Chapter
၂၈
ၶုဝ်းၼုင်ႈဢၼ်မူတ်းၸၢင်ႇ
၁ လွင်ႈၼင်ႇႁိုဝ်ပီႈၸၢႆးမႂ်းဢႃႇရုၼ်ႇၼၼ်ႉတၵ်းလႆႈပွင်ႁဵတ်းဢမူႉယိတ်ႉပရေႃးႁိၵ်ႈၵႃႈတီႈၽၢႆႇၼႃႈၵဝ်ၸိုင်ဢဝ်တင်းလုၵ်ႈၸၢႆးမၼ်းဢၼ်ဝႃႈ၊ၼႃႇတပ်ႉ၊ဢၽိႁူႉ၊ဢေႇလႃႇၸႃႇတင်းဢိသမႃႇၸိူဝ်းၼၼ်ႉဢွၵ်ႇသေၵႃႈၼႂ်းၵူၼ်းမဵဝ်းဢိသရေႇလတင်းလၢႆလႄႈႁႂ်ႈသုတ်ႉၸပ်းသုတ်ႉၸူးတီႈမႂ်းတႃႉ။
၂ မႂ်းတၵ်းလႆႈႁဵတ်းၶူဝ်းၼုင်ႈဢၼ်မူတ်းၸၢင်ႇပၼ်တီႈပီႈၸၢႆးမႂ်းဢႃႇရုၼ်ႇၼၼ်ႉပုၼ်ႈဢၼ်တၵ်းပဵၼ်မုၼ်ပဵၼ်သရေႇဢေႃႈ။
၃ မႂ်းတၵ်းလႆႈသင်ႇလၢတ်ႈဝႆႉတီႈၵူၼ်းဢၼ်မီးပိင်ႇၺႃႇဢၼ်ၵဝ်ႁႂ်ႈတဵမ်ဝႆႉတင်းၺၢၼ်ႇၵႃႈၼႂ်းၸႂ်ၼၼ်ႉတင်းသဵင်ႈတင်းလူင်ႁႂ်ႈၶဝ်လႆႈဢွၼ်ၵၼ်ႁဵတ်းၶူဝ်းၼုင်ႈပၼ်တီႈဢႃႇရုၼ်ႇႁႂ်ႈမၼ်းလႆႈမူတ်းၸၢင်ႇလႄႈမီးဢၶႂၢင်ႉဢၼ်လႆႈပွင်ႁဵတ်းဢမူႉယိတ်ႉပရေႃးႁိၵ်ႈၵႃႈတီႈၽၢႆႇၼႃႈၵဝ်ၼၼ်ႉဢေႃႈ။
၄ ၶူဝ်းၼုင်ႈဢၼ်တၵ်းလႆႈႁဵတ်းၸမ်း၊ပဵၼ်ၶိူင်ႈဝႆႉၼႃႈဢူၵ်း၊သိူဝ်ႈသုပ်း၊သိူဝ်ႈယၢဝ်း၊သိူဝ်ႈပုတ်းဢၼ်ႁၢင်ႈၶိူင်ႈ၊ၶဵၼ်းႁူဝ်တင်းသၢႆႁတ်ႉဢႅဝ်ဢေႃႈ။ၶဝ်တၵ်းလႆႈႁဵတ်းၶူဝ်းဢၼ်မူတ်းၸၢင်ႇပၼ်ပီႈၸၢႆးမႂ်းဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉႁႂ်ႈမၼ်းလႆႈပွင်ႁဵတ်းဢမူႉယိတ်ႉပရေႃးႁိၵ်ႈၵႃႈတီႈၽၢႆႇၼႃႈၵဝ်ၼႆႉဢေႃႈ။
၅ ၶဝ်တၵ်းလႆႈဢဝ်ၶမ်း၊ၶူဝ်းဢၼ်သွမ်ႇၶူဝ်းဢၼ်ၵမ်ႇၶူဝ်းဢၼ်လႅင်ႊဢိၵ်ႇတင်းပိၵ်ႈၶျေႃးဢေႃႈ။
ၶိူင်ႈႁဵတ်းသိူဝ်ႈသုပ်း
၆ ၶဝ်တၵ်းလႆႈဢဝ်ၶမ်း၊ၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊဢိၵ်ႇတင်းပိၵ်ႈၶျေႃးတေႃးႁၢင်ႈၶိူင်ႈႁဵတ်းသိူဝ်ႈသုပ်းဢေႃႈ။
၇ ၼင်ႇႁိုဝ်မၼ်းတၵ်းႁွႆႈၸပ်းၵၼ်ၸိုင်တၵ်းလႆႈမီးသၢႆတွႆးသွင်သဵၼ်ႈၵႃႈတီႈႁိမ်းသုတ်းမၼ်းသွင်ၽၢႆႇဢေႃႈ။
၈ သၢႆႁတ်ႉဢႅဝ်ဢၼ်ႁၢင်ႈၶိူင်ႈဢၼ်ၸၢပ်ႈသႅင်ႇၵၼ်တင်းတၢင်းဢၼ်ၼုင်ႈသိူဝ်ႈသုပ်းဢၼ်မီးၵႃႈတီႈမၼ်းၵေႃႈတၵ်းလႆႈပဵၼ်မိူၼ်ၸိူဝ်ႉၼင်ႇသိူဝ်ႈသုပ်းၼၼ်ႉလႄႈပဵၼ်ၼိူဝ်ႉလဵဝ်ၵၼ်တင်းမၼ်းဢေႃႈ။တၵ်းလႆႈဢဝ်ၶမ်းဢိၵ်ႇတင်းၶူဝ်းဢၼ်သွမ်ႇၶူဝ်းဢၼ်ၵမ်ႇ၊
၉ ၶူဝ်းဢၼ်လႅင်ႊ၊ပိၵ်ႈၶျေႃးႁဵတ်းဢေႃႈ။မႂ်းတၵ်းလႆႈဢဝ်သႅင်ၸၢႆးၶႃးယွတ်ႈသွင်လုၵ်ႈလႄႈဢဝ်ဢႅၵ်ႉၶရႃႇတူဝ်လိၵ်ႈၼႃႇမႃႉၸိုဝ်ႈသဵင်မဵဝ်းၵူၼ်းဢိသရေႇလတင်းလၢႆတၢင်ႇသႂ်ႇဝႆႉၵႃႈၼိူဝ်ၼၼ်ႉဢေႃႈ။
၁၀ ၸွမ်းလူၺ်ႈဢသၢၵ်ႈၵေႃႉယႂ်ႇတေႃႇထိုင်ႁွတ်ႈၵေႃႉလဵၵ်ႉသေလႄႈဢဝ်ၼႃႇမႃႉၸိုဝ်ႈသဵင်တၢင်ႇသႂ်ႇဝႆႉၵႃႈတီႈယေႈလုၵ်ႈႁူၵ်းဢၼ်ဢေႃႈ။
၁၁ မိူၼ်ၸိူဝ်ႉၼင်ႇၼၼ်ဢဝ်ဢႅၵ်ႉၶရႃႇတူဝ်လိၵ်ႈတၢင်ႇသႂ်ႇဝႆႉၵႃႈၼိူဝ်တၼ်းသိၵ်ႈၼၼ်ႉတၵ်းလႆႈဢဝ်တင်းတၢင်းႁဵတ်းဢၼ်မေႃႁဵတ်းတီႈသႅင်ၼၼ်ႉဢဝ်ဢႅၵ်ႉၶရႃႇတူဝ်လိၵ်ႈၼႃႇမႃႉၸိုဝ်သဵင်မဵဝ်းၵူၼ်းဢိသရေႇလတင်းလၢႆတၢင်ႇသႂ်ႇၵႃႈၼိူဝ်သႅင်သွင်လုၵ်ႈၼၼ်ႉလႄႈသႂ်ႇဝႆႉၵႃႈၼႂ်းႁိူၼ်းၶမ်းမၼ်းဢေႃႈ။
၁၂ မႂ်းတၵ်းလႆႈဢဝ်သႅင်သွင်လုၵ်ႈၼၼ်ႉသႂ်ႇဝႆႉၵႃႈၼိူဝ်သၢႆတွႆးသိူဝ်ႈသုပ်းႁႂ်ႈပဵၼ်သႅင်ပုၼ်ႈဢၼ်မၼ်းၸဝ်ႈတၵ်းၶုၵ်းၸႂ်လႆႈၶႆႈၸႂ်ထူပ်းၵူၼ်းမဵဝ်းဢိသရေႇလတင်းလၢႆဢေႃႈ။ဢႃႇရုၼ်ႇတၵ်းလႆႈပႃးဢဝ်ၼႃႇမႃႉၸိုဝ်ႈသဵင်ၶဝ်ၼၼ်ႉဝႆႉၵႃႈၼိူဝ်ႁူဝ်မႃႇမၼ်းၵႃႈတီႈၽၢႆႇၼႃႈထႃႇဝရႃႉၽြႃးပုၼ်ႈဢၼ်မၼ်းၸဝ်ႈတၵ်းၶုၵ်းၸႂ်လႆႈၶႆႈၸႂ်ထူပ်းၶဝ်ဢေႃႈ။
၁၃ -၁၄ မႂ်းတၵ်းလႆႈဢဝ်ၶမ်းႁဵတ်းလူင်ႇမွၵ်ႇၶမ်းဢေႃႈ။သၢႆသွင်သဵၼ်ႈဢၼ်လိမ်ႇၵဵဝ်ႈၵေႃႈမႂ်းတၵ်းလႆႈဢဝ်ၶမ်းလွတ်ႈငၢၼ်ႇၽၼ်ႈႁဵတ်းလႄႈႁဵတ်းသေယဝ်ႉတၵ်းလႆႈဢဝ်ႁွႆႈသႂ်ႇၵႃႈတီႈလူင်ႇမွၵ်ႇၶမ်းၼၼ်ႉဢေႃႈ။
ၶိူင်ႈဝႆႉၼႃႈဢူၵ်း
၁၅ မႂ်းတၵ်းလႆႈတမ်ႇၵၢမ်းၵၼ်တေႃးႁၢင်ႈၶိူင်ႈႁဵတ်းၶိူင်ႈဝႆႉၼႃႈဢူၵ်းပျႃႇတိၵ်ႈမိူၼ်ၸိူဝ်ႉၼင်ႇဢၼ်ႁဵတ်းသိူဝ်ႈသုပ်းၼၼ်ႉဢေႃႈ။တၵ်းလႆႈဢဝ်ၶမ်း၊ၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊဢိၵ်ႇတင်းပိၵ်ႈၶျေႃးႁဵတ်းဢေႃႈ။
၁၆ တၵ်းလႆႈတူပ်ႉႁဵတ်းသွင်ထၢပ်ႈလႄႈၼႃႈယၢဝ်းမၼ်းၶိုပ်ႈၼိုင်ႈၼႃႈပွတ်းမၼ်းၶိုပ်ႈၼိုင်ႈတၵ်းလႆႈပဵၼ်သီႇၸဵင်ႇဝႆႉဢေႃႈ။
၁၇ ၵႃႈတီႈၶိူင်ႈဝႆႉၼႃႈဢူၵ်းၼၼ်ႉမႂ်းတၵ်းလႆႈႁဵတ်းႁိူၼ်းသႅင်လႄႈဢဝ်သႅင်ဢၼ်မျၢတ်ႈၼၼ်ႉၸီႇသီႇထႅဝ်ဢေႃႈ။ထႅဝ်ပထမၸမ်းပဵၼ်သႅင်လႅင်ႊ၊ဢုၵ်ႉသၽူႉရႃးတင်းမျႃႉဢေႃႈ။
၁၈ ထႅဝ်တုတိယၸမ်းပဵၼ်ပတမျႃး၊ၼီႇလႃႇတင်းၸိင်ႇဢေႃႈ။
၁၉ ထႅဝ်တတိယၸမ်းပဵၼ်ဝႃႇၵိၼ်ႇသူႉ၊မႁူႇရႃႇတင်းၵေႃႉမုၵ်ႉဢေႃႈ။
၂၀ ထႅဝ်ၸတုၵ်ႉထၸမ်းပဵၼ်သႅင်မျၢၵ်ႉရွႆးၸၢႆးၶႃးယွတ်ႇတင်းၼၵႃးသွႆႇဢေႃႈ။သႅင်ႁင်းၽႂ်ႁင်းမၼ်းတၵ်းလႆႈဢဝ်ၸီႇသႂ်ႇၼႂ်းႁိူၼ်းၶမ်းမၼ်းဢေႃႈ။
၂၁ သႅင်ၸိူဝ်းၼၼ်ႉၸွမ်းၵႃႈၼင်ႇၼႃႇမႃႉၸိုဝ်သဵင်ၵူၼ်းမဵဝ်းဢိသရေႇလၼၼ်ႉသေလႄႈတၵ်းလႆႈမီးသိပ်းသွင်လုၵ်ႈၸွမ်းၵႃႈၼင်ႇၼႃႇမႃႉၸိုဝ်သဵင်ၶဝ်မီးၼၼ်ႉဢေႃႈ။တၵ်းလႆႈပဵၼ်မိူၼ်ၸိူဝ်ႉၼင်ႇဢၼ်ဢဝ်ဢႅၵ်ႉၶရႃႇတူဝ်လိၵ်ႈတၢင်ႇသႂ်ႇဝႆႉၵႃႈၼိူဝ်တၼ်းသိၵ်ႈၼၼ်ႉလႄႈပဵၼ်ပုၼ်ႈမဵဝ်းသိပ်းသွင်ပႃးႁင်းၽႂ်ႁင်းမၼ်းၵႃႈၼင်ႇၼႃႇမႃႉၸိုဝ်ႈသဵင်ၶဝ်မီးၼၼ်ႉဢေႃႈ။
၂၂ ၵႃႈတီႈၽၢႆႇၼိူဝ်ၶိူင်ႈဝႆႉၼႃႈဢူၵ်းၼၼ်ႉမႂ်းတၵ်းလႆႈဢဝ်ၶမ်းလွတ်ႈငၢၼ်ႇႁဵတ်းသၢႆလိမ်ႇၵဵဝ်ႈဢၼ်လႆႈၽၼ်ႈႁဵတ်းၼၼ်ႉသႂ်ႇဢေႃႈ။
၂၃ ၵႃႈတီႈၶိူင်ႈဝႆႉၼႃႈဢူၵ်းၼၼ်ႉမႂ်းတၵ်းလႆႈႁဵတ်းၶူၺ်ႇၶမ်းသွင်ဢၼ်လႄႈဢဝ်ၶူၺ်ႇသွင်ဢၼ်ၼၼ်ႉသႂ်ႇဝႆႉၵႃႈတီႈၸဵင်ႇၶိူင်ႈဝႆႉၼႃႈဢူၵ်းၼၼ်ႉသွင်ၸဵင်ႇဢေႃႈ။
၂၄ မႂ်းတၵ်းလႆႈဢဝ်သၢႆၶမ်းဢၼ်ၽၼ်ႈဝႆႉသွင်သဵၼ်ႈၼၼ်ႉသွတ်ႇသႂ်ႇၵႃႈၼႂ်းၶူၺ်ႇသွင်ဢၼ်၊ဢၼ်မီးၵႃႈတီႈၸဵင်ႇၶိူင်ႈဝႆႉၼႃႈဢူၵ်းၼၼ်ႉဢေႃႈ။
၂၅ ပၢႆသၢႆဢၼ်ၽၼ်ႈဝႆႉသွင်သဵၼ်ႈၼၼ်ႉၽၢႆႇၼိုင်ႈၸိုင်မႂ်းတၵ်းလႆႈမတ်ႉၸပ်းၵႃႈတီႈလူင်ႇမွၵ်ႇၶမ်းသွင်ဢၼ်ၼၼ်ႉဝႆႉလႄႈဢဝ်သႂ်ႇဝႆႉၵႃႈၼိူဝ်သၢႆတွႆးသိူဝ်ႈသုပ်းၵႃႈတီႈၽၢႆႇၼႃႈမၼ်းဢေႃႈ။
၂၆ မႂ်းသမ်ႉတၵ်းလႆႈႁဵတ်းၶူၺ်ႇၶမ်းသွင်ဢၼ်လႄႈဢဝ်သႂ်ႇဝႆႉၵႃႈတီႈၸဵင်ႇၼႃႈဢူၵ်းသွင်ၸဵင်ႇၵႃႈတီႈႁိမ်းမၼ်းဢၼ်မီးၽၢႆႇတၢင်းၼႂ်းလႄႈတေႃႇၸပ်းၵၼ်တင်းၼႃႈသိူဝ်ႈသုပ်းၼၼ်ႉဢေႃႈ။
၂၇ ၶူၺ်ႇၶမ်းတၢင်ႇဢၼ်ၵေႃႈမႂ်းတၵ်းလႆႈႁဵတ်းထဵင်ႈသွင်ဢၼ်လႄႈဢဝ်သႂ်ႇဝႆႉၵႃႈတီႈသၢႆတွႆးသိူဝ်ႈသုပ်းၵႃႈႁိမ်းတႂ်ႈမၼ်းၵႃႈတီႈၽၢႆႇၼႃႈမၼ်းၵႃႈတီႈဢၼ်သိူဝ်ႈသုပ်းတင်းသၢႆႁတ်ႉဢႅဝ်ဢၼ်ႁၢင်ႈၶိူင်ႈၼၼ်ႉသိုပ်ႇၵၢမ်းၵၼ်ၼၼ်ႉဢေႃႈ။
၂၈ ၶဝ်တၵ်းလႆႈဢဝ်မႆဢၼ်သွမ်ႇမတ်ႉတွႆးၶူၺ်ႇၶမ်းၼႃႈဢူၵ်းသွင်ဢၼ်ဢိၵ်ႇတင်းၶူၺ်ႇၶမ်းသိူဝ်ႈသုပ်းသွင်ဢၼ်ၼၼ်ႉၸပ်းၵၼ်ဝႆႉဢေႃႈ။ၼင်ႇၼၼ်လႄႈၶိူင်ႈဝႆႉၼႃႈဢူၵ်းၼၼ်ႉတၵ်းႁွႆႈဝႆႉၵႃႈတီႈၽၢႆႇၼိူဝ်သၢႆႁတ်ႉဢႅဝ်ဢၼ်ႁၢင်ႈၶိူင်ႈၵႃႈတီႈသိူဝ်ႈသုပ်းၼၼ်ႉလႄႈယင်းဢမ်ႇၽၢတ်ႇဢမ်ႇယၢၼ်ၵၼ်တင်းသိူဝ်ႈသုပ်းလႄႈမီးယူႇသေႇသေႇဢေႃႈ။
၂၉ ဢႃႇရုၼ်ႇၵေႃႈမိူဝ်ႈဢၼ်ၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉၸိုင်တၵ်းလႆႈပႃးဢဝ်ၼႃႇမႃႉၸိုဝ်သဵင်ၵူၼ်းမဵဝ်းဢိသရေႇလဢၼ်ပႃးၵႃႈတီႈၶိူင်ႈဝႆႉၼႃႈဢူၵ်းပျႃႇတိၵ်ႈၼၼ်ႉဝႆႉၵႃႈၼိူဝ်ႁူဝ်ၸႂ်မၼ်းပုၼ်ႈဢၼ်ထႃႇဝရႃႉၽြႃးတၵ်းၶုၵ်းၸႂ်လႆႈၶႆႈၸႂ်ထူပ်းၶဝ်သေႇသေႇၼၼ်ႉဢေႃႈ။
၃၀ မႂ်းတၵ်းလႆႈဢဝ်ဢူႉရိမ်ႇတင်းထူႉမိမ်ႇသႂ်ႇဝႆႉၵႃႈတီႈၶိူင်ႈဝႆႉၼႃႈဢူၵ်းၼၼ်ႉဢေႃႈ။ဢႃႇရုၼ်ႇၼၼ်ႉမိူဝ်ႈဢၼ်ၶဝ်ႈၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉၸိုင်တၵ်းလႆႈပႃးဢဝ်ၸိူဝ်းၼၼ်ႉဝႆႉၵႃႈၼိူဝ်ႁုဝ်ၸႂ်မၼ်းဢေႃႈ။ၼင်ႇၼၼ်လႄႈဢႃႇရုၼ်ႇတၵ်းလႆႈပႃးဢဝ်တၢင်းဢၼ်မၼ်းၸီႇယၢင်ႇၼႂ်းဢမူႉၵူၼ်းမဵဝ်းဢိသရေႇလၸိူဝ်းၼၼ်ႉဝႆႉၵႃႈၼိူဝ်ႁူဝ်ၸႂ်မၼ်းၵႃႈတီႈၽၢႆႇၼႃႈထႃႇဝရႃႉၽြႃးသေႇသေႇဢေႃႈ။
ၶူဝ်းၼုင်ႈဢၼ်မူတ်းၸၢင်ႇတၢင်ႇၸိူဝ်ႉတၢင်ႇမဵဝ်း
၃၁ မႂ်းတၵ်းလႆႈဢဝ်ၶူဝ်းဢၼ်သွမ်ႇၵူၺ်းၵူၺ်းႁဵတ်းသိူဝ်ႈယၢဝ်းဢၼ်ၸၢပ်ႈသႅင်ႇၵၼ်တင်းသိူဝ်ႈသုပ်းၼၼ်ႉဢေႃႈ။
၃၂ ၵႃႈတီႈသိူဝ်ႈယၢဝ်းၼၼ်ႉတၵ်းလႆႈမီးႁူးၶေႃသိူဝ်ႈၵႃႈၼႂ်းၶိုင်ႈၵၢင်ၽၢႆႇတၢင်းၼိူဝ်မၼ်းလႄႈတၵ်းလႆႈဢဝ်တင်းၶူဝ်းဢၼ်တေႃးၼၼ်ႉၵုပ်းသႂ်ႇၵႃႈတီႈႁိမ်းႁူးၶေႃသိူဝ်ႈၼၼ်ႉမိူၼ်ၸိူဝ်ႉၼင်ႇဢၼ်ပဵၼ်ၵႃႈတီႈႁူးၶေႃသိူဝ်ႈဢၼ်ဢဝ်လဵၵ်းႁဵတ်းၼၼ်ႉႁႂ်ႈဢမ်ႇလႆႈသိၵ်ႇလႆႈၶၢတ်ႇဢေႃႈ။
၃၃ ၵႃႈတီႈဢၼ်လဵပ်ႈႁွပ်ႈၸွမ်းႁိမ်းၽၢႆႇတႂ်ႈသိူဝ်ႈသၢဝ်းၼၼ်ႉမႂ်းတၵ်းလႆႈဢဝ်ၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊ၊ႁဵတ်းမၢၵ်ႇၸင်သႂ်ႇဢိၵ်ႇတင်းႁိင်ႇၶမ်းသႂ်ႇၵႃႈတီႈဝူင်ႈၵၢင်ႁူၺ်ႇၼိုင်ႈလႄႈႁူၺ်ႇၼိုင်ႈဢေႃႈ။
၃၄ မၢၵ်ႇၸင်လုၵ်ႈၼိုင်ႈႁိင်ႇၶမ်းလုၵ်ႈၼိုင်ႈ၊မၢၵ်ႇၸင်လုၵ်ႈၼိုင်ႈ၊ႁိင်ႇၶမ်းလုၵ်ႈၼိုင်ႈ၊တၵ်းလႆႈဢဝ်ၶၼ်ႈၵၼ်ၶႅၼ်ႈၵၼ်ၸွမ်းႁိမ်းမၼ်းဢေႃႈ။
၃၅ မိူဝ်ႈဢၼ်မၼ်းပွင်ႁဵတ်းဢမူႉၸဝ်ႈၼၼ်ႉဢႃႇရုၼ်ႇတၵ်းလႆႈၼုင်ႈသိူဝ်ႈယၢဝ်းၼၼ်ႉလႄႈႁႂ်ႈငိၼ်းသဵင်မၼ်းမိူဝ်ႈဢၼ်မၼ်းၶဝ်ႈဢွၵ်ႇၵႃႈၼႂ်းထႃႇၼႃႉတီႈမူတ်းၸၢင်ႇၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉႁႂ်ႈမၼ်းလႆႈၵၢင်းလွတ်ႈတင်းၽေးတၢင်းတၢႆဢေႃႈ။
၃၆ ၶိူင်ႈပျႃးၶမ်းလွတ်ႈငၢၼ်ၵေႃႈမႂ်းတၵ်းလႆႈႁဵတ်းလႄႈဢဝ်ဢႅၵ်ႉၶရႃႇတူဝ်လိၵ်ႈဢၼ်ဝႃႈတၢင်းဢၼ်မူတ်းၸၢင်ႇတီႈထႃႇဝရႃႉၽြႃးဢေႃႈ၊ဝႃႈၼင်ႇၼႆၼၼ်ႉ
၃၇ တၢင်ႇသႂ်ႇဝႆႉၵႃႈၼိူဝ်မၼ်းမိူၼ်ၸိူဝ်ႉၼင်ႇဢၼ်ဢဝ်ဢႅၵ်ႉၶရႃႇတူဝ်လိၵ်ႈတၢင်ႇသႂ်ႇဝႆႉၵႃႈၼိူဝ်တၼ်းသိၵ်ႈၼၼ်ႉလႄႈဢဝ်ၵူပ်ႉၸပ်းသၢႆဢၼ်သွမ်ႇသႂ်ႇဝႆႉၵႃႈတီႈၶဵၼ်းႁူဝ်ၼၼ်ႉဢေႃႈ။
၃၈ ဢႃႇရုၼ်ႇတၵ်းလႆႈဢဝ်ၶိူင်ႈပျႃးၶမ်းၼၼ်ႉတိူဝ်ႉသႂ်ႇၵႃႈတီႈၼႃႈၽၢၵ်ႇမၼ်းလႄႈပႃးဢပျႅတ်ႈဢၼ်ၸၢပ်ႈသႅင်ႇၵၼ်တင်းတႃႇၼႃႉတၢင်းလူဢၼ်မူတ်းၸၢင်ႇဢၼ်ၵူၼ်းမဵဝ်းဢိသရေႇလတင်းလၢႆတၵ်းႁႂ်ႈမူတ်းၸၢင်ႇၼႂ်းၶိူင်ႈပိူင်ဢၼ်မူတ်းၸၢင်ႇဢၼ်ၶဝ်တၵ်းပၼ်ၼၼ်ႉယူႇဢေႃႈ။မၼ်းတၵ်းလႆႈတိူဝ်ႉသႂ်ႇဝႆႉၵႃႈတီႈၼႃႈၽၢၵ်ႇမၼ်းယူႇသေႇသေႇႁႂ်ႈၶဝ်လႆႈထူပ်းတၢင်းဢၼ်ထုၵ်ႇၸႂ်ၵျိူၵ်ႈၸႂ်ထႃႇဝရႃႉၽြႃးဢေႃႈ။
၃၉ သိူဝ်ႈပုတ်းပိၵ်ႈၶျေႃးၵေႃႈမႂ်းတၵ်းလႆႈတေႃးႁဵတ်းဢေႃႈ။ၶဵၼ်းႁူဝ်ၵေႃႈမႂ်းတၵ်းလႆႈဢဝ်ပိၵ်ႈၶျေႃးႁဵတ်းဢေႃႈ။သၢႆႁတ်ႉဢႅဝ်ၵေႃႈမႂ်းတၵ်းလႆႈဢဝ်တင်းတၢင်းႁဵတ်းဢၼ်ႁၢင်ႈၶိူင်ႈမၼ်းၼၼ်ႉႁဵတ်းဢေႃႈ။
၄၀ မႂ်းတၵ်းလႆႈႁဵတ်းသိူဝ်ႈယၢဝ်း၊သၢႆႁတ်ႉဢႅဝ်တင်းမွၵ်ႇႁူဝ်ပၼ်တီႈလုၵ်ႈၸၢႆးဢႃႇရုၼ်ႇၸိူဝ်းၼၼ်ႉပုၼ်ႈဢၼ်တၵ်းပဵၼ်မုၼ်ပဵၼ်သရေႇဢေႃႈ။
၄၁ ၼင်ႇၼၼ်လႄႈမႂ်းတၵ်းလႆႈဢဝ်ၼုင်ႈပၼ်တီႈပီႈၸၢႆးမႂ်းဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉသေယဝ်ႉဢဝ်တင်းၼမ်ႉမၼ်းတႃးၶဝ်သေလႄႈၶၢၼ်းၶဝ်ဝႆႉၼႂ်းဢရႃႇလႄႈႁႂ်ႈမူတ်းၸၢင်ႇႁႂ်ႈၶဝ်လႆႈပွင်ႁဵတ်းဢမူႉယိတ်ႉပရေႃးႁိၵ်ႈၵႃႈတီႈၽၢႆႇၼႃႈၵဝ်ဢေႃႈ။
၄၂ မႂ်းတၵ်းလႆႈယဵပ်ႉၵူၼ်ပိၵ်ႈၶျေႃးပၼ်တီႈၶဝ်ႁႂ်ႈလႆႈႁူမ်ႇသုမ်ႇလွင်ႈတၢင်းဢၼ်လီဢူၵ်းလီဢၢႆတီႈၶဝ်ဢေႃႈ။ၵူၼ်ၸိူဝ်းၼၼ်ႉတၵ်းလႆႈယၢဝ်းၸႃႉၸဵမ်ၵႃႈတီႈဢႅဝ်တေႃႇထိုင်ႁွတ်ႈၵႃႈတီႈၶႃဢေႃႈ။
၄၃ ဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉမိူဝ်ႈဢၼ်ၶဝ်ၶဝ်ႈၵႃႈၼႂ်းသုမ်ႉထဵင်သုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈဢိၵ်ႇတင်းမိူဝ်ႈဢၼ်ၶဝ်သုတ်ႉၸပ်းသုတ်ႉၸူးၵႃႈတီႈႁိမ်းယိၸ်ႉပလၢင်ႇႁႂ်ႈလႆႈပွင်ႁဵတ်းဢမူႉၸဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇၼၼ်ႉၸိုင်တၵ်းလႆႈၼုင်ႈၸိူဝ်ႉၼင်ႇၼၼ်ႁႂ်ႈၶဝ်ဢမ်ႇလႆႈႁွတ်ႈထိုင်ဢပျႅတ်ႈလႄႈတၢႆဢေႃႈ။ပဵၼ်ထုင်းၾိင်ႈၸဝ်ႈဢၼ်ၸႃႉၸဵမ်မၼ်းဢိၵ်ႇတင်းၸိူဝ်ႉၶိူဝ်းမၼ်းသိုပ်ႇသိုပ်ႇတၢမ်ႈတၢမ်ႈတၵ်းလႆႈပႂ်ႉလႆႈၸွမ်းယူႇသေႇသေႇဢေႃႈ။