Chapter
၄၀
တႄႇတင်ႈသုမ်ႉထဵင်ၸဝ်ႈ
၁ ၵမ်းၼၼ်ႉထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈၸမ်း၊-
၂ ၼႂ်းလိူၼ်ပထမၼၼ်ႉမႂ်းတၵ်းလႆႈတႄႇႁဵတ်းသုမ်ႉထဵင်ၸဝ်ႈသုမ်ႉထဵင်တီႈၸူႉတီႈတုမ်ပရိၵ်ႈသၢတ်ႈဢေႃႈ။
၃ မႂ်းတၵ်းလႆႈဢဝ်တိူၵ်ႈၶိူင်ႈဢၼ်ၶၢမ်ႇသၢၵ်ႈသေႇသႂ်ႇဝႆႉၵႃႈၼႂ်းမၼ်းလႄႈဢဝ်တင်းၽႃႈၵင်ႈတၢင်းၼႂ်းၵင်ႈလပ်ႉတိူၵ်ႈၼၼ်ႉဝႆႉဢေႃႈ။
၄ ၶူင်ႇတီႈၵိၼ်ၵေႃႈမႂ်းတၵ်းလႆႈဢဝ်သႂ်ႇဝႆႉလႄႈမႄးႁႅၼ်းဝႆႉၵႃႈၼင်ႇဢၼ်တၵ်းလႆႈမႄးႁႅၼ်းဝႆႉၼၼ်ႉၵႃႈၼိူဝ်မၼ်းဢေႃႈ။ၶူင်ႇတီႈတႆႈၽႆးၵေႃႈမႂ်းတၵ်းလႆႈဢဝ်သႂ်ႇဝႆႉလႄႈတႆႈၽႆးၵွၵ်းတႆႈၽႆးမၼ်းၸိူဝ်းၼၼ်ႉဢေႃႈ။
၅ ယိၸ်ႉပလၢင်ႇၶမ်းတီႈဢၼ်တုတ်ႇၽႆးၼၢမ်ႇသႃႇၼၼ်ႉၵေႃႈမႂ်းတၵ်းလႆႈဢဝ်ဝႆႉၵႃႈတီႈၽၢႆႇၼႃႈတိူၵ်ႈၶိူင်ႈဢၼ်ၶၢမ်ႇသၢၵ်ႈသေႇၼၼ်ႉလႄႈႁွႆႈၵၢင်ၽႃႈၵင်ႈဢၼ်ၵင်ႈၽၵ်းတူသုမ်ႉထဵင်ၸဝ်ႈၼၼ်ႉသေဢေႃႈ။
၆ ယိၸ်ႉပလၢင်ႇတီႈဢၼ်တုတ်ႇၽႆးတူဝ်ယိၸ်ႉၼၼ်ႉၵေႃႈမႂ်းတၵ်းလႆႈဢဝ်ဝႆႉၵႃႈတီႈၽၢႆႇၼႃႈၽၵ်းတူသုမ်ႉရထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈဢေႃႈ။
၇ ၵွၵ်းလူင်ၵေႃႈမႂ်းတၵ်းလႆႈဢဝ်ဝႆႉၵႃႈၼႂ်းၵႄႈဝူင်ႈၵၢင်သုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈတင်းယိၸ်ႉပလၢင်ႇလႄႈဢဝ်ၼမ်ႉသႂ်ႇၼႂ်းမၼ်းဝႆႉဢေႃႈ။
၈ မႂ်းတၵ်းလႆႈဢဝ်ႁူဝ်ႉဝၢင်းဢၼ်လွမ်ႉႁွပ်ႈႁိမ်းသုမ်ႉထဵင်ၸဝ်ႈၼၼ်ႉပူၵ်းလႄႈဢဝ်ၽႃႈၵင်ႈဢၼ်ၵင်ႈၽၵ်းတူႁူဝ်ႉဝၢင်းၼၼ်ႉႁွႆႈၵင်ႈဝႆႉဢေႃႈ။
၉ မႂ်းတၵ်းလႆႈဢဝ်ၼမ်ႉမၼ်းပုၼ်ႈဢၼ်တၵ်းတႃးၼၼ်ႉတႃးသုမ်ႉထဵင်ၸဝ်ႈဢိၵ်ႇတင်းၵႃႈဢၼ်မီးၵႃႈၼႂ်းမၼ်းလႄႈႁႂ်ႈသုမ်ႉထဵင်ၸဝ်ႈဢိၵ်ႇတင်းၶိူင်ႈမၼ်းၵႃႈမီးတင်းသဵင်ႈတင်းလူင်မူတ်းၸၢင်ႇဢေႃႈ။ၼင်ႇၼၼ်လႄႈမၼ်းတၵ်းလႆႈမူတ်းၸၢင်ႇဢေႃႈ။
၁၀ မႂ်းတၵ်းလႆႈတႃးယိၸ်ႉပလၢင်ႇတီႈဢၼ်တုတ်ႇၽႆးတူဝ်ယိၸ်ႉဢိၵ်ႇတင်းၶိူင်ႈမၼ်းၵႃႈမီးတင်းသဵင်ႈတင်းလူင်ၼၼ်ႉလႄႈႁႂ်ႈယိၸ်ႉပလၢင်ႇၼၼ်ႉမူတ်းၸၢင်ႇဢေႃႈ။ယိၸ်ႉပလၢင်ႇၼၼ်ႉတၵ်းလႆႈပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။
၁၁ ၵွၵ်းလူင်ဢိၵ်ႇတင်းတိၼ်မၼ်းၵေႃႈမႂ်းတၵ်းလႆႈတႃးလႄႈႁႂ်ႈမူတ်းၸၢင်ႇဢေႃႈ။
၁၂ မႂ်းတၵ်းလႆႈႁွင်ႉဢဝ်ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉမႃးၵႃႈတီႈႁိမ်းၽၵ်းတူသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉလႄႈဢဝ်ၼမ်ႉဢၢပ်ႇပၼ်ၶဝ်သေဢေႃႈ။
၁၃ မႂ်းတၵ်းလႆႈဢဝ်ၶူဝ်းၼုင်ႈၶူဝ်းမႆႊဢၼ်မူတ်းၸၢင်ႇၼၼ်ႉၼုင်ႈပၼ်ဢႃႇရုၼ်ႇလႄႈဢဝ်ၼမ်ႉမၼ်းတႃးႁႂ်ႈမၼ်းမူတ်းၸၢင်ႇလွင်ႈၼင်ႇႁိုဝ်မၼ်းတၵ်းလႆႈပွင်ႁဵတ်းဢမူႉယိတ်ႉပရေႃးႁိၵ်ႈၵႃႈတီႈၽၢႆႇၼႃႈၵဝ်ဢေႃႈ။
၁၄ လုၵ်ႈၸၢႆးမၼ်းၸိူဝ်းၼၼ်ႉၵေႃႈမႂ်းတၵ်းလႆႈႁွင်ႉဢဝ်မႃးလႄႈဢဝ်သိူဝ်ႈယၢဝ်းၼုင်ႈပၼ်ၶဝ်လႄႈ
၁၅ ဢဝ်ၼမ်ႉမၼ်းတႃးၶဝ်မိူၼ်ၸိူဝ်ႉၼင်ႇဢၼ်ဢဝ်ၼမ်ႉမၼ်းတႃးပေႃႈၶဝ်ၼၼ်ႉလွင်ႈၼင်ႇႁိုဝ်ၶဝ်တၵ်းလႆႈပွင်ႁဵတ်းဢမူႉယိတ်ႉပရေႃးႁိၵ်ႈၵႃႈတီႈၽၢႆႇၼႃႈၵဝ်ဢေႃႈ။ၽိၵ်ႈသိၵ်ႈတၢင်းဢၼ်ဢဝ်ၼမ်ႉမၼ်းတႃးၶဝ်ၼၼ်ႉတၵ်းလႆႈပဵၼ်ပုၼ်ႈဢရႃႇယိတ်ႉပရေႃးႁိၵ်ႈထႃႇဝရႃႉၸူဝ်ႈလုၵ်ႈပၢၼ်လၢၼ်ၵႂႃႇမိူဝ်းၼႃႈဢေႃႈ၊ဝႃႈၼင်ႇၼႆဢေႃႈ။
၁၆ ၼင်ႇၼၼ်လႄႈမုဝ်းသေႇႁဵတ်းၸိူဝ်ႉၼင်ႇၼၼ်ဢေႃႈ။ၶဝ်ႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉတင်းသဵင်ႈတင်းလူင်ၼၼ်ႉဢေႃႈ။
၁၇ ၼႂ်းပီႊတုတိယလိူၼ်ပထမဝၼ်းပထမၼၼ်ႉလႆႈတႄႇႁဵတ်းသုမ်ႉထဵင်ၸဝ်ႈဢေႃႈ။
၁၈ မိူဝ်ႈဢၼ်တႄႇႁဵတ်းသုမ်ႉထဵင်ၸဝ်ႈၼၼ်ႉမုဝ်းသေႇဢဝ်တီႈသုပ်းတိၼ်မၼ်းၶျႃးသေလႄႈပူၵ်းပႅၼ်ႈမၼ်းသေယဝ်ႉသွတ်ႇသေႊမၼ်းလႄႈပူၵ်းသဝ်မၼ်းဢေႃႈ။
၁၉ မၼ်းဢဝ်သုမ်ႉထဵင်ၵီႈမုင်းၵႃႈၼိူဝ်သုမ်ႉထဵင်ၸဝ်ႈၼၼ်ႉသေလႄႈသမ်ႉဢဝ်ဢၼ်ႁူမ်ႇသုမ်ႉထဵင်မုင်းသွၼ်ႈသႂ်ႇၵႃႈၼိူဝ်မၼ်းထႅင်ႈၸွမ်းၵႃႈၼင်ႇထႃႇဝရႃႉၽြႃးသင်ႇလၢတ်ႈဝႆႉတီႈမၼ်းၼၼ်ႉဢေႃႈ။
၂၀ မၼ်းဢဝ်ၶိူင်ႈဢၼ်ၶၢမ်ႇသၢၵ်ႈသေႇသႂၢင်းသႂ်ႇၵႃႈၼႂ်းတိူၵ်ႈၸဝ်ႈလႄႈဢဝ်ၵၢၼ်းႁၢပ်ႇတိူၵ်ႈသွတ်ႇဝႆႉသေလႄႈဢဝ်ပလၢင်ႇတီႈၽေႇဢပျႅတ်ႈတၢင်ႇသႂ်ႇၵႃႈၼိူဝ်တိူၵ်ႈၸဝ်ႈၼၼ်ႉသေယဝ်ႉဢဝ်တိူၵ်ႈၸဝ်ႈသႂ်ႇဝႆႉၵႃႈၼႂ်းသုမ်ႉထဵင်ၸဝ်ႈလႄႈ
၂၁ ဢဝ်ၽႃႈၵင်ႈတၢင်းၼႂ်းဢၼ်ၵင်ႈလပ်ႉၼၼ်ႉၵင်ႈဝႆႉသေလႄႈၵင်ႈလပ်ႉတိူၵ်ႈၶိူင်ႈဢၼ်ၶၢမ်ႇသၢၵ်ႈသေႇၼၼ်ႉဝႆႉၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမၼ်းၼၼ်ႉဢေႃႈ။
၂၂ မၼ်းဢဝ်ၶူင်ႇတီႈၵိၼ်ဝႆႉၵႃႈၼႂ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၵႃႈတီႈႁိမ်းၽၢႆႇတၢင်းႁွင်ႇသုမ်ႉထဵင်ၸဝ်ႈၽၢႆႇၼွၵ်ႈၽႃႈၵင်ႈၼၼ်ႉလႄႈ
၂၃ မႄးႁႅၼ်းၶဝ်ႈမုၼ်းၽၢႆႇၼႃႈၸဝ်ႈဝႆႉၵႃႈၼိူဝ်မၼ်းၼၼ်ႉၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမၼ်းၼၼ်ႉဢေႃႈ။
၂၄ မၼ်းဢဝ်ၶူင်ႇတီႈတႆႈၽႆးဝႆႉၵႃႈၼႂ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၵႃႈတီႈႁိမ်းၽၢႆႇတၢင်းၸၢၼ်းႁႂ်ႈတေႃႇသိုဝ်ႈၵၼ်တင်းၶူင်ႇတီႈၵိၼ်လႄႈ
၂၅ တႆႈၵွၵ်းတႆႈၽႆးၸိူဝ်းၼၼ်ႉဝႆႉၵႃႈတီႈၽၢႆႇၼႃႈထႃႇဝရႃႉၽြႃးၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၵႃႈတီႈမၼ်းၼၼ်ႉဢေႃႈ။
၂၆ မၼ်းဢဝ်ယိၸ်ႉပလၢင်ႇၶမ်းဝႆႉၵႃႈၼႂ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၵႃႈတီႈၽၢႆႇၼွၵ်ႈၽႃႈၵင်ႈလႄႈ
၂၇ ဢဝ်ၼၢမ်ႇသႃႇဢၼ်ႁွမ်ဢၼ်ႁူၺ်းတုတ်ႇၽႆးၵႃႈၼိူဝ်ယိၸ်ႉပလၢင်ႇၼၼ်ႉၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၵႃႈတီႈမၼ်းၼၼ်ႉဢေႃႈ။
၂၈ မၼ်းဢဝ်ၽႃႈၵင်ႈဢၼ်ၵင်ႈၽၵ်းတူသုမ်ႉထဵင်ၸဝ်ႈၼၼ်ႉႁွႆႈၵင်ႈဝႆႉဢေႃႈ။
၂၉ မၼ်းဢဝ်ယိၸ်ႉပလၢင်ႇတီႈဢၼ်တုတ်ႇၽႆးတူဝ်ယိၸ်ႉၼၼ်ႉဝႆႉၵႃႈတီႈၽၢႆႇၼႃႈၽၵ်းတူသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈလႄႈဢဝ်တူဝ်ယိၸ်ႉဢၼ်တုတ်ႇၽႆးဢိၵ်တင်းတၢင်းပုၵ်ႉၸေႃႇၽေႃးၸဵၼ်ႇပုၵ်ႉၸေႃႇၵႃႈၼိူဝ်ယိၸ်ႉပလၢင်ႇၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၵႃႈတီႈမၼ်းၼၼ်ႉဢေႃႈ။
၃၀ မၼ်းဢဝ်ၵွၵ်းလူင်ၼၼ်ႉဝႆႉၵႃႈၼႂ်းၵႄႈဝူင်ႈၵၢင်သုမ်ႉထဵင်တီႈၸူႉတီႈတုမ်ပရိၵ်ႈသၢတ်ႈတင်းယိၸ်ႉပလၢင်ႇလႄႈဢဝ်ၼမ်ႉပုၼ်ႈဢၼ်တၵ်းသုၵ်ႈၼၼ်ႉသႂ်ႇဝႆႉဢေႃႈ။
၃၁ မုဝ်းသေႇဢိၵ်ႇတင်းဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉလႆႈသုၵ်ႈတိၼ်သုၵ်းမိုဝ်းၶဝ်ၵႃႈၼႂ်းမၼ်းဢေႃႈ။
၃၂ လႆႈသုၵ်ႈတိၼ်သုၵ်ႈမိုဝ်းမိူဝ်ႈဢၼ်ၶဝ်ၶဝ်ႈၵႃႈၼႂ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉဢိၵ်ႇတင်းမိူဝ်ႈဢၼ်ၶဝ်သုတ်ႉၸပ်းသုတ်ႉၸူးၵႃႈတီႈယိၸ်ႉပလၢင်ႇၼၼ်ႉၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၵႃႈတီႈမုဝ်းသေႇၼၼ်ႉဢေႃႈ။
၃၃ မၼ်းဢဝ်ႁူဝ်ႉဝၢင်းဢၼ်လွမ်ႉႁွပ်ႈႁိမ်းသုမ်ႉထဵင်ၸဝ်ႈဢိၵ်ႇတင်းယိၸ်ႉပလၢင်ႇၼၼ်ႉပူၵ်းလႄႈဢဝ်ၽႃႈၵင်ႈဢၼ်ၵင်ႈၽၵ်းတူႁူဝ်ႉဝၢင်းၼၼ်ႉႁွႆႈၵင်ႈဝႆႉဢေႃႈ။ၼင်ႇၼၼ်လႄႈမုဝ်းသေႇႁႂ်ႈတၢင်းႁဵတ်းယဝ်ႉတူဝ်ႈဢေႃႈ။
မုၼ်ၽုင်းၽြႃးပဵၼ်ၸဝ်ႈ
၃၄ မိူဝ်ႈၼၼ်ႉမွၵ်ႇၵုမ်ႈမုင်းႁူမ်ႇသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉလႄႈမုၼ်ၽုင်းထႃႇဝရႃႉၽြႃးတဵမ်ဝႆႉၼႂ်းသုမ်ႉထဵင်ၸဝ်ႈၼၼ်ႉဢေႃႈ။
၃၅ မုဝ်းသေႇဢမ်ႇၶဝ်ႈၵႃႈၼႂ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉလႆႈၵွပ်ႈပိူဝ်ႈမွၵ်ႇၵုမ်ႈၵုမ်ႈယူႇၵႃႈၼိူဝ်မၼ်းလႄႈမုၼ်ၽုင်းထႃႇဝရႃႉၽြႃးတဵမ်ဝႆႉၼႂ်းသုမ်ႉထဵင်ၸဝ်ႈၼၼ်ႉဢေႃႈ။
၃၆ ယၢမ်းမိူဝ်ႈဢၼ်မွၵ်ႇၵုမ်ႈယုၵ်ႉၽၢတ်ႇသေၵႃႈတီႈၼိူဝ်သုမ်ႉထဵင်ၸဝ်ႈၶိုၼ်းယဝ်ႉၼၼ်ႉၸိုင်ၵူၼ်းမဵဝ်းဢိသရေႇလတင်းလၢႆဢွၼ်ၵၼ်ၶၢႆႉတီႈၵႂႃႇတၢင်းပႆတၢင်းၼႂ်းၵႃႈဢၼ်ၶဝ်ၵႂႃႇၶဝ်ပႆၼၼ်ႉဢေႃႈ။
၃၇ ပေႃးမွၵ်ႇၵုမ်ႈဢမ်ႇယုၵ်ႉၽၢတ်ႇၶိုၼ်းၸိုင်ၶဝ်ယင်းဢမ်ႇၵႂႃႇဢမ်ႇပႆတေႃႇထိုင်ႈႁွတ်ႈဝၼ်းဢၼ်မွၵ်ႇၵုမ်ႈယုၵ်ႉၽၢတ်ႇၶိုၼ်းၼၼ်ႉဢေႃႈ။
၃၈ မွၵ်ႇၵုမ်ႈထႃႇဝရႃႉၽြႃးတႄႇယူႇၵႃႈၼိူဝ်သုမ်ႉထဵင်ၸဝ်ႈၶိင်ႇၵၢင်ဝၼ်းလႄႈၶိင်ႇၵၢင်ၶိုၼ်းၸမ်းပဵၼ်ပိဝ်ၽႆးလႄႈတႄႇယူႇသိုဝ်ႈၼႃႈတႂ်ႈတႃႇၵူၼ်းမဵဝ်းဢိသရေႇလတင်းသဵင်ႈတင်းလူင်ၼႂ်းၵႃႈဢၼ်ၶဝ်ၵႂႃႇၶဝ်ပႆၼၼ်ႉဢေႃႈ။