Chapter
၃၆
၁ ၼင်ႇၼၼ်လႄႈပေႇၸလေႇလတင်းဢႁေႃႇလျႃႉၽဢိၵ်ႇတင်းၵူၼ်းဢၼ်မီးပိင်ႇၺႃႇၵႃႈၼႂ်းၸႂ်တင်းသဵင်ႈတင်းလူင်ဢၼ်ထႃႇဝရႃႉၽြႃးဢဝ်ၺၢၼ်ႇပိင်ႇၺႃႇသႂၢင်းသႂ်ႇၵႃႈၼႂ်းႁူဝ်ၸႂ်ႁႂ်ႈမေႃႁဵတ်းတၢင်းႁဵတ်းၵူႈၸိူဝ်ႉၵူႈပိူင်ပုၼ်ႈဢၼ်တၵ်းပွင်ႁဵတ်းဢမူႉၸဝ်ႈၼႂ်းထႃႇၼႃႉတီႈမူတ်းၸၢင်ႇၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၸိူဝ်းၼၼ်ႉတၵ်းလႆႈဢွၼ်ၵၼ်ႁဵတ်းဢေႃႈ။
၂ ၵမ်းၼၼ်ႉမုဝ်းသေႇႁွင်ႉဢဝ်ပေႇၸလေႇလ၊ဢႁေႃႇလျႃႉၽ၊တင်းၵူၼ်းဢၼ်မီးပိင်ႇၺႃႇၵႃႈၼႂ်းၸႂ်ဢၼ်ထႃႇဝရႃႉၽြႃးဢဝ်ၺၢၼ်ႇသႂၢင်းသႂ်ႇၵႃႈၼႂ်းႁူဝ်ၸႂ်လႄႈမီးၸေႇတၼႃႇဢၼ်ၶႂ်ႈမႃးႁဵတ်းတၢင်းႁဵတ်းၸိူဝ်းၼၼ်ႉတင်းသဵင်ႈတင်းလူင်ၼၼ်ႉမႃးသေယဝ်ႉ၊
၃ ၶဝ်ဢွၼ်ၵၼ်ၶၢမ်ႇဢဝ်တၢင်းလူႇတၢင်းတၢၼ်းၵႃႈဢၼ်ၵူၼ်းမဵဝ်းဢိသရေႇလတင်းလၢႆဢဝ်မႃးၼၼ်ႉၵႃႈတီႈမိုဝ်းမုဝ်းသေႇႁႂ်ႈလႆႈသၢင်ႈႁဵတ်းထႃႇၼႃႉတီႈမူတ်းၸၢင်ႇဢိၵ်ႇတင်းၶိူင်ႈပိူင်ပုၼ်ႈဢၼ်တၵ်းၵိုတ်းႁၢပ်ႇဢမူႉၸဝ်ႈၸိူဝ်းၼၼ်ႉဢေႃႈ။ၵူၼ်းတင်းလၢႆထၢပ်ႈလႄႈဢဝ်တၢင်းလူႇတၢင်းတၢၼ်းဢၼ်ပႃးတင်းၸႂ်ၸေႇၼႃႇလူႇတၢၼ်းၼၼ်ႉမႃးထႅင်ႈယူႇၵူႈၼႂ်ဢေႃႈ။
၄ မိူဝ်ႈဢၼ်ၵူၼ်းဢၼ်မီးပိင်ႇၺႃႇဢၼ်ၸၢင်ႊႁဵတ်းတၢင်းႁဵတ်းထႃႇၼႃႉတီႈမူတ်းၸၢင်ႇတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်လုၵ်ႉသေၵႃႈတီႈတၢင်းႁဵတ်းၶဝ်ႁင်းၽႂ်ႁင်းမၼ်းမႃးၵႃႈတီႈမုဝ်းသေႇလႄႈမွၵ်ႇလၢတ်ႈလႄႈဝႃႈ၊-
၅ ၵူၼ်းတင်းလၢႆဢွၼ်ၵၼ်ဢဝ်မႃးထၢၼ်ႈပေႃးလူၼ်ႉလိူဝ်ၵႂႃႇသေတၢင်းဢၼ်ၵုမ်ႇႁဵတ်းတၢင်းႁဵတ်းဢၼ်ထႃႇဝရႃႉၽြႃးသင်ႇလၢတ်ႈဝႆႉႁႂ်ႈႁဵတ်းၼၼ်ႉၼႃႇလူင်လၢင်ၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊
၆ မုဝ်းသေႇၸီႇယၢင်ႇလႄႈၶဝ်ႁႂ်ႈသေႃႇႁႂ်ႈလၢတ်ႈတင်းတပ်ႉလႄႈဝႃႈ၊-ၵူၼ်းယိင်းၵူၼ်းၸၢႆးၵေႃႉလႂ်သေဢမ်ႇဝႃႈယႃႇပထေၢပ်ႈထႅင်ႈလႄႈႁဵတ်းတၢင်းႁဵတ်းႁႂ်ႈပဵၼ်တၢင်းလူႇတၢင်းတၢၼ်းပုၼ်ႈထႃႇၼႃႉတီႈမူတ်းၸၢင်ႇၸဝ်ႈ၊ဝႃႈၼင်ႇၼႆလႄႈႁႄႉၶႅၼ်လွင်ႈတၢင်းဢၼ်ၵူၼ်းတင်းလၢႆဢဝ်တၢင်းလူႇတၢင်းတၢၼ်းမႃးၼၼ်ႉဢေႃႈ။
၇ ဢုၵ်ႉၸႃႇဢၼ်လႆႈမႃးယဝ်ႉၼၼ်ႉၵုမ်ႇႁဵတ်းတၢင်းႁဵတ်းၼၼ်ႉယဝ်ႉဢမ်ႇၵႃးလူၼ်ႉလိူဝ်လႄႈမီးဝႆႉဢေႃႈ။
သုမ်ႉထဵင်ၸဝ်ႈ
၈ ၼႂ်းၶဝ်ၸိူဝ်းဢၼ်ႁဵတ်းတၢင်းႁဵတ်းၼၼ်ႉၵႃႈပဵၼ်ၵေႃႉဢၼ်မီးပိင်ႇၺႃႇၵႃႈၼႂ်းၸႂ်ၼၼ်ႉဢွၼ်ၵၼ်ဢဝ်ၽႃႈၵင်ႈသိပ်းၼိုင်ႈႁဵတ်းသုမ်ႉထဵင်ၸဝ်ႈဢေႃႈ။ၶဝ်ဢဝ်ပိၵ်ႈၶျေႃးဢၼ်ပႃးၶူဝ်းဢၼ်သွမ်ႇၶူဝ်းဢၼ်ၵမ်ႇၶူဝ်းဢၼ်လႅင်ႊတမ်ႇၵၢမ်းၵၼ်ႁၢင်ႈၶိူင်ႈႁဵတ်းပုင်ႇၶေႇရူႉၽိမ်ႇသႂ်ႇလႄႈႁဵတ်းၽႃႈၵင်ႈၸိူဝ်းၼၼ်ႉဢေႃႈ။
၉ ၽႃႈၵင်ႈၼၼ်ႉၼႃႈယၢဝ်းမၼ်းမီးသၢဝ်းပႅတ်ႇသွၵ်ႇၼႃႈပွတ်းမၼ်းမီးသီႇသွၵ်ႇလႄႈၽႃႈၵင်ႈတင်းသဵင်ႈတင်းလူင်ၸိူဝ်းၼၼ်ႉၼႃႈယၢဝ်းၼႃႈပွတ်းမိူၼ်မိူၼ်ၵၼ်ဢေႃႈ။
၁၀ ၽႃႈၵင်ႈႁႃႈၽိုၼ်ယဵပ်ႉၸပ်းႁႂ်ႈပဵၼ်ၽိုၼ်လဵဝ်ၵၼ်လႄႈၽႃႈၵင်ႈဢၼ်ၵိုတ်းႁႃႈၽိုၼ်ၼၼ်ႉၵေႃႈယဵပ်ႉၸပ်းႁႂ်ႈပဵၼ်ၽိုၼ်လဵဝ်ၵၼ်ဢေႃႈ။
၁၁ ၶဝ်ဢဝ်ၶူဝ်းဢၼ်သွမ်ႇႁဵတ်းႁူမၼ်းသႂ်ႇၵႃႈတီႈၸႃႉၸဵမ်တီႈသုတ်းၽႃႈၵင်ႈဢၼ်သိုပ်ႇၵၢမ်းၵၼ်ၽိုၼ်ၼိုင်ႈၼၼ်ႉလႄႈၸွမ်းၵႃႈတီႈႁိမ်းၽၢႆႇၼိူဝ်ဢေႃႈ။ၵႃႈတီႈၸႃႉၸဵမ်တီႈသုတ်းၽႃႈၵင်ႈၽိုၼ်တုတိယဢၼ်သိုပ်ႇၵၢမ်းၵၼ်ၽိုၼ်ၼိုင်ႈၼၼ်ႉလႄႈၸွမ်းၵႃႈတီႈႁိမ်းၽၢႆႇၼိူဝ်မၼ်းၵႂႃႇၼၼ်ႉၵေႃႈႁဵတ်းမိူၼ်ၸိူဝ်ႉၼင်ႇၼၼ်ဢေႃႈ။
၁၂ ၶဝ်ႁဵတ်းႁူႁႃႈသိပ်းၵႃႈတီႈၽႃႈၵင်ႈၽိုၼ်ႈၼိုင်ႈဢိၵ်ႇတင်းႁူႁႃႈသိပ်းၵႃႈတီႈႁိမ်းၽၢႆႇၼိူဝ်ၽႃႈၵင်ႈၽိုၼ်တုတိယသိုပ်ႇၵၢမ်းၵၼ်ၼၼ်ႉဢေႃႈ။ႁူတင်းလၢႆၸိူဝ်းၼၼ်ႉတေႃႇမႅၼ်ႈၵၼ်ဢေႃႈ။
၁၃ ၶေႃၶမ်းႁႃႈသိပ်းဢၼ်ၵေႃႈၶဝ်ႁဵတ်းလႄႈဢဝ်ၶေႃၶမ်းၸိူဝ်းၼၼ်ႉႁႂ်ႈၽႃႈၵင်ႈတေႃႇၸပ်းၵၼ်သေယဝ်ႉပဵၼ်သုမ်ႉထဵင်ၸဝ်ႈဢၼ်လဵဝ်ၵူၺ်းဢေႃႈ။
၁၄ ၽႃႈၵင်ႈပုၼ်ႈဢၼ်တၵ်းပဵၼ်သုမ်ႉထဵင်ၵႃႈၼိူဝ်သုမ်ႉထဵင်ၸဝ်ႈတၢင်ႇၽိုၼ်ၵေႃႈၶဝ်ႁဵတ်းဢေႃႈ။
၁၅ ၶဝ်ႁဵတ်းသိပ်းဢဵတ်းၽိုၼ်ဢေႃႈ။ၽႃႈၵင်ႈယေႈၽိုၼ်ၼႃႈယၢဝ်းမၼ်းမီးသၢမ်သိပ်းသွၵ်ႇၼႃႈပွတ်းမၼ်းမီးသီႇသွၵ်ႇလႄႈၽႃႈၵင်ႈသိပ်းဢဵတ်းၽိုၼ်ၸိူဝ်းၼၼ်ႉၼႃႈယၢဝ်းၼႃႈပွတ်းမိူၼ်မိူၼ်ၵၼ်ဢေႃႈ။
၁၆ ၶဝ်ယဵပ်ႉၽႃႈၵင်ႈႁႃႈၽိုၼ်ၸပ်းၵၼ်ႁႂ်ႈပဵၼ်ၽိုၼ်လဵဝ်ၵၼ်၊ၽႃႈၵင်ႈႁူၵ်းၽိုၼ်ၸပ်းၵၼ်ႁႂ်ႈပဵၼ်ၽိုၼ်လဵဝ်ၵၼ်ဢေႃႈ။
၁၇ မၼ်းႁဵတ်းႁူႁႃႈသိပ်းသႂ်ႇၵႃႈတီႈသုတ်းၽႃႈၵင်ႈၽိုၼ်ၼိုင်ႈၼၼ်ႉလႄႈၸွမ်းၵႃႈတီႈႁိမ်းၽၢႆႇၼိူဝ်မၼ်းၵႂႃႇဢိၵ်ႇတင်းႁူႁႃႈသိပ်းၸႃႉၸဵမ်တီႈသုတ်းၽႃႈၵင်ႈၽိုၼ်တုတိယၽိုၼ်ၼိုင်ႈၼၼ်ႉလႄႈၸွမ်းၵႃႈတီႈႁိမ်းၽၢႆႇၼိူဝ်မၼ်းၵႂႃႇၼၼ်ႉဢေႃႈ။
၁၈ ၶေႃတွင်းလိူင်ႁႃႈသိပ်းဢၼ်ၵေႃႈမၼ်းႁဵတ်းလႄႈႁႂ်ႈသုမ်ႉထဵင်ၽၢၵ်ႇၼိုင်ႈလႄႈၽၢၵ်ႇၼိုင်ႈတေႃႇၸပ်းၵၼ်ပဵၼ်ဢၼ်လဵဝ်ၵူၺ်းဢေႃႈ။
၁၉ ၶဝ်ဢဝ်ၼင်သူဝ်းဢၼ်ယွမ်ႉလႅင်ႊႁဵတ်းပုၼ်ႈဢၼ်တၵ်းႁူမ်ႇသုမ်ႇသုမ်ႉထဵင်ဢိၵ်ႇတင်းၼင်တႁႃႇသႁဵတ်းပုၼ်ႈဢၼ်တၵ်းႁူမ်ႇသုမ်ႇၵႃႈၼိူဝ်မၼ်းၼၼ်ႉသေဢေႃႈ။
၂၀ ပႅၼ်ႈဢၵႃႇသဢၼ်ၵင်ႈသုမ်ႉထဵင်ၸဝ်ႈၼၼ်ႉၵေႃႈၶဝ်ႁဵတ်းဢေႃႈ။ပႅၼ်ႈၼၼ်ႉယေႈၽႅၼ်ႇၼႃႈယၢဝ်းမၼ်းမီးသိပ်းသွၵ်ႇၼႃႈပွတ်းမၼ်းသွၵ်ႇၶိုပ်ႈဢေႃႈ။
၂၁ လွင်ႈၼင်ႇႁိုဝ်တၵ်းလႆႈၶပ်ႉၸႅၼ်ႇၵပ်းတၢမ်းၵၼ်ၸိုင်ၵႃႈတီႈပႅၼ်ႈၽႅၼ်ႇၼိုင်ႈမီးတိၼ်သွင်ဢၼ်ဢေႃႈ။
၂၂ ၶဝ်ႁဵတ်းပႅၼ်ႈသုမ်ႉထဵင်ၸဝ်ႈတင်းသဵင်ႈတင်းလူင်မိူၼ်ၸိူဝ်ႉၼင်ႇၼၼ်ဢေႃႈ။
၂၃ ၶဝ်ႁဵတ်းပႅၼ်ႈဢၼ်ၵင်ႈသုမ်ႉထဵင်ၸဝ်ႈပုၼ်ႈၼႃႈတၢင်းၸၢၼ်းသၢဝ်းၼိုင်ႈလႄႈ
၂၄ တီႈပႅၼ်ႈသၢဝ်းၼိုင်ႈၼၼ်ႉပႅၼ်ႈႁဵတ်းတီႈသုပ်းတိၼ်ငိုၼ်းသီႇသိပ်းၵႃႈတႂ်ႈပႅၼ်ႈယေႈၽႅၼ်ႇတီႈသုပ်းတိၼ်မၼ်းသွင်ဢၼ်ဢေႃႈ။
၂၅ မိူၼ်ၼင်ႇၼၼ်ၶဝ်ႁဵတ်းပႅၼ်ႈဢၼ်ၵင်ႈသုမ်ႉထဵင်ၸဝ်ႈပုၼ်ႈၼႃႈတၢင်းႁွင်ႇသၢဝ်းၼိုင်ႈ
၂၆ ဢိၵ်ႇတင်းတီႈသုပ်းတိၼ်ငိုၼ်းသီႇသိပ်းၵႃႈတႂ်ႈပႅၼ်ႈယေႈၽႅၼ်ႇတီႈသုပ်းတိၼ်မၼ်းသွင်ဢၼ်ဢေႃႈ။
၂၇ ပႅၼ်ႈဢၼ်ၵင်ႈသုမ်ႉထဵင်ၸဝ်ႈပုၼ်ႈၼႃႈတၢင်းတူၵ်းၸိုင်မၼ်းႁဵတ်းႁူၵ်းၽႅၼ်ႇဢေႃႈ။
၂၈ ပႅၼ်ႈဢၼ်ၵင်ႈပုၼ်ႈၸဵင်ႇၽၢႆႇတၢင်းလင်သုမ်ႉထဵင်ၸဝ်ႈၼၼ်ႉၵေႃႈၶဝ်ႁဵတ်းသွင်ၽႅၼ်ႇဢေႃႈ။
၂၉ လႆႈတူပ်ႉၸဵင်ႇၵၢမ်းၵၼ်ၸႃႉၸဵမ်ၵႃႈတီႈၽၢႆႇတႂ်ႈလႄႈပဵၼ်ဢၼ်လဵဝ်ၵၼ်ၶိုၼ်ႈၵႂႃႇၸွမ်းၸိူဝ်ႉၼင်ႇၼၼ်တေႃႇထိုင်ႁွတ်ႈပၢႆၸိၵ်းမၼ်းၵွပ်ႈပိူဝ်ႈလွင်ႈၶူၺ်ႇမၼ်းဢေႃႈ။
၃၀ ၼင်ႇၼၼ်လႄႈမၼ်းႁဵတ်းသွင်ဢၼ်ၵႃႈတီႈၸဵင်ႇသွင်ၸဵင်ႇဢေႃႈ။မီးပႅတ်ႇၽႅၼ်ႇတီႈသုပ်းတိၼ်ငိုၼ်းသိပ်းႁူၵ်းဢၼ်ယေႈၽႅၼ်ႇသွင်ဢၼ်ဢေႃႈ။
၃၁ ၶဝ်ဢဝ်မႆႉဢၵႃႇသႁဵတ်းသေႊႁႃႈလႅမ်ႈပုၼ်ႈပႅၼ်ႈသုမ်ႉထဵင်ၸဝ်ႈၸိူဝ်းၼၼ်ႉၼႃႈၼိုင်ႈႁႃႈလႅမ်ႈ
၃၂ ပုၼ်ႈပႅၼ်ႈသုမ်ႉထဵင်ၸဝ်ႈၸိူဝ်းၼၼ်ႉၼႃႈၼိုင်ႈႁႃႈလႅမ်ႈပုၼ်ႈပႅၼ်ႈသုမ်ႉထဵင်ၸဝ်ႈဢၼ်မီးၽၢႆႇတၢင်းလင်မၼ်းၼႃႈဝၼ်းတူၵ်းၸိူဝ်းၼၼ်ႉဢေႃႈ။
၃၃ ၶဝ်ႁဵတ်းႁႂ်ႈမႆႉသေႊၶိုင်ႈၵၢင်ၼၼ်ႉသွတ်ႇဝႆႉၵႃႈတီႈသိုဝ်ႈၶိုင်ႈၵၢင်ပႅၼ်ႈၸိူဝ်းၼၼ်ႉဢဝ်ၸႃႉၸဵမ်ၸဵင်ႇၼိုင်ႈတေႃႇထိုင်ႁွတ်ႈၸဵင်ႇၼိုင်ႈဢေႃႈ။
၃၄ ၶဝ်ဢဝ်ၶမ်းဢုမ်ႇႁေႃႇပႅၼ်ႈၸိူဝ်းၼၼ်ႉဢေႃႈ။ၶူၺ်ႇၶမ်းပုၼ်ႈတီႈဢၼ်သေႊၸိူဝ်းၼၼ်ႉတၵ်းသွတ်ႇၼၼ်ႉၵေႃႈၶဝ်ႁဵတ်းလႄႈဢဝ်ၶမ်းဢုမ်ႇႁေႃႇသေဢေႃႈ။
၃၅ ၼႄးၼိုင်ႈၸမ်းၶဝ်ဢဝ်ၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊဢိၵ်ႇတင်းပိၵ်ႈၶျေႃးႁဵတ်းၽႃႈၵင်ႈလႄႈႁၢင်ႈၶိူင်ႈသႂ်ႇပုင်ႇႁၢင်ႊၶေႇရူႉၽိမ်ႇသေဢေႃႈ။
၃၆ ၶဝ်ဢဝ်မႆႉဢၵႃႇသႁဵတ်းသဝ်သီႇလႅမ်ႈပုၼ်ႈမၼ်းလႄႈတဵၵ်းၶမ်းသေဢေႃႈ။သဝ်ၸိူဝ်းၼၼ်ႉမီးတႅမ်ၶမ်းလႄႈတီႈသုပ်းတိၼ်ငိုၼ်းသီႇဢၼ်ၵေႃႈၶဝ်လေႃႇႁဵတ်းဢေႃႈ။
၃၇ ၶဝ်ဢဝ်ၶူဝ်းဢၼ်သွမ်ႇၶူဝ်းဢၼ်ၵမ်ႇၶူဝ်ဢၼ်လႅင်ႊဢိၵ်ႇတင်းပိၵ်ႈၶျေႃးဢၼ်တမ်ႇၵၢမ်းႁၢင်ႈၶိူင်ႈတေႃးႁဵတ်းၼၼ်ႉႁဵတ်းၽႃႈၵင်ႈပုၼ်ႈဢၼ်တၵ်းၵင်ႈၵႃႈတီႈၽၵ်းတူသုမ်ႉထဵင်ၸဝ်ႈၼၼ်ႉလႄႈ
၃၈ ႁဵတ်းသဝ်ႁႃႈလႅမ်ႈဢိၵ်ႇတင်းတႅမ်မၼ်းတင်းလၢႆပုၼ်ႈၽႃႈၵင်ႈၼၼ်ႉဢေႃႈ။ၶဝ်ဢဝ်ၶမ်းဢုမ်ႇႁေႃႇဝၢၼ်ႇဢၼ်ၶၢမ်ႇႁူဝ်သဝ်ဢိၵ်ႇတင်းႁၢဝ်းတင်းလၢႆဢေႃႈ။တီႈသုပ်းတိၼ်တွင်းလိူင်ႁႃႈဢၼ်ၵေႃႈမီးဢေႃႈ။