Chapter
၄
ၼီႈမိၵ်ႈလၢၵ်ႈၶၼႃႇပုၼ်ႈမုဝ်းသေႇ
၁ မုဝ်းသေႇၵေႃႈၶိုၼ်းလဝ်ႈလၢတ်ႈလႄႈဝႃႈ၊-ၶဝ်တၵ်းဢမ်ႇယုမ်ႇၶႃႈၸဝ်ႈ။ၵႂၢမ်းၶႃႈၸဝ်ႈၵေႃႈၶဝ်တၵ်းဢမ်ႇထွမ်ႇဢမ်ႇဢဝ်။ၶဝ်တၵ်းဝႃႈ၊-ထႃႇဝရႃႉၽြႃးဢမ်ႇပေႃႇမႃးတီႈမႂ်းၵူၺ်း၊ဝႃႈၼင်ႇၼႆလူးၵွၼ်ႇတီႈၶႃႈဢေႃႈ၊ဝႃႈၼင်ႇၼႆဢေႃႈ။
၂ ထႃႇဝရႃႉၽြႃးၵေႃႈထၢမ်တီႈမၼ်းလႄႈဝႃႈ၊-ဢၼ်မီးၵႃႈၼႂ်းမိုဝ်းမႂ်းၼႆႉပဵၼ်ၵႃႈသင်၊ဝႃႈၼင်ႇၼႆလႄႈမၼ်းၵေႃႈလၢတ်ႈလႄႈဝႃႈ၊-
၃ ပဵၼ်ၶွၼ်ႉတဝ်ႉၶႃႈဢေႃႈ၊ဝႃႈၼင်ႇၼႆဢေႃႈ။မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊-ဢဝ်ၶွၼ်ႉတဝ်ႉမႂ်းထိမ်ႈတူၵ်းသႂ်ႇၵႃႈၼိူဝ်လိၼ်တႃႉ၊ဝႃႈၼင်ႇၼႆလႄႈမၼ်းၵေႃႈဢဝ်ထိမ်ႈတူၵ်းသႂ်ႇၵႃႈၼိူဝ်လိၼ်သေယဝ်ႉၶွၼ်ႉတဝ်ႉၼၼ်ႉပဵၼ်ငူးၵႂႃႇလႄႈမုဝ်းသေႇလႆႈလႅၼ်ႈပၢႆႊဢေႃႈ။
၄ ထႃႇဝရႃႉၽြႃးၵေႃႈလၢတ်ႈလႄႈဝႃႈ၊-ယိုၼ်းမိုဝ်းမႂ်းလႄႈတီႉၵမ်ဢဝ်မၼ်းတႃႉဝႃႈၼင်ႇၼႆလႄႈမၼ်းၵေႃႈယိုၼ်းမိုဝ်းမၼ်းတီႉၵမ်ဢဝ်လႄႈၶိုၼ်းပဵၼ်ၶွၼ်ႉတဝ်ႉၵႂႃႇၵႃႈၼႂ်းမိုဝ်းမၼ်းသေဢေႃႈ။
၅ ပေႃးႁဵတ်းၼင်ႇၼႆၸိုင်ၶဝ်တၵ်းယုမ်ႇလွင်ႈဢၼ်ထႃႇဝရႃႉၽြႃး၊ၽြႃးပဵၼ်ၸဝ်ႈပူႇမွၼ်ႇၶဝ်၊ၽြႃးဢႃႇပႁမ်ႇ၊ၽြႃးဢိၸၢၵ်ႉ၊ၽြႃးယႃႇၵုပ်ႉၼၼ်ႉပေႃႇမႃးၵႃႈတီႈမႂ်းယဝ်ႉဢၼ်ဝႃႈၼၼ်ႉဢေႃႈ။
၆ ၵမ်းၼၼ်ႉထႃႇဝရႃႉၽြႃးလၢတ်ႈလႄႈဝႃႈ၊-ဢဝ်မိုဝ်းမႂ်းၸူၵ်းၶဝ်ၵႃႈၼႂ်းၽႃႈမႆႊၵႃႈတီႈႁူဝ်ဢူၵ်းမႂ်းတႃႉ၊ဝႃႈၼင်ႇၼႆလႄႈမၼ်းၵေႃႈဢဝ်မိုဝ်းမၼ်းၸူၵ်းၶဝ်ႈၵႃႈၼႂ်းၽႃႈမႆႊၵႃႈတီႈႁူဝ်ဢူၵ်းမၼ်းလႄႈမိူဝ်ႈဢၼ်မၼ်းၶိုၼ်းဢဝ်ဢွၵ်ႇၼၼ်ႉမိုဝ်းမၼ်းၼၼ်ႉပဵၼ်တုတ်ႈၵႂႃႇၽိူၵ်ႇမိူၼ်ၸိူဝ်ႉၼင်ႇမူၺ်ႁႃႇဢေႃႈ။
၇ ၵမ်းၼၼ်ႉမၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊-ဢဝ်မိုဝ်းမႂ်းၶိုၼ်းၸူၵ်းၶဝ်ႈၵႃႈၼႂ်းၽႃႈမႆႊၵႃႈတီႈႁူဝ်ဢူၵ်းမႂ်းတႃႉ၊ဝႃႈၼင်ႇၼႆလႄႈမၼ်းသမ်ႉဢဝ်မိုဝ်းမၼ်းၶိုၼ်းၸူၵ်ႈၶဝ်ႈၵႃႈၼႂ်းၽႃႈမႆႊၵႃႈတီႈႁူဝ်ဢူၵ်းမၼ်းလႄႈမိုဝ်းဢၼ်မၼ်းၶိုၼ်းဢဝ်ဢွၵ်ႇၼၼ်ႉၸိုင်မိုဝ်းမၼ်းၶိုၼ်းပဵၼ်ၸိူဝ်ႉၼင်ႇၼိူဝ်ႉပၵတိပၵ်းၵဝ်ႇပိူင်ၵဝ်ႇဢေႃႈ။
၈ ပေႃးၶဝ်ဢမ်ႇယုမ်ႇမႂ်း၊ဢမ်ႇထွမ်ဢဝ်ၼီႈမိၵ်ႈသၢၵ်ႈသေႇပထမၼၼ်ႉၸိုင်ၶဝ်တၵ်းယုမ်ႇၼီႈမိၵ်ႈသၢၵ်ႈသေႇဢၼ်ပဵၼ်ၵမ်းလိုၼ်းၼႆႉဢေႃႈ။
၉ ဢမ်ႇၼၼ်ၵေႃႈပေႃးၶဝ်ဢမ်ႇယုမ်ႇၼီႈမိၵ်ႈသွင်ပႃးၼႆႉ၊ဢမ်ႇထွမ်ႇဢဝ်ၵႂၢမ်းမႂ်းၸိုင်မႂ်းဢဝ်ၼမ်ႉၵႃႈၼႂ်းၼမ်ႉႁွင်ႊလႄႈထွၵ်ႇသႂ်ႇၵႃႈၼိူဝ်ၽင်ႇတႃႉ။ၼမ်ႉဢၼ်မႂ်းဢဝ်ၵႃႈၼႂ်းၼမ်ႉႁွင်ႊၼၼ်ႉတၵ်းပဵၼ်လိူတ်ႈၵႂႃႇၵႃၼိူဝ်ၽင်ႇဢေႃႈ၊ဝႃႈၼင်ႇၼႆဢေႃႈ။
၁၀ မုဝ်းသေႇၵေႃႈလဝ်ႈလၢတ်ႈတီႈထႃႇဝရႃႉၽြႃးလႄႈဝႃႈ၊-ဢူဝ်းၸဝ်ႈႁဝ်း၊ၶႃႈၸဝ်ႈဢမ်ႇမီးၼမ်ႉသူပ်းၼမ်ႉၵႂၢမ်းသင်ၶႃႈ။မိူဝ်ႈဢွၼ်ၼႆႉၵေႃႈဢမ်ႇမီးၶႃႈ။ၸႃႉၸဵမ်မိူဝ်ႈဢၼ်ၸဝ်ႈႁဝ်းမီးဢမိင်ႉၵႃႈတီႈၶႃႈၸဝ်ႈၼႆႉၵေႃႈဢမ်ႇမီးတီႈၶႃႈ။ပဵၼ်ၵေႃႉဢၼ်သူပ်းၼၵ်း၊ၵေႃႉဢၼ်ၸၢင်ႊလၢတ်ႈၵႂၢမ်းထိူင်းထိူင်းလွႆးလွႆးၵူၺ်းတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၁ ထႃႇဝရႃႉၽြႃးၵေႃႈလၢတ်ႈတီႈမၼ်းလႄႈဝႃႈ၊-ၽူႈလႂ်ႁဵတ်းပဵၼ်သူပ်းၵူၼ်း၊ၽူႈလႂ်ႁဵတ်းပဵၼ်ၵေႃႉဢၼ်ဢႃႉၵေႃႉဢၼ်ႁူၼူၵ်ႇၵေႃႉဢၼ်တႃႁၼ်ၵေႃႉဢၼ်တႃဢမ်ႇႁၼ်ၸိူဝ်းၼၼ်ႉ။
၁၂ ၵဝ်ထႃႇဝရႃႉၽြႃးၼႆႉႁဵတ်းပဵၼ်ဢမ်ႇၸႂ်ႈႁိုဝ်။ပိူဝ်ႈၼႆလႄႈတေႃႈလဵဝ်ၼႆႉမႂ်းၵႂႃႇတႃႉ။ၵဝ်တၵ်းမီးယူႇၵႃႈတီႈသူပ်းမႂ်းလႄႈသွၼ်ပၼ်လွင်ႈဢၼ်မႂ်းတၵ်းလႆႈလၢတ်ႈၸိူဝ်ႉၼင်ႇႁိုဝ်ၼၼ်ႉတီႈမႂ်းဢေႃႈ၊ဝႃႈၼင်ႇၼႆဢေႃႈ။
၁၃ မၼ်းၵေႃႈၶိုၼ်းလဝ်ႈလၢတ်ႈလႄႈဝႃႈ၊-ဢူဝ်းၸဝ်ႈႁဝ်း၊ပၼ်ၵႃႈၼႂ်းမိုဝ်းၵေႃႉဢၼ်ၸဝ်ႈႁဝ်းၶႂ်ႈပၼ်ၼၼ်ႉလႄႈႁႂ်ႈမၼ်းၵႂႃႇၼၼ်ႉၵႂႃႇသေၵမ်းတီႈၶႃႈ၊ဝႃႈၼင်ႇၼႆလႄႈ
၁၄ ထႃႇဝရႃႉၽြႃးၸႂ်မႆႈၶႂ်ႈၸႃႉတီႈမုဝ်းသေႇလႄႈလၢတ်ႈဝႃႈ၊-မႂ်းမီးပီႈဢၢႆႈမႂ်းဢႃႇရုၼ်ႇဢၼ်ပဵၼ်ၵူၼ်းမဵဝ်းလေႇဝိၼၼ်ႉဢမ်ႇၸႂ်ႈႁိုဝ်။ၵဝ်ႁူႉလွင်ႈဢၼ်မၼ်းၸၢင်ႊမေႃလၢတ်ႈလီလီငၢမ်းငၢမ်းၼၼ်ႉယူႇဢေႃႈ။မၼ်းၵေႃႈတေႃႈလဵဝ်ၼႆႉမႃးႁႂ်ႈလႆႈႁပ်ႉႁူဝ်တၢင်းမႂ်းယူႇဢေႃႈ။မိူဝ်ႈဢၼ်မၼ်းထူပ်းႁၼ်မႂ်းၼၼ်ႉမၼ်းတၵ်းၸူမ်းသိူဝ်းဢေႃႈ။
၁၅ မႂ်းတၵ်းလႆႈလၢတ်ႈၵႂၢမ်းတေႃႇမၼ်းလႄႈသႂ်ႇၵႂၢမ်းဝႆႉၵႃႈၼႂ်းသူပ်းမၼ်းဢေႃႈ။ၵဝ်တၵ်းမီးယူႇၵႃႈတီႈသူပ်းမႂ်းဢိၵ်ႇတင်းၵႃႈတီႈသူပ်းမၼ်းလႄႈသင်ႇသွၼ်ပၼ်လွင်ႈဢၼ်သူတၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉဢေႃႈ။
၁၆ မၼ်းၵေႃႈတၵ်းႁဵတ်းၵူၼ်းပျၢၼ်ႇၵႂၢမ်းမႂ်းၵႃႈတီႈၵူၼ်းတင်းလၢႆလႄႈပဵၼ်ၵေႃႉဢၼ်တၢင်သူပ်းတၢင်လိၼ်ႉမႂ်းဢေႃႈ။မႂ်းၵေႃႈတၵ်းပဵၼ်ၵေႃႉဢၼ်တၢင်တူဝ်ၽြႃးပဵၼ်ၸဝ်ႈတီႈမၼ်းဢေႃႈ။
၁၇ မႂ်းတၵ်းလႆယိပ်းၵမ်ၶွၼ်ႉတဝ်ႉဢၼ်မႂ်းတၵ်းဢဝ်ၼႄပျႃးၼီႈမိၵ်ႈသၢၵ်ႈသေႇၼၼ်ႉဝႆႉၵႃႈၼႂ်းမိုဝ်းမႂ်းဢေႃႈ၊ဝႃႈၼင်ႇၼႆဢေႃႈ။
မိုဝ်းသေႇၶိုၼ်းမိူဝ်းမိူင်းဢေႇၵႅပ်ႉတု
၁၈ မုဝ်းသေႇၵေႃႈၶိုၼ်းမိူဝ်းၵႂႃႇၵႃႈတီႈပူႇၼၢႆးမၼ်းယေႇသရေႃႇလႄႈလၢတ်ႈဝႃႈ၊-ၶႅၼ်းတေႃႈပၼ်ဢၶႂၢင်ႉႁႂ်ႈၵဝ်ၶႃႈလႆႈၵႂႃႇသူႇၵႂႃႇၸႂ်းၵႃႈတီႈပီႈၼွင်ႉၸိူဝ်ႉၶိူဝ်းၵဝ်ၶႃႈဢၼ်မီးယူႇၵႃႈၼႂ်းမိူင်းဢေႇၵႅပ်ႉတုၼၼ်ႉလႄႈႁႂ်ႈလႆႈလူႈတူၺ်းလွင်ႈဢၼ်ၶဝ်ဢသၢၵ်ႈယင်းလိပ်းယူႇႁိုဝ်ၼၼ်ႉသေၵမ်း၊မိူဝ်ႈဢၼ်ဝႃႈၼင်ႇၼႆၸိုင်၊ယေႇသရေႃႇၵေႃႈၶိုၼ်းလၢတ်ႈတီႈမုဝ်းသေႇလႄႈဝႃႈ၊-
၁၉ ၵႂႃႇၼိမ်ၼိမ်တႃႉ၊ဝႃႈၼင်ႇၼႆဢေႃႈ။ထႃႇဝရႃႉၽြႃးၵေႃႈလၢတ်ႈတီႈမုဝ်းသေႇၵႃႈၼႂ်းမိူင်းမိတျၢၼ်ႇၼၼ်ႉလႄႈဝႃႈ၊-ၶိုၼ်းမိူဝ်းၵႂႃႇၵႃႈတီႈမိူင်းဢေႇၵႅပ်ႉတုပုၼ်ႉတႃႉ၊ၶဝ်ၸိူဝ်းဢၼ်ႁႃဢသၢၵ်ႈမႂ်းတင်းသဵင်ႈတင်းလူင်ၼၼ်ႉတၢႆယဝ်ႉ၊ဝႃႈၼင်ႇၼႆဢေႃႈ။
၂၀ မိူဝ်ႈၼၼ်ႉမုဝ်းသေႇဢဝ်မေးမၼ်းတင်းလုၵ်ႈၸၢႆးမၼ်းတင်းလၢႆတၢင်ႇသႂ်ႇၵႃႈၼိူဝ်မႃႉလီႈလႄႈဢဝ်တင်းမိုဝ်းယိပ်းၵမ်ၶွၼ်ႉတဝ်ႉၽြႃးပဵၼ်ၸဝ်ႈၼၼ်ႉသေယဝ်ႉမိူဝ်းၵႂႃႇၵႃႈတီႈမိူင်းဢေႇၵႅပ်ႉတုဢေႃႈ။
၂၁ ထႃႇဝရႃႉၽြႃးၵေႃႈသင်ႇလၢတ်ႈဝႆႉတီႈမုဝ်းသေႇလႄႈဝႃႈ၊-မိူဝ်ႈဢၼ်မႂ်းၶိုၼ်းမိူဝ်းၵႂႃႇႁွတ်ႈထိုင်ၵႃႈတီႈမိူင်းဢေႇၵႅပ်ႉတုၼၼ်ႉၸိုင်ၼႄပျႃႉလွင်ႈတၢင်းဢၼ်လီဢၢမ်းၵႃႈဢၼ်ၵဝ်ဢၢပ်ႈဝႆႉၵႃႈၼႂ်းမိုဝ်းမႂ်းတင်းသဵင်ႈတင်းလူင်ၸိူဝ်းၼၼ်ႉၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးတႃႉ။ပိၵ်ႉသမ်ႉႁဵတ်းၸိူဝ်ႉၼင်ႇၼၼ်သေၵေႃႈၵဝ်တၵ်းႁႂ်ႈႁူဝ်ၸႂ်မၼ်းၵႅၼ်ႇၶႅင်လႄႈမၼ်းၵေႃႈတၵ်းယင်းဢမ်ႇပွႆႇၵူၼ်းတင်းလၢႆလႄႈယူႇဢေႃႈ။
၂၂ တီႈၶုၼ်ႁေႃၶမ်းၽႃႇရေႃးၵေႃႈမႂ်းတၵ်းလႆႈမွၵ်ႇလၢတ်ႈလႄႈဝႃႈ၊-ထႃႇဝရႃႉႉၽြႃးဝႃႈဢိသရေႇလပဵၼ်လုၵ်ႈၸၢႆးၵဝ်ဢေႃႈ။
၂၃ ပဵၼ်လုၵ်ႈၸၢႆးတူၼ်ႈၵဝ်ဢေႃႈ။ၵဝ်မီးဢၶႂၢင်ႉႁႂ်ႈပွႆႇလုၵ်ႈၸၢႆးၵဝ်ႁႂ်ႈလႆႈႁဵတ်းဝၢတ်ႈတီႈၵဝ်ဢေႃႈ။ပေႃးမႂ်းထဵင်ပႅတ်ႈလႄႈဝႃႈ၊-ဢမ်ႇပွႆႇၵူၺ်း၊ဝႃႈၼင်ႇၼႆၸိုင်ၵဝ်တၵ်းဢဝ်လုၵ်ႈၸၢႆးမႂ်း၊လုၵ်ႈၸၢႆးတူၼ်ႈမႂ်းၼၼ်ႉတၢႆပႅတ်ႈဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၂၄ ၼႂ်းမိူဝ်ႈဢၼ်မၼ်းယင်းတိုၵ်ႉၵႂႃႇယူႇၼၼ်ႉၸိုင်ထႃႇဝရႃႉၽြႃးထူပ်းမုဝ်းသေႇၵႃႈတီႈပၢင်လိုဝ်ႈလႄႈၵျၢမ်ႇႁႃဢဝ်မၼ်းတၢႆဢေႃႈ။
၂၅ မိူဝ်ႈၼၼ်ႉၸိပေႃႇရဢဝ်မိတ်ႈမၢၵ်ႇႁိၼ်လႄႈထိူဝ်တႅပ်းပၢႆၼင်လုၵ်ႈၸၢႆးမၼ်းပႅတ်ႈသေယဝ်ႉဢဝ်ၶျႃးဝႆႉၵႃႈတီႈႁိမ်းတိၼ်ၽူဝ်မၼ်းသေလႄႈဝႃႈ၊-တီႈၵဝ်ၶႃႈၼႆႉၸိုင်ၸဝ်ႈပဵၼ်ၽူဝ်ဢၼ်ၸၢပ်ႈသႅင်ႇၵၼ်တင်းလိူတ်ႈဢေႃႈ၊ဝႃႈၼင်ႇၼႆဢေႃႈ။
၂၆ မိူဝ်ႈၼၼ်ႉမၼ်းၸဝ်ႈပွႆႇမၼ်းလွတ်ႈသေဢေႃႈ။မေးမၼ်းၵေႃႈလၢတ်ႈလႄႈဝႃႈ၊-ၵွပ်ႈပိူဝ်ႈမင်ႇၵလႃႇတၢင်းဢၼ်ထိူဝ်ႁိမ်းၼၼ်ႉလႄႈတီႈၵဝ်ၶႃႈၼႆႉၸိုင်ၸဝ်ႈပဵၼ်ၽူဝ်ဢၼ်ၸၢပ်ႈသႅင်ႇၵၼ်တင်းလိူတ်ႈဢေႃႈ၊ဝႃႈၼင်ႇၼႆဢေႃႈ။
၂၇ ထႃႇဝရႃႉၽြႃးၵေႃႈလၢတ်ႈတီႈဢႃႇရုၼ်ႇလႄႈဝႃႈ၊-ၵႂႃႇၵႃႈတီႈထိူၼ်ႇပုၼ်ႉႁႂ်ႈလႆႈႁပ်ႉႁူဝ်ၵၼ်တၢင်းမုဝ်းသေႇတႃႉ၊ဝႃႈၼင်ႇၼႆလႄႈမိူဝ်ႈဢၼ်မၼ်းၵႂႃႇၼၼ်ႉၸိုင်မၼ်းထူပ်းႁၼ်မုဝ်းသေႇၵႃႈၼိူဝ်လွႆၽြႃးပဵၼ်ၸဝ်ႈလႄႈႁဵတ်းတၢင်းဢၼ်ၸုပ်ႇၼူမ်ႈဢေႃႈ။
၂၈ မုဝ်းသေႇၵေႃႈမွၵ်ႇလၢတ်ႈၵႂၢမ်းထႃႇဝရႃႉၽြႃးဢၼ်ပွႆႇၸႂ်ႉမၼ်းမႃးၼၼ်ႉတင်းသဵင်ႈတင်းလူင်ဢိၵ်ႇတင်းၼီႈမိၵ်ႈသၢၵ်ႈသေႇၵႃႈဢၼ်မၼ်းၸဝ်ႈသင်ႇလၢတ်ႈဝႆႉၸိူဝ်းၼၼ်ႉတီႈဢႃႇရုၼ်ႇဢေႃႈ။
၂၉ မုဝ်းသေႇတင်းဢႃႇရုၼ်ႇၼၼ်ႉဢွၼ်ၵၼ်ၵႂႃႇလႄႈႁႂ်ႈၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်းၵူၼ်းဢိသရေႇလၸိူဝ်းၼၼ်ႉၸူႉၵၼ်တုမ်ၵၼ်သေယဝ်ႉ၊ဢႃႇရုၼ်ႇၶိုၼ်းမွၵ်ႇလၢတ်ႈၵႂၢမ်းဢၼ်ထႃႇဝရႃႉၽြႃးမီးဢမိင်ႉတီႈမုဝ်းသေႇတင်းသဵင်ႈတင်းလူင်ၼၼ်ႉလႄႈ
၃၀ ၼႄပျႃႉၼီႈမိၵ်ႈသၢၵ်ႈသေႇတင်းလၢႆၵႃႈတီႈသိုဝ်ႈၼႃႈတႂ်ႈတႃၵူၼ်းၸိူဝ်းၼၼ်ႉဢေႃႈ။ၵူၼ်းၸိူဝ်းၼၼ်ႉၵေႃႈယုမ်ႇဢေႃႈ။
၃၁ မိူဝ်ႈဢၼ်ၶဝ်လႆႈငိၼ်းလွင်ႈဢၼ်ထႃႇဝရႃႉၽြႃးမႃးလူႈမႃးတူၺ်းၵူၼ်းမဵဝ်းဢိသရေႇလတင်းလၢႆဢိၵ်ႇတင်းလွင်ႈဢၼ်မၼ်းၸဝ်ႈလႆႈႁူႉလႆႈႁၼ်တၢင်းဢၼ်ၶဝ်လႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉၸိုင်ၶဝ်ဢွၼ်ၵၼ်ၵူမ်ႈၵွမ်းႁူဝ်လႄႈၵူဝ်းၵႂၢႆႇဢေႃႈ။