Chapter
၁၁
ၽေးတၢင်းတၢႆလုၵ်ႈတူၼ်ႈ
၁ မိူဝ်ႈၼၼ်ႉထႃႇဝရႃႉၽြႃးလၢတ်ႈတီႈမုဝ်းသေႇလႄႈဝႃႈ၊-ၵဝ်တၵ်းႁႂ်ႈၽေးတၢမ်ႇဢၼ်ၼိုင်ႈႁွတ်ႈထိုင်ၵႃႈၼိူဝ်ၶုၼ်ႁေႃၶမ်းၽႃႇရေႃးတင်းမိူင်းဢေႇၵႅပ်ႉတုထႅင်ႈလူးၵွၼ်ႇဢေႃႈ။ဝၢႆးၼၼ်ႉမၼ်းတၵ်းပွႆႇသူၵႂႃႇဢေႃႈ။မိူဝ်ႈဢၼ်မၼ်းပွႆႇသူၵႂႃႇၼၼ်ႉမၼ်းတၵ်းႁေႃႈသူဢွၵ်ႇၵႂႃႇသဵင်ႈသဵင်ႈဢမၢၼ်ႇၶၼ်ပဵၼ်ဢေႃႈ။
၂ မွၵ်ႇလၢတ်ႈထိုင်ႁူၵူၼ်းတင်းလၢႆႁႂ်ႈၵူၼ်းၸၢႆးၵူႈၵေႃႉၵႂႃႇယွၼ်းဢဝ်ၶိုင်ႈငိုၼ်းၶိုင်ႈၶမ်းတီႈၵူၼ်းၸၢႆးတီႈႁိမ်းႁိူၼ်းဢၼ်ၸမ်ၵၼ်တင်းၶဝ်ၼၼ်ႉလႄႈႁႂ်ႈၵူၼ်းယိင်းၵူႈၵေႃႉၵႂႃႇယွၼ်းဢဝ်ၶိုင်ႈငိုၼ်းၶိုင်ႈၶမ်းတီႈၵူၼ်းယိင်းဢၼ်ယူႇႁိမ်းႁိူၼ်းၸမ်ၵၼ်တင်းၶဝ်ၼၼ်ႉႁင်းၽႂ်ႁင်းမၼ်းတႃႉ၊ဝႃႈၼင်ႇၼႆဢေႃႈ။
၃ ၵမ်းၼၼ်ႉထႃႇဝရႃႉၽြႃးႁႂ်ႈၶဝ်ထူပ်းၵျေးၸူးသိုဝ်ႈၼႃႈတႂ်ႈတႃၵူၼ်းဢေႇၵႅပ်ႉတုတင်းလၢႆဢေႃႈ။မုဝ်းသေႇၵေႃႈမီးသရေႇၼႃႈတႃဢၼ်ယ်ႂၼႃႇၵႃႈၼႂ်းမိူင်းဢေႇၵႅပ်ႉတုၵႃႈတီႈၽၢႆႇၼႃႈၶႃႈၶုၼ်ႁေႃၶမ်းၽႃႇရေႃးဢိၵ်ႇတင်းၵူၼ်းဝၢၼ်ႈၵူၼ်းမိူင်းတင်းလၢႆဢေႃႈ။
၄ မိူဝ်ႈၼၼ်ႉမုဝ်းသေႇလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၶိင်ႇတဵင်ႈၶိုၼ်းၵဝ်တၵ်းဢွၵ်ႇၸူးၵႃႈတီႈၶိုင်ႈၵၢင်မိူင်းဢေႇၵႅပ်ႉတုဢေႃႈ။
၅ ၸႃႉၸဵမ်လုၵ်ႈတူၼ်ႈၶုၼ်ႁေႃၶမ်းၽႃႇရေႃးဢၼ်ၼင်ႈယူႇၵႃႈၼိူဝ်ႁေႃတေႃႇထိုင်ႁွတ်ႈလုၵ်ႈတူၼ်ႈမေႈယိင်းၶႃႈဢၼ်ၼင်ႈယူႇၵႃႈတီႈၽၢႆႇလင်လူၺ်ၶိုတ်းၶဝ်ၼၼ်ႉလုၵ်ႈတူၼ်ႈၵႃႈဢၼ်မီးၵႃႈၼႂ်းမိူင်းဢေႇၵႅပ်ႉတုတင်းသဵင်ႈတင်းလူင်တၵ်းတၢႆလႄႈလုၵ်ႈတူၼ်ႈတရိၵ်ႈသၢၼ်ႇၵႃႈမီးတင်းသဵင်ႈတင်းလူင်ၵေႃႈတၵ်းတၢႆဢေႃႈ။
၆ တၢင်းဢၼ်ႁွင်ႉဢၼ်ႁႆႈဢၼ်ယႂ်ႇၼႃႇဢၼ်ၸႃႉၸဵမ်ၶိင်ႇၵႃႇလႃႉမိူဝ်ႈဢွၼ်ၼႆႉဢမ်ႇပႆႇတွၼ်ႉပဵၼ်သေပွၵ်ႈ၊ဢၼ်ၶိင်ႇၵႃႇလႃႉၵမ်းလိုၼ်းၵေႃႈတၵ်းဢမ်ႇပဵၼ်ထႅင်ႈၼၼ်ႉတၵ်းပဵၼ်ၵႃႈၼႂ်းမိူင်းဢေႇၵႅပ်ႉတုၵူႈတီႈၵူႈလႅၼ်ဢေႃႈ။
၇ ၵူၺ်းၵႃႈလွင်ႈၼင်ႇႁိုဝ်သူတၵ်းႁူႉလွင်ႈဢၼ်ဝႃႈထႃႇဝရႃႉၽြႃးႁႂ်ႈၵူၼ်းဢေႇၵႅပ်ႉတုတင်းၵူၼ်းမဵဝ်းဢိသရေႇလပႅၵ်ႇပိူင်ႈၵၼ်ၼၼ်ႉၸိုင်မႃသေတူဝ်တၵ်းဢမ်ႇလႆႈႁဝ်ႇၵူၼ်းမဵဝ်းဢိသရေႇလသေၵေႃႉသေၵူၼ်း။
၈ ၶဝ်ၸိူဝ်းဢၼ်ပဵၼ်ၶႃႈၸဝ်ႈႁဝ်းၵႃႈမီးတင်းသဵင်ႈတင်းလူင်ၸိူဝ်းၼႆႉတၵ်းဢွၼ်ၵၼ်လူင်းၸူးၵႃႈတီႈၵဝ်ၶႃႈလႄႈၶုပ်ႉမူပ်ႇသေလႄႈလၢတ်ႈဝႃႈ၊-မႂ်းဢိၵ်ႇတင်းၶဝ်ၸိူဝ်းဢၼ်ၸွမ်းလင်မႂ်းတင်းသဵင်ႈတင်းလူင်ဢွၼ်ၵၼ်ဢွၵ်ႇၵႂႃႇသေၵမ်း၊ဝႃႈၼင်ႇၼႆသေယဝ်ႉၵဝ်ၶႃႈတၵ်းဢွၵ်ႇၵႂႃႇတီႈၶႃႈဢေႃႈ၊ဝႃႈၼင်ႇၼႆဢေႃႈ။မုဝ်းသေႇၸႂ်မႆႈၶႂ်ႈၸႃႉၼႃႇလူင်လၢင်သေလႄႈဢွၵ်ႇသေၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးၼၼ်ႉၵႂႃႇသေဢေႃႈ။
၉ ထႃႇဝရႃႉၽြႃးလၢတ်ႈတီႈမုဝ်းသေႇလႄႈဝႃႈ၊-လွင်ႈၼင်ႇႁိုဝ်တၢင်းဢၼ်လီဢၢမ်းၵဝ်တင်းလၢႆတၵ်းၼမ်ၵိုၼ်းမႃးၵႃႈၼႂ်းမိူင်းဢေႇၵႅပ်ႉတုၼၼ်ႉၶုၼ်ႁေႃၶမ်းၽႃႇရေႃးတၵ်းဢမ်ႇထွမ်ႇဢဝ်ၵႂၢမ်းသူလႄႈတၵ်းယူႇဢေႃႈ၊ဝႃႈၼင်ႇၼႆဢေႃႈ။
၁၀ မုဝ်းသေႇတင်းဢႃႇရုၼ်ႇႁဵတ်းလွင်ႈတၢင်းဢၼ်လီဢၢမ်းၸိူဝ်းၼႆႉတင်းသဵင်ႈတင်းလူင်ၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးဢေႃႈ။ၵူၺ်းၵႃႈထႃႇဝရႃႉၽြႃးႁႂ်ႈႁူဝ်ၸႂ်ၶုၼ်ႁေႃၶမ်းၽႃႇရေႃးၵႅၼ်ႇၶႅင်လႄႈမၼ်းၵေႃႈယင်းဢမ်ႇပွႆႇၵူၼ်းမဵဝ်းဢိသရေႇလၶဝ်ဢွၵ်ႇသေၵႃႈတီႈမိူင်းမၼ်းၼၼ်ႉၵႂႃႇ။