Chapter
၁၈
ယေႇသရေႃႇမႃးၸႂ်းမုဝ်းသေႇ
၁ မိူဝ်ႈဢၼ်ယေႇသရေႃႇဢၼ်ပဵၼ်ယိတ်ႉပရေႃးႁိၵ်ႈမိူင်းမိတျၢၼ်ႇဢၼ်ပဵၼ်ပူႇၼၢႆးမုဝ်းသေႇၼၼ်ႉလႆႈငိၼ်းၵႃႈဢၼ်ၽြႃးပဵၼ်ၸဝ်ႈႁဵတ်းပုၼ်ႈၸႃႉၸဵမ်မုဝ်းသေႇတင်းၵူၼ်းမၼ်းၸဝ်ႈၵူၼ်းမဵဝ်းဢိသရေႇလၸိူဝ်းၼၼ်ႉဢိၵ်ႇတင်းလွင်ႈဢၼ်ထႃႇဝရႃႉၽြႃးၼုၵ်ႈဢဝ်
၂ ၵူၼ်းမဵဝ်းဢိသရေႇလၸိူဝ်းၼၼ်ႉဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉၸိုင်ယေႇသရေႃႇႁွင်ႉဢဝ်ၸိပေႃႇရဢၼ်ပဵၼ်မေးမုဝ်းသေႇဢိၵ်ႇတင်းလုၵ်ႈၸၢႆးသွင်ၵေႃႉဢၼ်မုဝ်းသေႇဝႆႉၵိုတ်းၵႃႈတီႈမၼ်းၼၼ်ႉလႄႈၵႂႃႇဢေႃႈ။
၃ လုၵ်ႈၸၢႆးၵေႃႉၼိုင်ႈၸမ်းလႆႈၸိုဝ်ၵေႇရသုၼ်ႇဢေႃႈ။လွင်ႈမၼ်းၸမ်းမၼ်းဝႃႈ၊-ၵဝ်လႆႈပဵၼ်ၶႅၵ်ႇဢႃႇၵၼ်ႇတူႉတၢင်ႇတီႈတၢင်ႇမိူင်းယဝ်ႉ၊ဝႃႈၼင်ႇၼႆဢေႃႈ။
၄ လုၵ်ႈၸၢႆးၵေႃႉၼိုင်ႈၸမ်းလႆႈၸိုဝ်ႈဢေႇလျႃႇၸႃႇဢေႃႈ။လွင်ႈမၼ်းၸမ်းမၼ်းဝႃႈ၊-ၽြႃးပဵၼ်ၸဝ်ႈပူႇမွၼ်ႇၵဝ်ၸွႆႈထႅမ်ၵဝ်လႄႈပွႆႇၵဝ်လွတ်ႈသေၵႃႈၼႂ်းၽေးလၢပ်ႇၶုၼ်ႁေႃၶမ်းၽႃႇရေႃးယဝ်ႉ၊ဝႃႈၼင်ႇၼႆဢေႃႈ။
၅ ယေႇသရေႃႇပူႇၼၢႆးမုဝ်းသေႇၼၼ်ႉဢဝ်မေးမၼ်းဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉမႃးႁွတ်ႈထိုင်ၵႃႈတီႈထိူၼ်ႇတီႈဢၼ်မုဝ်းသေႇၶျႃးတပ်ႉယူႇၵႃႈတီႈႁိမ်းလွႆၽြႃးပဵၼ်ၸဝ်ႈၼၼ်ႉသေယဝ်ႉ၊မွၵ်ႇလၢတ်ႈတီႈမုဝ်းသေႇလႄႈဝႃႈ၊-
၆ ၵဝ်ၶႃႈယေႇသရေႃႇ၊ဢၼ်ပဵၼ်ပူႇၼၢႆးၸဝ်ႈႁဝ်း၊ဢိၵ်ႇတင်းမေးၸဝ်ႈႁဝ်းတင်းလုၵ်ႈၸၢႆးၸဝ်ႈႁဝ်းသွင်ၵေႃႉမႃးႁွတ်ႈထိုင်ၵႃႈတီႈၸဝ်ႈႁဝ်းၼႆႉယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊
၇ မုဝ်းသေႇဢွၵ်ၵႂႃႇႁႂ်ႈလႆႈႁပ်ႉႁူဝ်တၢင်းပူႇၼၢႆးမၼ်းသေလႄႈၵူမ်ႈၵွမ်းႁူဝ်လႄႈၸုပ်ႇၼူမ်ႈသေယဝ်ႉၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်လွင်ႈဢၼ်ယူႇလီၵိၼ်ဝၢၼ်တီႈၵၼ်လႄႈဢွၼ်ၵၼ်ၶဝ်ႈၵႃႈၼႂ်းသုမ်ႉထဵင်ဢေႃႈ။
၈ မုဝ်းသေႇမွၵ်ႇလၢတ်ႈၵႃႈဢၼ်ထႃႇဝရႃႉၽြႃးႁဵတ်းတီႈၶုၼ်ႁေႃၶမ်းၽႃႇရေႃးတင်းၵူၼ်းမဵဝ်းဢေႇၵႅပ်ႉတုၶဝ်ၵွပ်ႈပိူဝ်ႈၵူၼ်းမဵဝ်းဢိသရေႇလတင်းလၢႆဢိၵ်ႇတင်းတုၵ်ႉၶႃႉတၢင်းၽၢၼ်ၵႃႈဢၼ်ႁွတ်ႈထိုင်ၵႃႈၼိူဝ်ၶဝ်ၵႃႈတႃႈၵႃႈတၢင်းဢိၵ်ႇတင်းလွင်ႈဢၼ်ထႃႇဝရႃႉၽြႃးၵႄႇသေႇၶျွတ်ႈဢဝ်ၶဝ်ၼၼ်ႉၵႃႈတီႈပူႇၼၢႆးမၼ်းဢေႃႈ။
၉ ယေႇသရေႃႇၸူမ်းသိူဝ်းၵွပ်ႈပိူဝ်ႈၵျေးၸူးဢၼ်ထႃႇဝရႃႉၽြႃးႁဵတ်းတီႈၵူၼ်းမဵဝ်းဢိသရေႇလဢၼ်မၼ်းၸဝ်ႈၵႄႇသေႇၶျွတ်ႈဢဝ်ႁႂ်ႈလွတ်ႈသေၵႃႈၼႂ်းမိူင်းဢေႇၵႅပ်ႉတုၸိူဝ်းၼၼ်ႉလႄႈလၢတ်ႈဝႃႈ၊-
၁၀ ႁႂ်ႈထႃႇဝရႃႉၽြႃးဢၼ်ၵႄႇသေႇၶျွတ်ႈဢဝ်သူလွတ်ႈသေၵႃႈၼႂ်းမိုဝ်းၶုၼ်ႁေႃၶမ်းၽႃႇရေႃးတင်းၵူၼ်းမဵဝ်းဢေႇၵႅပ်ႉတုၶဝ်ဢၼ်ၵႄႇသေႇၶျွတ်ႈဢဝ်ၵူၼ်းတင်းလၢႆလွတ်ႈသေၵႃႈၼႂ်းမိုဝ်းၵူၼ်းဢေႇၵႅပ်ႉတုၸိူဝ်းၼၼ်ႉၼၼ်ႉမီးမင်ႇၵလႃႇသေၵမ်းလူၺ်ႈ။
၁၁ တေႃႈလဵဝ်ၼႆႉၵဝ်ႁူႉလွင်ႈဢၼ်ထႃႇဝရႃႉၽြႃးယိင်ႈၶႅၼ်းမျၢတ်ႈၼႃႇသေၽြႃးတၢင်ႇသူႇတၢင်ႇပႃးၵႃႈမီးတင်းသဵင်ႈတင်းလူင်ၼၼ်ႉယဝ်ႉ။လွင်ႈမၼ်းၸမ်းမၼ်းၸဝ်ႈႁဵတ်းၸိူဝ်ႉၼင်ႇၼႆၵွပ်ႈပိူဝ်ႈၶဝ်ပႃးတင်းၸႂ်မႃႇၼႃႉၽႅၼ်သုင်သေလႄႈႁဵတ်းတီႈၵူၼ်းမဵဝ်းဢိသရေႇလၸိူဝ်းၼၼ်ႉယဝ်ႉ၊ဝႃႈၼင်ႇၼႆသေယဝ်ႉ
၁၂ ယေႇသရေႃႇဢဝ်ယိၸ်ႉဢၼ်တုတ်ႇၽႆးဢိၵ်ႇတင်းယိၸ်ႉဢၼ်တေပုၵ်ႉၸေႃႇၽြႃးပဵၼ်ၸဝ်ႈၼမ်ၼႃႇမႃးလႄႈဢႃႇရုၼ်ႇဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢိသရေႇလၸိူဝ်းၼၼ်ႉတင်းသဵင်ႈတင်းလူင်ၵေႃႈဢွၼ်ၵၼ်မႃးႁႂ်ႈလႆႈၵိၼ်ၶဝ်ႈမုၼ်းလူၺ်ႈၵၼ်တင်းပူႇၼၢႆးမုဝ်းသေႇၼၼ်ႉၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။
၁၃ ၼႂ်းဝၼ်းမိူဝ်ႈၽုၵ်ႈမုဝ်းသေႇၼင်ႈယူႇႁႂ်ႈလႆႈၸီႇယၢင်ႇတြႃးတီႈၵူၼ်းတင်းလၢႆဢေႃႈ။ၵူၼ်းတင်းလၢႆၵေႃႈဢွၼ်ၵၼ်ၸုၵ်းယူႇၵႃႈတီႈႁိမ်းမုဝ်းသေႇၸႃႉၸဵမ်ၶိင်ႇၵၢင်ၼႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။
၁၄ မိူဝ်ႈဢၼ်ပူႇၼၢႆးမုဝ်းသေႇႁၼ်လွင်ႈၵႃႈဢၼ်မုဝ်းသေႇႁဵတ်းတီႈၵူၼ်းၸိူဝ်းၼၼ်ႉၸိုင်မၼ်းလၢတ်ႈဝႃႈ၊-လွင်ႈတၢင်းဢၼ်မႂ်းႁဵတ်းတီႈၵူၼ်းတင်းလၢႆၼႆႉပဵၼ်ၸိူဝ်ႉၼင်ႇႁိုဝ်။ႁဵတ်းသင်လႄႈမႂ်းၵေႃႉလဵဝ်ၵူၺ်းၼင်ႈယူႇလႄႈၵူၼ်းတင်းသဵင်ႈတင်းလူင်လႆႈယူႇၵႃႈတီႈႁိမ်းမႂ်းၸႃႉၸဵမ်မိူဝ်ႈၶိင်ႇၵၢင်ၼႂ်တေႃႇထိုင်ႁွတ်ႈၶိင်ႇႁူဝ်ၶမ်ႈၼၼ်ႉၼင်ႇႁိုဝ်၊ဝႃႈၼင်ႇၼႆဢေႃႈ။
၁၅ မုဝ်းသေႇၵေႃႈလၢတ်ႈတီႈပူႇၼၢႆးမၼ်းလႄႈဝႃႈ၊-ၵွပ်ႈပိူဝ်ႈဢၼ်ၵူၼ်းတင်းလၢႆၶႂ်ႈၶၢမ်ႇဢယူႇတီႈၽြႃးပဵၼ်ၸဝ်ႈလႄႈမႃးထၢမ်တီႈၵဝ်ၶႃႈလႄႈၸင်ႇပဵၼ်ၸိူဝ်ႉၼင်ႇၼႆဢေႃႈ။
၁၆ ပေႃးၶဝ်မီးဢမူႉၸိုင်ၶဝ်မႃးၵႃႈတီႈၵဝ်ၶႃႈလႄႈၵဝ်ၶႃႈလႆႈၸီႇယၢင်ႇတႅပ်းတတ်းတြႃးၵႄႈဝူင်ႈၵၢင်ၵေႃႉၼိုင်ႈလႄႈၵေႃႉၼိုင်ႈဢေႃႈ။ၵဝ်ၶႃႈလႆႈသွၼ်ပၼ်ထုင်းၾိင်ႈတြႃးၽြႃးပဵၼ်ၸဝ်ႈဢိၵ်ႇတင်းပိင်းၺၢပ်ႈတြႃးမၼ်းၸဝ်ႈၸိူဝ်းၼၼ်ႉတီႈၶဝ်ဢေႃႈ၊မိူဝ်ႈဢဝ်ဝႃႈၼင်ႇၼႆၸိုင်
၁၇ ပူႇၼၢႆးမုဝ်းသေႇၼၼ်ႉလၢတ်ႈတီႈမၼ်းလႄႈဝႃႈ၊-လွင်ႈတၢင်းဢၼ်မႂ်းႁဵတ်းၼႆႉပဵၼ်ဢၼ်ဢမ်ႇထုၵ်ႇဢမ်ႇလီဢေႃႈ။
၁၈ ၸႃႉၸဵမ်မႂ်းလႄႈၵူၼ်းဢၼ်ပႃးလူၺ်ႈၵၼ်တင်းမႂ်းၸိူဝ်းၼႆႉႁႅင်းတၵ်းဢူၼ်ႈၵႂႃႇဢမၢၼ်ႇၶၢၼ်ပဵၼ်ဢေႃႈ။လွင်ႈတၢင်းၼႆႉၼၵ်းၼႃႇတီႈမႂ်းဢေႃႈ။ပဵၼ်လွင်ႈတၢင်းဢၼ်မႂ်းၵေႃႉလဵဝ်ၵူၺ်းတတ်ႈၼိုင်ႇလႆႈဢမ်ႇၸႂ်ႈ။
၁၉ ထွမ်ႇဢဝ်ၵႂၢမ်းၵဝ်တႃႉ။ၵဝ်တၵ်းပၼ်တၢင်းၵျၢမ်ႇတၢင်းပွင်ဢေႃႈ။ၽြႃးပဵၼ်ၸဝ်ႈၵေႃႈတၵ်းမီးယူႇလူၺ်ႈၵၼ်တင်းမႂ်းဢေႃႈ။မႂ်းတၵ်းလႆႈပၼ်ၵေႃႉဢၼ်ဢွၼ်ႁူဝ်ၵူၼ်းတင်းလၢႆတီႈၽြႃးပဵၼ်ၸဝ်ႈလႄႈဢဝ်ဢမူႉၶဝ်ၶဝ်ႈၸူးလဝ်ႈလၢတ်ႈတီႈၽြႃးပဵၼ်ၸဝ်ႈဢေႃႈ။
၂၀ မႂ်းတၵ်းလႆႈသင်ႇသွၼ်ပၼ်ထုင်းၾိင်ႈတြႃးၸဝ်ႈဢိၵ်ႇတင်းပိင်းၺၢပ်ႈတြႃးၸဝ်ႈတင်းလၢႆတီႈၶဝ်လႄႈၼႄပျႃးသဵၼ်ႈတၢင်းဢၼ်ၶဝ်တၵ်းလႆႈၵႂႃႇဢိၵ်ႇတင်းလွင်ႈဢၼ်ၶဝ်တၵ်းလႆႈႁဵတ်းၼၼ်ႉတီႈၶဝ်ဢေႃႈ။
၂၁ လိူဝ်သေၼၼ်ႉမႂ်းတၵ်းလႆႈလိူၵ်ႈၵဵပ်းဢဝ်ၶဝ်ၸိူဝ်းဢၼ်ႁဵတ်းလႆႈပဵၼ်လႆႈၵူဝ်ယမ်ၽြႃးပဵၼ်ၸဝ်ႈတဵမ်ဝႆႉတင်းသႅတ်ႈၸႃႇလီႁင်ႈလေႃးၽႃႉၸိူဝ်းၼၼ်ႉၵႃႈၼႂ်းၵူၼ်းတင်းသဵင်ႈတင်းလူင်ၼၼ်ႉလႄႈၶၢၼ်းၶဝ်ဝႆႉၼႂ်းဢရႃႇၵူၼ်းဢၼ်ဢုပ်ႉၵႃႈၼိူဝ်ၵူၼ်းယေႈႁဵင်ၵူၼ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇ၊ၵူၼ်းဢၼ်ဢုပ်ႉၵႃႈၼိူဝ်ၵူၼ်းႁႃႇသိပ်း၊ၵူၼ်းဢၼ်ဢုပ်ႉၵႃႈၼိူဝ်ၵူၼ်းယသေိပ်းတႃႉ။
၂၂ ႁႂ်ႈၶဝ်ၸီႇယၢင်ႇတြႃးတီႈၵူၼ်းတင်းလၢႆၵူႈၶိင်ႇၵူႈၶႃႇတႃႉ။ၵႃႈပဵၼ်ဢမူႉဢၼ်ယႂ်ႇဢၼ်လူင်ၼၼ်ႉၸိုင်ႁႂ်ႈၶဝ်ဢဝ်မႃးၸူးတီႈမႂ်းတႃႉ။ၵႃႈပဵၼ်ဢမူႉဢၼ်လဵၵ်ႉဢၼ်ၼွႆႉၼၼ်ႉၸိုင်ႁႂ်ႈၶဝ်ၸီႇယၢင်ႇႁင်းၶဝ်တႃႉ။ပေႃးႁဵတ်းၼႆၸိုင်မႂ်းတၵ်းသၢၵ်ႈသႃႇလႄႈၶဝ်ၵေႃႈတၵ်းၽွမ်ႉၵၼ်ၸွႆႈထႅမ်ႁၢပ်ႇဢမူႉလူၺ်ႈၵၼ်တင်းမႂ်းဢေႃႈ။
၂၃ ပေႃးမႂ်းႁဵတ်းၸိူဝ်ႉၼင်ႇၼၼ်လႄႈၽြႃးပဵၼ်ၸဝ်ႈပၼ်ဢၶႂၢင်ႉၸိုင်မႂ်းတၵ်းမၼ်ႈၶိူင်ႇဢေႃႈ။ၵူၼ်းတင်းသဵင်ႈတင်းလူင်ၸိူဝ်းၼႆႉၵေႃႈတၵ်းလႆႈၵႂႃႇၼိမ်ၼိမ်လီလီၸူးၵႃႈတီႈမိူင်းဢၼ်ၶဝ်တၵ်းလႆႈယူႇၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၄ မုဝ်းသေႇၵေႃႈထွမ်ႇဢဝ်ၵႂၢမ်းပူႇၼၢႆးမၼ်းလႄႈႁဵတ်းၸွမ်းၵႃႈၼင်ႇဢၼ်ၵႂၢမ်းမၼ်းမီးၼၼ်ႉဢေႃႈ။
၂၅ မုဝ်းသေႇလိူၵ်ႈၵဵပ်းဢဝ်ၶဝ်ၸိူဝ်းဢၼ်ႁဵတ်းလႆႈပဵၼ်လႆႈၼၼ်ႉၵႃႈၼႂ်းၵူၼ်းမဵဝ်းဢိသရေႇလၸိူဝ်းၼၼ်ႉသေယဝ်ႉၶၢၼ်းဝႆႉၼႂ်းဢရႃႇၵူၼ်းဢၼ်ဢုပ်ႉၵႃႈၼိူဝ်ၵူၼ်းယေႈႁဵင်၊ၵူၼ်ႈဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇ၊ၵူၼ်းဢၼ်ဢုပ်ႉၵႃႈၼိူဝ်ၵူၼ်းႁႃႈသိပ်း၊ၵူၼ်းဢၼ်ဢုပ်ႉၵႃႈၼိူဝ်ၵူၼ်းယသေိပ်းဢေႃႈ။
၂၆ ၶဝ်ၼၼ်ႉလႆႈဢွၼ်ၵၼ်ၸီႇယၢင်ႇတြႃးတီႈၵူၼ်းတင်းလၢႆၵူႈၶိင်ႇၵူႈၶႃႇဢေႃႈ။ၵႃႈပဵၼ်ဢမူႉဢၼ်ယၢပ်ႇဢၼ်ၽိုတ်ႇၼႃႇၼၼ်ႉၸိုင်ၶဝ်ဢဝ်မႃးၸူးတီႈမုဝ်းသေႇဢေႃႈ။ၵႃႈပဵၼ်ဢမူႉဢၼ်လဵၵ်ႉဢၼ်ၼွႆႉၼၼ်ႉၸိုင်ၶဝ်ၸီႇယၢင်ႇႁင်းၽႂ်ႁင်းမၼ်းဢေႃႈ။
၂၇ လိုၼ်းၼၼ်ႉမုဝ်းသေႇပၼ်ဢၶႂၢင်ႉပူႇၼၢႆးမၼ်းႁႂ်ႈလႆႈၶိုၼ်းမိူဝ်းၵႂႃႇၸူးတီႈယူႇမၼ်းၼၼ်ႉသေဢေႃႈ။