Chapter
၁၄
၁ -၂ ထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈ၊-သင်ႇလၢတ်ႈတီႈၵူၼ်းမဵဝ်းဢိသရေႇလႁႂ်ႈၶဝ်ဝၢႆႇၶိုၼ်းလႄႈၶျႃးတပ်ႉၵႃႈတီႈၽၢႆႇၼႃႈဝဵင်းပိႁႃႉႁိရုတ်ႉၵႄႈဝူင်ႈၵၢင်ဝဵင်းမၵတေႃႇလဢိၵ်ႇတင်းပၢင်ႇလၢႆႇၵႃႈတီႈၽၢႆႇၼႃႈပႃႇလႃႇၸေႇၽုၼ်ႇၼၼ်ႉတႃႉ။သူတၵ်းလႆႈၶျႃးတပ်ႉၵႃႈတီႈၼႃႈဝၼ်းဢွၵ်ႇဝဵင်းၼၼ်ႉၵႃႈႁိမ်းပၢင်ႇလၢႆႇၼၼ်ႉဢေႃႈ။
၃ လွင်ႈမၼ်းၸမ်းၶုၼ်ႁေႃၶမ်းၽႃႇရေႃးတၵ်းလၢတ်ႈလူၺ်ႈလွင်ႈၵူၼ်းမဵဝ်းဢိသရေႇလလႄႈဝႃႈ၊-ၶဝ်ႁွတ်ႈထိုင်ၵႃႈတီႈၵိတ်ႇတီႈၵႅၼ်းယဝ်ႉ။ထိူၼ်ႇၵေႃႈႁႄႉၶဝ်ဢိုတ်းၶဝ်ဝႆႉယဝ်ႉ၊ဝႃႈၼင်ႇၼႆဢေႃႈ။
၄ ၵဝ်တၵ်းႁႂ်ႈႁူဝ်ၸႂ်ၶုၼ်ႁေႃၶမ်းၽႃႇရေႃးၵႅၼ်ႇၶႅင်လႄႈမၼ်းတၵ်းလိုပ်ႈၸွမ်းလမ်းၸွမ်းၶဝ်ဢေႃႈ။လွင်ႈၼင်ႇႁိုဝ်ၵူၼ်းဢေႇၵႅပ်ႉတုတင်းလၢႆတၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉၸိုင်မုၼ်ၽုင်းၵဝ်တၵ်းပေႃႇဢွၵ်ႇမႃးၵွပ်ႈပိူဝ်ႈၶုၼ်ႁေႃၶမ်းၽႃႇရေႃးဢိၵ်ႇတင်းၵူၼ်းသိုၵ်းမၼ်းတင်းလၢႆၼၼ်ႉဢေႃႈ၊ဝႃႈၼင်ႇၼႆဢေႃႈ။ၶဝ်ၵေႃႈဢွၼ်ၵၼ်ႁဵတ်းၵႃႈၼင်ႇဢၼ်မၼ်းၸဝ်ႈဝႃႈၼၼ်ႉဢေႃႈ။
၅ ပိူၼ်ႈလဝ်ႈလၢတ်ႈလွင်ႈဢၼ်ၵူၼ်းၸိူဝ်းၼၼ်ႉဢွၵ်ႇပၢႆႊၵႂႃႇၼၼ်ႉတီႈၶုၼ်ႁေႃၶမ်းမိူင်းဢေႇၵႅပ်ႉတုလႄႈၸႃႉၸဵမ်ၸႂ်ၶုၼ်ႁေႃၶမ်းၽႃႇရေႃးတင်းၶႃႈမၼ်းၸိူဝ်းၼၼ်ႉပိၼ်ႈပိၼ်ႈႁၢႆႁၢႆတေႃႇၵူၼ်းၸိူဝ်းၼၼ်ႉသေလႄႈလၢတ်ႈဝႃႈ၊-ႁဵတ်းႁိုဝ်လႄႈႁဝ်းလႆႈႁဵတ်းၸိူဝ်ႉၼင်ႇၼႆလႄႈပွႆႇၵူၼ်းမဵဝ်းဢိသရေႇလဢွၵ်ႇသေၵႃႈၼႂ်းတၢင်းဢၼ်ႁဝ်းၸႂ်ႉၵိၼ်သွႆၵိၼ်ယူႇၼၼ်ႉလႄႈၵႂႃႇဝႃႈၼင်ႇၼႆဢေႃႈ။
၆ မိူဝ်ႈၼၼ်ႉၶုၼ်ႁေႃၶမ်းၽႃႇရေႃးမႄးႁၢင်ႈမႄးႁႅၼ်းလေႃႉရထႃးမၼ်းလႄႈႁွင်ႉဢဝ်ၵူၼ်းမၼ်းတင်းသဵင်ႈတင်းလူင်ဢေႃႈ။မၼ်းလိူၵ်ႈၵဵပ်းဢဝ်လေႃႉရထႃးႁူၵ်းပၢၵ်ႇဢိၵ်ႇတင်းလေႃႉရထႃးဢၼ်မီးၵႃႈၼႂ်းမိူင်းဢေႇၵႅပ်ႉတုတင်းသဵင်ႈတင်းလူင်ၼၼ်ႉသေလႄႈႁွင်ႉဢဝ်ၶုၼ်ပူဝ်ႇၶီႇၼိူဝ်လေႃႉရထႃးႁင်းၽႂ်ႁင်းမၼ်းဢေႃႈ။
၇ ထႃႇဝရႃႉၽြႃးႁႂ်ႈႁူဝ်ၸႂ်ၽႃႇရေႃး၊ၶုၼ်ႁေႃၶမ်းဢေႇၵႅပ်ႉတုၼၼ်ႉၵႅၼ်ႇၶႅင်လႄႈမၼ်းလိုပ်ႈၸွမ်းလမ်းၸွမ်းၵူၼ်းမဵဝ်းဢိသရေႇလၸိူဝ်းၼၼ်ႉဢေႃႈ။
၈ ၵူၺ်းၵႃႈၵူၼ်းမဵဝ်းဢိသရေႇလၸိူဝ်းၼၼ်ႉၸမ်းဢဝ်တင်းမိုဝ်းဢၼ်သုင်ၼႃႇသေလႄႈဢွၵ်ႇၵႂႃႇဢေႃႈ။
၉ ၼင်ႇၼၼ်လႄႈၵူၼ်းဢေႇၵႅပ်ႉတုတင်းသဵင်ႈတင်းလူင်ဢိၵ်ႇတင်းရထႃးၶုၼ်ႁေႃၶမ်းၽႃႇရေႃးၵူၼ်းသိုၵ်းၶီႇမႃႉမၼ်းပူဝ်ႇပႃႇမၼ်းၸိူဝ်းၼၼ်ႉဢွၼ်ၵၼ်လိုပ်ႈၸွမ်းလမ်းၸွမ်းလႄႈၶိုတ်းၶဝ်ဢၼ်ၶျႃးတပ်ႉယူႇၵႃႈတီႈႁိမ်းပၢင်ႇလၢႆႇႁိမ်းဝဵင်းပိႁႃႉႁိရုတ်ႉၵႃႈတီႈဝၼ်းဢွၵ်ႇပႃႇလႃႇၸေႇၽုၼ်ႇၼၼ်ႉဢေႃႈ။
၁၀ မိူဝ်ႈဢၼ်ၶုၼ်ႁေႃၶမ်းၽႃႇရေႃးသုတ်ႉၸမ်မႃးၼၼ်ႉၸိုင်ၵူၼ်းမဵဝ်းဢိသရေႇလၸိူဝ်းၼၼ်ႉမုင်ႈတူၺ်းလႄႈႁၼ်လွင်ႈဢၼ်ၵူၼ်းဢေႇၵႅပ်ႉတုတင်းလၢႆၶီႇတပ်ႉၶီႇသိုၵ်းမႃးယူႇၼၼ်ႉၸိုင်ၶဝ်ၵူဝ်ၼႃႇလူင်လၢင်လႄႈဢွၼ်ၵၼ်ႁွင်ႉသႅၼ်ႇတီႈထႃႇဝရႃႉၽြႃးဢေႃႈ။
၁၁ တီႈမုဝ်းသေႇၵေႃႈၶဝ်လၢတ်ႈလႄႈဝႃႈ၊-ၵွပ်ႈပိူဝ်ႈဢၼ်ၶုမ်ပႃႇႁဵဝ်ႈဢမ်ႇမီးၵႃႈၼႂ်းမိူင်းဢေႇၵႅပ်ႉတုၼၼ်ႉလႄႈမႂ်းၸင်ႇဢဝ်ႁဝ်းမႃးႁႂ်ႈႁဝ်းလႆႈတၢႆၵႃႈတီႈၼႂ်းထိူၼ်ႇၼႆႉႁိုဝ်။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းႁဵတ်းၸိူဝ်ႉၼင်ႇၼႆတီႈႁဝ်းလႄႈဢဝ်ႁဝ်းဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃး။
၁၂ ဢၼ်ၼႆႉယဝ်ႉပဵၼ်ဢၼ်ႁဝ်းလၢတ်ႈတီႈမႂ်းၵႃႈၼႂ်းမိူင်းဢေႇၵႅပ်ႉတုၼၼ်ႉဝႃႈ၊-ယႃႇႁဝ်းတႃႉ။ႁႂ်ႈႁဝ်းလႆႈၶၢမ်ႇႁဵတ်းၶႃႈယူႇတီႈၵူၼ်းဢေႇၵႅပ်ႉတုတင်းလၢႆၼႆႉတႃႉ၊ဝႃႈၼင်ႇၼႆယဝ်ႉဢမ်ႇၸႂ်ႈႁိုဝ်။တၢင်းဢၼ်ႁဝ်းၶၢမ်ႇႁဵတ်းၶႃႈတီႈၵူၼ်းဢေႇၵႅပ်ႉတုၸိူဝ်းၼၼ်ႉယိင်ႈၶႅၼ်းလီသေတၢင်းဢၼ်ႁဝ်းတၵ်းလႆႈတၢႆၵႃႈၼႂ်းထိူၼ်ႇၼႆႉဢေႃႈ၊ဝႃႈၼင်ႇၼႆဢေႃႈ။မုဝ်းသေႇၵေႃႈၶိုၼ်းလၢတ်ႈတီႈၵူၼ်းၸိူဝ်းၼၼ်ႉလႄႈဝႃႈ၊-ယႃႇပေမႆႈၸႂ်။ဢွၼ်ၵၼ်ၸုၵ်းယူႇၼိမ်ၼိမ်လႄႈတူၺ်းတၢင်းဢၼ်ၵႄႇၶျွတ်ႈဢၼ်ထႃႇဝရႃႉၽြႃးတၵ်းႁဵတ်းပုၼ်ႈသူဝၼ်းမိူဝ်ႈၼႆႉၼၼ်ႉတႃႉ။
၁၃ ၵူၼ်းဢေႇၵႅပ်ႉတုဢၼ်သူႁၼ်ဝၼ်းမိူဝ်ႈၼႆႉၸိူဝ်းၼၼ်ႉၵမ်းလိုၼ်းသူတၵ်းဢမ်ႇၶိုၼ်းလႆႈႁၼ်သေပွၵ်ႈ။
၁၄ ထႃႇဝရႃႉၽြႃးတၵ်းယူႇၽၢႆႇသူသေလႄႈတိုၵ်းသိုၵ်းဢေႃႈ။သူတၵ်းလႆႈဢွၼ်ၵၼ်ယူၼိမ်ၼိမ်လီလီဢေႃႈ၊ဝႃႈၼင်ႇၼႆဢေႃႈ။
၁၅ ထႃႇဝရႃႉၽြႃးၵေႃႈလၢတ်ႈတီႈမုဝ်းသေႇလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းႁွင်ႉသႅၼ်ႇတီႈၵဝ်။သင်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆႁႂ်ႈၶဝ်ၵႂႃႇၽၢႆႇၼႃႈတိၵ်းတိၵ်းတႃႉ။
၁၆ မႂ်းၸမ်းယုၵ်ႉၶွၼ်ႉတဝ်ႉမႂ်းသေလႄႈယိုၼ်းမိုဝ်းမႂ်းၶိုၼ်ႈၵႃႈၼိူဝ်ပၢင်ႇလၢႆႇလႄႈၽႃႇၼမ်ႉပၢင်ႇလၢႆႇတႃႉ။ၵူၼ်းမဵဝ်းဢိသရေႇလၸိူဝ်းၼႆႉတၵ်းလႆႈပႆၵႃႈၼိူဝ်လိၼ်ၵႂႃႇၵႃႈၼႂ်းပၢင်ႇလၢႆႇၼၼ်ႉဢေႃႈ။
၁၇ ၵဝ်ၵေႃႈတၵ်းႁႂ်ႈႁူဝ်ၸႂ်ၵူၼ်းဢေႇၵႅပ်ႉတုတင်းလၢႆၵႅၼ်ႇၶႅင်လႄႈၶဝ်တၵ်းဢွၼ်ၵၼ်ၶဝ်ႈၵႂႃႇၸွမ်းလင်ၶဝ်ဢေႃႈ။မုၼ်ၽုင်းၵဝ်တၵ်းပေႃႇဢွၵ်ႇမႃးၵွပ်ႈပိူဝ်ႈၶုၼ်ႁေႃၶမ်းၽႃႇရေႃးဢိၵ်ႇတင်းပူဝ်ႇပႃႇမၼ်းတင်းသဵင်ႈတင်းလူင်တင်းရထႃးမၼ်းတင်းၵူၼ်းသိုၵ်းၶီႇမႃႉၸိူဝ်းၼၼ်ႉဢေႃႈ။
၁၈ မိူဝ်ႈဢၼ်မုၼ်ၽုင်းၵဝ်ပေႃႇဢွၵ်ႇမႃးၵွပ်ႈပိူဝ်ႈၶုၼ်ႁေႃၶမ်းၽႃႇရေႃးဢိၵ်ႇတင်:ရထႃးမၼ်းတင်းၵူၼ်းသိုၵ်းၶီႇမႃႉမၼ်းၸိူဝ်ႉၼၼ်ႉၸိုင်ၵူၼ်းဢေႇၵႅပ်ႉတုတင်းလၢႆတၵ်းလႆႈႁူႉလွင်ႈဝႃႈၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၉ မိူဝ်ႈၼၼ်ႉတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈဢၼ်ၵႂႃႇဢွၼ်တၢင်တပ်ႉၵူၼ်းမဵဝ်းဢိသရေႇလၼၼ်ႉၶၢႆႉတီႈသေလႄႈၶိုၼ်းမႃးၸွမ်းၵႃႈတီႈၽၢႆႇလင်ၶဝ်လႄႈသဝ်မွၵ်ႇၵုမ်ႈၵေႃႈၶၢႆႉသေၵႃႈတီႈၽၢႆႇၼႃႈၶဝ်မႃးၸုၵ်းယူႇၵႃႈတီႈၽၢႆႇလင်ၶဝ်ဢေႃႈ။
၂၀ ႁွတ်ႈထိုင်ၵႃႈတီႈၵႄႈဝူင်ႈၵၢင်တပ်ႉၵူၼ်းဢေႇၵႅပ်ႉတုတင်းတပ်ႉၵူၼ်းမဵဝ်းဢိသရေႇလၸိူဝ်ႉၼင်ႇၼၼ်သေယဝ်ႉပဵၼ်မွၵ်ႇၵုမ်ႈဢၼ်လပ်းသိင်ႇတီႈၵူၼ်းဢေႇၵႅပ်ႉတုတင်းလၢႆလႄႈပၼ်ဢၼ်လႅင်းတီႈၵူၼ်းဢိသရေႇလတင်းလၢႆၶိင်ႇၵၢင်ၶိုၼ်းလႄႈ၊တင်းၶိုၼ်းတပ်ႉၼိုင်ႈလႄႈတပ်ႉၼိုင်ႈဢမ်ႇမႃးၵႆမႃးၸမ်ၵၼ်လႆႈ။
၂၁ မုဝ်းသေႇယိုၼ်းမိုဝ်းမၼ်းၶိုၼ်ႈၵႃႈၼိူဝ်ပၢင်ႇလၢႆႇလႄႈထႃႇဝရႃႉၽြႃးဢဝ်တင်းလူမ်းတၢင်းဢွၵ်ႇဢၼ်ႁႅင်းယႂ်ႇၼႃႇထူဝ်းထိပ်ႇၼမ်ႉပၢင်လၢႆႇတင်းၶိုၼ်းလႄႈႁႂ်ႈၼမ်ႉတႅၵ်ႇဢႃႈၽၢတ်ႇယၢၼ်ၵၼ်ၵႂႃႇလႄႈႁႂ်ႈလိၼ်ပေႃႇဢွၵ်ႇမႃးဢေႃႈ။
၂၂ ၵူၼ်းမဵဝ်းဢိသရေႇလၸိူဝ်းၼၼ်ႉဢွၼ်ၵၼ်ပႆၵႂႃႇၵႃႈၼိူဝ်လိၼ်ၶဝ်ႈၵႃႈၼႂ်းၵႄႈဝူင်ႈၵၢင်ၼမ်ႉပၢင်ႇလၢႆႇလႄႈၼမ်ႉၼၼ်ႉပဵၼ်ၸိူဝ်ႉၼင်ႇၽႃမၢၵ်ႇႁိၼ်ဝႆႉၵႃႈတီႈၽၢႆႇၶႂႃၶဝ်ၽၢႆႇသၢႆႉၶဝ်ဝႆႉဢေႃႈ။
၂၃ ၵူၼ်းဢေႇၵႅပ်ႉတုတင်းလၢႆဢိၵ်ႇတင်းမႃႉၶုၼ်ႁေႃၶမ်းၽႃႇရေႃး၊လေႃႉရထႃးမၼ်း၊ၵူၼ်းသိုၵ်းၶီႇမႃႉမၼ်းတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်လိုပ်ႈၸွမ်းလမ်းၸွမ်းလႄႈၶဝ်ႈၵႂႃႇၵႃႈၼႂ်းၵႄႈဝူင်ႈၵၢင်ၼမ်ႉပၢင်ႇလၢႆႇၸွမ်းလင်ၵူၼ်းဢိသရေႇလၶဝ်ၵႂႃႇဢေႃႈ။
၂၄ ၶိင်ႇႁူဝ်ၼႂ်ထႃႇဝရႃႉၽြႃးဢဝ်တင်းသဝ်ၽႆးမွၵ်ႇၵုမ်ႈၼၼ်ႉလူႈတူၺ်းတပ်ႉၵူၼ်းဢေႇၵႅပ်ႉတုတင်းလၢႆလႄႈယႃႉယူၵ်ႉၶဝ်ဢေႃႈ။
၂၅ မၼ်းၸဝ်ႈႁၵ်းမၢၵ်ႇလေႃႉရထႃးၶဝ်ပႅတ်ႈလႄႈႁႂ်ႈၶဝ်လႆႈႁေႃႈလေႃႉရထႃးၶဝ်ယၢပ်ႇၼႃႇထၢၼ်ႈပေႃးၵူၼ်းဢေႇၵႅပ်ႉတုၸိူဝ်းၼၼ်ႉလၢတ်ႈၵၼ်လႄႈဝႃႈ၊-ဢွၼ်ၵၼ်ဢွၵ်ႇပႆသေၵႃႈတီႈၵူၼ်းမဵဝ်းဢိသရေႇလၸိူဝ်းၼႆႉတႃႉႁဝ်း။ထႃႇဝရႃႉၽြႃးယူႇၽၢႆႇၶဝ်လႄႈတိုၵ်းတေႃးၵူၼ်းဢေႇၵႅပ်ႉတုတင်းလၢႆယဝ်ႉ၊ဝႃႈၼင်ႇၼႆဢေႃႈ။
၂၆ ထႃႇဝရႃႉၽြႃးၵေႃႈမီးဢမိင်ႉတီႈမုဝ်းသေႇလႄႈဝႃႈ၊-ယိုၼ်းမိုဝ်းမႂ်းၶိုၼ်ႈၵႃႈၼိူဝ်ပၢင်ႇလၢႆႇႁႂ်ႈၼမ်ႉပၢင်ႇလၢႆႇၶိုၼ်းလုပ်ႉမႃးၵႃႈၼိူဝ်ၵူၼ်းဢေႇၵႅပ်ႉတုတင်းလၢႆဢိၵ်ႇတင်းလေႃႉရထႃးၶဝ်တင်းၵူၼ်းသိုၵ်းၶီႇမႃႉၶဝ်ၸိူဝ်းၼၼ်ႉတႃႉ၊ဝႃႈၼင်ႇၼႆလႄႈ၊
၂၇ မုဝ်းသေႇၵေႃႈယိုၼ်းမိုဝ်းမၼ်းၶိုၼ်ႈၵႃႈၼိူဝ်ပၢင်ႇလၢႆႇလႄႈမိူဝ်ႈဢၼ်မိူင်းလႅင်းမႃးၼၼ်ႉၸိုင်ၼမ်ႉပၢင်ႇလၢႆႇၶိုၼ်ႈမႃးမိူၼ်ၸိူဝ်ႉၼင်ႇပၵ်းၵဝ်ပိူင်ၵဝ်လႄႈပိၵ်ႉသမ်ႉၵူၼ်းဢေႇၵႅပ်ႉတုၸိူဝ်းၼၼ်ႉဢွၼ်ၵၼ်လႅၼ်ႈပၢႆႊသေၵေႃႈထႃႇဝရႃႉၽြႃးဢဝ်ၶဝ်လူမ်ႉပႅတ်ႈၵႃႈၼႂ်းၶိုင်ႈၵၢင်ပၢင်ႇလၢႆႇဢေႃႈ။
၂၈ ၼင်ႇၼၼ်လႄႈၼမ်ႉပၢင်ႇလၢႆႇၶိုၼ်ႈမႃးလႄႈထုမ်ႈလေႃႉရထႃးဢိၵ်ႇတင်းၵူၼ်းသိုၵ်းၶီႇမႃႉပူဝ်ႇပႃႇၶုၼ်ႁေႃၶမ်းၽႃႇရေႃးဢၼ်ၶဝ်ႈၵႃႈၼႂ်းပၢင်ႇလၢႆႇၸွမ်းလင်ၶဝ်ၼၼ်ႉတင်းသဵင်ႈတင်းလူင်တေႃႇႁွတ်ႈဢမ်ႇလႆႈၵိုတ်းလႆႈၵျၢၼ်ႇဝႆႉသေၵေႃႉသေၵူၼ်း။
၂၉ ၵူၼ်းမဵဝ်းဢိသရေႇလၸိူဝ်းၼၼ်ႉၸမ်းဢွၼ်ၵၼ်ပႆၵႂႃႇၵႃႈၼိူဝ်လိၼ်ၵႃႈၼႂ်းၵႄႈဝူင်ႈၵၢင်ၼမ်ႉပၢင်ႇလၢႆႇၼၼ်ႉလႄႈၼမ်ႉၼၼ်ႉပဵၼ်ၸိူဝ်ႉၼင်ႇၽႃမၢၵ်ႇႁိၼ်ဝႆႉၵႃႈတီႈၽၢႆႇၶႂႃၶဝ်၊ၵႃႈတီႈၽၢႆႇသၢႆႉၶဝ်ယူႇဢေႃႈ။
၃၀ ၼင်ႇၼၼ်လႄႈထႃႇဝရႃႉၽြႃးၵႄႇသေႇၶျွတ်ႈဢဝ်ၵူၼ်းမဵဝ်းဢိသရေႇလလွတ်ႈဢွၵ်ႇသေၵႃႈၼႂ်းမိုဝ်းၵူၼ်းဢေႇၵႅပ်ႉတုတင်းလၢႆၼႂ်းဝၼ်းၼၼ်ႉလႄႈၵူၼ်းမဵဝ်းဢိသရေႇလၸိူဝ်းၼၼ်ႉလႆႈႁၼ်တူဝ်တၢႆၵူၼ်းဢေႇၵႅပ်ႉတုတင်းလၢႆၵႃႈတီႈႁိမ်းၽင်ႇပၢင်ႇလၢႆႇၼၼ်ႉဢေႃႈ။
၃၁ ၵူၼ်းမဵဝ်းဢိသရေႇလၸိူဝ်းၼၼ်ႉႁၼ်ဢမူႉလူင်ဢၼ်ထႃႇဝရႃႉၽြႃးႁဵတ်းတီႈၵူၼ်းဢေႇၵႅပ်ႉတုတင်းလၢႆၸိူဝ်ႉၼင်ႇၼၼ်ၼၼ်ႉလႄႈဢွၼ်ၵၼ်ၵူဝ်ႁႄထႃႇဝရႃႉၽြႃးဢေႃႈ။ၶဝ်ယုမ်ႇမၢတ်ႈထႃႇဝရႃႉၽြႃးဢိၵ်ႇတင်းမုဝ်းသေႇဢၼ်ပဵၼ်ၶႃႈမၼ်းၸဝ်ႈၼၼ်ႉဢေႃႈ။