႈၶဝ်မူတ်းၸၢင်ႇဢေႃႈ။ၶဝ်ၼၼ်ႉၵေႃႈဢွၼ်ၵၼ်သၵ်ႉလွႆးၶူဝ်းၼုင်ႈၶဝ်ဢေႃႈ။
၁၅ မၼ်းၵေႃႈလၢတ်ႈတီႈၵူၼ်းတင်းလၢႆၼၼ်ႉလႄႈဝႃႈ၊-ဢွၼ်ၵၼ်မႄးႁဵတ်းမႄးႁႅၼ်းႁႂ်ႈမီးဝႆႉၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉတႃႉ။ယႃႇပေၵႃႇမႃႉသိူၵ်ႈသမ်ႇၵၼ်တင်းမေးသူ၊ဝႃႈၼင်ႇၼႆဢေႃႈ။
၁၆ ၶိင်ႇၵၢင်ၼႂ်ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉမီးတင်းဢၼႃ်ႉလင်ဢိၵ်ႇတငႃ်းႉမႅပ်ႈတင်းမွၵ်ႇၵုမ်ႈဢၼ်လပ်းသိင်ႇၽိတ်းၽိတ်းၵႃႈၼိူဝ်လွႆတင်းသဵင်ၼႄးၶရႃႇဢၼ်မေႃးလင်ႊယႂ်ႇၼႃႇၼၼ်ႉလႄႈၵူၼ်းၵႃႈဢၼ်မီးၵႃႈၼႂ်းတပ်ႉတင်းသဵင်ႈတင်းလူင်ၵူဝ်သၼ်ႇယူႇဢေႃႈ။
၁၇ မုဝ်းသေႇၵေႃႈဢဝ်ၵူၼ်းတင်းလၢႆဢွၵ်ႇသေၵႃႈၼႂ်းတပ်ႉႁႂ်ႈၶဝ်ထူပ်းၵၼ်တင်းၽြႃးပဵၼ်ၸဝ်ႈလႄႈၶဝ်ၼၼ်ႉဢွၼ်ၵၼ်ၸုၵ်းယူႇၵႃႈတႂ်ႈတိၼ်လွႆဢေႃႈ။
၁၈ ၵွပ်ႈပိူဝ်ႈဢၼ်ထႃႇဝရႃႉၽြႃးပႃးတင်းၽႆးလူင်းမႃးၵႃႈၼိူဝ်လွႆသိၼႃႇလႄႈလွႆတင်းလွႆဢွၵ်ႇၵွၼ်းၽႆးယူႇဢေႃႈ။ၵႂၼ်းၽႆးၼၼ်ႉၵေႃႈၶိုၼ်ႈယူႇမိူၼ်ၸိူဝ်ႉၼင်ႇၵွၼ်းၽႆးၵႃႈတီႈမုၵ်ႉၽႆးလႄႈလွႆတင်းလွႆသၼ်ႇၶွၼ်းဝႆႉၼႃႇလူင်လၢင်ယူႇဢေႃႈ။
၁၉ မိူဝ်ႈဢၼ်သဵင်ၼႄးၶရႃႇမေႃးလင်ႊႁိုင်ၼႃႇလႄႈသဵင်ယိင်ႈၶႅၼ်းယႂ်ႇမႃးယူႇၼၼ်ႉၸိုင်မုဝ်းသေႇႁွင်ႉလႄႈၽြႃးပဵၼ်ၸဝ်ႈဢဝ်တင်းသဵင်ၵႂၢမ်းဢိူဝ်ႈဢေႃႈ။
၂၀ ထႃႇဝရႃႉၽြႃးလူင်းမႃးၵႃႈၼိူဝ်လွႆသိၼႃႇၵႃႈတီႈၼိူဝ်ပၢႆၸိၵ်းလွႆႇၼၼ်ႉသေလႄႈထႃႇဝရႃႉၽြႃးႁွင်ႉဢဝ်မုဝ်းသေႇၶိုၼ်ႈၵႃႈၼိူဝ်ပၢႆၸိၵ်းလွႆၼၼ်ႉလႄႈမုဝ်းသေႇၵေႃႈၶိုၼ်ႈၸူးဢေႃႈ။
၂၁ ထႃႇဝရႃႉၽြႃးၵေႃႈမီးဢမိင်ႉတီႈမုဝ်းသေႇလႄႈဝႃႈ၊-ၵူဝ်ၵူၼ်းတင်းလၢႆတၵ်းၶၢမ်ႈၶဝ်ႈမႃးၸူးၵႃႈတီႈထႃႇဝရႃႉၽြႃးႁႂ်ႈလႆႈလူႈတူၺ်းလႄႈၵူၼ်းၼမ်ၼႃႇတၵ်းတၢႆၼၼ်ႉလႄႈလူင်းၵႂႃႇပၼ်သတိၶဝ်တႃႉ။
၂၂ ယိတ်ႉပရေႃးႁိၵ်ႈဢၼ်သုတ်ႉၸပ်းသုတ်ႉၸူးၵႃႈတီႈထႃႇဝရႃႉၽြႃးၸိူဝ်းၼၼ်ႉၵေႃႈတၵ်းလႆႈႁႂ်ႈတူဝ်ၸဝ်ႈၵဝ်ႇမူတ်းၸၢင်ႇဢေႃႈ။ပေႃးဢမ်ႇၼၼ်ထႃႇဝရႃႉၽြႃးတၵ်းပၼ်တၢမ်ႇတီႈၶဝ်ဢေႃႈ၊ဝႃႈၼင်ႇၼႆဢေႃႈ။
၂၃ မုဝ်းသေႇၵေႃႈၶိုၼ်းလဝ်ႈလၢတ်ႈတီႈထႃႇဝရႃႉၽြႃးလႄႈဝႃႈ၊-ၵူၼ်းတင်းလၢႆဢမ်ႇၶိုၼ်ႈၵႃႈၼိူဝ်လွႆသိၼႃႇလႆႈတီႈၶႃႈ။လွင်ႈမၼ်းၸမ်းၸဝ်ႈႁဝ်းသင်ႇလၢတ်ႈဝႆႉႁႂ်ႈႁဵတ်းတၢင်းဢၼ်ႁႄႉဢၼ်ၶႅၼ်ဝႆႉႁွပ်ႈလွႆလႄႈႁႂ်ႈမူတ်းၸၢင်ႇတႃႉ၊ဝႃႈၼင်ႇၼႆတီႈၶႃႈယဝ်ႉ၊ဝႃႈၼင်ႇၼႆဢေႃႈ။
၂၄ ထႃႇဝရႃႉၽြႃးၵေႃႈမီးဢမိင်ႉတီႈမၼ်းလႄႈဝႃႈ၊-လူင်းၵႂႃႇလႄႈႁွင်ႉပႃးဢဝ်ဢႃႇရုၼ်ႇမႃးတႃႉ။မႂ်းဢိၵ်ႇတင်းဢႃႇရုၼ်ႇၵူၺ်းတၵ်းလႆႈၶိုၼ်ႈဢေႃႈ။ယႃႇပေႁႂ်ႈယိတ်ႉပရေႃးႁိၵ်ႈတင်းၵူၼ်းတင်းလၢႆၸိူဝ်းၼၼ်ႉၶၢမ်ႈမႃးႁႂ်ႈလႆႈၶိုၼ်ႈၸူးၵႃႈတီႈထႃႇဝရႃႉၽြႃး။ပေႃးဢမ်ႇၼၼ်မၼ်းၸဝ်ႈတၵ်းပၼ်တၢမ်ႇတီႈၶဝ်ဢေႃႈ၊ဝႃႈၼင်ႇၼႆဢေႃႈ။
၂၅ ၼင်ႇၼၼ်လႄႈမုဝ်းသေႇလူင်းၸူးၵႃႈတီႈၵူၼ်းတင်းလၢႆသေလႄႈမွၵ်ႇလၢတ်ႈတီႈၶဝ်ဢေႃႈ။