Chapter
၁၆
ၶဝ်ႈမုၼ်းမႃႇၼတင်းၼုၵ်ႉၶုမ်ႈ
၁ ၵမ်းၼၼ်ႉပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်သမ်ႉဢွၼ်ၵၼ်ဢွၵ်ႇသေၵႃႈတီႈဢေႇလိမ်ႇၵႂႃႇလႄႈႁွတ်ႈထိုင်ၵႃႈတီႈဝူင်ႈၵၢင်ဢေႇလိမ်ႇတင်းလွႆသိၼႃႇၼၼ်ႉၼႂ်းလိူၼ်တုတိယသိပ်းႁႃႈဝၼ်းလိုၼ်းသေဢၼ်လုၵ်ႉသေၵႃႈတီႈမိူင်းဢေႇၵႅပ်ႉတုဢွၵ်ႇၵႂႃႇၼၼ်ႉဢေႃႈ။
၂ ပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်တၢင်ႇဢပျႅတ်ႈတီႈမုဝ်းသေႇဢိၵ်ႇတင်းဢႃႇရုၼ်ႇၵႃႈတီႈၼႂ်းထိူၼ်ႇၼၼ်ႉလႄႈပွင်ႉၶင်းပွင်ႉမိူၼ်ႇဢေႃႈ။
၃ ၵူၼ်းမဵဝ်းဢိသရေႇလၸိူဝ်းၼၼ်ႉဢွၼ်ၵၼ်လၢတ်ႈတီႈၶဝ်လႄႈဝႃႈ၊-သင်ႁဝ်းလႆႈတၢႆၼႂ်းမိုဝ်းထႃႇဝရႃႉၽြႃးယၢမ်းမိူဝ်ႈဢၼ်ႁဝ်းလႆႈၼင်ႈၵႃႈႁိမ်းမေႃႈၼိူဝ်ႉသေလႄႈၵိၼ်ဢိမ်ႇၵိၼ်တဵမ်ယူႇၵႃႈၼႂ်းမိူင်းဢေႇၵႅပ်ႉတုၼၼ်ႉယဝ်ႉၸိုင်ယိင်ႈၶႅၼ်းတၵ်းလီဢေႃႈ။ၵူၺ်းၵႃႈသူႁွင်ႉဢဝ်မုၵ်ႉၵူၼ်းၸိူဝ်းၵူၼ်းတင်းသဵင်ႈတင်းလူင်ၸိူဝ်းၼႆႉမႃးၵႃႈတီႈထိူၼ်ႇၼႆႉႁႂ်ႈလႆႈတၢႆၵွပ်ႈပိူဝ်ႈတၢင်းဢၼ်ဢိုပ်းယၢၵ်ႈၼၼ်ႉလူင်ပေႇ၊ဝႃႈၼင်ႇၼႆဢေႃႈ။
၄ မိူဝ်ႈၼၼ်ႉထႃႇဝရႃႉၽြႃးလၢတ်ႈတီႈမုဝ်းသေႇလႄႈဝႃႈ၊-တူၺ်းလူႊ၊ၵဝ်တၵ်းႁႂ်ႈၽူၼ်ၶဝ်ႈမုၼ်းတူၵ်းသေၵႃႈၼိူဝ်ၵၢင်ႁၢဝ်မႃးပုၼ်ႈသူဢေႃႈ။ၵူၼ်းတင်းလၢႆတၵ်းလႆႈဢွၼ်ၵၼ်ဢွၵ်ႇလႄႈၵဵပ်းဢဝ်ၵူႈဝၼ်းၵူႈဝၼ်းပုၼ်ႈဢၼ်တၵ်းၵုမ်ႇၵိၼ်ယေႈဝၼ်းယေႈဝၼ်းႁႂ်ႈလႆႈၸၢမ်းတူၺ်းၶဝ်လွင်ႈဢၼ်ၶဝ်တၵ်းၵႂႃႇမႃးၸွမ်းၼင်ႇတြႃးၵဝ်ႁိုဝ်၊တၵ်းဢမ်ႇၸွမ်းႁိုဝ်ၼၼ်ႉဢေႃႈ။
၅ ၼႂ်းဝၼ်းဢၼ်ထူၼ်ႈထိုင်ႁူၵ်းဝၼ်းၼၼ်ႉၶဝ်တၵ်းလႆႈမႄးႁႅၼ်းဢၼ်ၶဝ်သိမ်းဢဝ်ၼၼ်ႉလႄႈဢၼ်ၶဝ်သိမ်းဢဝ်ၼၼ်ႉတၵ်းလႆႈလိူဝ်တွၼ်းသေဢၼ်ၶဝ်သိမ်းဢဝ်ယူႇၵူႈဝၼ်းၵူႈဝၼ်းၼၼ်ႉသွင်ပုၼ်ႈဢေႃႈ၊ဝႃႈၼင်ႇၼႆဢေႃႈ။
၆ မုဝ်းသေႇတင်းဢႃႇရုၼ်ႇၵေႃႈလၢတ်ႈတီႈၵူၼ်းမဵဝ်းဢိသရေႇလတင်းသဵင်ႈတင်းလူင်ၸိူဝ်းၼၼ်ႉလႄႈဝႃႈ၊-ၶိင်ႇႁူဝ်ၶမ်ႈဝၼ်းမိူဝ်ႈၼႆႉသူတၵ်းႁူႉလွင်ႈဢၼ်ဝႃႈထႃႇဝရႃႉၽြႃးၼုၵ်ႈဢဝ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉဢေႃႈ။
၇ ၶိင်ႇႁူဝ်ၼႂ်ၵေႃႈသူတၵ်းလႆႈႁၼ်မုၼ်ၽုင်းထႃႇဝရႃႉၽြႃးဢေႃႈ။မၼ်းၸဝ်ႈငိၼ်းသဵင်ႈတၢင်းဢၼ်သူတၢင်ႇဢပျႅတ်ႈတီႈထႃႇဝရႃႉၽြႃးလႄႈပွင်ႉၶင်းပွင်ႉမိုၼ်ယူႇၼၼ်ႉယဝ်ႉ။ႁဝ်းပဵၼ်ၵူၼ်းၸိူဝ်ႉၼင်ႇႁိုဝ်လႄႈသူတၵ်းလႆႈတၢင်ႇဢပျႅတ်ႈတီႈႁဝ်းလႄႈပွင်ႉၶင်းပွင်ႉမိုၼ်ယူႇၸိူဝ်ႉၼင်ႇၼႆ၊ဝႃႈၼင်ႇၼႆဢေႃႈ။
၈ ၵမ်းၼၼ်ႉမုဝ်းသေႇသမ်ႉလၢတ်ႈထႅင်ႈလႄႈဝႃႈ၊-မိူဝ်ႈဢၼ်ထႃႇဝရႃႉၽြႃးပၼ်ၼိူဝ်ႉပုၼ်ႈဢၼ်သူတၵ်းၵိၼ်ၼႂ်းၶိင်ႇႁူဝ်ၶဝ်ႈဢိၵ်ႇတင်းၶဝ်ႈမုၼ်းႁႂ်ႈလႆႈၵိၼ်ဢိမ်ႇၼႂ်းၶိင်ႇႁူဝ်ၼႂ်ၼၼ်ႉၸိုင်ၵႂၢမ်းၼႆႉတၵ်းတဵမ်ထူၼ်ႈဢေႃႈ။ထႃႇဝရႃႉၽြႃးငိၼ်းသဵင်ဢၼ်သူတၢင်ႇဢပျႅတ်ႈတီႈမၼ်းၸဝ်ႈလႄႈပွင်ႉၶင်းပွင်ႉမိုၼ်ၼၼ်ႉယဝ်ႉ။ႁဝ်းၼႆႉပဵၼ်ၵူၼ်းၸိူဝ်ႉၼင်ႇႁိုဝ်။ၵႂၢမ်းဢၼ်သူတၢင်ႇဢပျႅတ်ႈလႄႈပွင်ႉၶင်းပွင်ႉမိုၼ်ၼၼ်ႉဢမ်ႇတိူဝ်ႉဢမ်ႇထုၵ်ႇတီႈႁဝ်း၊တိူဝ်ႉထုၵ်ႇတီႈထႃႇဝရႃႉၽြႃးယဝ်ႉ၊ဝႃႈၼင်ႇၼႆဢေႃႈ။
၉ ၵမ်းၼၼ်ႉမုဝ်းသေႇလၢတ်ႈတီႈဢႃႇရုၼ်ႇလႄႈဝႃႈ၊-သင်ႇလၢတ်ႈတီႈပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်လႄႈဝႃႈ၊-ပိူဝ်ႈဢၼ်ထႃႇဝရႃႉၽြႃးငိၼ်းသဵင်ဢၼ်သူတၢင်ႇဢပျႅတ်ႈလႄႈပွင်ႉၶင်းပွင်ႉမိုၼ်ယူႇၼၼ်ႉလႄႈဢွၼ်ၵၼ်သုတ်ႉၸပ်းသုတ်ႉၸူးမႃးၵႃႈတီႈမၼ်းၸဝ်ႈတႃႉ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၀ မိူဝ်ႈဢၼ်ဢႃႇရုၼ်ႇသင်ႇလၢတ်ႈတီႈပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ၸိူဝ်ႉၼင်ႇၼၼ်ၼၼ်ႉၸိုင်ၶဝ်ၼၼ်ႉမုင်ႈတူၺ်းၵႃႈတီႈထိူၼ်ႇလႄႈမုၼ်ၽုင်းထႃႇဝရႃႉၽြႃးပေႃႇမႃးၵႃႈၼႂ်းမွၵ်ႇၵုမ်ႈဢေႃႈ။
၁၁ ထႃႇဝရႃႉၽြႃးၵေႃႈလၢတ်ႈတီႈမုဝ်းသေႇလႄႈဝႃႈ၊-ၵဝ်လႆႈငိၼ်းသဵင်ဢၼ်ၵူၼ်းမဵဝ်းဢိသရေႇလတင်းလၢႆတၢင်ႇဢပျႅတ်ႈလႄႈပွင်ႉၶင်းပွင်ႉမိုၼ်ၼၼ်ႉယဝ်ႉ။သင်ႇလၢတ်ႈတီႈၶဝ်လႄႈဝႃႈ၊-ၶိင်ႇႁူဝ်ၶမ်ႈသူတၵ်းလႆႈၵိၼ်ၼိူဝ်ႉဢေႃႈ။
၁၂ ၶိင်ႇႁူဝ်ၼႂ်ၵေႃႈသူတၵ်းလႆႈၵိၼ်ဢိမ်ႇၵိၼ်တဵမ်တင်းၶဝ်ႈမုၼ်းဢေႃႈ။သူတၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၃ ၶိင်ႇႁူဝ်ၶမ်ႈၼၼ်ႉၼူၵ်ႉၶုမ်ႈဢွၼ်ၵၼ်ၶိုၼ်ႈမႃးလႄႈႁူမ်ႇသုမ်ႇတပ်ႉၶဝ်ၵူႈတီႈၵူႈလႅၼ်ဝႆႉဢေႃႈ။ၶိင်ႇႁူဝ်ၼႂ်ၵေႃႈၼမ်ႉၼၢႆးတူၵ်းႁွပ်ႈၵႃႈတီႈႁိမ်းႁွမ်းတပ်ႉၼၼ်ႉဢေႃႈ။
၁၄ မိူဝ်ႈဢၼ်ၼမ်ႉၼၢႆးဢၼ်တူၵ်းႁွပ်ႈၼၼ်ႉၶိုၼ်ႈၶိုၼ်းယဝ်ႉၼၼ်ႉၸိုင်ၶိူင်ႈပိူင်ဢၼ်ပဵၼ်သေးသေးဢွၼ်မိူၼ်ၸိူဝ်ႉၼင်ႇၵွၼ်ႈမူၺ်ၼၼ်ႉၵိုတ်းဝႆႉမီးယူႇၵႃႈၼိူဝ်လိၼ်ၵႃႈၼႂ်းထိူၼ်ႇဢေႃႈ။
၁၅ မိူဝ်ႈဢၼ်ၵူၼ်းမဵဝ်းဢိသရေႇလၸိူဝ်းၼၼ်ႉႁၼ်ၶိူင်ႈပိူင်ၼၼ်ႉပဵၼ်ၵႃႈသင်ၼၼ်ႉလႄႈၵေႃႉၼိုင်ႈလႄႈၵေႃႉၼိုင်ႈထၢမ်ၵၼ်လႄႈဝႃႈ၊-ဢၼ်ၼႆႉပဵၼ်ၵႃႈသင်၊ဝႃႈၼင်ႇၼႆဢေႃႈ။မုဝ်းသေႇမွၵ်ႇလၢတ်ႈတီႈၶဝ်လႄႈဝႃႈ၊-ဢၼ်ၼႆႉပဵၼ်ၶဝ်ႈမုၼ်းဢၼ်ထႃႇဝရႃႉၽြႃးဢိတ်းလူပၼ်ပုၼ်ႈဢၼ်သူတၵ်းၵိၼ်ဢေႃႈ။
၁၆ ထႃႇဝရႃႉၽြႃးမီးဢမိင်ႉလူၺ်ႈလွင်ႈဢၼ်ၼႆႉလႄႈဝႃႈၸမ်း၊-ဢွၼ်ၵၼ်သိမ်းဢဝ်ႁႂ်ႈပေႃးၵုမ်ႇၵိၼ်ႁင်းၽႂ်ႁင်းမၼ်းၵူႈၵေႃႉၵူႈၵူၼ်းတႃႉ။သူတၵ်းလႆႈၸွမ်းၵႃႈၼင်ႇဢၼ်ၼပ်ႉဢၢၼ်ႇၵူၼ်းႁိူၼ်းၵူၼ်းယေးၼၼ်ႉသေလႄႈဢွၼ်ၵၼ်သိမ်းဢဝ်ယေႈၵေႃႉယေႈဢေႃႇမေႇဝႆႉပုၼ်ႈၶဝ်ၸိူဝ်းဢၼ်မီးၵႃႈၼႂ်းသုမ်ႉထဵင်သူႁင်းၽႂ်ႁင်းမၼ်းၵူႈၵေႃႉၵူႈၵေႃႉဢေႃႈဝႃႈၼင်ႇၼႆဢေႃႈ။
၁၇ ၵူၼ်းမဵဝ်းဢိသရေႇလၸိူဝ်းၼၼ်ႉဢွၼ်ၵၼ်ႁဵတ်းၸွမ်းၸိူဝ်ႉၼင်ႇၼၼ်လႄႈၵမ်ႈၽွင်ႈသိမ်းဢဝ်ၼမ်ၼမ်ၵမ်ႈၽွင်ႈသိမ်းဢဝ်ၵေႇၵေႇဢေႃႈ။
၁၈ မိူဝ်ႈဢၼ်ၶဝ်ဢဝ်ၵွၵ်းဢေႃႇမေႇတူင်တူၺ်းၸိုင်ၵေႃႉဢၼ်လႆႈၼမ်ၼမ်ၼၼ်ႉဢမ်ႇလိူဝ်ၵႂႃႇ။ၵေႃႉဢၼ်လႆႈၵေႇၵေႇၼၼ်ႉၵေႃႈဢမ်ႇလူဝ်ႇထႅင်ႈ။ၶဝ်ဢွၼ်ၵၼ်သိမ်းဢဝ်ပုၼ်ႈဢၼ်တၵ်းၵုမ်ႇၵိၼ်ဝႆႉႁင်းၽႂ်ႁင်းမၼ်းၵူႈၵေႃႉၵူႈၵူၼ်းဢေႃႈ။
၁၉ မုဝ်းသေႇၵေႃႈလၢတ်ႈတီႈၶဝ်လႄႈဝႃႈ၊-ယႃႇပေႁႂ်ႈမၼ်းၵိုတ်းၵျၢၼ်ႇဝႆႉတေႃႇထိုင်ႁွတ်ႈၶိင်ႇၵၢင်ၼႂ်၊ဝႃႈၼင်ႇၼႆသေၵေႃႈၶဝ်ဢမ်ႇထွမ်ႇဢမ်ႇဢဝ်ၵႂၢမ်းမုဝ်းသေႇလႄႈၵူၼ်းၵမ်ႈၽွင်ႈႁႂ်ႈၵိုတ်းၵျၢၼ်ႇဝႆႉတေႃႇထိုင်ႁွတ်ႈၶိင်ႇၵၢင်ၼႂ်ဢေႃႈ။
၂၀ ဢၼ်ၵိုတ်းၵျၢၼ်ႇၼၼ်ႉပဵၼ်မႅင်းမဵၼ်သူမ်ႈၵႂႃႇလႄႈမုဝ်းသေႇၸႂ်မႆႈၶႂ်ႈၸႃႉၶဝ်ဢေႃႈ။
၂၁ ၶဝ်ၼၼ်ႉဢွၼ်ၵၼ်သိမ်းဢဝ်ပုၼ်ႈဢၼ်တူဝ်ၸဝ်ႈၵဝ်ႇတၵ်းၵုမ်ႇၵိၼ်ၼၼ်ႉၵူႈၼႂ်ၵူႈၼႂ်ႁင်းၽႂ်ႁင်းမၼ်းဢေႃႈ။မိူဝ်ႈဢၼ်လႅတ်ႇမႆႈမႃးၼၼ်ႉၸိုင်ၸိူမ်ႈႁၢႆလၢႆၵႂႃႇသေဢေႃႈ။
၂၂ ၼႂ်းဝၼ်းဢၼ်ထူၼ်ႈထိုင်ႁူၵ်းဝၼ်းၼၼ်ႉၶဝ်လႆႈသိမ်းဢဝ်ၶဝ်ႈမုၼ်းသွင်ပုၼ်ႈယေႈၵေႃႉသွင်ဢေႃႇမေႇဢေႃႈ။လွင်ႈတၢင်းၼၼ်ႉၸိုင်ၶဝ်ၸိူဝ်းဢၼ်ဢုပ်ႉၵႃႈၼိူဝ်ပရိၵ်ႈသၢတ်ႈတင်းသဵင်ႈတင်းလူင်ၼၼ်ႉဢွၼ်ၵၼ်မႃးလႄႈမွၵ်ႇလၢတ်ႈတီႈမုဝ်းသေႇဢေႃႈ။
၂၃ မၼ်းၵေႃႈၶိုၼ်းလၢတ်ႈတီႈၶဝ်လႄႈဝႃႈ၊-ထႃႇဝရႃႉၽြႃးမီးဢမိင်ႉလူၺ်ႈလွင်ႈဢၼ်ၼႆႉလႄႈဝႃႈၸမ်း၊-ဝၼ်းမိူဝ်ႈၽုၵ်ႈပဵၼ်ဝၼ်းၵမ်သိၼ်ဢၼ်မူတ်းၸၢင်ႇၵႃႈတီႈၽၢႆႇၼႃႈထႃႇဝရႃႉၽြႃးလႄႈတၵ်းလႆႈယူႇၼိမ်ၼိမ်လီလီဢေႃႈ။ဢွၼ်ၵၼ်လိုင်ႈဢၼ်သူၶႂ်ႈလိုင်ႈ၊ဢွၼ်ၵၼ်တူမ်ႈဢၼ်သူၶႂ်ႈတူမ်ႈၼၼ်ႉဝၼ်းမိူဝ်ႈၼႆႉတႃႉ။ဢွၼ်ၵၼ်ဢဝ်ဢၼ်ၵိုတ်းဢၼ်ၵျၢၼ်ၼၼ်ႉသိမ်းဝႆႉတေႃႇထိုင်ႁွတ်ႈၶိင်ႇၵၢင်ၼႂ်ဝၼ်းမိူဝ်ႈၽုၵ်ႉတႃႉ၊ဝႃႈၼင်ႇၼႆဢေႃႈ။
၂၄ ၸွမ်းၵႃႈၼင်ႇဢၼ်မုဝ်းသေႇသင်ႇလၢတ်ႈဝႆႉၼၼ်ႉၶဝ်ဢွၼ်ၵၼ်သိမ်းဝႆႉတေႃႇထိုင်ႁွတ်ႈၶိင်ႇၵၢင်ၼႂ်ဢေႃႈ။ဢၼ်ၼၼ်ႉၵၢင်းလွတ်ႈတင်းတၢင်းဢၼ်မႅၼ်သူမ်ႈလႄႈဢမ်ႇမီးမူင်ႈမီးမႅင်း။မုဝ်းသေႇၵေႃႈလၢတ်ႈလႄႈဝႃႈ၊-ဢွၼ်ၵၼ်ၵိၼ်ဝၼ်းမိူဝ်ႈၼႆႉတႃႉ။
၂၅ ဝၼ်းမိူဝ်ႈၼႆႉပဵၼ်ဝၼ်းၵမ်သိၼ်ထႃႇဝရႃႉၽြႃးဢေႃႈ။ၼႂ်းဝၼ်းမိူဝ်ႈၼႆႉတၵ်းဢမ်ႇလႆႈထူပ်းလႆႈႁၼ်ၶဝ်ႈမုၼ်းၼၼ်ႉၵႃႈတီႈၼႂ်းထိူၼ်ႇ။
၂၆ ႁူၵ်းဝၼ်းတဵမ်တဵမ်သူတၵ်းလႆႈဢွၼ်ၵၼ်သိမ်းဢဝ်ဢေႃႈ။ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းဢၼ်ပဵၼ်ဝၼ်းၵမ်သိၼ်ၼၼ်ႉၸိုင်တၵ်းဢမ်ႇမီးၶဝ်ႈမုၼ်းၼၼ်ႉလႃးလႃး၊ဝႃႈၼင်ႇၼႆဢေႃႈ။
၂၇ ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉၵူၼ်းၵမ်ႈၽွင်ႈဢွၵ်ႇၵႂႃႇႁႂ်ႈလႆႈသိမ်းဢဝ်ၵေႃႈဢမ်ႇထူပ်းဢမ်ႇႁၼ်လႃးလႃး။
၂၈ ထႃႇဝရႃႉၽြႃးၵေႃႈလၢတ်ႈတီႈမုဝ်းသေႇလႄႈဝႃႈ၊-သူတၵ်းထဵင်ပႅတ်ႈပိင်းၺၢပ်ႈၵဝ်ဢိၵ်ႇတင်းတြႃးၵဝ်ၸိူဝ်းၼၼ်ႉလၢႆၶိင်ႇလၢႆမိူဝ်ႈ။
၂၉ ထႃႇဝရႃႉၽြႃးပၼ်ဝၼ်းၵမ်သိၼ်တီႈသူယဝ်ႉ။ပိူဝ်ႈၼႆလႄႈၼႂ်းဝၼ်းဢၼ်ထူၼ်ႈထိုင်ႁူၵ်းဝၼ်းၼၼ်ႉမၼ်းၸဝ်ႈပၼ်ၶဝ်ႈမုၼ်းပုၼ်ႈသွင်ဝၼ်းဢေႃႈ။ႁႂ်ႈၵူႈၵေႃႉၵူႈၵူၼ်းယူႇတီႈၽႂ်တီႈမၼ်းယူႇတႃႉ။ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉယႃႇပေႁႂ်ႈၽူႈလႂ်ဢွၵ်ႇသေၵႃႈၼႂ်းတီႈဢၼ်တူဝ်ၸဝ်ႈၵဝ်ႇယူႇၼၼ်ႉ၊ဝႃႈၼင်ႇၼႆဢေႃႈ။
၃၀ ပိူဝ်ႈၼႆလႄႈၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉၵူၼ်းတင်းလၢႆဢွၼ်ၵၼ်ယူႇၼိမ်ၼိမ်လီလီဢေႃႈ။
၃၁ ၵူၼ်းမဵဝ်းဢိသရေႇလၸိူဝ်းၼၼ်ႉႁွင်ႉႁိၵ်ႈၸိုဝ်ၶဝ်ႈမုၼ်းၼၼ်ႉဝႃႈမၼ်ႇၼႃႉဝႃႈၼင်ႇၼႆဢေႃႈ။ပဵၼ်ၸိူဝ်ႉၼင်ႇမဵတ်ႉၽၵ်းၵီးလႄႈမီးငဝ်းဢၼ်ၶၢဝ်ဝႆႉဢေႃႈ။ဢရႃႉသႃႇတၢင်းဝၢၼ်မၼ်းမိူၼ်ၸိူဝ်ႉၼင်ႇၶဝ်ႈမုၼ်းၶွပ်ႈဢၼ်လေႃးတင်းၼမ်ႉၽိုင်ႈၼၼ်ႉဢေႃႈ။
၃၂ မုဝ်းသေႇၵေႃႈလၢတ်ႈလႄႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ဢဝ်ႁႂ်ႈတဵမ်ဢေႃႇမေႇၼိုင်ႈလႄႈသိမ်းဝႆႉပုၼ်ႈၸိူဝ်ႉၶိူဝ်းသူသိုပ်ႇသိုပ်ႇတၢမ်ႈတၢမ်ႈႁႂ်ႈၶဝ်လႆႈႁၼ်ၶဝ်ႈမုၼ်းဢၼ်ၵဝ်လဵင်ႉလူႈၵႃႈတီႈထိူၼ်ႇၼႂ်းမိူဝ်ႈဢၼ်ၵဝ်ၼုၵ်ႈဢဝ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉတႃႉ၊ဝႃႈၼင်ႇၼႆဢေႃႈ။
၃၃ ၵမ်းၼၼ်ႉမုဝ်းသေႇလၢတ်ႈတီႈဢႃႇရုၼ်ႇလႄႈဝႃႈ၊-ဢဝ်မေႃႈႁူၺ်ႇၼိုင်ႈလႄႈသႂ်ႇမၼ်ႇၼႃႉႁႂ်ႈတဵမ်ဢေႃႇမေႇၼိုင်ႈသေယဝ်ႉသိမ်းဝႆႉၵႃႈတီႈၽၢႆႇၼႃႈထႃႇဝရႃႉၽြႃးႁႂ်ႈပႂ်ႉဝႆႉပုၼ်ႈၸိူဝ်ႉၶိူဝ်းသူသိုပ်ႇသိုပ်ႇတၢမ်ႈတၢမ်ႈၼၼ်ႉတႃႉ၊ဝႃႈၼင်ႇၼႆလႄႈ
၃၄ ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇၼၼ်ႉဢႃႇရုၼ်ႇသိမ်းဢဝ်မၼ်ႇၼႃႉၼၼ်ႉဝႆႉၵႃႈတီႈၽၢႆႇၼႃႈၶိူင်ႈဢၼ်ၶၢမ်ႇသၢၵ်ႈသေႇၸဝ်ႈႁႂ်ႈလႆႈပႂ်ႉဝႆႉဢေႃႈ။
၃၅ ၵူၼ်းမဵဝ်းဢိသရေႇလၸိူဝ်းၼၼ်ႉဢွၼ်ၵၼ်ၵိၼ်မၼ်ႇၼႃႉၼၼ်ႉသီႇသိပ်းပီႊတဵမ်တဵမ်တေႃႇထိုင်ႁွတ်ႈထၢၼ်ႈပေႃးၶဝ်ႁွတ်ႈၽႅဝ်ၵႃႈတီႈမိူင်းတီႈဢၼ်ၵူၼ်းယူႇၼၼ်ႉဢေႃႈ။ၶဝ်ဢွၼ်ၵၼ်ၵိၼ်မၼ်ႇၼႃႉၼၼ်ႉတေႃႇထိုင်ႈႁွတ်ႈထၼ်ႈပေႃးၶဝ်ႁွတ်ႈၽႅဝ်ၵႃႈတီႈလႅၼ်လိၼ်မိူင်းၶႃႇၼၢၼ်ႇၼၼ်ႉဢေႃႈ။
၃၆ ဢေႃႇမေႇၸမ်းပဵၼ်ဢေႇၽႃႇသိပ်းပုၼ်ႊဢဝ်ပုၼ်ႊၼိုင်ႈဢေႃႈ။