Chapter
၃၀
ယိတ်ႉပလၢင်ႇပုၼ်ႈၼၢမ်ႇသႃႇတုတ်ႇၽႆး
၁ ၼႄးၼိုင်ႈၸမ်းမႂ်းတၵ်းလႆႈဢဝ်မႆႉဢၵႃႇသႁဵတ်းယိၸ်ႉပလၢင်ႇပုၼ်ႈဢၼ်တၵ်းတုတ်ႇၽႆးၼၢမ်ႇသႃႇဢေႃႈ။
၂ ယိၸ်ႉပလၢင်ႇၼၼ်ႉတၵ်းလႆႈမီးၼႃႈယၢဝ်းမၼ်းသွၵ်ႇၼိုင်ႈၼႃႈပွတ်းမၼ်းသွၵ်ႇၼိုင်ႈတၵ်းလႆႈပဵၼ်သီႇၸဵင်ႇလႄႈဢၼ်သုင်မၼ်းတၵ်းလႆႈမီးသွင်သွၵ်ႇဢေႃႈ။ၶဝ်လႅမ်မၼ်းၵေႃႈတၵ်းလႆႈပဵၼ်ၼိူဝ်ႉလဵဝ်ၵၼ်တင်းမၼ်းဢေႃႈ။
၃ မႂ်းတၵ်းလႆႈဢဝ်ၶမ်းလွတ်ႈငၢၼ်ႇဢုမ်ႇႁေႃႇၼႃႈၼိူဝ်ႉမၼ်းတင်းၼႃႈႁိမ်းမၼ်းတင်းၶဝ်လႅမ်မၼ်းၸိူဝ်းၼၼ်ႉလႄႈႁဵတ်းၶိူင်ႈၶႅပ်းၶမ်းဢၼ်တၵ်းသႂ်ႇလဵပ်ႈႁွပ်ႈၵႃႈႁိမ်းၼိူဝ်မၼ်းသေဢေႃႈ။
၄ ၵႃႈတႂ်ႈၶိူင်ႈၶႅပ်းၶမ်းၵႃႈတီႈၸဵင်ႇယိၸ်ႉပလၢင်ႇသွင်ၼႃႈၼၼ်ႉမႂ်းတၵ်းလႆႈႁဵတ်းၶူၺ်ႇၶမ်းသႂ်ႇယေႈၼႃႈသွင်ၶူၺ်ႇဢေႃႈ။တၵ်းလႆႈပဵၼ်တီႈသွတ်ႇၵၢၼ်းပုၼ်ႈဢၼ်တၵ်းႁၢပ်ႇယိၸ်ႉပလၢင်ႇဢေႃႈ။
၅ ၵၢၼ်းၸိူဝ်းၼၼ်ႉၵေႃႈမႂ်းတၵ်းလႆႈဢဝ်မႆႉဢၵႃႇသႁဵတ်းလႄႈဢဝ်ၶမ်းလွတ်ႈငၢၼ်ႇဢုမ်ႇႁေႃႇသေဢေႃႈ။
၆ မႂ်းတၵ်းလႆႈဢဝ်ယိၸ်ႉပလၢင်ႇၼၼ်ႉဝႆႉၵႃႈတီႈၽၢႆႇၼႃႈၽႃႈၵင်ႈဢၼ်ၵင်ႈတိူၵ်ႈဢၼ်ဝႆႉၶိူင်ႈဢၼ်ၶၢမ်ႇသၢၵ်ႈသေႇၼၼ်ႉၵႃႈတီႈၽၢႆႇၼႃႈပလၢင်ႇတီႈၽေႇဢပျႅတ်ႈဢၼ်မီးၵႃႈၼိူဝ်ၶိူင်ႈဢၼ်ၶၢမ်ႇသၢၵ်ႈသေႇၼၼ်ႉတီႈဢၼ်ၵဝ်တၵ်းထူပ်းၵၼ်တင်းမႂ်းၼၼ်ႉဢေႃႈ။
၇ ဢႃႇရုၼ်ႇတၵ်းလႆႈတုတ်ႇၽႆးၼၢမ်ႇသႃႇဢၼ်ႁွမ်ဢၼ်ႁူၺ်းၵႃႈၼိူဝ်မၼ်းၼၼ်ႉဢေႃႈ။မၼ်းတၵ်းလႆႈတုတ်ႇၽႆးမိူဝ်ႈဢၼ်မၼ်းမႄးႁႅၼ်းၵွၵ်းတႆႈၽႆးၸိူဝ်းၼၼ်ႉၵူႈၼႂ်ဢေႃႈ။
၈ ၶိင်ႇႁူဝ်ၶမ်ႈၵေႃႈမိူဝ်ႈဢၼ်ဢႃႇရုၼ်ႇတႆႈၵွၵ်းၽႆးၸိူဝ်းၼၼ်ႉၸိုင်မၼ်းတၵ်းလႆႈတုတ်ႇၽႆးၼၢမ်ႇသႃႇဢၼ်ၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်ႈတၢမ်ႈတၵ်းလႆႈတုတ်ႇၽႆးၼၢမ်ႇသႃႇၵႃႈတီႈၽၢႆႇၼႃႈထႃႇဝရႃႉၽြႃးယူႇသေႇသေႇၼၼ်ႉဢေႃႈ။
၉ သူဢမ်ႇလႆႈဢဝ်ၼၢမ်ႇသႃႇတၢင်ႇၸိူဝ်ႉတၢင်ႇမဵဝ်းယိၸ်ႉဢၼ်တုတ်ႇၽႆးတၢင်ႇၸိူဝ်ႉတၢင်ႇမဵဝ်းတၢင်းပုၵ်ႉၸေႃႇၽေႃးၸဵၼ်ႇတၢင်ႇၸိူဝ်ႉတၢင်ႇမဵဝ်းပုၵ်ႉၸေႃႇၵႃႈၼိူဝ်ယိၸ်ႉပလၢင်ႇၼၼ်ႉ။တေဢမ်ႇလႆႈသွၼ်းလေႃႇၵႃႈၼိူဝ်မၼ်း။
၁၀ ဢႃႇရုၼ်ႇၼၼ်ႉယေႈပီႊယေႈပွၵ်ႈတၵ်းလႆႈႁဵတ်းမင်ႇၵလႃႇတၢင်းဢၼ်ၽေႇဢပျႅတ်ႈၵႃႈၼိူဝ်ၶဝ်လႅမ်မၼ်းဢေႃႈ။ၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်ႈတၢမ်ႈယေႈပီႊယေႈပွၵ်ႈတၵ်းလႆႈဢဝ်လိူတ်ႈတူဝ်ယိၸ်ႉပုၼ်ႈဢၼ်တၵ်းၽေႇဢပျႅတ်ႈၼၼ်ႉႁဵတ်းမင်ႇၵလႃႇတၢင်းဢၼ်ၽေႇဢပျႅတ်ႈဢေႃႈ။ပဵၼ်ယိၸ်ႉပလၢင်ႇဢၼ်မူတ်းၸၢင်ႇၼႃႇလူင်လၢင်တီႈထႃႇဝရႃႉၽြႃးဢေႃႈ၊ဝႃႈၼင်ႇၼႆဢေႃႈ။
ငိုၼ်းတၢင်းဢၼ်ထုတ်ႇဢဝ်
၁၁ ၵမ်းၼၼ်ႉထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇထႅင်ႈလႄႈဝႃႈၸမ်း၊-မိူဝ်ႈဢၼ်မႂ်းၼပ်ႉဢၢၼ်ႇဢဝ်ၸရၢင်းၵူၼ်းမဵဝ်းဢိသရေႇလတင်းလၢႆၸွမ်းလူၺ်ႈၶဝ်ၸိူဝ်းဢၼ်ၶၢမ်ႇတၢင်းဢၼ်ၼပ်ႉဢၢၼ်ႇၼၼ်ႉၼႂ်း
၁၂ ၶိင်ႇမိူဝ်ႈဢၼ်ၼပ်ႉဢၢၼ်ႇယူႇၼၼ်ႉၸိုင်ၵူၼ်းၵႃႈမီးတင်းသဵင်ႈတင်းလူင်ႁင်းၽႂ်ႁင်းမၼ်းတၵ်းလႆႈသၢၵ်ႈၵၢပ်ႈၵႃႊၶၼ်တီႈထႃႇဝရႃႉၽြႃးပုၼ်ႈဢၼ်တၵ်းထုတ်ႇဢဝ်ဢသၢၵ်ႈတူဝ်ၸဝ်ႈၵဝ်ႇႁႂ်ႈၶဝ်လႆႈၵၢင်းလွတ်ႈတင်းၽေးၼႂ်းၶိင်ႇမိူဝ်ႈဢၼ်ၼပ်ႉဢၢၼ်ႇယူႇၼၼ်ႉဢေႃႈ။
၁၃ ၶဝ်ၸိူဝ်းဢၼ်ၶၢမ်ႇတၢင်းဢၼ်ၼပ်ႉဢၢၼ်ႇလႄႈၶဝ်ႈပႃးၼႂ်းၸရၢင်းတင်းသဵင်ႈတင်းလူင်ၼၼ်ႉယေႈၵေႃႉတၵ်းလႆႈပၼ်ၶိုင်ႈၵျၢပ်ႈၼိုင်ႈၸွမ်းလူၺ်ႈၼမ်ႉၼၵ်းငိုၼ်းၸဝ်ႈၵျၢပ်ႈသၶေႇလၼၼ်ႉပဵၼ်ပုၼ်ႈဢၼ်တၵ်းလႆႈသၢၵ်ႈၵၢပ်ႈတီႈထႃႇဝရႃႉၽြႃးဢေႃႈ။ၵျၢပ်ႈၼိုင်ႈၸမ်းပဵၼ်ၵေႇရႃႉသၢဝ်းၼိုင်ႈဢေႃႈ။
၁၄ ၶဝ်ၸိူဝ်းဢၼ်ၶၢမ်ႇတၢင်းဢၼ်ၼပ်ႉဢၢၼ်ႇလႄႈၶဝ်ႈပႃးၼႂ်းၸရၢင်းၵူႈၵေႃႉဢၼ်ၸႃႉၸဵမ်ဢသၢၵ်ႈလႆႈသၢဝ်းၼိုင်ႈလႄႈဢသၢၵ်ႈလိူဝ်သၢဝ်းၵႂႃႇတင်းသဵင်ႈတင်းလူင်ၼၼ်ႉတၵ်းလႆႈဢွၼ်ၵၼ်ႁဵတ်းတၢင်းပုၵ်ႉၸေႃႇၸိူဝ်ႉၼင်ႇၼၼ်တီႈထႃႇဝရႃႉၽြႃးဢေႃႈ။
၁၅ မိူဝ်ႈဢၼ်ႁဵတ်းတၢင်းပုၵ်ႉၸေႃႇတီႈထႃႇဝရႃႉၽြႃးႁႂ်ႈလႆႈထုတ်ႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉၸိုင်ၶဝ်ၸိူဝ်းဢၼ်ၸင်ႇမၢၵ်ႈၸင်ႇမီးၼၼ်ႉယင်းဢမ်ႇလိူဝ်၊ၶဝ်ၸိူဝ်းဢၼ်ၽၢၼ်ၼၼ်ႉၵေႃႈယင်းဢမ်ႇယွမ်းလႄႈၵူၼ်းၵူႈၵေႃႉတၵ်းလႆႈပၼ်ငိုၼ်းၵျၢပ်ႈၼိုင်ႈဢေႃႈ။
၁၆ မႂ်းတၵ်းလႆႈဢဝ်ငိုၼ်းတၢင်းဢၼ်ထုတ်ႇဢဝ်ၵူၼ်းမဵဝ်းဢိသရေႇလၸိူဝ်းၼၼ်ႉလႄႈဝႆႉပုၼ်ႈၸရိၵ်ႈသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈပုၼ်ႈလွင်ႈၼင်ႇႁိုဝ်တၵ်းလႆႈပဵၼ်သၢၵ်ႈသေႇၵူၼ်းမဵဝ်းဢိသရေႇလတင်းလၢႆၵႃႈတီႈၽၢႆႇၼႃႈထႃႇဝရႃႉၽြႃးႁႂ်ႈလႆႈထုတ်ႇဢဝ်ဢသၢၵ်ႈသူၼၼ်ႉဢေႃႈ၊ဝႃႈၼင်ႇၼႆဢေႃႈ။
ၵွၵ်းတွင်းလိူင်ပုၼ်ႈတၵ်းသုၵ်ႈ
၁၇ ၵမ်းၼၼ်ႉထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇထႅင်ႈလႄႈဝႃႈၸမ်း၊-မႂ်းတၵ်းလႆႈႁဵတ်းၵွၵ်းတွင်းလိူင်လူင်ဢၼ်မီးတိၼ်တွင်းလိူင်ၼၼ်ႉပုၼ်ႈဢၼ်တၵ်းသုၵ်ႈတိၼ်သုၵ်မိုဝ်းလႄႈ
၁၈ ဢဝ်ဝႆႉၵႃႈတီႈၵႄႈဝူင်ႈၵၢင်သုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈတင်းယိၸ်ႉပလၢင်ႇၼၼ်ႉလႄႈဢဝ်ၼမ်ႉသႂ်ႇဝႆႉဢေႃႈ။
၁၉ ဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉတၵ်းလႆႈသုၵ်ႈတိၼ်သုၵ်ႈမိုဝ်းၶဝ်ၵႃႈၼႂ်းမၼ်းၼၼ်ႉဢေႃႈ။
၂၀ မိူဝ်ႈဢၼ်ၶဝ်ၶဝ်ႈၵႃႈၼႂ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉဢိၵ်ႇတင်းမိူဝ်ႈဢၼ်ၶဝ်သုတ်ႉၸပ်းသုတ်ႉၸူးတီႈယိၸ်ႉပလၢင်ႇႁႂ်ႈလႆႈပွင်ႁဵတ်းဢမူႉၸဝ်ႈလႄႈပုၵ်ႉၸေႃႇယိၸ်ႉဢၼ်တုတ်ႇၽႆးတီႈထႃႇဝရႃႉၽြႃးၼၼ်ႉၸိုင်ၶဝ်တၵ်းလႆႈသုၵ်ႈတိၼ်သုၵ်ႈမိုဝ်းၶဝ်ႁႂ်ႈလႆႈၵၢင်းလွတ်ႈတင်းၽေးတၢင်းတၢႆဢေႃႈ။
၂၁ ၼင်ႇၼၼ်လႄႈၶဝ်တၵ်းလႆႈသုၵ်ႈတိၼ်သုၵ်ႈမိုဝ်းၶဝ်ႁႂ်ႈၵၢင်းလွတ်ႈတင်းၽေးတၢင်းတၢႆဢေႃႈ။တၵ်းလႆႈပဵၼ်ထုင်းိင်ႈတြႃးၸဝ်ႈတီႈၶဝ်သေႇသေႇဢိၵ်ႇတင်းၸူဝ်ႈလုၵ်ႈပၢၼ်လၢၼ်ၶဝ်သိုပ်ႇသိုပ်ႇတၢမ်ႈတၢမ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။
ၼမ်ႉမၼ်းဢၼ်ပၼ်ၽိၵ်ႉသိၵ်ႈ
၂၂ ၵမ်းၼၼ်ႉထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇထႅင်ႈလႄႈဝႃႈၸမ်း၊-
၂၃ ၸွမ်းလူၺ်ႈၼမ်ႉၼၵ်းငိုၼ်းၸဝ်ႈၵျၢပ်ႈသၶလေၼၼ်ႉလႄႈမႂ်းတၵ်းလႆႈဢဝ်ၼၢမ်ႇသႃႇဢၼ်မျၢတ်ႈၼႃႇလူင်လၢင်၊ဢၼ်ဝႃႈယၢင်ႊမူႉရၢၼ်ႇဢၼ်ပဵၼ်ၼမ်ႉယူႇႁႃႈပၢၵ်ႇၵျၢပ်ႈ၊ၵိင်ႇႁွမ်ၶိုင်ႈၼိုင်ႈဢၼ်ၼၼ်ႉ
၂၄ သွင်ပၢၵ်ႇပၢႆႁႃႈသိပ်းၵျၢပ်ႈတင်းသၢမ်ပူးဢၼ်ႁွမ်သွင်ပၢၵ်ႇပၢႆႁႃႈသိပ်းၵျၢပ်ႈ၊မႆႉႁွမ်ႁိူတ်ႈႁႃႈပၢၵ်ႇၵျၢပ်ႈဢိၵ်ႇတင်းၼမ်ႉမၼ်းသၢၼ်ႇလုၼ်ႇႁီႉၼႃႉၼိုင်ႈၸိူဝ်းၼၼ်ႉလႄႈၽေႃႇႁဵတ်းၼမ်ႉမၼ်းဢၼ်မူတ်းၸၢင်ႇပုၼ်ႈဢၼ်တႃးဢၼ်ဝႃႈၼမ်ႉမၼ်းဢၼ်ႁွမ်ဢၼ်ႁူၺ်းၼၼ်ႉဢေႃႈ။
၂၅ တၵ်းလႆႈပဵၼ်ၼမ်ႉမၼ်းဢၼ်မူတ်းၸၢင်ႇပုၼ်ႈဢၼ်တၵ်းတႃးၼၼ်ႉဢေႃႈ။
၂၆ မႂ်းတၵ်းလႆႈဢဝ်တင်းၼမ်ႉမၼ်းၼၢမ်ႇသႃႇၼၼ်ႉတႃးသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈဢိၵ်ႇတင်းတိူၵ်ႈတီႈဢၼ်ဝႆႉၶိူင်ႈဢၼ်ၶၢမ်ႇသၢၵ်ႈသေႇ၊ၶူင်ႇတီႈၵိၼ်ဢိၵ်ႇတင်းၶိူင်ႈမၼ်းၵႃႈမီးတင်းသဵင်ႈတင်းလူင်ၶူင်ႇတီႈတႆႈၽႆးဢိၵ်ႇတင်းၶိူင်ႈမၼ်းၵႃႈမီးတင်းသဵင်ႈတင်းလူင်ပလၢင်ႇဢၼ်တုတ်ႇၽႆးၼၢမ်ႇသႃႇယိၸ်ႉပလၢင်ႇတီႈဢၼ်တုတ်ႇၽႆး
၂၈ တူဝ်ယိၸ်ႉဢိၵ်ႇတင်းၶိူင်ႈမၼ်းၵႃႈမီးတင်းသဵင်ႈတင်းလူင်ၵွၵ်းလူင်ဢိၵ်ႇတင်းတိၼ်မၼ်းလႄႈႁႂ်ႈမူတ်းၸၢင်ႇၸိူဝ်ႉၼင်ႇၼၼ်ပုၼ်ႈလွင်ႈၼင်ႇႁိုဝ်ၸိူဝ်းၼၼ်ႉတၵ်းပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။
၂၉ ၶိူင်ႈပိူင်ၵႃႈဢၼ်တၵ်းတိူဝ်ႉထုၵ်ႇၶိူင်ႈၸိူဝ်းၼၼ်ႉၵေႃႈတၵ်းလႆႈပဵၼ်ဢၼ်မူတ်းၸၢင်ႇဢေႃႈ။
၃၀ မႂ်းတၵ်းလႆႈဢဝ်တႃးဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉလႄႈႁႂ်ႈၶဝ်မူတ်းၸၢင်ႇပုၼ်ႈလွင်ႈၼင်ႇႁိုဝ်ၶဝ်တၵ်းမီးဢရႃႇယိတ်ႉပရေႃးႁိၵ်ႈလႄႈပွင်ႁဵတ်းဢမူႉၸဝ်ႈၵႃႈတီႈၽၢႆႇၼႃႈၵဝ်ဢေႃႈ။
၃၁ ဢၼ်မႂ်းတၵ်းလႆႈမွၵ်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈၸမ်း၊-ၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်ႈတၢမ်ႈၼၼ်ႉၼမ်ႉမၼ်းၼႆႉတၵ်းလႆႈပဵၼ်ၼမ်ႉမၼ်းဢၼ်မူတ်းၸၢင်ႇပုၼ်ႈဢၼ်တၵ်းတႃးၼၼ်ႉတီႈၵဝ်ဢေႃႈ။
၃၂ ဢမ်ႇလႆႈဢဝ်ထွၵ်ႇဢဝ်သႂ်ႇၵႃႈၼိူဝ်တူဝ်ၵူၼ်း။ဢမ်ႇလႆႈၽေႃႇလႆႈႁဵတ်းၼမ်ႉမၼ်းတၢင်းဢၼ်မိူၼ်ၸိူဝ်ႉၼင်ႇဢၼ်ၽေႃႇႁဵတ်းၼမ်ႉမၼ်းၼႆႉၼၼ်ႉ။ပိူဝ်ႈဢၼ်မူတ်းၸၢင်ႇလႄႈသူတၵ်းလႆႈမၢတ်ႈပဵၼ်ဢၼ်မူတ်းၸၢင်ႇဢေႃႈ။
၃၃ ၵေႃႉဢၼ်ၽေႃႇႁဵတ်းႁႂ်ႈမိူၼ်ၸိူဝ်ႉၼင်ႇၼမ်ႉမၼ်းၼၼ်ႉၵေႃႉဢၼ်ဢဝ်တႃးတီႈၵူၼ်းၵေႃႉဢၼ်ဢမ်ႇၸၢပ်ႈသႅင်ႇၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းမဵဝ်းၵူၼ်းၸိူဝ်ႉၶိူဝ်းမၼ်းဢေႃႈ၊ဝႃႈၼင်ႇၼႆဢေႃႈ။
ၼၢမ်ႇသႃႇ
၃၄ ၵမ်းၼၼ်ႉထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇထႅင်ႈလႄႈဝႃႈၸမ်း၊-မႂ်းတၵ်းလႆႈဢဝ်မဵဝ်းၼၢမ်ႇသႃႇဢၼ်ႁွမ်ဢၼ်ႁူၺ်းဢၼ်ဝႃႈယၢင်ႊၼတပ်ႉ၊ပိူၵ်ႇႁွႆဢၼ်ႁွမ်ယၢင်ႊၵႃႇလပၢၼ်ႇတင်းယၢင်ႊလေႃႇပၢၼ်ႇဢၼ်ၸႅတ်ႈၸႅတ်ႈၸိူဝ်းၼၼ်ႉလႄႈၸင်ႊႁိဝ်ႈၼမ်ႉၼၵ်းမၼ်းပဵင်းပဵင်းၵၼ်ၵူႈမဵဝ်းဢေႃႈ။
၃၅ မႂ်းတၵ်းလႆႈၽေႃႇႁဵတ်းၼၢမ်ႇသႃႇဢၼ်ဝႃႈယႃႈဢၼ်ႁွမ်ဢၼ်ႁူၺ်းၽေႃႇႁဵတ်းၸွမ်းၼင်ႇပိင်ႇၺႃႇမေႃယႃဢၼ်ၽေႃႇႁဵတ်းဢၼ်ႁွမ်ဢၼ်ႁူၺ်းၼၼ်ႉ၊ဢၼ်ဢဝ်ၵိူဝ်သႂ်ႇလႄႈၸိုၼ်ႈလီသႂ်ႇလီလႄႈမူတ်းၸၢင်ႇၼၼ်ႉဢေႃႈ။
၃၆ မႂ်းတၵ်းလႆႈဢဝ်ၵမ်ႈၽွင်ႈတမ်ဢွၼ်ႇဢွၼ်ႇလႄႈဝႆႉၵႃႈတီႈၽၢႆႇၼႃႈၶိူင်ႈဢၼ်ၶၢမ်ႇသၢၵ်ႈသေႇၵႃႈၼႂ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈတီႈဢၼ်ၵဝ်တၵ်းထူပ်းၵၼ်တင်းမႂ်းၼၼ်ႉဢေႃႈ။တၵ်းလႆႈပဵၼ်ဢၼ်မူတ်းၸၢင်ႇၼႃလူင်လၢင်တီႈသူဢေႃႈ။
၃၇ ၼၢမ်ႇသႃႇဢၼ်မႂ်းၽေႃႇႁဵတ်းၸိူဝ်ႉၼင်ႇၼၼ်ၼၼ်ႉသူဢမ်ႇလႆႈၽေႃႇလႆႈႁဵတ်းပုၼ်ႈသူၸွမ်းၼင်ႇၼႄးဢၼ်ၽေႃႇႁဵတ်းမၼ်းၼၼ်ႉ။တၵ်းလႆႈပဵၼ်ဢၼ်မူတ်းၸၢင်ႇပုၼ်ႈထႃႇဝရႃႉၽြႃးတီႈသူဢေႃႈ။
၃၈ ၽူႈလႂ်သေဢမ်ႇဝႃႈၵေႃႉဢၼ်ၽေႃႇႁဵတ်းႁႂ်ႈမိူၼ်ၸိူဝ်ႉၼင်ႇၼၢမ်ႇသႃႇၼၼ်ႉပုၼ်ႈဢၼ်မၼ်းတၵ်းသုတ်ႇၼူမ်ၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ၊ဝႃႈၼင်ႇၼႆဢေႃႈ။